1. Ndiéjunʼ gándoo gárígá nda̱wa̱á dí mbáa nikudaminaʼ mbá aʼkhá mbiiʼ rá.

 NÁA artículo dí ndiʼyáá ginii, ndiʼyáálu xú káʼnii Pablo niʼthúún bi̱ kúwá náa congregación dí nirígá náa Corinto xú káʼnii gúnimbánii numuu mbáa xa̱bu̱ bi̱ nikudaminaʼ aʼkhá mbiiʼ. Numuu dí tátanga̱a̱ a̱jkiu̱u̱n, ikha jngóo ndiyóoʼ muriya̱a̱ʼ náa congregación. Mú, xó má eʼthí náa texto dí kayáa edxu̱u̱, ma̱ndoo mixtambáyíí mbáa xa̱bu̱ mu matanga̱a̱ a̱jkiu̱u̱n (Rom. 2:4). Xú káʼnii ejmiuu Jeobá a̱ngiu̱lú anciano mu mumbayíí bi̱ nikudaminaʼ aʼkhá mu matanga̱a̱ a̱jkiu̱u̱n rá.

2, 3. Ndiéjunʼ gíʼmaa muʼni á mu nduʼyáá dí ndxájulú nikudaminaʼ aʼkhá mbiiʼ, ga̱jma̱a̱ náá numuu rá.

² Gundxaʼwamíjna̱ dí ndiʼyáá dí mbáa ndxájulú nikudaminaʼ aʼkhá mbiiʼ, xóo muʼthá, dí niʼni mbá dí ma̱ndoo muriya̱a̱ʼ náa congregación. Ndiéjunʼ gíʼmaa muʼni rá. Mu a̱ngiu̱lú ancianos mumbayíí ndayóoʼ mbuyáá májánʼ dí nirígá. Ikha jngóo dí ndayóoʼ muʼthán ndxájulú buʼko̱ dí maʼga̱ gáʼthúún anciano ga̱jma̱a̱ dí mumbayíí (Is. 1:18; Hech. 20:28; 1 Ped. 5:2).

³ Mú, ndiéjunʼ guʼni á mu tsíyoo gáʼthúún ancianos xá. Numuu dí nandulúʼ dí mixtambáyíí, ikháanʼ ndayóoʼ mu̱ʼgua̱ guʼthúún ikhiin. Á mu nuʼni xúʼko̱ musngajmá dí nandulúʼ kuʼyáá ndxájulú, numuu dí nduʼyáá dí anciano ma̱ndoo  mumbayíí. Á mu tseriʼkuminaʼ, maʼni gachúu itháan dí nambájxu̱u̱ ga̱jma̱a̱ Jeobá ga̱jma̱a̱ maʼni dí xa̱bu̱ bi̱ gudxawíín dí niʼni muthi dí raʼkhí ga̱jma̱a̱ numuu Jeobá ga̱jma̱a̱ xuajñuu. Ikha jngóo, maski ajndu maʼni mingíjyúuʼ ndayóoʼ dí xámiñúlú mu̱ʼgua̱ guʼthúún anciano numuu dí nandulúʼ kuʼyáá Jeobá ga̱jma̱a̱ nandulúʼ kuʼyáá ndxájulú (Sal. 27:14).

DÍ NUNI ANCIANOS MU MUMBAYÍÍ BI̱ NIKUDAMINAʼ MBÁ AʼKHÁ MBIIʼ

4. Náá numuu dí anciano gíʼmaa muwi̱i̱n gajmiún bi̱ nikudaminaʼ aʼkhá mbiiʼ rá.

⁴ Índo̱ mbáa ndxájulú nakudaminaʼ aʼkhá mbiiʼ, a̱ngiu̱lú anciano nuraʼwi̱i̱n ajtsíin anciano bi̱ nigumaratiin mu makuwá náa comité a ga̱jma̱a̱ dí muwi̱i̱n gajmiún ikhaa. Ikhiin gíʼmaa mani̱ndxu̱ún xa̱bu̱ guabiinʼ, maski ajndu nandún mumbayíí matanga̱a̱ a̱jkiu̱u̱n xándoo mutsudaa mariʼkuminaʼ (Deut. 30:19). Nakru̱ʼu̱u̱n dí raʼkháa xúgíinʼ natanga̱a̱ a̱jkiu̱ún xó má niʼni rey David (2 Sam. 12:13). Kúwá tikhuun bi̱ nuraʼwi̱i̱ dí xúnimbu̱ún consejo dí naxnún Jeobá (Gén. 4:​6-8). Maski ajndu xúʼko̱, ancianos munimíjna̱ xó má eʼngo̱o̱ dí mumbayíí bi̱ nikudaminaʼ aʼkhá mu mata̱nga̱a̱ a̱jkiu̱u̱n. Ndiéjunʼ gíʼmaa marmáʼáan a̱jkiu̱ún comité índo̱ gúwi̱i̱n mutamijná gajmiún bi̱ nikudaminaʼ aʼkhá rá.

5. Ndiéjunʼ ikha gíʼmaa marmáʼáan a̱jkiu̱ún anciano índo̱ gúwi̱i̱n gajmiún bi̱ nikudaminaʼ aʼkhá rá. (2 Timoteo 2:​24-26; atayáá ma̱ngaa xtiʼkhuu.)

⁵ Ancianos nduyáá dí mbáa bi̱ nikudaminaʼ aʼkhá nindxu̱u̱ mbáa mugiu̱u̱ Dios bi̱ nindáti̱ga̱a̱ (Luc. 15:​4, 6). Nusngajma rígi̱ índo̱ nawi̱i̱n mutamijná gajmiún, nutháán ga̱jma̱a̱ ajngáa gua̱ba̱ʼ, tséthán ga̱jma̱a̱ ajngáa mijkoo ni má tséndxawamíjna̱ dí muwi̱i̱n gajmiún i̱ndó mu muni̱i̱ grajxe̱ mu mbuyáá ndiéjunʼ nirígá. Dí phú nuni̱ nusngajma dí nindxu̱ún xóo na̱ʼkha̱ raʼthí náa 2 Timoteo 2:​24-26 (atraxnuu). Índo̱ nutamijná gajmiún, nutháán ga̱jma̱a̱ ajngáa gua̱ba̱ʼ, tsékiʼníi kuyáá ga̱jma̱a̱ májáanʼ a̱jkiu̱ún mu xúʼko̱ mumbayíí mariʼkhu̱u̱ xóo endxaʼwámi̱na̱ʼ.

6. Xú káʼnii eniratamijná anciano mu mutamijná gajmiún xa̱bu̱ bi̱ nikudaminaʼ aʼkhá rá. (Romanos 2:4.)

⁶ Ancianos nuri̱ya̱ʼ mbiʼi mbuyáá ndiéjunʼ endxa̱ʼwáminaʼ Jeobá. Narmáʼáan a̱jkiu̱ún ajngáa dí niʼthí Pablo: “Dios nandoo mambáyaaʼ mu mata̱nga̱a̱ a̱jkia̱a̱nʼ” (atraxnuu Romanos 2:4). Ikha jngóo nunimi̱jna̱ mbuyaridáá Jeobá dí ikhaa májáanʼ a̱jkiu̱u̱n kaʼñún xa̱bu̱ aʼkhá. Gíʼmaa marmáʼáan a̱jkiu̱ún dí nindxu̱ún baxtúu ga̱jma̱a̱ dí gíʼmaa munimbu̱ún ikha dí nixná Jesús ga̱jma̱a̱ mbuyaridáá ikhaa (Is. 11:​3, 4; Mat. 18:​18-20).  Nákha xóó tségimbíin gajmiún bi̱ nikudaminaʼ aʼkhá, comité nutakáñii Jeobá dí mambáñún mu mumbayíí xa̱bu̱ matanga̱a̱ a̱jkiu̱u̱n. Nduyáʼ itháan ikha náa Biblia ga̱jma̱a̱ náa i̱yi̱i̱ʼ ndrígúlú, ga̱jma̱a̱ nunda̱ʼa̱a̱ Jeobá dí mambáñún makru̱ʼu̱u̱n kuyáá bi̱ nikudaminaʼ aʼkhá ga̱jma̱a̱ dí nirígá. Nunimi̱jna̱ mbuyáá xóo nindxu̱u̱ xa̱bu̱ bugi̱ ga̱jma̱a̱ náá numuu xúʼko̱ endxa̱ʼwáminaʼ ma̱ngaa ndiéjunʼ ni̱jkha̱ kayáa maʼni dí niʼni (Prov. 20:5).

7, 8. Xú káʼnii gándoo anciano mbuyaridáá Jeobá dí naʼngo̱o̱ a̱jkiu̱u̱n índo̱ gútamíjná gajmiún bi̱ nikudaminaʼ aʼkhá rá.

⁷ Bi̱ nindxu̱ún anciano nduyaridáá dí naʼngo̱o̱ a̱jkiu̱u̱n Jeobá. Narmáʼáan a̱jkiu̱ún xú káʼnii niʼniún Jeobá xa̱bu̱ bi̱ nixudami̱jna̱ aʼkhá nákha wajyúuʼ. Mbá xkri̱da, niʼtámíjná májánʼ ga̱jma̱a̱ Caín, niʼthúu̱n dí ma̱ndoo matanga̱a̱ mambájxu̱u̱ ga̱jma̱a̱, mú ma̱ngaa niʼthúu̱n ndiéjunʼ gágíʼnuu á mu tseriʼkuminaʼ (Gén. 4:​6, 7). Imbo̱ʼ miʼtsu, Jeobá nikungua̱a̱nʼ profeta Natán mu paxprígúu rey David, ikhaa nijmuu mbá xkri̱da dí mambáyúu maʼga̱nú asndu náa a̱jkiu̱u̱n (2 Sam. 12:​1-7). Ma̱ngaa, Jeobá nikungui̱i̱nʼ profeta ndrígóo ‹nángi eʼni› mu maʼthúún israelita bi̱ tsénimbu̱ún (Jer. 7:​24, 25). Tagíʼthu̱u̱n dí xa̱bi̱i̱ ginii matanga̱a̱ a̱jkiu̱ún mu nda̱wa̱á mambáñún, ikhaa ginii niʼthúún dí matanga̱a̱ a̱jkiu̱ún nákha xóó kúwá ruxudami̱jna̱ aʼkhá.

⁸ Ndiéjunʼ gíʼmaa muni̱ anciano mu mbuyaridáá xkri̱da ndrígóo Jeobá índo̱ gúmbayíí mbáa bi̱ nikudaminaʼ aʼkhá mbiiʼ rá. Xó má eʼthí náa 2 Timoteo 4:​2, gíʼmaa ‹maʼngo̱o̱ a̱jkiu̱ún› kuyáá. Gíʼmaa muñewa̱a̱n dí muni̱, dí muthi ma̱ngaa dí muthán ga̱jma̱a̱ ajngáa gua̱ba̱ʼ mu mumbayíí maʼni dí májánʼ. Á mu ancianos nakiʼníin o nakasngáñún, mbáa maʼni dí xa̱bu̱ xándoo gaʼdxawun ni má xándoo gátanga̱a̱ a̱jkiu̱u̱n.

9, 10. Ndiéjunʼ gándoo muni̱ anciano mu mumbayíí ndxájulú bi̱ nikudaminaʼ aʼkhá rá.

⁹ Ancianos nduyáʼ mbuyáá ndiéjunʼ ni̱jkha̱ kayáa ndxájulú makudaminaʼ aʼkhá. Mbá xkri̱da, lá ni̱jkha̱ rakáguabaaʼ mañu mañúú numuu dí niniñuuʼ raʼnigajma̱a̱ o niniñuuʼ ra̱jkha̱ gátaraʼa tsejtsi xáʼ. Lá ni̱jkha̱ raniñuuʼ raʼtákáñuu Jeobá gájtsi xáʼ. Lá niniñuuʼ mbaja̱a̱ dí ra̱májánʼ náa a̱jkiu̱u̱n xáʼ. Lá bi̱ nambájxu̱u̱ gajmíi̱n o dí naʼni gagimina̱ʼ ga̱jma̱a̱ dí raʼkhí ni̱jkha̱ kayáa maʼni dí ra̱májánʼ xá. Lá ndaʼyoo ndiéjunʼ endxa̱ʼwáminaʼ Jeobá ga̱jma̱a̱ numuu dí niʼni xáʼ.

¹⁰ Ancianos nundxaʼwamíjna̱ májánʼ grajxe̱ dí muni̱i̱ ndxájulú, ga̱jma̱a̱ xútháán maʼthí dí tséyóo má mbuyáá. Dí phú muni̱ muthán ga̱jma̱a̱ ajngáa gua̱ba̱ʼ, mumbayíí maʼthí xóo ku̱mu̱u̱ ga̱jma̱a̱ makru̱ʼu̱u̱n ndiéjunʼ ni̱jkha̱ kayáa makudaminaʼ aʼkhá (Prov. 20:5). Ma̱ngaa, xó má niʼni Natán ga̱jma̱a̱ David, ma̱ndoo majmúún xkri̱da mu mumbayíí makro̱ʼo̱o̱ náá numuu dí raʼkhí nindxu̱u̱ dí niʼni. Á mu xúʼko̱ eni̱, índo̱ gútamíjná gajmiún timbá aʼphu̱, mbáa magáwíinʼ a̱jkiu̱u̱n o asndu mata̱nga̱a̱ a̱jkiu̱u̱n dí niʼni.

11. Xú káʼnii niʼniún Jesús xa̱bu̱ bi̱ nixudami̱jna̱ aʼkhá rá.

¹¹ Ancianos nunimi̱jna̱ mbuyaridáá Jesús. Mbá xkri̱da, ikhaa nirajxu̱u̱ Saulo bi̱ na̱ʼkha̱ náa Tarso: “Saulo, Saulo náá numuu dí natraxkoʼ rá.” Niʼniuu grajxe̱ rígi̱ mu mambáyúu Saulo makro̱ʼo̱o̱ dí ra̱májánʼ dí xtáa raʼni (Hech. 9:​3-6). Ga̱jma̱a̱ náa Apocalipsis 2:​20, 21 niʼthí ga̱jma̱a̱ numuu mbáa bi̱ mbiʼyuu “Jezabel” índo̱ niʼthí: “Ni̱xnu̱u̱ mbiʼi mu matanga̱a̱ a̱jkiu̱u̱n”.

12, 13. Ndiéjunʼ gándoo muni̱ ancianos mu muxnáá mbiʼi xa̱bu̱ matanga̱a̱ a̱jkiu̱u̱n rá. (Atayáá ma̱ngaa xtiʼkhuu.)

¹² Ancianos nduyaridáá Jesús ga̱jma̱a̱ tséndxaʼwamijna mbá nacha̱ dí xa̱bu̱ bi̱ nikudaminaʼ aʼkhá tsíyoo gátanga̱a̱ a̱jkiu̱u̱n. Kúwá tikhuun  bi̱ natanga̱a̱ a̱jkiu̱ún índo̱ nagimbíi̱n gajmiún comité náa timbá aʼphu̱, mú eʼwíinʼ nda̱ñúunʼ itháan mbiʼi. Ikha jngó ancianos ma̱ndoo muwi̱i̱n gajmiún ikhaa mbaʼa nuthu. Mbáa nda̱wa̱á dí niwi̱i̱n gajmíi̱n timbá aʼphu̱ mandxaʼwáminaʼ dí nitháán ga̱jma̱a̱ ma̱ndo̱ʼo̱o̱ Jeobá dí maʼni mba̱a̱ a̱jkiu̱u̱n kaʼyoo (Sal. 32:5; 38:18). Mbáa nda̱wa̱á dí gáʼtámíjná gajmíi̱n mbu̱júu̱ ancianos, niriʼkhu̱u̱ mbá kayuuʼ xóo eʼni.

¹³ Mu mumbayíí ndxájulú matanga̱a̱ a̱jkiu̱u̱n, ancianos ndayóoʼ makru̱ʼu̱u̱n kuyáá ga̱jma̱a̱ dí mani̱ndxu̱ún májáanʼ a̱jkiu̱ún. Nunda̱ʼa̱a̱ Jeobá dí maʼni tsajkurámuuʼ tsiaki̱i̱ ndrígu̱ún, ga̱jma̱a̱ dí ndxájulú maʼga̱nú makro̱ʼo̱o̱ mu matanga̱a̱ a̱jkiu̱u̱n (2 Tim. 2:​25, 26).

14. Índo̱ bi̱ nikudaminaʼ aʼkhá natanga̱a̱ a̱jkiu̱u̱n, tsáá gruigú gamajkhu ga̱jma̱a̱ náá numuu rá.

¹⁴ Á mu mbáa bi̱ nikudaminaʼ aʼkhá natanga̱a̱ a̱jkiu̱u̱n, xúgiáánʼ nadxuu wéñuuʼ a̱jkiu̱lú (Luc. 15:​7, 10). Mú, tsáá kaʼyoo magruigú gamajkhu rá. Lá ancianos ráʼ. Garmáʼáan a̱jkiu̱lú dí Pablo niʼthí “Mbáa Dios gáʼni rí mata̱nga̱a̱ a̱jkiu̱ún” bi̱ nixudami̱jna̱ aʼkhá (2 Tim. 2:25). Ikha jngó dí Jeobá kaʼyoo magruigú gamajkhu índo̱ bi̱ nikudaminaʼ aʼkhá nariʼkhu̱u̱ xóo endxa̱ʼwáminaʼ ga̱jma̱a̱ xóo eʼni, ikhaa nambáyúu mu mariʼkuminaʼ. Pablo niʼthí tikhuu ndiéjunʼ dí májánʼ erígá índo̱ mbáa natanga̱a̱ a̱jkiu̱u̱n: Nambáyúu bi̱ nikudaminaʼ aʼkhá magiʼdoo mbá ku̱ma̱ kájxi̱ dí gajkhun, nambáyúu makro̱ʼo̱o̱ dí xtáa raʼni nindxu̱u̱ raʼkhí, ga̱jma̱a̱ nambáyúu maʼni kríyaminaʼ náa tsáʼkhá ndrígóo Gixa̱a̱ (2 Tim. 2:26).

15. Xú káʼnii gándoo mumbayíí má xúʼko̱ anciano bi̱ nitanga̱a̱ a̱jkiu̱u̱n rá.

¹⁵ Á mu xa̱bu̱ natanga̱a̱ a̱jkiu̱u̱n, ancianos magún ruyáá má xúʼko̱ mu mumbayíí maʼni gujkhuʼ fe ndrígóo, maʼni gaʼduunʼ tsáʼkhá ndrígóo Gixa̱a̱ ga̱jma̱a̱ maʼni rí nindxu̱u̱ jmbu (Heb. 12:​12, 13). Mú, ancianos tséyóo muthán nimbáa dí niʼni ndxájulú bugi̱. Mú, ndiéjunʼ dí ma̱ndoo muthi náa congregación xá.

 “ATAXPRÍGÚÚN BI̱ NUNI̱ AʼKHÁ NÁA INÚN XÚGÍINʼ”

16. Tsíín niʼthí ga̱jma̱a̱ numún Pablo náa 1 Timoteo 5:20 índo̱ niʼthí “náa inún xúgíinʼ” rá.

¹⁶ (Atraxnuu 1 Timoteo 5:20). Pablo niʼthúu̱n Timoteo, bi̱ ma̱ngaa nindxu̱u̱ anciano, dí maxprígún “bi̱ nuni̱ aʼkhá náa inún xúgíinʼ”. Tsíín lá nindoo gáʼthí xá. Raʼkháa má xúgíinʼ bi̱ kúwá náa congregación. I̱ndó tikhuun a̱ngiu̱lú bi̱ ndiyáá ga̱jma̱a̱ idún dí niʼni o á mu bi̱ nikudaminaʼ aʼkhá má niʼthí dí niʼni. Anciano i̱ndó muthúún a̱ngiu̱lú bugi̱ dí nimbayíí ndxájulú ga̱jma̱a̱ dí nixpriguíí má.

17. Á mu xúgíinʼ nduyáá dí mbáa nikudaminaʼ aʼkhá, ndiéjunʼ gájuiʼthá náa congregación ga̱jma̱a̱ náá numuu rá.

¹⁷ Nguáná, xúgíinʼ bi̱ kúwá náa congregación nduyáá dí mbáa nikudaminaʼ mbá aʼkhá o mbáa naguánu nduyáá. Ikha jngóo “náa inún xúgíinʼ” mani̱ndxu̱ún má xúgíinʼ bi̱ kúwá náa congregación. Ma̱ngaa mbáa ndxájulú anciano maʼthí náa inún xúgíinʼ a̱ngiu̱lú náa congregación dí ndxájulú xa̱biya̱ o a̱ʼgu̱ buʼko̱ nixpriguíí (censurado). Náá numuu rá. Pablo niʼthí náá numuu: “Mu xúʼko̱ eʼwíinʼ mamiñún” ga̱jma̱a̱ xúxudamijná aʼkhá mbiiʼ.

18. Ndiéjunʼ eni̱ ancianos índo̱ bi̱ nikudaminaʼ aʼkhá xóó tséʼni 18 tsiguuʼ rá. (Atayáá ma̱ngaa xtiʼkhuu.)

¹⁸ Mú ndiéjunʼ gárígá á mu bi̱ nikudaminaʼ aʼkhá nindxu̱u̱ bi̱ nijngúun má iyááʼ, mú, xóó tséʼni 18 tsiguuʼ xá. A̱ngiu̱lú ancianos, mura̱ʼwi̱i̱n a̱jmi̱i̱n anciano muwi̱i̱n gajmiún ikhaa ga̱jma̱a̱ anu̱u̱ ma̱ngaa ru̱dúu̱ bi̱ nindxu̱ún Testigos. b Ancianos bugi̱ mbuyáá ndiéjunʼ má nini xabuanii mumbayíí aʼdiún mariʼkuminaʼ ga̱jma̱a̱ dí matanga̱a̱ a̱jkiu̱u̱n. Á mu bi̱ nikudaminaʼ  aʼkhá xtáa má rariʼkumi̱na̱ʼ ga̱jma̱a̱ naʼnimbo̱o̱ dí naʼthúún anu̱ún, a̱jmi̱i̱n ancianos ma̱ndoo mu̱thi̱ dí xáʼyóoʼ má dí a̱ngiu̱lú comité muwi̱i̱n gajmiún ikhiin. Numuu dí ikhiin má nduyáá dí Dios má nirajkuáa ñawúúnʼ xabuanii muxprigún e̱jñu̱ún ga̱jma̱a̱ ngajua (Deut. 6:​6, 7; Prov. 6:20; 22:6; Efes. 6:​2-4). Nda̱wa̱á, anciano mutamijná gajmiún xabuanii á mu numbayíí má xúʼko̱ aʼdiún. Mú ndiéjunʼ gárígá á mu dxámá bi̱ nijngún má iyááʼ na̱nguá etanga̱a̱ a̱jkiu̱u̱n ga̱jma̱a̱ naʼni gaʼduunʼ mariʼkuminaʼ rá. Á mu xúʼko̱, ajtsíin ancianos bi̱ kúwá náa comité muwi̱i̱n gajmiún ikhaa ga̱jma̱a̱ anu̱u̱ ma̱ngaa ru̱dúu̱ bi̱ nindxu̱ún Testigos.

“JEOBÁ MÁJÁNʼ WÉÑUUʼ A̱JKIU̱U̱N GA̱JMA̱A̱ NAGÁWÍINʼ A̱JKIU̱U̱N”

19. Xú káʼnii eyaridáá Jeobá ancianos índo̱ nutamijná gajmiún bi̱ nixudamíjna̱ aʼkhá mbiiʼ rá.

¹⁹ Comité bi̱ nindxu̱ún anciano nandún dí maʼni kaʼwu má xúʼko̱ náa congregación, numuu dí rúʼko̱ nindxu̱u̱ ñajunʼ dí Jeobá nirajkuáa ñawúúnʼ (1 Cor. 5:7). Mú, ma̱ngaa nuni̱ xó má eʼngo̱o̱ mu mumbayíí cristiano bi̱ nikudaminaʼ aʼkhá mu matanga̱a̱ a̱jkiu̱u̱n, ikha jngóo índo̱ kúwá rumbayíí nuguáʼthi̱i̱n dí xa̱bu̱ bugi̱ mariʼkuminaʼ. Xúʼko̱ nduyaridáá Jeobá, bi̱ “májánʼ wéñuuʼ a̱jkiu̱u̱n ga̱jma̱a̱ nagáwíinʼ a̱jkiu̱u̱n” (Sant 5:11). Guʼyáá xú káʼnii ajngáa nagui̱i̱ dí niʼnirámáʼ apóstol Juan índo̱ nikhi̱i̱ má: “E̱ji̱nʼ nindxa̱la, naniraʼmáʼ rígi̱ inala mu xúxuʼdámijná nimbá aʼkhá. Á mu mbáa rí ikháanʼ nakudaminaʼ aʼkhá, kuaʼdaa mbáa bi̱ nambáyulú bi̱ xtáa mbóó ga̱jma̱a̱ Anu̱lú: Ikhaa nindxu̱u̱ Jesucristo bi̱ jmbii” (1 Juan 2:1).

20. Ndiéjunʼ guʼyáá náa iwáá artículo dí na̱ʼkha̱ náa i̱yi̱i̱ʼ rígi̱ rá.

²⁰ Phú ngíná índo̱ nguáná cristiano bi̱ nixudamíjna̱ aʼkhá mbiiʼ tsíñún gátanga̱a̱ a̱jkiu̱ún. Índo̱ narígá xúʼko̱, mbaʼyóoʼ dí muriya̱a̱ʼ náa congregación. Mú, xú káʼnii enimbánii anciano rígi̱ rá. Muʼthá ga̱jma̱a̱ numuu rígi̱, náa iwáá artículo dí na̱ʼkha̱ náa i̱yi̱i̱ʼ rígi̱.