1. Xú káʼnii nisngájma Mateo dí gajkhun magabi̱i̱ rá.

 MATEO mbáa dxámá chíʼgíiʼ gíʼdoo mbó nandii gakhi̱i̱ ndiyóoʼ maguma operar mbaʼa nuthu índo̱ nigiʼdoo juwan tsiguuʼ ikhaa gajmíi̱nʼ familia ndrígóo ndiyáá JW Broadcasting^®. Índo̱ na̱jkha̱ raguámbá, nigájnuu ajmúú náa nikujmiin a̱ngiu̱lú nundriguíin a̱ngiu̱ún bi̱ nigabi̱ín. b Ikhú Mateo nijkha kanuu náa anu̱u̱ ga̱jma̱a̱ ru̱dúu̱, niguajthun ñawúúnʼ ga̱jma̱a̱ niʼthún: “Amá, apá, nduyalaráʼ, á mu ikhúún gákhañuʼ ma̱ndoo muguaʼthunʼla. Xúgííʼ má gagájnuu májánʼ”. Lá nandoo natatsaʼwáminaʼ ikháán ráʼ. Xú káʼnii nikumu̱ún xabuanii índo̱ ndiyáá dí aʼdiún ndaʼyoo dí gajkhun magabii rá.

2, 3. Náa numuu gíʼmaa mundxaʼwamíjna̱ ga̱jma̱a̱ numuu dí magabi̱ín xa̱bu̱ rá.

² Májánʼ gáʼni á mu nundxaʼwamíjna̱ ga̱jma̱a̱ numuu dí magabi̱ín xa̱bu̱ (Juan 5:28, 29). Náa numuu rá. Numuu dí na̱nguá eʼyáá dí muraʼníílú nda̱wa̱á. Ma̱ndoo muguáʼdáá mbóoʼ nandii gakhi̱i̱ o ma̱ndoo makhañú mbáa bi̱ nandulú kuʼyáá índo̱ na̱nguá guaʼti̱i̱n (Ecl. 9:11; Sant. 4:13, 14). Dí kua̱ʼthi̱i̱n magabi̱ín xa̱bu̱ nda̱wa̱á, mambáyulú muraʼníí ga̱ʼkhu̱ rígi̱ (1 Tes. 4:13). Náa Kiʼnirámáʼ naʼthúlú dí Anu̱lú bi̱ xtáá mekhuíí naʼni nuwáánʼlú májánʼ ga̱jma̱a̱ nandoo kaʼyulú wéñuuʼ (Luc. 12:7). Ra̱ʼkhá tháán májáanʼ niniáanʼlu ikha jngóo ma̱ndoo maʼniwáánlú mbu̱júu̱ ikhaa kayuuʼ xó má nindxu̱lú nákha ginii. Nandoo kaʼyulú wéñuuʼ ikha jngóo naxnúlú dí ma̱ndoo makuwáánʼlú kámuu mbiʼi. A mu nakháñulú ikhaa makujxáánʼlu.

 ³ Náa artículo rígi̱ mbuʼyáá náá numuu dí ma̱ndoo makumulú dí gajkhun magabi̱ín xa̱bu̱. Ma̱ngaa mambáyulú munigajmaa historia dí na̱ʼkha̱ náa texto rí kayá edxu̱u̱ artículo rígi̱: “Giʼtia̱a̱ʼ magabi̱i̱ʼ” (Juan 11:23). Nda̱wa̱á, mbuʼyáálú xú káʼnii gándoo muʼni mu mbuʼyáá itháan gajkhun dí matujxi̱ín xa̱bu̱.

4. Ndiéjunʼ gíʼmaa mbuʼyáá mu ma̱ndoo muʼnimbulú mbá ajngáa rá.

⁴ Mu ma̱ndoo muʼnimbulú ajngáa dí nuthulú, gíʼmaa mbuʼyáá dí bi̱ naʼthúlú gajkhun nandoo ga̱jma̱a̱ gíʼdoo tsiakii manimbánuu, xó muʼthá, majmaa maʼni dí naʼthí. Gundxaʼwamíjna̱ ga̱jma̱a̱ numuu mbá xkri̱da. Numuu dí gakhi̱i̱ wéñuuʼ nixnúu ruʼwa, guʼwúlú niguma gachúu. Mbáa bi̱ nambájxulú gajmiulúʼ naʼthúlú dí mambáyulú mu maʼni májáanʼ guʼwúlú. Nduʼyáálú di gajkhun naʼthí ga̱jma̱a̱ dí nandoo mambáyulú. Ikhaa najmaa naʼni májánʼ guʼwá ma̱ngaa gíʼdoo xúgíʼ ajua̱nʼ dí ndayóoʼ, ikha jngóo nduʼyáálú dí majmaa mambáyulú, numuu rúʼko̱ nakumulú kuʼyáá. Ndiéjunʼ ma̱ndoo muʼtálu ga̱jma̱a̱ numuu dí magabi̱ín xa̱bu̱ rá. Lá Dios nandoo ga̱jma̱a̱ maʼngo̱o̱ maʼni rígi̱ ráʼ.

5, 6. Náa numuu ma̱ndoo makumulú dí Jeobá nandoo maʼniga̱bi̱ín bi̱ nikháñúún rá.

⁵ Jeobá nandoo maʼnigabi̱ín bi̱ nikháñúún, ikha jngóo niʼni di mbaʼin xa̱bu̱ muʼnirámáʼ ga̱jma̱a̱ numuu rígi̱ náa Biblia (Is. 26:19; Os. 13:14; Apoc. 20:11-13). Ikhaa naʼnimbánuu xúgíʼ dí nakudaminaʼ maʼni (Jos. 23:14). Jeobá ra̱ʼkhá tháán nandoo maʼni dí makuwá mbu̱júu̱ xa̱bu̱ bi̱ nikháñúún. Náá numuu eʼthá rígi̱ rá.

⁶ Gundxaʼwamíjna̱ dí niʼthí xa̱bu̱ nikhi̱i̱ Job. Ikhaa gajkhun niku̱mu̱u̱ dí á mu nakháñuu, Jeobá nandoo wéñuuʼ mata̱nga̱a̱ mbaʼyoo mbu̱júu̱ (Job 14:14, 15, nota). Jeobá naku̱mu̱u̱ ikháá má kayuuʼ ga̱jma̱a̱ numún xa̱bi̱i̱ bi̱ nikháñúún, ra̱ʼkhá tháán nandoo maʼniga̱bi̱ín xa̱bu̱, ga̱jma̱a̱ dí xáʼniún nandii ma̱ngaa makuwá gagi. Xú káʼnii ku̱mu̱u̱ Jeobá ga̱jma̱a̱ numún xa̱bu̱ bi̱ nikháñúún mú na̱nguá nininuwiinʼ xá. Anu̱lú bi̱ nandoo kaʼyulú wéñuuʼ nandoo dí ikhiin ma̱ngaa matujxi̱ín (Hech. 24:15). Nandoo dí mbóoʼ mbiʼi, ikhiin maguánú mambájxuun gajmiún ga̱jma̱a̱ dí makuwíin kámuu mbiʼi (Juan 3:16). Xó má eʼyáá Jeobá nandoo maʼniga̱bi̱ín bi̱ nikháñúún.

7, 8. Ndíjkha nduʼyáá dí Jeobá gíʼdoo tsiakii mu maʼnigabi̱ín bi̱ nikháñúún rá.

⁷ Gíʼdoo Jeobá tsiakii mú maʼnigabi̱ín xa̱bu̱ bi̱ nikháñuu ráʼ. Xúʼko̱. Ikhaa “gíʼdoo xúgíʼ tsiakii” (Apoc. 1:8). Ikhaa ma̱ndoo maʼnigámbáa dí nakháñulú (1 Cor. 15:26). Rígi̱ naxnúʼlú tsiakii ga̱jma̱a̱ naʼni a̱jkiu̱lú. Guʼyáá dí nigíʼnuu mbáa ndxájulú mbiʼyuu Emma Arnold. Ikhaa gajmíi̱n bi̱ kúwá náa goʼwóo niraʼníí gamiéjunʼ índo̱ nirígá Raga̱jma̱ Guerra náa Xúgíʼ Numbaaʼ. Numuu dí nikháñun bi̱ nandún kuñún náa campo de concentración nazi, ikhaa niʼni̱i̱ a̱jkiu̱u̱n a̱ʼdióo ga̱jma̱a̱ ajngáa rígi̱: “Á mu xa̱bu̱ bi̱ nikháñun xátujxi̱ín, rígi̱ eyoo gáʼthúu̱n dí nakháñulú itháan gíʼdoo tsiakii ki xóo Dios”. Ragájkhun rúʼko̱. ¡Ndawaa imba̱a̱ bi̱ gíʼdoo wéñuuʼ tsiakii ki xóo Jeobá! Ikhaa niʼni dí makuwáánʼlú, ikha jngóo gíʼdoo wéñuuʼ tsiakii mu maʼni dí makuwi̱i̱n mbu̱júu̱ xa̱bu̱ bi̱ nikháñun.

⁸ Imbo̱ʼ numuu dí nduʼyáálú dí majmaa maʼnigabi̱ín bi̱ nikháñúún nindxu̱u̱ dí nditháan tsémbumuu. Náa Biblia naʼthí dí ikhaa naʼthúún xúgíinʼ a̱ʼgua̱a̱n ga̱jma̱a̱ mbiʼñún (Is. 40:26). Jeobá narmáʼáan a̱jkiu̱u̱n eni̱ xúgíinʼ xa̱bu̱ bi̱ nikháñúún (Job 14:13; Luc. 20:37, 38). Narmáʼáan a̱jkiu̱u̱n xúgíʼ xóo kaʼnii xa̱bu̱, xú káʼnii nixtáa ga̱jma̱a̱ ndiéjunʼ nigíʼnuu.

9. Ndíjkha ku̱ma̱a̱ ikháán dí magabi̱ín xa̱bu̱ rá.

⁹ Xó má eʼyáá, ma̱ndoo makumulú kuʼyáá dí  nikudaminaʼ maʼni Jeobá; dí makujxi̱ín xa̱bu̱, numuu dí nandoo maʼnimbánuu ga̱jma̱a̱ gíʼdoo tsiakii mu maʼni. Imbo̱o̱ xóo ma̱ndoo mambáyulú mbuʼyáá dí gajkhun maʼnimbánuu dí nikudaminaʼ nindxu̱u̱ dí maʼniga̱bi̱ín. Nákha wajyúuʼ, Jeobá nixnúún tsiakii xa̱bu̱ mu munigabi̱ín eʼwíinʼ, mbáa dí ikhaa nindxu̱u̱ Jesucristo. Mbuyáá xú káʼnii niʼnigabi̱i̱ Jesús mbáa xa̱bu̱. Ma̱ndoo muxkamaalu náa Juan capítulo 11.

10. Ndiéjunʼ nirígá náa Betania índo̱ Jesús xtaa raʼtáraʼa náa imbo̱ʼ rawuunʼ iyaʼ rá. b) Ndiéjuunʼ niraʼwíí maʼni ikhaa xá. (Juan 11:1-3.)

¹⁰ (Atraxnuu Juan 11:1-3). Gundxaʼwamíjna̱ dí nigíʼnuu náa Betania índo̱ na̱jkha̱ rámbáa tsiguʼ 32, Jesús gíʼdiin guáthi̱i̱n bi̱ nambájxu gajmíi̱n ikhí: Lázaro gajmii a̱ngui̱i̱n, María ga̱jma̱a̱ Marta (Luc. 10:38-42). Lázaro nindoo káñuu rúʼko̱ niʼni dí a̱ngui̱i̱n maxmiéjunʼ wéñuuʼ. Nixuʼma ajngáa náa Jesús, ikhaa xtaa náa imbo̱ʼ rawuunʼ iyaʼ dí midxuaʼnu ikhí matani̱ a̱jma̱ mbiʼi dí midxu̱u̱ʼ rajkuáaʼ (Juan 10:40). Mú phú gíná nirígá, mbáa índo̱ nijkhánú ajngáa náa inuu Jesús, nikháñu Lázaro. Maski ajndu Jesús ndaʼyoo má dí mígiu̱u̱ nikháñuu, ikhaa niraʼwíí maguanúu a̱jma̱ mbiʼi xóó náa xtáá. Ikha jngóo índo̱ nitanga̱a̱ a̱jkhu̱ mbiʼi ma niʼni dí Lázaro nikháñuu. Jesús nandoo maʼni mbóoʼ dí mambáñun bi̱ nambájxu̱u̱ gajmii ga̱jma̱a̱ maxnuu gamajkhu Dios (Juan 11:4, 6, 11, 17).

11. Ndiéjunʼ eʼsngúlú ga̱jma̱a̱ numún bi̱ nambájxu gajmiúlú náa xkri̱da rígi̱ rá.

¹¹ Ndiéjunʼ eʼsngúlú xkri̱da rígi̱ mu xóo mambájxulú gajmiúlú eʼwíinʼ rá. Índo̱ María ga̱jma̱a̱ Marta nixuʼma ajngáa náa inuu Jesús, na̱nguá nitháán dí maʼga náa Betania, i̱ndó má nitháán dí bi̱ nambájxu̱u̱ ga̱jma̱a̱ nandoo kañun (Juan 11:3). Índo̱ Lázaro nikháñuu, Jesús ma̱ndoo maʼnigabi̱i̱ maski ajndu má na̱nguá xtaa mijngii. Mú, ikhaa niraʼwíí maʼga̱ náa Betania mu maʼga gáʼñúún bi̱ nambájxu̱u̱ gajmíi̱n, María ga̱jma̱a̱ Marta. Lá xtaʼdaa ikháán mbáa bi̱ nambájxa̱a̱ʼ ga̱jma̱a̱ dí xtaa xawii mu mambáyaaʼ maski ajndu xóo tsératháán xáʼ. Á mu xúʼko̱, natayáá dí ma̱ndoo mambáyaaʼ índo̱ narígá gamiéjunʼ (Prov. 17:17). Á mu nduʼyaridáá Jesús manindxu̱lú xúʼko̱ kaʼnii mangáán. Gutanga̱ánʼlú mbuʼyáá dí nirígá nda̱wa̱á.

12. Ndiéjunʼ niʼthúu̱n Jesús Marta rá. Ga̱jma̱a̱ ndíjkha dí ma̱ndoo maku̱mu̱u̱ dí gajkhun nindxu̱u̱ dí niʼthún xá. (Juan 11:23-26.)

¹² (Atraxnuu Juan 11:23-26). Índo̱ Marta naʼdxawuun dí Jesús xtaa mijngii náa Betania, mbá nacha̱ nijkha gáʼyoo. Ikhaa niʼthún: “Tátá, á mu niraxtaa gi̱i̱, tákháñúu giʼtio̱ʼ” (Juan 11:21). Gajkhun má dí Jesús ma̱ndoo maʼni thanuu Lázaro nákha xóó tsékháñuu, mu ikhaa nandxa̱ʼwáminaʼ maʼni mbóoʼ dí tséguaʼthi̱i̱n. Jesús niʼthún Marta: “Giʼtia̱a̱ʼ magabi̱i̱ʼ”. Ma̱ngaa niʼni dí magiʼdoo mbóoʼ fe itháan gujkhuʼ índo̱ niʼthúu̱n: “Ikhúúnʼ ni̱ndxu̱ʼ bi̱ naʼnigabiín xa̱bu̱ ga̱jma̱a̱ na̱ni̱ rí mbuya”. Xúʼko̱, Dios nixnúu tsiakii Jesús mu maʼnigabi̱ín xa̱bu̱. Nakha ginii má, niʼniga̱bi̱i̱ mbá dxáʼgú  ga̱jma̱a̱ nda̱wa̱á mbá dxámá bi̱ niʼniga̱bi̱i̱ ikháá má mbiʼi dí nikháñuu (Luc. 7:11-15; 8:49-55). Mú, lá ma̱ndoo magabi̱i̱ mbáa xa̱bu̱ bi̱ nikháñuu má a̱jkhu̱ mbiʼi ga̱jma̱a̱ dí niʼgaa má xáʼ.

13. Xó má naʼthí náa Juan 11:32-35, ndiéjunʼ eʼni Jesús índo̱ ndaʼyoo dí María ga̱jma̱a̱ eʼwíinʼ numbiyaʼ rá. (Atayáá xtiʼkhuu ma̱ngaa.)

¹³ (Atraxnuu Juan 11:32-35). Gundxaʼwamíjna̱ dí kuwáánʼlú ikhí. María i̱mba̱ ndxájuu Lázaro na̱jkha̱ kanuu náa Jesús, naʼthúún ikhaa xó má nithúún Marta: “Tátá, á mu niraxtaa gi̱i̱ giʼtioʼ tákháñuu”. Ikhaa gajmíi̱n eʼwíinʼ ra̱ʼkhá tháán gíná kúwíin. Índo̱ Jesús ndaʼñún ga̱jma̱a̱ naʼdxawúún, nagáwi̱i̱nʼ a̱jkiu̱u̱n. Numuu dí ra̱ʼkhá tháán nagawúunʼ ga̱jma̱a̱ numún bi̱ nambájxu gajmíi̱n ikhaa nagíʼdu̱u̱ nambiyaʼ. Ikhaa nakro̱ʼo̱o̱ xú káʼnii gawúnlú índo̱ nuʼnimbáti̱ga̱a̱ mbáa bi̱ nandulú kuʼyáá, ikha jngóo nandoo maʼnigámbáa di naʼni mumíniiʼlu.

14. Ndiéjunʼ eʼsngúlú ga̱jma̱a̱ numuu Jeobá xóo niʼni Jesús índo̱ ndiʼyoo dí María nambi̱ya̱ʼ rá.

¹⁴ Xóo nikumu̱u̱ Jesús índo̱ ndiʼyoo dí nambi̱ya̱ʼ María nasngájmulú dí Jeobá nindxu̱u̱ mbáa Dios bi̱ nagáwíinʼ a̱jkiu̱u̱n. Ndíjkha nuʼthalu rígi̱ rá. Xó má ndiʼyáá náa artículo dí ninújngoo Jesús nasngájmaa kájxi̱ xóo nandxa̱ʼwáminaʼ ga̱jma̱a̱ xóo naku̱mu̱u̱ Anu̱u̱ (Juan 12:45). Ikha jngóo índo̱ nuraxnuu dí Jesús nimbi̱ya̱ʼ índo̱ ndiʼñún bi̱ nambájxu̱u̱ gajmíi̱n numbi̱ya̱ʼ nduʼyáálú dí Jeobá nagáwíinʼ a̱jkiu̱u̱n ma̱ngaa índo̱ numbi̱ya̱ʼlú ikháanʼ (Sal. 56:8). Rígi̱ eʼni dí maʼndulú muʼgua kanuu náa Dios ndrígulú bi̱ nandoo kaʼyulú.

15. Xó má eʼthí náa Juan 11:41-44, ndiéjunʼ nirígá náa iñáʼ náa nijuiʼdi̱i̱ Lázaro rá. (Atayáá xtiʼkhuu.)

¹⁵ (Atraxnuu Juan 11:41-44). Jesús na̱jkhánú náa iñáʼ náa nijui̱ʼdi̱i̱ Lázaro ga̱jma̱a̱ na̱nda̱ʼa̱a̱ dí murigú itsí dí kaxtogoo ga̱jma̱a̱. Mú Marta niʼthún dí xuyuuʼ niʼni ndajtsúunʼ má. Jesús nariʼña: “Lá raʼkháa nitha̱nʼ rí á mu natanimbaaʼ ma̱ta̱ya̱a̱ tsiakii ndrígóo Dios ráʼ.” (Juan 11:39, 40). Ikhú Jesús niyejxiraʼa mekhuíí ga̱jma̱a̱ nitajkháan náa inún xúgíinʼ. Numuu dí nindoo mbuyáá xúgíinʼ dí Jeobá nindxu̱u̱ bi̱ maxná tsiakii ga̱jma̱a̱ numuu dí inu marígá. Ikhú niʼthí ga̱jma̱a̱ aʼwá gakhi̱i̱:  “¡Lázaro, agajnáaʼ!”. Lázaro nigájnáa náa iñáʼ. Jesús niʼni mbá dí taguáʼthi̱i̱n marígá. c

16. Xú káʼnii embáyulú dí naʼthí náa capítulo 11 ndrígóo Juan rí mbuʼyáá itháán gajkhun dí magabiín bi̱ nikháñún rá.

¹⁶ Dí na̱ʼkha̱ raʼthí náa capítulo 11 ndrígóo Juan nambáyulú mbuʼyáá itháán gajkhun rí magabiín bi̱ nikháñún. Garmáʼáan a̱jkiu̱lú dí Jesús niʼthúu̱n Marta: “Giʼtia̱a̱ʼ magabi̱i̱ʼ” (Juan 11:23). Xó má Anu̱u̱, xúʼko̱ má Jesús ma̱ngaa nandoo ga̱jma̱a̱ maʼngo̱o̱ maʼnimbánuu rí nikudaminaʼ. Índo̱ nimbiyaʼ nisngájma rí nandoo ga̱jma̱a̱ xúgíʼ a̱jkiu̱u̱n maʼnigámbáa rí nakháñulú ma̱ngaa gájma dí naʼni marigá. Índo̱ Jesús niʼniga̱bi̱i̱ Lázaro, xúʼko̱ nitanga̱a̱ nisngájma rí gíʼdoo tsiaki̱i̱ makujxi̱ín xa̱bu̱ bi̱ nikháñún. Jesús niʼni marmáʼáan a̱jkiu̱u̱n Marta: “Lá raʼkháa nitha̱nʼ rí á mu natanimbaaʼ ma̱ta̱ya̱a̱ tsiakii ndrígóo Dios ráʼ.” (Juan 11:40). Guaʼdáá mbá májánʼ numuu muʼnimbulú dí Dios maʼnimbánuu rí nikudaminaʼ rí makujxi̱ín bi̱ nikháñún. Mú, ndiéjunʼ gándoo gúʼni mu mbuʼyáá dí gajkhun mambanúu rá.

17. Ndiéjunʼ gíʼmaa muʼni índo̱ guraxnuu Biblia náa naʼthí ga̱jma̱a̱ numún bi̱ nigabi̱ín rá.

¹⁷ Guraxnuu náa naʼthí rí nigabi̱ín xa̱bu̱ nákha wajyúuʼ ga̱jma̱a̱ gundxaʼwamíjna̱ numuu ikhaa. Náa Biblia nuxkamaa mbá migiñuʼ nuthu náa na̱ʼkha̱ raʼthí ga̱jma̱a̱ numún xa̱bu̱ bi̱ nigabi̱ín mu makuwá. d Lá ma̱ndoo muʼnimíjna̱ dí muʼnigajma̱a̱ itháán ga̱jma̱a̱ numuu mambá náa na̱ʼkha̱ raʼthí rúʼko̱ ráʼ. Índo̱ guʼni, guʼyáá rí naʼthí ga̱jma̱a̱ numún xa̱bu̱ gajkhun: Xa̱bekha, gu̱ʼu̱ ma̱ngaa e̱ji̱n. Guʼyáʼ ndiéjunʼ ma̱ndoo maʼsngulúʼ ga̱jma̱a̱ gundxaʼwamíjna̱ náa mámbá xkri̱da xú káʼnii esngájma rí Dios nandoo ga̱jma̱a̱ maʼngo̱o̱ maʼnigabi̱ín bi̱ nikháñún. Mú rí itháán gíʼdoo numuu rí mundxaʼwamíjna̱ xóo nigabi̱i̱ Jesús. Mbaʼin wéñuuʼ xa̱bu̱ ndiyáá Jesús  nda̱wa̱á rí nigabi̱i̱ ga̱jma̱a̱ rígi̱ naʼni dí fe ndrígulú maʼni itháán gujkhuʼ (1 Cor. 15:3-6, 20-22).

18. Xú káʼnii gándoo majmulú májánʼ ajmúú náa naʼthí ga̱jma̱a̱ numuu rí magabi̱ín xa̱bu̱ rá. (Atayáá nota ma̱ngaa.)

¹⁸ Gajmulú májánʼ “ajmúú dí na̱ʼkha̱ náa Dios” náa naʼthí ga̱jma̱a̱ numún bi̱ magabi̱ín (Efes. 5:19). e Ajmúú rígi̱ naʼni itháán gujkhuʼ fe ndrígulú dí gajkhun mambanúu rí matujxi̱ín xa̱bu̱. Ikha jngóo, májánʼ gáʼni rí muʼdxawíín. Ma̱ngaa ma̱ndoo muʼni índo̱ gúʼnigajma̱a̱ mbá guʼwáanʼ ga̱jma̱a̱ guʼtámíjná ndiéjunʼ eʼsngúlú. Gugiʼdáʼ edxu̱lúʼ ga̱jma̱a̱ guʼni rí makawoo asndu náa a̱jkiu̱lú. Índo̱ gúraʼníí mbá tsáʼkhá rí gamíi maʼni makañúlú o nakháñúu mbáa bi̱ kuʼyáá, ikhú espíritu santo ndrígóo Jeobá mambáyulú mu marmáʼáan a̱jkiu̱lú ajmúú rúʼko̱. Rígi̱ maʼni̱i̱ a̱jkiu̱lú ga̱jma̱a̱ maxnáaʼ tsiaki̱i̱.

19. Xú káʼnii gándoo muʼni mu mundxaʼwamíjna̱ rí magabiín xa̱bu̱ rá. (Atayáá kúgumaʼá “ Ndiéjunʼ gátrajxu̱u̱n xá.”)

¹⁹ Gajmulú rí nundxaʼwamíjna̱. Jeobá nixnúlú dí majmáanʼ mundxaʼwamíjna̱ xóo dí kuwáanʼ má náa numbaaʼ nuxi̱ʼ. Mbáa ndxájulú a̱ʼgu̱ naʼthí: “Nanújngoʼ mba̱yu̱u̱ʼ mbiʼi nandxa̱ʼwa̱mínáʼ dí xóo xtáá má náa Ku̱ba̱ʼ mitsaanʼ, nda̱yo̱o̱ xóo mitsaanʼ ndataun ri̱ʼi̱ rosas dí rígá ikhí”. Gundxaʼwamíjna̱ ma̱ngaa xóo gánindxu̱u̱ rí mbuʼñún xa̱bi̱i̱ Dios bi̱ niguájun jmbu bi̱ naʼthí náa Biblia. Tsáá nandaaʼ matatsiʼniiʼ itháán rá. Ndiéjunʼ gátrajxi̱i̱ xá. Gundxaʼwamíjna̱ ma̱ngaa xóo gúʼni índo̱ guxkami̱ín bi̱ kuʼñúún bi̱ nikháñún. Atatsaʼwáminaʼ ndiéjunʼ gáratha̱a̱n índo̱ gátayaa, mbiyaraʼaa jxa̱ʼ ga̱jma̱a̱ dí ra̱ʼkhá tháán gaʼdxaaʼ dí natayáá mbu̱júu̱.

20. Ndiéjunʼ gíʼmaa muʼni má xúʼko̱ rá.

²⁰ Nuxnalú núma̱aʼ wéñuuʼ Jeobá ga̱jma̱a̱ numuu rí nikudaminaʼ rí maʼnigabi̱ín bi̱ nikháñún. Nduʼyáá gajkhun dí ikhaa maʼnimbánuu numuu rí nandoo ga̱jma̱a̱ maʼngo̱o̱ maʼni. Rí asndu xóo xtáa raʼtulúʼ mambáa dí ikháanʼ: “Bi̱ xtañún matujxi̱ín”. Guʼni rí maʼni gujkhuʼ má xúʼko̱ fe ndrígulú náa rí magabi̱ín xa̱bu̱. Á mu nu̱ʼni̱, xúʼko̱ mu̱ʼgua̱ kanuu itháán mijngii náa Jeobá bi̱ nikudaminaʼ mbá rí mitsaanʼ wéñuuʼ rígi̱.