ARTÍCULO RÍ MUʼNIGAJMAA 19
Xú káʼnii guʼni gújkhúʼ fe ndrígúlú dí marigá mbá numbaaʼ nuxi̱ʼ rá.
“Índo̱ ikhaa [Jeobá] naʼthí mbá rí maʼni, lá tseʼnimbánuu xá’.” (NÚM. 23:19.)
AJMÚÚ 142 Guguaʼthi̱i̱n rí wíji̱ makánulu
RÍ MUʼNIGAJMAA a
1, 2. Nákha xóó tséʼkha̱ numbaaʼ nuxi̱ʼ, ndiéjunʼ gándoo muʼni rá.
RA̱ʼKHÁ tháán exnáalu núma̱aʼ Jeobá numuu rí nikudaminaʼ maʼni gámbáa xúgíʼ dí tséjmaa ga̱jma̱a̱ rí maʼni mbóʼ nuxi̱ʼ numbaaʼ (2 Ped. 3:13). Maski má na̱nguá eʼyáá nguáná gaʼni, mú xúgíʼ rí eʼyáá nasngájmaa rí itháán má mambanúu (Mat. 24:32-34, 36; Hech. 1:7).
2 Xúgiáánʼ gíʼmaa muʼni rí maʼni gújkhúʼ fe ndrígúlú tséʼniuu má nguáthá mbayuuʼ nindxu̱lú Testigos. Náa numuu rá. Numuu rí maski má kuaʼdáá mbá fe gujkhuʼ ma̱ndoo makaguambán. Apóstol Pablo niʼthí rí á mu nandáti̱gu̱lúʼ fe nindxu̱u̱ mbóo “aʼkhá rí tséjyúu eʼni majngrádáánʼ” (Heb. 12:1). Dí ma̱ndoo muʼni, mu fe ndrígúlú xákaguabaaʼ ndayóoʼ rí mbiʼi xúgi̱ maguaʼdáá mbá fe gujkhuʼ rí nikudaminaʼ maʼni Dios numbaaʼ nuxi̱ʼ (Heb. 11:1).
3. Ndiéjunʼ guʼyáá náa artículo rá.
3 Náa artículo rígi̱ mbuʼyáá mbá ajtsú numuu dí maʼni itháán gújkhúʼ fe ndrígúlú rí marígá mbá numbaaʼ nuxi̱ʼ nda̱wa̱á: 1) Rí mundxaʼwamíjna̱ ga̱jma̱a̱ numuu rí nijuiʼtsiwáanʼ, 2) rí mundxaʼwamíjna̱ ga̱jma̱a̱ numuu tsiakii rí gíʼdoo Jeobá ga̱jma̱a̱ 3) rí muʼgíʼ muʼni má xúʼkhíin ñajuunʼ Jeobá. Nda̱wa̱á mbuʼyáá ajngáa rí niʼthúu̱n Jeobá Habacuc rí ma̱ngaa naʼni itháán gújkhúʼ fe ndrígúlú. Mú ginii guʼthá ga̱jma̱a̱ numuu rí ndayúlú rí maguaʼdáálu mbá fe gújkhúʼ náa rí Jeobá nakudaminaʼ maʼni nda̱wa̱á.
NÁA NUMUU RÍ NDAYÚLÚ MUGUAʼDÁÁ MBÁ FE GÚJKHÚʼ RÁ.
4. Nguáná eyóoʼ maguaʼdáá mbá fe gújkhúʼ ga̱jma̱a̱ numuu rí nuraʼwíí dí muʼni rá.
4 Xúgíʼ mbiʼi ndayúlú mbá fe gújkhúʼ mu ma̱ndoo muraʼwíí muʼni. Mbá xkri̱da, rígá mbaʼa dí nuraʼwíí ga̱jma̱a̱ numuu bi̱ nambáxuluʼ gajmiulúʼ, dí nuʼni gagimijná, rí nuʼnigajmaa, dí nuʼdamijná, ga̱jma̱a̱ numún e̱ji̱n ma̱ngaa numuu ñajunʼ. Ma̱ndoo murajximíjna̱: “Ndiéjunʼ esngájma dí naraʼwíí rí nani rá. Lá nasngajmá rí naku̱mu̱ʼ dí rígá náa tsu̱du̱u̱ ku̱ba̱ʼ nindxu̱u̱ mbá xngaa ga̱jma̱a̱ dí nacha̱ má gágumaa gámbáa mu maʼni mbá numbaaʼ nuxi̱ʼ rí nakudaminaʼ maʼni Dios ráʼ. O nindxa̱a̱ʼ xóo xa̱bu̱ bi̱ nuthi dí káaʼ i̱ndó vida rígi̱ kuaʼdáá dxe̱ʼ” (Mat. 6:19, 20; Luc. 12:16-21). Á mu nuʼni gújkhúʼ fe ndrígúlú rí ku̱ba̱ʼ nuxi̱ʼ gíʼ mijngii, maʼni rí muraʼwíi májánʼ dí muʼni.
5, 6. Náa numuu rí ndayóʼ muguaʼdáá mbá fe gújkhúʼ índo̱ nuraʼníí mbá tsáʼkhá rá. Atagíʼ mbá xkri̱da.
5 Ma̱ngaa nuraʼníí tsáʼkhá náa dí ndayóʼ muguaʼdáá mbá fe gújkhúʼ, xóo índo̱ nunigínáanʼlu, nandii rí ndaa thanuu, o i̱ʼwáʼ rí naʼni makáguabáanʼlú. Mbáa nákha ginii nuraʼníí májánʼ asndu xkáʼnii má xkujndu. Mú índo̱ nagajyúuʼ mbayuuʼ, ndayóoʼ maguaʼdáá mbá fe gújkhúʼ mu maʼngulú muraʼníí ga̱jma̱a̱ muʼni má xúʼkhíin ñajuunʼ Jeobá ga̱jma̱a̱ gagi (Rom. 12:12; 1 Ped. 1:6, 7).
6 Índo̱ kuwáanʼ ruraʼníí mbaʼa gamiéjunʼ mbáa asndu makumulú rí Jeobá xáʼni mbá numbaaʼ nuxi̱ʼ. Lá rígi̱ eyoo gáʼthúu̱n rí fe ndrígúlú nánguá eʼni gujkhuʼ rá. Nánguá má eyoʼ mundxa̱ʼwa̱míjna̱ xúʼkhíin káʼnii. Guʼgíʼ mbá xkri̱da. Índo̱ naxnáa ruʼwa ra̱ʼkhá tháán migúwán ga̱jma̱a̱ mbáa nguáná nakumulú dí nditháan xáʼga̱nú maʼni ruʼphu. Mú na̱ʼkha̱nú ruʼphu nda̱wa̱á. Ikha má kayuuʼ índo̱ nakáguabáanʼ nakumulú rí ku̱ba̱ʼ nuxi̱ʼ xáʼga̱nú marígá. Mú, á mu fe ndrígúlú nindxu̱u̱ gújkhúʼ, mbuʼyáá gajkhun rí nikudaminaʼ maʼni Jeobá mambanúu (Sal. 94:3, 14, 15; Heb. 6:17-19). Rí makumulú xúʼko̱ mambáyulú muʼgíʼ muʼni má xúʼko̱ ginii ñajuunʼ Jeobá.
7. Ndiéjunʼ dí xáʼyóoʼ mundxaʼwamíjná rá.
7 Ma̱ngaa ndayóoʼ muguaʼdáá mbá fe gújkhúʼ mu muʼtáraʼa. Índo̱ nuʼthá ga̱jma̱a̱ numuu numbaaʼ nuxi̱ʼ rí Dios nacha̱ má gaʼni, mbaʼin xa̱bu̱ naku̱mu̱ún rí nditháan xambánuu (Mat. 24:14; Ezeq. 33:32). Mú nditháan xáʼyóoʼ mundxaʼwamíjná rí xáʼga̱nú marigá. Mu xágiʼnulú xúʼkhíin, ndayóoʼ rí maʼni gújkhúʼ má xúʼko̱ fe ndrígúlú. Guʼyáá mbá ajtsú enii rí ma̱ndoo muʼni.
GUNDXAʼWAMÍJNÁ GA̱JMA̱A̱ NUMUU RÍ NIJUIʼTSIWÁANʼ
8, 9. Xú káʼnii eʼni maʼni gújkhúʼ fe ndrígúlú índo̱ nundxa̱ʼwa̱míjna̱ ga̱jma̱a̱ numuu rí nijuiʼtsiwáánʼlú rá.
8 Mbá rí ma’ni gújkhúʼ fe ndrígúlú nindxu̱u̱ rí mundxa̱ʼwa̱míjna̱ ga̱jma̱a̱ numuu rí nijuiʼtsiwáánʼ. Rí nijuiʼtsiwáánʼ naʼni mbuʼyáá gajkhun dí xúgíʼ rí nikudaminaʼ maʼni Jeobá mambanúu. Gíʼdoo wéñuʼ numuu muriʼyáʼ mbiʼi mundxaʼwámijná xúgíʼ rí ndiyóoʼ maguma mu majuiʼtsiwáánʼ ma̱ngaa ndíjkha rí Jeobá niʼni xúʼko̱. Rúʼko̱ gambáyulúʼ mbuʼyáá gajkhun, dí Jeobá gajkhun maʼni marigá mbá numbaaʼ itháan májánʼ ga̱jma̱a̱ rí makuwáanʼ kámuu mbiʼi. Náa numuu rí nuʼthá xúʼkhíin rá.
9 Gundxaʼwámíjná ga̱jma̱a̱ numuu rí nijuiʼtsiwáánʼlú Jeobá, niniñuuʼ rí A̱ʼdióo bi̱ mbáwíi nikungua̱a̱nʼ náa ku̱ba̱ʼ bi̱ nambáxu̱u̱ itháán májánʼ ga̱jma̱a̱, mu maxtáa náa tsu̱du̱u̱ ku̱ba̱ʼ gi̱i̱ xóo mbáa xa̱bu̱ jmbii. Índo̱ Jesús nixtáa gi̱i̱, nimínuuʼ wéñuuʼ niraʼnuu mbaʼa tsáʼkhá gakhi̱i̱ rí asndu nikháñuu. Rígi̱ naʼni mbuʼyáá dí Jeobá ra̱ʼkhá tháán mba̱a̱ rí niʼni numuu. Xóo niʼtsiwáánʼlú ga̱jma̱a̱ rí ikhaa raʼkháa tháán májánʼ a̱jkiu̱u̱n, nditháan xániñuuʼ rí A̱ʼdióo magíʼnuu xúgi̱ kaʼnii mu makuwáánʼ májánʼ káaʼ mbá xngaa (Juan 3:16; 1 Ped. 1:18, 19). Numuu rí Jeobá ra̱ʼkhá tháán mba̱a̱ dí niʼni numuu, ikha jngóo ikhaa gáʼni rí ma̱ndoo makuwáánʼ kámuu mbiʼi náa numbaaʼ nuxi̱ʼ.
GUNDXA̱ʼWA̱MÍJNA̱ GAJMAA NUMUU TSIAKI RÍ GÍʼDOO JEOBÁ
10. Xó ma eʼthí náa Efesios 3:20, ndiéjunʼ gáʼngo̱o̱ maʼni Jeobá rá.
10 I̱mba̱ xóo ma̱ndoo muʼni mu maʼni gújkhúʼ fe ndrígúlú nindxu̱u̱ rí mundxa̱ʼwa̱míjna̱ ga̱jma̱a̱ numuu tsiakii ndrígóo Jeobá. Ikhaa gíʼdoo tsiakii maʼnimbánuu xúgíʼ rí nikudaminaʼ maʼni. Gajkhun má, mbáa xa̱bu̱ numbaaʼ maʼniuu miʼskhaa maku̱mu̱u̱ rí maxtáa kámuu mbiʼi náa ku̱ba̱ʼ nuxi̱ʼ rí maʼnii Jeobá. Mú Jeobá nakudaminaʼ maʼnimbánuu mbá dí rakáʼnii mambanúu eʼyáá ikháanʼ. Ga̱jma̱a̱ ikhaa gíʼdoo xúgíʼ tsiakii (Job 42:2; Mar. 10:27). Lá naku̱ma̱a̱ʼ ikháán dí mingíjyúuʼ maʼnimbánuu dí nikudaminaʼ maʼni xáʼ. (Atraxnuu Efesios 3:20.)
11. Arathá mbá dí nikudaminaʼ maʼni Jeobá (Atayáá kúgumaʼá náa naʼthí: “ Tikhu rí mitsaanʼ dí Jeobá niʼnimbánúu”).
11 Gundxa̱ʼwa̱míjna̱ ga̱jma̱a̱ numuu tikhu rí nikudaminaʼ maʼni Jeobá gajmíi̱n xa̱bi̱i̱ nákha wajyúuʼ asndu xóo rakáʼnii mambanúu káʼnii. Jeobá niʼthúu̱n Abrahán ga̱jma̱a̱ Sara rí muguaʼdaa mbáa ada̱ maski má guanii (Gén. 17:15-17). Ma̱ngaa niʼthúu̱n Abrahán dí bi̱ gaguwaʼ náa ikhaa maxnún ku̱ba̱ʼ ndrígóo Canaán. Mba̱yu̱u̱ʼ ma tsiguʼ bi̱ niguwááʼ náa Abrahán, xó muʼthá bi̱ israelitas, ninindxu̱ún ñumbáá náa Egipto, mbáa ikhiin nikumu̱ún rí xáʼga̱nú mambanúu xúgíʼ rígi̱. Mú nimbánuu mbayuuʼ tsiguʼ nda̱wa̱á, Jeobá niʼthúu̱n Elisabet, bi̱ nikhi̱i̱ má rí magiʼdaa mbáa ada̱. Ikhaa ma̱ngaa niʼthúu̱n María, bi̱ xóó tséboʼ ga̱jma̱a̱ xa̱bu̱ rí magiʼdaa A̱ʼdióo. Xúʼko̱ gambánuu rí nikudaminaʼ Jeobá mbayuuʼ tsiguuʼ ginii náa ixi̱ ri̱ʼi̱ Edén (Gén. 3:15).
12. Ndiéjunʼ eʼni mbuʼyáá tsiakii dí gíʼdoo Jeobá eʼthí náa Josué 23:14 ga̱jma̱a̱ Isaías 55:10, 11 rá.
12 Índo̱ nundxa̱ʼwa̱míjna̱ náa xúgíʼ rí nakudaminaʼ maʼni ga̱jma̱a̱ rí xú káʼnii niʼnimbánuu, na̱jkua̱nú nduʼyáá tsiakii ndrígóo. Rígi̱ naʼni gújkhúʼ fe ndrígúlú dí ikhaa gajkhun maʼni mbá numbaaʼ nuxi̱ʼ (atraxnuu Josué 23:14; b Isaías 55:10, 11). c Ga̱jma̱a̱ numuu rígi̱ makuwáánʼlú xawii mumbáñuun eʼwíinʼ makru̱ʼu̱u̱n rí numbaaʼ nuxi̱ʼ na̱nguá nindxu̱u̱ mbóo xnuʼndaa o mbá dí ragájkhun. Jeobá niʼthí rígi̱ ga̱jma̱a̱ numuu mbá nuxi̱ʼ mekhu ga̱jma̱a̱ mbá nuxi̱ʼ ku̱ba̱ʼ: “Ajngáa rígi̱ [...] nindxu̱u̱ gajkhun ga̱jma̱a̱ jmbu” (Apoc. 21:1, 5).
GUʼNI MÁ XÚʼKO̱ ÑAJUUNʼ DIOS
REUNIÓN
Xú káʼnii embáyulú dí muʼni rígi̱ mu maʼni itháan gújkhúʼ fe ndrígúlú rá. (Atayáá kutriga̱ 13).
13. Xú káʼnii embayulúʼ reunión mu maʼni gújkhúʼ fe ndrígúlú rá.
13 Ragajtsú enii rí maʼni gújkhúʼ fe ndrígúlú nindxu̱u̱ rí muʼni má xúʼkhíin ñajuunʼ Dios. Mbá xkri̱da, gundxa̱ʼwa̱míjna̱ xú káʼnii embáyulú wéñuʼ dí mu̱ʼgua̱ reunión. Anna, d bi̱ mbayuuʼ má tsiguʼ mixtiʼkhu enii xóo niʼni káxi̱ ñajuunʼ Dios, naʼthí: “Reunión nindxu̱u̱ xóo mbá ancla rí nambáyuʼ maʼni gújkhúʼ fe ndrígóʼ. Tséʼniuu á mu mbáa bi̱ naxná discurso tséʼthí májánʼ wéñuʼ o tséʼthi mbá rí nuxi̱ʼ, mú ikhúún nadxawuun má xúʼko̱ mbá dí nambáyuʼ makro̱ʼo̱ʼ itháan májánʼ mbá dí naʼthí náa Biblia ga̱jma̱a̱ xúʼko̱ fe ndrígóʼ naʼni itháán mba̱a̱”. Náa reunión nadxawuun tikhu comentario rí naʼni maʼni gújkhúʼ fe ndrígóʼ (Rom. 1:11, 12; 10:17).
DÍ MUʼTÁRAʼA
Xú káʼnii embáyulú dí muʼni rígi̱ mu maʼni itháan gújkhúʼ fe ndrígúlú rá. (Atayáá kutriga̱ 14).
14. Xú káʼnii embayulúʼ maʼni gújkhúʼ fe ndrígúlú dí muʼtáraʼa rá.
14 Ma̱ngaa nambáyulúʼ maʼni gujkhuʼ fe ndrígúlú rí muʼtáraʼa (Heb. 10:23). Barbara, bi̱ nindxu̱u̱ Testigo itháán rí 70 tsiguʼ, naʼthí: “Rí nataráʼa nambáyuʼ maʼni má xúʼko̱ gújkhúʼ fe ndrígóʼ. Na̱jkhánú nda̱yo̱o̱ dí índo̱ natha itháán ga̱jma̱a̱ numuu Jeobá ga̱jma̱a̱ rí ikhaa naʼthí maʼni, ikhú naʼni itháán mba̱a̱ fe ndrígóʼ”.
Xú káʼnii embáyulú dí muʼni rígi̱ mu maʼni itháan gújkhúʼ fe ndrígúlú rá. (Atayáá kutriga̱ 15).
15. Xú káʼnii embayulúʼ rí muʼnigajmaa ndajkuánʼ mu maʼni gújkhúʼ fe ndrígúlú rá. (Atayáá xtiʼkhuu.)
15 Guʼyáá i̱mba̱ rí nambáyulú maʼni itháan gújkhúʼ fe ndrígúlú: Rí muʼnigajmaa ndajkuáanʼ. Susan naʼthí rí índo̱ gíʼdoo mbá hora kiejunʼ rí maʼnigajmaa nambáyuu wéñuuʼ. Ikhaa naʼthí: “Mbiʼi domingo nanigajmaa̱ i̱yi̱i̱ʼ Bi̱ nayejngoo rí muʼnigajmaa i̱mba̱ xmáná. Lunes ga̱jma̱a̱ martes nanigájma̱a̱ dí mbuʼyáá náa reunión dí narígá ta̱pha̱ xmáná. I̱ʼwáʼ mbiʼi najmuu mu manigajmaa mbáwun”. Numuu rí naʼni má xúʼko̱ awan rí gíʼdoo, fe ndrígóo Susan naʼni itháán mba̱a̱. Irene, ma̱ngaa bi̱ mbayuuʼ má tsiguʼ xtáa rañajunʼ náa Betel, naʼthí dí naʼni itháán gújkhúʼ fe ndrígóo índo̱ naʼnigajmaa kiʼtáriyaʼ rí na̱ʼkha̱ náa Biblia, ikhaa naʼthí: “Naniguʼ wéñuʼ índo̱ nda̱yo̱o̱ xóo embánuu kuduun rí Jeobá niʼtáriyaʼ”. e
“GAJKHUN MAMBANÚU”
16. Xóo eʼyáá dí ajngáa rí Jeobá niʼthúu̱n Habacuc nambáyulú mangáanʼ rá. (Hebreos 10:36, 37.)
16 Tikhun xa̱bi̱i̱ Jeobá guaʼti̱i̱n mbayuuʼ tsiguʼ dí mambáa dí raʼkhí. Xóo xa̱bu̱ numbaaʼ nindxu̱lú naku̱mu̱lú dí ndajyúuʼ wéñuuʼ dí ma̱ʼkha̱ fin. Jeobá nakro̱ʼo̱o̱ xóo ku̱mu̱ún xa̱bi̱i̱. Ikhaa niʼthúu̱n gaʼyee Habacuc: “Numuu rí xóó ndayóoʼ mambanúu visión, na̱jkha̱ ragi̱ʼi̱ nacha̱ rí mambanúu, gajkhun rí mambanúu. Maski ajndu mbajyúuʼ, ¡araʼthi̱i̱n má xúʼko̱! Numuu rí gajkhun mambanúu. ¡Xájyúuʼ má gáʼkha̱!” (Hab. 2:3). Lá ajngáa rúʼko̱ i̱ndó ni̱jkha̱ náa inuu Habacuc o nambáyulúʼ asndu mangáánʼ rí mbiʼi xúgi̱ dxe̱ʼ. Jeobá niʼni rí apóstol Pablo maʼthúún ajngáa rúʼko̱ cristianos bi̱ guáʼthi̱i̱n numbaaʼ nuxi̱ʼ (atraxnuu Hebreos 10:36, 37). Á mu nakumulú rí Jeobá ndajyúuʼ maʼnimbánuu rí nakudaminaʼ maʼni, garmáʼáan a̱jkiu̱lú dí xúgíʼ dí nikudaminaʼ maʼni “gajkhun mambanúu. ¡Xájyúuʼ má gáʼkha̱!”.
17. Xú káʼnii niʼnimbánuu mbá ndxájulú consejo ndrígóo Jeobá rí nixnúu Habacuc rá.
17 Mbaʼin cristianos nusngajma dí nunimbánii consejo ndrígóo Jeobá dí muguaʼthi̱i̱n má xúʼko̱ maski ajndu kúwá mba̱yu̱u̱ʼ tsiguʼ. Mbuʼyáá xkri̱doo mbá ndxájulú bi̱ mbiʼyuu Louise, bi̱ nigíʼdu̱u̱ niʼni ñajuunʼ Jeobá nákhá tsiguʼ 1939. Ikhaa naʼthí: “Nditháan táku̱mu̱ʼ rí maʼgánú magúʼdoo 18 tsiguʼ numuu rí niku̱mu̱ʼ dí Armagedón ma̱ʼkha̱nú wapháá. Mú tárígá xúʼko̱, rí nimbáyúʼ náa xúgíʼ tsiguʼ rígi̱ nindxu̱u̱ dí niguxnuu ga̱jma̱a̱ numún bi̱ ikhúún nixna mbiʼñún xóo bi̱ niʼngo̱o̱ wéñuʼ a̱jkiu̱ún xóo muʼthá, Noé, Abrahán, José ga̱jma̱a̱ eʼwíinʼ bi̱ ndiyóoʼ muguaʼthi̱i̱n mundrígú dí nikudaminaʼ maxnúún Jeobá. Rí maxtáá xawii má xúʼko̱ nimbáyuʼ ikhúún ga̱jma̱a̱ eʼwíinʼ dí xámbumuʼ rí numbaaʼ nuxi̱ʼ gíʼ mijngii”. Mbáa xúʼko̱ má ku̱mu̱ún mbaʼin a̱ngiu̱lú bi̱ mbayuʼ tsiguʼ má kúwá runi ñajuunʼ Jeobá.
18. Xú káʼni embáyulú rí niʼniwíi Jeobá mu mbuʼyáá dí gajkhun ma̱ʼkha̱ kayóo mbá numbaaʼ nuxi̱ʼ rá.
18 Gajkhun má numbaaʼ nuxi̱ʼ xóó nda̱a̱ gi̱i̱ xúgi̱, mú guʼyáá tikhu dí rígá gi̱i̱: Xóo a̱ʼgua̱a̱n, ixi̱, xujkhú ga̱jma̱a̱ xa̱bu̱. Maski ajndu xúgíʼ rígi̱ tárígá nákha ginii, mú rí xúgi̱ nimbáa xándoo maʼthí dí nda̱a̱ rúʼko̱. Numuu dí Jeobá niʼniwíi ikha jngóo rí xúgi̱ gajkhun rígá (Gén. 1:1, 26, 27). Rí xúgi̱, Dios nakudaminaʼ maʼni̱i̱ mbóó numbaaʼ nuxi̱ʼ ga̱jma̱a̱ ikhaa maʼnimbánuu dí naʼthí. Ikhí ma̱ndoo makuwáanʼ kámuu mbiʼi ga̱jma̱a̱ ní xáʼniulu nandii. Índo̱ gáʼga̱nú mbiʼi dí Jeobá manimbánuu, ikhú muʼgua̱nú mbuʼyáá dí gajkhun nindxu̱u̱ dí kuwáánʼ náa numbaaʼ nuxi̱ʼ xó má xúgíʼ rí nduʼyáá mbiʼi xúgi̱ (Is. 65:17; Apoc. 21:3, 4).
19. Xóo guʼni rí maʼni gújkhúʼ fe ndrígúlú rá.
19 Nakha xóo tséʼkha̱nú numbaaʼ nuxi̱ʼ, guʼni mbá tsiakii asndu xó má eʼngo̱o̱ mu maguaʼdaa mbá fe gújkhúʼ. Gundxaʼwámíjná ga̱jma̱a̱ numuu rí nijuiʼtsiwáánʼ, ma̱ngaa gundxa̱ʼwa̱míjná náa tsiakii ndrígóo Jeobá ga̱jma̱a̱ guʼgíʼ muʼni má xúʼko̱ ñajuunʼ Dios. Á mú nuʼni xúgíʼ rígi̱, makuwáanʼ náa “bi̱ naʼngo̱o̱ a̱jkiu̱ún mu makhánun rí Dios nikudaminaʼ maxnún” (Heb. 6:11, 12; Rom. 5:5).
AJMÚÚ 139 Natayaminaʼ náa numbaaʼ nuxi̱ʼ ráʼ.
a Rí mbiʼi xúgi̱ mbaʼin xa̱bu̱ tsénimbu̱ún rí naʼthí Jeobá ga̱jma̱a̱ numuu ku̱ba̱ʼ nuxi̱ʼ. Nakumu̱ún rí nindxu̱u̱ mbá rí ra̱ʼkhá tháán nagui̱i̱ rí asndu rakáʼnii matanimbaaʼ rí asndu nindxu̱u̱ xóo mbóo cuentu. Mú ikháanʼlu gajkhun nduʼyáá dí xúgíʼ rí Jeobá naʼthí maʼni mambanúu. Ikha jngóo guʼnigajmaa má xúʼkhíin mu fe rí kuáʼdáá maʼni itháán gújkhúʼ. Náa artículo rígi̱ mbuʼyáá káʼnii gándoo muʼni.
b Josué 23:14: “Dí xúgi̱ gítháán má tígo̱o̱ makhañúʼ, ikháanʼla má ndu̱ya̱a̱ májánʼ ga̱jma̱a̱ xúgíʼ a̱jkia̱la, ma̱ngaa xúgíʼ xóo nindxa̱la, dí xúgíʼ ajngáa dí májánʼ dí Jeobá Dios ndrígála nikudaminaʼ maʼni nimbánuu. Xúgíʼ nimbánuu náa ikháanʼla. Nimbá ajngáa rígi̱ tákiéʼkhá”.
c Isaías 55:10, 11: “Numuu dí, xóo ma ruʼwa ga̱jma̱a̱ idiʼ dí nagajta̱a̱ mekhuíí tsétanga̱a̱ ikhí asndu índo̱ naguámbóo ermajan ku̱ba̱ʼ, naʼni dí marígá ga̱jma̱a̱ makráʼáan tsígáʼ dí najuiʼdu ma̱ngaa dí mikhu xa̱bu̱, xúʼko̱ ganindxu̱u̱ ajngóoʼ rí nagájnuu náa rawunʼ. Xátanga̱a̱ xúʼkhiín, gajkhun mani rí phú nandoʼ, ga̱jma̱a̱ mambanúu gajkhun rí nitañájunʼ maguma”.
d Nixtiʼkhuu mbiʼñún tikhun.
e Rí mataʼyáaʼ ajngáa “Profecía” náa Índice de las publicaciones Watch Tower, ikhí ma̱ndoo maxkamaa mbaʼa artículo náa naʼthí ga̱jma̱a̱ numuu rí kiʼtáriyaʼ náa Biblia. Mbá xkri̱da, atayáá artículo náa naʼthí. “Lo que Jehová predice se cumple sin falta”, náa Bi̱ nayejngoo 1 ñajunʼ gu̱nʼ enero 2008.
