Índo̱ narígá xúʼko̱, bi̱ kúwá náa congregación gíʼmaa mbuyáá rí xa̱biya̱ bi̱ niniña̱a̱nʼ a̱ʼgiu̱u̱ mu mbayáa i̱mba̱a̱, matrimonio ndrígóo nagiʼdoo numuu má. Mu ma̱ndoo mbuʼyáá náá numuu dí nuʼthá xígi̱ kaʼnii, guʼyáá rí niʼthí Jesús ga̱jma̱a̱ numuu rí mbáa ma̱ndoo maniña̱a̱ʼ bi̱ ndiyáa ga̱jma̱a̱ mbayáa i̱mba̱a̱.

Náa Mateo 19:9, Jesús niʼthí mbá numuu rí náa Biblia naʼthí dí ma̱ndoo muniñamijnáá xa̱bu̱ bi̱ nidamijná. Ikhí naʼthí: “Asndu tsáa bi̱ naniña̱a̱nʼ a̱ʼgiu̱u̱ ga̱jma̱a̱ ndayáa i̱mba̱a̱, nakudaminaʼ aʼkhá. I̱ndó ma̱ndoo maniña̱a̱ʼ á mu a̱ʼgiu̱u̱ nibóoʼ xkawiʼ kayuuʼ ga̱jma̱a̱ i̱mba̱a̱”. Náa ajngáa dí niʼthí Jesús rígá a̱jma̱ dí najmañunlú 1) i̱ndó mbá numuu rí naʼthí náa Biblia rí ma̱ndoo muniñamijnáá bi̱ nidamijná nindxu̱u̱ á mu mbáa dí ikhiin nabóoʼ ga̱jma̱a̱ i̱mba̱a̱, 2) xa̱bu̱ bi̱ naniña̱a̱nʼ a̱ʼgiu̱u̱ ga̱jma̱a̱ mbá numuu dí tséʼkha̱ náa Biblia ma̱ngaa ndayáa i̱mba̱a̱ nakudaminaʼ aʼkhá. a

Lá ajngáa rí niʼthí Jesús nandoo gáʼthúu̱n rí xa̱biya̱ bi̱ nibóo̱ʼ ga̱jma̱a̱ i̱mba̱a̱ ma̱ngaa naniña̱a̱nʼ a̱ʼgiu̱u̱, Biblia naniñuuʼ rí ma̱ndoo mbayáa i̱mba̱a̱ xáʼ. Na̱nguá má eyóoʼ maʼni xúʼko̱. Numuu rí a̱ʼgu̱ bi̱ ragíʼdoo aʼkhúun ma̱ndoo maraʼwíí á mu maʼni mba̱a̱ a̱jkiu̱u̱n o na̱nguá. Á mu naniña̱a̱nʼ ma̱ndoo manda̱ʼa̱ divorcio, ikhú mbá nájmi̱i̱n ma̱ndoo matangi̱ín mbuya̱a̱ i̱mba̱a̱ nda̱wa̱á dí nixnamijná divorcio.

Mbáa ma̱ndoo marigá dí a̱ʼgu̱ xóó maʼndoo maxtáa ga̱jma̱a̱ ajmbio̱o̱, ikhaa jngóo naʼthúu̱n dí maʼni mba̱a̱ a̱jkiu̱u̱n kaʼyoo. Mú, ndiéjunʼ gárígá á mu xa̱biya̱ mbájkhú má nánguá eyoo maxtáa ga̱jma̱a̱ a̱ʼgiu̱u̱ ga̱jma̱a̱ naxnúu divorcio dí i̱ndó ikhaa niraʼwíí maski má a̱ʼgiu̱u̱ niʼthúu̱n dí ma̱ndoo maʼni mba̱a̱ a̱jkiu̱u̱n kaʼyoo xá. Ga̱jma̱a̱ numuu dí a̱ʼgiu̱u̱ nandoo maʼni mba̱a̱ a̱jkiu̱u̱n kaʼyoo ma̱ngaa dí nandoo xóó maxtáa ga̱jma̱a̱, ikhaa jngóo xa̱biya̱ xándoo mbayáa i̱mba̱a̱ numuu rí nda̱a̱ mbá ikha náa Biblia rí maguma xígi̱ kaʼnii. Á mu xa̱biya̱ tséʼnimbánuu ikha ndrígóo Biblia nda̱ya̱a̱ má tsiakii i̱mba̱a̱ maski ajndu ndaʼyoo dí xándoo maʼni, mbu̱júu̱ nakudaminaʼ aʼkhá. Bi̱ kuya̱ edxu̱u̱ náa congregación nugíʼ i̱mba̱ comité judicial mu munimbaníí aʼkhá rígi̱ (1 Cor. 5:1, 2; 6:9, 10).

Á mu mbáa xa̱biya̱ nanigúu̱nʼ mbu̱júu̱ maski má náa Biblia naʼthí dí ragíʼmaa maʼni, xú káʼnii eyáá bi̱ kúwá náa congregación matrimonio dí ginii ga̱jma̱a̱ dí nda̱wa̱á rá. Xó má naʼthí náa Biblia, lá xóó magiʼdoo numuu matrimonio dí ginii ráʼ. Lá xóó ma̱ndoo a̱ʼgu̱ maʼni mba̱a̱ a̱jkiu̱u̱n kaʼyoo o maniñuuʼ bi̱ ninindxu̱u̱ ajmbio̱o̱ ráʼ. Lá dí i̱mba̱ nuxi̱ʼ matrimonio majmaʼnuuʼ xóo bi̱ nixudami̱jna̱ aʼkhá ráʼ.

Nákha ginii bi̱ kúwá náa congregación nduyáá dí índo̱ mbáa xa̱biya̱ natanga̱a̱ nanigúu̱nʼ, xó má ikhaa ga̱jma̱a̱ a̱ʼgu̱ bi̱ ndiyáa najmaʼniún xóo bi̱ nixudami̱jna̱ aʼkhá, numuu rí a̱ʼgiu̱u̱ bi̱ ndiyáa kaʼníí xóó xtáa, tánujúu̱nʼ ni má tábóoʼ ga̱jma̱a̱ i̱mba̱a̱. Índo̱ Jesús niʼthí ga̱jma̱a̱ numuu rígi̱, táʼthi ga̱jma̱a̱ numuu bi̱ ragíʼdoo  aʼkhúun. Rí phú nindoo gáʼthí, dí xa̱biya̱ bi̱ naniña̱a̱nʼ a̱ʼgiu̱u̱ ga̱jma̱a̱ mbá numuu dí tséʼthí náa Biblia ma̱ngaa ndayáa i̱mba̱a̱, nakudaminaʼ aʼkhá. Ikhaa jngóo á mu narígá divorcio ga̱jma̱a̱ natanga̱a̱ nanigúu̱nʼ, xtáa rakudaminaʼ aʼkhá xó má niʼthí Jesús, rígi̱ naʼni gámbóo matrimonio dí ginii.

Índo̱ mbáa naxná divorcio ga̱jma̱a̱ nda̱ya̱a̱ i̱mba̱a̱ naʼni gámbóo matrimonio rí ginii, bi̱ ragíʼdoo aʼkhúun nánguá xóo maʼni mba̱a̱ a̱jkiu̱u̱n kaʼyoo ni má mata̱nga̱a̱ maxtáa ga̱jma̱a̱. Ikhaa jngóo bi̱ ragíʼdoo aʼkhúun nánguá kajkuáa ñawúunʼ dí maraʼwíí rí maʼni. Ma̱ngaa bi̱ kúwá náa congregación ní xáʼyóoʼ mbuyáá rí nuxi̱ʼ matrimonio nindxu̱u̱ xóo bi̱ nini̱ aʼkhá, tséʼniuu á mu a̱ʼgiu̱u̱ maʼga̱nú makhañúu, tánujúu̱nʼ o tábóoʼ ga̱jma̱a̱ i̱mba̱a̱. b

Xkri̱da dí niʼgíʼ nákha nigíʼdi̱i̱, xa̱biya̱ nikudaminaʼ aʼkhá ga̱jma̱a̱ rúʼko̱ niʼni dí a̱ʼgiu̱u̱ maxnúu divorcio. Ndiéjunʼ gárígá á mu xa̱biya̱ gáxnúu divorcio a̱ʼgiu̱u̱ ga̱jma̱a̱ ndayáa i̱mba̱a̱ maski ajndu tákudaminaʼ aʼkhá rá. O ndiéjunʼ gárígá á mu xa̱biya̱ nakudaminaʼ aʼkhá nda̱wa̱á dí nixnúu divorcio a̱ʼgiu̱u̱ ga̱jma̱a̱ ndayáa i̱mba̱a̱ maski má a̱ʼgiu̱u̱ nandoo maʼni mba̱a̱ a̱jkiu̱u̱n kaʼyoo xá. Maski ajndu xúʼko̱ gárígá, rí xa̱biya̱ ndiyáa i̱mba̱a̱ a̱ʼgu̱ ga̱jma̱a̱ divorcio dí nirígá rí nindxu̱u̱ aʼkhá, naʼni gámbóo matrimonio dí ginii. Matrimonio dí nuxi̱ʼ na̱jkha̱nú nagiʼdoo numuu. Náa La Atalaya 15 ñajunʼ gu̱nʼ febrero tsiguʼ 1980, ináa 30, niʼthí rí xa̱bu̱ bi̱ ninigúu̱nʼ mbu̱júu̱ “ní xándoo gátanga̱a̱ mbayáa mbu̱júu̱ bi̱ ndiyáa nákha ginii, numuu dí matrimonio rúʼko̱ niguámbá índo̱ nixnúu divorcio, índo̱ niʼni aʼkhá ga̱jma̱a̱ índo̱ nitanga̱a̱ ndiyáa i̱mba̱a̱ a̱ʼgu̱”.

Dí xóo nixtiʼkhu̱u̱ rígi̱ tsíyoo gáʼthí dí cristianos mbaʼyóoʼ mundxaʼwamíjna̱ dí matrimonio nánguá nindxu̱u̱ mitsúʼkháan o rí mata̱ba̱a̱ʼ ga̱jma̱a̱ʼ i̱mba̱a̱ na̱nguá má nindxu̱u̱ mbá aʼkhá mbi̱i̱ʼ wéñuuʼ. Á mu mbáa xa̱biya̱ naxnúu divorcio a̱ʼgiu̱u̱ ga̱jma̱a̱ mbá numuu dí tséʼkha̱ náa Biblia ga̱jma̱a̱ ndayáa i̱mba̱a̱ a̱ʼgu̱, bi̱ kuya̱ edxu̱u̱ mbaʼyóoʼ mugíʼ mbá comité judicial mu munimbaníí, numuu rí nikudaminaʼ aʼkhá mbi̱i̱ʼ. (Á mu a̱ʼgu̱ bi̱ ndiʼkhú ndiyáa nindxu̱u̱ xa̱bi̱i̱ Jeobá, mbaʼyóoʼ mugíʼ i̱mba̱ comité judicial numuu rí ma̱ngaa nikudaminaʼ aʼkhá). Maski má matrimonio nuxi̱ʼ rígi̱ xájmaʼnuuʼ xóo bi̱ nini̱ aʼkhá, mú xa̱biya̱ xándoo magruigú ñajunʼ kiejuunʼ náa congregación. Mbaʼyóoʼ magiʼthu̱u̱n mba̱yu̱u̱ʼ tsiguʼ asndu índo̱ xa̱bu̱ ní xútha ga̱jma̱a̱ numuu dí niʼni. Nákha xóó tsékánáá mbá ñajunʼ náa congregación, bi̱ kuya̱ edxu̱u̱ ma̱ngaa ndayóoʼ mbuyáá ga̱jma̱a̱ numuu a̱ʼgu̱ bi̱ ndiyáa nákha ginii bi̱ niʼni nduwaaʼ, ma̱ngaa gíʼmaa mbuyáá ga̱jma̱a̱ numún e̱ji̱n bi̱ niguanún gajmiún rudún (Mal. 2:14-16).

Dí matatsiʼñáanʼ bi̱ ndiyáa ma̱ngaa dí mbi̱ya̱a̱ i̱mba̱a̱ ga̱jma̱a̱ mbá numuu rí tséʼkha̱ náa Biblia na̱ʼkha̱ kagu̱u̱ mbaʼa ga̱ʼkhu̱, ikhaa jngóo bi̱ ni̱ndxu̱lú cristianos, májánʼ gáʼni rí mbuʼyáá dí nidamijná xa̱bu̱ nindxu̱u̱ mitsúʼkháan xó má eʼyoo Jeobá (Ecl. 5:4, 5; Heb. 13:4).