1. Ndiéjunʼ dí nduʼyáá gajkhun rá.

 BI̱ NI̱NDXU̱LÚ xa̱bi̱i̱ Jeobá nduʼyáá gajkhun dí ikhaa nandoo kaʼyulúʼ ga̱jma̱a̱ nandoo dí makuwáánʼ májánʼ (Rom. 8:35-39). Ma̱ngaa nduʼyáá gajkhun dí índo̱ nuʼnimbulúʼ ikha dí na̱ʼkha̱ náa Biblia nambáyulúʼ má xúʼko̱ (Is. 48:17, 18). Mú, xú káʼnii gíʼma muʼni á mu nuraʼníí mbá xkujndu dí nditháan na̱nguá guáʼthi̱i̱n rá.

2. Ndiéjunʼ xkujndu kuaʼdáá ga̱jma̱a̱ ndiéjunʼ eʼni murajximíjna̱ rá.

² Xúgiáánʼ bi̱ ni̱ndxu̱lú xa̱bi̱i̱ Jeobá kuaʼdáá xkujndu. Mbá xkri̱da, mbáa bi̱ kuʼyáá naʼni o naʼthí dí naʼni gawúnlú. Mbáa kuaʼdáá mbá nandii dí tséniñulúʼ muʼni wéñuʼ ñajuunʼ Jeobá. Mbáa numíniiʼ ga̱jma̱a̱ numuu mbá gamiéjunʼ. O mbáa nuni gínáanʼ ga̱jma̱a̱ numuu rí nuʼni ñajuunʼ Dios. Índo̱ nuraʼníí xkujndu xóo rígi̱, mbáa maʼni murajximíjna̱: “Ndíjkha dí ikhúún giʼnuu rígi̱ rá. Lá nini mbá dí raʼkhí ráʼ. Lá rígi̱ eyoo gáʼthí dí Jeobá na̱nguá eʼni tsajkurámuuʼ ráʼ.” Á mu nikumaʼ mbá miʼtsú xúʼko̱ kaʼnii, xájmaa má. Mbaʼin xa̱bi̱i̱ Jeobá bi̱ niguájun jmbu niguaʼnii xúʼko̱ kaʼnii ma̱ngaa (Sal. 22:1, 2; Hab. 1:2, 3).

3. Ndiéjunʼ eʼsngúlú dí naʼthí náa Salmo 34:19 rá.

 ³ (Atraxnuu Salmo 34:19). b Náa versículo rígi̱ naʼthí a̱jma̱ dí gíʼdoo wéñuʼ numuu: 1) Xa̱bu̱ jmbiin nuraʼníí xkujndu 2) Jeobá naʼni káwáanʼ náa xúgíʼ xkujndu. Mbá dí naʼni Jeobá mu maʼni káwáanʼ náa xkujndu nindxu̱u̱ dí nambáyulúʼ mbuʼyáá awáán xóo kuwáanʼ náa numbaaʼ rígi̱. Gajkhun má dí Jeobá nakudaminaʼ dí makuwáánʼ gagi á mu nuʼni ñajuunʼ, mú raʼkháa rúʼko̱ eyoo gáʼthí dí xáguaʼdáá xkujndu (Is. 66:14). Ikhaa nandoo dí mbuʼyáá má xúʼko̱ dí kuaʼti̱i̱n nda̱wa̱á, ga̱jma̱a̱ nandoo makuwáánʼ náa ku̱ba̱ʼ mitsaanʼ (2 Cor. 4:16-18). Mú, rí xúgi̱ ikhaa nambáyulúʼ makuwáánʼ mámbá mbiʼi (Lam. 3:22-24).

4. Ndiéjunʼ guʼyáá náa artículo rígi̱ rá.

⁴ Náa artículo rígi̱, mbuʼyáá tikhu xkri̱da ndrígu̱ún xa̱bi̱i̱ Jeobá bi̱ nikúwá nákha wájyúuʼ ga̱jma̱a̱ bi̱ kúwá rí mbiʼi xúgi̱. Mbáa maguaʼdáá xkujndu dí tséguaʼthi̱i̱n maguaʼníí. Mú, á mu nakumulú kuʼyáá Jeobá, ikhaa mambáyulúʼ má xúʼko̱ (Sal. 55:22). Índo̱ guʼyáá mámbá xkri̱da rígi̱, atraxi̱mínáʼ: “Ndiéjunʼ lá gáni ikhúún á mu xúʼko̱ xtáá rá. Xú káʼnii embáyuʼ xkri̱da rígi̱ maku̱mu̱ʼ ka̱yo̱o̱ itháan Jeobá rá. Ndiéjunʼ ejma̱ñuʼ náa xkri̱da rígi̱ rá.”

5. Ndiéjunʼ xkujndu niʼni magiʼdoo Jacob Labán rá. (Atayáá xtiʼkhu dí na̱ʼkha̱ náa nagi̱ʼdu̱u̱.)

⁵ Nikúwi̱i̱n xa̱bi̱i̱ Jeobá nákha wajyúúʼ bi̱ niraʼníí xkujndu dí taguáʼthi̱i̱n. Gundxaʼwámíjná ga̱jma̱a̱ numuu Jacob. Anu̱u̱ nikunguanʼ dí maʼga̱ ganigúnʼ ga̱jma̱a̱ mbáa wáxioo Labán, mbáa bi̱ kuyáá ga̱jma̱a̱ naʼni ñajuunʼ Jeobá. Ga̱jma̱a̱ niʼthúu̱n dí Jeobá maʼni tsajkurámaaʼ wéñuʼ (Gén. 28:1-4). Ikha jngóo Jacob ninimbo̱o̱ ga̱jma̱a̱ ni̱jkha̱ náa Canaán ga̱jma̱a̱ ni̱jkha̱nú asndu náa xtáa Labán, bi̱ gíʼdiin a̱jmi̱i̱n wa̱ʼxa̱ʼ bi̱ mbiʼyuu Lea ga̱jma̱a̱ Raquel. Jacob nindoo kaʼyoo Raquel bi̱ itháan gíʼtháá. Mu manigúnʼ ga̱jma̱a̱ ikhaa, nixtáa xawii mañajunʼ mbá juwan tsiguʼ náa Labán (Gén. 29:18). Mú tárígá xóo ikhaa nigi̱ʼthu̱u̱n. Labán niʼninduwaaʼ ga̱jma̱a̱ nixnáxi̱i̱ maʼni a̱ʼgiu̱u̱ wáxioo bi̱ giʼnii bi̱ mbiʼyuu Lea. Mbá xmáná nda̱wa̱á niniñuuʼ manigúnʼ ga̱jma̱a̱ Raquel, mú i̱ndó á mu nañajunʼ ga̱jma̱á nindxu̱u̱ xóó i̱mbá juwan tsiguʼ (Gén. 29:25-27). Mú, raʼkháa i̱ndó rúʼko̱. Labán ma̱ngaa mbaʼa dí raʼkhí niʼniuu Jacob ga̱jma̱a̱ numuu náa niñajunʼ. ¡Niʼni gínáa mbá 20 tsiguʼ! (Gén. 31:41, 42).

6. Ndiéjunʼ i̱ʼwáʼ xkujndu nigiʼdoo Jacob rá.

⁶ Jacob ndiyóoʼ maraʼnuu itháan xkujndu. Nigiʼdiin mbaʼin bi̱ kúwá náa goʼwóo, mú e̱ji̱i̱n na̱nguá nimbájxu̱u̱n májánʼ. Asndu niguánu nigujua̱a̱ José xóo esclavo. Ga̱jma̱a̱ a̱jmi̱i̱n e̱ji̱i̱n Jacob bi̱ mbiʼyuu Simeón ga̱jma̱a̱ Leví, nini gachíí mbiʼñún bi̱ kúwá náa guʼwún ga̱jma̱a̱ mbiʼyuu Jeobá. Ma̱ngaa Raquel, a̱ʼgiu̱u̱ bi̱ nindoo kaʼyoo, nikháñuu índo̱ nixtáa bi̱ maʼni a̱jmi̱i̱n e̱ji̱i̱n. Ma̱ngaa numuu dí nirígá ewiʼ, Jacob ndiyóoʼ maʼga̱ gaxtáa náa Egipto índo̱ niʼni nikhi̱i̱ má (Gén. 34:30; 35:16-19; 37:28; 45:9-11, 28).

7. Xú káʼnii nisngájmuu Jeobá Jacob dí nidxuu kaʼyoo rá.

⁷ Maski ajndu Jacob niraʼnuu xúgíʼ xkujndu rúʼko̱, ikhaa nditháan tániñuuʼ raku̱mu̱u̱ kaʼyoo Jeobá ni má xúgíʼ dí nikudaminaʼ maʼni. Ga̱jma̱a̱ Jeobá nisngájmuu dí nidxuu kaʼyoo. Mbá xkri̱da, maski ajndu mbaʼa nuthu Labán niʼni nduwaaʼ, Jacob nigiʼdoo wéñuʼ, numuu rí Jeobá má nimbáyúu. Mbáa Jacob nixnáa núma̱aʼ Dios ndrígóo índo̱ dí mbayuuʼ tsiguʼ nda̱wa̱á nixka̱ma̱a̱ José, bi̱ nikumu̱u̱ ikhaa dí nikháñuu. Jacob niʼngo̱o̱ niraʼnuu xúgíʼ rúʼko̱  numuu rí nimbáxu̱u̱ májánʼ ga̱jma̱a̱ Jeobá (Gén. 30:43; 32:9, 10; 46:28-30). Ikháanʼlu ma̱ngaa maʼngulú muʼni gajmiúlú xkujndu dí nuraʼníí á mu nambáxulúʼ májánʼ gajmiúlú Jeobá.

8. Ndiéjunʼ nindoo maʼni rey David rá.

⁸ Rey David táʼngo̱o̱ maʼni xúgíʼ dí ninigu̱u̱ʼ maʼni náa Jeobá. Mbá xkri̱da, ikhaa nindoo ga̱jma̱a̱ xúgíʼ a̱jkiu̱u̱n maʼni mbá templo ndrígóo Dios. Índo̱ niʼthúu̱n gaʼyee Natán, ikhaa niriʼñuu: “Atani dí gíwanʼ náa a̱jkia̱nʼ, numuu rí Dios gajkhun xtáa ga̱jma̱á nindxa̱a̱ʼ” (1 Crón. 17:1, 2). Lá naʼngo̱o̱ nundxaʼwamíjná dí ra̱ʼkhá tháán gagi nixtáa David índo̱ niʼdxawuun ajngáa rúʼko̱ ráʼ. Mbáa ikhaa mbá nacha̱ nigíʼdu̱u̱ niríyaʼ awan xú káʼnii gáʼnii ñajunʼ rúʼko̱.

9. Xú káʼnii nikumu̱u̱ David índo̱ na̱nguá nirígá xó má nindoo ikhaa xá.

⁹ Mú tájyúuʼ má dí gaʼyee ndrígóo Jeobá nitanga̱a̱ ga̱jma̱a̱ i̱mba̱ ajngáa. Mbruʼun má rúʼko̱, Jeobá niʼthúu̱n Natán dí raʼkháa David maʼni templo, numuu rí mbáa a̱ʼdióo gáʼni (1 Crón. 17:3, 4, 11, 12). Xú káʼnii nikumu̱u̱ David índo̱ niʼdxawuun ajngáa rúʼko̱ rá. Ikhaa niriʼkhu̱u̱ awan dí niríyaʼ. Nigíminaʼ magímbóo mbújkha̱a̱ ga̱jma̱a̱ dí majmuu a̱ʼdióo Salomón maʼni templo (1 Crón. 29:1-5).

10. Xú káʼnii niʼni tsajkurámáanʼ Jeobá David rá.

¹⁰ Nda̱wa̱á índo̱ nitháán dí ikhaa xáʼni templo, Jeobá rígá dí nikudaminaʼ ga̱jma̱a̱ David: Nikudaminaʼ dí mbáa bi̱ ga̱ʼkha̱ náa ikhaa maʼtáñajunʼ kámuu mbiʼi (2 Sam. 7:16). Náa numbaaʼ nuxi̱ʼ, índo̱ Jesús gáʼtañajunʼ mbá Míi tsiguʼ, David ra̱ʼkhá tháán gáʼdxuu a̱jkiu̱u̱n índo̱ gáʼyoo dí Rey nindxu̱u̱ mbáa bi̱ na̱ʼkha̱ náa ikhaa. Historia rígi̱ naʼsngúlúʼ dí maski ajndu tséʼngo̱o̱ muʼni ñajuunʼ Jeobá xóo ikháanʼ nandulú, Dios ndrígúlú ma̱ndoo maʼnitsajkurámáánʼ.

11. Xú káʼnii niguma tsajkurámiinʼ cristianos bi̱ nikúwá nákha siglo timbá, maski ajndu Reino táʼkha̱ índo̱ nikumu̱ún ikhiin xá. (Hechos 6:7.)

¹¹ Cristianos bi̱ nikúwá nákha siglo timbá niraʼníí tikhu xkujndu dí turaʼthi̱i̱n maguaʼnii. Mbá xkri̱da, nindúún dí Reino ndrígóo Dios ma̱ʼkha̱a̱ nacha̱, mú, na̱nguá ndiyáá nguáná ga̱ʼkha̱ (Hech. 1:6, 7). Ndiéjunʼ nini xá. Túniñanʼ rutaraʼa má xúʼko̱. Índo̱ ndiyáá dí ajngáa dí májánʼ nijuiʼtáraʼa náa mbaʼa xuajen, niguánu ndiyáá dí Jeobá xtáa raʼni tsajkurámuuʼ ñajunʼ dí kúwá runi (atraxnuu Hechos 6:7).

12. Ndiéjunʼ nini cristianos bi̱ nikúwá nákha siglo timbá índo̱ nirígá ewiʼ rá.

¹² Nákha siglo timbá nirígá ewiʼ náa “xúgíʼ numbaaʼ” (Hech. 11:28). Xó má eʼyáá asndu a̱ngiu̱lú nimíniiʼ ga̱jma̱a̱ numuu ewiʼ. Mbáa bi̱ niguáʼdiin e̱jñún nixmiéjuunʼ ga̱jma̱a̱ numuu rí xóo gúni muxniʼtsun bi̱ kúwá náa guʼwún. Bi̱ ninindxu̱ún jiámá bi̱ nikumu̱ún muni itháan ñajuunʼ Jeobá mbáa nindxaʼwamíjná muni itháan nda̱wa̱á. Tséʼyáá xúgíʼ dí nirígá, mú cristianos ninimíjna̱ xó má eʼngo̱o̱ náa nitaraʼa ga̱jma̱a̱ nixnún ga̱jma̱a̱ xúgíʼ a̱jkiu̱ún dí guaʼdáá a̱ngiu̱lú bi̱ nikúwá náa Judea (Hech. 11:29, 30).

13. Xú káʼnii niguma tsajkurámiinʼ cristianos índo̱ nirígá ewiʼ rá.

¹³ Xú káʼnii niguma tsajkurámiinʼ cristianos índo̱ niraʼníí dí gakhi̱i̱ rá. Bi̱ nindrigú ganitsu, ndiyáá xú káʼnii Jeobá xtáa rañewu̱u̱n (Mat. 6:31-33). Mbáa nimbájxu̱u̱n itháan májánʼ gajmiún a̱ngiu̱lú bi̱ nixnúún dí guaʼdáá. Ma̱ngaa nikúwá gagi wéñuʼ bi̱ nixna mbújkha̱a̱ o i̱mba̱ xóo niyambáá náa mixtambáñuun a̱ngiu̱lú (Hech. 20:35). Jeobá niʼni tsajkurámiinʼ xúgínʼ numuu dí ninimi̱jna̱ xóo eʼngo̱o̱.

14. Ndiéjunʼ nigíʼnuu Bernabé ga̱jma̱a̱ apóstol Pablo rá. Ndiéjunʼ nirígá ga̱jma̱a̱ numuu dí xúʼko̱ niguáʼníí xá. (Hechos 14:21, 22.)

¹⁴ Cristianos bi̱ nikúwá nákha siglo timbá  niguma gíníín mbaʼa nuthu, nguáná asndu mbiʼi dí ikhiin nditháan na̱nguá niguaʼti̱i̱n. Guʼyáá dí nigíʼnuu Bernabé ga̱jma̱a̱ apóstol Pablo índo̱ kúwá rutaraʼa náa mbayuuʼ xuajen Listra. Nákha ginii, xa̱bu̱ nidriguíin májánʼ ga̱jma̱a̱ nidxawíín. Mú mbiʼi má rúʼko̱, tikhun xa̱bu̱ sia̱nʼ nini dí xa̱bu̱ makiʼníin kuñúún ga̱jma̱a̱ tikhun dí ikhiin nixnáá ga̱jma̱a̱ itsí Pablo rí asndu nikumu̱ún dí nixiyáa (Hech. 14:19). Mú Bernabé ga̱jma̱a̱ Pablo nigún i̱mba̱ ríʼkhá̱ gutaraʼa. Ndiéjunʼ nirígá rá. “Niʼngu̱u̱n nini dí mbaʼin maguánu mani̱ndxu̱ún xa̱bi̱i̱ Jesús” ma̱ngaa nixnúún tsiakii a̱ngiu̱lú ga̱jma̱a̱ ajngáa dí nithi ma̱ngaa numuu xkri̱da dí niniñanʼ (atraxnuu Hechos 14:21, 22). Bernabé ga̱jma̱a̱ Pablo takanájkhún maski ajndu niguma gíníín ga̱jma̱a̱ rúʼko̱ nimbáñun mbaʼin xa̱bu̱. Xúʼko̱ má kayuuʼ, á mu na̱nguá ekanájkhulú ga̱jma̱a̱ nuʼni má xúʼko̱ ñajuunʼ dí Jeobá nixnúlú, maguma tsajkurámáanʼlu wéñuʼ.

15. Ndiéjunʼ ejmañaaʼ ikháán náa xkri̱da ndrígóo ndxájulú Alexander Macmillan rá.

¹⁵ Tsiguʼ wapháá nákha xóó tséʼni tsiguʼ 1914, xa̱bi̱i̱ Jeobá mbaʼa rí nikumu̱ún. Mbáa dí ikhaa ninindxu̱u̱ Alexander Macmillan. Xó má mbaʼin nindxaʼwamijná nákha ikhú, ikhaa ma̱ngaa nikumu̱u̱ dí xájyúuʼ má gáʼga̱a̱ mekhuíí. Náa mbá discurso dí nixná nákha septiembre tsiguʼ 1914, niʼthí: “Mbáa rígi̱ gánindxu̱u̱ iwáá kayuʼ discurso dí gáxna̱”. Mú tárígá xúʼko̱. Nda̱wa̱á, ikhaa niʼnirámáʼ: “Mbáa tikhuanʼ nikumulúʼ dí mbá nacha̱ gúʼgua̱a̱ mekhuíí”. Ga̱jma̱a̱ niʼthí xóó: “I̱ndó dí ndiyóoʼ munixu nindxu̱u̱ dí munixu má xúʼko̱ ñajuunʼ Tátá”. Ga̱jma̱a̱ xúʼko̱ má niʼni. Niʼtáráʼa ga̱jma̱a̱ xúgíʼ a̱jkiu̱u̱n, nixnúún tsiakii mbaʼin a̱ngiu̱lú bi̱ nixudiinʼ guʼwá e̱jua̱nʼ ga̱jma̱a̱ nditháan tániñuuʼ ra̱jkha̱ reunión maski ajndu nikhi̱i̱ má. Nijmuu májánʼ mbiʼi índo̱ xtáa ragiʼthu̱u̱n mbiʼi dí maguma tsajkurámáanʼ. Ndiéjunʼ nimbáyúu maʼni xúʼko̱ xá. Xígi̱ niʼnirámáʼ nákha tsiguʼ 1966, índo̱ inu makhañúu, niʼthí: “Fe dí gúʼdoʼ xúgi̱ nindxu̱u̱ itháan gujkhuʼ xó má nákha ginii”. Gajkhun má dí niniñuuʼ mbá májánʼ xkri̱da náa xúgiáanʼlu, itháan má xóo bi̱ mbayuuʼ má kúwá ruguaʼthi̱i̱n mambáa dí raʼkhí (Heb. 13:7).

16. Ndiéjunʼ xkujndu dí tágiʼthu̱u̱n niraʼnuu ndxájulú Jennings ga̱jma̱a̱ a̱ʼgiu̱u̱ rá. (Santiago 4:14.)

¹⁶ Mbaʼin xa̱bi̱i̱ Jeobá naguáʼdáá mbá nandii dí na̱nguá kuaʼti̱i̱n. Mbá xkri̱da, ndxájulú Herbert Jennings niʼthí náa historia ndrígóo dí ikhaa ga̱jma̱a̱ a̱ʼgiu̱u̱ kúwá gagi runi ñajunʼ xóo misionero náa xuajen Ghana. c Mú nda̱wa̱á nitháán dí gíʼdoo mbá nandii náa edxu̱u̱. Ndxájulú Jennings niʼthí dí rúʼko̱ ninindxu̱u̱ asndu xóo “mbá miʼcha̱ dí na̱nguá niguaʼti̱i̱n”, dí nindoo gáʼthí ga̱jma̱a̱ ajngáa dí na̱ʼkha̱ náa Santiago 4:14 (atraxnuu). Niʼthí: “Kuwáanʼ ruraʼnííxu dí gajkhun rígá ma̱ngaa ndiyóoʼ mutagáwiixu xuajen Ghana ga̱jma̱a̱ mbaʼin bi̱ nambájxu gajmiúxu mu magutangáanʼxu Canadá [mu munitanamijná]”. Jeobá nimbáyúu ndxájulú Jennings ga̱jma̱a̱ a̱ʼgiu̱u̱ mu muni ñajuunʼ má xúʼko̱ maski ajndu niraʼníí dí mingíjyúuʼ wéñuʼ.

17. Xú káʼnii nimbañúún xkri̱da ndrígóo ndxájulú Jennings eʼwíinʼ a̱ngiu̱lú rá.

¹⁷ Ajngáa dí niʼthí ndxájulú Jennings náa historia ndrígóo nimbañúún wéñuʼ eʼwíinʼ. Mbáa ndxájulú niʼnirámáʼ: “Nimbá miʼtsú táʼni mambiyaʼ wéñuʼ mbá artículo […]. Índo̱ ndi̱yo̱o̱ dí ndxájulú Jennings ndiyóoʼ maniñuuʼ asignación ndrígóo mu maʼni thanaminaʼ  nimbáyuʼ maraʼnuu awáán xóo xtáá”. Imba̱a̱ ndxájulú niʼnirámáʼ: “Nda̱wa̱á dí ninindxu̱ʼ bi̱ kayá edxu̱u̱ itháan dí mbá gu̱wa̱ʼ tsiguʼ, ndiyóoʼ maniʼñúuʼ ga̱jma̱a̱ mbá numuu nandii dí nigúʼdoʼ náa edxu̱ʼ. Ra̱ʼkhá tháán nixtáá ngíná dí naʼni majmúʼ wéñuʼ índo̱ nagúxnuu mbá historia […]. Mú rí xóo takanájkhoo ndxájulú Jennings nixnúʼ tsiakii”. Rígi̱ naʼni marmáʼáan a̱jkiu̱lúʼ dí ma̱ndoo muxnún tsiakii eʼwíinʼ índo̱ naʼngulú nuraʼníí mbá xkujndu dí nda̱a̱ tsúma e̱ʼkha̱ inulu. Ikha jngóo, maski ajndu na̱nguá kuwáánʼ xóo guaʼthíinlú, ma̱ndoo muniʼñááʼ mbá májánʼ xkri̱da náa eʼwíinʼ ga̱jma̱a̱ numuu fe dí kuáʼdáá ma̱ngaa dí naʼngulú má xúʼko̱ (1 Ped. 5:9).

18. Ndiéjunʼ ejmañuluʼ ga̱jma̱a̱ xkri̱da ndrígóo ndxájulú a̱ʼgú xuáʼa bi̱ xtáa náa Nigeria ráʼ. (Atayáá xtiʼkhu náa nasngájma xóo nirígá experiencia rígi̱.)

¹⁸ Nandii COVID-19 niʼniún mbaʼin wéñuʼ xa̱bi̱i̱ Jeobá. Mbá xkri̱da, mbáa ndxájulú a̱ʼgú xuáʼa̱ bi̱ xtáa náa Nigeria nánguá nigiʼdoo mba̱a̱ mbújkha̱a̱ ni má ganitsu. Mbá miʼcha̱ índo̱ káaʼ gíʼdoo xóó imbá taza ndrígóo arroz, a̱ʼdióo niraxu̱u̱ ndiéjunʼ gúphú nda̱wa̱á. Ndxájulú niʼthúu̱n dí nánguá guaʼdáá itháan mbújkha̱a̱, mú rí mbuyaridáá a̱ʼgú xuáʼa̱ bi̱ nixtáa náa Sarepta. Rí muni májánʼ iwáá ganitsu ga̱jma̱a̱ rí makumu̱ún kuyáá Jeobá (1 Rey. 17:8-16). Índo̱ xóó na̱nguá nindxaʼwamíjna̱ ndiéjunʼ gúphú miʼcha̱ rúʼko̱, a̱ngiu̱lú nixnáá mbá paquete náa kajti ganitsu dí muni májánʼ dí muphu̱. ¡Paquete rúʼko̱ nigiʼdoo dí maʼngo̱o̱ muphu itháan dí a̱jma̱ xmáná! Ikhú ni̱jkha̱nú ndiʼyoo ndxájulú dí Jeobá niʼdxawuun májánʼ dí ikhaa niʼthúu̱n wáxioo. Nakujmaa kaʼwu dí á mu nakumulú kuʼyáá Jeobá, xkujndu dí nuraʼníí nda̱a̱ tsumáá ma̱ndoo maʼni dí mu̱ʼgua̱ kanuu itháan mijngii náa ikhaa (1 Ped. 5:6, 7).

19. Ndiéjunʼ ndiyóoʼ maraʼnuu Alexéi Yershov rá.

¹⁹ Mbá nguáthá tsiguʼ wapháá, mbaʼin a̱ngiu̱lú niraʼníí xkujndu dí mbáa na̱nguá niguaʼti̱i̱n, ikhaa nindxu̱u̱ dí naguma gíníi. Guʼyáá  ga̱jma̱a̱ numuu mbáa ndxájulú bi̱ na̱ʼkha̱ náa Rusia, Alexéi Yershov. Índo̱ ikhaa nijngúun iyááʼ nákha tsiguʼ 1994, testigos de Jeobá nindoo má nitaraʼa náa kúwá. Mú nda̱wa̱á nixtiʼkhu̱u̱ wéñuʼ náa Rusia. Nákha tsiguʼ 2020, tikhun policía nitu̱ʼu̱u̱n ga̱jma̱a̱ tsiakii náa goʼwóo ndxájulú Yershov, nixkangaa ga̱jma̱a̱ nigún kudúún mbaʼa trastiu̱u̱. Mbayuʼ gu̱nʼ nda̱wa̱á, xa̱bu̱ ñajunʼ nitháán dí ndayóoʼ maʼga̱ náa inún xa̱bu̱ ñajunʼ ga̱jma̱a̱ numuu video dí niguwíi mbáa xa̱bu̱ bi̱ nisngájma itháan dí mbá tsiguʼ dí ninigu̱u̱ʼ maʼnigajmaa Biblia. ¡Ra̱ʼkhá tháán niʼninduwaʼ!

20. Ndiéjunʼ niʼni ndxájulú Yershov mu mambáxu̱u̱ itháan májánʼ ga̱jma̱a̱ Jeobá rá.

²⁰ Lá nitayáá mbá dí májánʼ rí xóo nigíʼnuu ndxájulú Yershov ráʼ. Xúʼko̱. Rí mbiʼi xúgi̱ ikhaa nambáxu̱u̱ itháan májánʼ ga̱jma̱a̱ Jeobá. Ikhaa naʼthí: “A̱ʼgiu̱ʼ ga̱jma̱a̱ ikhúún nutájkáanxu itháan ngéʼni. Nda̱yo̱o̱ dí xáʼngo̱ʼ á mu raʼkháa Jeobá embáyuʼ”. Ikhaa naʼthí xóó: “Rí manigajmaa Biblia nambáyuʼ dí xájmúʼ wéñuʼ. Nandxa̱ʼwa̱mínáʼ ga̱jma̱a̱ numún xa̱bi̱i̱ Jeobá bi̱ nikúwá nákha wájyúuʼ. Rígá mbaʼa historia náa Biblia náa nasngájma dí gíʼdoo numuu makumulúʼ kuʼyáá Jeobá”.

21. Ndiéjunʼ nijmañulúʼ náa artículo rígi̱ rá.

²¹ Ndiéjunʼ nijmañulúʼ náa artículo rígi̱ rá. Dí maski ajndu na̱nguá eʼyáá ndiéjunʼ gúraʼníí náa numbaaʼ rígi̱, á mu nakumulú kuʼyáá Jeobá, ikhaa maxtáa xawii má xúʼko̱ mambáyulú. Xó má eʼthí texto dí kayá edxu̱u̱, “mbaʼa gamiéjunʼ rí nagíʼnuu xa̱bu̱ jmbii, mú Jeobá naʼni kríyaaʼ náa xúgíʼ” (Sal. 34:19). Ikha jngóo, xúxnatiʼñamijná mbuʼyáá wéñuʼ xkujndu dí kuaʼdáá, itháan má guʼyáá tsiakii dí gíʼdoo Jeobá mu mambáyulú. Mu xúʼko̱ ma̱ndoo muʼthá xóo niʼthí apóstol Pablo: “Gúʼdoo tsiakii mu ma̱ni̱ xúgíʼ núma̱a̱ má bi̱ naxnúʼ tsiakii” (Filip. 4:13).