1. Ndíjkha rí gíʼdoo numuu makuwaanʼ xawii náa mbiʼi rí kuwaanʼ ga̱jma̱a̱ rí xtaa rarígá mbájndi rá. Atagíʼ mbá xkri̱da (atayáá timbá xtiʼkhu).

 GUNDXAʼWAMÍJNA̱ rí inu magi̱ʼdu̱u̱ mbá asamblea. Bi̱ magi̱ʼdu̱u̱ natsimuu náa plataforma ga̱jma̱a̱ naʼthúún rí májánʼ rí niguwaʼ. Ajmúú magi̱ʼdu̱u̱ mawáán. Bi̱ kuwa ikhí nduyáá má rí ni̱jkha̱nú hora rí mutrigi̱i̱n. Nandún mudxawíín ajmúú rí mitsaan ga̱jma̱a̱ ra̱ʼkhá tháán nandún mudxawíín discurso. Mú mbáa tikhun na̱nguá edxawíín rí eʼthí presidente o tséyáá dí ajmúú nawáán. Numuu rí na̱nguá kuwa xawii, tséyáá rí nagi̱ʼdu̱u̱ asamblea ga̱jma̱a̱ jngruigu̱u̱n náa pasillo o nutamijná gajmiún bi̱ nambáxu̱u̱n. Xkri̱da rígi̱ nasngájma rí ma̱ndoo marigá á mu na̱nguá kuwaanʼ xawii náa mbiʼi rí kuwaanʼ o rí xtáa rarígá mbájndi. Rí naʼsngúlú rígi̱ gíʼdoo wéñuʼ numuu, numuu rí inu marigá rí itháan gíʼdoo numuu ga̱jma̱a̱ rí ndayóoʼ muʼniratamijná. Ndiéjunʼ rí kuwaanʼ ruʼthá rá.

2. Ndíjkha rí Jesús niʼthún xa̱bi̱i̱ rí makuwá xawii rá.

² Jesucristo niʼthún xa̱bi̱i̱ rí makuwa xawii ga̱jma̱a̱ rí muniratamijná índo̱ inu “mambáa xúgíʼ dí xtáa rarígá náa numbaaʼ ”. Niʼthún: “Guyala, gajuhuala xahui, [...] numu ri tsiyala guana aganu mbiʼi ruʼkue”. Nda̱wa̱á nitanga̱a̱ niʼthún mbu̱júu̱: “Gajuhuala xahui” (Mat. 24:3; atraxnuu Marcos 13:32-37). Náa i̱yi̱i̱ʼ ndrígóo Mateo ma̱ngaa nisngájma rí Jesús niʼthún rígi̱ xa̱bi̱i̱. Niʼthún: “Gajuhuala xahui, numu ri tsiyala na hora gaʼka Señaʼla”. Nda̱wa̱á niʼthí mbu̱júu̱: “Gajuhua namañaʼla manganʼla, numu ri Ade Xabo maʼka hora ri tsindxaʼhuamijnala ri maʼka”. Ga̱jma̱a̱ xóó niʼthún: “Gajuhuala xahui, tia tsiyala na mbiʼi jame ni na hora gaʼka Ade Xabo” (Mat. 24:42-44; 25:13).

3. Ndíjkha rí gíʼmaa muʼnimbulúʼ rí niʼthí Jesús rá.

³ Bi̱ ni̱ndxu̱lú xa̱bi̱i̱ Jeobá nuʼnimbulúʼ rí niʼthí Jesús. Náa numuu rá. Numuu rí nduʼyáá rí kuwaanʼ náa ‹mbiʼi rí ma̱ʼkha̱nú fin› ga̱jma̱a̱ rí inu magi̱ʼdu̱u̱ marigá “mapu-mba gaʼko” (Dan. 12:4; Mat. 24:21). Xóo má niʼtáriyaʼ Jesús, xuajñu Jeobá xtáa raʼtáraʼa ajngáa ndrígóo Reino náa xúgíʼ tsu̱du̱u̱ Ku̱ba̱ʼ. Ga̱jma̱a̱ xó má niʼtáriyaʼ Jesús ma̱ngaa, mámbá mbiʼi nduʼyáá itháan guerras, nandii, gaʼxma, ewiʼ, nuradímíjná ga̱jma̱a̱ i̱ʼwáʼ dí ra̱májánʼ náa mbaʼa xuajen. Ma̱ngaa, rí mbiʼi xúgi̱ kuwa itháan xa̱bu̱ ede̱ náa guʼwá ndxajkun bi̱ nuni nduwiinʼ xa̱bu̱ (Mat. 24:7, 11, 12, 14; Luc. 21:11). Ra̱ʼkhá tháán eyulú ma̱ʼkha̱nú mbiʼi rí ma̱ʼkha̱ Jesús ga̱jma̱a̱ maʼnimbánuu rí nandoo Anu̱u̱ (Mar. 13:26, 27).

4. a) Náa numuu eku̱mu̱lú rí Jesús ndaʼyoo nguáná gáʼkha̱ Armagedón rá. b) Maski ajndu tséʼyáá nguáná gági̱ʼdu̱u̱ marigá majphú mba̱a̱ gaʼkhu, ndiéjunʼ rí nduʼyáá májánʼ rá.

⁴ Ikháanʼ nduʼyáá náa hora gági̱ʼdu̱u̱ asamblea. Mú tséʼyáá náa phú mbiʼi gági̱ʼdu̱u̱ marigá majphú mbáa gaʼkhu. Índo̱ nixtáa náa Ku̱ba̱ʼ Jesús niʼthí: “Indo ri na mbiʼi jame na hora asjndo nimba tsiʼyo, ni ángel tsi juhua mikui tsiya, mbahui Tateʼ iʼyo” (Mat. 24:36). Numuu rí Jesús maxná ikha náa Armagedón, ma̱ndoo mundxaʼwamíjna̱ xúgi̱ rí ikhaa ndaʼyoo nguáná gági̱ʼdu̱u̱ guerra rígi̱ (Rev. 19:11-16). Mú ikháanʼ xóó tséʼyáá náa mbi̱ʼi̱i̱ ga̱jma̱a̱ náa hora gáʼkha̱ fin. Ikha jngó gíʼdoo wéñuʼ numuu rí makuwaanʼ xawii. Jeobá niraʼwíí náa phú mbi̱ʼi̱i̱ gági̱ʼdu̱u̱ índo̱ marigá majphú mba̱a̱ gaʼkhu. Ga̱jma̱a̱ mbiʼi rúʼko̱ najngiyuu itháan. Xó má eʼthí náa Biblia: “Xájyúuʼ má gáʼkha̱” (atraxnuu Habacuc 2:3). * Náa numuu rí nduʼyáá rígi̱ rá.

5. Atagíʼ mbá xkri̱da rí masngájma rí niʼtáriyaʼ Jeobá nambánuu mbiʼi rí phú niʼthí.

⁵ Rí niʼtáriyaʼ Jeobá nimbánuu mbiʼi rí ikhaa má niʼthí. Mbá xkri̱da, gundxaʼwamíjna̱ ga̱jma̱a̱ numuu mbiʼi 14 gu̱nʼ judío ndrígóo nisán tsiguʼ 1513 tsiguʼ ginii. Mbiʼi rúʼko̱ Dios niguwíin israelitas náa Egipto. Nda̱wa̱á Moisés niʼnirámáʼ rí Jeobá niʼni káwíin ‹mbiʼi má rúʼko̱› índo̱ na̱jkha̱ mambá ‹a̱jkhu̱ ciento mbá skíñúʼ gu̱wa̱ʼ tsiguʼ› (Éx. 12:40-42).  Tsiguʼ 430 nigi̱ʼdu̱u̱ 14 ñajunʼ gu̱nʼ nisán tsiguʼ 1943 tsiguʼ ginii, índo̱ nigi̱ʼdu̱u̱ nimbánuu rí nikudaminaʼ Jeobá dí maʼni tsajkurámiinʼ e̱ji̱i̱n Abrahán (Gál. 3:17, 18). Nguáthá mbiʼi nda̱wa̱á, Jeobá niʼthúu̱n Abrahán rí e̱ji̱i̱n maguanu makuwá náa Ku̱ba̱ʼ dí rakáʼñún, mani̱ndxu̱ún esclavos ga̱jma̱a̱ maguma gíníi “akociento tsigu” (Gén. 15:13; Hech. 7:6). Tsiguʼ rígi̱ nigi̱ʼdu̱u̱ tsiguʼ 1913 tsiguʼ ginii, índo̱ Ismael nigi̱ʼdu̱u̱ nitsíjmaa Isaac. Ga̱jma̱a̱ niguámbáa mbiʼi rí Jeobá niʼni káwíin israelita náa Egipto (Gén. 21:8-10; Gál. 4:22-29). Xó má eʼyáá, mba̱yu̱ʼ tsiguʼ ginii Jeobá niʼthí náa phú mbiʼi gáʼnikríyaaʼ xuajñu.

6. Xú káʼnii eʼyáá májánʼ rí Jeobá maʼnikríyaaʼ xuajñu rá.

⁶ Josué ninindxu̱u̱ mbáa bi̱ nigájnuu náa Egipto. Mba̱yu̱ʼ tsiguʼ nda̱wa̱á niʼni marmáʼáan a̱jkiu̱ún israelitas: “Ikháanʼ ndu̱ya̱a̱ májánʼ ga̱jma̱a̱ xúgíʼ a̱jkia̱la ma̱ngaa xúgiáanʼ ikháanʼla dí xúgíʼ ajngáa rí májánʼ rí niʼthí Jeobá Dios nimbánuu. Xúgíʼ nimbánuu náa ikháanʼ. Nimbá ajngáa táʼni tígo̱o̱” (Jos. 23:2, 14). Jeobá nikudaminaʼ náa xa̱bi̱i̱ rí maʼni káwíin índo̱ garigá majphú mba̱a̱ gaʼkhu ga̱jma̱a̱ maxnúu mbá mbiʼi kámuu náa numbaaʼ nuxi̱ʼ. Nduʼyáá gajkhun rí maʼnimbánuu rí nikudaminaʼ. Ikha jngó á mu nandulúʼ makuwaanʼ náa numbaaʼ nuxi̱ʼ, gíʼmaa makuwaanʼ xawii.

7, 8. a) Ndiéjunʼ eʼni mbáa bi̱ nayejngoo nákha wajyúúʼ, ga̱jma̱a̱ ndiéjunʼ eʼsngúlúʼ rá. b) Ndiéjunʼ gárígá á mu bi̱ nayejngoo naʼgu rá. Atagíʼ mbá xkri̱da.

⁷ Ma̱ndoo maʼsngulúʼ mbá ikha rí nini xa̱bu̱ bi̱ nuyejngoo nákha wajyúúʼ náa xuajen. Jerusalén ga̱jma̱a̱ i̱ʼwáʼ xuajen niguáʼdáá xtátsí tsidaanʼ wéñuʼ mu xa̱bu̱ sia̱nʼ xátu̱ʼu̱u̱n. Bi̱ nuyejngoo naguáju̱n má xúʼko̱ náa tsu̱du̱u̱ xtátsí, náa ma̱ndoo mbuyáá dí xtáa rarígá mbájndi. Eʼwíínʼ nuyejngoo náa xkrugua ndrígóo xuajen. Xúgínʼ ikhiin ndiyóoʼ makuwá xawii mbiʼí mbruʼun. Ga̱jma̱a̱ índo̱ nduyáá naguwaʼ xa̱bu̱ sia̱nʼ, ndiyóoʼ mutaruʼun xa̱bu̱ bi̱ kuwa náa xuajen (Is. 62:6). Ndiyáá rí gíʼdoo wéñuʼ numuu rí maxúnuʼ ga̱jma̱a̱ makuwá xawii ga̱jma̱a̱ numuu xúgíʼ rí garigá. Á mu rí tseni xúʼko̱, mbaʼin xa̱bu̱ gamíi makhañún (Ezeq. 33:6).

⁸ Nákha tsiguʼ 70 tsiguʼ nda̱wa̱á soldados romanos niʼngu̱u̱n nitu̱ʼu̱u̱n náa Jerusalén. Xú káʼnii rá. Mbáa judío bi̱ nigumbiʼyuu Josefo, niʼthí rí bi̱ kuwa ruyejngoo náa mbá níʼkhóo xuajen ninuʼ. Ikha jngó romanos nitu̱ʼu̱u̱n, nitsikha templo ga̱jma̱a̱ nini gámbáa xúgíʼ xuajen. Rígi̱ ninindxu̱u̱ iwáá gaʼkhu rí nirígá náa xúgíʼ xuajñún judíos.

9. Ndiéjunʼ rí tséyáá mbaʼin xa̱bu̱ rá.

⁹ Rí mbiʼi xúgi̱, mbaʼin xa̱bu̱ ñajunʼ guáʼdiin soldados ga̱jma̱a̱ guáʼdáá ajua̱nʼ nuxi̱ʼ rí nayejngoo náa ndawaa. Xúʼko̱ nduyáá májánʼ rí nimbá o nimbáa gáʼni dí ra̱májánʼ náa xuajñún. Mú Xa̱bu̱ Ñajunʼ bugi̱ tséyáá rí mekhuíí xtáa mbáa Xa̱bu̱ Ñajunʼ bi̱ itháan gíʼdoo tsiakii náa maʼtáñajunʼ Jesucristo. Imbá chíʼgíʼ má tígo̱o̱ rí Xa̱bu̱ Ñajunʼ bugi̱ maxmínaʼ gajmíi̱n xúgínʼ Xa̱bu̱ Ñajunʼ bi̱ kuwa náa tsu̱du̱u̱ Ku̱ba̱ʼ (Is. 9:6, 7; 56:10; Dan. 2:44). Ra̱ʼkhá tháán eyulú maʼga̱nú mbiʼi rúʼko̱ ga̱jma̱a̱ nandulúʼ makuwaanʼ xawii índo̱ gáʼkha̱nú. Ikha jngó kuwáanʼ xawii ga̱jma̱a̱ numuu rí naʼtáriyaʼ náa Biblia ma̱ngaa tséniʼñáaʼ ru̱ʼni̱ ñajunʼ Jeobá (Sal. 130:6).

10, 11. a) Ndiéjunʼ rí gíʼmaa muñeumíjna̱ ga̱jma̱a̱ náa numuu rá. b) Xú káʼnii tayáá ikháánʼ rí Gixa̱a̱ naʼngo̱o̱ naʼni rí xa̱bu̱ xúnimbu̱ún rí naʼtáriyaʼ náa Biblia rá.

¹⁰ Gundxaʼwamíjna̱ ga̱jma̱a̱ numuu mbáa bi̱ nayejngoo bi̱ nixtáa xawii xúgíʼ mbruʼun. Índo̱ itháan majtsi néʼngo̱o̱ má wéñuʼ, ikha jngó naʼniún itháan mingíjyúuʼ maxtáa xawii. Xúʼko̱ má mangáanʼ kuwáanʼ náa iwáá mbiʼi ndrígóo numbaaʼ rígi̱. Ikha jngó gíʼmaa muñeumíjna̱ mu makuwaanʼ xawii. Náa numuu rá. Numuu rí índo̱ na̱ʼkha̱ rajngiyuu itháan fin, itháan mingíjyúuʼ gáʼni rí maxúʼnuʼ. Phú migíná gáʼni á mu nunuʼ xúgi̱. Guʼyáá ajtsú enii rí ma̱ndoo maʼni rí muʼnuʼ náa inuu Dios.

¹¹ Gixa̱a̱ naʼninduwiinʼ xa̱bu̱. Nákha inu makhañúu, Jesús niʼni marmáʼáan a̱jkiu̱ún xa̱bi̱i̱ ajtsú nuthu rí Satanás nindxu̱u̱ “tsi naʼtañajun naʼ numba rigueʼ” (Juan 12:31; 14:30; 16:11). Gixa̱a̱ najmuu religión rí minduwaʼ mu maʼni nduwiinʼ xa̱bu̱. Ikha jngó mbaʼin rí mbiʼi xúgi̱ tsedxawíín rí naʼtáriyaʼ náa Biblia rí nasngájmaa kaʼwu rí ndayóoʼ imbá lájuíin mu ma̱ʼkha̱ fin ndrígóo numbaaʼ rígi̱ (Sof. 1:14). Nakujmaa kaʼwu rí Satanás “nirugoo ku̱ma̱ ndrígu̱ún xa̱bu̱” (2 Cor. 4:3-6). Rígi̱ naʼni rí mbaʼin xa̱bu̱ tsíñún gudxawíín índo̱ nuʼthúún rí fin gíʼ mijngii ga̱jma̱a̱ rí Cristo xtáa raʼtáñajunʼ. Mbaʼa nuthu nutulúʼ: “Tsíyóóʼ gádxuun”.

12. Náa numuu dí ragíʼmaa muniʼñáʼ dí Gixa̱a̱ maʼni nduwánʼ ráʼ.

¹² Mbaʼin xa̱bu̱ tsíñún mudxawíín rí naʼtáriyaʼ náa Biblia. Mú xúniʼñáʼ dí rúʼko̱ maʼni guabáanʼ. Nduʼyáá ndíjkha gíʼdoo numuu makuwaanʼ xawii. Apóstol Pablo niʼthún a̱ngui̱i̱n: “Ikháanʼ ndu̱ya̱a̱ májánʼ wéñuʼ rí mbiʼi ndrígóo Jeobá na̱ʼkha̱ xóo mbáa kuʼwáʼ índo̱ mbruʼun” (atraxnuu 1 Tesalonicenses 5:1-6). * Ga̱jma̱a̱  Jesús niʼthúluʼ: “Gajuhuala xahui manganʼla, numu ri hora ri tsindxaʼ-huamijnala ri maʼka, ika hora ruʼkue maʼka Ade Xabo” (Luc. 12:39, 40). Inu má Satanás maʼninduwiinʼ xa̱bu̱ i̱mba̱ núthu. Maʼni makumún rí náa numbaaʼ rígá “tsímáá ga̱jma̱a̱ nda̱a̱ rí gugíʼníín”. Ikhú nda̱a̱ tsu̱ma̱ gáʼkha̱ mbiʼi ndrígóo Jeobá. Xa̱bu̱ mamiñún wéñuʼ. Ikháanʼlu rá. Á mu nandulúʼ makuwaanʼ xawii mbiʼi rúʼko̱, xúniʼñáʼ rí Gixa̱a̱ maʼni nduwánʼ xó má eʼwíínʼ xa̱bu̱. Ikha jngó xúgi̱ gíʼmaa muʼni rí niʼthí Pablo: “Gakuwaanʼ xawii ga̱jma̱a̱ mbiʼyulú”. Ikha jngó gíʼmaa muraxnuu Biblia xúgíʼ mbiʼi ga̱jma̱a̱ mundxaʼwamíjna̱ rí naʼthúlúʼ Jeobá.

13. a) Xú káʼnii eʼniún xa̱bu̱ xi̱ʼ dí rígá náa numbaaʼ ráʼ. b) Ndiéjunʼ gándoo muʼni mu xarigá náa ikháanʼ rá.

¹³ Xi̱ʼ dí rígá náa numbaaʼ naʼni gachúu rí xóo endxaʼwamíjna̱ xa̱bu̱. Rí mbiʼi xúgi̱, mbaʼin xa̱bu̱ nakumu̱ún rí tséyóoʼ muniʼniiʼ Dios (Mat. 5:3). Rí nuni, najmún itháan mbiʼi ga̱jma̱a̱ tsiakii ndrígu̱ún mu makhánun rí naxnáraʼa numbaaʼ (1 Juan 2:16). Ma̱ngaa rí mbiʼi xúgi̱ rígá itháan náa ma̱ndoo muʼni gagimijná. Rígi̱ naʼni rí xa̱bu̱ i̱ndó mundxaʼwamíjna̱ muni rí nanigu̱nʼ ga̱jma̱a̱ rí nagua̱ʼa̱ muni (2 Tim. 3:4). Ikha jngó nambumún rí gíʼdoo itháan numuu ga̱jma̱a̱ tséndxaʼwamíjna̱ mambaxúún gajmiún Dios. Ndiéjunʼ gándoo gúʼni mu xi̱ʼ rúʼko̱ xarigá náa ikháanʼ rá. Pablo niʼthí dí ragíʼmaa muʼni i̱ndó rí nandulúʼ. Á mu nuʼnimbulúʼ xtágabu rí nixná, maxúʼnuʼ náa inuu Dios (Rom. 13:11-14).

14. Ndiéjunʼ eʼthúlú náa Lucas 21:34 ga̱jma̱a̱ 35 rá.

¹⁴ Nandulúʼ rí maxnúlúʼ ikha xi̱ʼ ndrígóo Dios, raʼkháa xi̱ʼ dí rígá náa numbaaʼ. Jeobá najmuu xi̱ʼ ndrígóo mu mambáyulúʼ makru̱ʼu̱lú kaʼwu ndiéjunʼ rí inu marigá (1 Cor. 2:12) ^[1] (atayáá nota rí na̱ʼkha̱ náa námbá artículo). Mú gíʼmaa muñeumíjna̱lú. Numuu rí asndu xóo dí ragíʼdoo numuu ma̱ndoo maʼnijngáanʼ mu xúʼni̱ ñajunʼ Jeobá (atraxnuu Lucas 21:34, 35). Mbáa asndu tikhun mutulú rí ni̱ndxu̱lú skágunʼ numuu rí nakumulú rí kuwaanʼ náa iwáá mbiʼi náa numbaaʼ rígi̱ (2 Ped. 3:3-7). Mú xúniʼñáʼ dí rúʼko̱ maʼni guabáanʼ. Rígá mbaʼa rí nasngájma kaʼwu dí fin gíʼ mijngii wéñuʼ. Á mu nandulúʼ rí xi̱ʼ ndrígóo Dios maxnúlúʼ ikha, ragíʼmaa muniʼñáʼ rajkua náa nagimbáanʼ.

15. Ndiéjunʼ rí nigíʼnuu Pedro, Santiago ga̱jma̱a̱ Juan, ga̱jma̱a̱ xú káʼnii gándoo guguaʼnii xúʼko̱ mangáanʼ rá.

¹⁵ Rí naʼni makiéʼkulú naʼni rí xákuwáanʼ xawii. Jesús ndiʼyoo má rí ni̱ndxu̱lú xa̱bu̱ aʼkhá ga̱jma̱a̱ kuaʼdáá rí naʼni makiéʼkulú. Gundxaʼwamíjna̱ rí nirígá mbruʼun nákha inu makhañúu Jesús. Ikhaa na̱nguá nigiʼdoo aʼkhá, mú ndiʼyoo rí gíʼmaa ma̱ndo̱ʼo̱o̱ Jeobá rí mambáyúu mu mawiji̱ jmbu. Jesús nindo̱ʼo̱o̱ apóstol Pedro, Santiago ga̱jma̱a̱ Juan rí maxúnuʼ índo̱ ikhaa xtáa raʼtájkháan. Mú ikhiin túyáá rí gíʼdoo wéñuʼ numuu makuwá xawii ikhú. Ndiéjunʼ rí niguaʼnii xá. Numuu rí néʼngu̱u̱n wéñuʼ, ninuʼ. Jesús  ma̱ngaa néʼngo̱o̱, mú tígu̱ ikhaa niʼtákáñuu Anu̱u̱. Xa̱bi̱i̱ ndiyóoʼ muni xó má niʼni ikhaa (Mar. 14:32-41).

16. Xó má eʼthí Lucas 21:36, ndiéjunʼ rí niʼthí Jesús rí gíʼmaa muʼni mu makuwáanʼ xawii rá.

¹⁶ Ndiéjunʼ gambáyulú mu makuwaanʼ xawii rá. Ndayóoʼ maʼndulú muʼni dí májánʼ. Mú raʼkháa i̱ndó rígi̱. Nákha inu makhañúu, Jesús niʼthún xa̱bi̱i̱ rí gíʼmaa munda̱ʼa̱a̱ má xúʼko̱ Jeobá rí mambáñun (atraxnuu Lucas 21:36). Mú makuwaanʼ xawii náa mbiʼi rígi̱ rí inu ma̱ʼkha̱ fin, ikháanʼ mangáanʼ gíʼmaa muʼtájkáan xúgíʼ mbiʼi (1 Ped. 4:7, nota).

17. Ndiéjunʼ gándoo muʼni mu mbuʼyáá májánʼ rí kuwaanʼ xawii mu muraʼníí rí ga̱ʼkha̱ rá.

¹⁷ Jesús niʼthún xa̱bi̱i̱ rí fin ma̱ʼkha̱ ‹náa mbá hora rí tsindxaʼwamíjna̱ rí ma̱ʼkha̱› (Mat. 24:44). Ikha jngó gíʼmaa makuwaanʼ xawii xúgíʼ mbiʼi. Raʼkháa mbiʼi rí mbuʼyáaʼ rí naxnáraʼa numbaaʼ ndrígóo Satanás. Numbaaʼ rígi̱ naʼthí dí rúʼko̱ ma̱ndoo maʼni makuwaanʼ tsímáá. Mú ikháanʼ nduyáá dí ragájkhun. Jeobá ga̱jma̱a̱ Jesús nutulúʼ náa Biblia rí gíʼmaa muʼni mu makuwaanʼ xawii. Ikha jngó, gakuwaanʼ xawii ga̱jma̱a̱ xúgíʼ rí naʼtáriyaʼ náa Biblia ma̱ngaa xú ejkha̱ rambánuu. Gambáxulúʼ itháan májánʼ gajmiúlú Jeobá ga̱jma̱a̱ guʼgíʼ ginii Reino ndrígóo náa vida ndrígúlú. Xúʼko̱ makuwáanʼlu xawii índo̱ gáʼkha̱ fin (Rev. 22:20). Garmáʼáan a̱jkiu̱lú rí ikháanʼ ma̱ndoo makuwáanʼ á mu nuʼni rígi̱.