Náa mbá diccionario naʼthí dí, maraxna ajngáaʼ, nindxu̱u̱ “rí ndaʼyoo Dios dí marata rí gajkhun o mataxuʼdáminaʼ mbá rí matani̱” (Diccionario de uso del español, de María Moliner). Rí mbáa xa̱bu̱ maxná ajngóo ma̱ndoo maʼthí o maʼnirámáʼ.

Tikhun nakumu̱ún dí raʼkhí nindxu̱u̱ dí muxna ajngún numuu rí Jesús niʼthí: “Xúxna ajngála. […] Á mu naratá, ‹xúʼko̱›, gaʼni xúʼko̱. Á mu ‹na̱nguá›, na̱nguá. Á mu mba’ ratáá, na̱ʼkha̱ náa Gixa̱a̱” (Mat. 5:33-37). Jesús ndaʼyoo má dí náa Xtángoo ndrígóo Moisés nindu̱ʼu̱u̱n israelitas ga̱jma̱a̱ bi̱ niguájun jmbu náa Dios rí nguáná má mbaʼyóoʼ muxna ajngún (Gén. 14:22, 23; Éx. 22:10, 11). Ma̱ngaa ndaʼyoo rí mínaaʼ má Jeobá nixná ajngóo (Heb. 6:13-17). Ikhaa jngóo Jesús na̱nguá niʼthí rí nditháan xándoo muxna ajngún. Nindoo gáʼthí dí xándoo muxna ajngún mbá nacha̱ o náa mbá dí ragíʼdoo numuu. Gíʼmaa muʼnimbáníí má xúʼko̱ ajngúlú numuu dí rúʼko̱ dí Jeobá nandoo mu̱ʼni̱.

Ndiéjunʼ gátani̱ ikháán á mu nunda̱ʼa̱a̱ dí maraxna ajngáaʼ xá. Timbá, atayáá á mu maʼnga̱a̱ʼ matanimbáníí. Á mu naku̱ma̱a̱ʼ dí xáʼnga̱a̱ʼ itháan májánʼ gáʼni dí xáraxna ajngáaʼ. Náa Ajngá rawuunʼ Dios nuxkamaa consejo rígi̱: “Itháan májánʼ rí xáraxna ajngáaʼ ki xóo rí matani ga̱jma̱a̱ xátanimbaníí” (Ecl. 5:5). Nda̱wa̱á atayáʼ ikha ndrígóo Biblia rí naʼthí ga̱jma̱a̱ numuu dí nandaaʼ maraxna ajngáaʼ, ikhú atani̱ xó má naniña̱a̱nʼ ku̱ma̱ ndrígáaʼ rí nijuiʼsngáá ga̱jma̱a̱ Biblia. Ndiéjunʼ nindxu̱u̱ tikhuu ikha rúʼko̱ rá.

Rígá tikhuu náa nuxná ajngúlú dí nambánii ga̱jma̱a̱ dí nandoo Dios. Mbá xkri̱da, índo̱ nudamijná a̱jmi̱i̱n testigo de Jeobá, nuxna mbá voto rí nindxu̱u̱ xó má dí muxna ajngún. Dxámá ga̱jma̱a̱ dxáʼgú nuxna ajngún náa inuu Dios ga̱jma̱a̱ náa inún eʼwíinʼ testigos dí maʼndún kuyamijná, muñewamíjna̱ ga̱jma̱a̱ dí mbuyamajkumijná asndu índo̱ gákháñún. (Kúwá eʼwíinʼ bi̱ tséthí ajngáa rígi̱ índo̱ nudamijná, mú tsiakii má nuxna mbá voto náa inuu Dios). Ikhú najuiʼthá rí nindxu̱ún mbóó xuwiʼ ga̱jma̱a̱ rí nidamijná mbajyúuʼ asndu índo̱ gákháñún (Gén. 2:24; 1 Cor. 7:39). Voto dí nuxna índo̱ nudamijná nindxu̱u̱ májánʼ numuu dí nanigu̱u̱ʼ Dios.

Rígá tikhuu náa nuxna ajngún dí tsémbánii ga̱jma̱a̱ dí nanigu̱u̱ʼ Dios. Mbá xkri̱da, bi̱ cristianos tséxna ajngún dí muñewa̱a̱n xuajen ga̱jma̱a̱ ajua̱nʼ o rí munigaʼduunʼ fe dí guáʼdáá náa Dios. Á mu nuni̱ xúʼko̱ nanujgurámún kiʼtáñajunʼ ndrígóo Dios. Bi̱ cristianos na̱nguá nindxu̱ún “xóo xa̱bu̱ numbaaʼ”, tséxudamíjna̱ náa narígá xkujndu (Juan 15:19; Is. 2:4; Sant. 1:27).

 Nguáná nuxná ajngún numuu rí ku̱ma̱ ndrígu̱ún niniñúúnʼ. Mbáa cristiano ndayóoʼ mandxa̱ʼwa̱mínáʼ májánʼ náa consejo dí Jesús nixná: “Guxna̱a̱la César rí kaʼyoo má César, mú guxna̱a̱ Dios rí kaʼyoo má Dios”. Gíʼmaa maʼni rígi̱ nákha xóó tséxna ajngóo (Luc. 20:25).

Guʼgíʼ mbá xkri̱da, á mu mbáa cristiano nandoo maʼga gáxtáa náa mbá país o mbayáʼ i̱yi̱i̱ʼ dí manújngoo ga̱jma̱a̱, mú na̱jkha̱nú ndaʼyoo dí ndayóoʼ maxná ajngóo dí mani̱ndxu̱u̱ jmbii. Á mu dí náa maxná ajngóo rígi̱ naʼni dí manújgurámuuʼ xtángoo ndrígóo Dios, ku̱ma̱ ndrígóo dí nijuiʼsngáá ga̱jma̱a̱ Biblia gáʼthu̱u̱n á mu ma̱ndoo maʼni. Mbáa Xa̱bu̱ Ñajunʼ ma̱ndoo maniñuuʼ mariʼkhu̱u̱ náa dí nixná ajngóo mu xúʼko̱ masngájma dí naʼnimbánuu xó má naʼthúu̱n ku̱ma̱ ndrígóo.

Dí matriʼkhu̱u̱ náa dí niraxná ajngáaʼ nambríguii ga̱jma̱a̱ ikha dí na̱ʼkha̱ náa Romanos 13:1, náa naʼthí: “Xúgiáanʼ gíʼmaa munimbáníí dí nuthi xa̱bu̱ ñajunʼ”. Rígi̱ gámbáyúu mbáa cristiano mu mbaʼyoo dí na̱nguá má nindxu̱u̱ ra̱májánʼ dí maxná ajngóo náa dí Dios naniñuuʼ marigá.

Á mu mbáa nunda̱ʼa̱a̱ dí maxná ajngóo náa inúu mbá dí Dios tsénigu̱u̱ʼ, ikhú dí mbaʼyóoʼ masngájma á mu ku̱ma̱ ndrígóo nijuiʼsngáá májánʼ. Nákha wajyúuʼ bi̱ romanos ga̱jma̱a̱ escitas nuxna ajngún náa espada ndrígu̱ún, ga̱jma̱a̱ nuthi mbiʼyuu mbáa dios bi̱ kaʼyoo náa guerra, xígi̱ kaʼnii esngajma dí munimbáníí ajngún. Bi̱ griegos nuxujxi̱ ñawúúnʼ mekhuíí índo̱ nuxná ajngún. Xúʼko̱ kaʼnii esngajma dí xtáa bi̱ gíʼdoo tsiakii bi̱ ndaʼyoo dí ikhiin nuthi ga̱jma̱a̱ dí nuni̱, bi̱ mandi̱ʼi̱i̱n cuenta.

Mbáa xa̱bi̱i̱ Jeobá xándoo gáxná ajngóo náa mbá dí xa̱bu̱ numbaaʼ najmún mu mbuyajkuíí o rí kuajtuminaʼ ga̱jma̱a̱ religión nduwaʼ. Ndiéjunʼ gáʼni á mu na̱jkha̱ náa guʼwá ñajunʼ ga̱jma̱a̱ nunda̱ʼa̱a̱ dí matámáʼ ñawúunʼ náa Biblia mu maʼthí á mu gajkhun maʼnimbánuu ajngóo xá. Mbáa rúʼko̱ dí ma̱ndoo maraʼwíí maʼni, numuu dí náa Biblia naʼthí ga̱jma̱a̱ numún xa̱bi̱i̱ Dios bi̱ niguájun jmbu índo̱ ikhiin nixná ajngún ga̱jma̱a̱ mbá dí nasngájma dí munimbáníí (Gén. 24:2, 3, 9; 47:29-31). Á mu xúʼko̱ gúraʼwíí mu̱ʼni̱, garmáʼáan a̱jkiu̱lú dí kuwáánʼ ruxna ajngúlú náa inuu Dios, ikhaa jngóo gíʼmaa muʼthá dí gajkhun. Á mu rígá mbá dí nurajxulú guriʼña̱a̱ xó má kaʼyoo.

Nduʼyáá dí gíʼdoo wéñuuʼ numuu dí nambájxulu gajmiúlú Jeobá, ikhaa jngóo, gíʼmaa muʼtákáñíí ma̱ngaa dí mundxaʼwamíjna̱ nákha xóó tséxná ajngúlú. Ndayóoʼ mbuʼyáá á mu dí gúraʼwíí mu̱ʼni̱ xáʼni gawúunʼ ku̱ma̱ ndrígúlú ni má xánujgurámuu ikha ndrígóo Biblia. Á mu rígá mbá dí nuxuʼdamíjna̱ mu̱ʼni̱, guʼnimbáníí (1 Ped. 2:12).