• “Nindxu̱u̱ xóo a̱jmbio̱ʼ nángi eʼni naʼni nduwúúnʼ”.

• “Naku̱mu̱ʼ rí tséyamajkhuʼ, rí na̱nguá tsiʼñúún ga̱jma̱a̱ dí nda̱a̱ numuu nditháan”.

• “Xándoo mathu̱u̱n eʼwíinʼ dí egíʼnuʼ. I̱ndó má ikhúún e̱yo̱o̱ dí nixtáá ngíná”.

• “Nijkhánú nikumu̱u̱ dí Jeobá tsixmiéjunʼ kaʼyoʼ”.

Ajngáa rígi̱ dí tima rijma̱a̱, xúʼko̱ naku̱mu̱u̱ mbáa a̱ʼgu̱ índo̱ ajmbio̱o̱ ndaʼyoo pornografía. a Á mu mbáa xa̱biya̱ ndaʼyoo nguʼwáá pornografía mbayuuʼ igu̱nʼ o tsiguʼ, a̱ʼgu̱ asndu gamíi dí nánguá maku̱mu̱u̱ kaʼyoo mbu̱júu̱ ajmbio̱o̱. Xó má nirajximínáʼ mbáa a̱ʼgu̱: “Tsáa lá nindxu̱u̱ xa̱bu̱ bi̱ ndi̱ya̱a̱ rá. Lá rígá imbo̱o̱ dí xóó tséʼthí xá.”

Lá ajmbia̱a̱ʼ ndaʼyoo pornografía ráʼ. b Artículo rígi̱ mambáyáaʼ. Gi̱i̱ mataxkamaa ikha dí na̱ʼkha̱ náa Biblia mu maʼni̱i̱ a̱jkia̱a̱nʼ, mu ma̱ta̱ya̱a̱ dí Jeobá xtáa ga̱jma̱á nindxa̱a̱ʼ ma̱ngaa mambáyáaʼ mu maraxtaa tsímáá ga̱jma̱a̱ mu mambajxáaʼ itháán májánʼ ga̱jma̱a̱ Jeobá. c

Gajkhun má dí xándoo maratha̱a̱n ajmbia̱a̱ʼ xúgíʼ dí gíʼmaa maʼni, mú ma̱ndoo mataʼyáʼ dí matani mu maraxtaa tsímáá. Gi̱i̱ mataxkamaa tikhu dí mambáyáaʼ.

Xáku̱ma̱ʼ dí ikháán aʼkháanʼ. A̱ʼgu̱ ma̱ndoo maku̱mu̱u̱ dí ikhaa aʼkhúun numuu rí ajmbio̱o̱ ndaʼyoo pornografía. Guʼyáá xkridoo Alice d ikhaa naʼthí: “Nindxa̱ʼwáminaʼ dí ajmbio̱o̱ ndaʼyoo dí na̱nguá tsíʼyáa, ikha jngóo nirajximínáʼ, náá numuu dí a̱jmbio̱ʼ nanigu̱u̱ʼ mbaʼñúún itháán eʼwíinʼ gu̱ʼu̱ ki xóo ikhúún rá”. Ga̱jma̱a̱ Daniela naʼthí: “Ra̱ʼkhá tháán ekiʼnún dí ikhaa ndaʼyoo má xúʼko̱ pornografía. Asndu niku̱mu̱ʼ dí ikhúún nani̱ gachúu dí niʼdamijná ga̱jma̱a̱ numuu xóo na̱ni̱”.

Á mu naku̱ma̱a̱ʼ dí aʼkháanʼ ikháán, garmáʼáan a̱jkia̱a̱nʼ dí Jeobá tsékumu̱u̱ xúʼko̱ kaʼnii. Santiago 1:14 naʼthí: “Mámbáa natriga̱ dí ra̱májánʼ náa  inuu ga̱jma̱a̱ naxkajxi̱minaʼ maʼni xó má rí nagua̱ʼa̱ maʼni” (Rom. 14:12; Filip. 2:12). Ikha jngóo Jeobá tséʼthi dí aʼkháanʼ ikháán, dí itháán nanigu̱u̱ʼ ikhaa nindxu̱u̱ dí natayamajkuíí ga̱jma̱a̱ mbá a̱jkia̱a̱nʼ káxi̱ (2 Crón. 16:9).

Mbáa a̱ʼgu̱ ma̱ndoo maku̱mu̱u̱ dí ajmbio̱o̱ ndaʼyoo pornografía numuu dí ikhaa na̱nguá tsíʼyáa. Mú ragájkhun rígi̱. Mbaʼin xa̱bu̱ bi̱ najmañún nuthi dí nimbá a̱ʼgu̱ ma̱ndoo maʼni xúgíʼ dí na̱ʼkha̱ ikhí.

Xatatsaʼwamínáʼ wéñuuʼ. Catherine eʼthí dí tsejtsí mbiʼi nindxa̱ʼwáminaʼ ga̱jma̱a̱ numuu dí ajmbio̱o̱ numuu rí ndaʼyoo pornografía. Frances eʼthí: “Ra̱ʼkhá tháán najmúʼ índo̱ tséyóo náa xtáa a̱jmbio̱ʼ, naxmiéjunʼ xúgíʼ mbiʼi”. Eʼwíinʼ gu̱ʼu̱ ra̱ʼkhá tháán natiñu̱u̱n índo̱ kúwíin gajmiún a̱ngiu̱lú bi̱ nduyáá xú káʼnii eʼni ajmbiu̱ún. Ga̱jma̱a̱ eʼwíinʼ nakumu̱ún dí ndawa̱a̱ tsáa makro̱ʼo̱o̱ xóo kúwíin.

Gajkhun má dí nagawáanʼ, mu á mu naxmiéjuanʼ má xúʼko̱, rúʼko̱ maʼni dí majmáanʼ itháan. Itháán májánʼ dí matatsaʼwamínáʼ xóo embájxa̱a̱ʼ ga̱jma̱a̱ Jeobá, numuu dí rígi̱ maxnáa tsiakii (Sal. 62:2; Efes. 6:10).

Xú káʼnii gámbáyáaʼ dí matraxnuu Biblia ga̱jma̱a̱ rí matatsaʼwamínáʼ dí nitraxnuu rá. Ikhí ma̱ndoo mataxkamaa xkridún gu̱ʼu̱ bi̱ niraʼníí xkujndu mingíjyúuʼ, ga̱jma̱a̱ niʼni̱i̱ a̱jkiu̱ún nda̱wa̱á rí nitháán Jeobá xúgíʼ dí ku̱mu̱ún. Maski ajndu ikhaa nguáná na̱nguá niʼni jngudi̱i̱ xkujndu dí niguaʼdáá, mú niʼni rí makuwíin tsímáá. Garmáʼáan a̱jkia̱a̱nʼ dí Ana “nixmiéjunʼ wéñuʼ”. Ikhaa “ndijyúuʼ mba̱yu̱u̱ʼ niʼtákáñuu Jeobá” ga̱jma̱a̱ nixtáa tsímáá maski ajndu ikhaa xóo tséʼyoo xú káʼnii maguma mbáníí xkujndu ndrígóo (1 Sam. 1:10, 12, 18; 2 Cor. 1:3, 4).

Atanda̱ʼa̱ dí mumbayáaʼ bi̱ kuya̱ edxu̱u̱. Ikhiin mani̱ndxu̱ún “xóo náa nurkaʼumijná índo̱ naxnúu giñánʼ gakhi̱i̱ ga̱jma̱a̱ xóo náa nutawu̱nʼ índo̱ naxnúu wéñuʼ ruʼwa” (Is. 32:2). Mbáa asndu muthaanʼ dí mataʼyáaʼ mbáa ndxájulú a̱ʼgu̱ mu maratha̱a̱n xú káʼni phú ku̱ma̱a̱ ga̱jma̱a̱ ikhaa maxnáaʼ tsiakii (Prov. 17:17).

Ma̱ndoo matambáyii ajmbia̱a̱ʼ mu maniñuuʼ raʼyoo pornografía. Mu ma̱ndoo matanimbánii mbá xkujndu o matani ga̱jma̱a̱ʼ mbáa xa̱bu̱ sia̱nʼ, náa Biblia naʼthí rí “itháan májánʼ dí a̱jmi̱i̱n ki xóo mbáwíí” (Ecl. 4:9-12). Xa̱bu̱ bi̱ najmañún nuthi dí  índo̱ bi̱ nidamijná nuñajunʼ mbóó, xa̱bu̱ bi̱ ndaʼyoo pornografía maʼngo̱o̱ maniñuuʼ ga̱jma̱a̱ a̱ʼgiu̱u̱ ma̱ndoo maku̱mu̱u̱ kaʼyoo mbu̱júu̱.

Mu maʼngo̱o̱ matambáyii ajmbia̱a̱ʼ maniñuuʼ raʼyoo pornografía, atayáá a mu ikhaa nandoo ga̱jma̱a̱ naʼni tsiakimínáʼ maniñuuʼ raʼyoo pornografía. Atrajxi̱mínáʼ rígi̱, lá niʼtákáñuu má Jeobá a̱jmbio̱ʼ mu maxnúu tsiaki̱i̱, ga̱jma̱a̱ dí mumbayíí bi̱ kuya̱ edxuu xáʼ. (2 Cor. 4:7; Sant. 5:14, 15.) Lá ndiyáʼ ma dí maʼni ajmbia̱a̱ʼ mu xáʼyoo pornografía ráʼ. Lá nagíminaʼ maniñuuʼ tablet, celular o i̱ʼwáʼ dí maʼni maʼga kayáa mu maʼni dí ra̱májánʼ xáʼ. (Prov. 27:12.) Lá nandoo dí matambáyíí ga̱jma̱a̱ naʼtháanʼ rí naʼni xáʼ.

Xú káʼnii ma̱ndoo matambáyíí ajmbia̱a̱ʼ rá. Atayáá xóo eʼni Felicia, ikhaa ndiyáa Ethan bi̱ ndiʼyoo pornografía asndu nákha nindxu̱u̱ dxámáa. Felicia naʼni xúgíʼ xóo má eʼngo̱o̱, mu índo̱ ajmbio̱o̱ nandoo gáʼyoo mbu̱júu̱ pornografía, xáʼniuu miʼskhaa maʼtámíjná ga̱jma̱a̱ ikhaa. Ethan naʼthí: “Ma̱ndoo maʼtámíjná gajmuʼ a̱ʼgiu̱ʼ xúgíʼ dí eyoʼ ikhúún. Ikhaa nandoo kaʼyoʼ wéñuuʼ. Nambáyuʼ mu mañewumínáʼ xu káʼni ejmuʼ Internet, ga̱jma̱a̱ náá mínaaʼ ejmuʼ mu xáni̱ dí raʼkhí.” Gajkhun ma dí Felicia nagawúunʼ dí naʼni ajmbio̱o̱. Mu ikhaa naʼthí: “Maski ajndu nakiʼnún wéñuʼ nda̱yo̱o̱ dí rígi̱ xámbáyuu a̱jmbio̱ʼ, ikha jngóo ginii nutamíjná xá káʼnii ku̱mu̱u̱ ikhaa. Nda̱wa̱á nutamíjná xú káʼnii ma̱ndoo maʼni dí maʼni̱i̱ a̱jkiu̱nʼ”.

Dí mutamijná xa̱bu̱ gajmii nambáyúu xa̱biya̱ mu xáʼyoo pornografía, mu ma̱ngaa nambáyúu a̱ʼgu̱ mu maku̱mu̱u̱ kaʼyoo ajmbio̱o̱ numuu dí xa̱biya̱ tserkaʼwuu dí naʼni o dí nanigu̱u̱ʼ maʼni, ga̱jma̱a̱ naʼthúu̱n náa nixtáa.

Lá ma̱ndoo mangáán matambáyíí ajmbia̱a̱ʼ ráʼ. Mbóoʼ rí ma̱ndoo mambáyáaʼ, ikhaa nindxu̱u̱ dí matraxnuu ga̱jma̱a̱ʼ ma̱ngaa mutamijná numuu articulo rígi̱. Ikháán xa̱biya̱ atagíminaʼ matatsiʼñáʼ ma̱ta̱ya̱a̱ pornografía ga̱jma̱a̱ dí a̱ʼgia̱a̱ʼ maku̱mu̱u̱ kaʼyaaʼ mbu̱júu̱, xákiʼnááʼ a mu ikhaa nandoo gáʼtháanʼ ga̱jma̱a̱ numuu rígi̱, atani̱ tsiakimínáʼ makrua̱ʼa̱a̱ʼ xú káʼnii eʼni gawúunʼ dí natani̱. Ikháán rá, a̱ʼgu̱ atambáyíí ajmbia̱a̱ʼ ga̱jma̱a̱ xátani a̱jma̱ a̱jkia̱a̱nʼ dí ikhaa ma̱ndoo mariʼkuminaʼ. Gíʼdoo numuu a̱jma̱la mbu̱ya̱a̱ náá numuu dí xa̱bu̱ nduyáá pornografía ga̱jma̱a̱ ndiéjunʼ ma̱ndoo maguma mu xa̱biya̱ maniñuuʼ dí naʼni. e

 A mu naku̱ma̱a̱ʼ dí makiʼnáa índo̱ garatamíjna ga̱jma̱a̱ʼ ajmbia̱a̱ʼ ga̱jma̱a̱ numuu rígi̱, ma̱ndoo makuwíin bi̱ kuya̱ edxu̱u̱ índo̱ gútamíjnala’, o guʼñiinla bi̱ naku̱ma̱laʼ ku̱ñu̱u̱n. Ga̱jma̱a̱ atayáá rí mbajyúuʼ má mba̱yu̱u̱ʼ índo̱ matangáan makumaaʼ xtayáá mbu̱júu̱ ajmbia̱a̱ʼ. Xakanájkhaaʼ má, xáxmiéjuaanʼ, ma̱ndoo matangáan mu mambájxala májánʼ (Ecl. 7:8; 1 Cor. 13:4).

A mu ajmbia̱a̱ʼ natanga̱a̱ mbu̱júu̱ ndaʼyoo pornografía rá. Lá rígi̱ nandoo gáʼthúu̱n dí na̱nguá egawíin a̱jkiu̱u̱n tani o dí nimbá miʼtsú xáʼngo̱o̱ maniñuuʼ raʼni rígi̱ xáʼ. Na̱nguá. Itháán má a mú mba̱yu̱u̱ʼ ma tsiguʼ naʼni rígi̱, ma̱ndoo matanga̱a̱ mbu̱júu̱ mbaʼyoo maski ajndu ninújngoo mba̱yu̱u̱ʼ tsiguʼ dí nánguá eʼyoo. Mbáa mbaʼyoo dí ikhaa maʼni má xúʼko̱ dí nikudaminaʼ maʼni, maski ajndu nakujmaa dí na̱nguá naniguuʼ mbaʼyoo pornografía (Prov. 28:14; Mat. 5:29; 1 Cor. 10:12). Mbaʼyóoʼ muriʼkhu̱u̱ “xóo endxa̱ʼwa̱a̱ e̱dxa̱la” ga̱jma̱a̱ dí “gawiyala kuya̱a̱ dí ra̱májánʼ” xóo di pornografía o xúgíʼ dí kaʼyoo ga̱jma̱a̱ numuu rígi̱, xóo dí maxúmuu xtóo xuyuuʼ’ tsáʼkhúun (Efes. 4:23; Sal. 97:10; Rom. 12:9). A mu nandoo maʼni mbá xúgíʼ rígi̱ ikhaa maʼngo̱o̱ maniñuuʼ mbá kayuuʼ raʼyoo pornografía, numuu rí pornografía naʼni miʼskhaa matatsiʼñáánʼ. f

Dí gátani̱ á mu ajmbia̱a̱ʼ na̱nguá eyoo maniñuuʼ raʼyoo pornografía rá. A mu xúʼko̱, xágáwíinʼ a̱jkia̱a̱nʼ ga̱jma̱a̱ xákumaaʼ dí niʼni nduwáánʼ, ni xakiʼnán ma̱ngaa. Aratháán Jeobá xúgíʼ dí ku̱ma̱a̱ʼ, ga̱jma̱a̱ rígi̱ maʼni dí maraxtaa tsímáá (1 Ped. 5:7). Atanigajma̱a̱ má xúʼko̱, ratajkáan ga̱jma̱a̱ atatsaʼwáminaʼ dí naʼni maraxtaa itháán mijngii náa Jeobá, ga̱jma̱a̱ xúʼko̱ ma̱ta̱ya̱a̱ dí ikhaa ma̱ʼkha̱ kanuu náa ikháán. “Jeobá xtáa mijngii náa xa̱bu̱ bi̱ nagawúunʼ a̱jkiu̱ún” ga̱jma̱a̱ ikhaa nandoo dí makuwáanʼ mbu̱júu̱ tsímáá (Sal. 34:18). Atani̱ xúgíʼ xó má eʼngo̱o̱ mu mani̱ndxa̱a̱ʼ mbáa májáanʼ cristiana, ga̱jma̱a̱ atayáʼ rí bi̱ kuya̱ edxu̱u̱ mumbayáaʼ, ga̱jma̱a̱ gakuma̱a̱ʼ dí maʼga̱nú mbóo mbiʼi dí ajmbia̱a̱ʼ matanga̱a̱ a̱jkiu̱u̱n ga̱jma̱a̱ mariʼkuminaʼ (Rom. (2:4; 2 Ped. 3:9).