1, 2. Xú káʼnii embáyulú Romanos 5:12 rá.

 ROMANOS 5:12 naʼthí: “Ga̱jma̱a̱ numuu mbáwíi xa̱bu̱ nito̱ʼo̱o̱ aʼkhá náa numbaaʼ. Ma̱ngaa rí nakháñulú nito̱ʼo̱o̱ ga̱jma̱a̱ numuu aʼkhá, rí nakháñulú nigadráʼa náa xúgínʼ xa̱bu̱ numuu rí xúgínʼ xa̱bu̱ nixuda̱mi̱jna̱ aʼkhá”. Nuniʼnúuʼ májánʼ versículo rígi̱ numuu rí najmulú má xúʼko̱ índo̱ nuʼsngúún xa̱bu̱ rí naʼthí náa Biblia.

² Versículo rígi̱ najmaa mbaʼa nuthu náa libro Ndiéjunʼ phú eʼsngáa náa Biblia rá. Índo̱ nuʼnigajmaa capítulo 3, 5 ga̱jma̱a̱ 6 gajmiúlú e̱jñu̱lú ga̱jma̱a̱ eʼwíínʼ xa̱bu̱, mbáa nuraxnuu Romanos 5:12. Najmulú mu mumbáñuun makru̱ʼu̱u̱n náa numuu rí Ku̱ba̱ʼ na̱nguá nindxu̱u̱ mitsaan, náa numuu ndayúlú rí miʼtsiwáanʼ ga̱jma̱a̱ náa numuu rí nakháñulú. Mú náa versículo rígi̱ ma̱ngaa ma̱ndoo mambáyulúʼ xúgiáanʼ mu mbuʼyáá rí gíʼdoo wéñuʼ numuu mambáxulu gajmiúlú Jeobá. Ma̱ngaa ma̱ndoo mambáyulúʼ rí muʼnimbulúʼ má xúʼko̱ rí naʼthí ga̱jma̱a̱ muguaʼthi̱i̱n mambanúu xúgíʼ rí niʼthí maʼni.

3. Ndiéjunʼ rí gíʼmaa marmáʼáan a̱jkiu̱lú xúgiáanʼ rá.

 ³ Xúgiáanʼ gíʼmáanʼ marmáʼáan a̱jkiu̱lú rí ni̱ndxu̱lú xa̱bu̱ aʼkhá ga̱jma̱a̱ rí nakiéʼkulu xúgíʼ mbiʼi. Jeobá ndaʼyoo rí ni̱ndxu̱lú xa̱bu̱ aʼkhá, mú naʼngo̱o̱ ga̱jma̱a̱ nandoo maʼni mba̱a̱ a̱jkiu̱u̱n kaʼyulú (Sal. 103:13, 14). Jesús niʼsngúlúʼ rí gíʼmaa munda̱ʼa̱a̱ Dios rí maʼni mba̱a̱ a̱jkiu̱u̱n kaʼyulú (Luc. 11:2-4). Á mu Jeobá niʼni mba̱a̱ a̱jkiu̱u̱n kaʼyoo aʼkhá rí ni̱ʼni̱ nákha wajyúúʼ, nánguá gíʼmaa mundxaʼwamíjna̱ ga̱jma̱a̱ numuu rúʼko̱. Náa numuu rí ma̱ndoo maʼni mba̱a̱ a̱jkiu̱u̱n kaʼyulú Jeobá rá. Guʼyáá rí gáxti̱ʼña̱a̱.

4, 5. a) Ndiéjunʼ embáyulú makru̱ʼu̱lú náa numuu rí Jeobá ma̱ndoo maʼni mba̱a̱ a̱jkiu̱u̱n kaʼyulú rá. b) Ndiéjunʼ nindxu̱u̱ “rí májánʼ wéñuʼ a̱jkiu̱u̱n” xá.

⁴ Mbá rí ma̱ndoo mambáyulúʼ makru̱ʼu̱lú náa numuu rí Jeobá ma̱ndoo maʼni mba̱a̱ a̱jkiu̱u̱n kaʼyulú na̱ʼkha̱ náa Romanos, itháan náa capítulo 6. Náa Romanos 3:23, 24, apóstol Pablo niʼthí rí xúgiáanʼ ni̱ndxu̱lú xa̱bu̱ aʼkhá ga̱jma̱a̱ nda̱wa̱á niʼthí: “Nindxu̱u̱ xóo mbá rí nimináanʼ numuu rí májánʼ a̱jkiu̱u̱n ikha jngó naʼni rí manindxu̱lúʼ xa̱bu̱ jmbii índo̱ rí niʼtsiwáanʼ Cristo Jesús mu maʼni káwáanʼ”. Índo̱ nuʼthá rí “májánʼ wéñuʼ a̱jkiu̱u̱n” Dios, Pablo nindoo gáʼthi rí Dios niʼni mbá rí májánʼ wéñuʼ ga̱jma̱a̱ numulúʼ rí asndu tágiʼthu̱u̱n madaaʼ, mbá rí rakáʼyulú.

⁵ Mbáa xa̱bu̱ bi̱ najmañuu niʼthí rí májánʼ wéñuʼ a̱jkiu̱u̱n Dios mbaʼa nuthu nandoo gáʼthúu̱n rí Dios o Cristo nini mu muni káwíin xa̱bu̱ náa aʼkhá ga̱jma̱a̱ rí nakháñun. Ikha jngó, náa Traducción del Nuevo Mundo naʼthí rí “májánʼ wéñuʼ a̱jkiu̱u̱n”. Guʼyáá ndiéjunʼ niʼni Dios ga̱jma̱a̱ numulúʼ ga̱jma̱a̱ xú káʼnii rí májánʼ a̱jkiu̱u̱n nambáyulúʼ rí mbiʼi xúgi̱ ga̱jma̱a̱ naʼthúlúʼ muguaʼthi̱i̱n mbá rí májánʼ nda̱wa̱á.

6. Tsíin ma̱ndoo mambáñun rí májánʼ a̱jkiu̱u̱n Dios ga̱jma̱a̱ ndiéjunʼ gakánuun xá.

⁶ Ga̱jma̱a̱ numuu aʼkhá rí niʼni Adán xúgínʼ xa̱bu̱ guáʼdáá aʼkhá ga̱jma̱a̱ nakháñun. Ikha jngó náa Biblia naʼthí rí xa̱bu̱ nakháñun náa numbaaʼ numuu rí táʼnimbo̱o̱ “mbáwíi xa̱bu̱”, Adán. Mú Jeobá nisngájma rí májánʼ wéñuʼ a̱jkiu̱u̱n ga̱jma̱a̱ niríyaʼ awan mu maʼtsiwíin xa̱bu̱ numbaaʼ ga̱jma̱a̱ numuu ‹mbáwíi xa̱bu̱, Jesucristo› (Rom. 5:12, 15, 17). Ikha jngó xúgiáanʼ ma̱ndoo mambáyulúʼ rí májánʼ wéñuʼ a̱jkiu̱u̱n Dios. Numuu rí Jesucristo niʼnimbo̱o̱, mbaʼin mani̱ndxu̱ún jmbiin ga̱jma̱a̱ ma̱ndoo makuwá kámuu (Rom. 5:19, 21).

7. Náa numuu rí nijuiʼtsiwáanʼ nindxu̱u̱ mbá regalo dí rakáʼyulú ga̱jma̱a̱ nasngájma rí Dios májánʼ wéñuʼ a̱jkiu̱u̱n rá.

⁷ Rí nijuiʼtsiwáanʼ nindxu̱u̱ mbá regalo dí rakáʼyulú ga̱jma̱a̱ nasngájma rí májánʼ wéñuʼ a̱jkiu̱u̱n Dios. Gundxa̱ʼwámi̱jna̱ rígi̱: Jeobá ninindxu̱u̱ májánʼ wéñuʼ a̱jkiu̱u̱n rí asndu nixnáa mbáa mu maʼni káwáanʼ náa aʼkhá ga̱jma̱a̱ rí nakháñulú. Mú ikhaa na̱nguá kaʼyoo maxnáa A̱ʼdióo xóo mbáa bi̱ maʼni káwáanʼ. Ma̱ngaa, nimbáa rí ikháanʼ kaʼyoo rí Jeobá ga̱jma̱a̱ Jesús nini mu  ma̱ndoo muni mba̱a̱ a̱jkiu̱ún kuyulúʼ ga̱jma̱a̱ makuwáanʼ kámuu mbiʼi. Rí xóo kuwáanʼ ma̱ndoo musngajmáá Dios rí nuxnáa wéñuʼ núma̱aʼ.

8. Ndiéjunʼ rí gíʼmáanʼ muʼni gaʼduunʼ rá.

⁸ Nduʼyáá rí Dios nandoo maʼni mba̱a̱ a̱jkiu̱u̱n kaʼyoo aʼkhá ndrígúlú, asndu rí itháan mitsáʼkhúun. Mú rígá mbá rí gíʼmáanʼ muʼni gaʼduunʼ. Nimbá miʼtsú xundxa̱ʼwa̱míjna̱ rí ma̱ndoo muʼni mbá dí ra̱májánʼ numuu rí Jeobá májánʼ wéñuʼ a̱jkiu̱u̱n, ga̱jma̱a̱ nda̱a̱ rí gárígá numuu rí ikhaa maʼni mba̱a̱ a̱jkiu̱u̱n kaʼyulú. Tikhun cristianos bi̱ nikuwa nákha siglo timbá nini xúʼko̱ kaʼnii maski ajndu tikhun apóstoles xóó kuwa (atraxnuu Judas 4). * Rí mbiʼi xúgi̱ mangáanʼ gíʼmáanʼ muñeumíjna̱ ga̱jma̱a̱ xúniʼñáʼ rí eʼwíínʼ xa̱bu̱ mañúú mañúú gúniulú mundxaʼwamíjna̱ xúʼko̱ kaʼnii.

9, 10. Náa numuu niʼthí Pablo rí ikhaa ga̱jma̱a̱ eʼwíínʼ cristianos nikháñun “ga̱jma̱a̱ numuu aʼkhá” rá.

⁹ Pablo niʼthún cristianos dí ra̱májánʼ mundxaʼwami̱jna̱ rí Dios maʼni mba̱a̱ a̱jkiu̱u̱n kaʼñún guni rí guni. Niʼthún rí gíʼmaa muni gaʼduunʼ ku̱ma̱ rígi̱ numuu rí nikháñun “ga̱jma̱a̱ numuu aʼkhá” (atraxnuu Romanos 6:1, 2). * Ndiéjunʼ nindoo gáʼthúu̱n rá.

¹⁰ Ga̱jma̱a̱ numuu rí niʼtsiwáanʼ, Dios niʼni mba̱a̱ a̱jkiu̱u̱n kaʼyoo aʼkhá rí nikudaminaʼ Pablo ga̱jma̱a̱ aʼkhún eʼwíínʼ cristianos bi̱ nikuwa nákha siglo timbá. Jeobá niraʼwíin ga̱jma̱a̱ xi̱ʼ kaʼwu ndrígóo mu maʼni ndrígio̱o̱. Á mu naguájun jmbu, makuwá mekhuíí ga̱jma̱a̱ mutañajunʼ gajmiún Cristo. Mú xóó kuwa náa tsu̱du̱u̱ Ku̱ba̱ʼ. Mú, náa numuu rí Pablo niʼthí rí “nikháñulú ga̱jma̱a̱ numuu aʼkhá” rá. Numuu rí xóo xtáa niriʼkhu̱u̱ mbá kayuʼ. Pablo nijmuu xkridoo Jesús mu maʼthí rígi̱. Niʼthí rí nakháñulú nánguá ‹eʼtháñajunʼ› náa Jesús numuu rí nituxi̱i̱ xóo mbáa bi̱ nánguá makhañúu. Xúʼko̱ má cristianos nikháñun “ga̱jma̱a̱ numuu aʼkhá”, mú “nduya náa inuu Dios ga̱jma̱a̱ numuu Cristo Jesús” (Rom. 6:9, 11). Xóo kuwa nixtiʼkhu̱u̱ mbá kayuʼ numuu rí nánguá eni rí nandún ikhiin. Rí xúgi̱ nunimi̱jna̱ muni rí naniguʼ Dios.

11. Xú káʼnii “nikháñulú ga̱jma̱a̱ numuu aʼkhá” cristianos rí mbiʼi xúgi̱ rá.

¹¹ Rígáa ikháanʼlú rá. Xú káʼnii “nikháñulú ga̱jma̱a̱ numuu aʼkhá” rá. Nákha wajyúúʼ, mbáa ni̱ʼni̱ mbaʼa dí ra̱májánʼ numuu rí tséʼyáá rí endxa̱ʼwáminaʼ Jeobá. Nini̱ndxu̱lú “esclavos ndrígóo aʼkhá” (Rom. 6:19, 20). Mú índo̱ nijmañulúʼ náa Biblia xóo eyoo Dios makuwáanʼ, nigími̱jna̱ muriʼkhu̱u̱ xóo kuwáanʼ, nixnaxími̱jna̱ náa ikhaa ga̱jma̱a̱ nijngúlú iyááʼ. Nindulúʼ muʼnimbulúʼ náa Jeobá asndu xúgíʼ a̱jkiu̱lú ga̱jma̱a̱ makuwáanʼ xóo ikhaa eniguʼ. “Niguma káwáanʼ náa aʼkhá” ga̱jma̱a̱ nini̱ndxu̱lú “esclavos náa rí jmbu” (Rom. 6:17, 18).

12. Ndiéjunʼ guraʼwíí muʼni rá.

¹² Pablo niʼthí: “Xúniʼñáanʼ dí aʼkhá maxtáa raʼtáñajunʼ má xúʼko̱ náa xuyala dí na̱jkha̱nú nakháñuu ga̱jma̱a̱ asndu xúni̱ xó má eguaʼa xuyala” (Rom. 6:12). Ikha jngó gíʼmáanʼ muraʼwíí rí muʼni. O nuʼniñámi̱jna̱ maʼga̱ kaguáanʼ ku̱ma̱  dí ra̱májánʼ ga̱jma̱a̱ rí nagua̱ʼa̱ muʼni o nuxprígumíjnálu. Guraximíjna̱: “Lá naniʼñúʼ rí nagua̱ʼa̱ mani maʼga̱ kañún mani mbá dí ra̱májánʼ o nani gaʼduunʼ mbá nacha̱ dxe̱ʼ.” Á mu gajkhun nuxnáa núma̱aʼ Dios, muʼnimi̱jna̱ muʼni rí naniguʼ.

13. Xú káʼnii xkri̱da gambáyulú muʼni rí jmbu rá.

¹³ Guʼyáá mbaʼa xkri̱da rí nirígá nákha siglo timbá rí maʼni mbuʼyáá rí ma̱ndoo muʼni rí jmbu. Náa xuajen Corinto, tikhun nini kuʼwáʼ, bi̱ nibúunʼ gajmiún kanikhiin xa̱bekha o gu̱ʼu̱, bi̱ niguáʼdiin eʼwíínʼ gu̱ʼu̱ o xa̱bekha, bi̱ ndiyamajkhún eʼwíínʼ xándú ga̱jma̱a̱ xa̱bu̱ bi̱ nijngi̱i̱n. Nininiʼ Jeobá ga̱jma̱a̱ nindúún kuyáá, niriʼkumijná. Nitiñu̱nʼ ga̱jma̱a̱ rí nini (Rom. 6:21; 1 Cor. 6:9-11). Mangiin cristianos bi̱ nikuwa náa Roma ndiyóoʼ muriʼkhumijná. Pablo niʼthún: “Ma̱ngaa xúxnaxí xuyala náa aʼkhá xóo mbá dí najmaa mu miʼni dí ra̱májánʼ, guxnaximíjná náa Dios xóo bi̱ nduya náa bi̱ nikháñun, guxnaxí xúgíʼ xuyala náa Dios xóo mbá dí najmaa mu miʼni rí jmbu” (Rom 6:13). Pablo ndiʼyoo májánʼ rí ma̱ndoo muni rí jmbu ga̱jma̱a̱ mundrígú má xúʼko̱ rí májánʼ rí na̱ʼkha̱ náa Dios.

14, 15. Ndiéjunʼ guraximíjna̱ rá.

¹⁴ Xúʼko̱ má rígá mbiʼi xúgi̱. Tikhun a̱ngiu̱lú nikuwa xóo a̱ngiu̱lú bi̱ nikuwa náa Corinto. Mú índo̱ nininiʼ Jeobá, niriʼkumijná. Nindxu̱u̱ xóo rí niguma kaʼwu̱u̱n. Xúgiáanʼ nandulúʼ muriʼkhumijná mu muʼni rí nandoo Jeobá. Mú gusngájma má xúʼko̱ rí nuxnáa núma̱aʼ Dios numuu rí májánʼ wéñuʼ a̱jkiu̱u̱n. Xú káʼnii gándoo gúʼni rá. Rí muʼni gaʼduunʼ dí ra̱májánʼ ga̱jma̱a̱ majmulúʼ vida ndrígúlú mu muʼni ñajunʼ Jeobá.

¹⁵ Mú, ndayóoʼ muʼni gaʼduunʼ aʼkhá rí mitsáʼkhúun wéñuʼ xóo rí nini bi̱ corintios. Xándoo muxuʼdámíjná aʼkhá ga̱jma̱a̱ muguaʼthi̱i̱n rí Jeobá masngájma rí májánʼ wéñuʼ a̱jkiu̱u̱n ma̱ngaa rí maʼni mba̱a̱ a̱jkiu̱u̱n kaʼyulú. Mú mbáa nuraximíjnalú: “Ndiéjunʼ erígá ga̱jma̱a̱ aʼkhá rí tikhun nakumu̱ún rí na̱nguá mitsáʼkháan wéñuʼ rá. Lá muʼnimi̱jna̱ mu muʼnimbulúʼ xúgíʼ rí gáʼthi Jeobá ráʼ.” (Rom. 6:14, 17.)

16. Xú káʼnii esngájmulú xkri̱da ndrígóo Pablo rí ma̱ngaa ndayóoʼ muʼni gaʼduunʼ aʼkhá rí tséʼthi náa 1 Corintios 6:9-11 rá.

¹⁶ Gundxa̱ʼwámi̱jna̱ náa xkri̱da ndrígóo Pablo. Ikhaa niʼnirámáʼ: “Ikhúúnʼ ni̱ndxu̱ʼ mbáa xa̱bu̱ numbaaʼ, bi̱ nigujuamínáʼ náa aʼkhá”. Ga̱jma̱a̱ nda̱wa̱á niʼthí xóó: “Numuu rí tsíkro̱ʼo̱ʼ rí xtáá rani̱. Numuu rí tseni rí nandoʼ, nani rí naguiyuʼ ka̱yo̱o̱” (Rom. 7:14, 15). Maski ajndu na̱nguá xtáa raʼni rí naʼthí náa 1 Corintios 6:9-11, Pablo ndiʼyoo rí maski ajndu xúʼko̱ nakiéʼkúun. Nindoo maʼni rí naniguʼ Jeobá, ikha jngó niʼniminaʼ mu maʼni rí májánʼ (atraxnuu Romanos 7:21-23). * Gíʼmaa mbuʼyaridáá ga̱jma̱a̱ muʼnimi̱jna̱ mu muʼnimbulúʼ kuʼyáá Jeobá.

17. Náa numuu rí tséʼni nduwaʼ rá.

 ¹⁷ Mbá xkri̱da, nduʼyáá rí mu muʼni ñajunʼ Jeobá ndayóoʼ rí xúʼni̱ nduwaʼ ga̱jma̱a̱ muʼthá má xúʼko̱ rí gajkhun (atraxnuu Proverbios 14:5 * ga̱jma̱a̱ Efesios 4:25). * Tsíyulú manindxu̱lúʼ xóo Satanás, bi̱ nindxu̱u̱ ‹anu̱ún bi̱ nuninduwaʼ›. Ma̱ngaa garmáʼáan a̱jkiu̱lú rí Ananías ga̱jma̱a̱ a̱ʼgiu̱u̱ nikháñun numuu rí nininduwaʼ. Ikha jngó ikháanʼ tséʼni nduwaʼ (Juan 8:44; Hech. 5:1-11). Mú rí xúʼthá rí nduwaʼ nandoo gáʼthúu̱n itháan. Á mu gajkhun nuxnáa núma̱aʼ numuu rí májánʼ wéñuʼ a̱jkiu̱u̱n Dios, muʼthá rí gajkhun asndu náa. Guʼyáá.

18, 19. Ndiéjunʼ rí ndayóoʼ muʼni gaʼduunʼ mu muʼthá má xúʼko̱ rí gajkhun rá.

¹⁸ Á mu nandulúʼ muʼthá rí gajkhun, rígá i̱ʼwáʼ rí ma̱ndoo muʼni. Mbá xkri̱da, Jeobá niʼthún israelitas: “Ragíʼmaa muni kuʼwáʼ, ga̱jma̱a̱ ragíʼmaa muni nduwaʼ, ma̱ngaa ragíʼmaa muni tsu̱di̱i̱ ndxájuala”. Náa numuu dí ragíʼmaa muni rígi̱ xá. Numuu rí Jeobá niʼthún: “Gíʼmaa mani̱ndxa̱la kaʼwáanʼ numuu rí ikhúúnʼ Jeobá Dios ndrígála ni̱ndxu̱ʼ kaʼwún” (Lev. 19:2, 11).  Maski ajndu xúʼni̱ nduwaʼ, tséʼthá rí gajkhun á mu nuʼni rí eʼwíínʼ makumún rí gajkhun nindxu̱u̱ mbá dí ragájkhun.

¹⁹ Mbá xkri̱da, gundxa̱ʼwámi̱jna̱ rí mbáa xa̱bu̱ naʼthúu̱n jefe ndrígóo o bi̱ nañajunʼ gajmíi̱n rí ndayóoʼ maʼga̱a̱ miʼcháá numuu rí maʼga̱ náa médico. Mú raʼkháa xúʼko̱ phú, nandoo maʼga̱ gáʼñun bi̱ nambáxu̱u̱ gajmíi̱n ga̱jma̱a̱ magajnáa wapháá. Mú i̱ndó ndayóoʼ maʼga̱ mbá xngaa mu maʼtsi̱ thana. Lá muʼthá rí niʼthí rí gajkhun xáʼ. O muʼthá rí niʼni nduwaʼ dxe̱ʼ. Xa̱biya̱ bugi̱ niʼni rí eʼwíínʼ munimbu̱ún rí gajkhun nindxu̱u̱ mbá dí ragájkhun. Nguáná xa̱bu̱ nuni nduwaʼ mu ma̱ndoo makhánun mbá rí eñún o mu xakhánun castigo. Mú ikháanʼ nuʼnimbulúʼ kuʼyáá Jeobá, bi̱ naʼthí: “Ragíʼmaa muni nduwaʼ”. Nandulúʼ muʼni rí naʼthí Dios rí nindxu̱u̱ jmbu ga̱jma̱a̱ kaʼwu (Rom. 6:19).

20, 21. Ndiéjunʼ gúʼni gaʼduunʼ á mu nuxnáa núma̱aʼ Dios numuu rí májánʼ wéñuʼ a̱jkiu̱u̱n rá.

²⁰ Gajkhun má rí nuʼni gaʼduunʼ rí muguaʼdiin eʼwíínʼ gu̱ʼu̱ o xa̱bekha, rí majngáanʼ ga̱jma̱a̱ i̱ʼwáʼ aʼkhá mitsáʼkhúun. Mú á mu nuxnáa núma̱aʼ rí Dios májánʼ wéñuʼ a̱jkiu̱u̱n, ma̱ngaa muʼni gaʼduunʼ xúgíʼ rí tséniguʼ. Mbá xkri̱da, raʼkháa i̱ndó muʼni gaʼduunʼ rí muʼbulú gajmiúlú mbáa, ma̱ngaa nuʼni gaʼduunʼ gitsíin rí mitsaga. Ga̱jma̱a̱ raʼkháa i̱ndó rí tséjngáanʼ ma̱ngaa tséʼwan rí asndu itháan majngáanʼ. Mbáa maʼni mingíjyúuʼ muʼni gaʼduunʼ tsáʼkhá rígi̱, mú ma̱ndoo muʼnimbánii.

²¹ Guʼni xúgíʼ rí naʼngulú mu muʼnimbánii xtágabu ndrígóo Pablo: “Xúniʼñáanʼ dí aʼkhá maxtáa raʼtáñajunʼ má xúʼko̱ náa xuyala dí na̱jkha̱nú nakháñuu ga̱jma̱a̱ asndu xúni̱ xó má eguaʼa xuyala” (Rom. 6:12; 7:18-20). Gajkhun rí xándoo muʼnigaʼduunʼ mbá kayuʼ aʼkhá. Mú índo̱ nuʼnimi̱jna̱ xúgíʼ enii aʼkhá nusngajmá rí nuxnáa núma̱aʼ numuu rí májánʼ a̱jkiu̱u̱n Jeobá ga̱jma̱a̱ Jesús.

22. Ndiéjunʼ gárígá á mu nuxnáa núma̱aʼ Dios numuu rí májánʼ wéñuʼ a̱jkiu̱u̱n rá.

²² Jeobá niʼni mba̱a̱ a̱jkiu̱u̱n kaʼyulú ga̱jma̱a̱ xóó ma̱ndoo maʼni. Nuxnáa wéñuʼ núma̱aʼ numuu rí májánʼ a̱jkiu̱u̱n. Guʼnimi̱jna̱ mu nuʼni gaʼduunʼ xúgíʼ rí Dios naʼthí rí nindxu̱u̱ ra̱májánʼ, maski ajndu eʼwíínʼ xa̱bu̱ tséyáá á mu ra̱májánʼ nindxu̱u̱. Ndiéjunʼ gakhánulú á mu nuʼni xúʼko̱ rá. Pablo naʼthí: “Rí xúgi̱, numuu rí niguma káwáanʼ náa aʼkhá, mú ni̱jkuánú nini̱ndxa̱la esclavos ndrígóo Dios, rí naxná xndúu náa kamba̱a̱ rí mikaʼwu, ga̱jma̱a̱ rí gárígá nda̱wa̱á nindxu̱u̱ vida kámuu mbiʼi” (Rom. 6:22).