1. Náa numuu eʼni comentar náa reunión rá.

 NÁÁ numuu ejkualú reunión rá. Najkualu numuu dí nandulú muʼni mba̱a̱ Jeobá (Sal. 26:12; 111:1). Ma̱ngaa ikhí ma̱ndoo muxnamíjnálu tsiaki̱i̱ náa mbiʼi gakhi̱i̱ dí kuwáanʼlu xúgi̱ (1 Tes. 5:11). Ikha jngóo índo̱ nuʼni comentar nuʼnimbáníí mbá nájma̱ dí gíʼdoo numuu rígi̱.

2. Nguáná gándoo guʼni̱i̱ comentar náa reunión rá.

² Ma̱ndoo muʼni comentar náa xúgíʼ reunión dí narígá. Mbá xkri̱da, ma̱ndoo muʼni̱i̱ comentar índo̱ nuʼnigajmaa i̱yi̱ʼ Bi̱ Nayejngoo. Ma̱ngaa ma̱ndoo muʼni̱i̱ comentar índo̱ nduʼyáá “Guʼyáʼ rí gíʼdoo numuu”, ga̱jma̱a̱ índo̱ “Najmañulúʼ ga̱jma̱a̱ numuu Biblia náa congregación” ma̱ngaa ma̱ndoo muxujxí ñawúnlú índo̱ nunda̱ʼa̱a̱ dí muʼni̱i̱ comentar.

3. a) Ndiéjunʼ dí nguáná naʼniulú dí xúʼni̱ comentar rá. b) Xkáʼnii embáyulú Hebreos 10:24, 25 rá.

³ Xúgiáanʼ nandulú dí muʼni mba̱a̱ Jeobá ga̱jma̱a̱ muxnún tsiaki̱i̱ a̱ngiu̱lú índo̱ nuʼni̱i̱ comentar. Mú rígá tikhu dí naʼniulú gakhi̱i̱: Numuu dí ra̱ʼkhá tháán míñulú dí asndu naʼni dí xúʼni comentar, o nuxujxí mbaʼa aʼphu̱ ñawúnlú mu tséjxnulú xúgíʼ náa dí ikháanʼ nindulú muʼthá. Náa i̱yi̱ʼ dí apóstol Pablo niʼnirámáʼ náa inún bi̱ hebreos nuxkamaa mbóoʼ dí ma̱ndoo  mambáyulú. Índo̱ niʼthí dí gíʼdoo wéñuʼ numuu magimbáánʼlú, niʼthí ndiéjunʼ gíʼmaa muʼni: “Guxnámíjnálu tsiakii” (atraxnuu Hebreos 10:24, 25). Á mu nduʼyáá dí comentario dí guxna maʼni dí maxnún tsiaki̱i̱ a̱ngiu̱lú ga̱jma̱a̱ xúʼthá wéñuʼ ma̱ngaa maʼni rí makujmaa fe dí kuaʼdáálú, rígi̱ gáʼni dí xámiñulu wéñuʼ índo̱ guxujxí ñawúnlú. Á mu tséʼni̱ comentar xó má endulú ikháan, makuwáanʼlu gagi índo̱ guʼyáá dí eʼwíinʼ nakánún muni̱i̱ comentar (1 Ped. 3:8).

4. Ndiéjunʼ nindxu̱u̱ ajtsú dí guʼyáá náa artículo rígi̱ rá.

⁴ Náa artículo rígi̱, ginii mbuʼyáá xóo gándoo guxnamíjnalú tsiaki̱i̱ náa nagimbíi̱n guéjmi̱i̱n, náa kúwi̱i̱n káaʼ nguéjmi̱i̱n a̱ngiu̱lú ga̱jma̱a̱ ndayóoʼ magumaa comentar. Nda̱wa̱á, mbuʼyáá xóo gáʼndoo gúʼni̱ náa nagimbíi̱n mbaʼin, náa kúwi̱i̱n mbaʼin a̱ngiu̱lú bi̱ nandún muni̱ comentar. Iwáá kayuuʼ majmañúlú xóo gíʼmaa mani̱ndxu̱u̱ comentario ndrígúlú mu mambáñún eʼwíinʼ.

5. Ndiéjuunʼ gándoo gúʼni mu muxnamíjnalú tsiaki̱i̱ á mu na̱nguá ewan mbaʼánʼ náa reunión rá.

⁵ Náa káaʼ nguéjmi̱i̱n egimbíin, na̱nguá kúwi̱i̱n mbaʼin bi̱ mumbayíí ndxájulú bi̱ naʼsngáa mu muni̱i̱ comentar. Nguáná, ndxájulú buʼko̱ ndaʼyóoʼ magiʼthu̱u̱n mbayuuʼ mu makujxí ñawúnʼ mbáa. Rígi̱ naʼni dí reunión mbajyúuʼ wéñuuʼ. Ma̱ngaa rígi̱ naʼni dí xákanáaʼlu tsiaki̱i̱. Ndiéjunʼ gándoo guʼni índo̱ narígá xígi̱ kaʼnii rá. Gakuwáánʼlú xawii mu muʼni̱i̱ comentar mbaʼa nuthu. Á mu nuʼni xúʼko̱, rígi̱ gáxkajxi̱i̱n muni̱ itháán comentar eʼwíinʼ.

6, 7. Ndiéjunʼ gátani̱ mu xámiñaʼ wéñuuʼ rá.

⁶ Mbaʼin a̱ngiu̱lú namiñun índo̱ nundxaʼwamíjna̱ muni̱i̱ comentar. Ndiéjunʼ gándoo gátani̱ á mu xúʼko̱ kaʼnii egíʼnaaʼ mangáán rá. Atayáʼ dí ma̱ndoo mambáyáaʼ mu xámiñaaʼ mu xúʼko̱ ma̱ndoo matambáñún itháán eʼwíinʼ índo̱ gáraxna comentario.

⁷ Mbá dí ma̱ndoo mambáyáaʼ nindxu̱u̱ dí matanigajmaa mbu̱júu̱ i̱yi̱ʼ Bi̱ Nayejngoo, b dí nigájnuu nákha ginii. Mbá dí ni̱ʼkha̱ raʼthí ikhí nindxu̱u̱ dí matanirataminaʼ májánʼ (Prov. 21:5). Índo̱ itháán gatanigajmaa dí ma̱ta̱ya̱a̱, mambáyáaʼ mu xámiñaaʼ mataxujxí ñawáanʼ. Imbo̱ʼ dí mambáyáaʼ nindxu̱u̱ dí xárata wéñuuʼ índo̱ gátani̱ comentar (Prov. 15:23; 17:27). Á mu tsératá wéñuuʼ, rígi̱ gáʼni dí xámiñaaʼ wéñuuʼ, ma̱ngaa rígi̱ gáʼni dí a̱ngiu̱lú xájyúuʼ gákru̱ʼu̱u̱n comentariaʼ. Á mu ikháán tsératá wéñuuʼ ga̱jma̱a̱ najmaaʼ ajngáaʼ índo̱ natani̱ comentar, maʼni dí eʼwíinʼ mbuyáá dí nitani̱ rataminaʼ májánʼ ga̱jma̱a̱ nakruaʼaa dí kuwáanʼ ruʼnigajmaa.

8. Xú káʼnii ku̱mu̱u̱ Jeobá índo̱ ndaʼyoo tsiaki̱i̱ dí nuʼni mu muʼni̱i̱ comentar rá.

⁸ Ndiéjunʼ gándoo gátani̱ á mu kaʼníí namíñáaʼ matani̱i̱ comentar mbaʼa nuthu maski ajndu nitani̱ ma dí ndiʼyáálu rá. Garmáʼáan a̱jkia̱a̱nʼ dí Jeobá nangajo̱o̱ tsiakii dí natani̱ mu matani̱i̱ comentar (Luc. 21:1-4). Mú Jeobá tségiʼthu̱u̱n matani̱ itháán dí tséʼnga̱a̱ʼ (Filip. 4:5). Atayáá nguáthá comentario gáʼngo̱o̱ gáraxna, atanirataminaʼ ga̱jma̱a̱ atanda̱ʼa̱a̱ Jeobá dí xámiñaaʼ. Atagíʼdi̱i̱ maraxna mbóoʼ comentario chíʼgíiʼ.

9. Ndiéjunʼ gándoo matraʼníí náa nagimbíi̱n mbaʼin xá.

⁹ Á mu náa congregación ndrígáaʼ kúwi̱i̱n mbaʼin publicadores, mbáa ikháán mixtiʼkhu kayuuʼ natraʼníí. Mbáa mbaʼa nuthu tsétani̱  comentar numuu dí kúwi̱i̱n mbaʼin a̱ngiu̱lú bi̱ nandún muriʼña̱a̱. Gundxaʼwamíjna̱ ga̱jma̱a̱ numuu Daniela mbá ndxájulú a̱ʼgu̱ bi̱ nanigu̱u̱ʼ wéñuuʼ maʼniuu comentar náa reunión. c Ikhaa ndaʼyoo dí ra̱ʼkhá tháán gíʼdoo numuu maʼniuu comentar, numuu di xúʼko̱ naʼni mba̱a̱ Jeobá ga̱jma̱a̱ naxnún tsiakii eʼwíinʼ a̱ngiu̱lú ma̱ngaa nambáyúu mu magida̱ʼ edxu̱u̱ di najmañuu náa Biblia. Ikhaa naʼthí: “Niku̱mu̱ʼ xóo nándáa numuʼ, nindxu̱u̱ xóo nindáti̱go̱ʼ mbá dí gíʼdoo wéñuuʼ numuu. Índo̱ mbaʼa nuthu na̱nguá exna̱a̱ mbá comentario, nagíʼdu̱u̱ natatsaʼwáminaʼ dí nuni̱ kiejuunʼ”.

10. Ndiéjunʼ ma̱ndoo matani mu matani̱i̱ comentar itháan rá.

¹⁰ Lá niku̱ma̱a̱ʼ mbá miʼtsu xóo nikumu̱u̱ Daniela mangáán rá. Á mu xúʼko̱ mbá asndu naku̱ma̱a̱ʼ dí itháan májánʼ dí xátaxujxí ñawáanʼ ga̱jma̱a̱ dí i̱ndó matadxawíín. Ndiéjunʼ ma̱ndoo matani mu matani̱i̱ comentar itháán rá. Ma̱ndoo matani ratháá mbaʼa comentario mú xúʼko̱ á mu na̱nguá kanáa’ náa nagi̱ʼdu̱u̱ artículo ma̱ndoo marata náa i̱ʼwáʼ kutriga̱. Índo̱ gatanirataminaʼ ga̱jma̱a̱ i̱yi̱ʼ Bi̱ Nayejngoo, atatsaʼwáminaʼ xú káʼni mbríguii mámbá kutriga̱ ga̱jma̱a̱ dí kayá edxu̱u̱ artículo, mu xúʼko̱ maraʼdáá májánʼ dí marata. Imbo̱ʼ dí ma̱ndoo matani nindxu̱u̱ di matanirataminaʼ náa kutriga̱ di na̱ʼkha̱ kisngáa di naʼni itháán miʼskhaa makrua̱ʼa̱a̱ʼ (1 Cor. 2:10). Numuu dí ikhí ndawi̱i̱n wéñuuʼ bi̱ muxna comentario. Mú ndiéjunʼ ma̱ndoo matani xi nitani̱ má xúgíʼ rígi̱, mu na̱nguá xóó kanáa’ marata rá. Nákha xóó tségi̱ʼdu̱u̱ reunión ma̱ndoo maratha̱a̱n ndxájulú bi̱ maʼsngáa, náá graxe̱ nandaʼ matriʼña̱a̱.

11. Xó má eʼthí náa Filipenses 2:4, ndiéjunʼ ma̱ndoo muʼni rá.

¹¹ (Atraxnuu Filipenses 2:4). Dios niʼni dí apóstol Pablo maxkajxiin cristianos mu mbuyáá dí ndaʼñún eʼwíinʼ. Xú káʼni ma̱ndoo muʼnimbáníí consejo rígi̱ náa reunión rá. Garmáʼáan a̱jkiu̱lú dí eʼwíinʼ ma̱ngaa nandún muni̱i̱ comentar.

12. Ndiéjunʼ ma̱ndoo muʼnilú mu muxnúún tsiakii eʼwíinʼ náa reunión rá. (Atayáá xtiʼkhuu.)

¹² Gúʼgíiʼlú mbá xkri̱da dí mambáyulú mu  ma̱ndoo makru̱ʼu̱lú. Índo̱ naratámíjná gajmiáanʼ bi̱ nambájxáaʼ, na̱nguá rathá i̱ndó ikháán, natatsiñúnʼ dí ikhiin mangiin muthi. Xúʼko̱ má rígá náa reunión ma̱ngaa. Nandulú dí mbaʼin a̱ngiu̱lú muni̱i̱ comentar ma̱ngaa. Imbo̱ʼ dí ma̱ndoo muʼni mu muxnún tsiakii a̱ngiu̱lú nindxu̱u̱ dí muniʼñááʼlu dí mangiin muthi fe dí guáʼdáá (1 Cor. 10:24). Guʼyáá ndiéjunʼ ma̱ndoo muʼnilú mu eʼwíinʼ ma̱ngaa ma̱ndoo muni̱i̱ comentar.

13. Ndiéjuunʼ ma̱ndoo muʼni mu muni̱i̱ comentar itháán mbaʼin rá.

¹³ Mbóoʼ dí ma̱ndoo muʼnilú nindxu̱u̱ dí índo̱ muʼnilú comentar xájyúlú mbayuuʼ mu ma̱ndoo muni̱i̱ comentar eʼwíinʼ ma̱ngaa. Ma̱ndoo mugíʼ xkri̱da rígi̱ a̱ngiu̱lú bi̱ kuya̱ edxu̱u̱ ga̱jma̱a̱ Testigos bi̱ kúwi̱i̱n má mbayuuʼ tsiguʼ náa xuajñuu Jeobá. Ma̱ngaa ragíʼmaa muthi mbá xúgííʼ dí na̱ʼkha̱ náa kutriga̱, á mu nuʼni xúʼko̱, eʼwíinʼ xáguáʼdáá dí muthi. Mbá xkri̱da, náa kutriga̱ rígi̱ na̱ʼkha̱ a̱jma̱ dí ma̱ndoo muʼni: Dí xájyúlú mbayuuʼ ma̱ngaa dí ragíʼmaa muʼthá xúgíʼ dí na̱ʼkha̱ náa kutriga̱. Á mu ikháán nuxna̱a̱ʼ timbá comentario ndrígóo kutriga̱ rígi̱, ndíjkha tsirathá káaʼ mbó dí na̱ʼkha̱ gi̱i̱ rá.

14. Ndiéjunʼ ma̱ndoo mambáyulú muraʼwíí nguáthá nuthu guxujxí ñawúnlú rá. (Atayáá tikhu xtiʼkhuu.)

¹⁴ Atatsaʼwáminaʼ májánʼ nguáthá nuthu ma̱ndoo mataxujxí ñawáanʼ mu marata, á mu nataxújxi̱ ñawáanʼ náa xúgííʼ reunión, mbáa ndxájulú bi̱ nayéjkha̱ edxu̱u̱ maku̱mu̱u̱ dí nutsudaa mu maxnúlú mbaʼa comentario maski ajndu eʼwíinʼ xóó tsékánún muthi. Ma̱ngaa ma̱ndoo maʼni dí eʼwíinʼ maku̱mu̱ún di na̱nguá má gíʼdoo numuu muxujxi ñawúúnʼ (Ecl. 3:7).

15. a) Ndiéjuunʼ gúʼni á mu na̱nguá nixná nimbá comentario náa reunión rá. b) Ndiéjunʼ gíʼmaa mbaʼyoo ndxájulú bi̱ naʼni graxe̱ rá. (Atayáá náa kúgumaʼá “ Xú gándoo gáraxnajxí mbá parte náa matani graxe̱ rá.”)

¹⁵ Índo̱ kúwi̱i̱n mbaʼin a̱ngiu̱lú bi̱ nuxujxi̱ ñawúúnʼ, mbá a̱ʼkhu̱ dí ikháanʼlu xándoo muʼtá xúgíʼ náa eyulú ikháan. O asndu xakánulú nimbá  comentario índo̱ gámbá reunión. Gajkhun má rúʼko̱ maʼni makumulú dí raguáʼdáá numulú. Mú ragíʼmaa makiʼnáanʼlu (Ecl. 7:9).

16. Ndiéjunʼ ma̱ndoo mu’ni mu muxnúún tsiakii bi̱ nixná comentario rá.

¹⁶ Maski ma tákánáaʼ marata xó má ikháán nindaaʼ, dí ma̱ndoo matani̱ nindxu̱u̱ dí matadxun dí nuthi eʼwíinʼ ga̱jma̱a̱ marathu̱u̱n dí májánʼ nini̱ índo̱ naguámbá reunión. Mbáa ajngáa mitsaanʼ dí gárathu̱u̱n a̱ngiu̱lú maxnúún tsiakii ikháá xó má comentario dí nindaaʼ maraxna (Prov. 10:21). Naraxnún tsiakii a̱ngiu̱lú índo̱ narathúún dí májánʼ nini.

17. a) Ndiéjunʼ gándoo gúni xabuanii rá. b) Xó má e̱ʼkha̱ náa video, ndiéjuunʼ a̱jkhu̱ enii ma̱ndoo muʼnilú mu muʼni ratháá comentario rá. (Atayáá nota ma̱ngaa.)

¹⁷ Ndiéjuunʼ xóó gándoo guʼni mu muxnamíjnálu tsiaki̱i̱ náa reunión rá. Á mu ikháán xtaʼdiin e̱ji̱n majkhiinʼ atambáñúún muniratáá comentario dí ma̱ndoo muthi ikhiin (Mat. 21:16). Náa tikhu reunión najuiʼthá ga̱jma̱a̱ numuu xkujndu dí naguáʼdáá bi̱ nidamijná o aʼkhá xkawiʼ dí nuni̱ xa̱bu̱. Maski ajndu xúʼko̱ marígá mbóo o a̱jma̱ kutriga̱ náa e̱ji̱nʼ ma̱ndoo muthi. Ma̱ngaa atambáñúún e̱jña̱a̱ʼ makru̱ʼu̱u̱n ndíjkha dí xákánún xúgíʼ comentario mámbá dí guxujxi̱ ñawúúnʼ.  Á mu narathúún xúgíʼ rígi̱, ikhiin xákúwi̱i̱n ngíná índo̱ gakánúún eʼwíinʼ comentario dí nindúún muthi (1 Tim. 6:18). d

18. Ndiéjuunʼ ma̱ndoo muʼni mu xúʼthá i̱ndó ga̱jma̱a̱ numulú ikháanʼ índo̱ nuxná comentario rá. (Proverbios 27:2.)

¹⁸ Xugiáanʼlu ma̱ndoo muʼni ratháá májánʼ comentario dí maʼgá gamajkhu náa Jeobá ga̱jma̱a̱ dí maxnúún tsiakii a̱ngiu̱lú (Prov. 25:11). Nguáná ma̱ndoo muʼthá mbá chíʼgíiʼ dí niguaʼnilú ikháanʼ mu ragíʼmaa muʼthá wéñuuʼ i̱ndó ga̱jma̱a̱ numulú (atraxnuu Proverbios 27:2; e 2 Cor. 10:18). Rí phú gíʼmaa muʼni, nindxu̱u̱ dí muʼthá itháán ga̱jma̱a̱ numuu Jeobá, Ajngóo ga̱jma̱a̱ numuu xuajñuu (Apoc. 4:11). Ma̱ndoo muʼthá dí niguáʼníílu á mu graxe̱ dí na̱ʼkha̱ náa kutriga̱ na̱ndu̱ʼu̱lú dí muʼthá. Náa imbo̱ʼ kutriga̱ mbuʼyáá mbá xkri̱da.

19. a) Ndiéjuunʼ gárígá á mu nundxaʼwamíjna̱ ga̱jma̱a̱ numún eʼwíinʼ rá. (Romanos 1:11, 12.) b) Ndíjkha nanigua̱a̱ʼ matani̱ comentar ikháán náa reunión rá.

¹⁹ Maski ajndu nda̱a̱ náa naʼthí xú káʼnii gíʼmaa muʼni̱i̱ comentar náa reunión. Xóo nuʼni comentar xúgiáanʼ ma̱ndoo muʼnimíjna̱ mu muxnamíjnálu tsiakii. Rígi̱ nandoo gáʼthúu̱n dí muʼni̱i̱ comentar itháán xóó o dí makuwáanʼlu gagi ga̱jma̱a̱ numuu dí nikhánulú ma comentario ga̱jma̱a̱ maʼdxulu dí eʼwíinʼ ma̱ngaa nandún muriʼña̱a̱ graxe̱. Á mu náa reunión nundxaʼwamíjna̱ ga̱jma̱a̱ numún eʼwíinʼ, xúgiáanʼ makuwáanʼlu gagi muxnamíjnálu tsiakii (atraxnuu Romanos 1:11, 12).