1. Ndiéjunʼ gíʼthúu̱n Jeobá náa ikháánʼ rá.

 MBÁ rí naʼni mákuwíin gagi xa̱bu̱ gajmíi̱ nindxu̱u̱ índo̱ naxtáa aʼdiún. Máski ajndu ra̱ʼkhá tháán edxúún kuyáá, mu tsíñún máni̱ndxu̱u̱ má xúʼko̱ mbáa ada̱ chíʼgíiʼ. Á mu tségaja̱a̱ máxmiéjúúnʼ wéñuuʼ. Ikháá má kayuuʼ, Jeobá nadxuu wéñuuʼ índo̱ ndaʼyoo nugíʼdi̱i̱ najkua̱lú kidxuuʼ Jesús, mú tsíyoo mánindxu̱lú má xúʼko̱ “xóo e̱ji̱n” (1 Cor. 3:1). Ikhaa nagi̱ʼthu̱u̱n rí xúgíinʼ cristianos muguánu “mundxaʼwamíjna̱ xóo xabuanii” (1 Cor. 14:20).

2. Ndiéjunʼ graxe̱ guriʼña̱a̱ náa artículo rígi̱ rá.

² Náa artículo rígi̱ muriʼña̱a̱ graxe̱: Ndiéjunʼ eyoo gáʼthúu̱n rí ma̱nindxa̱a̱ʼ mbáa cristiano bi̱ gújkuiiʼ rá. Ndiéjunʼ gáʼyóoʼ muʼni mu mánindxu̱lú mbáa cristiano bi̱ gújkuiiʼ rá. Ndíjkha dí ra̱ʼkhá tháán gíʼdoo numuu ganitsu rí na̱ʼkhá náa Dios rí nindxu̱u̱ gujkhuʼ rá. Ga̱jma̱a̱, ndíjkha dí ragíʼmaa makumulú kuʼyamijná i̱ndó ikháánʼ rá.

NDIÉJUNʼ EYOO GÁʼTHÚU̱N RÍ MA̱NINDXA̱A̱ʼ MBÁA CRISTIANO BI̱ GÚJKUIIʼ RÁ.

3. Ndiéjunʼ eyoo gáʼthúu̱n rí ma̱nindxa̱a̱ʼ mbáa cristiano bi̱ gújkuiiʼ rá.

³ Índo̱ náa Biblia naʼthí rí mani̱ndxa̱a̱ʼ mbáa cristiano bi̱ gújkuiiʼ na̱nguá eyoo gáʼthúu̱n guata tsiguaʼ xtaʼdaa. Náa ajngáa griego, ajngáa “gújkuiiʼ” ma̱ngaa nandoo gáʼthúnʼ, “jmbii” ga̱jma̱a̱ “kájxi̱” (1 Cor. 2:6). a Ikhaa jngó na̱jkuánu nani̱ndxu̱lú mbáa cristiano bi̱ gújkuiiʼ índo̱ nambájxulú gajmiúlú Dios ga̱jma̱a̱ nuniʼñááʼ rani̱ndxu̱lú xóo e̱ji̱n. Lá rígi̱ eyoo gáʼthúu̱n rí  índo̱ mbáa na̱jkha̱nú nanindxu̱u̱ cristiano bi̱ gújkuiiʼ nándáa rí gáʼyóoʼ máʼni xáʼ. Na̱nguá, ndaʼyóoʼ rí máʼnii itháan (1 Tim. 4:15). Mú, xú káʼnii kujmáa mbáa cristiano rí nindxu̱u̱ gújkuiiʼ índo̱ naʼni dí naniguʼ Dios tséʼniuʼ a mu nindxu̱u̱ ndxámá o nikhi xá.

4. Xú káʼnii nindxúu̱n cristianos bi̱ gújkuíínʼ rá.

⁴ Cristianos bi̱ gújkuíínʼ nunimbún xúgi̱ xtángoo ndrígóo Jeobá raʼkháa índo̱ rí nandún ikhiin. Gajkhun má, maski asndu nindxúu̱n xa̱bu̱ aʼkhá ga̱jma̱a̱ nuni̱ dí raʼkhí, mú nusngajmaa xóo nakúwi̱i̱n dí nuni mbá tsiakii mundxaʼwamíjna̱ ga̱jma̱a̱ muni̱ xóo má endooʼ Jeobá muni̱ xa̱bi̱i̱. Nindxúu̱n xóo imbáa nuxi̱i̱ʼ xa̱bu̱ ga̱jma̱a̱ nuni xúgíʼ xóo eʼngóo mu mundxaʼwáá eʼdxuun xóo endxaʼwóó edxuu Dios (Efes. 4:​22-24). Nijmañún muraʼwíí májánʼ rí muni̱ xóo má eʼthí náa xtángoo ga̱jma̱a̱ ikha ndrígóo Jeobá, ikhaa jngó na̱nguá eñúu̱nʼ mbá lista náa naʼthí ndiéjunʼ gíʼmáa muni̱. Ma̱ngaa índo̱ nuraʼwíí mbá rí muni̱, nuni mbá tsiakii mu munimbánii (1 Cor. 9:​26, 27).

5. Ndiéjunʼ gamíi máguáʼníí cristianos bi̱ xóo na̱nguá gújkuíínʼ rá. (Efesios 4:​14, 15.)

⁵ Mú cristianos bi̱ na̱nguá gújkuíínʼ gamíi mágumá nduwiinʼ náa xa̱bu̱ “bi̱ najmáñún muni̱ nduwiinʼ eʼwíinʼ”. Mbá munimbu̱ún minduwaaʼ rí nuthi apóstatas (atraxnuu Efesios 4:​14, 15). b Mbáa maguanu máxígúun o májmángunʼ, ga̱jma̱a̱ xájyúuʼ gákiʼníin o xájyúuʼ gájngutíguíin náa tsáʼkhá (1 Cor. 3:3).

6. Ndiéjunʼ xkri̱da embáyulú mákru̱ʼu̱lú xóo nindxu̱u̱ rí mi̱dxu̱ʼnú ma̱nindxa̱a̱ʼ mbáa cristiano bi̱ gújkuííʼ rá. (Atayáá ma̱ngaa xtiʼkhuu.)

⁶ Xó má ndiʼyáa, náa Biblia naʼni mbríguii rí mi̱dxu̱ʼnú ma̱nindxa̱a̱ʼ gújkuíínʼ náa rí natani̱ ñajunʼ Dios, ga̱jma̱a̱ rí mi̱dxu̱ʼnú ma̱nindxa̱a̱ʼ mbáa xa̱bu̱ nikhi. Rígá mbaʼa rí mbáa ada̱ tseʼyoo, ikhaa jngó ndaʼyóoʼ rí mbáa xa̱bu̱ nikhi máñe̱wu̱nʼ. Mbá xkri̱da, a̱ʼgú nikhi maʼthúnʼ wáxióo rí mágujtuun ñawúnʼ mu makidaa náa carretera, mu índo̱ wáxióo na̱jkha̱ rakhíʼ, mbáa maniñuʼ má makidaa mbáwíí, mú maʼthúu̱n má xúʼko̱ dí gíʼma mayejxi̱ mbá najmáa nijniu mu ma̱ndoo manújngoo. Índo̱ dxáʼgú na̱jkha̱nú nakhi̱i̱, ma̱ndoo má mbaʼyóoʼ mbáwíí gamíi dí rígá. Ikhaa má kayuuʼ nindxu̱u̱ rí maʼni gújkuíínʼ náa nathani ñajuunʼ Dios, cristianos bi̱ na̱nguá gújkuíín mbaʼyóoʼ  rí cristianos bi̱ gújkuíínʼ mumbañún mbuyáá ndiéjunʼ dí gamíi máʼni rí muniñaʼ runi̱ ñajuunʼ Dios ga̱jma̱a̱ rí muraʼwíí májánʼ rí muni̱. Mú cristianos bi̱ gújkuíínʼ naʼngu̱u̱n nduyáá ikha rí na̱ʼkhá náa Biblia ga̱jma̱a̱ xúʼko̱ nduyáá ndiéjunʼ endxa̱ʼwáminaʼ Jeobá ga̱jma̱a̱ numuu mbá rí nandún muni̱, ma̱ngaa xúʼko̱ naguanu nuraʼwíí májánʼ rí muni̱.

7. Lá ndañún cristianos bi̱ gújkuíínʼ rí eʼwíinʼ mumbañún xáʼ.

⁷ Lá rúʼko̱ eyoo gáʼthúnʼ dí cristianos bi̱ gújkuíínʼ na̱nguá má eyoo rí mixtambáñún xáʼ. Na̱nguá, rígá mbiʼi rí ikhiin ndaʼyoo mixtambáñún. Mbáa bi̱ ndiʼkhu̱ún xtaa rajmañuu ga̱jma̱a̱ numuu Dios, mbáa nagi̱ʼthu̱u̱n dí eʼwíinʼ muthán dí gáʼni, mu mbáa cristiano bi̱ gújkuiiʼ najmuʼ ku̱ma̱a̱ rí gíʼdoo ga̱jma̱a̱ consejo ndrígún a̱ngiu̱lú bi̱ itháán najmañún, mú ikhaa má ndaʼyoo dí mámbáa “gíʼmáa máʼni ñajunʼ rí kaʼyoo máʼni” (Gál. 6:5).

8. Ndíjkha nuʼthá rí cristianos bi̱ gújkuíínʼ na̱nguá mbríguiin rá.

⁸ Xó má raʼkháa xúgíinʼ xabuanii mbrígu̱ún xóo kaʼniún, xúʼko̱ má raʼkháa xúgíinʼ cristianos bi̱ gújkuíínʼ guaʼdáá ikhaa má cualidad. Mbá xkri̱da, tikhuun najmañún wéñuuʼ, eʼwíinʼ tsémiñún, eʼwíinʼ májáanʼ a̱jkiu̱nʼ ga̱jma̱a̱ eʼwíinʼ nakru̱ʼu̱u̱n kuñún eʼwíinʼ. Índo̱ a̱jmi̱i̱n cristianos bi̱ gújkuíínʼ ndayóoʼ murawíi mbá rí muni̱, mbá mixtiʼkhu dí garaʼwíí maʼni mámbáa, mú nimbáa xáʼthí dí raʼkhí dí niraʼwíi maʼni imba̱a̱, numuu dí mbá najmiin ndaʼyóoʼ muni̱ tsiakimijna mu makuwíin mbá kambájxu̱u̱n (Rom. 14:10; 1 Cor. 1:10).

NDIÉJUNʼ GÚʼNI̱ MU MÁNINDXU̱LÚ MBÁA CRISTIANO BI̱ GÚJKUIIʼ RÁ.

9. Náá numuu rí xándoo mu̱ʼgua̱nú manindxu̱lú mbáa cristiano bi̱ gújkuiiʼ a mu tséʼni tsiakimíjna̱ rá.

⁹ Mbáa ada̱ nájka̱nú nákhi mboʼ mbiʼi, mu nimbáa cristiano tséʼni gújkuiiʼ a mu tséʼni tsiakimínáʼ. Mbá xkri̱da, a̱ngiu̱lú bi̱ nikúwíin náa Corinto nindrígu ajngáa rí májánʼ, nijngúun iyááʼ, nikhánuu espíritu santo ga̱jma̱a̱ nijmañún wéñuuʼ náa apóstol Pablo (Hech. 18:​8-11). Mú, tsiguuʼ nda̱wa̱á dí nijngúun iyááʼ, mbaʼin xóó na̱nguá gújkuíínʼ (1 Cor. 3:2). Ndiéjunʼ gáʼyóoʼ muʼni mu xágiʼnulú xígi̱ kaʼnii ikháánʼ rá.

10. Ndiéjunʼ gáʼyoo muʼni mu mu̱ʼgua̱nú manindxu̱lú mbáa cristiano bi̱ gújkuiiʼ rá.

¹⁰ Mu mu̱ʼgua̱nú manindxu̱lú mbáa cristiano bi̱ gújkuiiʼ, ginii kayuuʼ ndayóoʼ rí maʼndulú maʼni gújkiáánʼ. Bi̱ nandún mani̱ndxu̱u̱n xóo e̱ji̱i̱n bi̱ xóó tséjmañún, nditháan má xaguanú muni̱ itháan ñajunʼ Dios (Prov. 1:22). Tsíyulú manindxu̱lú xóo xabuanii bi̱ tsíñún guʼnimbáníí rí kaʼñún ga̱jma̱a̱ naguáʼthi̱i̱n rí anu̱ún ga̱jma̱a̱ rudún mutún ndiéjunʼ gíʼmaa muni̱. Ikháanʼ nandulúʼ munimbáníí rí kaʼyulú, mu mu̱ʼgua̱nú manindxu̱lú mbáa cristiano bi̱ gújkuiiʼ (atraxnuu Judas 20). A mu ikháán nakuma̱a̱nʼ rí xóó tsédxúʼnú ma̱nindxa̱a̱ʼ mbáa cristiano bi̱ gújkuiiʼ, atanda̱ʼa̱ Jeobá rí maxnáa “rí máʼndaaʼ mátani̱ ga̱jma̱a̱ tsiakii mu mátanimbánii” (Filip. 2:13).

11. Xú káʼnii embáyulú Jeobá mu muguánu manindxu̱lú mbáa cristiano bi̱ gújkuiiʼ rá. (Efesios 4:​11-13.)

¹¹ Jeobá na̱nguá gíʼthúu̱n dí máganiáanʼ índo̱ ikháán. Nixniúlú bi̱ kuyaaʼ edxuu ga̱jma̱a̱ bi̱ nusngáa náa congregación bi̱ mumbayulúʼ mu muʼni itháan ñajuunʼ Dios, mú “índo̱ gájmáánʼ xóo mbáa xa̱bu̱ nikhi̱i̱ ga̱jma̱a̱ rí mu̱ʼgua̱nú máʼni mbríguáanʼ gajmiúlú Cristo” (atraxnuu Efesios 4:​11-13). Ma̱ngaa naxnúlú xi̱ʼ kaʼwu ndrígóo dí nambáyulú mu muguáʼdáá “ku̱ma̱ ndrígóo Cristo” (1 Cor. 2:​14-16). Ma̱ngaa, niʼni dí mágumáraʼmáʼ a̱jkhu̱ Evangelios, dí mambáyulú mu májmáñulú itháán rí niʼni Jesús índo̱ nixtáa náa tsu̱du̱u̱ ku̱ba̱ʼ. A mu nduʼyaridáá xóo endxaʼwamínáʼ,  xóo naʼthí ga̱jma̱a̱ xóo naʼni, muguánu manindxu̱lú mbáa cristiano bi̱ gújkuiiʼ.

GÍʼDOO NUMUU GANITSU GÚJKHÚʼ RÍ NA̱ʼKHA̱ NÁA DIOS

12. Ndiéjunʼ nindxu̱u̱ “kiʼsngáa rí nijmañulúʼ ginii kayuuʼ ga̱jma̱a̱ numuu Cristo” rá.

¹² Mu manindxu̱lú má xúʼko̱ gújkiáánʼ gíʼmaa majmañulú itháán ga̱jma̱a̱ numuu “kiʼsngáa rí nijmañulúʼ ginii kayuuʼ ga̱jma̱a̱ numuu Cristo”. Tikhuu kiʼsngáa rúʼko̱ nindxu̱u̱ rí mata̱nga̱a̱ a̱jkia̱a̱nʼ, rí maraʼdáá fe, rí majnguánʼ iyááʼ ga̱jma̱a̱ rí magabiín xa̱bu̱ (Heb. 6:​1, 2). Xúgíinʼ cristianos gíʼmaa majmañún kiʼsngáa rígi̱. Ikhaa jngó, apóstol Pedro nisngúún náa Pentecostés (Hech. 2:​32-35, 38). Mu mu̱ʼgua̱nú manindxu̱lú xa̱bi̱i̱ Cristo gíʼdoo wéñuuʼ numuu mundrígú kiʼsngáa rígi̱. Numuu rí Pablo niʼthí rí a mu tsétatsimbaaʼ náa magabiín xa̱bu̱ xándoo mi̱dxu̱ʼnú ma̱nindxa̱a̱ʼ cristiano (1 Cor. 15:​12-14). Ikhaa jngó, gíʼmaa mbuʼyáa majmañulú itháan.

13. Ndiéjunʼ gáʼyoo muʼni mu manigulúʼ ganitsu gujkhuʼ rí na̱ʼkha̱ náa Dios, dí naʼthí náa Hebreos 5:14 rá. (Atayáá ma̱ngaa xtiʼkhuu.)

¹³ Guaʼdáá kiʼsngáa ndrígóo Biblia dí ra̱mingíjyúuʼ, mú ma̱ngaa guaʼdáá ganitsu gujkhuʼ dí na̱ʼkha̱ náa Dios. Ganitsu rígi̱ raʼkháa índo̱ nindxu̱u̱ xtángoo ndrígóo Jeobá, ma̱ngaa nindxu̱u̱ ikha ndrígóo rí nambáyulú makru̱ʼu̱lú xóo endxa̱ʼóo edxuu. Mú manigulúʼ ndaʼyóoʼ munigajmaa Biblia, mundxaʼwamíjná rí nuraxnuu ga̱jma̱a̱ muʼgíʼ munimbánii rí najmañulú. Rígi̱ mambáyulú muraʼwíí májánʼ dí muʼni, rí naniguʼ Jeobá (atraxnuu Hebreos 5:14). c

14. Xú káʼnii nimbañúún Pablo cristianos bi̱ nikuwa náa Corinto mu máʼni gújkuíínʼ rá.

¹⁴ Cristianos bi̱ na̱nguá gújkuíínʼ naʼniún miʼskhaa muraʼwíí dí muni̱ índo̱ na̱nguá exkamaa náa Biblia rí naʼthúu̱n mbájmbu ndiéjunʼ gíʼmaa muni̱. Mbáa tikhuiin mákumún dí ma̱ndoo muʼni asndu ndiéjunʼ má eñún ikhiin. Ga̱jma̱a̱ eʼwíinʼ maʼndún rí marigá mbá xtángoo dí maʼthúu̱n mbájmbu ndiéjunʼ dí muni̱. Mbá xkri̱da, cristianos bi̱ nikúwíin náa Corinto ninda̱ʼa̱ Pablo dí marigá mbá xtángoo náa maʼthí a mu ma̱ndoo muphu ganitsu rí nijuixnájxi̱ náa inún xándú. Mú Pablo na̱nguá niʼthún ndiéjunʼ gíʼmaa muni̱, i̱ndó niʼthún  dí mámbáa xa̱bu̱ “kaʼyoo maraʼwíi dí maʼni” xó má eniñuʼ ku̱ma̱a̱ ndrígóo. Niʼthúu̱n mbaʼa ikha rí na̱ʼkha̱ náa Biblia dí mámbáñún mu muraʼwíí májánʼ dí muni̱ ga̱jma̱a̱ dí xáʼni gawúnʼ ku̱ma̱a̱ ndrígún ga̱jma̱a̱ rí xúni̱ májngutíguíin eʼwíinʼ (1 Cor. 8:​4, 7-9). Xúʼko̱ nixtáa rasngúún máʼnii gújkuíínʼ ga̱jma̱a̱ mu majmúún ku̱ma̱a̱ ndrígún raʼkháa dí muguaʼthi̱i̱n dí eʼwíinʼ muthúún rí muni̱.

15. Xú káʼnii nimbañúún Pablo cristianos bi̱ hebreos mu mambajxúún má xúʼko̱ gajmiún Dios rá.

¹⁵ Rígá i̱mba̱ dí naʼsngúlú náa ajngáa rí Pablo niʼnirámáʼ náa inún cristianos bi̱ hebreos. Tikhuun dí ikhiin niniñaaʼ runi̱ ñajuunʼ Dios, ikhaa jngó niʼthúu̱n: “Mbu̱júu̱ʼ ndayála yáʼdú raʼkháa rí muphula ganitsu gújkhúʼ” (Heb. 5:12). Na̱nguá nindrigú kiʼsngáa dí Jeobá nisngúún náa congregación (Prov. 4:18). Mbá xkri̱da, mbaʼin cristianos bi̱ nindxúu̱n judíos nithi rí gíʼma munimbu̱ún má xúʼko̱ xtángoo ndrígóo Moisés maski má ninújngoo 30 tsiguuʼ rí nixnáximinaʼ makhañún Cristo (Rom. 10:4; Tito 1:10). Niguáʼdaa mbayuʼ wéñuuʼ mbiʼi mu muriʼkumijnáa. Ikhaa jngó Pablo nindoo mámbáñún mu mundrígú kiʼsngáa dí gajkhun dí niʼthúún náa carta rí niʼnirámáʼ ga̱jma̱a̱ xi̱ʼ kaʼwu. Ganitsu gujkhuʼ rí na̱ʼkhá náa Dios nindxu̱u̱ dí ikhiin ndiʼñún mu makru̱ʼu̱u̱n rí itháán májánʼ eyamajkuíí Jeobá xúgi̱ ga̱jma̱a̱ mu xámíñún mutaraʼa má xúʼko̱ maski má bi̱ judíos tséniñúnʼ mutaraʼa (Heb. 10:​19-23).

XÁKUMULÚ KUʼYAMIJNÁ

16. Ndiéjunʼ ma̱ngaa gáʼyóoʼ muʼni nda̱wa̱á rí nini̱ndxu̱lú mbáa cristiano bi̱ gújkuiiʼ rá.

¹⁶ Raʼkháa índo̱ ndayóoʼ muʼni tsiakimijna mu manindxu̱lú gújkiáánʼ, ma̱ngaa mu xúni̱ guabamíjnalú. Ikhaa jngó xákumulú kuyamijná (1 Cor. 10:12). Ra̱ʼkhá tháán gíʼdoo numuu rí muyajmámijná má xúʼko̱ mu mbuyaaʼ a mu kuwaanʼ ra̱jma̱ñulú xóó itháan (2 Cor. 13:5).

17. Ndiéjunʼ esngúlú Carta rí ni̱jkha̱ inún bi̱ Colosenses ga̱jma̱a̱ numuu rí manindxaa mbáa cristiano bi̱ gújkuiiʼ rá.

¹⁷ Náa Carta rí ni̱jkha̱ inún bi̱ Colosenses, ikhí Pablo naʼthí dí gíʼma manindxu̱lú má xúʼko̱ mbáa cristiano bi̱ gújkuiiʼ. Maski ajndu cristianos bugi̱ nindxúu̱n má gújkuíínʼ, mú niʼthúu̱n rí gíʼmaa muñeumíjna̱ mu xúniʼñámíjná rí maʼni jnga̱wi̱i̱n ku̱ma̱a̱ dí rígá náa numbaaʼ (Col. 2:​6-10). Epafras, bi̱ naninuʼ má  májánʼ, naʼtájkáan má xúʼko̱ ga̱jma̱a̱ numún mu “máguajún má xúʼko̱ jmbu” o ma̱ni̱ “gújkuíínʼ” (Col. 4:12). Ndiéjunʼ esngúlú rígi̱ rá. Xóo má Pablo ga̱jma̱a̱ Epafras ndiyáa májánʼ rí manindxaa mbáa cristiano bi̱ gújkuiiʼ, ndaʼyóoʼ rí matani tsiakimínáʼ ga̱jma̱a̱ matanda̱ʼa̱a̱ Jeobá rí mambáyaaʼ. Nindúún rí bi̱ colosenses mani̱ndxu̱ún má xúʼko̱ cristianos bi̱ gújkuíínʼ maski asndu nuraʼníí xkujndu.

18. Ndiéjunʼ gamíi magíʼnuu mbáa cristiano bi̱ gújkuiiʼ rá. (Atayáá ma̱ngaa xtiʼkhuu.)

¹⁸ Pablo niʼthúún bi̱ hebreos dí mbáa cristiano bi̱ gújkuiiʼ gamíi maʼni tsínguminaʼ náa Jeobá, a mu naʼni gujkhuʼ a̱jkiu̱ún ga̱jma̱a̱ nda̱wa̱á xándoo matanga̱a̱ a̱jkiu̱ún. Mu májánʼ rí bi̱ hebreos na̱nguá nini wéñuuʼ dí raʼkhí (Heb. 6:​4-9). Ndiéjunʼ erígá dí mbiʼi xúgi̱ ga̱jma̱a̱ numún bi̱ niniñanʼ runi̱ ñajuunʼ Jeobá o bi̱ nigájnún expulsado a mu nda̱wa̱á natanga̱a̱ a̱jkiu̱ún xá. Ga̱jma̱a̱ numún rí nindxu̱ún xa̱bu̱ guabiinʼ, rí natanga̱a̱ a̱jkiu̱ún nusngajmaa rí nánguá nindxu̱ún xóo xa̱bu̱ bi̱ niʼthí Pablo. Mu índo̱ natangiín náa xuajñuu Jeobá, ndayóoʼ rí mixtambáñún (Ezeq. 34:​15, 16). Mbáa bi̱ kuyaaʼ edxuun munda̱ʼa̱a̱ mbáa ndxájulú bi̱ gújkuiiʼ mu mumbáñún mambajxúún mbu̱júu̱ gajmiún Jeobá.

19. Ndiéjunʼ gíʼmaa muʼgímijná muʼni rá.

¹⁹ A mu ikháán nataniminaʼ manindxaa mbáa cristiano bi̱ gújkuiiʼ. Ataniminaʼ má xúʼko̱ mu maʼngaaʼ matanimbánii rí natagímináʼ matani̱. Gajmañaaʼ má xúʼko̱ ga̱jma̱a̱ numuu ganitsu gujkhuʼ rí na̱ʼkhá náa Dios ga̱jma̱a̱ gajmañaaʼ matatsaʼwa̱a̱ edxa̱a̱ʼ xóo endxa̱ʼóo edxuu Jeobá. A mu nindxa̱a̱ʼ má mbáa cristiano bi̱ gújkuiiʼ atani̱ xóo má eʼnga̱a̱ʼ mu nditháan xátatsiʼñáʼ ranindxa̱a̱ʼ xa̱bi̱i̱ Jeobá.