1. Ndiéjunʼ nindxu̱u̱ paraíso rí na̱ʼkha̱ náa Dios, ga̱jma̱a̱ ndiéjunʼ nandulúʼ muʼni rá.

 RÍ MBIʼI xúgi̱ nduʼyamajkuíí Jeobá mbá jnduʼ, kuwáánʼ náa xuajñuu ga̱jma̱a̱ rígá mbaʼa dí májánʼ rí nuʼni. Ra̱ʼkhá tháán mbaʼin, kúwá tsímáá ga̱jma̱a̱ mbá kambájxuún. Nditháan tsíñún muniñaaʼ ruʼyamajkuíí ga̱jma̱a̱ nandún rí mbaʼin xa̱bu̱ manigu̱u̱nʼ mambáxu̱u̱n gajmiún Jeobá. Ndiéjunʼ kuwáanʼ ruʼthálú rá. ¡Paraíso rí na̱ʼkha̱ náa Dios!  a

2. Ndiéjunʼ rí itháán naʼniaaʼ tsiánguá ga̱jma̱a̱ numuu paraíso rí na̱ʼkha̱ náa Dios rá.

² Maski ajndu naʼniulú tsiánguá, Jeobá niʼni rí makuwáanʼ gajmiúlú xa̱bi̱i̱ náa mbá numbaaʼ dí tsíñún kuyamijná, náa rígá dí xkawiʼ ga̱jma̱a̱ dí gamíi (1 Juan 5:19; Apoc. 12:12). Ikhaa ndaʼyoo xúgíʼ rí emíniʼlú náa numbaaʼ ndrígóo Gixa̱a̱. Numuu rí nandoo kaʼyulú, ikhaa naʼni rí makuwáanʼ tsímáá mu muʼni má xúʼko̱ ñajunʼ ndrígóo ga̱jma̱a̱ gagi. Náa Ajngáa rawuunʼ naʼthí dí paraíso rí na̱ʼkha̱ náa ikhaa nindxu̱u̱ náa ma̱ndoo “mayambáá mu ikhí mutawa̱a̱nʼ” ga̱jma̱a̱ nindxu̱u̱ xóo “mbá jardín rí nuxtijyáá májánʼ” (Is. 4:6; 58:11). Numuu dí Jeobá naʼni tsajkurámáanʼ bi̱ kúwáanʼ náa paraíso rígi̱, kúwáanʼ gagi ga̱jma̱a̱ kúwáanʼ tsímáá maski ajndu kúwáanʼ náa iwáá mbiʼi dí ra̱ʼkhá tháán mingíjyúuʼ (Is. 54:14; 2 Tim. 3:1).

3. Xú káʼnii nimbánuu timbá míʼtsú ajngáa ndrígóo Isaías capítulo 65 rá.

 ³ Náa capítulo 65 ndrígóo Isaías, Jeobá niʼthí xóo mani̱ndxu̱u̱ rí mbuʼyamajkuíí ikhaa gajmiúlú xa̱bi̱i̱, xóo muʼthá rí makuwáanʼ náa paraíso rí na̱ʼkha̱ náa ikhaa. Timbá míʼtsú dí nimbánuu ajngáa rígi̱ nindxu̱u̱ tsiguʼ 537 tsiguʼ ginii. Nákhá ikhú, judíos bi̱ nitanga̱a̱ a̱jkiu̱ún, nigájníin náa Babilonia ga̱jma̱a̱ niguwáa̱nʼ náa jmbañu̱ún. Numuu rí Jeobá niʼni tsajkurámiinʼ ga̱jma̱a̱ nimbáñún, niʼngu̱u̱n nini̱i̱ Jerusalén dí niguma gámbáa, nini̱i̱ mbu̱júu̱ dí mani̱ndxu̱u̱ mbá xuajin mitsaanʼ. Ma̱ngaa náa Israel nini májáanʼ templo náa phú kaʼyoo mbuyamajkuíí Jeobá (Is. 51:11; Zac. 8:3).

4. Xú káʼnii embánuu ajngáa ndrígóo Isaías capítulo 65 rí mbiʼi xúgi̱ rá.

⁴ Ma̱ngaa rí mbiʼi xúgi̱ nambánuu ajngáa ndrígóo Isaías. Nigi̱ʼdu̱u̱ nákhá 1919, índo̱ xa̱bi̱i̱ Jeobá nigájníin náa Babilonia rí Mba̱a̱. Asndu nákha ikhú paraíso rí na̱ʼkha̱ náa Dios ni̱jkha̱ rajo̱o̱ náa xúgíʼ tsu̱du̱u̱ Ku̱ba̱ʼ. Xa̱bi̱i̱ Jeobá, bi̱ nutaraʼa ga̱jma̱a̱ numuu Reino ga̱jma̱a̱ gagi nini̱ dí marigá mbaʼa congregación. Mbaʼin xa̱bekha ga̱jma̱a̱ gu̱ʼu̱ bi̱ nákha ginii najmangu̱u̱nʼ, nuxuʼdamíjná aʼkhá, niniña̱a̱nʼ runi̱ xúgíʼ rígi̱ ga̱jma̱a̱ ‹niriʼkumijná mbá kayuuʼ xóo xa̱bu̱ nindxu̱ún xó má Dios nandoo› (Efes. 4:24). Mbaʼa rí niʼthí Isaías xóo maguma tsajkurámáanʼ mambanúu náa numbaaʼ nuxi̱ʼ. Maski ajndu xúʼko̱, asndu nákha xúgi̱ naguma tsajkurámáanʼlu wéñuuʼ. Guʼyáá xú káʼnii embáyulú rí makuwáanʼ náa paraíso rí na̱ʼkha̱ náa Dios ga̱jma̱a̱ mbuʼyáá náá numuu dí nditháan ragíʼmaa muniʼñááʼ.

XÓO KU̱MU̱ÚN BI̱ KÚWÍIN NÁA PARAÍSO RÍ NA̱ʼKHA̱ NÁA DIOS

5. Xó má eʼthí Isaías 65:​13, xú káʼnii kuwáanʼ náa paraíso dí na̱ʼkha̱ náa Dios rá.

⁵ Nakuwáanʼ májánʼ ga̱jma̱a̱ nakhánáaʼlú tsiakii. Isaías niʼthí xóo mixtiʼkhu kayuuʼ nindxu̱u̱ rí maraxtaa náa awúu̱n paraíso rí na̱ʼkha̱ náa Dios ga̱jma̱a̱ dí xáraxtaa ikhí (atraxnuu Isaías 65:13). b Xa̱bi̱i̱ Jeobá, nakánún xúgíʼ rí nda̱ñúunʼ mu makuwíin mijngii náa ikhaa. Naxnúlú xi̱ʼ kaʼwu ndrígóo, Ajngáa rawuunʼ ga̱jma̱a̱ ra̱ʼkhá tháán mbaʼa ganitsu dí na̱ʼkhá náa ikhaa mu xúʼko̱ muʼphulú, mu̱ʼwa̱a̱nlú ga̱jma̱a̱ makuwáanʼ gagi (atayáá ma̱ngaa Apocalipsis 22:17). Mú bi̱ na̱nguá kúwíin náa paraíso rí na̱ʼkha̱ náa Dios kúwíin mixtiʼkhu kayuuʼ. Ikhiin “naxkidxu̱u̱n”, “nakándawúnʼ” ma̱ngaa “kúwíin ga̱jma̱a̱ majti”. Numuu dí na̱nguá embájxu̱u̱n májánʼ gajmiún Dios (Amós 8:11).

6. a) Díí ganitsu kuáʼdáá e̱ʼkha̱ raʼthí náa Joel 2:​21-24 rá. b) Ndiéjunʼ eyoo gáʼthúu̱n ga̱jma̱a̱ xú káʼnii embáyulú rá.

⁶ Mbóo dí niʼtáriyaʼ profeta Joel, nindxu̱u̱ dí Jeobá maxnún xuajñuu xúgíʼ ganitsu dí itháán mbaʼñúún, xóo tsígáʼ, vino, ga̱jma̱a̱ aceite ndrígóo oliva (Joel 2:​21-24). Rí phú nindoo gáʼthí nindxu̱u̱ rí maxnúún xúgíʼ rí ndañún xuajñuu, xó má ganitsu rí na̱ʼkhá náa ikhaa. Xú káʼnii eʼni dí mbiʼi xúgi̱ xá. Naxnúlú Biblia, mbaʼa i̱yi̱i̱ʼ, sitio ndrígulú náa internet, reunión ga̱jma̱a̱ asamblea. Mu xúʼko̱ makuwáanʼlu májánʼ xúgíʼ mbiʼi, muguaʼdáá rí mu̱ʼphu̱lúʼ ga̱jma̱a̱ makhánáaʼlú tsiaki̱i̱.

7. Ndíjkha ra̱ʼkhá tháán nadxuu a̱jkiu̱lú rá. (Isaías 65:14.)

⁷ Nakuwáanʼ gagi ga̱jma̱a̱ dí kuáʼdáá. Xa̱bi̱i̱ Jeobá nuxna̱a̱ núma̱aʼ ikhaa ga̱jma̱a̱ xúgíʼ a̱jkiu̱ún, ikha jngóo nundxa̱ʼwa̱a̱ ga̱jma̱a̱ gagi (atraxnuu Isaías 65:14). c Gajkhun dí na̱ʼkhá náa Ajngáa rawuunʼ Dios ga̱jma̱a̱ dí na̱ʼkhá ikhí naxnáaʼlú tsiaki̱i̱, ma̱ngaa rí kuáʼti̱i̱n mambanúu kuajtuminaʼ ga̱jma̱a̱ numuu rí nikháñúu Jesús, xúgíʼ rígi̱ naʼni rí maʼdxuu wéñuuʼ a̱jkiu̱lú. ¡Ra̱ʼkhá tháán nadxulú índo̱ nuʼtámíjná xúgíʼ rígi̱ gajmiúlú a̱ngiu̱lú! (Sal. 34:8; 133:​1-3).

8. Ndiéjunʼ nindxu̱u̱ a̱jma̱ dí itháán nagájnuriyo̱o̱ʼ náa paraíso dí na̱ʼkha̱ náa Dios rá.

 ⁸ A̱jma̱ dí itháán nagájnuriyo̱o̱ʼ náa paraíso rí na̱ʼkha̱ náa Dios nindxu̱u̱ dí makuwáanʼ mbá kambájxulú náa xuajñuu ikhaa ga̱jma̱a̱ dí nandulúʼ kuʼyamijná. Ngajua rígi̱ “naruwi̱i̱n xa̱bu̱” nambáyulú mbuʼyáá xú káʼnii gákuwáanʼ náa numbaaʼ nuxi̱ʼ. Ikhí maʼndulú kuʼyamijná itháan ga̱jma̱a̱ makuwáanʼ kambájxulú itháan májánʼ ki xóo xúgi̱ (Col. 3:14). Mbáa ndxájulú a̱ʼgu̱ naʼthí xú káʼnii nikumu̱u̱ índo̱ nininiúnʼ testigos de Jeobá: “Ikhúún na̱nguá eyoo xú káʼnii nindxu̱u̱ rí maraxtaa gagi, ni má na̱nguá nixtáá gagi gajmiínʼ familioʼ. Timbá míʼtsú náa ndi̱yo̱o̱ dí gajkhun nandún kuyamijná nindxu̱u̱ náa majñúúnʼ xa̱bi̱i̱ Jeobá”. Xúgíinʼ bi̱ nandún makuwíin gagi ga̱jma̱a̱ rí kuáʼdáá, ndayóo rí makuwíin náa paraíso rí na̱ʼkha̱ Dios. Tséʼniún dí gúthi xa̱bu̱ numbaaʼ ga̱jma̱a̱ numulú, náa iduu Jeobá ga̱jma̱a̱ náa familia ndrígúlú bi̱ kúwíin náa xúgíʼ numbaaʼ, kuáʼdáá májánʼ mbiʼyulú ga̱jma̱a̱ kri̱ga̱ májánʼ numulú (Is. 65:15).

9. Ndiéjunʼ garigá ga̱jma̱a̱ numuu dí numíníiʼ rá. (Isaías 65:​16, 17.)

⁹ Nakuwáanʼ tsímáá ga̱jma̱a̱ tséxmiéjunlú. Náa Isaías 65:14 naʼthí rí bi̱ na̱nguá kúwíin náa paraíso rí na̱ʼkha̱ náa Dios ‹mundxa̱ʼwa̱ numuu rí na̱ʼkhu̱ a̱jkiu̱ún ga̱jma̱a̱ mumbiyaʼ numuu rí ngíná kúwíin›. Xú káʼnii kúwíin xa̱bi̱i̱ Jeobá rá. Ndiéjunʼ garigá ga̱jma̱a̱ numuu dí numíníiʼ rá. Jeobá nakudaminaʼ: “Xúgíʼ gaʼkhu dí nirígá nákha ginii maguanúu tsu̱díí; marigá ngo̱ʼo̱o̱ náa xándoo mba̱yo̱o̱” (atraxnuu Isaías 65:​16, 17). d Ikhaa maʼni dí xúgíʼ xkujndu mambáa ga̱jma̱a̱ xúgíʼ rí niguáʼníílu dí naʼni mumíniiʼlú, ni xármáʼáan a̱jkiu̱lú.

10. Náá numuu rathá ikháán dí nindxu̱u̱ mitsaanʼ rí maraxtaa gajmiáanʼ a̱ngiu̱lú rá. (Atayáá ma̱ngaa xtiʼkhuu.)

¹⁰ Asndu nákhá mbiʼi xúgi̱ kuwáanʼ tsímáá ga̱jma̱a̱ tséxmiéjunlú índo̱ kuwáánʼ náa reunión. Índo̱ kuwáánʼ ikhí tséxmiéjunlú eʼni xkujndu dí rígá náa numbaaʼ. Ndiéjunʼ gándoo gúʼni ikháanʼ mu marigá má xúʼko̱ rí tsímáá náa paraíso rí na̱ʼkha̱ náa Dios rá. Gusngajmálú cualidades dí na̱ʼkha̱ náa xi̱ʼ kaʼwu ndrígóo Dios xóo ngajua, gagi, tsímáá, rí májánʼ, ga̱jma̱a̱ rí xákiʼnán (Gál. 5:​22, 23). ¡Ra̱ʼkhá tháán nagui̱i̱ dí kuwáanʼ náa xuajñuu Dios! Á mu na̱nguá eniʼñáánʼ ruʼyamajkuíí Jeobá gajmiúlú xa̱bi̱i̱, mbuʼyáá xú káʼnii ikhaa eʼnimbánuu xúgíʼ dí nikudaminaʼ índo̱ niʼthí: “Ma̱ni̱ mbá nuxi̱ʼ mekhu ga̱jma̱a̱ mbá ku̱ba̱ʼ nuxi̱ʼ”.

11. Xú káʼnii gíʼmaa makumulú rí kuwáánʼ náa paraíso rí na̱ʼkha̱ náa Dios rá. (Isaías 65:​18, 19.)

 ¹¹ Nuxnáalu núma̱aʼ ga̱jma̱a̱ nakuwáanʼ gagi. Isaías niʼthí dí xa̱bi̱i̱ Dios kuáʼdáá mbaʼa numuu mu makuwíin gagi. Jeobá niʼni paraíso náa kuwáánʼlú (atraxnuu Isaías 65:​18, 19). e Ikha jngóo naʼthulú dí muʼthúún xa̱bu̱ dí magajníiʼ náa majñu̱únʼ xa̱bu̱ bi̱ na̱nguá esngáa dí gajkhun numuu Dios, mu xúʼko̱ mumbaʼñúún mu makuwíin náa paraíso mitsaanʼ rígi̱. ¡Ra̱ʼkhá tháán nadxulú dí kuwáánʼ náa rí gajkhun! Ikha jngóo nandulúʼ muʼthúún eʼwíinʼ xóo eʼni tsajkurámáanʼ Jeobá (Jer. 31:12).

12. Xú káʼnii ku̱ma̱a̱ʼ ikháán índo̱ natraxnuu Isaías 65:​20-24, ga̱jma̱a̱ náá numuu rá.

¹² Bi̱ kuwáanʼ náa paraíso rí na̱ʼkha̱ náa Dios nuxnáalu wéñuuʼ núma̱aʼ numuu dí ra̱ʼkhá tháán mitsaanʼ rí kuáʼti̱i̱n nda̱wa̱á. ¡Atátsaʼwáminaʼ xúgíʼ dí maʼngaaʼ ma̱ta̱ya̱a̱ ga̱jma̱a̱ matani náa numbaaʼ nuxi̱ʼ! Náa Biblia naʼthí: “Ikhí ní xáʼga̱nú maxtáa mbáa ada̱ bi̱ xóó naʼxúu bi̱ ndiʼkhún nguáthá mbiʼi xtáa, ni má mbáa xa̱bu̱ bi̱ na̱nguá xtáa xó má mbiʼi rí kaʼyoo”. Naʼthí xóó ga̱jma̱a̱ numún xa̱bu̱: “Mu̱ni̱ guʼwá ga̱jma̱a̱ makuwáanʼ ikhí; mudula ixi̱ uva ga̱jma̱a̱ muphula xndúu”. Ma̱ngaa: “Ni xáʼni néʼngu̱u̱n”, numuu rí Jeobá maʼni tsajkurámiinʼ wéñuuʼ. Dios nakudaminaʼ rí magiʼdoo numuu dí makuwáanʼlu, makuwáanʼ májánʼ ga̱jma̱a̱ maxnúlú xúgíʼ rí mbaʼyulú. “Ga̱jma̱a̱ nákha xóó tsénda̱ʼa̱”, Dios mbaʼyoo rí gáʼñúunʼ ga̱jma̱a̱ “maxnún rí nda̱ñúnʼ xúgíinʼ bi̱ kúwá nduya” (Is. 65:​20-24; Sal. 145:16).

13. Xó má eʼthí náa Isaías 65:25 xú káʼnii eriʼkumijnáa xa̱bu̱ índo̱ nugíʼdi̱i̱ nuni̱ ñajuunʼ Jeobá rá.

¹³ Kuwáanʼlu tsímáá ga̱jma̱a̱ tsémiñulu. Numuu dí nambáyulú xi̱ʼ kaʼwu, mbaʼin xa̱bu̱ bi̱ nákhá ginii nindxu̱ún xóo xujkhúʼ niriʼkumijnáa (atraxnuu Isaías 65:25). f Xóo muʼthá niriʼkhuu xóo nindxu̱ún nákhá ginii (Rom. 12:2; Efes. 4:​22-24). Gajkhun má, xúgiáanʼ bi̱ nindxu̱lú xa̱bi̱i̱ Dios, nindxu̱lú xa̱bu̱ aʼkhá ikha jngóo nakiéʼkulu. Maski ajndu xúʼko̱ Jeobá niʼni mbá milagro, dí “xúgíinʼ enii xa̱bu̱” makuwíin mbá jnduʼ, maʼndún kuyamijná ga̱jma̱a̱ makuwá tsímáá (Tito 2:11). ¡I̱ndó Dios bi̱ gíʼdoo xúgíʼ tsiaki̱i̱ maʼngo̱o̱ maʼni rígi̱!

14. Xú káʼnii nimbánuu ajngáa rí naʼthí náa Isaías 65:25 náa mbáa ndxájulú rá.

¹⁴ Lá gajkhun rí mbáa xa̱bu̱ ma̱ndoo mariʼkuminaʼ ráʼ. Guʼyálú mbá xkri̱da rí nasngájma dí xúʼko̱. Mbáa xa̱bu̱ bi̱ gíʼdoo 20 tsiguʼ bi̱ ra̱ʼkhá tháán ejmangu̱u̱ʼ ga̱jma̱a̱ nikudaminaʼ aʼkhá, nixtáa mbaʼa nuthu náa guʼwá e̱jua̱nʼ numuu rí niʼni dí ra̱májánʼ, xóo rí niʼni kúwáʼ carro ga̱jma̱a̱ i̱ʼwáʼ. Ma̱ngaa naniguuʼ magíʼdu̱u̱ má xúʼko̱ gajmíi̱n xa̱bu̱. Índo̱ nidxawuun timbá mijtsu̱ rí naʼsngáa náa Biblia, ikhaa nigíʼdúu nijkha reunión gajmíi̱n testigos de Jeobá, ikhí ndiʼyoo dí gíʼdoo numuu maxtáa: Ikhaa nindxu̱u̱ paraíso rí na̱ʼkha̱ náa Dios. Nda̱wa̱á rí nijngúun iyááʼ, mbaʼa nuthu nindxa̱ʼwáminaʼ xú káʼnii nimbánuu náa vida ndrígóo ajngáa rí naʼthí náa Isaías 65:25. Nákhá ginii najmangu̱u̱ xóo mbáa león mú nda̱wa̱á ninindxu̱u̱ guabaaʼ xóo mbáa a̱ʼdá mugu̱.

15. Náá numuu rí nandulúʼ mumbáñún eʼwíinʼ mu makuwíin náa paraíso rí na̱ʼkha̱ náa Dios rá. Ga̱jma̱a̱ xú káʼnii gáʼngulú muʼni rígi̱ rá.

¹⁵ Náa Isaías 65:13 nagíʼdu̱u̱ naʼthí ajngáa rígi̱: “Rígi̱ rí niʼthí Tátá Jeobá bi̱ naʼtáñajunʼ xúgíʼ numbaaʼ”. Ga̱jma̱a̱ náa versículo 25 naguámbári̱go̱o̱ xígi̱: “Eʼthí Jeobá”. Xúgíʼ rí nakudaminaʼ maʼni nambánuu má xúʼko̱ (Is. 55:​10, 11). Paraíso rí na̱ʼkha̱ náa Dios nindxu̱u̱ gajkhun; rí niʼthí Jeobá ga̱jma̱a̱ numuu paraíso rígi̱, nimbánuu. Numuu rí kuwáanʼ náa familia rígi̱, ra̱ʼkhá tháán kuaʼdáálú tsímáá xúgi̱ ga̱jma̱a̱ tsémiñulu.  (Sal. 72:7). Ga̱jma̱a̱ numuu xúgíʼ rígi̱, nandulúʼ mumbáñún mbaʼin xa̱bu̱ xó má eʼngo̱o̱ mu makuwíin náa xuajñuu Jeobá. Maʼngulú muʼni rígi̱ á mu nuʼgímijna̱ muʼtárúʼún xa̱bu̱ (Mat. 28:​19, 20).

GÚʼNI RÍ EʼWÍINʼ MANIGU̱U̱Nʼ MAGUWÁʼ NÁA PARAÍSO RÍ NA̱ʼKHA̱ NÁA DIOS

16. Náá numuu rí xa̱bu̱ nanigúnʼ maguwáʼ náa paraíso rí na̱ʼkha̱ náa Dios rá.

¹⁶ Xúgiáanʼ ma̱ndoo muñambáá mu paraíso rí na̱ʼkha̱ náa Dios mani̱ndxu̱u̱ ra̱ʼkhá tháán mitsaanʼ ga̱jma̱a̱ xúʼko̱ xa̱bu̱ manigúnʼ mathu̱ʼu̱n. Xú káʼnii rá. Guʼyaridáá Jeobá. Tséʼkha̱ kagui̱i̱n xa̱bu̱ ga̱jma̱a̱ tsiakii, ikhaa naʼni rí xa̱bu̱ manigu̱u̱nʼ maguwáʼ náa ikhaa numuu rí májáanʼ a̱jkiu̱u̱n (Jer. 31:3; Juan 6:44). Bi̱ najmañún ga̱jma̱a̱ numuu Jeobá, bi̱ májáanʼ a̱jkiu̱ún nanigúnʼ maguwáʼ náa ikhaa ga̱jma̱a̱ numuu xóo xa̱bu̱ nindxu̱ún. Ndiéjunʼ gándoo guʼni rí mambáa dí ikháánʼlú mu xúʼko̱ xa̱bu̱ manigúnʼ maguwa̱ʼ náa paraíso rí na̱ʼkha̱ náa Dios rá.

17. Ndiéjunʼ gándoo muʼni mu xa̱bu̱ manigúnʼ maguwáʼ náa paraíso rígi̱ rá.

¹⁷ Mbá dí xóo ma̱ndoo muʼni mu xa̱bu̱ manigu̱u̱nʼ maguwáʼ náa paraíso rí na̱ʼkha̱ náa Dios ni̱ndxu̱u̱ dí maʼndulú kuʼñúún a̱ngiu̱lú ga̱jma̱a̱ manindxu̱lú mbáa májáanʼ xa̱bu̱. Nandulúʼ dí xa̱bu̱ bi̱ gaguwaʼ náa reunión ndrígulú muthi kayúʼ xó má nithi bi̱ nikúwi̱i̱n náa xuajin Corinto nákhá wajyúuʼ índo̱ nigún timbá aʼphu̱ reunión: “Gajkhun rí Dios xtáa ga̱jma̱á nindxa̱la” (1 Cor. 14:​24, 25; Zac. 8:23). Ikha jngó gíʼdoo wéñuuʼ numuu dí muʼnimbulú consejo rígi̱: “Gakuwáanʼla tsímáá” (1 Tes. 5:13).

18. Ndiéjunʼ gaʼni rí manigúnʼ xa̱bu̱ maguwáʼ náa xuajñuu Jeobá rá.

¹⁸ Gíʼmaa muʼni tsiakimíjna má xúʼko̱ mbuʼñún a̱ngiu̱lú xó má Jeobá ndaʼñún, ikha jngó nduyáá náa cualidad dí mitsaanʼ rí ikhiin guaʼdáá, raʼkháa náa najngawi̱i̱n, ngajua mambáyulú muʼnimbaníí xkujndu á mu nuʼnimbulú consejo rígi̱. “Ganindxa̱la májáanʼ a̱jkia̱la gajmiála eʼwíinʼ, gusngajmá  dí nandala kuyamíjna̱, agáwíinʼ a̱jkia̱la kuyamíjna̱, gu̱ni̱ mba̱a̱ a̱jkia̱la kuyamíjna̱” (Efes. 4:32). Xúgíinʼ bi̱ nanigúnʼ rígi̱ maʼndún maguwáʼ náa paraíso rí na̱ʼkha̱ náa Dios. g

GAKUWÁÁNʼ MÁ XÚʼKO̱ NÁA PARAÍSO RÍ NA̱ʼKHA̱ NÁA DIOS

19. a) Ndiéjunʼ nithíí tikhuun bi̱ nitangiín náa paraíso rí na̱ʼkha̱ náa Dios rá. (Atayáá kúgumaʼá “ Nigájni̱ín, mu nitangi̱ín”.) b) Ndiéjunʼ gíʼma muʼni rá. (Atayáá ma̱ngaa xtiʼkhuu.)

¹⁹ Ra̱ʼkhá tháán májánʼ nindxu̱u̱ dí kuwáanʼ náa paraíso rí na̱ʼkha̱ náa Dios, dí xúgi̱ nindxu̱u̱ itháán mitsaanʼ ki xóo nakha ginii numuu dí kúwi̱i̱n itháán mbaʼin xa̱bíi̱ Jeobá ikhí, guxna̱a̱lú má xúʼko̱ núma̱aʼ Dios ga̱jma̱a̱ numuu paraíso rígi̱ dí ikhaa nixnulu, xúgíinʼ bi̱ nandún makánún tsiakii, makuwíin gagi, tsímáá ga̱jma̱a̱ májánʼ, gíʼmaa dí matuʼun náa paraíso rígi̱ ga̱jma̱a̱ nditháan xúniñaaʼ. Mú gúñeumíjnalú wéñuuʼ numuu rí Gixa̱a̱ nandoo dí xákuwáanʼ ikhí (1 Ped. 5:8; Apoc. 12:9). Guʼnimíjna̱ ga̱jma̱a̱ xúgií tsiakii ndrígulú mu muñewa̱a̱n paraíso rí na̱ʼkha̱ náa Dios, mu manidxu̱u̱ má xúʼko̱ mitsaanʼ, kaʼwu ga̱jma̱a̱ mu marigá rí tsímáá.