ARTÍCULO RÍ MUʼNIGAJMAA 18
Guguaʼdáá metas rí maʼngulú muʼnimbaníí
“Atatsaʼwáminaʼ má xúʼko̱ ga̱jma̱a̱ numuu rígi̱, ataniminaʼ asndu xó má eʼnga̱a̱ʼ mu matanimbaníí, xúʼko̱ xúgíinʼ gúyáá rí nadxu̱ʼ ratani̱ itháan májánʼ” (1 TIM. 4:15).
AJMÚÚ 84 Guyambáá náa ndayóoʼ
RÍ MUʼNIGAJMAA a
1. Ndiéjunʼ metas gíʼmaa muguaʼdáá rá.
IKHÁANʼ bi̱ ni̱ndxu̱lú cristianos gajkhun nandulú kuʼyáá Jeobá, ikhaa jngóo nandulú mu̱ʼni̱ ñajuunʼ xó má eʼngo̱o̱. Mu ma̱ndoo mu̱ʼni̱ rígi̱ ndayóoʼ muguaʼdáá metas, xóo rí manindxu̱lú mbáa májáanʼ cristiano, majmañulú i̱ʼwáʼ dí nuxi̱ʼ ga̱jma̱a̱ rí mumbáñúnlú eʼwíinʼ. b
2. Ndíjkha dí gíʼdoo numuu muguaʼdáá metas dí mu̱ʼni̱ itháan ñajuunʼ Dios ga̱jma̱a̱ náá numuu dí ndayóoʼ muʼnimbáníí rá.
2 Ndíjkha dí gíʼdoo numuu muguaʼdáá metas dí mu̱ʼni̱ itháan ñajuunʼ Dios ga̱jma̱a̱ náá numuu dí ndayóoʼ muʼnimbáníí rá. Timbá, numuu dí nandulú maxtáa gagi Anu̱lú Jeobá, ikhaa nandoo dí majmulú májánʼ rí najmañulú, dí nakru̱ʼu̱lú mu mu̱ʼni̱ ñajuunʼ. Ma̱ngaa nandulú dí manindxu̱lú itháan májáanʼ cristiano mu ma̱ndoo mumbáñún itháan a̱ngiu̱lú (1 Tes. 4:9, 10). Tséʼniuu má nguáthá tsiguʼ kuwáánʼ náa dí gajkhun ndayóoʼ mu̱ʼni̱ mbaja̱a̱ dí nambájxulu gajmiúlú Dios. Guʼyáá xú káʼnii gándoo mu̱ʼni̱.
3. Ndiéjunʼ consejo rí Pablo nixnúu Timoteo rá. (1 Timoteo 4:12-16.)
3 Índo̱ Pablo niʼnirámáʼ timbá i̱yi̱i̱ʼ náa inuu Timoteo ikhaa kaʼníí nindxu̱u̱ dxámá, mú nakro̱ʼo̱o̱ má dí xóo najmañuu mbáa bi̱ kayá edxu̱u̱, maski ajndu xúʼko̱ Pablo nimbáyúu mu mani̱ndxu̱u̱ mbáa májáanʼ xa̱bi̱i̱ Jeobá (atraxnuu 1 Timoteo 4:12-16). c Á mu nundxaʼwamíjná náa ajngáa dí nijmuu Pablo na̱jkua̱nú nduʼyáá dí ikhaa nindoo dí Timoteo magíminaʼ maʼnimbánuu náa mbá nájma̱ rígi̱. Timbá, dí magiʼdoo cualidades dí nasngájma dí nindxu̱u̱ mbáa májáanʼ cristiano, xóo dí magiʼdoo ngajua, fe ga̱jma̱a̱ dí mani̱ndxu̱u̱ kaʼwu rí gáʼni. Raga̱jma̱, dí majmañuu maguxnuu májánʼ náa inún mbaʼiin xa̱bu̱, dí maxná consejo ga̱jma̱a̱ dí maʼsngáa májánʼ. Náa artículo rígi̱ mbuʼyáá ndiéjuunʼ gándoo gájmañulú náa xkridoo Timoteo xóo rí muguaʼdáá metas dí mambáyulú mbaja̱a̱ dí nambájxulú gajmiúlú Dios. Ma̱ngaa mbuʼyáá ndiéjunʼ gándoo gámbáyulú mu mu̱ʼni̱ itháan ñajuunʼ Dios.
GUGUAʼDÁÁ CUALIDADES RÍ MAMBÁYULÚ MANINDXU̱LÚ MÁJÁANʼ CRISTIANO
4. Xó má eʼthí náa Filipenses 2:19-22, náá numuu dí Jeobá nijmiuu Timoteo rá.
4 Náá numuu dí Jeobá nijmiuu Timoteo mu maʼni ñajuunʼ rá. Numuu dí nigiʼdoo májánʼ cualidades (atraxnuu Filipenses 2:19-22). d Rí xóo Pablo niʼthí ga̱jma̱a̱ numuu Timoteo, naʼni mbuʼyáá dí ninindxu̱u̱ mbáa xa̱bu̱ guabaaʼ, jmbii, xa̱bu̱ nañajunʼ ga̱jma̱a̱ bi̱ maku̱ma̱a̱ʼ xtayáá. Nindoo kaʼñún a̱ngiu̱lú ga̱jma̱a̱ nixmiéjuunʼ kaʼñún. Ikhaa jngóo, Pablo ra̱ʼkhá tháán nindoo kaʼyoo, nixnúu ñajunʼ dí mingíjyúuʼ mu maʼnimbánuu numuu rí ndiʼyoo dí majmaaʼ maʼni (1 Cor. 4:17). Á mu nuguaʼdáá cualidades dí Jeobá nanigu̱u̱ʼ maʼndoo kaʼyulú ga̱jma̱a̱ maxnúlú mbaʼa ñajunʼ dí mu̱ʼni̱ náa congregación (Sal. 25:9; 138:6).
Atatsaʼwáminaʼ náa mbá cualidad dí nandaaʼ maraʼdáá. (Atayáá kutriga̱ 5 ga̱jma̱a̱ 6).
5. a) Xú gándoo gúʼyáá á mu rígá rí ndayóoʼ muriʼkhu̱u̱ xóo ni̱ndxu̱lú rá. b) Ndiéjunʼ eʼni ndxájulú dxáʼgú mu masngájma dí nagáwíinʼ a̱jkiu̱u̱n xó má kujmaa náa xtiʼkhuu rá.
5 Guʼnimíjna muʼnimbáníí rí ndayóoʼ. Guʼtákañíí Jeobá mu mambáyulú mbuʼyáá náa rí ndayóoʼ muriʼkhu̱u̱ xóo xa̱bu̱ ni̱ndxu̱lú. Guraʼwíí mbá rí nandulú mu̱ʼni̱ ga̱jma̱a̱ guʼnimíjna muʼnimbáníí. Á mu nduʼyáá dí xóó ndayóoʼ makumulú xóo eku̱mu̱u̱ i̱mba̱a̱, rí mumbáñún itháán eʼwíinʼ o rí mu̱ʼni̱ mba̱a̱ a̱jkiu̱lú kuʼñúún, guʼnimíjna muʼnimbáníí. Á mu tséʼngulú gúʼyáá, gura̱jxi̱i̱ mbáa bi̱ nambájxulú gajmiúlú ndiéjunʼ rí ndayóoʼ muriʼkhu̱u̱ eʼyoo ikhaa (Prov. 27:6).
6. Xú káʼnii gándoo gúʼni mu muʼnimbaníí meta ndrígúlú á mu nandulú muguaʼdáá mbá cualidad rá.
6 Guʼnimíjna muʼnimbáníí meta ndrígúlú. Xú káʼnii rá. Ma̱ndoo muʼnigajma̱a̱ ga̱jma̱a̱ numuu cualidad dí nandulú muguaʼdáá. Mbá xkri̱da, á mu nandulú dí mu̱ʼni̱ mba̱a̱ a̱jkiu̱lú kuʼñúún eʼwíinʼ, májánʼ gáʼni dí muraxnuu ga̱jma̱a̱ mbuʼyáʼ xkri̱da ndrígu̱ún xa̱bu̱ bi̱ nikúwá nákha wajyúuʼ bi̱ nini̱ mba̱a̱ a̱jkiu̱ún kuñúún eʼwíinʼ ga̱jma̱a̱ bi̱ na̱nguá ga̱jma̱a̱ mundxaʼwamíjna̱ rí xóo ikhiin nini̱. Jesús nindxu̱u̱ mbá májánʼ xkri̱da, ikhaa niʼni mba̱a̱ a̱jkiu̱u̱n kaʼñúún eʼwíinʼ (Luc. 7:47, 48). Táʼyoo náa rí niʼni tígu̱u̱n, ndiʼyoo náa rí najmiin nuni̱. Mú fariseos nindxaʼwamíjna̱ “dí eʼwíinʼ nda̱a̱ numún” (Luc. 18:9). Nda̱wa̱á rí nindxa̱ʼwa̱míjnalú ga̱jma̱a̱ numuu rígi̱, ma̱ndoo murajximíjna̱: “Xú káʼnii eñu̱u̱n eʼwíinʼ rá. Ndiéjunʼ cualidad rí nda̱yo̱o̱ náa ikhiin xá.” Á mu naʼniulú mingíjyúuʼ mu̱ʼni̱ mba̱a̱ a̱jkiu̱lú kuʼyáá mbáa, guʼnirámáʼ náa i̱yi̱i̱ʼ xúgíʼ cualidad dí gíʼdoo ga̱jma̱a̱ guraximíjna̱: “Xú káʼnii eʼyoo Jesús xá. Lá maʼni mba̱a̱ a̱jkiu̱u̱n kaʼyoo xáʼ.” Á mu nuʼnilú xígi̱ kaʼnii mambáyulú muriʼkhu̱u̱ xóo endxaʼwamíjna̱. Mbáa índo̱ ndiʼkhú mugíʼdi̱i̱ maʼniulú mingíjyúuʼ mu̱ʼni̱ mba̱a̱ a̱jkiu̱lú kuʼyáá mbáa bi̱ niʼniulúʼ dí raʼkhí, mú majmáán mu̱ʼni̱ á mu nuʼni tsiakimijna muriʼkhu̱u̱ xóo xa̱bu̱ ni̱ndxu̱lú.
GAJMAÑULÚ RÍ MAMBÁYULÚ MU̱ʼNI̱ ÑAJUUNʼ DIOS
Gajmañaaʼ matani̱ ñajunʼ dí narígá náa Guʼwá nagimbáanʼ. (Atayáá kutriga̱ 7). i
7. Xú káʼnii ejmiuu Jeobá dí mbiʼi xúgi̱ xa̱bu̱ bi̱ najmañuu tikhuu ñajunʼ rá. (Proverbios 22:29.)
7 I̱mba̱ meta dí ma̱ndoo muguaʼdáá nindxu̱u̱ dí majmañulú mbá dí nuxi̱ʼ. Gundxaʼwamíjna̱ ga̱jma̱a̱ numún a̱ngiu̱lú bi̱ nuruguambáá maguma sucursal, Guʼwá náa narígá Asambleas ga̱jma̱a̱ náa Guʼwá nagimbáanʼ. A̱ngiu̱lú bugi̱ nijmañún numuu dí niñejunʼ gajmiún bi̱ nakru̱ʼu̱u̱n májánʼ. Xó má nakujmaa náa xtiʼkhuu, xa̱bekha ga̱jma̱a̱ gu̱ʼu̱ kúwá rajmañún xóo muni̱ kaʼwi̱i̱ Guʼwá náa nagimbáanʼ ga̱jma̱a̱ náa narígá Asambleas. Jeobá bi̱ nindxu̱u̱ “Rey bi̱ xtáa kámuu”, ga̱jma̱a̱ Jesús bi̱ nindxu̱u̱ “Rey náa bi̱ nutañajunʼ xóo reyes”, najmiún xa̱bu̱ bugi̱ mu muni̱ ñajunʼ dí gíʼdoo numuu (1 Tim. 1:17; 6:15; atraxnuu Proverbios 22:29). e Ikhaa jngóo gajmulú dí najmañulú nu̱ʼni̱ mu mu̱ʼni̱ mba̱a̱ Jeobá, raʼkháa ikháánʼ (Juan 8:54).
8. Ndiéjunʼ gándoo mu̱ʼni̱ mu mbuʼyáá náa rí ndayúlú muriʼkhu̱u̱ rá.
8 Atagíminaʼ matanimbáníí rí ndayóoʼ. Ndiéjunʼ rí ndayóoʼ muriʼkhu̱u̱ xóo ni̱ndxu̱lú rá. Ma̱ndoo muʼtamíjná gajmiúlú bi̱ kuya̱ edxu̱u̱ náa nagimbáanʼ o ndxájulú circuito mu muthulú náá dí ikhiin nduyáá dí ndayóoʼ mu̱ʼni̱ itháan májánʼ. Á mu nutulúʼ dí ndayóoʼ muxná itháán májánʼ discurso o muʼsngáa itháan májánʼ, ma̱ndoo muraxu̱u̱n ndiéjuunʼ dí itháan ndayóoʼ muʼnilú, nda̱wa̱á guʼgimijna̱ mu̱ʼni̱ dí nitulúʼ. Xú káʼnii rá.
9. Ndiéjunʼ gíʼmaa matani̱ mu marasngáa májánʼ rá.
9 Guʼnimíjna muʼnimbáníí meta ndrígúlú. Á mu nandaaʼ marasngáa itháan májánʼ, ma̱ndoo matanigajma̱a̱ folleto Gajmañaaʼ matraxnuu ga̱jma̱a̱ marasngáa májánʼ. Ga̱jma̱a̱ índo̱ gáraxnajxí dí kaʼyaaʼ náa reunión dí narígá ta̱pha̱ xmáná, ginii ma̱ndoo matrajxi̱i̱ mbáa ndxájulú bi̱ najmañuu mu maʼdxawaanʼ ga̱jma̱a̱ maʼtháanʼ náá ndayóoʼ. Á mu natani̱ rataminaʼ wapháá dí maraxnaxí rúʼko̱ gáʼni dí mani̱ndxa̱a̱ʼ mbáa bi̱ naʼsngáa májánʼ ga̱jma̱a̱ eʼwíinʼ mbuyáá dí nindxa̱a̱ʼ mbáa xa̱bu̱ bi̱ nañejunʼ májánʼ ma̱ngaa bi̱ naʼnimbánuu májánʼ ñajunʼ ndrígóo (Prov. 21:5; 2 Cor. 8:22).
10. Ndiéjunʼ gándoo mu̱ʼni̱ mu majmáán mu̱ʼni̱ mbá rí tséjmáán gúʼni rá. Arathá mbá xkri̱da.
10 Ndiéjunʼ gándoo mu̱ʼni̱ mu majmáán mu̱ʼni̱ mbá rí tséjmáán gúʼni rá. ¡Xákanajkulú! Guʼyáá xkridoo ndxájulú Garry, bi̱ naʼniuu mingíjyúuʼ maguxnuu. Ikhaa narmáʼáan a̱jkiu̱u̱n dí nati̱yu̱u̱ʼ wéñuuʼ índo̱ naguxnuu náa reunión, mú ikhaa tákánajkooʼ niʼni tsiakimínáʼ mu maguxnuu. Núma̱aʼ má dí a̱ngiu̱lú nimbayíí ma̱ngaa dí niguxnuu i̱yi̱i̱ʼ ndrígúlú, dí xúgi̱ naxnáxi májánʼ discurso náa reunión ga̱jma̱a̱ náa asamblea.
11. Xó má Timoteo, ndiéjunʼ gámbáyulú mu makuwáánʼ xawii mundrígú itháan ñajunʼ rá.
11 Lá Timoteo ninindxu̱u̱ mbáa bi̱ nixná májánʼ discurso o nijmañuu niʼsngáa májánʼ ráʼ. Náa Biblia tséʼthí, mú nduʼyáá dí ikhaa niʼnimbánuu consejo ndrígóo Pablo. Mbáa rúʼko̱ nimbáyúu dí mañu mañuu nijmañuu maʼni itháan májánʼ ñajunʼ dí nikhánáá (2 Tim. 3:10). Xó má Timoteo, á mu najmañulú itháan májánʼ mu̱ʼni̱ ñajunʼ, mundrígú itháán ñajunʼ mu̱ʼni̱.
GUʼYÁʼ XÓO MUMBÁÑÚN EʼWÍINʼ
12. Xú káʼnii nimbayáaʼ eʼwíinʼ ikháán rá.
12 Nakuwáánʼ gagi índo̱ eʼwíinʼ numbayúlúʼ. Mbá xkri̱da, índo̱ kuwáánʼlú náa hospital nduʼyáa tsiakii índo̱ nagún gúyulú a̱ngiu̱lú bi̱ kúwá náa Comité bi̱ nuyambáá náa Hospital o a̱ngiu̱lú bi̱ nagún ruñún bi̱ naʼniún nandii. Índo̱ kuwáánʼ ranújngulú mbá awúu̱n ga̱ʼkhu̱ ra̱ʼkhá tháán nuxnáa núma̱aʼ índo̱ a̱ngiu̱lú bi̱ kuya̱ edxu̱u̱ nuri̱ya̱ʼ mbiʼi mu mudxawúnlú ga̱jma̱a̱ muni̱i̱ a̱jkiu̱lú. Á mu naʼniulú mingíjyúuʼ muʼsngáá mbáa xa̱bu̱ ga̱jma̱a̱ numuu Biblia naʼni̱i̱ a̱jkiu̱lú índo̱ nduʼyáá dí xtáa xawii mbáa precursor bi̱ najmañuu mu mambáyulú ga̱jma̱a̱ maʼthúlú dí gíʼmaa mu̱ʼni̱ mu muʼsngáa itháan májánʼ. Jesús niʼthí: “Rígá itháan gagi dí maraxna̱ ki xóo dí makánaa’” (Hech. 20:35). Xúgíinʼ a̱ngiu̱lú bugi̱ kúwá gagi dí numbañún eʼwíinʼ. Mangáanʼ ma̱ndoo makuwáanʼ gagi á mu nu̱ʼni̱ xúʼko̱. Á mu nandulú mu̱ʼni̱ itháan ñajuunʼ Jeobá, ndiéjunʼ rí ma̱ndoo mu̱ʼni̱ rá.
13. Índo̱ gúʼgimi̱jna̱ mbá meta, ndiéjunʼ gíʼmaa mbuʼyáá rá.
13 Xátaʼyáʼ mbá rí maʼniaaʼ mingíjyúuʼ matanimbáníí. Mbá xkri̱da, ikháán naratá: “Nandoʼ mayambáá itháan náa congregación”. Mú naʼniaaʼ mingíjyúuʼ ma̱ta̱ya̱a̱ náá gátagíʼdi̱i̱ ga̱jma̱a̱ tsíyoo gáta̱ya̱a̱ á mu najmáán natani̱ o na̱nguá. Itháan májánʼ gáʼni dí matraʼwi̱i̱ mbá dí majmáán matani̱. Mbáa ma̱ndoo mataniraʼmáʼ ndiéjunʼ gándoo gátani̱ mu matanimbaníí.
14. Ndíjkha jngóo ndayóoʼ mu̱ʼni̱ tsumáá índo̱ gúraʼwíí mbá dí nandulú muʼnimbáníí rá.
14 Tsumáá gúraʼwíí mbá dí nandulú muʼnimbáníí. Náá numuu rá. Numuu dí xájmáán gúʼnimbáníí xúgíʼ ga̱jma̱a̱ numuu dí xóo kuwáánʼlú. Mbá xkri̱da, apóstol Pablo niñambáá mu marigá congregación náa Tesalónica, mbáa nindxa̱ʼwáminaʼ dí maguanúu ikhí nguáthá mbiʼi mu mambáñún a̱ngiu̱lú. Mú bi̱ tsíñún gúyáá nixkriya̱a̱ʼ náa xuajin rúʼko̱ (Hech. 17:1-5, 10). Á mu niguanúu ikhí asndu migamíi maguma gíníin bi̱ kúwá náa congregación. Mú Pablo tákánajkooʼ, niraʼwíí dí maʼni, numuu dí nda̱wa̱á nikuʼmaa maʼga Timoteo mu mambáñún maʼni gujkhuʼ fe ndrígu̱ún a̱ngiu̱lú bi̱ kúwá náa Tesalónica (1 Tes. 3:1-3). Ra̱ʼkhá tháán nidxún a̱ngiu̱lú bugi̱ índo̱ ndiyáá dí Timoteo nindoo mañambáá asndu náá má.
15. Atagíʼ mbá xkri̱da xú káʼnii gándoo gáxtiʼkhuu meta ndrígúlú á mu naxtiʼkuu xóo kuwáánʼ.
15 Ma̱ndoo majmañulú náa xkridoo Pablo ga̱jma̱a̱ dí nigíʼnuu náa Tesalónica. Mbáa rígá mbá meta dí nandulú muʼnimbáníí xóo mu̱ʼni̱ ñajuunʼ Jeobá, mú mbá nacha̱ naxtiʼkhuu xóo kuwáánʼ, ikhaa jngóo nánguá eʼngulú gúʼnimbáníí (Ecl. 9:11). Ndiéjunʼ gúʼni̱ rá. Ma̱ndoo muʼgimi̱jna̱ i̱mba̱ meta dí majmáán muʼnimbáníí. Xúʼko̱ kaʼnii nigíʼnuu ndxájulú Ted ga̱jma̱a̱ Hiedi. Ga̱jma̱a̱ numuu dí niʼniún nandii ndiyóoʼ magajníín náa Betel. Ikhiin nandún kuyáá Jeobá ikhaa jngóo mbá nacha̱ ndiyáʼ i̱mba̱ xú káʼnii mu̱ni̱ ñajuunʼ. Ginii ninindxu̱ún precursores regulares, nda̱wa̱á ninindxu̱ún precursores especiales, Ted nigumarataa mu mani̱ndxu̱u̱ sustituto ndrígóo circuito. Ikhú tsiguʼ dí mani̱ndxu̱u̱ superintendente de circuito nixtiʼkuu, Ted ga̱jma̱a̱ Hiedi ndiyáá dí ní xándoo muni̱ ñajunʼ rúʼko̱. Maski ajndu niʼniún mingíjyúuʼ mú ndiyáá dí rígá i̱mba̱ xóo ma̱ndoo muni̱ ñajuunʼ Jeobá. Ted naʼthí: “Nijmañunxu̱ dí raʼkháa rígá mbóó dí xóo ma̱ndoo munixu̱ʼ ñajuunʼ Jeobá”.
16. Ndiéjunʼ eʼsngúlú Gálatas 6:4 rá.
16 Xándoo muriʼkhu̱u̱ xóo kuwáánʼlú. Ikhaa jngóo gíʼmaa marmáʼáan a̱jkiu̱lú dí naʼni maguaʼdáá numulú náa Jeobá raʼkháa ga̱jma̱a̱ numuu ñajunʼ dí niguáʼdáá. Nda̱a̱ rí eyambáá dí mbuʼyáá ñajunʼ dí guáʼdáá eʼwíinʼ dí ra̱guaʼdáálú ikháánʼ. Hiedi naʼthí: “Á mu nu̱ʼni̱ mbríguii dí xóo kuwáánʼ ga̱jma̱a̱ xóo kúwíin eʼwíinʼ maʼni dí xákuwáánʼ tsímáá” (atraxnuu Gálatas 6:4). f Rí itháan májánʼ dí ma̱ndoo mu̱ʼni̱ nindxu̱u̱ dí mbuʼyáʼ má xúʼko̱ xóo mu̱ʼni̱ ñajuunʼ Jeobá ga̱jma̱a̱ dí mumbáñún eʼwíinʼ. g
17. Ndiéjunʼ gándoo matani̱ mu makhánaa itháan ñajunʼ rá.
17 Á mu na̱nguá etayáʼ maraʼdáá wéñuuʼ ga̱jma̱a̱ na̱nguá gíʼmáán, ma̱ndoo maraʼdáá itháán mbiʼi mu makhánaa itháan ñajunʼ. Atagimínáʼ asndu xúgi̱ metas rí mambáyáaʼ maraʼdáá i̱ʼwáʼ metas nda̱wa̱á. Mbá xkri̱da, á mu nandaaʼ mani̱ndxa̱a̱ʼ precursor regular ginii ma̱ndoo mani̱ndxa̱a̱ʼ precursor auxiliar o á mu nandaaʼ mani̱ndxa̱a̱ʼ siervo ministerial, ma̱ndoo marataráʼa itháan, mi̱dxu̱ʼ gátañu̱u̱n a̱ngiu̱lú wanii ga̱jma̱a̱ bi̱ naʼniún nandii bi̱ kúwá náa congregación. Xúgíʼ dí gájmañaaʼ matani̱ xúgi̱ mambáyáaʼ dí makhánaa itháan ñajunʼ nda̱wa̱á. Tséʼniuu asndu xú káʼnii má, atani̱ ga̱jma̱a̱ xúgíʼ a̱jkia̱a̱nʼ ñajuunʼ Jeobá (Rom. 12:11).
Atraʼwíí mbá meta dí maʼnga̱a̱ʼ matanimbáníí. (Atayáá kutriga̱ 18). j
18. Ndiéjunʼ eʼsngúlú xkridoo Beverley rá. (Ma̱ngaa atayáá xtiʼkhuu.)
18 Tséʼniuu á mu waniáán ma̱ndoo muʼgimi̱jna̱ metas ma̱ngaa dí muʼnimbáníí. Guʼyáá xkridoo mbáa ndxájulú bi̱ gíʼdoo 75 tsiguuʼ bi̱ mbiʼyuu Beverley. Ga̱jma̱a̱ numuu mbá nandii dí gíʼdoo naʼni dí tsíyoo maʼga májánʼ, mú nindoo mayambáá náa mixnaráʼa invitación ndrígóo Conmemoración. Ikhaa niʼni asndu xó má eʼngo̱o̱ mu mayambáá, ra̱ʼkhá tháán nixtáa gagi índo̱ niʼngo̱o̱ niʼnimbánuu. Tsiakii dí niʼni nimbáñún eʼwíinʼ mu mutaraʼa itháan. Jeobá ndaʼyoo dí gíʼdoo numuu tsiakii dí nuni̱ a̱ngiu̱lú wanii maski má tséʼngu̱u̱n gúni̱ wéñuuʼ (Sal. 71:17, 18).
19. Xú kaʼnii tikhu meta rí ma̱ndoo muʼgímíjnálú rá.
19 Guʼgimíjna̱ meta rí maʼngulú muʼnimbáníí. Guʼnimíjna muguaʼdáá cualidades dí nanigu̱u̱ʼ Jeobá. Gajmañulú i̱ʼwáʼ dí mu̱ʼni̱ mu xúʼko̱ Dios ga̱jma̱a̱ xuajñuu muxnulú ñajunʼ dí mu̱ʼni̱. Guʼyáá xóo mumbáñún a̱ngiu̱lú, h á mu nu̱ʼni̱ xúʼko̱ Jeobá maʼni tsajkuramáánʼlú, ma̱ngaa muguaʼníí xó má Timoteo, xúgíinʼ mbuyáá rí naʼngulú nu̱ʼni̱ (1 Tim. 4:15).
AJMÚÚ 38 Jeobá gáñe̱wa̱nʼ
a Timoteo nijmañuu niʼtáráʼa májánʼ, maski ajndu xúʼko̱ Pablo nimbáyúu mu mani̱ndxu̱u̱ itháan májáanʼ cristiano. Timoteo niʼnimbo̱o̱ consejo dí nixnúu Pablo ikhaa jngóo Jeobá nijmiuu mu maʼni mbaʼa ñajunʼ, ma̱ngaa nimbáñún mbaʼiin a̱ngiu̱lú. Lá natani̱ xó má niʼni Timoteo ráʼ. Lá nandaaʼ matani̱ itháan ñajuunʼ Jeobá ga̱jma̱a̱ matambáñún a̱ngiu̱lú ráʼ. Mbáa xúʼko̱. Ndiéjunʼ meta gándoo maraʼdáá mu ma̱ndoo matani̱ ráʼ. Ndiéjunʼ gíʼmaa ma̱ta̱ya̱a̱ nákhi xóó tsétraʼwíí meta ndrígáaʼ ga̱jma̱a̱ ndiéjuunʼ gátani̱ mu mataxkamaa rá.
b KU̱MA̱ RÍ GÍʼDOO NUMUU: Rí muguaʼdáá metas nambáyulú mu mu̱ʼni̱ itháan ñajuunʼ Jeobá ga̱jma̱a̱ dí mu̱ʼni̱ maxtáa gagi.
c 1 Timoteo 4:12-16: “Xátatsiʼñánʼ rí nimbáa xáʼyámajkuaaʼ numuu rí kaʼníí dxámá nindxa̱a̱ʼ. Ataniminaʼ rí mani̱ndxa̱a̱ʼ mbá xkri̱da náa bi̱ guájun jmbu, dí xóo naratá, rí natani̱, ngajua rí xtaʼdáá, fe ndrígáaʼ ga̱jma̱a̱ ganindxu̱u̱ kaʼwu rí gátani̱. Nákha xóó tséjkhánú ataniminaʼ má xúʼko̱ rí matraxnuu náa inún mbaʼin xa̱bu̱, rí maraxna consejo ma̱ngaa marasngáa. Xátatsiʼñánʼ rí Dios nixnáaʼ ga̱jma̱a̱ rí nitandrígú náa mbá kiʼtáriyaʼ índo̱ mbá nguéjmi̱i̱n bi̱ kuya̱ edxu̱u̱ nixkrama̱a̱nʼ. Atatsaʼwáminaʼ má xúʼko̱ ga̱jma̱a̱ numuu rígi̱, ataniminaʼ asndu xó má eʼnga̱a̱ʼ mu matanimbaníí, xúʼko̱ xúgíinʼ gúyáá rí nadxu̱ʼ ratani̱ itháan májánʼ. Atiejxi̱i̱ tsumáá wéñuuʼ rí natani̱ ga̱jma̱a̱ dí narasngáa, xátatsiʼñánʼ ratani̱ rígi̱ numuu rí xúʼko̱ matanikríyaminaʼ ikháán ga̱jma̱a̱ bi̱ nudxawaanʼ”.
d Filipenses 2:19-22: “Rí xúgi̱, gúʼthu̱u̱n náa Tátá Jesús rí makuʼmáa Timoteo náa ikháanʼla, mu xúʼko̱ mba̱ya̱a̱ tsiakii índo̱ gádxun xóo kuwáanʼla. Numuu rí na̱nguá gúʼdaa i̱mba̱a̱ bi̱ naʼni xóo ikhaa, bi̱ gajkhun naxmiéjuunʼ kaʼyala. Numuu rí eʼwíinʼ i̱ndó nduyáʼ rí nandún ikhiin, raʼkháa rí nandoo Jesucristo. Ikháanʼ má ndu̱ya̱a̱ májánʼ rí nisngájma xóo nindxu̱u̱, numuu rí niñejunʼ gakhi̱i̱ wéñuuʼ ga̱jma̱á nindxu̱ʼ mu miʼtáraʼa ajngáa rí májánʼ, xóo eʼni mbáa ada̱ ga̱jma̱a̱ anu̱u̱”.
e Proverbios 22:29: “Nitayáá mbáa xa̱biya̱ bi̱ nañajunʼ májánʼ wéñuʼ raʼ. Náa inún reyes gáxtáa rañajunʼ; xáxtáa náa inún xa̱bu̱ bi̱ nda̱a̱ numún”.
f Gálatas 6:4: “Mú mámbáa gíʼmaa mbaʼyoo rí naʼni mu xúʼko̱ magiʼdoo mbá numuu rí maʼdxuu dí ikhaa niʼni, ma̱ngaa rí xáʼni mbríguminaʼ ga̱jma̱a̱ i̱mba̱a̱ xa̱bu̱”.
g Atayáá dí kayá edxu̱u̱ “Servir donde se necesita ayuda”, dí na̱ʼkha̱ náa libro Organizados para hacer la voluntad de Jehová, capítulo 10, kutriga̱ 6 asndu 9.
h Atayáá kíxnuu 60, rí kayá edxu̱u̱ “Gambaxáaʼ itháan ga̱jma̱a̱ʼ Dios”, dí na̱ʼkha̱ náa libro ¡Araxtaa gagi kámuu mbiʼi!.
