1. Xú káʼnii ku̱mu̱ún tikhuun índo̱ nagájnún gutaraʼa rá. (Atayáá ma̱ngaa xtiʼkhuu.)

 BI̱ NINDXU̱LÚ xa̱bi̱i̱ Jeobá nuʼtáraʼa numuu rí nandulúʼ kuʼyáá anu̱lú bi̱ xtaa mekhuíí ga̱jma̱a̱ nandulúʼ dí xa̱bu̱ maguanu muniʼniiʼ. Mbaʼin a̱ngiu̱lú nanigúun muʼtáraʼa mú eʼwíinʼ tsénigunʼ. Náá numuu rá. Numuu rí tikhuun natiñu̱u̱n ga̱jma̱a̱ tsénigunʼ muthi wéñuuʼ. Tikhuun tsénigunʼ magúun gúñún xa̱bu̱ náa guʼwún ga̱jma̱a̱ namiñuu rí xúdriguíin, ma̱ngaa eʼwíinʼ nijuisʼgúún dí ragíʼmaa magi̱ʼdu̱u̱n gajmiún eʼwíinʼ. Mú xúgíinʼ ikhiin nandún kuyáá wéñuuʼ Jeobá, mú naniuʼ gakhii muʼtáruʼun ajngáa rí májánʼ xa̱bu̱ bi̱ tséniʼnúunʼ. Numuu rí nduyáá dí ra̱ʼkhá tháán gíʼdoo numuu ñajunʼ rígi̱, ikhaa jngó nuni xó má eʼngo̱o̱ mu muʼtáraʼa. ¡Ra̱ʼkhá tháán gagi xtaa Jeobá ga̱jma̱a̱ numún ikhiin!

2. Ndíjkha ragíʼmaa majmaaʼ a mu naʼniaʼ gakhii dí marataráʼa rá.

² Ikháán rá. Lá tsénigua marataraʼaa rá. Rí naratáraʼa maski asndu tséniguá nasngájmaa rí nindxa̱a̱ʼ mbáa xa̱bu̱ guabaaʼ. Mbáa numuu rí tsíyááʼ dí xa̱bu̱ mbuyáaʼ rí xóo naratámíjná gajmiáanʼ eʼwíinʼ náa naratáraʼa, ma̱ngaa nimbáa tsénigu̱u̱ʼ rí xúdríguíi náa naʼtáraʼa numuu dí i̱ndó nandulúʼ mumbañún xa̱bu̱. Jeobá nakro̱ʼo̱o̱ májánʼ xkujndu dí nuʼraníí ga̱jma̱a̱ ikhaa nandoo mambáyulú (Is. 41:13). Náa artículo rígi̱ mbuʼyáa mbá witsu enii rí ma̱ndoo mambáyulú mu xámiñulúʼ ga̱jma̱a̱ manigulúʼ rí muʼtáraʼa.

GUNIÑÁA RÍ AJNGÁ RAWUUNʼ DIOS MAXNULÚ TSIAKII

3. Náá nikánaa tsiakii Jeremías mu maʼtáraʼa rá.

³ Mbayuuʼ má tsiguʼ Ajngá rawuunʼ Dios nimbañúu̱n xa̱bi̱i̱ índo̱ niguáʼdaa mbá ñajunʼ gakhii rí muni̱. Guʼyáá  ga̱jma̱a̱ numuu profeta Jeremías, índo̱ Jeobá nikuʼmaa maʼga gátaraʼa, ikhaa nimiñuu ga̱jma̱a̱ niʼthí: “Ikhúún tséjmún gáthá. Kaʼnii ni̱ndxu̱ʼ mbáa dxámá” (Jer. 1:6). Ndiéjunʼ nimbáyúu mu xámíñúʼ xáʼ. Nikána tsiakii náa Ajngá rawuunʼ Dios, niʼthí: “Ajngóo nigutajxi̱i̱ xóo aguʼ náa awúu̱n a̱jkiu̱nʼ xóo mbá aguʼ rí nakha asndu náa awúu̱n itsuʼ, nánguá niʼngo̱ʼ itháan rí maʼni wíyú” (Jer. 20:​8, 9) Náa niʼtáraʼaʼ Jeremías ninindxu̱u̱ gakhii wéñuuʼ, mú ajngáa rí nijkha kayóo nixnúu tsiakii mu maʼnimbánuu ñajunʼ ndrígóo.

4. Xú káʼnii embáyulú rí muraxnuu Biblia ga̱jma̱a̱ mundxaʼwamíjná rí naʼthí ikhí rá. (Colosenses 1:​9, 10.)

⁴ Bi̱ nindxu̱lú cristiano mangáánʼ nambáyulú wéñuuʼ Ajngá rawuunʼ Dios. I̱ndó apóstol Pablo niʼniramaa náa inún cristianos bi̱ nikuwa náa Colosas, niʼthún dí kúmáa kájxi̱ ma̱ndoo mambáñun mu muni̱ “xó má nanigu̱u̱ʼ Jeobá” ga̱jma̱a̱ muni̱ “má xúʼko̱ ñajunʼ rí májánʼ” (atraxnuu Colosenses 1:​9, 10). Ñajunʼ rí májánʼ nindxu̱u̱ dí muʼtáraʼa. Xó má eʼyáá, índo̱ nuraxnuu Biblia ga̱jma̱a̱ nundxaʼwamíjná rí naʼthí ikhí, naʼni itháan gujkhuʼ fe ndrígulú náa Jeobá ga̱jma̱a̱ na̱jkuánu nduyáá dí gíʼdoo wéñuuʼ numuu mú muʼtáraʼa ga̱jma̱a̱ numuu Reino.

5. Ndiéjunʼ gambáyúlú mu manigulúʼ muʼnigajmaa Biblia rá.

⁵ Mu manigulúʼ munigajmaa Biblia, xándoo ka muraxnuu o mundxaʼwamíjná mbá nacha̱ dí na̱ʼkhá raʼthí. Ndiéjunʼ gándoo guʼni rá. Mbá xkri̱da, a mu nuxkamaa mbá texto rí tsékruʼulú ma̱ndoo mbuʼyáa ndiéjunʼ eyoo gáʼthúnʼ versículo rúʼko̱ náa Índice de las publicaciones Watch Tower o náa Ikha rí munigajmaa xa̱bi̱i̱ Jeobá. A mu natriyáa mbiʼi mu matanigajmaa itháan, rúʼko̱ gaʼni dí mi̱dxu̱ʼnú matayaa rí gajkhun nindxu̱u̱ rí naʼthí náa Ajngá rawuunʼ Dios (1 Tes. 5:21). Ga̱jma̱a̱ rúʼko̱ gaʼni rí itháan ganigua̱ʼ marathu̱u̱n eʼwíinʼ ga̱jma̱a̱ numuu rí nijmañaʼ.

ATANIRATAMINAʼ MÁJÁNʼ MÚ MARATARÁʼA

6. Ndíjkha dí gíʼma muʼniratamijná májánʼ mu muʼtáraʼa rá.

⁶ A mu nátanirataminaʼ májánʼ mu marataráʼa, mbáa itháán ganigua̱ʼ maratamíjná gajmián xa̱bu̱. Jesús niʼniratiin xa̱bi̱i̱ nakha xóó tsékumíin magúun guʼtáraʼa  (Luc. 10:​1-11). Ga̱jma̱a̱ ikhiin nigímíjna muni̱ rí Jesús niʼsngúún, rúʼko̱ niʼni rí makuwa gagi ga̱jma̱a̱ numuu xúgií rí niʼngu̱u̱n nini̱ (Luc. 10:17).

7. Xú káʼnii gándoo guʼni ratamíjná mu muʼtáraʼa rá. (Atayáá ma̱ngaa xtiʼkhuu.)

⁷ Xú káʼnii guʼni ratamíjná mu muʼtáraʼa rá. Gíʼma mbuyáá májánʼ xú káʼnii guʼthá ajngáa rí májánʼ ga̱jma̱a̱ ajngúlú ikháanʼ. Ma̱ngaa májánʼ gaʼni rí mundxaʼwamíjná wapha xú káʼnii guríʼñulú xa̱bu̱ náa najkua̱lú guʼtáraʼa, ma̱ngaa ndiéjunʼ gándoo guʼthá ikháanʼ. Rúʼko̱ gaʼni rí índo̱ guʼtámíjná gajmiúlú xa̱bu̱ xámiñúlú, mundu̱ʼwa̱ ga̱jma̱a̱ muʼthá ajngáa gua̱ba̱ʼ.

8. Xú káʼnii embrígui̱i̱n cristianos ga̱jma̱a̱ daan ku̱ba̱ʼ rá.

⁸ Apóstol Pablo nijmuu mbá xkri̱da mu maʼthí ndiéjunʼ ñajunʼ kuáʼdáá ikháanʼ náa nuʼtáraʼa, niʼthí: “Kuaʼdáá rí gíʼdoo wéñuuʼ numuu náa daan ku̱ba̱ʼ” (2 Cor. 4:7). Ndiéjunʼ nindxu̱u̱ dí gíʼdoo wéñuuʼ numuu rígi̱ rá. Nindxu̱u̱ rí najuiʼtáraʼa ajngáa rí májánʼ ga̱jma̱a̱ numuu Reino rí maʼni káwíin xa̱bu̱ (2 Cor. 4:1). Ga̱jma̱a̱, tsíin nindxúu̱n daan ku̱ba̱ʼ rá. Nindxu̱lú ikháanʼ xa̱bi̱i̱ Dios bi̱ najkua̱lú guʼtáraʼa. Nákhá nixtáa Pablo, bi̱ nugujua̱ nagún kudúún náa daan ku̱ba̱ʼ tikhuu dí gíʼdoo wéñuuʼ numuu xó ganitsu, vino o mbújkha̱ʼ. Rí mbiʼi xúgi̱ Jeobá nixnúlú mbá ñajunʼ dí gíʼdoo wéñuuʼ numuu muʼni: Nindxu̱u̱ rí muʼtáraʼa ajngáa rí májánʼ. Ikhaa má gáxnulú tsiakii mu muʼnimbánii ñajunʼ rígi̱.

ATANDA̱ʼA̱A̱ DIOS RÍ MAMBÁYÁAʼ

9. Ndiéjunʼ gándoo gámbáyulú mú xámíñulú gúni xa̱bu̱ náa nuʼtáraʼa rá. (Atayáá ma̱ngaa xtiʼkhuu.)

⁹ Mbáa nguáná namíñulú índo̱ xa̱bu̱ tsiñúúnʼ gudxuun náa nuʼtáraʼa. Ndiéjunʼ gándoo gámbáyulú mu xámiñúlú rá. Gundxaʼwamíjna̱ ga̱jma̱a̱ numuu rí nitajkháan xa̱bi̱i̱ Jesús índo̱ nithúún rí muniñaʼ rutaraʼa. Ikhiin tuniñaa rí gamíi marikun, ikhaa jngó ninda̱ʼa̱ Jeobá rí mambáñun mu muʼtáraʼa má xúʼko̱ Ajngá rawuunʼ ga̱jma̱a̱ rí xámíñún, ga̱jma̱a̱ ikhaa niriʼña mbá nacha̱ rí nitajkháan (Hech. 4:​18, 29, 31). Índo̱ gamiñulú gúni xa̱bu̱ gúnda̱ʼa̱a̱ Jeobá rí mambáyulú. Xúʼko̱, guʼtháán rí mambáyulú mu xámiñúlú  gúni xa̱bu̱ ga̱jma̱a̱ xúʼko̱ musngajma rí nandulúʼ kuʼñúún.

10. Ndiéjunʼ gámbáyulú mu muʼnimbánii ñajunʼ rí kuáʼdáá xóo testigos de Jeobá rá. (Isaías 43:​10-12.)

¹⁰ Jeobá niraʼwáánlú mu manindxu̱lú Testigos ndrígóo (atraxnuu Isaías 43:​10-12). a Ga̱jma̱a̱ nakudaminaʼ dí mambáyulú. Gutanga̱ánʼlú mbuʼyáá a̱jkhu̱ eʼni̱i̱ rí xóo nambáyulú. Timbá, Jesús xtáa ga̱jma̱a̱ nindxu̱lú náa najkua guʼtáraʼa (Mat. 28:​18-20). Ragajma, Jeobá nigruiguíin ángeles ndrígióo mú mumbayulúʼ (Apoc. 14:6). Ragatsu, Jeobá naxnúlú xi̱ʼ kaʼwu ndrígóo dí nambáyulú mu marmáʼán a̱jkiu̱lú dí nijmañulúʼ (Juan 14:​25, 26). Rí maʼni a̱jkhu̱, Jeobá naxniulúʼ a̱ngiu̱lú xa̱bekha ga̱jma̱a̱ gu̱ʼu̱ mú magúun ga̱jma̱a̱ nindxu̱lú. Rí nambáyulúʼ Jeobá ga̱jma̱a̱ dí numbáyulú a̱ngiu̱lú naʼni rí maʼngulú muʼni ga̱jma̱a̱ rí namíñulú mutaraʼa.

GAGUWÁN GA̱JMA̱A̱ ATAYÁÁ NÁA RÍ MÁJÁNʼ

11. Ndiéjunʼ gátani̱ ikháán mu maratarúʼún itháan xa̱bu̱ rá. (Atayáá ma̱ngaa xtiʼkhuu.)

¹¹ Lá naʼni majmaa rí na̱nguá etaxkamiin xa̱bu̱ náa guʼún rá. A mu xúʼko̱, atrajxi̱mínáʼ: “Náá nigún xa̱bu̱ xúgi̱ rá. Lá nigún guñajunʼ o nigún gútsi xáʼ.” (Hech. 16:13.) Ikhú atagíminaʼ marataruʼun xa̱bu̱ bi̱ nagún náa kamba̱a̱. Mbáa ndxájulú bi̱ mbiʼyuu Joshua naʼthí: “Nagájnuu májánʼ rí nataruʼun xa̱bu̱ bi̱ nanujgún náa naxtagojo̱o̱ ga̱jma̱a̱ náa naguájun carro”. Ikhaa ga̱jma̱a̱ a̱ʼgiu̱u̱ Bridget, nuxkamiin itháan xa̱bu̱ náa guʼwún índo̱ nagún gúñún rí wakhííʼ ga̱jma̱a̱ rí wakhaʼ domingo (Efes. 5:​15, 16).

12. Xú káʼnii gándoo gúʼyáá dí nunimbún xa̱bu̱ ga̱jma̱a̱ ndiéjunʼ rí nanigúnʼ mudxa̱wíín xáʼ.

¹² A mu xa̱bu̱ tsíñún gúdxuun ajngáa rí na̱jkuá kuyulú, gúgimíjna̱ mbuʼyáá ndiéjunʼ rí nunimbún ga̱jma̱a̱ rí naʼni maxmiéjunʼ. Joshua ga̱jma̱a̱ Bridget najmún grajxe̱ rí nakha náa inu tratados. Mbá  xkri̱da, índo̱ nuxnajxi̱ tratado, Xú káʼnii tayáá Biblia ikháánʼ rá. Nuthí: “Tikhuun xa̱bu̱ nunimbún rí Biblia na̱ʼkhá náa Dios, mú eʼwíinʼ na̱nguá, ndiéjunʼ rathá ikháán rá”. Xígi̱ káʼnii naʼngu̱u̱n nutamijná gajmiún mbaʼin xa̱bu̱.

13. Xú káʼnii gándoo gákuwán gagi náa nuʼtáraʼa maski asndu tsiñúúnʼ gúdxawunlú xáʼ. (Proverbios 27:11.)

¹³ Tséʼniuʼ a mu nuxkamiin xa̱bu̱ o na̱nguá, rí gíʼdoo itháan numuu nindxu̱u̱ rí muʼnimbáníí ñajunʼ rí Jeobá ga̱jma̱a̱ Jesús endu̱ʼu̱lúʼ muʼni: Rí muʼtáraʼa (Hech. 10:42). Ikha jngó, á mu tséxkamaa nimbáa xa̱bu̱ mutamijná gajmiúlú o tsédríguu ajngáa rí najkua kuyulú, ma̱ndoo makuwalu gagi numuu rí nuʼni maxtáa gagi anu̱lú bi̱ xtaa mekhuíí (atraxnuu Proverbios 27:11). b

14. Xu káʼnii kuʼwáʼ índo̱ mbáa publicador naxkamaa mbáa bi̱ naniguʼ maʼnigajmaa Biblia, ga̱jma̱a̱ náá numuu rá.

¹⁴ Ma̱ngaa ma̱ndoo makuwaanʼ gagi índo̱ mbáa publicador naxkamaa mbáa bi̱ nagruigú maʼnigajmaa Biblia. Náa i̱yi̱i̱ʼ Bi̱ Nayejngoo naʼnimbríguii ñajunʼ ndrígulú ga̱jma̱a̱ índo̱ nduyáá mbáa ada̱ bi̱ nindutíga. Mbá xúgíinʼ nduyáá, ga̱jma̱a̱ índo̱ nakujmaa ada̱ mbá xúgíinʼ nakuwa gagi, ra̱ʼkhá i̱ndó xa̱bu̱ bi̱ nixkamaa. Xúʼko̱ má nindxu̱u̱ rí mbuʼñíinʼ xa̱bu̱ mu mani̱ndxu̱u̱n xa̱bi̱i̱ Dios, xúgiáanʼ nakuwáanʼ gagi índo̱ mbáa nagíʼdu̱u̱ na̱jkhá reunión.

ATANII GA̱JMA̱A̱ NGAJUA

15. Ndiéjunʼ gándoo gambáyulúʼ mu makuwan gagi má xúʼko̱ náa nuʼtáraʼa rá. (Mateo 22:​37-39; atayáá xtiʼkhuu .)

¹⁵ Itháan ganigulúʼ muʼtáraʼa a mu nandulúʼ kuʼyáá Jeobá ga̱jma̱a̱ nandulúʼ kuʼñúún xa̱bu̱ (atraxnuu Mateo 22:​37-39). Atatsaʼwáminaʼ xú káʼnii gagi xtaa Jeobá índo̱ ndayúlú nuʼtáraʼa ga̱jma̱a̱ xu káʼnii gagi kuwíinʼ xa̱bu̱ bi̱ nuguáʼdi̱i̱ nuniga̱jma̱a̱ Biblia. Ga̱jma̱a̱ xámbumaaʼ dí bi̱ nundrigú ajngáa rí májánʼ maguma káwíin (Juan 6:40; 1 Tim. 4:16).

16. Xú káʼnii gándoo manigulúʼ rí muʼtáraʼa maski asndu xándoo magajnulúʼ náa guʼulúʼ rá. Aratá mbá xkri̱da.

¹⁶ Á mu ikháán tséndooʼ gaʼtagájná náa  guʼwá rá. Atayáá rí ma̱ndoo matani mu matasngájmaa rí nandaʼ xtayáá Jeobá ga̱jma̱a̱ rí nandaaʼ xtañún xa̱bu̱. Índo̱ nirígá nandii COVID-19, Samuel ga̱jma̱a̱ Dania ndiyóoʼ maguanúʼ náa guʼwún. Náa xúgi̱ tsiguʼ mijgíjyúu rúʼko̱ nitaraʼa ga̱jma̱a̱ teléfono, niniraʼmáʼ cartas ga̱jma̱a̱ nijmuʼ Zoom mu musngáa ga̱jma̱a̱ numuu Biblia. Ma̱ngaa Samuel niʼtáraʼaʼ náa clínica, náa naguma thanáá ga̱jma̱a̱ numuu nandii cáncer. Ikhaa naʼthí: “Xkujndu naʼni maraxtaa ngíná, naʼni néʼnga̱ʼ ga̱jma̱a̱ naʼni manduʼtigá fe. Ikhaa jngó, ndiyúxu gagi rí naʼni makuwáanʼ rí muni̱ ñajunʼ Jeobá”. Ma̱ngaa ikhú má Dania nixpátri̱ga̱a̱ ga̱jma̱a̱ nánguá nindoʼ matujxu̱u̱ ga̱jma̱a̱ nda̱wa̱á ndiyóoʼ majmuu silla de ruedas mbá majun igu̱nʼ. Ikhaa naʼthí: “Niʼniminaʼ ma̱ni̱ asndu xó má eʼngo̱o̱, nindoo nitaroʼoʼ enfermera bi̱ na̱ʼkhá gáyóo ga̱jma̱a̱ nitamíjná gajmii bi̱ naguwaʼ kudúún rí nagujua̱ náa goʼwóo. Ma̱ngaa nitamijná gájmuʼ náa teléfono mbáa bi̱ kayá edxu̱u̱ náa guʼwá thana”. Gajkhun ma dí Samuel ga̱jma̱a̱ Dania nánguá niʼngu̱u̱n gúni itháan mu mutaraʼa, mú nini xúgi̱ xó má eʼngu̱u̱n, rúʼko̱ niʼni makuwá gagi wéñuuʼ.

17. Xú káʼnii gándoo gámbáyulú itháan májánʼ ikha rí nijmañulúʼ náa artículo rígi̱ rá.

¹⁷ Á mu nuʼnimbáníí mbá xúgíʼ ikha rí na̱ʼkhá náa artículo rígi̱, magajnúu itháan májánʼ ñajunʼ rí guʼni. Mambáa ikha nindxu̱u̱ xóo rí najti mu maguma májánʼ mbá ganitsu, a mu najti mbá xúgií, ganitsu magajnúu itháan miʼtsí. Á mu nugímíjná muʼnimbáníí xúgíʼ ikha rí nijmañulúʼ maʼngulú muʼni gajmiúlú rí namíñulú muʼtáraʼa ga̱jma̱a̱ manigulúʼ itháan mutaraʼa.