1. Nguáná niʼni timbá milagro Jesús rá.

 GUʼYÁÁ dí nirígá índo̱ na̱jkha̱ rámbá tsiguʼ 29. Jesús ndiʼkhún nigíʼdu̱u̱ niʼtáráʼa. Ikhaa ga̱jma̱a̱ ru̱dúu̱ gajmíi̱n xa̱bi̱i̱ nigún náa nirígá ndxa̱a̱ gatsigún dí nirígá náa Caná, mbá xuajen dí rígá náa tsu̱du̱u̱ xuajen Nazaret, náa ikhaa nigaja̱a̱. María nindxu̱u̱ bi̱ nimbájxu̱u̱ gajmíi̱n a̱ngui̱i̱n bi̱ nidamijná mbiʼi rúʼko̱, nakujmaa dí ikhaa niyambáá mu maxniʼtsun bi̱ niguwáʼ. Mú nirígá mbá dí migamíi maʼni dí muriyaʼ gamajkhún bi̱ ndiʼkhún nidamijná ga̱jma̱a̱ bi̱ kuñún, numuu rí na̱jkha̱ rámbá vino. b Mbáa nigún itháan xa̱bu̱ bi̱ na̱nguá niguaʼti̱i̱n. María na̱jkha̱ mbá nacha̱ gáʼyoo a̱ʼdióo ga̱jma̱a̱ naʼthúu̱n: “Nánguá guáʼdáá mbaji̱ʼ vino” (Juan 2:1-3). Ikhú Jesús niʼni mbá rí nimbáa tági̱ʼthu̱u̱n, numuu dí niʼni rí iyaʼ magutajxi̱i̱ “vino rí itháan májánʼ” (Juan 2:9, 10).

2, 3. a) Xú káʼnii nijmuu tsiakii ndrígóo Jesús rá. b) Ndíjkha rí májánʼ mbuʼyáá milagro dí niʼni Jesús rá.

² Jesús niʼni itháan milagro índo̱ niʼtáráʼa náa tsu̱du̱u̱ ku̱ba̱ʼ. c  Nijmuu tsiakii ndrígóo mu mambáñún mbaʼin wéñuʼ xa̱bu̱. Mbá xkri̱da, mbá miʼtsú nixniʼtsun mbá 5 mil xa̱bekha ga̱jma̱a̱ i̱mba̱ aʼphu̱ nixniʼtsun mbá 4 mil. Náa nájma̱ milagro rúʼko̱ mbáa nixniʼtsun itháan dí 27 mil xa̱bu̱ á mu nigixnii gu̱ʼu̱ ga̱jma̱a̱ e̱ji̱n ma̱ngaa (Mat. 14:15-21; 15:32-38). Náa a̱jma̱ nuthu rúʼko̱, Jesús ma̱ngaa niʼni thanún bi̱ nindoo kháñuun (Mat. 14:14; 15:30, 31). Mbáa xúgínʼ xa̱bu̱ buʼko̱ niguanún tsiánguá índo̱ ndiyáá dí Jesús nixnúún dí muphu ga̱jma̱a̱ niʼni thanún.

³ Mbaʼa rí ma̱ndoo majmañulúʼ náa milagro dí niʼni Jesús. Náa artículo rígi̱ muxkamaa mbaʼa ikha dí mambáyulúʼ maʼni gújkhúʼ fe ndrígúlú. Ma̱ngaa mbuʼyáá xú káʼnii gándoo mbuʼyaridáá rí xóo ninindxu̱u̱ xa̱bu̱ guabaaʼ ga̱jma̱a̱ dí nigáwi̱i̱nʼ a̱jkiu̱u̱n Jesús índo̱ niʼni milagro rígi̱.

4. Ga̱jma̱a̱ numún tsíin gajmañulú índo̱ gagutanga̱án mbuʼyáá milagro dí niʼni Jesús rá.

⁴ Milagro dí niʼni Jesús raʼkháa i̱ndó naʼsngúlúʼ wéñuʼ ga̱jma̱a̱ numuu ikhaa ma̱ngaa naʼsngúlúʼ ga̱jma̱a̱ numuu Anu̱u̱. Numuu rí mínaʼ má Jeobá nixnúu tsiakii maʼni milagro. Náa Hechos 10:38 naʼthí xígi̱ ga̱jma̱a̱ numuu Jesús: “Dios niraʼwíi ga̱jma̱a̱ espíritu santo ga̱jma̱a̱ nixnúu tsiakii, ikhaa nijngruigo̱o̱ raʼni dí májánʼ ga̱jma̱a̱ niʼni thanún bi̱ Gixa̱a̱ niʼni gíníi, numuu rí Dios nixtáa ga̱jma̱a̱ ikhaa”. Ma̱ngaa xó má eʼyáá, Jesús ndiʼyáridoo xóo ku̱mu̱u̱ ga̱jma̱a̱ xóo endxa̱ʼwáminaʼ Anu̱u̱, nikujmaa dí xúʼko̱ nindxu̱u̱ ga̱jma̱a̱ rí xóo niʼthí ma̱ngaa rí xóo niʼni, asndu milagro dí niʼni (Juan 14:9). Guʼyáá ajtsú ikha dí ma̱ndoo muríyaʼ náa milagro dí niʼni Jesús ga̱jma̱a̱ rí mambáyulúʼ maʼni itháan gújkhúʼ fe ndrígúlú.

5. Ndiéjunʼ nixkaxi̱i̱ Jesús maʼni milagro rá. (Mateo 20:30-34.)

⁵ Ginii, Jesús ga̱jma̱a̱ Anu̱u̱ nandún kuyulúʼ wéñuʼ. Índo̱ Jesús nixtáa náa tsu̱du̱u̱ Ku̱ba̱ʼ nisngájma nguáthá eyoo kaʼñúún xa̱bu̱ índo̱ nijmuu tsiakii ndrígóo mu mambáñún xa̱bu̱ ga̱jma̱a̱ milagro dí niʼni. Mbá miʼtsú a̱jmi̱i̱n xa̱bu̱ bi̱ tsékruigu̱u̱n nitháán ga̱jma̱a̱ aʼwá gakhi̱i̱ dí mambáñún (atraxnuu Mateo 20:30-34). Náa historia naʼthí dí Jesús “nigáwi̱i̱nʼ a̱jkiu̱u̱n kaʼñún” ga̱jma̱a̱ dí nda̱wa̱á niʼni dí mambaʼta̱a̱ idún. Náa ajngáa griego najuiʼtájuíi xóo “nigáwi̱i̱nʼ a̱jkiu̱u̱n kaʼñún” mu miʼtá mbá rí xóo nikumu̱u̱ asndu náa awúún a̱jkiu̱u̱n. Rí nigáwi̱i̱nʼ wéñuʼ a̱jkiu̱u̱n nisngájma dí ra̱ʼkhá tháán nindoo kaʼñúún xa̱bu̱ ga̱jma̱a̱ numuu rúʼko̱ nixkaxi̱i̱ maxnún dí muphu bi̱ nixkidxu̱u̱n ga̱jma̱a̱ maʼni thanún bi̱ niguaʼdáá nandii (Mat. 15:32; Mar. 1:41). Ikha jngóo nandoo nduʼyáá gajkhun dí Jeobá Dios bi̱ “nagáwiinʼ a̱jkiu̱u̱n kaʼyulú” ga̱jma̱a̱ A̱ʼdióo nandún kuyulúʼ wéñuʼ ga̱jma̱a̱ nagawúnʼ wéñuʼ índo̱ nduyáá dí numíniiʼlú (Luc. 1:78; 1 Ped. 5:7). Ikhiin nandún ga̱jma̱a̱ xúgíʼ a̱jkiu̱ún muni gámbáa xkujndu dí naʼni mumíniiʼ xa̱bu̱ numbaaʼ.

6. Ndiéjunʼ tsiakii nixnúu Dios Jesús rá.

⁶ Raga̱jma̱, Dios nixnúu tsiakii Jesús mu maʼnigámbáa xúgíʼ xkujndu dí guaʼdáá xa̱bu̱. Rígá xkujndu dí ikháanʼ nditháan xáʼngulú guʼnimbánii. Mú ga̱jma̱a̱ milagro dí niʼni Jesús nisngájma dí ikhaa majmaa. Mbá xkri̱da, gíʼdoo tsiakii maʼnigámbáa náa phú nikumu̱u̱ dí naʼni mumíniiʼ xa̱bu̱ numbaaʼ, xóo muʼthá, maʼngo̱o̱ maʼnigámbáa aʼkhá rí kuaʼdáá ga̱jma̱a̱ xúgíʼ rí naʼni mumíniiʼ, xóo nandii ga̱jma̱a̱ dí nakháñulú (Mat. 9:1-6; Rom. 5:12, 18, 19). Ga̱jma̱a̱ milagro dí niʼni nasngájma dí ikhaa ma̱ndoo maʼni thanún xa̱bu̱ náa “xúgíʼ enii nandii” dí kuaʼdáá ga̱jma̱a̱ rí asndu ma̱ndoo maʼni dí matuxi̱ín xa̱bu̱ (Mat. 4:23; Juan 11:43, 44). Ma̱ngaa gíʼdoo tsiakii matsijii giñán mbiʼ ga̱jma̱a̱ maʼni gajmíi̱n xa̱bu̱ wéñiʼ (Mar. 4:37-39; Luc. 8:2). Naʼni̱i̱ a̱jkiu̱lú índo̱ nduʼyáá dí Jeobá nixnúu wéñuʼ tsiakii A̱ʼdióo, lá ragájkhun ráʼ.

7, 8. a) Ndiéjunʼ e̱ʼni̱ mbuʼyáá gajkhun milagro dí niʼni Jesús rá. b) Xkáʼnii milagro nandaaʼ ma̱ta̱ya̱a̱ itháan ikháán rá.

 ⁷ Ragajtsú, ma̱ndoo mbuʼyáá dí gajkhun mambanúu xúgíʼ dí maʼni Reino ndrígóo Dios. Xúgíʼ milagro dí niʼni Jesús nákha nixtáa náa tsu̱du̱u̱ Ku̱ba̱ʼ nisngájma rí maʼngo̱o̱ maʼni itháan dí mambáñún xa̱bu̱ índo̱ ikhaa ganindxu̱u̱ rey náa Reino ndrígóo Dios. Atatsaʼwáminaʼ xú káʼni gakuwáánʼ índo̱ Jesús gáʼtañajunʼ náa tsu̱du̱u̱ Ku̱ba̱ʼ. Numuu rí ikhaa maʼnigámbáa xúgíʼ dí naʼni maguaʼdáá xkujndu ga̱jma̱a̱ xúgíʼ nandii dí naʼni mumíniiʼ xa̱bu̱, ikha jngóo nimbáa ní xáʼniuu nandii (Is. 33:24; 35:5, 6; Apoc. 21:3, 4). Nditháan xumíniiʼ ga̱jma̱a̱ numuu dí nda̱a̱ ganitsu ni má ga̱jma̱a̱ numuu i̱ʼwáʼ gamiéjunʼ dí narígá (Is. 25:6; Mar. 4:41). Ma̱ngaa maʼdxuu a̱jkiu̱lú mudriguíin bi̱ gátuxi̱ín (Juan 5:28, 29). Índo̱ nundxaʼwamíjná dí marigá náa numbaaʼ nuxi̱ʼ, ndiéjunʼ dí itháan xtaʼti̱i̱n ma̱ta̱ya̱a̱ ikháán rá.

⁸ Nákha Jesús niʼni milagro nisngájma a̱jma̱ rí xóo xa̱bu̱ nindxu̱u̱, rí xúgiáanʼ ndayóoʼ maguaʼdáá: Dí ninindxu̱u̱ xa̱bu̱ wabaaʼ ga̱jma̱a̱ dí nigáwi̱i̱nʼ a̱jkiu̱u̱n. Guʼyáá a̱jma̱ dí nirígá, muʼthá ginii dí niʼni náa boda dí nirígá náa Caná.

9. Ndiéjunʼ niʼni Jesús náa boda dí nirígá náa Caná rá. (Juan 2:6-10.)

⁹ (Atraxnuu Juan 2:6-10). Índo̱ niguámbá vino náa boda, lá ndiyóoʼ tsiakii dí Jesús mayambáá ráʼ. Na̱nguá. Nda̱a̱ nimbá náa kiʼtáriyaʼ dí Mesías maʼni milagro dí iyaʼ magutajxi̱i̱ vino.  Mú atatsaʼwáminaʼ ikháán, xú káʼnii gákuma̱a̱ʼ á mu xúʼko̱ gárígá náa boda ndrígáʼ rá. Mbáa Jesús nindxa̱ʼwáminaʼ dí muriyamajkhún familia ndrígóo novio, numuu rí nigáwi̱i̱nʼ a̱jkiu̱u̱n nindoo mambáñún. Ikha jngóo niʼni milagro dí niʼthá náa nagi̱ʼdu̱u̱ artículo rígi̱. Niʼni rí mbá 390 litro ndrígóo iyaʼ magutajxi̱i̱ vino dí itháan májánʼ. Ndíjkha rí niʼni mba̱ji̱nʼ wéñuʼ xá. Mbáa á mu napídunʼ ma̱ndoo majmúún i̱mba̱ aʼphu̱ o ma̱ndoo mugu̱jua̱ mu mumbayumíjná bi̱ ndiʼkhún nidamijná. ¡Ikhiin nidxún wéñuʼ!

10. Arathá tikhu dí nagájnuriyoʼ náa historia dí na̱ʼkha̱ náa capítulo 2 ndrígóo Juan (atayáá xtiʼkhuu).

¹⁰ Guʼyáá tikhu dí nigájnuriyoʼ náa artículo rígi̱ dí nigájnuu náa capítulo 2 ndrígóo Juan. Nitayáá tsáa niʼnimajnííʼ iyaʼ náa rayaʼ ráʼ. Raʼkháa Jesús. Numuu rí ikhaa tándoo mbuyáá xa̱bu̱, ikha jngó niʼthún xa̱bu̱ bi̱ nuyambáá muni (versículo 6 ga̱jma̱a̱ 7). Ga̱jma̱a̱ nda̱wa̱á dí niʼni milagro, tsáa ni̱jkha̱ kayóo vino maga̱a̱n bi̱ kayá edxu̱u̱ náa ndxa̱a̱ rá. Raʼkháa Jesús. Ikhaa niʼthún xa̱bu̱ bi̱ nuyambáá magún kuñu̱u̱n mbá chíʼgíiʼ (versículo 8). Ma̱ngaa, Jesús na̱nguá nikujxi̱ copa mu maʼthí náa inún xúgínʼ xa̱bu̱: “¡Guwanlá vino rígi̱ dí ra̱ʼkhá tháán miʼtsí dí nini nángii!”.

11. Ndiéjunʼ ejmañuluʼ náa milagro dí niʼni Jesús rá.

¹¹ Ndiéjunʼ ejmañuluʼ náa milagro rígi̱ dí niʼni Jesús rá. Mbá ikha dí naʼsngúlú nindxu̱u̱ dí gíʼmaa manindxu̱lú xa̱bu̱ guabaaʼ. Jesús táʼnimbamínáʼ índo̱ niʼni rí iyaʼ magutajxi̱i̱ vino. Ikhaa, nimbá miʼtsú táʼnimbamínáʼ ga̱jma̱a̱ xúgíʼ dí niʼngo̱o̱ niʼni. Ikhaa ninindxu̱u̱ má xúʼko̱ xa̱bu̱ guabaaʼ ga̱jma̱a̱ nixnúu má xúʼko̱ gamajkhu Anu̱u̱ (Juan 5:19, 30; 8:28). Á mu nduʼyaridáá Jesús, manindxu̱lú xa̱bu̱ guabaaʼ ga̱jma̱a̱ xúʼni mbaʼumíjna̱ dí naʼngo̱o̱ nuʼni. Tséʼniuu má ndiéjunʼ ñajunʼ kuaʼdáá náa xuajñuu Jeobá, xúʼni mbaʼumíjna̱, guxnáá má xúʼko̱ gamajkhu Dios ndrígúlú bi̱ nuʼni ñajuunʼ (Jer. 9:23, 24). Guxnáá xúgíʼ gamajkhu dí ikhaa kaʼyoo. Xó má eʼyáá, nimbá xáʼngo̱o̱ guʼni á mu raʼkháa Jeobá embáyuluʼ (1 Cor. 1:26-31).

12. Xú káʼnii i̱mba̱ náa ma̱ndoo mbuʼyaridáá Jesús rí ninindxu̱u̱ xa̱bu̱ guabaaʼ rá. Atagíʼ mbá xkri̱da.

¹² Gundxaʼwámíjná i̱mba̱ xóo ma̱ndoo mbuʼyaridáá dí Jesús ninindxu̱u̱ xa̱bu̱ wabaaʼ. Gundxaʼwámíjná ga̱jma̱a̱ numuu mbáa ndxájulú bi̱ kayá edxu̱u̱ bi̱ naríyaʼ mbayuʼ mbiʼi mambáyúu mbáa ndxájulú dxámá maʼniratoo mbá discurso público rí maxná. Ga̱jma̱a̱ numuu rúʼko̱, dxámá naxná mbá májánʼ discurso ga̱jma̱a̱ a̱ngiu̱lú ra̱ʼkhá tháán nanigu̱u̱nʼ. Mú, nda̱wa̱á dí niguámbá reunión mbáa ndxájulú naʼthúún ndxájulú bi̱ kayá edxu̱u̱: “Ra̱ʼkhá tháán májánʼ nixná discurso ndxájulú buʼko̱ tayáá aan”. Xú káʼnii májánʼ mariʼña̱a̱ ndxájulú, lá maʼthí “Aan májánʼ nixná numuu rí ikhúún nimbáyúu” o masngájma rí nindxu̱u̱ xa̱bu̱ guabaaʼ á mu naʼthí: “Aan, ra̱ʼkhá tháán májánʼ nixná”. Mbáa xa̱bu̱ guabaaʼ tséyóo maʼnimbamínáʼ ga̱jma̱a̱ numuu dí májánʼ dí naʼni ga̱jma̱a̱ numuu imba̱a̱. I̱ndó má ndaʼyoo dí gíʼdoo numuu rí Jeobá ndaʼyoo ga̱jma̱a̱ nangajo̱o̱ rí ikhaa naʼni (atayáá ma̱ngaa Mateo 6:2-4; Heb. 13:16). Jeobá nadxuu wéñuʼ a̱jkiu̱u̱n índo̱ ndaʼyoo dí nandulúʼ manindxu̱lú xa̱bu̱ guabaaʼ xóo Jesús (1 Ped. 5:6).

13. Ndiéjunʼ ndiʼyoo Jesús náa mijngii xuajen Naín ga̱jma̱a̱ ndiéjunʼ niʼni ikhaa xá. (Lucas 7:11-15.)

¹³ (Atraxnuu Lucas 7:11-15). Índo̱ naʼni tapha tsiguʼ dí Jesús nigíʼdu̱u̱ má niʼtáráʼa, na̱jkha̱ náa xuajen Naín. Xuajen rúʼko̱ dí rígá náa mbayuuʼ galilea gíʼ mijngii xuajen Sunem, náa mbá 900 tsiguʼ kidíiʼ Eliseo niʼni matuxi̱i̱ a̱ʼdióo mbáa a̱ʼgu̱ (2 Rey. 4:32-37). Índo̱ ni̱jkha̱ kanuu náa xkrugoo xuajen, Jesús ndaʼñún xa̱bu̱ bi̱ nagún kuya̱a̱ bi̱ nikháñuu. Ra̱ʼkhá tháán migíná numuu rí ndiʼkhún niʼnimbáti̱ga̱a̱ bi̱ nindxu̱u̱ mbáwíí a̱ʼdióo. Mú, a̱ʼgu̱ na̱nguá xtaa mbáwíi, mbaʼin xa̱bu̱ bi̱ kúwá náa xuajen  nagún gajmiún. Jesús natsijiin xa̱bu̱ bi̱ nagún kuya̱a̱ bi̱ nikháñuu ga̱jma̱a̱ rígá dí naʼni mu mambáyúu a̱ʼgu̱ bi̱ namínuuʼ wéñuʼ bugi̱: Naʼni rí matuxi̱i̱ a̱ʼdióo. Rígi̱ nindxu̱u̱ timbá rí ajtsú rí niʼni matuxi̱ín xa̱bu̱ Jesús dí na̱ʼkha̱ raʼthí náa a̱jkhu̱ libro rí kiʼnirámáʼ ga̱jma̱a̱ numuu ikhaa.

14. Arathá ga̱jma̱a̱ numuu tikhu dí naʼthí náa capítulo 7 ndrígóo Lucas (atayáá xtiʼkhuu).

¹⁴ Guʼyáá tikhu dí nagájnuriyoʼ náa relato dí na̱ʼkha̱ náa capítulo 7 ndrígóo Lucas. Nitayáá xú káʼnii kuduun ni̱ʼkha̱ rarígá ráʼ. Ginii Jesús “ndiʼyoo a̱ʼgu̱” ga̱jma̱a̱ nda̱wa̱á “nigáwiinʼ a̱jkiu̱u̱n kaʼyoo” (versículo 13). Mbáa ndiʼyoo a̱ʼgu̱ nambiyaʼ wéñuʼ índo̱ na̱jkha̱ inún xa̱bu̱ bi̱ nagún kuya̱a̱ a̱ʼdióo. Rí ndiʼyoo mbiʼi rúʼko̱ niʼni magawúúnʼ wéñuʼ. Jesús raʼkháa i̱ndó nikumu̱u̱ dí nigáwi̱i̱nʼ a̱jkiu̱u̱n, ikhaa nisngájma ga̱jma̱a̱ rí xóo niʼni. Mbáa ga̱jma̱a̱ aʼwá gua̱ba̱ʼ niʼthí: “Ní xátambiyaʼ rá.” Mú, raʼkháa i̱ndó niʼtámíjná ga̱jma̱a̱ ikhaa; niʼni rí a̱ʼdióo matuxi̱i̱ ga̱jma̱a̱ “nixniáa” ikhaa (versículo 14 ga̱jma̱a̱ 15).

15. Ndiéjunʼ ejmañuluʼ náa milagro dí niʼni Jesús rá.

¹⁵ Ndiéjunʼ ejmañuluʼ náa milagro dí niʼni Jesús rá. Mbá ikha rí xóo ma̱ndoo musngajmá índo̱ mbáa xtáa ngíná. Gajkhun má rí xándoo muʼni dí matuxi̱ín bi̱ nikháñúún xóo niʼni Jesús ga̱jma̱a̱ numuu a̱ʼgú xuáʼa̱. Mú ma̱ndoo majmañulúʼ magáwíinʼ a̱jkiu̱lú kuʼñúún bi̱ nikháñuu bi̱ kuyáá. Timbá, ndayóoʼ mbuʼyáá tsumáá, nda̱wa̱á ma̱ndoo muʼthá ga̱jma̱a̱ muʼni mbá rí mambáyúu ga̱jma̱a̱ maʼni̱i̱ a̱jkiu̱u̱n (Prov. 17:17; 2 Cor. 1:3, 4; 1 Ped. 3:8). d Dí maratha̱a̱n ajngáa dí májánʼ ga̱jma̱a̱ dí matambáyii bi̱ xtáa ngíná ma̱ndoo mambáyúu wéñuʼ.

16. Ndiéjunʼ ejmañuluʼ ga̱jma̱a̱ experiencia dí na̱ʼkha̱ raʼthí náa kutriga̱ rá. (Atayáá náa xtiʼkhuu náa nakujmaa xú káʼnii nirígá.)

¹⁶ Guʼyáá dí nirígá náa mbá reunión nguáthá tsiguʼ kidííʼ. Índo̱ xtáa raguma ajmúú náa naʼthí ga̱jma̱a̱ numún bi̱ matuxi̱ín, mbáa ndxájulú a̱ʼgu̱ ndiʼyoo imba̱a̱ ndxájulú dí nambiyaʼ náa i̱mba̱ níjniúu salón. Xtáa rambiyaʼ numuu dí xíkhoo nikháñuu a̱ʼdióo. Numuu rí ndxájulú ndiʼyoo ndiéjunʼ dí xtáa raraʼnuu ru̱dúu̱ ada̱ bugi̱, ikha jngóo mbá nacha̱ ni̱jkha̱ níjniúu ga̱jma̱a̱ niʼni xóó ajmúú asndu niguámbá ga̱jma̱a̱ ikhaa.  Ru̱dúu̱ ada̱ bi̱ nikháñuu niʼthí dí mbiʼi rúʼko̱ niʼni dí ra̱ʼkhá tháán nindoo kaʼñún a̱ngiu̱lú. Nidxuu wéñuʼ dí ni̱jkha̱ reunión. Ikhaa niʼthí: “Ndi̱yo̱o̱ má dí náa guʼwá nagimbáanʼ mixtambáyuʼ”. Ma̱ndoo mbuʼyáá gajkhun dí Jeobá ndaʼyoo ga̱jma̱a̱ nanga̱jo̱o̱ asndu nguáthá má eʼngo̱o̱ nusngajmá ikháanʼ dí nagáwi̱i̱nʼ a̱jkiu̱lú kuʼñúún bi̱ kúwá rumíniiʼ ga̱jma̱a̱ “bi̱ kúwá ngíná wéñuʼ” (Sal. 34:18).

17. Ndiéjunʼ nijmañulúʼ náa artículo rígi̱ rá.

¹⁷ Rí muʼnigajmaa milagro dí niʼni Jesús naʼni gujkhuʼ fe ndrígúlú. Historia dí na̱ʼkha̱ náa a̱jkhu̱ libro náa naʼthí ga̱jma̱a̱ numuu Jesús nasngájma dí Jeobá ga̱jma̱a̱ Jesús nandún kuyulúʼ wéñuʼ, Jesús gíʼdoo tsiakii maʼnigámbáa xúgíʼ xkujndu dí guaʼdáá xa̱bu̱ numbaaʼ ma̱ngaa nandoo nduʼyáá gajkhun dí xájyúuʼ má dí Reino maʼni marigá xúgíʼ dí májánʼ. Ma̱ngaa, nambáyulúʼ mundxaʼwamíjná xú káʼnii gándoo mbuʼyaridáá xóo xa̱bu̱ nindxu̱u̱ Jesús. Náá numuu rí tsetagíminaʼ matanigajmaa̱ i̱ʼwáʼ milagro dí niʼni Jesús índo̱ gunigajmaa̱ mbá guʼwáanʼ o índo̱ natanigajmaa mbáwiin rá. Atagíminaʼ ma̱ta̱ya̱a̱ ndiéjunʼ ikhaa ma̱ndoo majmañaaʼ ga̱jma̱a̱ arathún eʼwíinʼ. Rúʼko̱ gáyambáá dí mutamijná májánʼ gajmiála eʼwíinʼ (Rom. 1:11, 12).

18. Ndiéjunʼ guʼyáá náa i̱mba̱ artículo rá.

¹⁸ Índo̱ na̱jkha̱ rámbá ñajunʼ dí niʼni Jesús náa tsu̱du̱u̱ ku̱ba̱ʼ, ikhaa nikuxi̱i̱ imba̱a̱ bi̱ nikháñuu, bi̱ maʼni ajtsíin bi̱ nikuxi̱i̱n ga̱jma̱a̱ ninindxu̱u̱ iwáá kayuʼ bi̱ nduʼyáá ga̱jma̱a̱ numuu dí nikujxi̱i̱. Mú ninindxu̱u̱ mixtiʼkhu ki xóo i̱ʼwáʼ: Numuu rí nikuxi̱i̱ mbáa bi̱ nimbájxu̱u̱ májánʼ ga̱jma̱a̱ ma̱ngaa mixtiʼkhu xóo nirígá. Ndiéjunʼ ikha ejmañuluʼ náa milagro rígi̱ rá. Ga̱jma̱a̱ ndiéjunʼ gándoo muʼni mu mbuʼyáá dí gajkhun matuxi̱ín bi̱ nikháñúún rá. Mbuʼyáá náa i̱mba̱ artículo.