1. Xú káʼnii nikúwíin mbo̱o̱ jnduʼ xa̱bi̱i̱ Jeobá nakha siglo timbá rá.

 MAMBÁA índo̱ Jeobá naxnún mbá ñajunʼ muni̱ xa̱bi̱i̱, ikhaa nagi̱ʼthu̱u̱n rí munimbáníí ga̱jma̱a̱ mbá awan (1 Cor. 14:33). Mbá xkri̱da, ikhaa nandoo rí majuiʼtáraʼa ajngáa rí májánʼ náa xúgi̱ tsu̱du̱u̱ numbaaʼ (Mat. 24:14). Ga̱jma̱a̱ nigíiʼ Jesús mu mayéʼga edxu̱u̱ náa ñajunʼ rígi̱, ma̱ngaa Jesús nagrui̱ga̱ awan. Nákha siglo timbá, náa Jerusalén nirígá mbá grupo náa nikuwa apóstoles ga̱jma̱a̱ bi̱ kuya̱ edxu̱u̱ bi̱ kúwíin náa xuajin rúʼko̱, bi̱ kaʼñún muraʼwíi rí muni̱ ga̱jma̱a̱ mu muxnún ikha bi̱ kúwá náa congregación mu munimbánii (Hech. 15:2; 16:4). Náa mambáa congregación nindrigi̱i̱n bi̱ muyégun edxu̱u̱, mu ikhiin muxnún ikha a̱ngiu̱lú (Hech. 14:23). Numuu dí a̱ngiu̱lú nunimbánii ikha rí nikhánún, “bi̱ nagimbíi̱n niʼni itháán gújkhúʼ fe ndrígu̱ún” (Hech. 16:5).

2. Xú káʼnii nixná ikhúún ga̱jma̱a̱ nixniʼtsun Jeobá xuajñuu asndu nakha 1919 rá.

² Rí mbiʼi xúgi̱ Jeobá nagrui̱ga̱ má xúʼko̱ awan náa xuajñuu. Nakha 1919, nigruigi̱i̱n mbá guéjmi̱i̱n xa̱bekha bi̱ kaxtaʼwíin mu muri̱ya̱ʼ awan xóo majuiʼtáraʼa ga̱jma̱a̱ mu muxnúlú ganitsu rí na̱ʼkhá náa Dios (Luc. 12:42). a Ga̱jma̱a̱ nakujmaa kaʼwu dí Jeobá xtáa raʼni tsajkurámuuʼ ñajunʼ rí kúwá runi̱ (Is. 60:22; 65:​13, 14).

3, 4. a) Aratá ga̱jma̱a̱ mbá xkri̱da xú káʼnii embáyulú dí marigá awan náa xuajñuu Dios. b) Ndiéjunʼ guʼyáá náa artículo rígi̱ rá.

³ A mu na̱nguá rígáa awan, xándoo muʼnimbánii ñajunʼ dí nixnúlú muʼni Jesús (Mat. 28:​19, 20). Mbá xkri̱da, a mu na̱nguá rígáa awan xóo majuiʼtáraʼa, mambáa ma̱ndoo  maʼtáraʼa asndu náa ma endooʼ, mú mbáa kikháá xuajin guʼtáraʼa ga̱jma̱a̱ náa iʼwáá xuajin nditháan xúʼtáráʼa. Lá natatsaʼwáminaʼ xú káʼnii eyambáá rí narígá májánʼ awan rá.

⁴ Rí mbiʼi xúgi̱, Jesús nagrui̱ga̱ awan náa xuajñuu Dios, xóo má niʼni gajmíi̱n xa̱bi̱i̱ índo̱ nixtáa náa tsu̱du̱u̱ ku̱ba̱ʼ. Náa artículo rígi̱, mbuʼyáá xkri̱da rí nigíʼ Jesús ga̱jma̱a̱ mbuʼyáá xú káʼnii xuajñuu Dios ndaʼyaridoo. Ma̱ngaa mbuʼyáá xú káʼnii gándoo gusngajmá dí nakumulú kuʼyáá xuajñuu Jeobá.

XUAJÑUU DIOS NDAʼYARIDOO XKRI̱DOO JESÚS

5. Xú káʼnii eʼyaridoo xkri̱doo Jesús, xuajñuu Dios rá. (Juan 8:28.)

⁵ Jesús nijmañuu náa anu̱u̱ ndiéjunʼ rí gíʼmaa maʼnii ga̱jma̱a̱ dí maʼthí. Ikháá má kayuuʼ, xuajñuu Jeobá najmúu consejo ga̱jma̱a̱ kiʼsngáa dí na̱ʼkhá náa Ajngá rawunʼ Dios (atraxnuu Juan 8:28; 2 Tim. 3:​16, 17). Ma̱ngaa nángi eʼni nuni marmáʼáan a̱jkiu̱lú dí gíʼmaa muraxnuu má xúʼko̱ Biblia ga̱jma̱a̱ muʼgíʼ muʼni rí najmañulú. Xú káʼnii embáyulú rí muʼnimbulú consejo rígi̱ rá.

6. Xú káʼnii embáyulú dí muʼnigajmaa Biblia rá.

⁶ Rí majmulú i̱yi̱i̱ʼ ndrígulú mu muʼnigajmaa Biblia nambáyulú wéñuuʼ. Mbá xkri̱da, nambáyulú muʼni mbríguíi rí nasngáa náa Biblia ga̱jma̱a̱ ikha dí naxnúlú xuajñuu Dios. Índo̱ guʼyáá dí ikha rúʼko̱ na̱ʼkhá náa Biblia, maʼnii rí makumulú kuʼyáá itháán xuajñuu Jeobá (Rom. 12:2).

7. Ndiéjunʼ ajngáa niʼtáráʼa Jesús ga̱jma̱a̱ xú káʼnii eʼyaridoo xuajñuu Jeobá rá.

⁷ Jesús niʼtáráʼa “ajngáa rí májánʼ ga̱jma̱a̱ numuu Xa̱bu̱ Ñajunʼ ndrígóo Dios” (Luc. 4:​43, 44). Ma̱ngaa nikuʼmiin xa̱bi̱i̱ mu mutaraʼa (Luc. 9:​1, 2; 10:​8, 9). Rí mbiʼi xúgi̱, xúgiáanʼlú ikháanʼ bi̱ kuwaanʼ náa xuajñuu Jeobá nuʼtáraʼa ga̱jma̱a̱ numuu Xa̱bu̱ Ñajunʼ ndrígóo, tséʼniuu má asndu náá mínaaʼ kuwanlú o asndu ndiéjunʼ má ñajunʼ kuaʼdalú.

8. Ndiéjunʼ ñajunʼ dí mitsaanʼ kuaʼdalú rá.

⁸ Rí muʼtáruʼun xa̱bu̱ ga̱jma̱a̱ numuu Xa̱bu̱ Ñajunʼ ndrígóo Dios, nindxu̱u̱ mbá ñajunʼ kiejunʼ. Numuu dí raʼkháa xúgíinʼ xa̱bu̱ ma̱ndoo mutaraʼa. Mbá xkri̱da, índo̱ Jesús nixtáa náa tsu̱du̱u̱ ku̱ba̱ʼ tániñuʼ rí xa̱bu̱ wéñiiʼ muthi ga̱jma̱a̱ numuu ikhaa (Luc. 4:41). Rí mbiʼi xúgi̱, mu mbáa xa̱bu̱ ma̱ndoo maʼtáraʼa gajmíi̱nʼ testigos de Jeobá, ginii ndayóo maʼnimbánuu tikhuu ikha. Xú káʼnii esngajmá rí nangajulú ñajunʼ dí kuaʼdalú rí muʼtáraʼa rá. Rí muʼni asndu xó má eʼngo̱o̱ mu mutaruʼun xa̱bu̱. Ikháanʼ ma̱nga̱n nandulúʼ muʼni xó má niʼni Jesús, ikhaa jngóo nuʼni mbá tsiakii mu muʼtáruʼun eʼwíinʼ ga̱jma̱a̱ musngúún rí gajkhun (Mat. 13:​3, 23; 1 Cor. 3:6).

9. Ndiéjunʼ niʼni xuajñuu Dios mu masngáa mbiʼyuu xáʼ.

⁹ Jesús niʼsngáa mbiʼyuu Dios. Índo̱ niʼtájkáan niʼthún rígi̱ Anu̱u̱ bi̱ xtaa mekhuíí: “Nixnu̱u̱n mbuyáá mbiʼyaaʼ” (Juan 17:26). Xuajñuu Jeobá ndaʼyáridoo xkri̱doo numuu rí naʼni asndu xó má eʼngo̱o̱ mu xa̱bu̱ muguánu muniʼnuuʼ mbiʼyuu Dios. Najmún Traducción del Nuevo Mundo, dí rígá ma kájxi̱i̱ o tuapha̱a̱ náa itháán rí 270 ajngáa, mu munimbánii ñajunʼ rígi̱. Traducción ndrígóo Biblia rígi̱ nasngájmaa mbiʼyuu Dios náa má kaʼyóo maʼgá xó má na̱ʼkhá náa phú nigumaʼramáʼ. Náa apéndice A4 ga̱jma̱a̱ A5 na̱ʼkhá raʼthí itháán ga̱jma̱a̱ numuu  mbiʼyuu Dios. Ga̱jma̱a̱ náa apéndice C, dí na̱ʼkhá náa Biblia de estudio, rígá mbaʼa dí nasngájmaa dí mbiʼyuu Dios gíʼmaa ma̱ʼkhá náa Escrituras Griegas Cristianas mbá 237 nuthu.

10. Ndiéjunʼ eʼsngúlú experiencia ndrígóo a̱ʼgu̱ú bi̱ xtáa náa Myanmar rá.

¹⁰ Xó má Jesús, ikháanʼ mangáanʼ nandulúʼ dí mbaʼin xa̱bu̱ muguánu muniʼnuuʼ mbiʼyuu Dios. Náa Myanmar mbáa Testigo niʼsngóo mbáa a̱ʼgu̱ nikhi bi̱ gíʼdoo 67 tsiguuʼ dí mbiʼyuu Dios nindxu̱u̱ Jeobá. A̱ʼgu̱ nikhi ra̱ʼkhá tháán nidxuu rí asndu nimbi̱ya̱ʼ ga̱jma̱a̱ niʼthí: “Nindxu̱u̱ timbá aʼphu̱ rí nadxáun mbiʼyuu Dios. Nirasngoóʼ mbá dí gíʼdoo wéñuuʼ numuu náa vida ndrígóʼ”. Experiencia rígi̱ nasngájmulú dí muʼsngúún xa̱bu̱ mbiʼyuu Dios ma̱ndoo mariʼkhu̱u̱ xóo kúwi̱i̱n.

GUSNGAJMÁ RÍ NAKUMULÚ KUʼYÁÁ XUAJÑUU DIOS

11. Xó gándoo gusngajmáá ancianos dí naku̱mu̱ún kuyáá xuajñuu Dios rá.

¹¹ Xú káʼnii gándoo gusngajmáá ancianos dí naku̱mu̱ún kuyáá xuajñuu Dios rá. Mbá rí ma̱ndoo muni̱ nindxu̱u̱ rí mugíʼ májánʼ edxuun muraxnuu ikha rí nakhánún, ga̱jma̱a̱ nda̱wa̱á mugíʼ munimbánii. Mbá xkri̱da, ikhiin nundrígú ikha xóo gíʼma muni̱ asignación ma̱ngaa xóo mutajkáan náa reunión, mú ma̱ngaa xóo gíʼmaa muñewu̱u̱n múgiúu Jesús. Índo̱ ancianos nunimbánii xúgií ikha rí nakhánún náa xuajñuu Dios, a̱ngiu̱lú naku̱mu̱ún rí Jeobá nandoo kaʼñún ga̱jma̱a̱ rí nañewu̱u̱n.

12. a) Ndíjkha gíʼmaa muʼnimbulú ikha dí nuxnulúʼ bi̱ nuyegun edxu̱u̱ rá. (Hebreos 13:​7, 17.) b) Ndíjkha rí gíʼmaa mbuyáá náa rí májánʼ dí nuni bi̱ nuyegun edxu̱u̱ rá.

¹² Índo̱ ancianos gúxnulú ikha, rí itháan májánʼ muʼni nindxu̱u̱ rí muʼnimbánii ga̱jma̱a̱ gagi, xúʼko̱ ikhiin xáʼniun miʼskhaa munimbaníí ñajunʼ rí guáʼdáá. Náa Biblia naʼthúlú dí gíʼma muʼnimbulúʼ ga̱jma̱a̱ muʼnimbánii rí nuthi bi̱ nuxnulu ikha (atraxnuu Hebreos 13:​7, 17). Mú rígi̱í nguáná naʼni gakhii numuu rí ancianos mangiin nindxu̱ún xa̱bu̱ aʼkhá. Mú garmáʼáan a̱jkiu̱lú rí a mu i̱ndó nduʼya náa rí nakiéʼkúun, makuwáanʼ ru̱ʼni̱ xó má nandún xa̱bu̱ sia̱nʼ ndrígulú. Náá numuu nuʼthá rígi̱ rá. Numuu rí a mu nundxaʼwamíjná dí raʼkhí ga̱jma̱a̱ numún ancianos, rúʼko̱ gaʼni rí ní xákumulú kuʼyáá xuajñuu Dios. Rí xúgi̱, ndiéjunʼ gáʼyoo muʼni mu muʼni gáʼndún nduwaʼ rí nuthi xa̱bu̱ sia̱nʼ ndrígulú rá.

XÚNIʼÑÁÁNʼ RÍ NIMBÁA MAʼNI A̱JMA̱ A̱JKIU̱LÚ

13. Ndiéjunʼ ethi̱ xa̱bu̱ sia̱nʼ ndrígulú ga̱jma̱a̱ numuu xuajñuu Dios rá.

¹³ Xa̱bu̱ sia̱nʼ ndrígulú nuthi rí xúgíiʼ dí májánʼ rí naʼni xuajñuu Dios nindxu̱u̱ ra̱májánʼ. Mbá xkri̱da, náa Biblia nasngáa dí Jeobá nandoo rí xa̱bi̱i̱ mani̱ndxu̱ún kaʼwiin, xóo rí nuni ga̱jma̱a̱ xóo nduyamajkuíí. Ma̱ngaa naʼthí rí asndu tsáa bi̱ naʼni dí ra̱májánʼ ga̱jma̱a̱ tsétanga̱a̱ a̱jkiu̱ún, gíʼma maguma expulsar náa congregación (1 Cor. 5:​11-13; 6:​9, 10). Numuu rí ikháanʼ nuʼnimbáníí ikha rúʼko̱, ikhaa jngó xa̱bu̱ sia̱nʼ ndrígulú nutulúʼ rí tsíyulú gúʼñún xa̱bu̱ ga̱jma̱a̱ rí nakumulú dí itháan májánʼ eʼni ikháanʼ ki xóo eʼwi̱i̱nʼ.

14. Náá e̱ʼkha̱ nduwaʼ rí nuthi ga̱jma̱a̱ numuu xuajñuu Dios xá.

¹⁴ Garmáʼáan a̱jkiu̱lú náa e̱ʼkha̱ rí tsíñún gúyulú. Gixa̱a̱ “nindxu̱u̱ anu̱ún bi̱ nuni̱ nduwaʼ”, ikhaa naʼni dí muthi xúgíiʼ dí ragájkhun ga̱jma̱a̱ numuu xuajñuu Dios  (Juan 8:44; Gén. 3:​1-5). Tséʼniulú tsiánguá rí najmiuu xa̱bu̱ mu muthi nduwaʼ rúʼko̱, numuu dí xúʼko̱ má niʼni nákha siglo timbá.

15. Ndiéjunʼ ninii Jesús gajmíi̱n xa̱bi̱i̱, ndxajkun bi̱ kuya̱ edxu̱u̱ rá.

¹⁵ Maski asndu Jesús nindxu̱u̱ aʼdió Dios, nindxu̱u̱ jmbii ga̱jma̱a̱ niʼni milagro rí nagui̱i̱ wéñuuʼ, Gixa̱a̱ nijmiu tikhuun xa̱bu̱ mu muthi dí nduwaʼ ga̱jma̱a̱ numuu ikhaa. Mbá xkri̱da, ndxajkun bi̱ kuya̱ edxu̱u̱ nithúún xa̱bu̱ rí Jesús naxkawíin xa̱bu̱ wéñiiʼ ga̱jma̱a̱ tsiakii ndrígóo “bi̱ naʼtáñajúúnʼ xa̱bu̱ wéñiiʼ” (Mar. 3:22). Nda̱wa̱á índo̱ nigún kuyáá Jesús náa xa̱bu̱ ñajunʼ, ndxajkun bi̱ kuya̱ edxu̱u̱ nini gámaa rí naʼthí nduwaʼ ga̱jma̱a̱ nitsudiin xa̱bu̱ rí munda̱ʼa̱ rí makhañúu (Mat. 27:20). Tsiguʼ nda̱wa̱á, índo̱ discípulos ndrígóo Jesús niguáʼdi̱i̱ nitaraʼa, xa̱bu̱ sia̱nʼ ndrígún “nixkajxi̱i̱n xa̱bu̱” mu “makiʼníin” kuñún ma̱ngaa mu muxkúún (Hech. 14: 2, 19). Rí naʼthí náa Hechos 14:​2, náa Atalaya 1 ñajunʼ gu̱nʼ diciembre tsiguʼ 1998 naʼthí dí xa̱bu̱ sia̱nʼ judíos raʼkháa i̱ndó tudrígúu ajngáa rí májánʼ, ma̱ngaa “nithi rí nduwaʼ ga̱jma̱a̱ numún” mú xúʼko̱ xa̱bu̱ xuajin xáʼndúún gúñún cristianos.

16. Ndiéjunʼ gíʼmaa marmáʼáan a̱jkiu̱lú a mu nuʼdxawíín dí ragájkhun rá.

¹⁶ Gixa̱a̱ nánguá eniñu̱u̱ʼ raʼthí nduwaʼ ga̱jma̱a̱ asndu dí mbiʼi xúgi̱ “naʼni nduwiinʼ xúgíinʼ xa̱bu̱ bi̱ kúwá náa tsu̱du̱u̱ ku̱ba̱ʼ” (Apoc. 12:9). Ikhaa jngó, a mu nuʼdxawíín dí ragájkhun ga̱jma̱a̱ numuu xuajñuu Dios o ga̱jma̱a̱ numún a̱ngiu̱lú bi̱ nuyegun edxu̱u̱, garmáʼáan a̱jkiu̱lú dí nini xa̱bu̱ sia̱nʼ ndrígóo Dios ga̱jma̱a̱ Jesús, ma̱ngaa rí niniu̱u̱n  discípulos nákha siglo timbá. Xó má niʼtáriyaʼ náa Biblia, xa̱bu̱ kúwá ruxkúún testigos de Jeobá ga̱jma̱a̱ nuthi dí ragájkhun ga̱jma̱a̱ numún (Mat. 5:​11, 12). Xa̱bu̱ sia̱nʼ xáʼngu̱u̱n gúni ndúwanʼ a mu nduʼyáá náa e̱ʼkha̱ nduwaʼ rí nuthi ga̱jma̱a̱ mbá nacha̱ nuñeumíjna̱lú. Ndiéjunʼ gúʼni mú muñeumíjna̱lú rá.

17. Ndiéjunʼ gíʼmaa muʼni a mu nuʼdxawíín dí ragájkhun rá. (2 Timoteo 1:13; atayáá ma̱ngaa kúgumaʼá “ Lá nikhánúu náa inaaʼ mbá rí nindxu̱u̱ nduwaaʼ rá. Ndiéjunʼ gíʼmaa matani̱.”)

¹⁷ Gúʼni gaʼduunʼ rí minduwaʼ. Apóstol Pablo niʼthí kaʼwu ndiéjunʼ gíʼma muʼni a mu nuʼdxawíín dí ragájkhun. Náa timbá i̱yi̱i̱ʼ rí na̱jkhá inuu Timoteo 1:3 ga̱jma̱a̱ 4 niʼthí rígi̱: “Ni má xúgíʼ edxu̱ún mudxawíín cuento dí minduwaʼ”. Ga̱jma̱a̱ nixnúu consejo rígi̱ Timoteo: “Atani̱ gaʼduunʼ cuento rí minduwaʼ dí naʼthí raʼkhí ga̱jma̱a̱ numuu Dios” (1 Tim. 4:7). Muʼgíʼ mbá xkri̱da: Índo̱ mbáa ada̱ nayejxi̱ mbá rí kri̱ga̱ mbayíʼ, mbáa magídáʼ náa rawunʼ; mú mbáa xa̱bu̱ nikhi xáʼni xúʼko̱, numuu rí ndaʼyoo dí gamíi nindxu̱u̱ rúʼko̱. Xúʼko̱ má ma̱nga̱n nuʼni gaʼduunʼ rí minduwaʼ, ga̱jma̱a̱ i̱ndó nuʼdxawíín “ajngáa májánʼ” dí nindxu̱u̱ gajkhun (atraxnuu 2 Timoteo 1:13).

18. Xú káʼnii gándoo gusngájma dí nakumulú kuʼyáá xuajñuu Jeobá rá.

¹⁸ Ndiʼyáa mbá ajtsú enii rí xóo xuajñuu Dios ndaʼyaridoo Jesús, mú raʼkháa i̱ndó rúʼko̱. Índo̱ ikháán gídxúʼ ratanigajma̱a̱ Biblia, matayaa xóó itháan. Xátatsiʼñáʼ ratambáñun a̱ngiu̱lú mu maku̱mu̱ún kuyáá má xúʼko̱ xuajñuu Dios. Ga̱jma̱a̱ atani̱ má xúʼko̱ kájxi̱ ñajuunʼ Jeobá, xátatsiʼñáʼ rí nimbáa maʼni tsínguáanʼ náa xuajñuu Dios dí najmúu mu maʼnimbánuu rí nandoo (Sal. 37:28). Lá ragájkhun dí ra̱ʼkhá tháán nagui̱i̱ rí muʼni ñajuunʼ Jeobá náa xuajñuu dí rígá ngajua ga̱jma̱a̱ rí jmbu rá. ¡Gangajulú má xúʼko̱ ñajunʼ mitsaanʼ rí guáʼdáá!