ARTÍCULO RÍ MUʼNIGAJMAA 33
AJMÚÚ 130 Guʼni mba̱a̱ a̱jkiu̱lú kuʼyamijná
Náa congregación nasngájma xú káʼnii eʼñún Jeobá bi̱ nixudami̱jna̱ aʼkhá
“Á mu mbáa rí ikháanʼ nakudaminaʼ aʼkhá, kuaʼdaa mbáa bi̱ nambáyulú” (1 JUAN 2:1).
EDXU̱U̱
Ndiéjunʼ gándoo gajmañulú dí xóo ninimbánii xkujndu dí nirígá náa Corinto índo̱ mbáa nikudaminaʼ aʼkhá mbiiʼ rá.
1. Ndiéjunʼ nandoo Jeobá dí muni̱ xúgíinʼ xa̱bu̱ rá.
JEOBÁ niʼniwíinʼ xa̱bu̱ mu ma̱ndoo muraʼwi̱i̱ dí muni̱. Xúgíʼ mbiʼi najmulú regalo rúʼko̱ índo̱ nuraʼwi̱i̱ dí muʼni. Mbá dí itháan gíʼdoo numuu dí maraʼwíí maʼni xa̱bu̱, nindxu̱u̱ dí maxnáximinaʼ náa Jeobá mu maʼga̱nú maxtáa náa kúwá bi̱ nduyamajkuíí ikhaa. Jeobá nandoo dí xúgíinʼ xa̱bu̱ muraʼwi̱i̱ muni̱ rúʼko̱, numuu dí nandoo kaʼñún ga̱jma̱a̱ nandoo dí makuwá májánʼ. Nandoo dí mambáxu̱u̱n gajmiún ma̱ngaa dí makuwá kámuu mbiʼi (Deut. 30:19, 20; Gál. 6:7, 8).
2. Ndiéjunʼ eyoo Jeobá muni̱ bi̱ nixudami̱jna̱ aʼkhá ga̱jma̱a̱ xóó tséta̱nga̱a̱ a̱jkiu̱ún rá. (1 Juan 2:1.)
2 Jeobá tsétsudaa nimbáa dí maʼni ñajuunʼ, ikhaa má naniñuuʼ dí mámbáa má garaʼwíí ndiéjunʼ gáʼni. Mú, ndiéjunʼ erígá índo̱ mbáa cristiano bi̱ nijngúun má iyááʼ nakudaminaʼ aʼkhá mbiiʼ rá. Á mu tsétanga̱a̱ a̱jkiu̱u̱n, mbaʼyóoʼ muriya̱a̱ʼ náa congregación (1 Cor. 5:13). Mú, maski ajndu xúʼko̱, Jeobá nandoo dí matanga̱a̱ mambajxúu ga̱jma̱a̱. Ikhaa numuu rúʼko̱ dí nixnájxi̱i̱ A̱ʼdióo makhañúu, mú xúʼko̱ ma̱ndoo maʼni mba̱a̱ a̱jkiu̱u̱n kaʼñún bi̱ natanga̱a̱ a̱jkiu̱ún náa aʼkhá dí nini (atraxnuu 1 Juan 2:1). Dios ndrígúlú, ra̱ʼkhá tháán nandoo kaʼyulú, dí nambáñúún bi̱ nixudami̱jna̱ aʼkhá ga̱jma̱a̱ naʼthúún dí mata̱nga̱a̱ a̱jkiu̱ún (Zac. 1:3; Rom. 2:4; Sant. 4:8).
3. Ndiéjunʼ guʼyáá náa artículo rígi̱ rá.
3 Jeobá nandoo dí mbuʼyaridáá ga̱jma̱a̱ rí xóo eʼyoo aʼkhá ma̱ngaa ga̱jma̱a̱ numún bi̱ nixudami̱jna̱ mbá aʼkhá mbiiʼ. Náa artículo rígi̱ mambáyulú mbuʼyaridáá. Ginii mbuʼyáá xú káʼnii nimbánuu xkujndu ndrígóo mbáa bi̱ nikudaminaʼ aʼkhá náa congregación dí nirígá náa Corinto. Nda̱wa̱á mbuʼyáá ndiéjunʼ ikha nixná apóstol Pablo índo̱ bi̱ nikudaminaʼ aʼkhá nitanga̱a̱ a̱jkiu̱u̱n. Ga̱jma̱a̱, nda̱wa̱á kayuuʼ, mbuʼyáá xú káʼnii eʼñún Jeobá bi̱ nixudami̱jna̱ mbá aʼkhá mbiiʼ.
XÓO NIMBÁNUU NÁKHA SIGLO TIMBÁ ÍNDO̱ MBÁA NIKUDAMINAʼ AʼKHÁ
4. Ndiéjunʼ xtáa rarígá náa congregación dí rígá náa Corinto rá. (1 Corintios 5:1, 2.)
4 (Atraxnuu 1 Corintios 5:1, 2). Índo̱ maʼni ajtsú nuthu dí Pablo ni̱jkha̱ xóo misionero, niʼdxawuun dí xtáa rarígá mbá dí xkawiʼ kayuuʼ náa congregación Corinto dí ndiʼkhún nigi̱ʼi̱: Dí mbáa cristiano nabaʼkhúun ga̱jma̱a̱ rudú skojo̱o̱. Pablo niʼthí dí rígi̱ “nindxu̱u̱ xkawiʼ wéñuuʼ rí asndu bi̱ tséninuwiinʼ Dios tséni”. Mú bi̱ nikúwá náa congregación niniñaaʼ má marigá, mbáa asndu nikumu̱ún dí kúwá rusngajma dí nagáwíinʼ a̱jkiu̱ún, xó má Jeobá eʼni gajmíi̱n xa̱bu̱ bi̱ nakiéʼkúún. Mú, Jeobá nditháan tsénigu̱u̱ʼ. Ga̱jma̱a̱ numuu dí xígi̱ xkawiʼ xtáa raʼni xa̱bu̱ bugi̱, mbáa tikhuun xa̱bu̱ bi̱ na̱nguá nindxu̱ún cristiano nithi dí raʼkhí ga̱jma̱a̱ numuu xuajñuu Jeobá. Ma̱ngaa dí tikhuun bi̱ kúwá náa congregación mbáa muguáʼdi̱i̱ muni̱ dí raʼkhí. Ikha jngóo, ndiéjunʼ niʼthúún Pablo muni̱ a̱ngiu̱lú bi̱ kúwá náa Corinto rá.
5. Ndiéjunʼ niʼthúún Pablo bi̱ kúwá náa congregación ga̱jma̱a̱ ndiéjunʼ nindoo gáʼthí xá. (1 Corintios 5:13; atayáá ma̱ngaa xtiʼkhuu.)
5 (Atraxnuu 1 Corintios 5:13). Pablo niʼnirámáʼ mbá carta ga̱jma̱a̱ xi̱ʼ kaʼwu, dí gíʼmaa muriya̱a̱ʼ náa congregación mbáa bi̱ nakudaminaʼ aʼkhá á mu tsétanga̱a̱ a̱jkiu̱u̱n. Ndiéjunʼ gíʼma muni̱ cristianos bi̱ naguájun jmbu gajmiún bi̱ tsétanga̱a̱ a̱jkiu̱u̱n rá. Pablo niʼthún dí ni xambáxu̱u̱n gajmiún ni má dí xuphiʼtsu mbóó gajmiún (1 Cor. 5:11). Índo̱ nuphiʼtsu gajmiúlú mbáa xa̱bu̱, nuʼtámíjná gajmiúlú ga̱jma̱a̱ nakuwáánʼ mbayuuʼ gajmiúlú. Ikha jngóo Pablo nindoo maʼthí dí a̱ngiu̱lú bi̱ kúwá náa congregación xáʼyóoʼ mambáxu̱u̱n gajmiún xa̱bu̱ buʼko̱. Mu xúʼko̱ ma̱ndoo mixtiewu̱u̱n bi̱ kúwá náa congregación (1 Cor. 5:5-7). Ma̱ngaa, rúʼko̱ gámbáyúu xa̱biya̱ buʼko̱ mbaʼyoo dí niʼni gawúunʼ Jeobá, dí mati̱yu̱u̱ʼ dí niʼni ga̱jma̱a̱ dí rúʼko̱ gáxkájxi̱i̱ mata̱nga̱a̱ a̱jkiu̱u̱n.
Dios nijmiuu Pablo mu maʼnirámáʼ inún bi̱ corintios dí muriya̱a̱ʼ náa congregación xa̱bu̱ bi̱ na̱nguá tanga̱a̱ a̱jkiu̱u̱n. (Atayáá kutriga̱ 5).
6. Ndiéjunʼ nini a̱ngiu̱lú índo̱ nindrigú carta ndrígóo Pablo ga̱jma̱a̱ ndiéjunʼ niʼni bi̱ nikudaminaʼ aʼkhá rá.
6 Nda̱wa̱á dí nikuʼmaa carta náa congregación dí rígá náa Corinto, Pablo nirajximi̱na̱ʼ: Ndiéjunʼ gúni bi̱ kúwá náa congregación rá. Nguáthá mbayuuʼ nda̱wa̱á, Tito niʼthúu̱n: Dí a̱ngiu̱lú nini dí májánʼ ga̱jma̱a̱ dí ninimbánii ikha dí apóstol nixnún (2 Cor. 7:6, 7). Ma̱ngaa nguáthá igu̱nʼ nda̱wa̱á dí Pablo nikunguanʼ carta, xa̱biya̱ buʼko̱ nitanga̱a̱ a̱jkiu̱u̱n. Niriʼkhu̱u̱ xóo eʼni ga̱jma̱a̱ xóo nindxu̱u̱, ga̱jma̱a̱ nigíʼdu̱u̱ niʼnimbo̱o̱ xtángoo ndrígóo Jeobá (2 Cor. 7:8-11). Mú, rí xúgi̱ ndiéjunʼ gáʼthúún Pablo muni̱ bi̱ kúwá náa congregación rá.
XÚ KÁʼNII GÍʼMAA MUNI̱I̱ BI̱ NATANGA̱A̱ A̱JKIU̱U̱N BI̱ KÚWÁ NÁA CONGREGACIÓN RÁ.
7. Ndiéjunʼ niʼni bi̱ nikudaminaʼ aʼkhá nda̱wa̱á dí niriya̱a̱ʼ náa congregación xá. (2 Corintios 2:5-8.)
7 (Atraxnuu 2 Corintios 2:5-8). Pablo niʼthí: “Niʼngo̱o̱ má rí xa̱bu̱ buʼko̱ nixpriguíí xúgíinʼ”. Xóo muʼthá, rí nixpriguíí nimbáyúu xa̱bu̱ bugi̱ mu mata̱nga̱a̱ a̱jkiu̱u̱n, ikha jngóo nánguá má eyóoʼ dí a̱ngiu̱lú bi̱ kúwá náa congregación muxpriguíí (Heb. 12:11).
8. Ndiéjunʼ niʼthún Pablo muni̱ bi̱ kúwá náa congregación nda̱wa̱á rá.
8 Nda̱wa̱á, Pablo niʼthúún ndiéjunʼ gíʼmaa muni̱ gajmiún bi̱ nikudaminaʼ aʼkhá: “Gíʼmaa mu̱ni̱ mba̱a̱ a̱jkia̱la kuya̱a̱ ga̱jma̱a̱ gu̱ni̱i̱ a̱jkiu̱u̱n”. Ma̱ngaa niʼthí xóó: “Na̱tala rí gaʼndala ku̱ya̱a̱”. Xó má eʼyáá, Pablo raʼkháa i̱ndó nindoo dí muniñaaʼ mata̱nga̱a̱ náa congregación, dí phú gíʼma muni̱, musngajmáá dí gajkhun nini mba̱a̱ a̱jkiu̱ún kuyáá ma̱ngaa dí nandún kuyáá xóo nuthi ga̱jma̱a̱ xóo nuni̱. Xúʼko̱ maʼni dí xa̱bu̱ bi̱ nitanga̱a̱ a̱jkiu̱u̱n mbaʼyoo dí a̱ngiu̱lú bi̱ kúwá náa congregación, nadxuu a̱jkiu̱ún dí ikhaa nitanga̱a̱.
9. Ndíjkha dí mbáa tikhuun niʼniún mingíjyúuʼ muni̱ mba̱a̱ a̱jkiu̱ún kuyáá bi̱ nikudaminaʼ aʼkhá rá.
9 Lá nikúwá tikhuun a̱ngiu̱lú bi̱ niʼniún mingíjyúuʼ mundriguíi bi̱ nitanga̱a̱ a̱jkiu̱u̱n ráʼ. Náa Biblia na̱nguá eʼthí, mú mbáa xúʼko̱ nirígá. Numuu dí niʼni marigá xkujndu náa awúún congregación ga̱jma̱a̱ mbáa niʼni gawúúnʼ tikhuun bi̱ nagún ikhí. Mbáa tikhuun nikumu̱ún dí raʼkhí dí mundríguíi májánʼ mbáa bi̱ nikudaminaʼ wéñuuʼ aʼkhá, índo̱ ikhiin ninimi̱jna̱ xó má eʼngo̱o̱ munimbu̱ún xtángoo ndrígóo Jeobá (atani̱ mbríguíi ga̱jma̱a̱ Lucas 15:28-30). Mú ndíjkha dí gíʼdoo wéñuuʼ numuu dí musngajmáá dí gajkhun nandún kuyáá ndxájulú bi̱ nitanga̱a̱ náa congregación xá.
10, 11. Á mu anciano táʼndún gúni mba̱a̱ a̱jkiu̱ún kuyáá bi̱ nitanga̱a̱ a̱jkiu̱u̱n, ndiéjunʼ migamíi marigá rá.
10 Ndiéjunʼ gárígá á mu anciano túniña̱a̱ʼ mata̱nga̱a̱ náa congregación ga̱jma̱a̱ á mu a̱ngiu̱lú túndriguíi májánʼ xá. Xa̱bu̱ bi̱ nitanga̱a̱ a̱jkiu̱u̱n mbáa maxtáa “gínáa wéñuuʼ rí maku̱mu̱u̱ rí asndu nánguá eʼngo̱o̱ itháan”. Mbáa asndu maku̱mu̱u̱ dí ikhaa nánguá xóo ma̱ndoo mata̱nga̱a̱ mambájxu̱u̱ ga̱jma̱a̱ Jeobá o asndu ní xáʼniminaʼ matanga̱a̱ mambájxu̱u̱ ga̱jma̱a̱.
11 Mú itháan ngíná gáʼni á mu a̱ngiu̱lú tsíñún gúni mba̱a̱ a̱jkiu̱ún kuyáá xa̱bu̱ bi̱ nitanga̱a̱ a̱jkiu̱u̱n, migamíi muni̱ gachíí xóo embájxu̱u̱n gajmiún Dios. Numuu dí xúsngajma xóo nindxu̱u̱ Jeobá, bi̱ xtáa xawii maʼni mba̱a̱ a̱jkiu̱u̱n kaʼñún xa̱bu̱ aʼkhá bi̱ natanga̱a̱ a̱jkiu̱ún, itháan má nduyaridáá Gixa̱a̱ bi̱ gujkhuʼ a̱jkiu̱u̱n ga̱jma̱a̱ ra̱májánʼ. Mani̱ndxu̱ún bi̱ Gixa̱a̱ gájmiuu mu xa̱bu̱ bugi̱ maniñuuʼ raʼni ñajuunʼ Jeobá (2 Cor. 2:10, 11; Efes. 4:27).
12. Xú káʼnii gándoo guyaridáá Jeobá bi̱ kúwá náa congregación rá.
12 Mú, xú káʼnii gándoo gúyaridáá Jeobá raʼkháa Gixa̱a̱ a̱ngiu̱lú bi̱ nikúwá náa Corinto rá. Dí muni̱i̱ bi̱ natanga̱a̱ a̱jkiu̱ún xó má eʼñúún Jeobá. Guʼyáá ndiéjunʼ nithi tikhuun bi̱ ninirámáʼ Biblia ga̱jma̱a̱ numuu Dios, David niʼthí: “Ra̱ʼkhá tháán májáanʼ a̱jkia̱a̱nʼ, xtaa xawii mu matani̱ mba̱a̱ a̱jkia̱a̱nʼ” (Sal. 86:5). Miqueas niʼnirámáʼ: “Lá xtáa i̱mba̱a̱ Dios xóo ikháán, bi̱ naʼni mba̱a̱ a̱jkiu̱u̱n kaʼyoo aʼkhá ga̱jma̱a̱ nanújngurámúunʼ aʼkhúún xa̱bi̱i̱ ráʼ.” (Miq. 7:18.) Ga̱jma̱a̱ Isaías niʼthí xóó: “Ganiñuuʼ kambo̱o̱ xa̱bu̱ xkawi̱i̱ʼ, ganiñuuʼ rí nandxaʼwáminaʼ dí ra̱májánʼ xa̱bu̱ ra̱májáanʼ, gatanga̱a̱ náa Jeobá, ikhaa magáwíinʼ a̱jkiu̱u̱n kaʼyoo, gatanga̱a̱ náa Dios ndrígulú, ikhaa maʼni mba̱a̱ a̱jkiu̱u̱n kaʼyoo” (Is. 55:7).
13. Náá numuu dí ninindxu̱u̱ májánʼ dí niniñaaʼ matanga̱a̱ xa̱bu̱ bi̱ nigáwi̱i̱nʼ a̱jkiu̱u̱n rá. (Atayáá ma̱ngaa kúgumaʼá dí kayá edxu̱u̱ “ Nguáná nitanga̱a̱ maʼni mbu̱júu̱ ñajuunʼ Dios xa̱bu̱ bi̱ nixtáa náa Corinto rá.”)
13 Mu a̱ngiu̱lú bi̱ nikúwá náa Corinto mbuyaridáá Jeobá, ndiyóoʼ dí mundriguíi májánʼ xa̱bu̱ bi̱ nitanga̱a̱ a̱jkiu̱u̱n ga̱jma̱a̱ musngajmáá dí nandún kuyáá. Pablo niʼthí dí á mu nuni̱ mba̱a̱ a̱jkiu̱ún kuyáá xa̱bu̱ bi̱ nitanga̱a̱ a̱jkiu̱u̱n ‹musngajma dí nunimbu̱ún náa xúgíʼ› (2 Cor. 2:9). Gajkhun má dí káaʼ ninújngoo nguáthá gu̱nʼ dí niriya̱a̱ʼ xa̱bu̱ buʼko̱ náa congregación, mú rúʼko̱ nimbáyúu mu mata̱nga̱a̱ a̱jkiu̱u̱n. Ikha jngóo dí bi̱ kuya̱ edxu̱u̱ xáyóo má mbajñún wéñuuʼ dí muniñaaʼ mata̱nga̱a̱.
NDIÉJUNʼ EʼSNGÚLÚ DÍ JEOBÁ NAGÁWI̱I̱Nʼ A̱JKIU̱U̱N GA̱JMA̱A̱ DÍ NAʼNI DÍ JMBU RÁ.
14, 15. Ndiéjunʼ eʼsngúlú dí xóo niguma mbánúu dí nirígá náa congregación ndrígóo Corinto rá. (2 Pedro 3:9; atayáá ma̱ngaa xtiʼkhuu.)
14 Jeobá niʼni dí magumarámáʼ náa Ajngá rawuunʼ dí xú káʼnii nirígá náa congregación ndrígóo Corinto “mu maʼsngulúʼ” (Rom. 15:4). Rígi̱ naʼsngúlú dí Dios tsénigu̱u̱ʼ dí xa̱bu̱ bi̱ kúwá náa xuajñuu nuxudamíjna̱ aʼkhá mbiiʼ. Tikhuun nakumu̱ún dí, numuu dí ikhaa nagáwi̱i̱nʼ a̱jkiu̱u̱n naniñuuʼ maxtáa má xúʼko̱ náa congregación xa̱bu̱ bi̱ tséta̱nga̱a̱ a̱jkiu̱u̱n. Mú ragájkhun nindxu̱u̱ rígi̱. Gajkhun má dí Jeobá nagáwi̱i̱nʼ a̱jkiu̱u̱n, mú tsénigu̱u̱ʼ dí ra̱májánʼ ni má na̱nguá riʼkhu̱u̱ xtángoo ndrígóo (Jud. 4). Á mu dí Jeobá naniñuuʼ maxtáa má xúʼko̱ mbáa bi̱ nakudaminaʼ aʼkhá náa congregación xasngájma dí nagáwi̱i̱nʼ a̱jkiu̱u̱n numuu dí migamíi mumíniiʼ xúgíinʼ bi̱ kúwá náa congregación (Prov. 13:20; 1 Cor. 15:33).
15 Xkri̱da rígi̱ naʼsngúlú dí Jeobá tsíyoo dí nimbáa xa̱bu̱ makhañúu, ikhaa nandoo dí mbaʼin xa̱bu̱ makáwíin. Ikhaa nagáwi̱i̱nʼ a̱jkiu̱u̱n kaʼñún bi̱ natanga̱a̱ a̱jkiu̱ún ga̱jma̱a̱ bi̱ nuni̱ tsiakimijna mambáxu̱u̱n mbu̱júu̱ gajmiún ikhaa (Ezeq. 33:11; atraxnuu 2 Pedro 3:9). Ikha jngóo índo̱ xa̱bu̱ bi̱ xtáa náa Corinto nitanga̱a̱ a̱jkiu̱u̱n ga̱jma̱a̱ niniñuuʼ raʼni dí raʼkhí, Jeobá nijmiuu Pablo mu maʼthúún a̱ngiu̱lú bi̱ nikúwá náa Corinto dí gíʼmaa muni̱ mba̱a̱ a̱jkiu̱ún kuyáá ga̱jma̱a̱ mudriguíi mbu̱júu̱.
Bi̱ kúwá náa congregación nduyaridáá ngajua dí gíʼdoo Jeobá ga̱jma̱a̱ dí nagáwi̱i̱nʼ a̱jkiu̱u̱n, índo̱ nundriguíin májánʼ bi̱ natangiín muni̱ mbu̱júu̱ ñajuunʼ Jeobá. (Atayáá kutriga̱ 14 ga̱jma̱a̱ 15).
16. Xú káʼnii ku̱ma̱a̱ʼ ikháán ga̱jma̱a̱ numuu Jeobá dí xóo nigumambánuu xkujndu náa Corinto rá.
16 Dí ndiʼyáá ga̱jma̱a̱ numuu dí nirígá náa Corinto nambáyulú mbuʼyáá dí Jeobá gíʼdoo ngajua, naʼni dí májánʼ ga̱jma̱a̱ dí jmbu (Sal. 33:5). Índo̱ nduʼyáá dí Dios ndrígúlú nindxu̱u̱ xúʼko̱ kaʼnii naxkajxáánʼ muʼni mba̱a̱. Numuu dí xúgiáanʼ nindxu̱lú xa̱bu̱ aʼkhá ga̱jma̱a̱ ndayúlú dí ikhaa maʼni mba̱a̱ a̱jkiu̱u̱n kaʼyulú. Ra̱ʼkhá tháán nuxnáa núma̱aʼ ga̱jma̱a̱ numuu dí niʼtsiwáánʼ, numuu dí xúʼko̱ nandoo naʼni mba̱a̱ a̱jkiu̱u̱n kaʼyoo aʼkhúlú. Ra̱ʼkhá tháán naʼni̱i̱ a̱jkiu̱lú índo̱ nduʼyáá dí Jeobá gajkhun nandoo kaʼñún xa̱bi̱i̱ ga̱jma̱a̱ dí nandoo makuwá májánʼ.
17. Ndiéjunʼ guʼyáá náa i̱ʼwáʼ artículos rá.
17 Xú káʼni erígá dí mbiʼi xúgi̱ rá. Á mu mbáa nakudaminaʼ aʼkhá mbiiʼ, xú káʼnii gándoo guyaridáá ngajua dí gíʼdoo Jeobá a̱ngiu̱lú anciano mu mumbayíí xa̱bu̱ mata̱nga̱a̱ a̱jkiu̱u̱n rá. Ga̱jma̱a̱ ndiéjuunʼ gíʼmaa muʼni ikháanʼ á mu a̱ngiu̱lú ancianos nuraʼwi̱i̱ dí muriya̱a̱ʼ mbáa náa congregación o rí mata̱nga̱a̱ mbu̱júu̱ xá. Mbuʼyáá xóo exti̱ʼña̱a̱ grajxe̱ rígi̱ náa i̱ʼwáʼ artículo.
AJMÚÚ 109 Gaʼndulúʼ kuʼyamijná ga̱jma̱a̱ xúgíʼ a̱jkiu̱lú
