Nigumún nákhá tsiguʼ 1955, ga̱jma̱a̱ ninindxu̱u̱ bi̱ itháán chigiun náa a̱ngui̱i̱n. Ndi̱ju̱u̱n náa mijngíí xuajin Finlandia, náa xúgi̱ najmaʼnuuʼ xóo xuajin Vantaa.

Ru̱dúu̱ nijngúnʼ iyááʼ ga̱jma̱a̱ ninindxu̱u̱ testigo de Jeobá nákhá xóó tséxtáa ikhúún. Mú, anu̱u̱ na̱nguá niniñuuʼ maʼga̱ náa rí gajkhun ga̱jma̱a̱ niʼthúú rí xaʼsngúxu ga̱jma̱a̱ numuu Biblia ma̱ngaa dí xáʼga̱ kaguáanʼ náa reunión. Índo̱ anu̱u̱ nda̱wa̱a̱, ikhaa naríya̱a̱ʼ mbiʼi mú maʼsngúxu ga̱jma̱a̱ numuu Jeobá.

Nákhá kaʼníí chíʼgiúúnʼ niku̱mu̱ʼ ka̱yo̱o̱ Jeobá. Mbá xkri̱da, índo̱ nigúʼdoo 7 tsiguuʼ, maestra ndrígóʼ nikiʼnáa kaʼyoʼ numuu rí táʼndoʼ gíʼkhu verilättyjä (rí nindxu̱u̱ ganitsu rí na̱ʼkha̱ náa finlandesa dí gíʼdoo eʼdi). Náa mbá ñawúunʼ nagujtun rawunʼ mu makuáján ga̱jma̱a̱ ímba ñawúunʼ kayá ganitsu mu makudaa náa rawunʼ, maski má asndu ikhúún tsíyóʼ, mú niʼngo̱ʼ nidaaʼ ganitsu rúʼko̱ náa mbayííʼ.

Índo̱ nigúʼdoo 12 tsiguuʼ, anu̱u̱ nikañúu. Nda̱wa̱á dí rúʼko̱, nindoo ni̱jkhá reunión. A̱ngiu̱lú nisngájmuu rí naxmiéjunʼ kuyoʼ ga̱jma̱a̱ rúʼko̱ nimbáyúu mú maʼga̱ kanuu itháán mijngíí náa Jeobá. Nigíʼdu̱u̱ niguxnuu Biblia mambáa mbiʼi ma̱ngaa ninigajmaa itháán iyúlúʼ. Rígi̱ nimbáyúu mu xúʼko̱ maʼgánú maʼjngún iyááʼ índo̱ nigúʼdoo 14 tsiguuʼ, nákhá 8 ñajunʼ gu̱nʼ agosto 1969.

Nda̱wa̱á rí niguámboʼ escuelo, ninindxu̱u̱ʼ precursor regular. Xmáná nda̱wa̱á, ni̱jkhá gaxtáa náa xuajin Pielavesi, náa mbo̱o̱ xuajin dí gíʼ mijngii náa Finlandia, mu mayambáá náa majuiʼtáraʼa.

Náa Pielavesi niniʼniiʼ Sirkka, bi̱ nijkanú ninindxu̱u̱ a̱ʼgiu̱ʼ. Rí niniguʼ náa ikhaa ninindxu̱u̱ dí ra̱ʼkhá tháán májánʼ a̱jkiu̱nʼ ga̱jma̱a̱ rí nandoo kaʼyoo wéñuuʼ Jeobá. Ikháa na̱nguá ndiyáa dí magiʼdoo wéñuuʼ. Mbá najmáán niniguxu rí muni̱ itháán ñajuunʼ Jeobá ga̱jma̱a̱ dí kuwánʼxu xawii mú muni̱ asndu ndiéjunʼ ñajunʼ rí gakanuxu. Nidamíjnáxu nákhá 23 ñajunʼ gu̱nʼ marzo tsiguʼ 1974. Ikhú ni̱jkuáxu gúyambáá náa xuajin Karttula náa ndaʼyoo wéñuuʼ Testigos mú muʼtáraʼa, ki xóó rí muʼguáxu̱ pasiá.

 Nda̱wa̱á rí nidamijná. Jeobá nisngájmuxuʼ rí ikhaa má gáxnúxu̱ʼ asndu ndiéjunʼ má rí gáʼyuxuʼ a mu nuʼgíiʼ giʼnii Xa̱bu̱ Ñajunʼ ndrígóo Dios (Mat. 6:33). Mbá xkri̱da, náa xuajin Karttula na̱nguá kuaʼdáxuʼ mbá carro. Na̱ʼkhá giʼníi na̱jkuáxu̱ ga̱jma̱a̱ bicicleta. Nda̱wa̱á, índo̱ niʼnii gu̱nʼ migúwán ninindxu̱u̱ mingíjyúuʼ wéñuuʼ. Mu muʼtáraʼa náa territorio dí mitsínguánʼ náa congregación ndiyúxuʼ mbo̱o̱ carro, mú na̱nguá kuaʼdáxuʼ mbújkha̱a̱ mu mutsi.

Mbo̱o̱ mbiʼi, mbáa ndxájuu bi̱ giʼnii níʼkhá gáʼyuxuʼ ga̱jma̱a̱ niʼthún rí ma̱ndoo maguánú ga̱jma̱a̱ carriuu. Na̱nguá má ndiyóo dí muʼni numaxúʼ, i̱ndó ndiyóoʼ dí mutsixu gasolina. ¡Dí xúgi̱ niguáʼdááxu̱ mbá carro!.

Jeobá niʼtúxuʼ kaʼwu rí ikhaa má gaxnuxuʼ asndu ndiéjunʼ má rí gáʼyuxuʼ. I̱ndó rí ndaʼyóoʼ rí mugíiʼ ginii Xa̱bu̱ Ñajunʼ ndrígóo Dios.

Índo̱ ni̱jkuáxu náa escuela ndrígóo precursor nákhá tsiguʼ 1978 náa Raimo Kuokkanen. a Mbáa bi̱ níʼsngúxu, niʼthúxu dí muriʼña̱a̱ solicitud mú mu̱ʼguáxu náa Escuela ndrígóo Galaad. Ikhaa jngó, nigíʼdi̱i̱xu ninigajmaa inglés mú ma̱ndoo munimajtííʼxu solicitud mú mu̱ʼguáxu. Mú nda̱wa̱á, na̱nguá nixuʼmáxu solicitud, numuu rí tsiguʼ 1980 nithúxu rí muñambáá náa sucursal ndrígóo Finlandia. Tsiguʼ rúʼko̱, betelitas xándoo magúun náa Escuela ndrígóo Galaad. Ninduxu̱ʼ munixu̱ʼ ñajuunʼ Jeobá asndu náa ma gáʼtuxuu  ikhaa, raʼkháa náa enduxúú ikháán. Ikhaa jngó nindrigúu invitación. Mú ninigajma̱a̱xu̱ má xúʼko̱ inglés a mu nda̱wa̱á gándoo munimajtííʼxu solicitud mu mu̱ʼguáxu náa escuela ndrígóo Galaad.

Tsiguuʼ nda̱wa̱á, Cuerpo Gobernante niʼthí dí betelitas ma̱ndoo munimajtíí solicitud mu magúun náa Escuela ndrígóo Galaad. Ikhaa jngó mbá nacha̱ nixuʼmáxu solicitud ndrígúxu̱, mú ra̱ʼkhá numuu dí na̱nguá kuwanxu gagi náa Betel. I̱ndó nindúxu mbuyáá a mu ma̱ndoo mu̱ʼguáxu mu ma̱ndoo muñambáá náa rígá itháán ñajunʼ. Nituxu̱ʼ rí muʼgua náa Escuela ndrígóo Galaad número 79, nigumáanʼ graduar nákhá gu̱nʼ septiembre tsiguʼ 1985. Mú náá nixuʼmanʼxu xá. ¡Náa Colombia!

Índo̱ nijkuanú náa Colombia, nixuʼmanʼxu mú muñejunʼ náa sucursal. Nini̱i̱ xó má eʼngo̱o̱ mu ñajunʼ ndrígúxu̱ magajnúuʼ májáanʼ, mú tsiguʼ nda̱wa̱á niku̱mu̱xu rí ndaʼyoo maxtiʼkhuu náa kuwánxu. Timbá míʼtsuʼ ga̱jma̱a̱ i̱ndó má rígi̱ ninda̱ʼa̱ rí maxtiʼkhuu congregación ndrígúxu̱. Nixuʼmanʼxu mu muñambáá xóo misionero náa xuajin Neiva náa departamento ndrígóo Huila.

Naniguuʼ wéñuuʼ mataraʼa. Náa Finlandia, índo̱ kaʼnii mbaun ga̱jma̱a̱ nindxu̱u̱ precursor, nguáná nataraʼa asndu nákha miʼcha̱ ga̱jma̱a̱ asndu wakíʼ eguambo̱o̱. Índo̱ ndiʼkhu̱ún nidámíjnáxu, Sirkka gajmúʼ ikhúún nutaráʼaxu káñii mbiʼi. Índo̱ na̱jkuáxu̱ náa territorio rí mitsínguánʼ, nguáná rí asndu nunúʼxu náa carro. Xúʼko̱ na̱nguá naʼniuxu̱ mitsínguánʼ mú mutanga̱ánʼ ga̱jma̱a̱ dí xúʼko̱ ma̱ndoo mugíʼdi̱i̱xu miʼcha̱ imbo̱o̱ mbiʼi.

Rí muñambáá mbu̱júu̱ náa mutaraʼa, niʼni rí makuwáanʼ mbu̱júu̱ gagi xó má na̱ʼkhá giʼnii. Náa congregación rí kuwaanʼ ruyambáá ni̱jkhá raʼnii itháán mba̱a̱, a̱ngiu̱lú náa Colombia nindxúu̱n gamajkuiin ga̱jma̱a̱ dí ra̱ʼkhá tháán májáanʼ a̱jkiu̱unʼ.

Mijngíí náa Neiva rígá mbaʼa xuajin náa rí nimbáa Testigo nda̱wa̱a̱. Nixmiéjunʼ wéñuuʼ rí xú káʼnii gáʼganúu ajngáa rí májánʼ náa xuajin rúʼko̱. Ma̱ngaa, ga̱jma̱a̱ numuu guerra rí narígá, ga̱jma̱a̱ gamíi rí eʼwíinʼ magún bi̱ na̱nguá kúwíin ikhí. Ikhaa jngó nitajkán rí mani̱ndxu̱u̱ Testigo mbáa xa̱bu̱ náa xuajin rúʼko̱, numuu rí nikumu̱u̱ rí mbaʼyóoʼ maxtaa náa Neiva mú maninuuʼ rí gajkhun. Ikhaa jngó, nitajkáan mbu̱júu̱ mú maʼgánuʼ majngúnʼ iyááʼ ga̱jma̱a̱ rí majmañún itháán ga̱jma̱a̱ numuu Dios ga̱jma̱a̱ rí nda̱wa̱á mata̱nga̱á náa xuajñuu mu maʼtáraʼa ajngáa rí gajkhun. Mú Jeobá gíʼdoo mbá rí maʼni dí nindxu̱u̱ itháán májánʼ.

Gu̱nʼ nda̱wa̱a̱, nigíʼdúu nisngóo Biblia mbáa dxámá bi̱ mbiʼyuu Fernando González, bi̱ xtaa náa Algeciras náa mbo̱o̱ xuajin rí ndawi̱i̱n testigos. Fernando na̱jkha̱ mbá 50 kilómetros (30 millas) asndu náa Neiva mú mañajunʼ. Naʼnirataminaʼ májáanʼ mambáa índo̱ munigajmaa ga̱jma̱a̱ nákhá timbá aʼphu̱ nigíʼdúu ni̱jkhá náa mbá xúgi̱ reunión. Mbá xmáná rí ikhaa niʼnigajmaa, nigíʼdúu nigimbíin tikhuun xa̱bu̱ náa xuajin rúʼko̱ mú masngúún rí xtaa rajmañuu.

Fernando nijngúun iyááʼ gu̱nʼ enero tsiguʼ 1990, ka majun igu̱nʼ nijngoo rí nigíʼdúu niʼnigajmaa Biblia, ga̱jma̱a̱ nda̱wa̱á ninindxu̱u̱ precursor regular. Xúgi̱ rí xtaa mbáa Testigo náa xuajin Algeciras, sucursal nindoo nikuʼmiin a̱ngiu̱lú pre cursores especiales ga̱jma̱a̱ numuu rí nánguá gamíi. Gu̱nʼ febrero tsiguʼ 1992 nigíʼdúu nirígá mbo̱o̱ congregación náa xuajin rúʼko̱.

Mú Fernando na̱nguá niguanúu mú maʼtáraʼa índo̱ náa xuajin Algeciras. Nda̱wa̱á rí ninigúu̱nʼ, ikhaa ga̱jma̱a̱ a̱ʼgiu̱u̱ Olga nigúun gakúwi̱i̱n náa xuajin San Vicente drígóo Caguán náa rí ndawi̱i̱n Testigos. Ikhiin ma̱ngaa niyambáá mú mbaja̱a̱ mbo̱o̱ congregación. Nákhá tsiguuʼ 2002 nixuʼmiin mu muñambáá xóo Circuito ikhaa ga̱jma̱a̱ a̱ʼgiu̱u̱, náa rí kúwi̱i̱n ruyambáá asndu má xúgi̱.

Náa Experiencia rígi̱ nijmañuu rí gíʼdoo wéñuuʼ numuu rí muʼtájkáan ga̱jma̱a̱ numuu rí kaʼyoo náa asignación ndrígulú. Jeobá naʼngo̱o̱ naʼni rí ikháanʼ tséʼngulú guʼni, Ikhaa jngó, ikhaa naʼni rí ma̱jma̱a̱ dí nijuiʼdu, raʼkháa ikháánʼlú (Mat. 9:​38).

Nákhá tsiguʼ 1990, nithúnʼ rí mani̱ndxu̱ʼ Circuito. Timbá kayuuʼ rí ni̱jkuáxu xóo circuito náa xuajin Bogotá. Sirkka ga̱jma̱a̱ ikhúún nini̱ndxu̱xu̱ʼ xa̱bu̱ bi̱ tséjmaʼnuuʼ ni ma na̱nguá kuáʼdaxu wéñuuʼ, ma̱ngaa nimbá nda̱a̱ rí ejmañuxú guni̱. Ikhaa jngó tségúʼunxu makuwaanʼ náa xuajin mbáʼu. Nimíñuxuʼ rí xúni̱ májánʼ ñajunʼ rígi̱. Mú Jeobá niʼnimbánuu rí naʼthí náa Filipenses 2:​13: “Dios nindxu̱u̱ bi̱ naxnála tsiakii mu mu̱ni̱ rí ikhaa nanigu̱u̱ʼ, ma̱ngaa naxnála rí maʼndala mu̱ni̱ ga̱jma̱a̱ tsiakii mu munimbánííla”.

Nda̱wa̱á nixuʼmáanʼ mu̱ʼguáxu náa Medellín, náa xuajin rí niʼthá na̱ʼkhá nigíʼdúu. Ikhí mbaʼin xa̱bu̱ naguʼwún rí muxmijná náa xúgíʼ calle rí asndu nánguá emíñún. Narmáʼáan a̱jkiu̱nʼ rí náa mbá guwáʼ xtáa rasngáa ga̱jma̱a̱ numuu Biblia, índo̱ mbiʼi ma rúʼko̱ náa rexa̱a̱ nigíʼdúu nirmidá xndú ajua̱nʼ. Ikhúún nimiñuu ga̱jma̱a̱ nigíʼ masmbáti̱go̱o̱ mbayííʼ, mú bi̱ xtáa rasngóo xtáa raguxnuu má xúʼko̱ rí asndu xóo nda̱a̱ dí nirígá. Índo̱ niguámbóo niguxnuu, niʼthún rí magajnúu mbáxngaa. Mú índo̱ nitangáa, ni̱ʼkha̱á gajmínʼ a̱jmi̱i̱n ejín májkiinʼ ga̱jma̱a̱ niʼthúnʼ: “Atani̱ mbáá a̱jkia̱a̱nʼ, mú ndiʼyoo maʼga gágui̱i̱n ejín”.

Mú rakháá índo̱ rúʼko̱ gamíi rí niguáʼníí. Mbo̱o̱ mbiʼi kuwaanʼ rutaraʼa náa mambáa guʼwá, índo̱ a̱ʼgiu̱ʼ na̱ʼkhá ragayúʼ náa ikhúún rí asndu na̱nguá ndiʼyoʼ dí maʼnii. Niʼthún rí mbáa nigíʼ maxnuu ga̱jma̱a̱ ajua̱nʼ, ga̱jma̱a̱ ikhúún mangúún nimiñuu. Mú nda̱wa̱á ndi̱ya̱xu̱ dí rakháá ikhaa nigíʼ maxnún, nindoo maxnuu imba̱a̱ xa̱bu̱ bi̱ xtaa ranúnjgóo náa nijniun ikhaa.

Mañu mañu naguʼwunxu ga̱jma̱a̱ numuu gamíi rúʼko̱. Ndiyaridúún a̱ngiu̱xu̱ bi̱ niʼngu̱u̱n ga̱jma̱a̱ rí niguájun jmbu ga̱jma̱a̱ numuu xúgíʼ gamíi rígi̱. Nindxa̱ʼwa̱míjna̱xu rí a mu Jeobá xtaa rañewuunʼ a̱ngiu̱lú bugi̱, xúʼko̱ má gañewunxu ma̱nga̱a̱n. Ninimbuxu̱u̱ má xúʼko̱ ikha ndrígún ancianos bi̱ kúwíin náa congregación, niñewumíjnaxú wéñuuʼ ga̱jma̱a̱ xúgíʼ niniʼñáʼxu náa ñawuun Jeobá.

Nguáná na̱nguá má gamíi xóo kumulú. Mbá xkri̱da, narmáʼáan a̱jkiu̱nʼ índo̱ nijkha gáyóo mbáa, rexa̱a̱ niʼdxawun xóo a̱jmi̱i̱n gu̱ʼu̱ nagiʼdu̱u̱n. Ikhúún na̱nguá nindoʼ magajnúu gáyóo, mú bi̱ goʼwóo nindoo mbaʼyóoʼ. ¡Mú ka nindxúu̱n a̱jmi̱i̱n ñuʼún bi̱ nindxúu̱n loro nuniwíin bi̱ kúwíin ikhí!

Nákhá 1997 nigiúúnʼ mú mayéʼga edxu̱u̱ náa Escuela de Entrenamiento Ministerial. b Niniguʼ maʼgá náa majuiʼsngóoʼ xóo mataraʼa, mú na̱nguá nikumu rí mbóo mbiʼi ikhúún maʼga masngáa.

Nda̱wa̱á ninindxu̱u̱ superintendente ndrígóo distrito. Mú nda̱wa̱á nitangu̱ún ninindxu̱u̱ circuito. Nayéjkha̱ má 30 tsiguʼ xoo bi̱ nasngáa ga̱jma̱a̱ xóo superintendente. Náa xúgí’ ñajunʼ rígi̱ Jeobá niʼnitsajkurámuuʼ, mú nguáná raʼkháa xúgií nagájnuu májánʼ. Náá numuu na̱tha̱ rígi̱ rá.

Ndayóo má rí na̱nguá nindxu̱u̱ mbáa xa̱bu̱ wabaaʼ, mú rúʼko̱ nimbáyuʼ mu maʼngoo náa xkujndu, mú nguáná rúʼko̱ naʼni dí gakhii manimbánuu mbá ñajunʼ dí rígá náa congregación. Mbá xkri̱da, nguáná nathúnʼ gakhii tikhuun a̱ngiu̱lú rí gíʼma maʼndún kuñún ga̱jma̱a̱ makru̱ʼu̱n kuñún eʼwíinʼ a̱ngiu̱lú. Mú rúʼko̱ nindxu̱u̱ cualidades rí ikhúún nda̱yo̱o̱ magúʼdoo (Rom. 7:21-23).

Nguáná naxtáa ngínáa ga̱jma̱a̱ numuu raʼkhí dí nanii (Rom. 7:24). Ra̱ʼkhá tháán naxtáa ngínáa, dí mbó miʼtsu nithúún Jeobá rí itháan májánʼ rí maniʼñúuʼ ranindxu̱u̱ misionero ga̱jma̱a̱ mathangu̱u̱nʼ Finlandia. Mú mbiʼi rúʼko̱ dí nidxúún náa reunión nimbáyúu mu xániʼñúuʼ ra̱ni̱ ñajunʼ ndrígóo ga̱jma̱a̱ mariʼkhuu xóo xa̱bu̱ nindxu̱u̱. Nditháan xámbumuu xóo Jeobá niriʼña oración ndrígóo. Ga̱jma̱a̱ naxnáa wéñuuʼ numaaʼ numuu rí nimbáyúu ga̱jma̱a̱ ngajua mu mariʼkuminaʼ.

Sirkka ga̱jma̱a̱ ikhúún na̱nguá kuaʼdáá ajngáa mu muxnáa numaaʼ Jeobá ga̱jma̱a̱ numuu rí niniñuxu muni̱ kájxi̱ ñajunʼ. Ma̱ngaa naxnáa wéñuuʼ numaaʼ numuu rí nixniúu mbáa a̱ʼgiu̱ʼ bi̱ nandoo kaʼyoo ga̱jma̱a̱ nimbáyúu náa xúgi̱ tsiguʼ rí ninújngoo.

Inu mbayáa 70 tsiguʼ, ikhaa jngó maniʼñúuʼ rasngáa ga̱jma̱a̱ maniʼñúuʼ ranindxu̱u̱ superintendente. Mú na̱nguá ejmu̱u̱, numuu rí ndayóo rí matayamajkuíí Jeobá na̱nguá eyóoʼ maraʼdaa wéñuuʼ ñajunʼ náa xuajñuu. Rí itháan gíʼdoo numuu nindxu̱u̱ rí muʼni ñajuunʼ xó má eʼngulú ga̱jma̱a̱ mbuʼyamajkuíí ga̱jma̱a̱ xúgíiʼ a̱jkiu̱lú (Miq. 6:8; Mar. 12:32-34).

Náa xúgi̱ mbiʼi rí nixtáa ra̱ʼkhá tháán nagui̱i̱ xóo Jeobá niʼnitsajkurámuuʼ. Mú ra̱ʼkhá ga̱jma̱a̱ numuu rí ikhúún itháán najmúu o itháán najmañuʼ ki xóo eʼwíinʼ, numuu rí maski asndu rígá mbaʼa náa najngawu̱u̱n, Jeobá nixnúu ñajunʼ rúʼko̱ numuu rí májánʼ wéñuuʼ a̱jkiu̱u̱n. A mu na̱nguá nimbáyúu nditháan xáʼngo̱o̱ gánimbánuu ñajunʼ rí gúʼdoo. Ma̱ndoo ma̱ta̱ rí tsiakii ndrígóo Dios niʼni dí maʼnii a̱jkiu̱nʼ (2 Cor. 12: 9).