1. Xú káʼnii mixtiʼkhu nindxu̱u̱ rí ndayúlú ga̱jma̱a̱ rí nandulúʼ rá.

 MIXTIʼKHU nindxu̱u̱ rí ndayúlú ga̱jma̱a̱ rí nandulúʼ. Xú káʼnii nindxu̱u̱ rá. Rí tséyulú má mbaʼa mu makuwáanʼ, káaʼ ganitsu, xtíin ga̱jma̱a̱ mbá guʼwá náa makuwaanʼ. Mú rí nandulúʼ nguáná ma̱ndoo maʼni mbaʼa. Ga̱jma̱a̱ mbaʼin xa̱bu̱ na̱nguá eyáá dí raʼkháa xúgíʼ eyulú mu makuwaanʼ.

2. Ndiéjunʼ rí itháan nandún maguaʼdáá xa̱bu̱ rá.

² Xa̱bu̱ bi̱ kuwa náa xuajen tsingíná mbáa tsíñún ikhaa má xóo rí nandún xa̱bu̱ bi̱ kuwa náa xuajen rí guaʼdáá wéñuʼ. Náa tikhu xuajen, xa̱bu̱ nandún maguaʼdáá mbá celular, mbá motocicleta o mbá chíʼgíʼ mbaaʼ. Náa i̱ʼwáʼ xuajen xa̱bu̱ nandún maguaʼdáá xtíin rí itháan numuu, mbá guʼwá itháan mba̱a̱ o mbá carro itháan numuu. Mú tséʼniuu má náa kuwaanʼ o nguáthá mbújkha̱a̱ kuaʼdáálú, ma̱ndoo maʼndulú maguaʼdáá itháan ga̱jma̱a̱ i̱ʼwáʼ rí tséyulú o rí xáʼngulú gúʼtsi.

3. Ndiéjunʼ eyoo gáʼthúu̱n rí maguaʼdáá itháan rá.

³ Ndiéjunʼ eyoo gáʼthúu̱n rí maguaʼdáá itháan rá. Nandoo gáʼthúu̱n rí mbuʼyáá dí itháan gíʼdoo numuu rí maguaʼdáá ki xóo rí mambáxulu gajmiúlú Jeobá. Á mu nandulúʼ maguaʼdáá wéñuʼ, xákuwáanʼ gagi ga̱jma̱a̱ i̱ndó rí ndayóoʼ maguaʼdáá. Maʼndulú maguaʼdáá itháan. Mu asndu tsáa maʼndoo magiʼdoo itháan, maski ajndu raguáʼdáá wéñuʼ mbújkha̱a̱ o tséʼtsi̱ rí minumuu wéñuʼ. Mbáa asndu muniʼñáʼ ru̱ʼni̱ ñajuunʼ Reino ndrígóo Dios (Heb. 13:5).

4. Náa numuu rí Satanás najmuu “rí nagua̱ʼa̱ idulú” rá.

⁴ Satanás nandoo mundxaʼwamíjna̱ rí ikháanʼ makuwáanʼ gagi á mu muguaʼdáá wéñuʼ. Ikha jngó najmuu numbaaʼ ndrígóo ga̱jma̱a̱ “rí nagua̱ʼa̱ idulú” mu maxkaxáanʼ maʼndulú maguaʼdáá itháan (1 Juan 2:15-17; Gén. 3:6; Prov. 27:20). Xúgíʼ mbiʼi nduʼyáá ga̱jma̱a̱ nuʼdxawíín anuncios rí naʼni maʼndulú mu̱ʼtsi̱ rí itháan nuxi̱ʼ. Lá niʼtsi mbá miʼtsú mbá rí mitsaan kujmaa náa tienda o numuu rí ndiʼyáá náa mbá anuncio ráʼ. Á mu xúʼko̱, mbáa nda̱wa̱á ndiʼyáá rí xájmaa. Á mu nuʼtsi má xúʼko̱ rí tséyulú, muxnámíjná itháan ñajunʼ. Rúʼko̱ ma̱ndoo maʼni rí muniʼñáʼ ru̱ʼni̱ ñajunʼ Jeobá. Mbá xkri̱da, mbáa ikhú ní xaguaʼdáá mbiʼi mu muʼnigajmaa Biblia, muʼniratamijná mu mu̱ʼgua̱ reunión, makuwaanʼ ikhí ga̱jma̱a̱ muʼtáraʼa má xúʼko̱. Garmáʼáan a̱jkiu̱lú rí apóstol Juan niʼthí rí numbaaʼ rígi̱ ga̱jma̱a̱ xúgíʼ dí rígá ikhí mandáti̱ga̱a̱.

5. Ndiéjunʼ gándoo gugíʼniin bi̱ najmún xúgíʼ tsiakii ndrígu̱ún mu maguaʼdáá itháan rá.

⁵ Satanás nandoo majmulúʼ tsiakii ndrígúlú mu mbuʼyáá itháan mbújkha̱a̱ ga̱jma̱a̱ rí maguaʼdáá itháan. Tsíyoo rí majmulúʼ tsiakii ndrígúlú mu muʼni ñajunʼ Jeobá (Mat. 6:24). Mú á mu i̱ndó naxmiéjunlú maguaʼdáá rí nandulúʼ ikháanʼ, vida ndrígúlú xágiʼdoo numuu. Mbáa maxmiéjunʼlú o maguaʼdáá xkujndu ga̱jma̱a̱ numuu mbújkha̱a̱. Rí itháan raʼkhí rí muʼnimbáti̱ga̱a̱ fe náa Jeobá ga̱jma̱a̱ náa Reino ndrígóo (1 Tim. 6:9, 10; Rev. 3:17). Jesús niʼthí rí ‹magua̱ʼa̱ maraʼdáá i̱ʼwáʼ› nindxu̱u̱ xóo tsuwanʼ rí tséniñuʼ maga̱ja̱a̱ tsígáʼ ga̱jma̱a̱ maxná xndúu (Mar. 4:14, 18, 19).

6. Ndiéjunʼ eʼsngúlúʼ rí nigíʼnuu Baruc rá.

⁶ Gundxaʼwamíjna̱ ga̱jma̱a̱ numuu Baruc, bi̱ ninindxu̱u̱ secretario ndrígóo gaʼyee Jeremías. Índo̱ Baruc nigíʼdu̱u̱ ndiyáaʼ “rí gíʼdoo wéñuʼ numuu”, Jeobá niʼni marmáʼáan a̱jkiu̱u̱n rí imbá chíʼgíʼ tígo̱o̱ mu mambáa Jerusalén. Mú niʼthún rí maʼnikríyaaʼ (Jer. 45:1-5). Baruc ragíʼmaa magiʼthu̱u̱n wéñuʼ. Jeobá xáʼnikríyaaʼ rí guáʼdáá xa̱bu̱ (Jer. 20:5). Ndiéjunʼ eʼsngúlúʼ rí nigíʼnuu Baruc rá. Rí xúgi̱ ma̱ngaa nánguá eyóoʼ mba̱yu̱ʼ mbiʼi mu mambáa numbaaʼ ndrígóo Satanás. Ikha jngó xáʼyóoʼ mbuʼyáaʼ maguaʼdáá itháan. Xáguaʼthi̱i̱nlú rí nda̱wa̱á  rí garigá majphú mba̱a̱ ga̱ʼkhu̱ maguaʼdáá xóó rí kuaʼdáá mbiʼi xúgi̱, maski ajndu gíʼdoo wéñuʼ numuu eʼyáálú xúgi̱ (Prov. 11:4; Mat. 24:21, 22; Luc. 12:15).

7. Ndiéjunʼ gúʼyáá xúgi̱ ga̱jma̱a̱ náa numuu rá.

⁷ Xú káʼnii gándoo guʼñeumíjna̱ ga̱jma̱a̱ bi̱ kuwa náa guʼwúlú rí xúniʼñáʼ ru̱ʼni̱ rí itháan gíʼdoo numuu rá. Xú káʼnii gándoo gunigaʼduunʼ rí maʼndulú maguaʼdáá itháan rá. Ndiéjunʼ gambáyulú mu xaxmiéjunʼlu wéñuʼ mu makhánulúʼ rí ndayúlú rá. Jesús nixnúlú xtágabu rí itháan májánʼ ga̱jma̱a̱ numuu rígi̱ náa discurso rí nixná náa Kúbá (Mat. 6:19-21). Rí xúgi̱ muraxnuu ga̱jma̱a̱ mbuʼyáá Mateo 6:25-34. Rígi̱ mambáyulúʼ mbuʼyáá májánʼ rí gíʼmaa mbuʼyááʼ má xúʼko̱ Reino, ra̱ʼkhá rí muguaʼdáá wéñuʼ (Luc. 12:31).

8, 9. a) Náa numuu dí ragíʼmaa maxmiéjunʼlú wéñuʼ ga̱jma̱a̱ numuu rí ndayúlú rá. b) Ndiéjunʼ ndiʼyoo Jesús ga̱jma̱a̱ numún xa̱bu̱ ma̱ngaa rí nda̱ñúnʼ xá.

⁸ (Atraxnuu Mateo 6:25). Jesús ndiʼyoo rí xa̱bi̱i̱ kuwa raxmiéjunʼ rí xú káʼnii mbuʼyáaʼ ganitsu ga̱jma̱a̱ xtíin. Ikha jngó, náa discurso rí nixná náa Kúbá niʼthún: “Maxuxnamijna-güeñaʼla gaʼko”. Ikhaa nindoo mambáñun mu makru̱ʼu̱u̱n rí rakáʼyoo maxmiéjunʼ ga̱jma̱a̱ numuu rígi̱. Maski ajndu ndayóoʼ wéñuʼ, Jesús ndiʼyoo á mu rí xa̱bi̱i̱ naxmiéjunʼ wéñuʼ, ma̱ndoo muniñaʼ rí itháan gíʼdoo numuu. Numuu rí naxmiéjunʼ kaʼñún wéñuʼ, ikhú niʼthún a̱jkhu̱ nuthu itháan ga̱jma̱a̱ numuu rí maxmiéjuanʼ wéñuʼ (Mat. 6:27, 28, 31, 34).

⁹ Mú, náa numuu rí Jesús niʼthúluʼ rí xaxmiéjunlú ga̱jma̱a̱ numuu ganitsu o xtíin rá. Lá tséyulú rígi̱ ráʼ. Ndayúlú. Ku maxmiéjunʼlú á mu na̱nguá kuaʼdáá wéñuʼ mbújkha̱a̱ mu mu̱ʼtsi̱. Jesús ndiʼyoo rígi̱ ga̱jma̱a̱ ndiʼyoo rí ndiñúnʼ xa̱bu̱. Ma̱ngaa ndiʼyoo rí makuwá itháan mingíjyúuʼ xa̱bu̱ índo̱ gáʼnii “iwáá mbiʼi” (2 Tim. 3:1). Rí mbiʼi xúgi̱, mbaʼin xa̱bu̱ tséxkamaa ñajunʼ, ga̱jma̱a̱ naʼni itháan numuu rí naxtango̱jo̱o̱. Ga̱jma̱a̱ náa i̱ʼwáʼ xuajen, xa̱bu̱ migíníi wéñuʼ ga̱jma̱a̱ na̱nguá guáʼdáá wéñuʼ ganitsu nguáná asndu nda̱a̱ mbá kayuʼ. Mú Jesús ma̱ngaa ndiʼyoo rí vida ndrígóo mbáa xa̱bu̱ itháan gíʼdoo numuu “ki xóo ganitsu, ga̱jma̱a̱ xuyuʼ ki xóo xtíin”.

10. Xó má niʼthí Jesús, ndiéjunʼ gíʼmaa magiʼdoo itháan numuu náa vida ndrígúlú rá.

¹⁰ Jesús niʼsngúún xa̱bi̱i̱ rí índo̱ gutajkáan munda̱ʼa̱a̱ Anu̱u̱ mekhuíí rí nda̱ñúnʼ. Niʼthún rí mutajkáan xúgi̱ kaʼnii: “Araxnaʼxoʼ xuguiʼ guma ri ndaʼyo mopoxoʼ xuguiʼ” (Mat. 6:11). I̱mba̱ miʼtsu niʼthún rí mutajkáan xúgi̱ kaʼnii: “Araxnaxoʼ xuguiʼ guma ri ndaʼyo mopoxoʼ tsitsi” (Luc. 11:3). Mú rígi̱ tsíyoo gáʼthúu̱n rí mundxaʼwamíjna̱ má xúʼko̱ rí gíʼmaa mbuʼyáaʼ rí ndayúlú. Jesús niʼsngúún xa̱bi̱i̱ rí munda̱ʼa̱ ma̱ʼkha̱ Reino  ndrígóo Dios rí gíʼdoo itháan numuu ki xóo munda̱ʼa̱ rí ndayúlú (Mat. 6:10; Luc. 11:2). Mu Jesús mambáñun xa̱bi̱i̱ mu xaxmiéjunʼ, niʼthún rí Jeobá mañewu̱u̱n xúgíʼ rí niʼni.

11, 12. Ndiéjunʼ eʼsngúlúʼ xú káʼnii Jeobá eñawu̱u̱n ñu̱ʼu̱ rá. (Atayáá timbá xtiʼkhu.)

¹¹ (Atraxnuu Mateo 6:26). Gundxaʼwamíjna̱ náa “ñuʼun tsi ngrigun mikui”. Maski ajndu majkhinʼ, naʼphu̱ wéñuʼ. Á mu mbáa ñu̱ʼu̱ itháan mba̱a̱ ki xóo mbáa xa̱bu̱, mikhu itháan ki xóo ikháanʼ. Ñu̱ʼu̱ naʼphu̱ xndú taun, tsígáʼ, xujkhúʼ majkhinʼ ga̱jma̱a̱ ñu̱u̱. Mú tséyóoʼ mudu ni muraxi̱i̱, numuu rí Jeobá naxnún xúgíʼ rí nda̱ñúnʼ (Sal. 147:9). Mú ikhaa tserajkuáa ganitsu náa xurawúunʼ. Ñu̱ʼu̱ magún gúyááʼ. Mú ganitsu rígá má ikhí muxkamaa.

¹² Jesús ndiʼyoo májánʼ rí á mu Jeobá nañewu̱u̱n ñu̱ʼu̱ ma̱ngaa mañawu̱u̱n xa̱bu̱ (1 Ped. 5:6, 7) ^[1] (atayáá nota rí na̱ʼkha̱ náa námbá artículo). Mú, xó má ñu̱ʼu̱, gíʼmaa muñajunʼ. Gíʼmaa muʼdu rí mu̱ʼphu̱ o rí muʼdaʼ mbújkha̱a̱ mu mu̱ʼtsi̱lú. Ga̱jma̱a̱ Jeobá maʼni tsajkurámuunʼ tsiakii ndrígúlú. Á mu na̱nguá kuaʼdáá mba̱a̱ mbújkha̱a̱ o ganitsu, ikhaa maxnúlúʼ rí ndayúlú. Mbá xkri̱da, eʼwíínʼ muxnulu rí guáʼdáá. Xúʼko̱ má Jeobá ma̱ngaa naxnún ñu̱ʼu̱ náa makuwá. Niʼniin mu ikhiin ma̱ndoo muni xájúnʼ ga̱jma̱a̱ rí ma̱ndoo muni ga̱jma̱a̱ xájúnʼ. Xúʼko̱ má Jeobá ma̱ndoo mambáyulúʼ muxkamaa náa ma̱ndoo makuwáanʼ gajmiúlú bi̱ kuwa náa guʼwúlú.

13. Ndiéjunʼ esngájma rí itháan kuaʼdáá numulúʼ ki xóo ñu̱ʼu̱ rá.

¹³ Náa Mateo 6:26, Jesús niʼni marmáʼáan a̱jkiu̱ún xa̱bi̱i̱ rí Jeobá naxniʼtsun ñu̱ʼu̱. Ga̱jma̱a̱ nda̱wa̱á niraxu̱u̱n: “¿A raʼka ihua guiʼdo numaʼla ikanʼla xo ri ikin-ra?” (atayáá ma̱ngaa náa Lucas 12:6, 7.) Índo̱ niʼthí rígi̱, mbáa xtáa randxa̱ʼwáminaʼ rí imbá chíʼgíʼ má tígo̱o̱ mu maxnáximinaʼ ga̱jma̱a̱ numún mbá xúgínʼ xa̱bu̱ numbaaʼ. Xúʼko̱ kaʼnii, Jesús tákhañu ga̱jma̱a̱ numún ñu̱ʼu̱ o eʼwíínʼ xujkhúʼ. Nikháñu ga̱jma̱a̱ numulúʼ ikháanʼ mu ma̱ndoo makuwáanʼ kámuu mbiʼi (Mat. 20:28). Lá ragájkhun dí rígi̱ naʼsngúlú rí itháan kuaʼdáá numulúʼ ikháanʼ ki xóo ñu̱ʼu̱ ráʼ.

14. Ndiéjunʼ xáxkamaa xa̱bu̱ bi̱ naxmiéjunʼ wéñuʼ rá.

¹⁴ (Atraxnuu Mateo 6:27). Jesús niʼthí rí mbáa xa̱bu̱ xándoo “magaja imba lajuin” numuu rí naxmiéjunʼ ga̱jma̱a̱ rí ndayóoʼ. Ndiéjunʼ nindoo gáʼthi rá. Maski ajndu maxmiéjunʼ wéñuʼ xándoo maʼni rí maxtáa itháan mba̱yu̱ʼ. Á mu naxmiéjunʼ wéñuʼ, asndu maʼniuu nandii o makhañúu.

15, 16. a) Ndiéjunʼ eʼsngúlúʼ rí xú káʼnii Jeobá nañewu̱u̱n lirios dí rígá xanáá rá. (Atayáá timbá xtiʼkhu.) b) Ndiéjunʼ rí gíʼmaa muraximíjna̱ ga̱jma̱a̱ náa numuu ekumaʼ xúʼko̱ rá.

¹⁵ (Atraxnuu Mateo 6:28-30). Xúgiáanʼ nandulúʼ muguaʼdáá xtíin mitsaan, itháan índo̱ na̱jkua̱ gúʼtaraʼa, na̱jkua̱ náa reunión o náa asambleas. Lá gíʼmaa maxmiéjunʼlú wéñuʼ mu mbuʼyáaʼ xtíin ráʼ. Mbu̱júu̱ʼ Jesús niʼni marmáʼáan a̱jkiu̱ún xa̱bi̱i̱ rí Jeobá nañewu̱u̱n xúgíʼ rí niʼni. Ikhaa nixnúún mbá xkri̱da ga̱jma̱a̱ numuu ‹lirios dí rígá xanáá›. Ga̱jma̱a̱ ajngáa rígi̱, mbáa nindoo gáʼthi ri̱ʼi̱ xóo gladiolas, jacintos ga̱jma̱a̱ tulipan. Nimbá ri̱ʼi̱ rígi̱ ndayóoʼ maʼni xtíñuu. Mú  mitsaan wéñuʼ rí Jesús niʼthí rí “ni Salomón tsi niguiʼdo mba xugui gloria drigo” táguwunʼ xtíñuu xóo ri̱ʼi̱ rúʼko̱.

¹⁶ Nda̱wa̱á rí niʼthún xa̱bi̱i̱ rí xú káʼnii Jeobá naʼniratoo “ina ri riga xana”, Jesús niraxu̱u̱n: “¿A raʼka ihua majan gaʼñaʼla ikanʼla tsanʼla pu-lajuin fe kuaʼdala-dxeʼ”. Maxnún má xtíin mu maguwu̱nʼ. Mú xa̱bi̱i̱ Jesús ndiyóoʼ maguaʼdáá itháan fe (Mat. 8:26; 14:31; 16:8; 17:20). Ndiyóoʼ makumún kuyáá Jeobá rí ikhaa nandoo mañewu̱u̱n ga̱jma̱a̱ rí ikhaa maʼni. Gíʼmaa mundxaʼwamíjna̱ ga̱jma̱a̱ numuu rígi̱ ma̱ngaa muraximíjna̱: “Lá naku̱mu̱ʼ gajkhun rí Jeobá má gáñe̱wu̱nʼ ráʼ.”

17. Ndiéjunʼ gamíi maʼni gachúu rí nambáxulúʼ gajmiúlú Jeobá rá.

¹⁷ (Atraxnuu Mateo 6:31, 32). Mbaʼin xa̱bu̱ bi̱ tseniʼniiʼ Dios i̱ndó nduyáaʼ mbújkha̱a̱ ga̱jma̱a̱ muguaʼdáá wéñuʼ. Mú á mu mangáanʼ nuʼni xúʼko̱, ma̱ndoo maʼni gachúu rí nambáxulúʼ gajmiúlú Jeobá. Nduʼyáá rí ikhaa nindxu̱u̱ Anu̱lú ga̱jma̱a̱ nandoo kaʼyulú. Ikha jngó nduʼyáá rí á mu nuʼni rí na̱ndu̱ʼu̱lú ga̱jma̱a̱ nuʼgíʼ ginii Reino ndrígóo, ikhaa maxnúlúʼ rí ndayúlú ga̱jma̱a̱ i̱ʼwáʼ. Ma̱ngaa nduʼyáá rí á mu nambáxulúʼ májánʼ gajmiúlú Jeobá maʼni makuwáanʼ tsímáá. Rígi̱ nambáyulúʼ mu maʼdxulú ga̱jma̱a̱ numuu xtíin ma̱ngaa ganitsu rí ndayúlú (1 Tim. 6:6-8).

18. Ndiéjunʼ eʼyoo Jeobá ga̱jma̱á numulúʼ, ga̱jma̱a̱ ndiéjunʼ gáʼni xá.

¹⁸ (Atraxnuu Mateo 6:33). Á mu nuʼgíʼ ginii Reino ndrígóo Dios, Jeobá nakudaminaʼ rí maxnúlúʼ xúgíʼ rí ndayúlú. Náa numuu nduʼyáá májánʼ rí xúʼko̱ gáʼni xá. Náa Mateo 6:32, Jesús niʼthí: “Anaʼla tsi xta mikui ndaʼyo-ma ri mba xugui rigueʼ iʼyaʼla”. Jeobá ndaʼyoo rí ndayúlú asndu nákha xóó tséʼyáá ikháanʼ (Filip. 4:19). Ndaʼyoo xú káʼnii xtíin ga̱jma̱a̱ ganitsu rí gáʼyulúʼ. Ga̱jma̱a̱ ndaʼyoo rí bi̱ kuwa náa guʼwúlú nda̱ñúnʼ náa makuwá. Ikhaa maxnúlúʼ rí phú ndayúlú.

19. Náa numuu dí ragíʼmaa maxmiéjunʼlú ga̱jma̱a̱ numuu dí gárígá nda̱wa̱á rá.

¹⁹ (Atraxnuu Mateo 6:34). Xóó niʼthún Jesús xa̱bi̱i̱: “Maxuxnamijna-güeñaʼla gaʼko”. Jeobá maxnúlúʼ rí ndayúlú mámbá mbiʼi. Ikha jngó ragíʼmaa maxmiéjunʼlú wéñuʼ ga̱jma̱a̱ numuu rí gárígá nda̱wa̱á. Á mu naxmiéjunlú wéñuʼ, ma̱ndoo mugíʼdi̱i̱ makumulúʼ kuyamijná i̱ndó ikháanʼ ki xóo Jeobá. Ga̱jma̱a̱ rígi̱ maʼni gachúu rí nambáxulúʼ gajmiúlú. Ikha jngó, gakumulú kuʼyáá i̱ndó ikhaa (Prov. 3:5, 6; Filip. 4:6, 7).

20. a) Xú káʼnii meta ma̱ndoo mataʼgíʼ matani náa Jeobá rá. b) Ndiéjunʼ gándoo gátani ikháánʼ mu xáraʼdáá wéñuʼ rá.

²⁰ Gíná gáʼni rí xúʼni̱ ñajunʼ Jeobá ga̱jma̱a̱ xúgíʼ tsiakii ndrígúlú numuu rí nduʼyáaʼ muguaʼdáá itháan. Rí phú gíʼmaa muʼni, gíʼmaa muxnáá Jeobá  rí itháan májánʼ rí kuaʼdáá. Ma̱ndoo muguaʼdáá mbá meta. Mbá xkri̱da, lá ma̱ndoo mu̱ʼgua̱ náa mbá congregación náa ndayóoʼ miʼtáraʼa itháan ráʼ. Lá ma̱ndoo manindxu̱lúʼ precursor ráʼ. Ga̱jma̱a̱ á mu ni̱ndxu̱lú precursor, lá ma̱ndoo muʼguá Náa Najuiʼsngúún bi̱ Nutaraʼa numuu Jeobá ráʼ. Lá ma̱ndoo muñambáá náa Betel o náa oficina náa nuráwíi ajngáa xáʼ. Lá ma̱ndoo muyambáá náa naguma guʼwá, ga̱jma̱a̱ majmulúʼ mbiʼi mu muyambáá náa naguma Guʼwá náa nagimbáanʼ ráʼ. Gundxaʼwamíjna̱ ndiéjunʼ gándoo muʼni mu xáguaʼdáá wéñuʼ. Xúʼko̱ muguaʼdáá itháan mbiʼi ga̱jma̱a̱ tsiakii mu muñajunʼ ga̱jma̱a̱ numuu Reino. Náa kúgumaʼá  “Xú káʼnii gátani mu xáraʼdáá wéñuʼ” naxná tikhu ikha. Gunda̱ʼa̱a̱ Jeobá rí mambáyulúʼ mbuʼyáá ndiéjunʼ rí eyóoʼ muʼni. Nda̱wa̱á muʼgíʼ muʼni rí ndayóoʼ.

21. Ndiéjunʼ gambáyulú muxuʼmamijná itháan náa Jeobá rá.

 ²¹ Jesús niʼsngúlúʼ muʼgíʼ ginii Reino náa vida ndrígúlú. Á mu nuʼni, ní xáxmiéjunʼlú wéñuʼ ga̱jma̱a̱ numuu rí ndayúlú. Makumulúʼ kuʼyáá itháan rí ikhaa má gañewunlúʼ. Ma̱ngaa majmañulúʼ muxprígumíjná ga̱jma̱a̱ xúʼtsi̱ xúgíʼ rí nandulúʼ o xúgíʼ rí naxná náa numbaaʼ, maski ajndu kuaʼdáá mbújkha̱a̱. Xúgíʼ rígi̱ gambáyulú muxuʼmamijná itháan náa Jeobá. Rí xáguaʼdáá wéñuʼ mambáyulúʼ manindxu̱lúʼ jmbii má xúʼko̱ náa Jeobá ga̱jma̱a̱ makuwáanʼ kámuu mbiʼi rí ikhaa má nikudaminaʼ maʼni (1 Tim. 6:19).