Lá natayáá má ráʼ.
Ndíjkha nikúwíin xa̱bu̱ bi̱ na̱nguá nindxu̱ún israelitas náa xa̱bi̱i̱ David rá.
NÁA ejército ndrígóo David nikúwíin xa̱bu̱ bi̱ na̱nguá nindxu̱ún israelitas, xóo Zélec xa̱bu̱ ammonita, Urías xa̱bu̱ hitita ga̱jma̱a̱ Itmá xa̱bu̱ moabita (1 Crón. 11:39, 41, 46). a Ma̱ngaa nikúwíin “keretitas, peletitas ga̱jma̱a̱ guititas” (2 Sam. 15:18). Nakujmaa rí keretitas ga̱jma̱a̱ peletitas kuñún filisteos (Ezeq. 25:16). Ga̱jma̱a̱ rí guititas nindxu̱ún bi̱ nikúwíin náa xuajen filistea ndrígóo Gat (Jos. 13:2, 3; 1 Sam. 6:17, 18).
Ndíjkha niniñu̱u̱nʼ David dí makuwíin náa ejército ndrígóo, xa̱bu̱ bi̱ na̱nguá nindxu̱ún israelitas rá. Numuu rí ndiʼyoo dí muguajún jmbu náa Jeobá, raʼkháa i̱ndó náa ikhaa. Xóo bi̱ keretitas ga̱jma̱a̱ peletitas, mbá diccionario dí naʼthí ga̱jma̱a̱ numuu Biblia naʼthí: “Ikhiin niguajun jmbu gajmíi̱n David índo̱ niʼniuu itháán mingíjyúuʼ maʼtáñajunʼ”. Xú káʼnii eʼyáá rá. Índo̱ “xúgíinʼ xa̱bu̱ Israel” niniña̱a̱nʼ rey David mu magún kidxuuʼ “mbáa xa̱bu̱ bi̱ nanigu̱u̱ʼ maʼni xkujndu, bi̱ mbiʼyuu Seba”, keretitas gajmíi̱nʼ peletitas túniña̱a̱ʼ David ga̱jma̱a̱ nimbayíí maʼnigámbáa rí nikujximínáʼ Seba (2 Sam. 20:1, 2, 7). Imba̱a̱ míʼtsú, Adonías a̱ʼdióo rey David nindoo marígú káʼyúʼ trono anu̱u̱. Mú keretitas gajmiún peletitas túniña̱a̱ʼ David ga̱jma̱a̱ nimbayíiʼ mu Salomón mani̱ndxu̱u̱ nuxi̱ʼ rey, numuu rí ndiyáá dí ikhaa nindxu̱u̱ bi̱ niraʼwíí Jeobá (1 Rey. 1:24-27, 38, 39).
Imba̱a̱ bi̱ nimbáyúu David bi̱ na̱nguá nindxu̱u̱ israelita nindxu̱u̱ Ittái xa̱bu̱ guitita. Ikhaa gajmíi̱n 600 xa̱bi̱i̱ nimbayíí índo̱ Absalón imba̱a̱ a̱ʼdióo David, nindoo rí xa̱bu̱ ndrígóo Israel mugíiʼ rey ikhaa raʼkháa anu̱u̱. David niʼthúu̱n Ittái rí ikhaa na̱nguá nindxu̱u̱ israelita ikha jngóo xáʼyóo magiʼdu̱u̱ ga̱jma̱a̱ nindxu̱u̱. Mú Ittái niriʼñuu: “¡Na̱xna̱ ajngóʼ ga̱jma̱a̱ numuu mbiʼyuu Jeobá ma̱ngaa náa tátioʼ rey, rí asndu náá má gáʼga tátioʼ rey ikhí maxtáa xa̱bia̱a̱ʼ, tséʼniuu á mu maxtáa o makhañúu!” (2 Sam. 15:6, 18-21).
Ittái niwi̱ji̱ jmbu a̱jkiu̱u̱n kaʼyoo David, rey bi̱ niraʼwíí Jeobá.
Maski ajndu keretitas, peletitas ga̱jma̱a̱ guititas tánindxu̱ún israelitas ndiyáá rí Jeobá nindxu̱u̱ Dios bi̱ gajkhun ga̱jma̱a̱ ndiyamajkuíí David xóo bi̱ ikhaa niraʼwíi. Mbáa David nixnáa wéñuuʼ núma̱aʼ rí nikúwíin xa̱bu̱ bi̱ niguajún jmbu náa níjniúu.
a Xtángoo ndrígóo Dios rí nuxkamaa náa Deuteronomio 23:3-6 naʼthí rí nimbáa ammonita ni má moabita ma̱ndoo mato̱ʼo̱o̱ náa congregación ndrígóo Israel. Mbáa rígi̱ eyoo gáʼthúu̱n rí mundrígú xó má eʼthí náa xtángoo, xó má kaʼyoo mbáa israelita. Mú na̱nguá eʼthúún rí xándoo mambajxúún gajmiún xuajñuu Dios ni ma rí xákúwá ikhí. Náa libro Perspicacia para comprender las Escrituras, ayuʼ náa naʼthí “Ammonitas” ga̱jma̱a̱ nda̱wa̱á náa subtítulo “Se casan con israelitas”.
