1-3. a) Ndiéjunʼ rí gáʼniulú mingíjyúuʼ muʼni nda̱wa̱á rí nijngúlú iyááʼ rá. b) Á mu rí naʼniulú mingíjyúuʼ wéñuʼ muriʼkhumijná ndiéjunʼ gándoo guraximíjna̱lú rá. (Atayáá timbá xtiʼkhu.)

 NÁKHA Kevin xóó tsénindxu̱u̱ xa̱bi̱i̱ Jeobá, mba̱yu̱ʼ tsiguʼ niguʼwun maʼtsíin ga̱jma̱a̱ numuu mbújkha̱a̱, matsikhá ndíí, maga̱a̱n wéñuʼ iya najnga̱a̱ ga̱jma̱a̱ majmuu droga ^[1] (atayáá nota rí na̱ʼkha̱ náa námbá artículo). Índo̱ nijmañuu ga̱jma̱a̱ numuu Jeobá, nindoo mambaxúu ga̱jma̱a̱. Mú nákha xóó tséjngúun iyááʼ ndiyóoʼ mariʼkuminaʼ wéñuʼ. Nindoo niriʼkuminaʼ numuu rí Jeobá má nimbáyúu ga̱jma̱a̱ tsiakii rí gíʼdoo Ajngá rawunʼ (Heb. 4:12).

² Nda̱wa̱á rí nijngúun iyááʼ, Kevin ndiyóoʼ mariʼkuminaʼ má xúʼko̱ mu mani̱ndxu̱u̱ mbáa xa̱bi̱i̱ Jeobá itháan májánʼ (Efes. 4:31, 32). Mbá xkri̱da, tséjyúuʼ kiʼnáa. Niʼniuu tsiánguá índo̱ ndiʼyoo rí naʼniuu mingíjyúuʼ wéñuʼ maxpríguminaʼ. Ikhaa  naʼthí rí niʼniuu itháan mingíjyúuʼ rúʼko̱ ki xóo i̱ʼwáʼ dí raʼkhí rí niʼni nákha xóó tséjngúun iyááʼ. Ikha jngó niʼtákáñuu Jeobá rí mambáyúu ga̱jma̱a̱ nigíminaʼ maʼnigajmaa Biblia tsumáá wéñuʼ. Ga̱jma̱a̱ numuu rígi̱ ikhaa niriʼkuminaʼ.

³ Nákha xóó tsejngúlú iyááʼ, mbaʼánʼ rí ikháanʼ ndiyóoʼ muriʼkhumijná wéñuʼ. Xúʼko̱ nindoo niʼnimbaníí rí naʼthí náa Biblia. Mú mbáa nduʼyáá rí ndayóoʼ muʼnimi̱jna̱ itháan mu mbuʼyaridáá májánʼ Dios ga̱jma̱a̱ Cristo (Efes. 5:1, 2; 1 Ped. 2:21). Mbá xkri̱da, mbáa nduʼyáá rí naguʼwunlú rí muxieʼkha wéñuʼ o najngruigulú ruʼthá numún eʼwíínʼ. O mbáa nguáná tséʼni rí jmbu numuu rí namíñulú rí guthi eʼwíínʼ o gundxaʼwa̱a̱ edxu̱ún. Mbáa naʼni má mba̱yu̱ʼ tsiguʼ rí nuʼnimi̱jna̱ muʼni rí májánʼ, mú nakiéʼkulu má xúʼko̱. Mbáa ikha jngó nuraximíjna̱lu: “Náa numuu rí naʼniuʼ mingíjyúuʼ wéñuʼ mariʼkuminaʼ rá. Ndiéjunʼ gáʼyóóʼ mani mu mariʼkhuu xóo xa̱bu̱ ni̱ndxu̱ʼ xó má eʼthí náa Biblia rá.”

4. Náa numuu rí tséʼngulú gúʼni xúgíʼ rí nandoo Jeobá rá.

⁴ Bi̱ nuʼnilú ñajunʼ Dios nandulúʼ kuʼyáá ga̱jma̱a̱ nandulúʼ muʼni rí nandoo ikhaa ga̱jma̱a̱ xúgíʼ a̱jkiu̱lú. Mú nguáná tséʼngulú guʼnimbaníí numuu rí ni̱ndxu̱lú xa̱bu̱ aʼkhá. Mbaʼa nuthu nakumulú xóo apóstol Pablo, bi̱ niʼthí rí nandoo maʼni rí májánʼ, mú nguáná táʼngo̱o̱ gaʼnimbánuu (Rom. 7:18; Sant. 3:2).

5. a) Ndiéjunʼ ndiyóoʼ muniʼñáaʼ ru̱ʼni̱ mu majngúlú iyááʼ rá. b) Ndiéjunʼ eʼni numuu rí xóó kuaʼdáá aʼkhá rá.

⁵ Mu ma̱ndoo majngúlú iyááʼ ga̱jma̱a̱ manindxu̱lúʼ xa̱bi̱i̱ Jeobá, ndiyóoʼ muniʼñáaʼ ru̱ʼni̱ rí nawiyuʼ kaʼyoo Jeobá (1 Cor. 6:9, 10). Numuu rí xóó kuaʼdáá aʼkhá nakiéʼkulu má xúʼko̱, maski ajndu niʼníí má nijngúlú iyááʼ (Col. 3:9, 10). Mbáa nguáná xóó nagua̱ʼa̱ muʼni mbá dí ra̱májánʼ o náa a̱jkiu̱lú gíwanʼ mbá dí ra̱májánʼ, o mbáa naʼniulú mingíjyúuʼ muxprígumijna rí xú káʼnii xa̱bu̱ ni̱ndxu̱lú. Mbá niʼníí má eʼnimi̱jna̱ ga̱jma̱a̱ rí xú kaʼniáanʼ.

6, 7. a) Maski ajndu ni̱ndxu̱lú xa̱bu̱ aʼkhá, náa numuu ma̱ndoo mambáxulu gajmiúlú Jeobá rá. b) Náa numuu dí ragíʼmaa muniʼñáaʼ runda̱ʼa̱a̱ Jeobá rí maʼni mba̱a̱ a̱jkiu̱u̱n kaʼyulú rá.

⁶ Maski ajndu ni̱ndxu̱lú xa̱bu̱ aʼkhá, ma̱ndoo mambaxúlúʼ gajmiúlú Jeobá ga̱jma̱a̱ muʼni ñajuunʼ. Xámbumulu rí ni̱jkuánú nimbáxulúʼ gajmiúlú numuu dí ndiʼyoo mbá rí májánʼ náa ikháanʼ ga̱jma̱a̱ nindoo rí muniʼnííʼ (Juan 6:44). Ikhaa ndiʼyoo rí ni̱ndxu̱lú xa̱bu̱ aʼkhá ga̱jma̱a̱ numuu rúʼko̱ rí nakiéʼkulu. Maski ajndu xúʼko̱, Jeobá nindoo rí mambaxúlúʼ gajmiúlú.

⁷ Numuu rí Jeobá nindoo kaʼyulú wéñuʼ, nimínaaʼ mbá rí gíʼdoo wéñuʼ numuu. Nikuʼmaa A̱ʼdióo náa tsu̱du̱u̱ Ku̱ba̱ʼ mu maxnáximinaʼ ga̱jma̱a̱ maʼni numuu aʼkhúlúʼ (Juan 3:16). Índo̱ nakiéʼkulu ma̱ndoo munda̱ʼa̱a̱ Jeobá rí maʼni mba̱a̱ a̱jkiu̱u̱n kaʼyulú. Ga̱jma̱a̱ numuu rí nixnáximinaʼ Jesús, Dios naʼni mba̱a̱ a̱jkiu̱u̱n kaʼyulú ga̱jma̱a̱ naniñuʼ rí mambaxúlúʼ má xúʼko̱ gajmiúlú (Rom. 7:24, 25; 1 Juan 2:1, 2). Garmáʼáan a̱jkiu̱lú rí Jesús nikháñu ga̱jma̱a̱ numún xa̱bu̱ aʼkhá bi̱ natangi̱i̱n. Ikha jngó, á mu nakumulú rí niʼni mbóo dí ra̱májánʼ wéñuʼ, xúniʼñáʼ runda̱ʼa̱a̱ Jeobá rí maʼni mba̱a̱ a̱jkiu̱u̱n kaʼyulú. Á mu tsénda̱ʼa̱a̱ rí maʼni mba̱a̱ a̱jkiu̱u̱n kaʼyulú, maʼni xóo índo̱ mitsaga ñawúnlú ga̱jma̱a̱ tsíyulú muʼjñáa. Lá ragájkhun rí nuxnáa  núma̱aʼ Jeobá rí naniñuʼ mambaxúlúʼ gajmiúlú maski ajndu ni̱ndxu̱lú xa̱bu̱ aʼkhá ráʼ. (Atraxnuu 1 Timoteo 1:15.) *

8. Náa numuu rí gíʼmaa muriʼkhumijná rá.

⁸ Mú xándoo mbuʼyáá rí asndu xóo ragíʼdoo numuu rí nakiéʼkulu. Jeobá naʼthúlúʼ xú káʼnii xa̱bu̱ eyoo mambaxúu gajmíi̱n (Sal. 15:1-5). Ikha jngó, á mu nandulúʼ mambaxúlúʼ gajmiúlú Dios, gíʼmaa muʼnimi̱jna̱ mu mbuʼyaridáá xkri̱da ndrígóo ga̱jma̱a̱ xkridoo A̱ʼdióo. Ma̱ngaa gíʼmaa muʼnimi̱jna̱ mu muʼni gaʼduunʼ dí ra̱májánʼ rí nagua̱ʼa̱ muʼni ga̱jma̱a̱ muʼgíiʼ muʼni gámbáa. Tséʼniuu má nguáthá tsiguʼ rí nijngúlú iyááʼ, gíʼmaa manindxu̱lúʼ itháan májáánʼ xa̱bi̱i̱ Jeobá (2 Cor. 13:11).

9. Xú káʼnii eʼyáá rí xóó ma̱ndoo muriʼkhumijná rí xóo xa̱bu̱ ni̱ndxu̱lú rá.

⁹ Apóstol Pablo nixná xtágabu rígi̱: “Ikháanʼ gíʼmaa muniʼñáaʼ runi rí enila nákha ginii xóo dí ra̱májánʼ rí nunila ga̱jma̱a̱ rí naʼni gachúu numuu rí nagua̱ʼa̱ dí ragájkhun”. Ga̱jma̱a̱ xóó niʼthí: “Mú gíʼmaa muriʼkhumijnála ga̱jma̱a̱ tsiakii ndrígóo edxa̱la, ga̱jma̱a̱ gíʼmaa muriʼkhumijnála dí xóo xa̱bu̱ ni̱ndxa̱la rí niguma xó má eyoo Dios rí jmbu ga̱jma̱a̱ rí gajkhun” (Efes. 4:22-24). Rígi̱ nandoo gáʼthi rí gíʼmaa muʼni mbá tsiakii mu manindxu̱lúʼ itháan májánʼ ga̱jma̱a̱ muriʼkhumijná rí ‹xóo xa̱bu̱ ni̱ndxu̱lú›. Ikha jngó tséʼniuu nguáthá má mba̱yu̱ʼ eʼni ñajunʼ Jeobá, xóó ma̱ndoo majmañulúʼ rí xú xa̱bu̱ nindxu̱u̱. Ga̱jma̱a̱ Biblia ma̱ndoo mambáyulúʼ manindxu̱lúʼ itháan májánʼ xa̱bu̱ mu xúʼko̱ ma̱ndoo mbuʼyaridáá Jeobá.

10. a) Ndiéjunʼ gíʼmaa muʼni mu Biblia mambáyulúʼ muriʼkhumijná má xúʼko̱ rá. b) Ndiéjunʼ eraximíjnalu rá.

¹⁰ Xúgiáanʼ nandulúʼ muʼnimbulúʼ rí naʼthí náa Biblia. Mú á mu nandulúʼ muriʼkumijná, gíʼmaa muʼnimi̱jna̱ itháan. Náa numuu eyóoʼ muʼni rígi̱ rá. Lá tsíyoo Jeobá maʼni rí xáʼniulu mingíjyúuʼ muʼni rí májánʼ ráʼ.

11-13. Náa numuu rí Jeobá nagiʼthu̱u̱n muʼnimi̱jna̱ mu muʼni gaʼduunʼ rí naʼni makiéʼkulú rá.

¹¹ Índo̱ nundxa̱ʼwa̱míjna̱ ga̱jma̱a̱ numuu xúgíʼ rí niʼni Jeobá, nduʼyáá májánʼ rí ikhaa gíʼdoo tsiakii mu maʼni asndu ndiéjunʼ má rí eyoo. Gundxaʼwamíjna̱ ga̱jma̱a̱ numuu A̱jkha̱ʼ. Mámbá segundo rí nanújngoo naxná wéñuʼ tsiakii. Mbá chíʼgíʼ tsiakii rúʼko̱ na̱ʼkha̱nú asndu náa Ku̱ba̱ʼ, mú rígi̱ nayambáá mu ma̱ndoo marigá vida ikhí (Sal. 74:16; Is. 40:26). Jeobá ma̱ngaa naxnún tsiakii xa̱bi̱i̱ bi̱ kuwa náa tsu̱du̱u̱ Ku̱ba̱ʼ índo̱ nda̱ñúnʼ (Is. 40:29). Ikha jngó tikhun nuraximíjná náa numuu rí Jeobá tséʼni rí xáʼniulu ra̱mingíjyúuʼ muʼni gaʼduunʼ dí ra̱májánʼ rí naʼni makiéʼkulú.

¹² Jeobá naniñulú mu muraʼwíí rí ikháanʼ eyulú muʼni. Ikhaa naniñuʼ muraʼwíí á mu muʼnimbulúʼ kuʼyáá o na̱nguá. Índo̱ nuraʼwíí muʼnimbulúʼ kuʼyáá ga̱jma̱a̱ nuʼnimi̱jna̱  muʼni rí ikhaa nandoo, nusngajmá rí nandulúʼ kuʼyáá ga̱jma̱a̱ nandulúʼ muʼni rí nandoo ikhaa. Satanás naʼthí rí Jeobá na̱nguá kaʼyoo maʼtáñajunlú. Mú índo̱ nuʼnimbulúʼ kuʼyáá, nusngajmá rí nandulúʼ rí ikhaa maʼtáñajunʼ. Ga̱jma̱a̱ Anu̱lú bi̱ nandoo kaʼyulú ndaʼyoo rí gíʼdoo wéñuʼ numuu xúgíʼ tsiakii rí nuʼnilú (Job 2:3-5; Prov. 27:11). Numuu rí Jeobá tséʼni rí xáʼniulu mingíjyúuʼ muʼni gaʼduunʼ dí ra̱májánʼ rí naʼni makiéʼkulú, tsiakii rí nu̱ʼni̱ masngájma rí ni̱ndxu̱lú jmbii ga̱jma̱a̱ rí nandulúʼ rí ikhaa maʼtáñajunlú.

¹³ Jeobá naʼthúlúʼ rí gíʼmaa muʼnimi̱jna̱ mu mbuʼyaridáá rí xú káʼnii nindxu̱u̱ ikhaa (Col. 3:12; atraxnuu 2 Pedro 1:5-7). * Ikhaa gíʼthu̱u̱n rí muxpriguíí rí xóo e̱ndxa̱ʼwáá edxu̱lúʼ ga̱jma̱a̱ rí nakumulú (Rom. 8:5; 12:9). Á mu nu̱ʼni̱ xúgíʼ rí eyóoʼ mu muriʼkhumijná ga̱jma̱a̱ naʼngulú nuʼnimbánii, makuwaanʼ gagi.

14, 15. Ndiéjunʼ gáʼyóóʼ muʼni mu manindxu̱lúʼ mbáa xa̱bu̱ bi̱ nandoo kaʼyoo Jeobá rá. (Atayáá kúgumaʼá “ Biblia ga̱jma̱a̱ rí nitajkháan niriʼkhu̱u̱ rí xóo xa̱bu̱ ninindxu̱ún”.)

¹⁴ Ndiéjunʼ gíʼmaa muʼni mu manindxu̱lúʼ mbáa xa̱bu̱ bi̱ nandoo kaʼyoo Jeobá rá. Ragíʼmaa muʼthá ikháanʼ ndiéjunʼ rí gáʼyóóʼ muriʼkhuʼ. Gíʼmaa muniʼñáaʼ rí Jeobá maxná ikhulú. Romanos 12:2 naʼthí: “Ga̱jma̱a̱ guniʼñáanʼ rundáwami̱jna̱ náa numbaaʼ rígi̱; mú itháan májánʼ, muriʼkhuíí xóo endxa̱ʼwa̱a̱  edxa̱la, mu ma̱ndoo mbu̱ya̱a̱ ikháanʼ mínanʼ dí májánʼ ga̱jma̱a̱ dí naniguuʼ ga̱jma̱a̱ xúgíʼ rí jmbu rí e̱nda̱ʼa̱ Dios”. Á mu nandulúʼ mbuʼyáá rí naniguuʼ Jeobá, gíʼmaa majmulúʼ xúgíʼ rí naxnúlú. Gíʼmaa muraxnuu Biblia xúgíʼ mbiʼi, mundxaʼwamíjna̱ rí eraxnuu ga̱jma̱a̱ munda̱ʼa̱a̱ xi̱ʼ kaʼwu ndrígóo (Luc. 11:13; Gál. 5:22, 23). Á mu nu̱ʼni̱ xúʼko̱, Jeobá mambáyulúʼ makru̱ʼu̱lú rí naniguuʼ ga̱jma̱a̱ majmañulúʼ mundxaʼwáá edxu̱lúʼ xóo ikhaa. Rúʼko̱ gáʼni rí gundxaʼwáá edxu̱lúʼ, rí gúʼthá ga̱jma̱a̱ rí gúʼni maniguuʼ itháan Jeobá. Mú, mbaʼyóoʼ muʼni gaʼduunʼ má xúʼko̱ dí ra̱májánʼ rí naʼni makiéʼkulú (Prov. 4:23).

¹⁵ Ma̱ngaa raʼkháa i̱ndó muraxnuu Biblia xúgíʼ mbiʼi, gíʼmaa muʼnigajmaa ga̱jma̱a̱ i̱ʼwáʼ i̱yi̱i̱ʼ xóo Bi̱ Nayejngoo ga̱jma̱a̱ ¡Despertad! Mbaʼa artículos ndrígóo revista rígi̱ naʼsngúlúʼ xú káʼnii guʼyaridáá rí xú xa̱bu̱ nindxu̱u̱ Jeobá ga̱jma̱a̱ xú káʼnii guʼni gaʼduunʼ dí ra̱májánʼ rí naʼni makiéʼkulú. Mbáa tikhuu artículos o textos ndrígóo Biblia nindxu̱u̱ rí phú ndayúlú. Ma̱ndoo muraxi̱i̱ mu muraxnuu índo̱ gáʼyulúʼ.

16. Náa numuu dí ragíʼmaa makáguabáanʼ á mu nakumulú rí tsiriʼkumijná nacha̱ wéñuʼ xóo eyulú rá.

¹⁶ Mbaʼyóoʼ mba̱yu̱ʼ mbiʼi mu majmañulúʼ mbuʼyaridáá rí xóo xa̱bu̱ nindxu̱u̱ Jeobá. Ikha jngó, gaʼngo̱o̱ a̱jkiu̱lú á mu nakumulú rí tsiriʼkumijná nacha̱ wéñuʼ xóo eyulú. Mbáa ginii mbaʼyóoʼ muʼni tsiakimijná mu muʼni rí naʼthí náa Biblia. Á mu itháan guʼnimi̱jna̱ mu mundxaʼwáá edxu̱lúʼ  ga̱jma̱a̱ muʼni rí nandoo Jeobá, itháan ra̱mingíjyúuʼ gaʼniulúʼ mundxaʼwáá edxu̱lúʼ xóo ikhaa ga̱jma̱a̱ muʼni rí jmbu (Sal. 37:31; Prov. 23:12; Gál. 5:16, 17).

17. Á mu naguajún jmbu náa Jeobá, xú káʼnii gakuwáanʼ nda̱wa̱á rá.

¹⁷ Nandulúʼ rí ma̱ʼkha̱nú mbiʼi rí ní xáguaʼdáá aʼkhá ga̱jma̱a̱ muʼni ñajunʼ Jeobá kámuu mbiʼi. Ikhú ní xáʼyóoʼ muʼni gaʼduunʼ dí ra̱májánʼ rí naʼni makiéʼkulú. Ní xáʼniulu miʼskhoo mbuʼyaridáá Jeobá. Mú maski ajndu ni̱ndxu̱lú xa̱bu̱ aʼkhá ma̱ndoo mbuʼyamajkuíí ga̱jma̱a̱ numuu rí niʼtsiwáanʼ. Á mu nuʼnimi̱jna̱ mu muriʼkhumijná ga̱jma̱a̱ muʼnimbulúʼ rí naʼsngáa Jeobá náa Biblia, ma̱ndoo muʼni rí naniguuʼ.

18, 19. Ndiéjunʼ esngájma rí Biblia gíʼdoo tsiakii mu mariʼkhuu rí xóo xa̱bu̱ ni̱ndxu̱lú rá.

¹⁸ Nákha nigíʼdi̱i̱, niʼthá ga̱jma̱a̱ numuu Kevin, mbáa ndxájulú bi̱ naʼniminaʼ mu xákiʼnáa me̱ndaʼkho. Ikhaa nindxa̱ʼwáminaʼ rí niguxnuu náa Biblia ga̱jma̱a̱ niʼni mbá tsiakii mu mariʼkuminaʼ. Ma̱ngaa, niʼdxuun xtágabu ndrígu̱ún eʼwíínʼ cristianos. Maski ajndu ndijyúuʼ mba̱yu̱ʼ tsiguʼ mu mariʼkuminaʼ, nda̱wa̱á ninindxu̱u̱ siervo ministerial. Ga̱jma̱a̱ naʼni mbá 20 tsiguʼ rí kayá edxu̱u̱ náa nagimbáanʼ. Mú naku̱mu̱u̱ rí xóó ndayóoʼ maʼniminaʼ mu mariʼkhuu rí xóo xa̱bu̱ nindxu̱u̱.

¹⁹ Xó má Kevin, mangáanʼ ma̱ndoo manindxu̱lúʼ itháan májánʼ xa̱bu̱. Á mu nu̱ʼni̱ má xúʼko̱, mambaxúlúʼ itháan májánʼ gajmiúlú Jeobá (Sal. 25:14). Guʼni xúgíʼ rí eyóoʼ mu muʼni rí naniguuʼ ga̱jma̱a̱ ikhaa gambáyulú. Ma̱ndoo mbuʼyáá májánʼ rí Biblia gíʼdoo tsiakii mu mariʼkhuu rí xóo xa̱bu̱ ni̱ndxu̱lú (Sal. 34:8).