1. Ndiéjunʼ eʼni dí makuwáánʼ gagi rá.

 JEOBÁ nandoo dí makuwáánʼ gagi. Nduʼyáá dí xúʼko̱ numuu rí maraxtaa gagi nindxu̱u̱ mbá dí nambáyulúʼ xi̱ʼ kaʼwu maguaʼdáá (Gál. 5:22). Numuu rí kuwáánʼ itháan gagi rí muxná ki xóo rí mundrígú, nakuwáánʼ májánʼ wéñuuʼ índo̱ nu̱ʼni̱ ñajuunʼ Jeobá ga̱jma̱a̱ numbáñún a̱ngiu̱lú (Hech. 20:35).

2, 3. a) Xó má naʼthí náa Gálatas 6:4, ndiéjunʼ gámbáyulú mu makuwáánʼ má xúʼko̱ gagi rá. b) Ndiéjunʼ gúʼyáá náa artículo rígi̱ rá.

² Ndiéjunʼ gámbáyulú mu makuwáánʼ má xúʼko̱ gagi rá. Apóstol Pablo niʼthí a̱jma̱ ku̱ma̱ dí ma̱ndoo mambáyulúʼ. Nuxkamaa náa Gálatas 6:4 (atraxnuu). b Timbá, dí naʼni maʼdxuu wéñuuʼ a̱jkiu̱lú nindxu̱u̱ índo̱ nuxnáá dí itháan májánʼ Jeobá índo̱ nu̱ʼni̱ ñajuunʼ. Rúʼko̱ dí gíʼmaa mu̱ʼni̱ xúgiáánʼ (Mat. 22:36-38). Raga̱jma̱, dí xáʼyóoʼ mu̱ʼni̱ mbrígumijná gajmiúlú eʼwíinʼ. Á mu tséʼniulú nandii o rígá mbá dí nijuiʼsngúlú, rí najmáán nu̱ʼni̱, ma̱ndoo mu̱ʼni̱ mbá dí májánʼ, guxnáa núma̱aʼ Jeobá, numuu rí xúgíʼ rí najmáán nu̱ʼni̱ ga̱jma̱a̱ rí kuaʼdáá nixnúlú ikhaa. Á mu eʼwíinʼ najmiin nuni̱ itháan májánʼ ñajunʼ gaʼdxulú, numuu dí najmún májánʼ dí najmañún mu muni̱ ñajuunʼ Jeobá, raʼkháa mu muni̱ dí nandún ikhiin. Gíʼmaa majmañulúʼ náa ikhiin, raʼkháa dí mu̱ʼni̱ mbrígumijná gajmiúlú.

³ Náa artículo rígi̱ mbuʼyáá ndiéjunʼ gándoo gámbáyulú mu xákaguabáánʼ á mu nakumulú dí nánguá eʼni xó má nanigulúʼ náa ñajuunʼ Jeobá. Ma̱ngaa xóo gándoo majmulú májánʼ dí najmáán nu̱ʼni̱ ga̱jma̱a̱ ndiéjuunʼ gándoo gajmañulú náa eʼwíinʼ.

4. Ndiéjunʼ gáʼni rí makáguabáanʼ rá. Arathá xkri̱da ndrígóo Carol.

⁴ Mbaʼiin a̱ngiu̱lú nakumu̱ún rí nikáguabiinʼ numuu rí nánguá eni̱ ñajuunʼ Jeobá xó ikhiin nandún ga̱jma̱a̱ numuu dí niʼni guanii  má o numuu rí naʼniún nandii. Xúʼko̱ egiʼnuu mbáa ndxájulú bi̱ mbiʼyuu Carol, bi̱ nákha ginii nixtáa náa ndiyóoʼ miʼtáraʼa itháan. Ni̱jkha̱nú nigiʼdoo itháan dí 35 estudio ga̱jma̱a̱ nimbáñún mbaʼiin xa̱bu̱ dí muxnaximi̱jna̱ náa Jeobá ga̱jma̱a̱ majngún iyááʼ. ¡Ra̱ʼkhá tháán májánʼ dí niʼngo̱o̱ niʼni! Mú nda̱wa̱á niʼniuu nandii ga̱jma̱a̱ nánguá niʼngo̱o̱ magajnúu náa goʼwóo. Ikhaa naʼthí: “Nda̱yo̱o̱ má dí nánguá ejmúún gáni xó má eni̱ eʼwíinʼ, numuu dí naʼniuʼ nandii. Maski ajndu nda̱yo̱o̱ má dí xúʼko̱ nindxu̱u̱, mú naʼni maku̱mu̱ʼ dí tséjmún mbá kayuuʼ. Mámbá mbiʼi rígá mbaʼa dí nandoʼ ma̱ni̱ mú nánguá ejmúún gáni. Rúʼko̱ naʼni makáguabúnʼ wéñuuʼ”. Carol nandoo maʼni xúgíʼ dí naʼngo̱o̱ náa Jeobá ga̱jma̱a̱ rúʼko̱ gíʼdoo wéñuuʼ numuu. Ma̱ndoo mbuʼyáá gajkhun dí Dios bi̱ nagáwíinʼ a̱jkiu̱u̱n, ndaʼyoo dí gíʼdoo wéñuuʼ numuu dí ndxájulú nandoo maʼni.

5. a) Ndiéjunʼ gíʼmaa mu̱ʼni̱ á mu nduʼyáá rí tséjmáán gúʼni̱ xúgíʼ rá. b) Xó má nakujmaa náa xtiʼkhuu, xú káʼnii ndxájulú bugi̱ naxnúu Jeobá dí itháan májánʼ rá.

⁵ Á mu nguáná kuwáánʼ ngíná numuu rí tséʼngulú mu̱ʼni̱ xúgíʼ xóo nanigulúʼ, guraximíjna̱: “Ndiéjunʼ gíʼthu̱u̱n Jeobá ma̱ni̱ ikhúún rá.” Jeobá gíʼthu̱u̱n muxnáá dí itháan májánʼ, xóo muʼthá, rí mu̱ʼni̱ xúgíʼ xó má eʼngulú mu̱ʼni̱ ñajuunʼ. Atatsaʼwáminaʼ náa xkri̱da rígi̱. Mbáa ndxájulú bi̱ gíʼdoo 80 tsiguuʼ xtáa ngíná numuu rí nánguá ejmaa gáʼtaraʼa xóo nákha nigiʼdoo 40 tsiguuʼ. Nadxaʼwáminaʼ rí maski ajndu naʼni ñajuunʼ Jeobá ga̱jma̱a̱ xúgíʼ tsiakii dí gíʼdoo, naku̱mu̱u̱ dí na̱nguá edxu̱u̱ a̱jkiu̱u̱n kaʼyoo. Mú, lá gajkhun rúʼko̱ ráʼ. Guʼyáá. Á mu ndxájulú bugi̱ niʼni ñajuunʼ Jeobá xó má eʼngo̱o̱ nákha nigiʼdoo 40 tsiguuʼ ga̱jma̱a̱ naʼni má xúʼko̱ xúgi̱ índo̱ gíʼdoo 80, nandoo gáʼthí dí nditháan má tániñuuʼ raʼni xóo eʼngo̱o̱. Á mu nugíʼdi̱i̱ nundxaʼwamíjná dí ñajunʼ dí nu̱ʼni̱ nánguá gíʼdoo wéñuuʼ numuu eʼyoo Jeobá, garmáʼáan a̱jkiu̱lú dí ikhaa naraʼwíí ndiéjunʼ dí nanigu̱u̱ʼ ga̱jma̱a̱ dí tsénigu̱u̱ʼ. Á mu ikháanʼ nu̱ʼni̱ xó má eʼngo̱o̱ ñajuunʼ, ikhaa maʼthúlú: “Phú májánʼ rí nitani̱” (Atayáá ma̱ngaa Mateo 25:20-23).

6. Ndiéjunʼ eʼsngúlúʼ xkridoo María rá.

⁶ Mbá rí ma̱ndoo mambáyúlú maʼdxuu a̱jkiu̱lú má xúʼko̱ nindxu̱u̱ rí mbuʼyáá ndiéjuunʼ dí naʼngo̱o̱ mu̱ʼni̱, rí xúndxaʼwamíjna mu̱ʼni̱ mbá dí xájmáán gúʼni̱. Guʼyáá xkridoo María, ikhaa nánguá eʼtáraʼa wéñuuʼ numuu dí gíʼdoo nandii. Nákha ginii nixtáa ngíná wéñuuʼ ga̱jma̱a̱ nindxa̱ʼwáminaʼ dí nánguá gíʼdoo numuu. Mú nda̱wa̱á ndiʼyoo dí náa congregación xtáa mbáa ndxájulú bi̱ kaʼmáaʼ kayuuʼ náa xiyau. Ikha jngóo ndiyáʼ xóo ma̱ndoo mambáyúu. María naʼthí: “Niríyáʼ awan dí maʼgá náa goʼwóo mu mataráʼa gajmuʼ náa teléfono ma̱ngaa munixu̱ʼ carta. Índo̱ natanguúnʼ náa goʼwóʼ nadxuu a̱jkiu̱nʼ numuu rí nindoo nimbáyúu ndxájuʼ”. Mangáánʼ ma̱ndoo makuwáánʼ gagi á mu nu̱ʼni̱ náa dí najmáán raʼkháa náa dí tséʼngulú gúʼni̱. Mú, á mu mixtiʼkhu xóo kuwáánʼ ikháanʼ rá. Á mu nandoo nu̱ʼni̱ itháan o rígá i̱mba̱ dí najmáán nu̱ʼni̱ náa ñajuunʼ Jeobá rá.

7. Ndiéjunʼ niʼthún muni̱ cristianos apóstol Pedro rá.

⁷ Náa timbá carta dí apóstol Pedro niʼnirámáʼ, niʼthún a̱ngui̱i̱n dí majmúún asndu ndiéjunʼ má dí najmiin nuni̱ mu muxnún tsiakii eʼwíinʼ a̱ngiu̱lú. Niʼnirámáʼ: “Xó má regalo rí nikánala mámbáa rí ikháanʼ, gajmala mumbáñún eʼwíinʼ xóo bi̱ nuñajunʼ májánʼ bi̱ nindrigú rí májánʼ wéñuuʼ a̱jkiu̱u̱n Dios” (1 Ped. 4:10). Xámíñúlú mu̱ʼni̱ dí najmáán nu̱ʼni̱ i̱ndó ga̱jma̱a̱ numuu rí tsíyulú dí eʼwíinʼ maxígu̱u̱n kuyulú o rí makáguábiinʼ. Á mu xúʼko̱ kaʼnii e̱ʼni̱, tséxnáá Jeobá dí itháan májánʼ dí kuaʼdáá.

8. Xó má naʼthí náa 1 Corintios 4:6, 7, ndíjkha dí ragíʼmaa mu̱ʼni̱ mbaʼumíjna̱ ga̱jma̱a̱ numuu rí najmañulúʼ nu̱ʼni̱ rá.

⁸ Gajkhun má dí ndayóoʼ mu̱ʼni̱ dí najmáán xó má eʼngo̱o̱, mú ndayóoʼ mu̱ʼni̱ tsumáá dí  xúʼni̱ mbaʼumíjna̱ ga̱jma̱a̱ numuu rúʼko̱ (atraxnuu 1 Corintios 4: 6, 7). c Mbá xkri̱da, mbáa ikháán najmáán natani̱ rí ma̱ndoo matagíʼdi̱i̱ marasngáa ga̱jma̱a̱ numuu Biblia. ¡Atani̱ má xúʼko̱! Mú, mixtiʼkhu nindxu̱u̱ dí majmaaʼ májánʼ dí najmañaaʼ natani̱ ga̱jma̱a̱ rí matanimbamínaʼ ga̱jma̱a̱ numuu rí najmañaaʼ natani̱. Atatsaʼwáminaʼ rí xíkhoo niraʼdáá mbá experiencia májánʼ náa niratáraʼa ma̱ngaa nijmáán nitagíʼdi̱i̱ mbá estudio. Ikha jngóo nandaaʼ marathu̱u̱n kuduun xóo nirígá bi̱ nagájnáa gárataráʼa gajmiáanʼ. Mú, índo̱ xtaa má náa magajnáa gárataráʼa, natadxawíín dí mbáa ndxájulú naʼthí dí niʼngo̱o̱ niniñuuʼ mbá revista náa ñawúunʼ mbáa xa̱bu̱. Ikhaa niʼngo̱o̱ niniñuuʼ mbá revista, ikháán nijmáán nitagíʼdi̱i̱ mbá estudio. Ndiéjunʼ gátani̱ rá. Ikháán natayáá dí experiencia ndrígáaʼ maxnún tsiakii a̱ngiu̱lú, mú mbáa natraʼwíí marata i̱mba̱ miʼtsú, mu xúʼko̱ xátani̱ dí ndxájulú majmáa a̱jkiu̱u̱n ga̱jma̱a̱ numuu dí niʼngo̱o̱ niniñuuʼ revista. ¡Rí nu̱ʼni̱ xúʼko̱ nindxu̱u̱ mitsaanʼ wéñuuʼ! Mú, xátatsiʼñááʼ marathu̱u̱n xa̱bu̱ rí marasngúún ga̱jma̱a̱ numuu Biblia. Ikháán rígá dí najmañaaʼ natani̱, ikha jngóo gajmaaʼ má xúʼko̱ dí najmáán natani̱.

9. Xú káʼnii gíʼmaa majmulú dí najmáán nu̱ʼni̱ rá.

⁹ Garmáʼáan a̱jkiu̱lú rí xúgíʼ dí najmañulúʼ nu̱ʼni̱ nindxu̱u̱ numuu rí Dios nixnúlú. Ikha jngóo gajmulú mu muxnúún tsiakii bi̱ kúwá náa congregación, raʼkháa mu mu̱ʼni̱ mbaʼumíjna̱ (Filip. 2:3). Índo̱ najmulú tsiakii dí kuaʼdáá ma̱ngaa rí najmañulúʼ nu̱ʼni̱ mu mu̱ʼni̱ ñajuunʼ Dios, naʼni dí maʼdxuu a̱jkiu̱lú. Numuu rí nduʼyáá dí najmulú xúgíʼ dí kuaʼdáá mu mu̱ʼni̱ mba̱a̱ Jeobá, raʼkháa mu mu̱ʼni̱ mbaʼumíjna̱ o mu̱ʼni̱ rí itháan najmáán ikháanʼ ki xóo a̱ngiu̱lú.

10. Ndíjkha dí ragíʼmaa mu̱ʼni̱ mbrígumijná gajmiúlú eʼwíinʼ rá.

¹⁰ Á mu na̱nguá eñawumi̱jna̱, migamíi majngutíguáánʼ náa tsáʼkhá rí mu̱ʼni̱ mbrígumijná gajmiúlú eʼwíinʼ náa dí ikhiin tséjmiin mú ikháanʼ najmáán. Guʼthá mbá xkri̱da. Mbáa ndxájulú naxná májánʼ discurso público. Rúʼko̱ dí najmaa naʼni, mbáa náa a̱jkiu̱u̱n naku̱mu̱u̱ dí ikhaa gíʼdoo itháan numuu ki xóo i̱mba̱a̱ bi̱ naʼniuu gakhii maxná. Mú, mbáa ndxájulú buʼko̱, i̱ʼwáʼ dí najmaa naʼni, xóo dí naxná dí gíʼdoo, naʼni mbaji̱i̱n májánʼ e̱ji̱i̱n o ra̱ʼkhá tháán májánʼ eʼtáraʼa. Nuxnáaʼlú wéñuuʼ núma̱aʼ numuu rí kúwá mbaʼiin a̱ngiu̱lú xa̱bekha ga̱jma̱a̱ gu̱ʼu̱ bi̱  najmún rí najmiin nuni̱ mu muni̱ ñajuunʼ Jeobá ga̱jma̱a̱ rí mumbañún eʼwíinʼ.

11. Ndíjkha rí gíʼmaa muʼnimi̱jna̱ mbuʼyaridáá Jesús rá.

¹¹ Maski ajndu ragíʼmaa mu̱ʼni̱ mbrígumijná gajmiúlú eʼwíinʼ, mú najmañulúʼ wéñuuʼ índo̱ nduʼyáá náa májánʼ dí nuni̱ eʼwíinʼ xa̱bi̱i̱ Jeobá. Gundxaʼwámíjná ga̱jma̱a̱ numuu Jesús, bi̱ niniñuuʼ májánʼ xkri̱da mu̱ʼni̱. Maski ajndu ikháanʼ na̱nguá ni̱ndxu̱lú xa̱bu̱ jmbii xóo ikhaa, ma̱ndoo majmañulúʼ rí xóo ninindxu̱u̱ ga̱jma̱a̱ rí xóo niʼni (1 Ped. 2:21). Á mu nu̱ʼni̱ xúgíʼ xóo eʼngo̱o̱ mbuʼyaridáá, manindxu̱lú itháan májáanʼ xa̱bi̱i̱ Jeobá ma̱ngaa magajnúu itháan májánʼ dí gúʼni̱ náa nuʼtáraʼa.

12, 13. Ndiéjunʼ ejmañuluʼ náa xkri̱doo David rá.

¹² Náa Biblia naʼthúlú dí mbaʼiin xa̱bekha ga̱jma̱a̱ gu̱ʼu̱ bi̱ maski ajndu ni̱ndxu̱ún xa̱bu̱ aʼkhá, niniña̱a̱nʼ mbá májánʼ xkri̱da náa ikháanʼlú (Heb. 6:12). Mbáa dí ikhaa nindxu̱u̱ rey David. Jeobá niʼthí rígi̱ ga̱jma̱a̱ numuu ikhaa: “Nixkamaa […] mbáa xa̱bu̱ bi̱ naʼni a̱jkiu̱nʼ ka̱yo̱o̱” (Hech. 13:22). Mú David na̱nguá ninindxu̱u̱ xa̱bu̱ jmbii ga̱jma̱a̱ nikudaminaʼ aʼkhá. Maski ajndu xúʼko̱, niniñuuʼ mbá májánʼ xkri̱da. Náá numuu rá. Numuu rí índo̱ nixpri̱guíí, na̱nguá nirkaʼwumúʼúun dí niʼni. Nixnátiʼñaminaʼ maʼdxaun ga̱jma̱a̱ nigáwi̱i̱nʼ wéñuuʼ a̱jkiu̱u̱n dí niʼni. Ikha jngóo, Jeobá niʼni mba̱a̱ a̱jkiu̱u̱n kaʼyoo (Sal. 51:3, 4, 10-12).

¹³ Xkri̱da ndrígóo David ma̱ndoo mambáyúlú á mu nuraximi̱jna̱ xóo rígi̱: “Xóo eriʼñuu mbáa índo̱ naxnúʼ consejo rá. Lá mbá nacha̱ má nda̱yo̱o̱ dí raʼkhí ni̱ni̱ o ndaʼyáʼ xóo markaʼumuʼúnʼ dxe̱ʼ. Lá mbá nacha̱ nda̱yo̱o̱ xóo ma̱ta̱ mu ma̱ni̱ tsu̱du̱ún eʼwíinʼ ráʼ. Lá naniminaʼ rí xátangaán ma̱ni̱ dí nikiéʼkhunʼ ráʼ.” Gu̱ʼni̱ graxe̱ xóo rúʼko̱ índo̱ gúʼnigajma̱a̱ xóo nini̱ xa̱bekha ga̱jma̱a̱ gu̱ʼu̱ bi̱ niguájun jmbu bi̱ na̱ʼkha̱ raʼthí náa Biblia. Lá niraʼníí xkujndu xó má ikháanʼ xáʼ. Xú káʼnii xa̱bu̱ ninindxu̱ún xá. Náa mámbá dí nuraxnuu, guraximíjna̱: “Xú káʼnii gándoo ma̱ni̱ mu mani̱ndxu̱ʼ xóo xa̱bi̱i̱ Jeobá bugi̱ rá.”

14. Xú káʼnii embáyulú xkri̱da ndrígu̱ún eʼwíinʼ cristianos rá.

¹⁴ Ma̱ngaa ma̱ndoo majmañulúʼ wéñuuʼ náa a̱ngiu̱lú, tséʼniuu á mu náa jiámá o náa bi̱ guanii. Mbáa nundxaʼwamíjná ga̱jma̱a̱ numuu mbáa bi̱ xtáa náa congregación ndrígúlú bi̱ xtáa raʼniminaʼ ga̱jma̱a̱ mbá tsáʼkhá, xóo índo̱ eʼwíinʼ a̱ngui̱i̱n nutsudaaʼ mu maʼni dí raʼkhí, dí nakiʼníin kuyáá bi̱ kaʼñún o numuu rí naʼniuu mbá nandii. Lá rígá rí xóo nindxu̱u̱ ndxájulú buʼko̱ dí ikháanʼ ma̱ndoo mu̱ʼni̱ ráʼ. Á mu nduʼyáá náa xkri̱da ndrígóo, majmañulúʼ i̱ʼwáʼ dí mambáyúlú muraʼníí xkujndu dí kuaʼdáá. Lá ragájkhun dí nambáyulú wéñuuʼ xkridún xáʼ.  Mangáánʼ makuwáánʼ gagi á mu nu̱ʼni̱ xó má ikhiin nuni̱ (Heb. 13:7; Sant. 1:2, 3).

15. Náá biʼyaa consejo dí niʼthí Pablo mambáyulú mu̱ʼni̱ ñajuunʼ Jeobá ga̱jma̱a̱ gagi rá.

¹⁵ Á mu xúgiáánʼ nuxnáá Jeobá rí itháan májánʼ dí najmáán nu̱ʼni̱, mu̱ʼni̱ rí marigá tsímáá ga̱jma̱a̱ dí makuwáánʼ mbá kambáxulú náa congregación. Rúʼko̱ nini̱ cristianos bi̱ nikúwá nákha siglo timbá. Ikhiin mixtiʼkhu dí nijmañún nini̱ ga̱jma̱a̱ mixtiʼkhu ñajunʼ dí niguáʼdáá (1 Cor. 12:4, 7-11). Mú, rúʼko̱ na̱nguá ninindxu̱u̱ mbá numuu rí magi̱ʼdu̱u̱n gajmiún eʼwíinʼ o rí muni̱ wajímíjná. Pablo niʼthí náa carta dí nikuʼmá náa inún bi̱ nikúwá náa Éfeso rí mámbáa dí ikhiin “muxnáá tsiakii xuyuuʼ Cristo”. Ga̱jma̱a̱ niʼthí xóó: “Índo̱ mámbá rí kaʼyoo náa xuwiʼ naʼni ñajunʼ xó má gíʼmaa, rígi̱ nayambáá mu xuyuuʼ xa̱bu̱ mbaja̱a̱, mu xúʼko̱ xúgíʼ xuwiʼ mawiji̱ jmbu náa ngajua” (Efes. 4:1-3, 11, 12, 16). Bi̱ ninimbáníí dí niʼthí, nini̱ marigá dí tsímáá ga̱jma̱a̱ rí makuwá mbá kambáxu̱u̱n, ma̱ngaa rí nakujmaa náa mbaʼa congregación dí kuwáánʼ mbiʼi xúgi̱.

16. Ndiéjunʼ dí gíʼmaa muʼgími̱jna̱ mu̱ʼni̱ rá. (Hebreos 6:10.)

¹⁶ Guʼgímijná dí xúʼni̱ mbrígumijná gajmiúlú eʼwíinʼ. Rí gíʼmaa mu̱ʼni̱ nindxu̱u̱ rí mbuʼyáá xóo niʼni Jesús ga̱jma̱a̱ guʼnimi̱jna̱ mbuʼyaridáá xóo ninindxu̱u̱. Gajmañulú náa xkri̱da ndrígu̱ún bi̱ niguáʼdáá fe nákha wájyúuʼ ga̱jma̱a̱ bi̱ kúwá rí mbiʼi xúgi̱. Araxnáá má xúʼko̱ rí itháan májánʼ Jeobá, garmáʼáan a̱jkia̱a̱nʼ dí ikhaa “nindxu̱u̱ jmbii, ga̱jma̱a̱ tsémbumuu kaʼyoo ñajunʼ” dí ikháán natani̱ ga̱jma̱a̱ numuu (atraxnuu Hebreos 6:10). d Atani̱ má xúʼko̱ ñajuunʼ Jeobá ga̱jma̱a̱ gagi, atayáá gajkhun dí ikhaa ndaʼyoo dí gíʼdoo wéñuuʼ numuu tsiakii dí natani̱ mu matani̱ rí nandoo ikhaa.