1. Tsáá niʼni dí ma̱ndoo muʼthá rá.

 NUMUU rí Jeobá nandoo kaʼyulú, ikhaa niʼni rí ma̱ndoo muʼthá. Ga̱jma̱a̱ numuu regalo rígi̱, timbáa xa̱biya̱ bi̱ nigumbiʼyuu Adán, nindoo maʼtámijná ga̱jma̱a̱ Anu̱u̱ bi̱ xtáa mekhuíí índo̱ ikhaa nigumaa. Ma̱ngaa ma̱ndoo maʼnirámáaʼ itháan ajngáa dí maʼthí. Rúʼko̱ nimbáyúu maʼnimbánuu ñajunʼ dí maxná mbiʼñún xúgíinʼ xujkhúʼ (Gén. 2:19). Ga̱jma̱a̱ ra̱ʼkhá tháán nidxuu índo̱ niʼtámíjná timbá aphu ga̱jma̱a̱ i̱mba̱a̱ xa̱bu̱, ikhaa ninindxu̱u̱ Eva bi̱ ninindxu̱u̱ a̱ʼgiu̱u̱ (Gén. 2:22, 23).

2. Xú káʼnii niʼni rí tájmún májánʼ dí nuthi asndu má nákha wájyúuʼ ga̱jma̱a̱ asndu mbiʼi xúgi̱ xa̱bu̱ rá.

² Mú regalo rúʼko̱ tájyúuʼ má niʼni rí na̱nguá nijmún májánʼ. Gixa̱a̱ niʼninduwaaʼ Eva, ga̱jma̱a̱ numuu nduwaʼ rúʼko̱ niʼni dí manindxu̱lú xa̱bu̱ aʼkhá (Gén. 3:1-4). Adán tájmuu májánʼ dí maʼthí índo̱ niʼthí dí Eva ga̱jma̱a̱ Jeobá nigiʼdoo aʼkhúun ga̱jma̱a̱ rí nikiéʼkhún (Gén. 3:12). Caín niʼninduwaaʼ Jeobá nda̱wa̱á dí nixíyáa giʼtio̱o̱ bi̱ mbiʼyuu Abel (Gén. 4:9). Mba̱yu̱u̱ʼ tsiguʼ nda̱wa̱á, mbáa bi̱ na̱ʼkha̱ náa Caín bi̱ nigumbiʼyuu Lamec niʼnirámáʼ mbá poema náa nisngájma xú káʼnii xkawi̱ʼ nirígá nákha ikhú (Gén. 4:23, 24). Ga̱jma̱a̱ ndiéjunʼ eʼyáá mbiʼi xúgi̱ rá. Nduʼyáá rí bi̱ ni̱ndxu̱ún políticos na̱nguá tiñu̱u̱n muthi ajngáa dí tséjmaa náa inún xa̱bu̱. Ga̱jma̱a̱ mingíjyúuʼ mataxkamaa mbá película náa na̱nguá e̱ʼkha̱ ajngáa dí tséjmaa. Ma̱ngaa ajngáa rígi̱ nakujmaa náa escuela ga̱jma̱a̱ náa ñajunʼ. Xúgíʼ rígi̱ nasngájma dí numbaaʼ nigachúu wéñuuʼ.

3. a) Ndiéjunʼ gamíi marigá á mu tséñawamíjna̱ rá. b) Ndiéjunʼ gúʼyáá náa artículo rígi̱ rá.

³ Á mu tséñawamíjnalú ma̱ndoo maguʼwunlú muʼdxawíín ajngáa dí tséjmaa rí asndu mangáánʼ ma̱ndoo muʼthá. Numuu  rí ikháanʼ bi̱ ni̱ndxu̱lú cristianos nandulúʼ mu̱ʼni̱ dí nanigu̱u̱ʼ Jeobá, raʼkháa i̱ndó na̱nguá eʼthá ajngáa dí tséjmaa ma̱ngaa nuʼnimi̱jna̱ majmulú májánʼ dí nuʼthá, xóo muʼthá, dí mu̱ʼni̱ mba̱a̱ Jeobá. Náa artículo rígi̱, mbuʼyáá xú káʼnii gándoo mu̱ʼni̱ mba̱a̱ índo̱ nuʼtáraʼa, índo̱ najkua reunión ga̱jma̱a̱ índo̱ nuʼtámíjná gajmiúlú eʼwíinʼ. Mú, ginii mbuʼyáá ndíjkha rí Jeobá naxmiéjuunʼ dí xóo nuʼthá.

4. Xó má naʼthí náa Malaquías 3:16, ndíjkha rí Jeobá naxmiéjuunʼ rí nuʼthá rá.

⁴ (Atraxnuu Malaquías 3:16). b Ndíjkha rí Jeobá naʼnirámáʼ náa mbá libro mbiʼñún bi̱ nusngajma dí namíñúún kuyáá ga̱jma̱a̱ dí xóo nuthi ma̱ngaa dí nundxaʼwamíjná ga̱jma̱a̱ numuu mbiʼyuu xá. Dí xóo nuʼthá nasngájma dí gíwánʼ náa a̱jkiu̱lú. Jesús niʼthí: “Numuu dí rígá náa a̱jkiu̱u̱n xa̱bu̱, rúʼko̱ má eʼthí” (Mat. 12:34). Ikhaa jngóo rí xóo nuʼthá nasngájma nguáthá eyulú kuʼyáá Jeobá. Ga̱jma̱a̱ Jeobá nandoo rí bi̱ nandún kuyáá makuwá kámuu mbiʼi náa numbaaʼ nuxi̱ʼ.

5. a) Xú káʼnii eʼni mbríguii dí nuʼthá ga̱jma̱a̱ rí nduʼyamajkuíí Jeobá rá. b) Xó má nakujmaa náa xtiʼkhuu, ndiéjunʼ gíʼmaa mu̱ʼni̱ gáʼdu̱u̱n mu Jeobá maʼdxuu ga̱jma̱a̱ dí xóo nuʼthá rá.

⁵ Jeobá ndaʼyoo dí gíʼdoo wéñuuʼ numuu rí xóo nuʼthá mu mbaʼyoo á mu magruigú rí nduʼyamajkuíí o na̱nguá (Sant. 1:26). Índo̱ nuthi tikhun xa̱bu̱ bi̱ na̱nguá eñún kuyáá Jeobá, nuthi ajngáa dí muni̱ gawáanʼ, dí na̱nguá eniña̱a̱nʼ marata ikháán ga̱jma̱a̱ rí xóo nuthi nuni̱ mbaʼumíjna̱ (2 Tim. 3:1-5). Nditháan tsíyulú manindxu̱lú xóo ikhiin. Rí phú nandulú nindxu̱u̱ rí Jeobá maʼdxuu kaʼyulú ga̱jma̱a̱ rí xóo nuʼthá. Lá manigu̱u̱ʼ ikhaa kaʼyoo mbáa xa̱bu̱ bi̱ naʼthí májánʼ náa reunión ga̱jma̱a̱ náa naʼtáraʼa, mú, índo̱ xtáa mbáwíí gajmíi̱n bi̱ kúwá náa goʼwóo, naʼthúún mijkoo ga̱jma̱a̱ rí xóo naʼthí tsésngájma rí nandoo kaʼñún xáʼ. (1 Ped. 3:7.)

6. Ndiéjunʼ nirígá ga̱jma̱a̱ rí xóo ajngáa dí nijmuu Kimberly rá.

⁶ Á mu najmulú májánʼ dí xóo nuʼthá, eʼwíinʼ xa̱bu̱ mbuyáá dí mixtiʼkuii “mbáa bi̱ naʼni  ñajuunʼ Dios ga̱jma̱a̱ bi̱ tséʼni ñajuunʼ” (Mal. 3:18). Xóo muʼthá, makujmaa kaʼwu dí ikháanʼ nu̱ʼni̱ ñajuunʼ Jeobá. Guʼyáá rí xóo nigíʼnuu mbáa ndxájulú bi̱ mbiʼyuu Kimberly. c Índo̱ ikhaa ga̱jma̱a̱ mbáa ndxáʼgú bi̱ naʼniga̱jma̱a̱ ga̱jma̱a̱ nini̱ mbóó ñajunʼ, ndxáʼgú buʼko̱ ndiʼyoo dí Kimberly nindxu̱u̱ mixtiʼkuii. Na̱nguá eʼthá numún eʼwíinʼ, nindxu̱u̱ má xúʼko̱ májáanʼ xa̱bu̱ ga̱jma̱a̱ nditháan na̱nguá eʼthí ajngáa dí tséjmaa. Ndxáʼgú nindoo mbaʼyoo náá numuu, nda̱wa̱á ikhaa nigruigú dí maʼniga̱jma̱a̱ Biblia. ¡Ra̱ʼkhá tháán nadxuu Jeobá índo̱ ndaʼyoo dí eʼwíinʼ xa̱bu̱ nanigu̱u̱nʼ majmañún dí gajkhun ga̱jma̱a̱ numuu rí xóo nuʼthá!

7. Ndiéjunʼ enigua̱a̱ʼ matani̱ ikháán ga̱jma̱a̱ numuu dí najmáán naratá rá.

⁷ Xúgiáánʼ nandulú dí xóo nuʼthá maʼni dí maʼga̱ gamajkhu náa Jeobá ga̱jma̱a̱ dí mambáyulú mambáxulu gajmiúlú a̱ngiu̱lú. Ikha jngóo, guʼyáá tikhu ikha rí xóo ma̱ndoo mu̱ʼni̱ mu manindxu̱lú má xúʼko̱ mbáa bi̱ naxná májánʼ xkri̱da ga̱jma̱a̱ rí xóo naʼthí.

8. Xú káʼnii gándoo mbuʼyaridáá Jesús náa nuʼtáraʼa rá.

⁸ Ganindxa̱a̱ʼ májáanʼ xa̱bu̱ ga̱jma̱a̱ araʼdáá gamajkuaaʼ índo̱ nuthaanʼ dí raʼkhí. Índo̱ Jesús nixtáa náa tsu̱du̱u̱ Ku̱ba̱ʼ nithi dí raʼkhí ga̱jma̱a̱ numuu, nitháán dí nindxu̱u̱ “mbáa xa̱biya̱ bi̱ nakuiʼtsu egoo ga̱jma̱a̱ mbáa bi̱ naʼga̱a̱n wéñuuʼ vino”, dí xtáa raʼni ñajuunʼ Gixa̱a̱, dí na̱nguá eʼyámajkhuu mbiʼi sábado ga̱jma̱a̱ rí naʼthá wéñuuʼ Dios (Mat. 11:19; 26:65; Luc. 11:15; Juan 9:16). Mú Jesús nditháan na̱nguá niríʼñúún ga̱jma̱a̱ ajngáa dí xkawi̱ʼ. Á mu mbáa naʼthúlú ajngáa dí naʼni gawúnlú, gíʼmaa mu̱ʼni̱ xó má niʼni Jesús rí xúʼniu̱u̱n xó má niniulúʼ (1 Ped. 2:21-23). Gajkhun má mbáa nguáná naʼni gakhi̱i̱ muñewa̱a̱n dí muʼthá (Sant. 3:2). Mú, ndiéjunʼ gámbáyulú rá.

9. Xú káʼnii gándoo muñewa̱a̱n dí muʼthá índo̱ nuʼtáraʼa rá.

⁹ Á mu mbáa naʼtháanʼ dí raʼkhí índo̱ naratáraʼa, xáta̱ya̱a̱ náa dí raʼkhí naʼni. Mbáa ndxájulú bi̱ mbiʼyuu Sam naʼthí: “Naniminaʼ mandxa̱ʼwa̱mínáʼ dí xa̱bu̱ ndayóoʼ maʼdxaun dí gajkhun ga̱jma̱a̱ rí ma̱ndoo mariʼkuminaʼ”. Ma̱ngaa nguáná xa̱bu̱ nakiʼnáa numuu dí na̱jkua̱nú mbá mbiʼi dí ikhaa na̱nguá xtáa májánʼ. Índo̱ gúxkamaa mbáa bi̱ nakiʼnáa, ma̱ndoo mu̱ʼni̱ xó má eʼni mbáa ndxájulú bi̱ mbiʼyuu Lucía: Muʼtákáñíí Jeobá rí mambáyúlú mu xákiʼnáanʼ ga̱jma̱a̱ rí xúʼthá nimbá dí rakáʼyoo o masngájma dí na̱nguá kuaʼdáá gamajkulú.

10. Xó má naʼthí náa 1 Timoteo 4:13, ndiéjunʼ dí gíʼmaa mu̱ʼni̱ rá.

¹⁰ Atagíminaʼ marasngáa itháan májánʼ. Timoteo mba̱yu̱u̱ʼ má nixtáa raʼtáraʼa, mú maski ajndu xúʼko̱ ndiyóoʼ maʼniminaʼ maʼsngáa  itháan májánʼ (atraxnuu 1 Timoteo 4:13). d Ndiéjunʼ gándoo mu̱ʼni̱ mu muʼsngáa itháan májánʼ rá. Gíʼmaa muʼniratamijná májánʼ. Kuaʼdáá mbaʼa dí ma̱ndoo mambáyúlú, xóo folleto rí mbiʼyuu Gajmañaaʼ matraxnuu ga̱jma̱a̱ marasngáa májánʼ, ga̱jma̱a̱ sección náa naʼthí “Ganindxu̱lú mbáa bi̱ naʼsngáa májánʼ” dí na̱ʼkha̱ náa I̱yi̱i̱ʼ dí najmulú náa reunión Xóo kúwi̱i̱n ga̱jma̱a̱ xóo Etaraʼa Cristianos. Lá najmaaʼ ikháán ráʼ. Á mu natani̱ rataminaʼ májánʼ, xámiñaaʼ wéñuuʼ ga̱jma̱a̱ ma̱ndoo marata májánʼ.

11. Ndiéjunʼ nini̱ tikhun a̱ngiu̱lú mu musngáa itháan májánʼ rá.

¹¹ I̱mba̱ dí ma̱ndoo mambáyúlú muʼsngáa itháan májánʼ nindxu̱u̱ rí mbuʼyáá xóo eni̱ eʼwíinʼ a̱ngiu̱lú bi̱ kúwá náa congregación ga̱jma̱a̱ mbuʼyaridúún. Sam, bi̱ niʼthá náa kutriga̱ 9, ndaʼyoo ndiéjunʼ eni̱ tikhun a̱ngiu̱lú bi̱ nusngáa májánʼ. Naʼdxaun xóo nuthi ga̱jma̱a̱ naʼniminaʼ mbaʼyaridúún xóo esngáa. Mbáa ndxájulú bi̱ mbiʼyuu Talía nijmañuu maʼtámíjná gajmíi̱n xa̱bu̱ índo̱ nagíʼ edxu̱u̱ maʼdxaun discurso ndrígu̱ún a̱ngiu̱lú bi̱ nuxna májánʼ discurso.

12. Ndiéjunʼ rí naʼniún mingíjyúuʼ muni̱ tikhuun náa reunión rá.

¹² Xúgiáánʼ ma̱ndoo muñambáá náa reunión índo̱ nu̱ʼni̱ ajmúú ga̱jma̱a̱ nuxná májánʼ comentario (Sal. 22:22). Mbaʼiin naʼniún gakhi̱i̱ muni̱ ajmúú ga̱jma̱a̱ muni̱ comentar náa reunión. Lá nagíʼnaa xúʼko̱ mangáán ráʼ. Á mu xúʼko̱, manigua̱a̱ʼ ma̱ta̱ya̱a̱ ndiéjunʼ nimbáñún tikhun mu xámiñún.

13. Ndiéjunʼ gándoo gámbáyáaʼ matani̱ ajmúú ga̱jma̱a̱ xúgíʼ a̱jkia̱a̱nʼ náa reunión rá.

¹³ Atani̱ ajmúú ga̱jma̱a̱ xúgíʼ a̱jkia̱a̱nʼ. Garmáʼáan a̱jkia̱a̱nʼ rí índo̱ nu̱ʼni̱ ajmúú náa reunión nindxu̱u̱ mu mu̱ʼni̱ mba̱a̱ Jeobá. Guʼyáá xkri̱da ndrígóo Sara. Maski ajndu ikhaa naku̱mu̱u̱ dí na̱nguá mitsaanʼ voz ndrígóo mú, nandoo maʼni mba̱a̱ Jeobá índo̱ naʼni ajmúú. Ikha jngóo, índo̱ naʼni rataminaʼ dí manújngoo náa xúgíʼ reunión, ma̱ngaa naʼnirataminaʼ ga̱jma̱a̱ ajmúú. Naʼniuu ensayar ga̱jma̱a̱ naʼniminaʼ mbaʼyoo xóo mbríguii letra ga̱jma̱a̱ tema dí manújngoo náa reunión. Ikhaa naʼthí: “Xúgíʼ rígi̱ nambáyuʼ mba̱yo̱o̱ itháan letra dí naʼthí ki xóo voz ndrígóʼ”.

14. Á mu ikháán namíñáaʼ gárata, ndiéjunʼ gámbáyáaʼ matani̱ comentar náa reunión rá.

¹⁴ Gaguʼwaanʼ matani̱ comentar. Gajkhun má, mbaʼiin a̱ngiu̱lú naʼniún mingíjyúuʼ muni̱ rígi̱. Talía, bi̱ niʼthá náa kutriga̱ 11, naʼthí: “Maski ajndu tséwáán dí namíñúʼ índo̱ na̱tha̱, mú namíñúʼ wéñuuʼ ma̱ta̱ náa inún mbaʼiin xa̱bu̱. Ikha jngóo rí maniu̱u̱ comentar naʼniuʼ gakhi̱i̱ wéñuuʼ”. Mú rúʼko̱ tsérikoo dí maʼni comentar. Índo̱ naʼnirataminaʼ dí mbaʼyoo náa  reunión, ndaʼyoo dí timbá respuesta ndayóoʼ maʼni chíʼgíiʼ ga̱jma̱a̱ maʼthí mbájmbu. Ikhaa naʼthí: “Májánʼ nindxu̱u̱ dí mariʼña̱a̱ mbájmbu, ramíʼskhoo ga̱jma̱a̱ chíʼgíiʼ numuu dí xúʼko̱ nagi̱ʼthu̱u̱n maʼdxaun bi̱ naʼniuu conducir”.

15. Ndiéjunʼ gíʼmaa marmáʼáan a̱jkiu̱lú ga̱jma̱a̱ numuu comentario rá.

¹⁵ Nguáná asndu a̱ngiu̱lú bi̱ tsémiñún muthi tséni comentar. Náá numuu rá. Mbáa ndxájulú bi̱ mbiʼyuu Juliet naʼthí: “Nguáná naʼniuʼ miʼskhoo maniu̱u̱ comentar numuu rí naku̱mu̱ʼ dí na̱nguá etha xó má gíʼmaa”. Lá nagíʼnaaʼ xúʼko̱ mangáán rá. Á mu xúʼko̱, garmáʼáan a̱jkia̱a̱nʼ dí Jeobá nandoo dí mu̱ʼni̱ xó má eʼngo̱o̱. e Jeobá ndaʼyoo dí gíʼdoo wéñuuʼ numuu tsiakii dí nu̱ʼni̱ mu mu̱ʼni̱ comentar maski ajndu namiñúlúʼ.

16. Xú káʼnii ajngáa dí ragíʼmaa muʼthá rá.

¹⁶ Xájmaa “ajngáa dí maʼni gawúúnʼ eʼwíinʼ” (Efes. 4:31). Xó má eʼyáá, mbáa cristiano nditháan ragíʼmaa majmuu ajngáa dí xkawi̱ʼ. Mú mbáa migamíi muʼthá dí maʼni gawúúnʼ eʼwíinʼ dí asndu na̱nguá kumulúʼ xóo eʼthá, ikha jngóo gíʼmaa muñewa̱a̱n dí muʼthá. Mbá xkri̱da, ragíʼmaa muʼthá dí raʼkhí ga̱jma̱a̱ numún xa̱bu̱ bi̱ naguwáʼ náa i̱ʼwáʼ xuajin, bi̱ nuthi i̱mba̱ ajngáa o bi̱ mixtiʼkhu rí xóo naguʼwún nuni̱. Ni má ragíʼmaa muʼthá dí maʼni gawúúnʼ eʼwíinʼ. Mbáa ndxájulú naʼthí: “Nguáná natha dí ikhúún naku̱mu̱ʼ dí na̱ni̱ xnduʼwá, mú nda̱wa̱á na̱jkhánú nda̱yo̱o̱ dí ni̱ni̱ gawúunʼ mbáa. Mba̱yu̱u̱ʼ tsiguʼ má na̱jkhá rariʼkumina̱a̱ʼ, núma̱aʼ má ga̱jma̱a̱ numuu dí a̱ʼgiu̱ʼ naʼthúnʼ nguʼwáá índo̱ nakiéʼkunʼ natha mbá dí naʼni gawúunʼ ikhaa o i̱mba̱a̱ xa̱bu̱”.

17. Xó má naʼthí náa Efesios 4:29, xú káʼnii gándoo muxnúún tsiakii ga̱jma̱a̱ rí maʼni̱i̱ a̱jkiu̱ún eʼwíinʼ rá.

¹⁷ Arathá ajngáa dí naxná tsiakii ga̱jma̱a̱ dí naʼni̱i̱ a̱jkiu̱ún eʼwíinʼ. Xataxiéʼká ni má xárata numún eʼwíinʼ, ataniminaʼ marathu̱u̱n dí májánʼ eni̱ (atraxnuu Efesios 4:29). f Tsíyulú manindxu̱lú xóo israelita. Maski ajndu nirígá mbaʼa rí ikhiin ma̱ndoo muxna̱a̱ núma̱aʼ, mú ikhiin nixieʼkhá má xúʼko̱, índo̱ narígá xúʼko̱, eʼwíinʼ mangiin nduyaridáá. Ga̱jma̱a̱ numuu dí raʼkhí dí nithi bi̱ mbá gu̱wi̱i̱nʼ bi̱ nigún guyama, “xúgínʼ israelita nixieʼkhá náa inuu Moisés” (Núm. 13:31-14:4). Mú, índo̱ nuʼthá dí májánʼ eni̱ eʼwíinʼ, narígá dí májánʼ. Gundxaʼwámíjná ga̱jma̱a̱ numuu wáxioo Jefté. Numuu rí bi̱ nimbájxu̱u̱ gajmíi̱n nitháán ajngáa dí májánʼ ga̱jma̱a̱ rí nixnáá tsiakii, rúʼko̱ nimbáyúu mu maʼni má xúʼko̱ ñajuunʼ Jeobá (Juec. 11:40). Sara,  bi̱ niʼthá náa kutriga̱ 13, naʼthí: “Índo̱ nuʼthúún eʼwíinʼ ajngáa dí májánʼ, nu̱ʼni̱ maku̱mu̱ún dí Jeobá nandoo kaʼñún ga̱jma̱a̱ dí guáʼdáá numún náa congregación”. Arathún má xúʼko̱ dí májánʼ eni̱ eʼwíinʼ.

18. Xó má naʼthí náa Salmo 15:1, 2, ndíjkha rí gíʼmaa muʼthá má xúʼko̱ dí gajkhun, ga̱jma̱a̱ ndiéjunʼ eyoo gáʼthúu̱n rúʼko̱ rá.

¹⁸ Arathá má xúʼko̱ dí gajkhun. Jeobá xáʼdxuu kaʼyulú á mu na̱nguá eʼthá dí gajkhun, numuu rí ikhaa nawiyuuʼ kaʼyoo xúgíʼ enii dí mindu̱wa̱ʼ (Prov. 6:16, 17). Maski ajndu xa̱bu̱ nánguá eyáá dí raʼkhí muni̱ nduwaʼ, ikháanʼ nandulú mundxaʼwamíjná xó má Jeobá (atraxnuu Salmo 15:1, 2). g Gajkhun má nditháan xáʼyóoʼ muʼthá mbá mindu̱wa̱ʼ, ma̱ngaa ragíʼmaa murkaʼwumáʼán mbá ajngáa dí maʼni rí eʼwíinʼ mundxaʼwamíjná mbá dí ragájkhun.

19. Ndiéjunʼ i̱mba̱ dí gíʼmaa muñewa̱a̱n mu xúʼni̱ rá.

¹⁹ Xájngruiga̱a̱ʼ raratá numún eʼwíinʼ (Prov. 25:23; 2 Tes. 3:11). Juliet, bi̱ niʼthá ga̱jma̱a̱ numuu náa kutriga̱ 15, naʼthí xú káʼnii eʼni maxtáa ikhaa índo̱ mbáa naʼthá numún eʼwíinʼ: “Índo̱ nadxáun dí mbáa naʼthá numún eʼwíinʼ, najmúʼ wéñuuʼ ga̱jma̱a̱ naʼni dí ni xáku̱mu̱ʼ ka̱yo̱o̱ xa̱bu̱ buʼko̱. Xú káʼnii gáyóo a mu tséjngrui̱go̱o̱ raʼthí ga̱jma̱a̱ numuʼ mangúún xá.” Á mu ikháán natayáá dí índo̱ kúwáanʼ rutamíjná maʼni rí mutha numún eʼwíinʼ, atriʼkhu̱u̱ dí naratá ga̱jma̱a̱ arathá mbá dí májánʼ (Col. 4:6).

20. Ndiéjunʼ xtaa xawii matani̱ ikháán rá.

²⁰ Kuwáánʼ náa numbaaʼ náa xa̱bu̱ nánguá ejmúún májánʼ rawúúnʼ. Ikha jngóo gíʼmaa muʼnimi̱jna̱ majmulú xó má eyoo Jeobá. Garmáʼáan a̱jkiu̱lú rí nindxu̱u̱ mbá regalo dí nixnúlú Jeobá ga̱jma̱a̱ ikhaa naxmiéjuunʼ dí xóo nuʼthá. Á mu nu̱ʼni̱ xó má eʼngo̱o̱ rí mbuʼyamajkuíí Jeobá ga̱jma̱a̱ rí xóo nuʼthá náa nuʼtáraʼa, náa reunión ga̱jma̱a̱ índo̱ kuwáánʼ ruʼtámíjná gajmiúlú eʼwíinʼ, ikhaa maʼni tsajkurámáánʼ. Índo̱ gáʼga̱nú mbiʼi dí nánguá mbuʼyáá dí raʼkhí náa numbaaʼ, xáʼniulú mingíjyúuʼ mbuʼyamajkuíí Jeobá ga̱jma̱a̱ rí xóo nuʼthá (Jud. 15). Mú rí xúgi̱, gakuwáánʼ xawii mu̱ʼni̱ dí niʼthí mbáa bi̱ niʼnirámáʼ mbá salmo: ‹Gani̱ndxu̱u̱ májánʼ ajngáa dí nagájnuu náa rawunʼ, dí manigua̱a̱ʼ ikháán Jeobá› (Sal. 19:14).