Rí naʼthí náa Mateo ga̱jma̱a̱ Lucas rí xú káʼnii nixtáa Jesús mixtiʼkhu nindxu̱u̱ numuu rí mámbáa niʼnirámáʼ xó má ndiʼyoo.

Mateo naʼthí itháan ga̱jma̱a̱ numuu José. Naʼthí xú káʼnii niʼni índo̱ ndiʼyoo rí María kagu̱ ewáan ada̱, xnuʼndaa náa rí mbáa ángel niʼthúu̱n rí nirígá ga̱jma̱a̱ xú káʼnii niʼnimbo̱o̱ ikha rí nixnúu ángel (Mat. 1:19-25). Mateo ma̱ngaa naʼthí rí mbáa ángel niʼthúu̱n José rí maʼgá náa Egipto gajmíi̱n bi̱ kuwa náa goʼwóo ga̱jma̱a̱ niʼnimbo̱o̱. Ma̱ngaa, naʼthí rí náa imbo̱o̱ xnuʼndaa mbáa ángel niʼthúu̱n mata̱nga̱a̱ náa ku̱ba̱ʼ ndrígóo Israel ga̱jma̱a̱ ikhaa nitanga̱a̱ ga̱jma̱a̱ nixtáa náa Nazaret (Mat. 2:13, 14, 19-23). Náa timbá ga̱jma̱a̱ raga̱jma̱ capítulos rí na̱ʼkha̱ náa Evangelio ndrígóo Mateo, mbiʼyuu José naʼthí juwan nuthu, mú mbiʼyuu María káaʼ a̱jkhu̱ nuthu.

Lucas niʼnirámáʼ itháan ga̱jma̱a̱ numuu María. Naʼthí rí ángel Gabriel ni̱jkha̱ gáʼyoo ga̱jma̱a̱ rí ikhaa ni̱jkha̱ gáʼyoo Elisabet ga̱jma̱a̱ niʼni mba̱a̱ Jeobá (Luc. 1:26-56). Ma̱ngaa naʼthí rí Simeón niʼthúu̱n María xú káʼnii gamiéjunʼ rí gágíʼnuu Jesús. Ga̱jma̱a̱ rí nirígá índo̱ Jesús gíʼdoo mbá 12 tsiguuʼ ga̱jma̱a̱ rí ni̱jkha̱ náa templo gajmíi̱n bi̱ kuwa náa goʼwóo, Lucas naʼthí rí niʼthí María, raʼkháa rí niʼthí José. Ma̱ngaa naʼthí rí xúgíʼ rígi̱ niyéxi̱i̱ náa awúu̱n a̱jkiu̱u̱n (Luc. 2:19, 34, 35, 48, 51). Náa timbá ga̱jma̱a̱ raga̱jma̱ capítulos rí naʼthí náa Evangelio ndrígóo Lucas, mbiʼyuu María nakujmaa mbá 12 nuthu, mú mbiʼyuu José káaʼ 7 nuthu. Ikha jngó Mateo naʼthí itháan rí nindxa̱ʼwáminaʼ ga̱jma̱a̱ rí niʼni José, mú Lucas naʼthí rí nindxa̱ʼwáminaʼ ga̱jma̱a̱ rí niʼni María.

Ga̱jma̱a̱ xóo ikhiin niniraʼmáʼ mbiʼñún xa̱bu̱ bi̱ niguwáʼ rakuwa mixtiʼkhu ninindxu̱u̱. Mateo naʼthí ga̱jma̱a̱ numún xa̱bu̱ guaniuu José ga̱jma̱a̱ nasngájma rí Jesús, numuu rí ninindxu̱u̱ a̱ʼdióo José, kaʼyoo mbayáa ñajunʼ ndrígóo rey David. Náa numuu rá. Numuu rí José ninindxu̱u̱ bi̱ ni̱ʼkha̱ náa rey David náa a̱ʼdióo Salomón (Mat. 1:6, 16). Mú Lucas naʼthí ga̱jma̱a̱ numún xa̱bu̱ guaniuu María ga̱jma̱a̱ nasngájma rí Jesús kaʼyoo mbayáa ñajunʼ ndrígóo rey David, “náa xuwiʼ” (Rom. 1:3). Náa numuu rá. Numuu rí María ni̱ʼkha̱ náa rey David náa imba̱a̱ a̱ʼdióo, bi̱ mbiʼyuu Natán (Luc. 3:31). Á mu María ninindxu̱u̱ wáxioo Helí, náa numuu rí Lucas naʼthí rí ninindxu̱u̱ José rá. Numuu rí xóo phú nuraxi̱i̱ mbiʼñún xa̱bu̱ bi̱ niguwáʼ rakuwa ninindxu̱u̱ i̱ndó mbiʼñún xa̱bekha. Ikha jngó, índo̱ Lucas naʼthí rí José nindxu̱u̱ a̱ʼdióo Helí, nakru̱ʼu̱lú rí nindxu̱u̱ nigiúnʼ (Luc. 3:23).

Listas náa na̱ʼkha̱ mbiʼñún xa̱bu̱ bi̱ niguwáʼ rakuwa rí niʼnirámáʼ Mateo ga̱jma̱a̱ Lucas nasngájma kaʼwu rí Jesús ninindxu̱u̱ Mesías bi̱ nijuiʼthá ma̱ʼkha̱. Mbaʼin ndiyáá rí Jesús ni̱ʼkha̱ náa David asndu fariseos ga̱jma̱a̱ saduceos ndiyáá rígi̱ ga̱jma̱a̱ na̱nguá xóo muthi dí ragájkhun nindxu̱u̱. Xúgi̱, nájma̱ lista rígi̱ náa nigumaraʼmáʼ mbiʼñún xa̱bu̱ xóó gíʼdoo wéñuʼ numuu mu muguaʼdáá itháan fe ga̱jma̱a̱ naʼni makumulúʼ kuʼyáá itháan Dios rí ikhaa maʼnimbánuu rí nikudaminaʼ.