ARTÍCULO RÍ MUʼNIGAJMAA 31
AJMÚÚ 12 Dios Jeobá, Dios ndrígúlú bi̱ mba̱a̱
Dí niʼni Jeobá mu maʼni káwíin xa̱bu̱ numbaaʼ náa aʼkhá ga̱jma̱a̱ náa nakháñún
“Dios ra̱ʼkhá tháán nindoo kaʼñún xa̱bu̱ numbaaʼ, ikha jngóo nixnájxi̱i̱ A̱ʼdióo bi̱ mbáwíí” (JUAN 3:16).
EDXU̱U̱
Guʼyáá ndiéjunʼ niʼni Jeobá mu maʼni káwáánʼ náa aʼkhá ga̱jma̱a̱ ndiéjunʼ niʼni mu makuwáánʼ kámuu mbiʼi.
1, 2. a) Ndiéjunʼ nindxu̱u̱ aʼkhá ga̱jma̱a̱ xú káʼnii gúʼni gajmiúlú rá. (Atayáa ma̱ngaa “Ku̱ma̱ rí gíʼdoo numuu”.) b) Ndiéjunʼ guʼyáá náa artículo rígi̱ ga̱jma̱a̱ náa i̱ʼwáʼ artículo dí na̱ʼkha̱ náa i̱yi̱i̱ʼ Bi̱ Nayejngoo rígi̱ rá. (Atayáá ma̱ngaa “Dí najuiʼtháán bi̱ naguxnuu” náa revista rígi̱.)
LÁ NANDAAʼ ma̱ta̱ya̱a̱ nguáthá eyoo kaʼyaaʼ Jeobá ráʼ. Májánʼ gáʼni dí matanigajma̱a̱ mu ma̱ta̱ya̱a̱ ndiéjunʼ niʼni mu maʼni káwíin xa̱bu̱ náa aʼkhá ga̱jma̱a̱ náa nakháñulú. Aʼkhá a nindxu̱u̱ asndu xóo xa̱bu̱ sia̱nʼ bi̱ nimbáa dí ikháanʼ xáʼngo̱o̱ gáʼni ga̱jma̱a̱. Xúgiáánʼ bi̱ nindxu̱lú xa̱bu̱ numbaaʼ nakiéʼkulu, nindxu̱lú xa̱bu̱ aʼkhá ikha jngóo nakháñulú (Rom. 5:12). Mú, ma̱ndoo mbuʼyáá gajkhun dí Jeobá ma̱ndoo maʼni káwáanʼ náa aʼkhá.
2 Naʼni má 6,000 tsiguʼ dí Jeobá xtáa rambáñún xa̱bu̱ mu muni̱ gajmiún aʼkhá. Numuu dí nandoo kaʼyulú wéñuuʼ. Asndu má nákha niʼniáánʼ nandoo kaʼyulú wéñuuʼ, ikha jngóo xtáa xawii mambáyulú mu muʼni gajmiúlú aʼkhá. Dios ndaʼyoo dí aʼkhá na̱jkha̱ kaguáanʼ makañúlú, ikhaa tsíyóo dí nimbáa dí ikháanʼ makhañúu, ikhaa nandoo dí makuwáánʼ kámuu mbiʼi (Rom. 6:23). ¡Rúʼko̱ dí nandoo ga̱jma̱a̱ numaaʼ ikháanʼ ma̱ngaa! Náa artículo rígi̱ muriʼña̱a̱ ajtsú grajxe̱: 1) Ndiéjunʼ niʼni Jeobá mu maxnúlú mbá dí maguáʼthi̱i̱n nda̱wa̱á rá. 2) Ndiéjunʼ nini xa̱bu̱ bi̱ nikúwá nákha kawáá mbiʼi mu muni̱ rí nandoo Jeobá maski ajndu nindxu̱ún xa̱bu̱ aʼkhá rá. Ga̱jma̱a̱ 3) ndiéjunʼ niʼni Jesús mu maʼni káwíin xa̱bu̱ náa aʼkhá ga̱jma̱a̱ náa nakháñún rá.
NDIÉJUNʼ NIʼNI JEOBÁ MU MAXNÚLÚ MBÁ DÍ MAGUÁʼTHI̱I̱N NDA̱WA̱Á RÁ.
3. Xú káʼnii niʼni dí Adán ga̱jma̱a̱ Eva ninindxu̱ún xa̱bu̱ aʼkhá rá.
3 Índo̱ Jeobá niʼnii Adán ga̱jma̱a̱ Eva, nindoo dí makuwá gagi. Ikha jngóo nixnún mbá ku̱ba̱ʼ mitsaanʼ náa makuwá ga̱jma̱a̱ dí makuwá mbóó ma̱ngaa dí muni̱ majtíin xa̱bu̱ náa xúgíʼ tsu̱du̱u̱ numbaaʼ, ga̱jma̱a̱ mu muni̱ dí maʼni mitsaanʼ náa xúgíʼ Ku̱ba̱ʼ xó má kaʼnii náa ixi̱ ri̱ʼi̱ Edén. I̱ndó niʼthúún dí á mu xúnimbu̱ún kuyáá makhañún. Nduʼyáá má dí ni̱jkha̱nú nirígá, mbáa ángel bi̱ ra̱májánʼ, bi̱ na̱nguá nindoo kaʼñúún ikhiin ni má Jeobá, niʼninduwiinʼ mu xúnimbu̱ún. Adán ga̱jma̱a̱ Eva tákumu̱ún kuyáá Jeobá, Anu̱ún bi̱ nindoo kaʼñúún, itháan má nikumu̱ún kuyáá ángel bi̱ ra̱májánʼ. Ga̱jma̱a̱ numuu dí túnimbu̱ún, Adán ga̱jma̱a̱ Eva nimíniiʼ náa xúgíʼ mbiʼi dí xóó nikúwá, niganii ga̱jma̱a̱ ni̱jkha̱nú nikháñún (Gén. 1:28, 29; 2:8, 9, 16-18; 3:1-6, 17-19, 24; 5:5).
4. Náa numuu dí Jeobá naguiyu̱u̱ʼ kaʼyoo aʼkhá, ga̱jma̱a̱ ndíjkha nambáyulú muʼni gajmiúlú rá. (Romanos 8:20, 21.)
4 Phú ngíná dí nirígá. Mú, Jeobá niniñuuʼ dí magumarámáʼ náa Biblia mu makru̱ʼu̱lú mbá dí gíʼdoo wéñuuʼ numuu; dí ikhaa naguiyu̱u̱ʼ kaʼyoo aʼkhá. Aʼkhá naʼni tsíngulú náa anu̱lú ga̱jma̱a̱ na̱jkha̱ kaguáanʼ makhañúlúʼ (Is. 59:2). Ikha jngóo Gixa̱a̱, ángel bi̱ ra̱májáanʼ nanigu̱u̱ʼ aʼkhá. Ikha jngóo niʼni nduwaaʼ Adán ga̱jma̱a̱ Eva ma̱ngaa naʼni nduwáanʼlú mangáanʼ dí mbiʼi xúgi̱. Mbáa nikumu̱u̱ dí náa ixi̱ ri̱ʼi̱ Edén niʼngo̱o̱ niʼni xó má nindoo ikhaa. Mú na̱nguá ekro̱ʼo̱o̱ nguáthá mba̱a̱ ngajua gíʼdoo Jeobá, Ikhaa táriʼkhu̱u̱ dí nindoo maʼni ga̱jma̱a̱ numún bi̱ naguwáʼ náa Adán ga̱jma̱a̱ Eva. Dios nandoo kaʼñúún xa̱bu̱ numbaaʼ. Ikha jngóo nixnúún mbá dí maguáʼthi̱i̱n xúgíinʼ ikhiin (atraxnuu Romanos 8:20, 21). Jeobá ni̱jkha̱nú ndiʼyoo dí tikhuun muraʼwi̱i̱ maʼndún kuyáá ga̱jma̱a̱ dí tikhuun mbuyáaʼ mu mambañúún muni̱ gajmiún aʼkhá. Jeobá niʼni dí xa̱bu̱ bugi̱ ma̱ndoo magún kanuu náa ikhaa mu maguma káwíin náa aʼkhá ga̱jma̱a̱ náa dí nakháñún.
5. Xú káʼnii ga̱jma̱a̱ nguáná nixnún Jeobá xa̱bu̱ numbaaʼ mbá dí maguáʼthi̱i̱n rá. (Génesis 3:15.)
5 (Atraxnuu Génesis 3:15). Mbá nacha̱ Jeobá niʼthí ndiéjunʼ magíʼnuu Gixa̱a̱. Ga̱jma̱a̱ niʼthí dí ‹ma̱ʼkha̱› mbáa bi̱ maxíyáa Gixa̱a̱ ga̱jma̱a̱ maʼnimbánuu xúgíʼ xkujndu dí ikhaa niʼni marigá náa ixi̱ ri̱ʼi̱ Edén (1 Juan 3:8). Mú bi̱ ‹ma̱ʼkha̱› mbaʼyóoʼ rí mamínuuʼ, numuu dí Gixa̱a̱ maʼni dí makhañúu. Rígi̱ maʼni gawúunʼ wéñuuʼ a̱jkiu̱u̱n Jeobá. Mú, ikhaa nixtáa xawii mamínuuʼ numuu dí rígi̱ ma̱ndoo maʼni káwíin mbaʼin wéñuuʼ xa̱bu̱ náa aʼkhá ga̱jma̱a̱ dí nakháñún.
RÍ NINI XA̱BU̱ BI̱ NIKÚWÁ NÁKHA KAWÁÁ MBIʼI MU MUNI̱ DÍ NANIGUUʼ DIOS MASKI AJNDU NINDXU̱ÚN XA̱BU̱ AʼKHÁ
6. Ndiéjunʼ niʼni Abel ga̱jma̱a̱ Noé mu magún kanuu náa Jeobá rá.
6 Xú káʼnii gándoo gúʼgua kanuu náa Jeobá rá. Náa xúgíʼ tsiguʼ dí ni̱jkha̱ ranújngoo, ikhaa nisngájma xú káʼnii gándoo gúʼni. Nda̱wa̱á dí Adán ga̱jma̱a̱ Eva túnimbu̱ún kuyáá, timbáa xa̱bu̱ bi̱ nigiʼdoo fe náa Jeobá ninindxu̱u̱ Abel bi̱ maʼni a̱jmi̱i̱n e̱jñu̱ún ikhiin. Ikhaa ra̱ʼkhá tháán nindoo kaʼyoo Jeobá, nindoo maʼni rí nanigu̱u̱ʼ ga̱jma̱a̱ rí maʼga̱ kanuu náa ikhaa. Ikha jngóo niraʼwíí maxnájxi̱ mbá tsigijñaʼ. Numuu rí ikhaa ninindxu̱u̱ bi̱ niñewu̱u̱n mugu̱ ikha jngóo ni̱jkha̱ kagui̱i̱n mbaʼin “mugiu̱u̱ bi̱ giʼnuu” mu maxnájxi̱i̱n náa Jeobá. Ga̱jma̱a̱ Dios ‹ninigu̱u̱ʼ rí niʼni Abel ga̱jma̱a̱ nigruigú tsigijñaʼ gamajkhu dí nixnájxi̱› (Gén. 4:4). Ma̱ngaa itháan nda̱wa̱á nigruigú tsigijñaʼ dí nixnajxi̱ xa̱bu̱ bi̱ nindúún kuyáá ga̱jma̱a̱ bi̱ nikumu̱ún kuyáá, xóo Noé (Gén. 8:20, 21). Rígi̱ nisngájma dí maski ajndu xa̱bu̱ numbaaʼ nindxu̱ún xa̱bu̱ aʼkhá, ma̱ndoo muni dí naniguuʼ Jeobá ga̱jma̱a̱ dí magún kanuu náa ikhaa. b
7. Ndiéjunʼ ejmañulúʼ dí Abrahán nixtáa xawii maxnájxi̱i̱ a̱ʼdióo makhañúu rá.
7 Jeobá nindoʼoo maʼni Abrahán bi̱ ninindxu̱u̱ imba̱a̱ bi̱ nigiʼdoo mbá fe gujkhuʼ, mbá dí gakhi̱i̱ wéñuuʼ: Dí maxnájxi̱i̱ a̱ʼdióo Isaac xóo tsigijñaʼ. Mbáa Abrahán niʼniuu gakhi̱i̱ maʼnimbánuu rígi̱. Mú, niʼnimbo̱o̱. Índo̱ inu maxíyáa, Jeobá niʼthúu̱n dí xaxíyáa má. Xkri̱da rígi̱ naʼsngúún mbá dí gíʼdoo wéñuuʼ numuu xúgíinʼ xa̱bu̱ bi̱ kuaʼdáá fe, dí Jeobá xtáa xawii maxnájxi̱i̱ A̱ʼdióo bi̱ nandoo kaʼyoo makhañúu numuu dí ra̱ʼkhá tháán nandoo kaʼñúún xa̱bu̱ numbaaʼ (Gén. 22:1-18).
8. Ndiéjunʼ esngájma náa tsigijñaʼ dí nirígá náa Xtángoo dí niʼnirámáʼ Moisés rá. (Levítico 4:27-29; 17:11.)
8 Mbayuuʼ tsiguʼ ndawaá índo̱ Jeobá nixnúún Xtángoo israelitas, niʼthúún dí muxnajxi̱i̱n xujkhúʼ xóo tsigijñaʼ mu magudi̱i̱ aʼkhúún (atraxnuu Levítico 4:27-29; 17:11). Tsigijñaʼ rúʼko̱ nisngájma dí Jeobá maxnájxi̱ mbá tsigijñaʼ dí itháan májánʼ numuu dí maʼni káwíin mbá kayuuʼ xa̱bu̱ numbaaʼ náa aʼkhá. Dios niʼni dí profeta mutariyaʼ dí bi̱ nijuiʼthá Ma̱ʼkha̱, nindxu̱u̱ A̱ʼdióo Dios bi̱ mbáwíi, mbaʼyóoʼ dí mamínuuʼ ga̱jma̱a̱ dí makhañúu. Mani̱ndxu̱u̱ xóo mugu̱ bi̱ nijuixnájxi̱i̱ náa tsigijñaʼ (Is. 53:1-12). Atatsaʼwáminaʼ: Jeobá maxnájxi̱i̱ A̱ʼdióo bi̱ nandoo kaʼyoo mu maʼni káwíin xúgíinʼ xa̱bu̱ numbaaʼ náa aʼkhá ga̱jma̱a̱ náa dí nakháñún, ma̱ngaa asndu ga̱jma̱a̱ numaaʼ ikháán.
NDIÉJUNʼ NIʼNI JESÚS MU MAʼNIKÁWÍIN XA̱BU̱ NUMBAAʼ RÁ.
9. Ndiéjunʼ nisngájma Juan bi̱ nakumíinʼ iyááʼ xa̱bu̱ rá. (Hebreos 9:22; 10:1-4, 12.)
9 Nákha tsiguʼ 29, Juan bi̱ nakumíinʼ iyááʼ xa̱bu̱, ndiʼyoo Jesús bi̱ na̱ʼkha̱ náa Nazaret ga̱jma̱a̱ niʼthí: “¡Gu̱ya̱a̱, A̱ʼdá múgiúu Dios bi̱ narígúu aʼkhúún xa̱bu̱ numbaaʼ!” (Juan 1:29). Xígi̱ nisngájma dí Jesús nindxu̱u̱ bi̱ Dios nikudaminaʼ dí Ma̱ʼkha̱. Jesús maxnáximinaʼ makhañúu mu xa̱bu̱ numbaaʼ makáwíin mbá kayuuʼ náa aʼkhá ga̱jma̱a̱ náa nakháñún (atraxnuu Hebreos 9:22; 10:1-4, 12).
10. Xú káʼnii nisngájma Jesús dí ni̱ʼkha̱ gáñiinʼ xa̱bu̱ aʼkhá rá.
10 Jesús nindoo mambáñún xa̱bu̱ bi̱ kúwá ngíná ga̱jma̱a̱ numuu dí nindxu̱ún xa̱bu̱ aʼkhá, ikha jngóo niʼthúún dí magún kidxuuʼ. Ni̱jkha̱nú ndiʼyoo dí xa̱bu̱ numíniiʼ ga̱jma̱a̱ numuu aʼkhá dí guaʼdáá. Ikha jngóo nindoo mambáñún xa̱bekha ga̱jma̱a̱ gu̱ʼu̱ bi̱ nimíniiʼ ga̱jma̱a̱ numuu aʼkhá dí nini. Ikhaa ni̱jkha̱nú niʼthí: “Xa̱bu̱ bi̱ tséʼniún nandii tséñúúnʼ má xa̱bu̱ bi̱ naʼni thana, mú bi̱ naʼniún nandii, nda̱ñúúnʼ”. Ga̱jma̱a̱ niʼthí xóó: “Ni̱ʼkhá gáñiinʼ xa̱bu̱ aʼkhá, raʼkháa xa̱bu̱ jmbiin” (Mat. 9:12, 13). Ga̱jma̱a̱ rúʼko̱ má dí niʼni Jesús, mbá xkri̱da niʼni mba̱a̱ a̱jkiu̱u̱n kaʼyoo a̱ʼgu̱ bi̱ nijñiáaʼ rajkhúu ga̱jma̱a̱ iyooʼ iduu (Luc. 7:37-50). Ma̱ngaa niʼsngóo a̱ʼgú samaritana maski ajndu ikhaa ndiʼyoo dí xtáa ga̱jma̱a̱ mbáa xa̱biya̱ bi̱ raʼkháa ajmbio̱o̱ (Juan 4:7, 17-19, 25, 26). Xa̱bu̱ nakháñún ga̱jma̱a̱ numuu aʼkhá, mú Dios nixnúu tsiaki̱i̱ Jesús mu maʼni matujxi̱ín xa̱bekha, gu̱ʼu̱ ga̱jma̱a̱ i̱ji̱n bi̱ nikháñún (Mat. 11:5).
11. Ndíjkha dí xa̱bu̱ bi̱ nixudami̱jna̱ aʼkhá nindúún magún kanuu náa Jesús rá.
11 Asndu xa̱bu̱ bi̱ nixudami̱jna̱ aʼkhá nanigu̱u̱nʼ magún kanuu náa Jesús. Numuu dí ikhaa nakro̱ʼo̱o̱ kaʼñúún ga̱jma̱a̱ nagáwíinʼ a̱jkiu̱u̱n kaʼñún (Luc. 15:1, 2). Ma̱ngaa niʼthúún dí májánʼ eni̱ ga̱jma̱a̱ niʼni tsajkurámiinʼ ga̱jma̱a̱ numuu dí niguaʼdáá fe náa ikhaa (Luc. 19:1-10). Jesús nisngájma kaʼwu xóo nindxu̱u̱ Anu̱u̱ (Juan 14:9). Ajngáa dí nijmuu mu maʼthúún xa̱bu̱ ga̱jma̱a̱ dí xóo niʼni, nisngájma dí Jeobá nandoo kaʼyulú ga̱jma̱a̱ dí nagáwi̱i̱nʼ a̱jkiu̱u̱n kaʼyulú, ma̱ngaa dí nandoo maʼni káwáanʼ náa aʼkhá. Jesús niʼni dí xa̱bu̱ maʼndún muriʼkumijná ga̱jma̱a̱ dí maʼndún magún kidxuuʼ ikhaa (Luc. 5:27, 28).
12. Ndiéjunʼ niʼthí Jesús ga̱jma̱a̱ numuu dí makhañúu rá.
12 Jesús ndiʼyoo má májánʼ dí maxnáximinaʼ mu makhañúu. Mbaʼa nuthu niʼthún xa̱bi̱i̱ dí maguma nduwaaʼ ga̱jma̱a̱ dí majuiʼdujmaa náa ixi̱ (Mat. 17:22; 20:18, 19). Ma̱ngaa ndiʼyoo dí rígi̱ marígúu aʼkhúún xa̱bu̱ numbaaʼ xó má niʼthí Juan ga̱jma̱a̱ xó má nitariyaʼ profeta. Ma̱ngaa, niʼsngáa dí nda̱wa̱á dí ikhaa gakháñuu, “mbaʼin enii xa̱bu̱” magún kanuu náa ikhaa (Juan 12:32). Bi̱ gaguaʼdáá fe náa ikhaa ga̱jma̱a̱ bi̱ guyaridáá xkri̱da ndrígóo ma̱ndoo muni̱ dí nanigu̱u̱ʼ Jeobá ga̱jma̱a̱ ‹maguma káwíin náa aʼkhá› (Rom. 6:14, 18, 22; Juan 8:32). Mu marigá rígi̱, Jesús támíñúu ga̱jma̱a̱ nixtáa xawii mamínuuʼ ga̱jma̱a̱ makhañúu mu maʼni káwáánʼlú (Juan 10:17, 18).
13. Xú káʼnii nikháñúu Jesús, ga̱jma̱a̱ ndiéjunʼ ejmañulúʼ ga̱jma̱a̱ numuu Jeobá rí ikhaa nikháñúu xá. (Atayáá ma̱ngaa xtiʼkhuu.)
13 Jesús nininduwaaʼ, nirugua̱a̱, nitawéñiiʼ, nithi dí raʼkhí ga̱jma̱a̱ numuu, nixnajxi̱i̱ mu makhañúu ga̱jma̱a̱ nini gínáa. Nda̱wa̱á kayuuʼ, soldado nidujmaa náa ixi̱ mu makhañúu. Jesús niʼngo̱o̱ nimínúuʼ xúgíʼ rígi̱, mú Jeobá nimínúuʼ itháan índo̱ ndiʼyoo xóo xtáa ramínúuʼ A̱ʼdióo. Maski ajndu ra̱ʼkhá tháán nindoo kaʼyoo ga̱jma̱a̱ gíʼdoo tsiaki̱i̱, mú tambáyúu dí xagíʼnuu nimbá, numuu dí nandoo kaʼyulú. Jesús niʼthí: “Dios ra̱ʼkhá tháán nindoo kaʼñún xa̱bu̱ numbaaʼ, ikha jngóo nixnájxi̱i̱ A̱ʼdióo bi̱ mbáwíí mu xúʼko̱ bi̱ gágiʼdoo fe náa ikhaa xákháñuu, maxtáa kámuu mbiʼi” (Juan 3:16).
Jeobá nixtáa xawii mamínuuʼ índo̱ niniñuuʼ rí A̱ʼdióo makhañúu mu maʼni káwáánʼ náa aʼkhá ga̱jma̱a̱ náa dí nakháñulú. (Atayáá kutriga̱ 13)
14. Ndiéjunʼ eʼsngáa ikháán dí nixnáximinaʼ makhañúu Jesús rá.
14 Índo̱ nixnájxi̱i̱ A̱ʼdióo mu makhañúu, Jeobá nisngájma dí nandoo kaʼñúún xúgíinʼ bi̱ naguwáʼ náa Adán ga̱jma̱a̱ Eva. Ma̱ngaa nasngájma dí ra̱ʼkhá tháán nandoo kaʼyaaʼ ikháán. Niʼni xó má eʼngo̱o̱ mu maʼni kríñanʼ náa aʼkhá dí na̱jkha̱ kañáán makhañáaʼ (1 Juan 4:9, 10). Ikhaa nandoo mambáyúu mámbáa dí ikháanʼ mu maʼngulú muʼni gajmiúlú aʼkhá.
15. Ndiéjunʼ gíʼmaa muʼni mu mambáyulú dí nixnáximinaʼ makhañúu Jesús rá.
15 Dí nixnájximinaʼ A̱ʼdióo bi̱ mbáwíi mu makhañúu nindxu̱u̱ mbá dí Dios nimínáanʼlu mu ma̱ndoo majngudi̱i̱ aʼkhúlú. Mú rígá dí ikháanʼ ndayóoʼ muʼni, Juan bi̱ nakumíinʼ iyááʼ xa̱bu̱ ga̱jma̱a̱ Jesús niʼthí ndiéjunʼ gíʼmaa muʼni, ikhiin nithi: “Gatanga̱a̱ a̱jkia̱la, numuu dí Xa̱bu̱ Ñajunʼ ndrígóo Dios bi̱ xtáa mekhuíí na̱ʼkha̱ rajngiyuu” (Mat. 3:1, 2; 4:17). Ikha jngóo gíʼmaa matanga̱a̱ a̱jkiu̱lú á mu nandulúʼ mu̱ʼgua̱ kanuu náa Jeobá ga̱jma̱a̱ á mu nandulúʼ magudi̱i̱ aʼkhúlú. Mú ndiéjunʼ eyoo gáʼthúu̱n dí matanga̱a̱ a̱jkia̱a̱nʼ ga̱jma̱a̱ xú káʼnii embáyulú muʼni dí naniguuʼ Jeobá maski ajndu nindxu̱lú xa̱bu̱ aʼkhá rá. Náa imbo̱o̱ artículo rí munigajmaa mbuʼyáá xóo exti̱ʼña̱a̱ grajxe̱ rígi̱.
AJMÚÚ 18 Núma̱aʼ ga̱jma̱a̱ numuu tsingijñaʼ
a KU̱MA̱ RÍ GÍʼDOO NUMUU: Índo̱ náa Biblia na̱ʼkha̱ raʼthí ga̱jma̱a̱ numuu ajngáa aʼkhá raʼkháa ikháá dí eyoo gáʼthúu̱n. Mbá xkri̱da, rí mataxuʼdáminaʼ aʼkhá nindxu̱u̱ dí matani̱ rí Jeobá naʼthí dí nindxu̱u̱ ra̱májánʼ o dí xátani̱ mbá rí ikhaa naʼthí dí gíʼmaa muʼni. Mú, ma̱ngaa aʼkhá nindxu̱u̱ dí nindrigúu náa Adán. Ga̱jma̱a̱ numuu aʼkhá rígi̱, xúgiáánʼ na̱jkuánu nakháñulú.
