ARTÍCULO RÍ MUʼNIGAJMAA 35
AJMÚÚ 123 Guguajún jmbu ga̱jma̱a̱ guʼnimbulúʼ
Xóo extambáñún bi̱ nirawíin náa congregación
“Narígá itháan gagi mekhuíí índo̱ mbáa xa̱bu̱ aʼkhá natanga̱a̱ a̱jkiu̱u̱n, ki xóo bi̱ mbá 99 xa̱bu̱ míjíinʼ bi̱ tséyóoʼ má mata̱nga̱a̱ a̱jkiu̱ún” (LUC. 15:7).
EDXU̱U̱
Náá numuu dí ndayóoʼ magajníín tikhuun xa̱bu̱ náa congregación ga̱jma̱a̱ xú káʼnii gándoo ancianos mumbañún mu matanga̱a̱ a̱jkiu̱ún, ma̱ngaa mu mambajxúúnʼ mbu̱júu̱ gajmiún Jeobá xá.
1, 2. a) Xú káʼnii endxa̱ʼwáminaʼ Jeobá ga̱jma̱a̱ numún bi̱ nixudami̱jna̱ aʼkhá bi̱ tsétanga̱a̱ a̱jkiu̱ún rá. b) Ndiéjunʼ dí nandoo Jeobá rá.
JEOBÁ tséʼthí dí xúgíʼ rí nuni̱ xa̱bu̱ nindxu̱u̱ májánʼ, nawi̱yu̱u̱ʼ kaʼyoo xúgíʼ enii aʼkhá dí nuni̱ (Sal. 5:4-6). Ikhaa nandoo rí muʼnimbaníí xtángoo dí nixnúlú dí na̱ʼkha̱ náa Biblia dí nindxu̱u̱ jmbu. Gajkhun má dí ikhaa ndaʼyoo dí nindxu̱lú xa̱bu̱ aʼkhá, ikha jngóo tségi̱ʼtu̱u̱n dí muʼnimbaníí mbá xúgíʼ xó má kaʼyoo (Sal. 130:3, 4). Mú ikhaa tségruiguíin “xa̱bu̱ bi̱ nda̱a̱ gamajkhún, bi̱ tséyamajkuíí rí májánʼ wéñuuʼ a̱jkiu̱u̱n Dios mu muni̱ xúgíʼ enii rí xkawiʼ” (Jud. 4). Náa Biblia naʼthí dí Dios maʼni gámbíin “xa̱bu̱ bi̱ nda̱a̱ gamajkhún” náa guerra dí mbiʼyuu Armagedón (2 Ped. 3:7; Apoc. 16:16).
2 Mú, Jeobá tsíyóo rí nimbáa maguma gámbáa. Xó má ndiʼyáá náa artículos dí nijngoo, náa Biblia naʼthí kaʼwu dí “ikhaa nandoo rí xúgíinʼ maguánú matanga̱a̱ a̱jkiu̱ún” (2 Ped. 3:9). Ancianos nduyaridáá Jeobá índo̱ naʼngo̱o̱ a̱jkiu̱ún ga̱jma̱a̱ numbayíí mbáa bi̱ nikudaminaʼ aʼkhá mbiiʼ mu matanga̱a̱ a̱jkiu̱u̱n, ma̱ngaa mu mambajxúu mbu̱júu̱ ga̱jma̱a̱ Jeobá. Mú raʼkháa xúgíinʼ endrigú dí mixtambáñún (Is. 6:9). Kúwá tikhuun bi̱ tsíñún gúriʼkumijnáa maski ajndu ancianos mbaʼa nuthu embañún mu matanga̱a̱ a̱jkiu̱ún. Ndiéjunʼ eni̱ índo̱ narígá xígi̱ kaʼnii xá.
“GURÍYA̱A̱ʼ XA̱BU̱ BUʼKO̱ BI̱ NAʼNI RÍ TSÉJMAA”
3. a) Xó má eʼthí náa Biblia, ndiéjunʼ gíʼmaa maguma índo̱ mbáa nakudaminaʼ aʼkhá mbiiʼ ga̱jma̱a̱ tsétanga̱a̱ a̱jkiu̱u̱n rá. b) Á mu mbáa xa̱bu̱ tsétanga̱a̱ a̱jkiu̱u̱n, náá numuu ma̱ndoo muʼthá dí ikhaa má niraʼwíí dí muriya̱a̱ʼ náa congregación xá.
3 Á mu mbáa nakudaminaʼ aʼkhá mbiiʼ ga̱jma̱a̱ tsétanga̱a̱ a̱jkiu̱u̱n, ikhú ancianos mbaʼyóoʼ munimbaníí kiʼtáñajunʼ dí na̱ʼkha̱ náa 1 Corintios 5:13: “Guríya̱a̱ʼ xa̱bu̱ buʼko̱ bi̱ naʼni rí tséjmaa náa ikháanʼla”. Nindxu̱u̱ asndu xóo xa̱bu̱ bi̱ nikudaminaʼ aʼkhá naraʼwíí makudaminaʼ má xúʼko̱ aʼkhá, ikhaa xtáa ragujxi̱i̱ dí niʼdu, xóo muʼthá nada̱a̱ʼ rí niʼni (Gál. 6:7). Numuu rí tándoo gáriʼkumina̱a̱ʼ maski ajndu ancianos mbaʼa nuthu ninimíjna̱ mumbayíí (2 Rey. 17:12-15). Dí xóo xtáa raʼni nasngájma dí tsíyoo gáʼnimbo̱o̱ kiʼtáñajunʼ ndrígóo Jeobá (Deut. 30:19, 20).
4. Náá numuu dí nanújngoo anuncio náa congregación índo̱ nuri̱ya̱a̱ʼ mbáa xá.
4 Índo̱ nuri̱ya̱a̱ʼ mbáa náa congregación ga̱jma̱a̱ numuu dí tsétanga̱a̱ a̱jkiu̱u̱n náa mbá aʼkhá mbiiʼ dí nikudaminaʼ, nagrigu mbá anuncio náa congregación mu muthi dí xa̱bu̱ buʼko̱ nánguá nindxu̱u̱ xa̱bi̱i̱ Jeobá. a Tséni rígi̱ mu dí muni̱ majti̱i̱, i̱ndó nuni̱ mu xúʼko̱ bi̱ kúwá náa congregación ma̱ndoo munimbáníí kiʼtáñajunʼ dí na̱ʼkha̱ náa Biblia, dí ni xámbájxu̱u̱n gajmiún ní má xúpiʼtsu gajmiún mbóó (1 Cor. 5:9-11). Jeobá nixná kiʼtáñajunʼ rígi̱ ga̱jma̱a̱ mbá májánʼ numuu. Apóstol Pablo niʼnirámáʼ: “Mbá chíʼgíiʼ levadura naʼni makajxíi xúgíʼ xúwáʼ” (1 Cor. 5:6). Á mu tséri̱ya̱a̱ʼ náa congregación mbáa bi̱ tsíyoo gátanga̱a̱ a̱jkiu̱u̱n, xúgíinʼ a̱ngiu̱lú maguánú mundxa̱ʼwa̱míjna̱ dí tséyóoʼ má muni̱ tsiakimíjna̱ munimbaníí dí naʼthí náa xtángoo ndrígóo Jeobá dí nindxu̱u̱ jmbu (Prov. 13:20; 1 Cor. 15:33).
5. Xú káʼnii gíʼmaa mbuʼyáá bi̱ nánguá nindxu̱u̱ xa̱bi̱i̱ Jeobá ga̱jma̱a̱ náá numuu rá.
5 Xú káʼnii gíʼmaa mbuʼyáá bi̱ nánguá nindxu̱u̱ xa̱bi̱i̱ Jeobá rá. Maski ajndu nánguá embájxulú gajmiúlú, mú tsémbumulú kuʼyáá, nduʼyáá má dí ikhaa maʼga̱nú matanga̱a̱ mbu̱júu̱ náa eʼwíinʼ mugiu̱u̱ Jeobá, á mu ikhaa nandoo. Garmáʼáan a̱jkiu̱lú dí ni̱jkha̱nú mbá mbiʼi dí ikhaa nixnáximinaʼ mu maʼni ñajuunʼ Jeobá. Mú ngíná dí xúgi̱ nánguá xtáa raʼni dí nanigu̱u̱ʼ Jeobá ga̱jma̱a̱ rúʼko̱ nindxu̱u̱ gamíi (Ezeq. 18:31). Xúgi̱, kaʼníí rígá mbiʼi ga̱jma̱a̱ Jeobá ma̱ndoo maʼni mba̱a̱ a̱jkiu̱u̱n kaʼyoo, ikha jngóo nduʼyáá dí xa̱bu̱ buʼko̱ ma̱ndoo matanga̱a̱ a̱jkiu̱u̱n. Xú káʼnii gándoo gúmbayíí ancianos bi̱ nigájnáa náa congregación rá.
XÍGI̱ KAʼNII EMBAÑÚN ANCIANOS XA̱BU̱ BI̱ NIRAWÍIN NÁA CONGREGACIÓN
6. Ndiéjunʼ eni̱ ancianos mu ma̱ndoo mumbayíí mbáa bi̱ nigájnáa náa congregación rá.
6 Ndiéjunʼ eni̱ ancianos índo̱ mbáa nagájnáa náa congregación rá. Lá nuniña̱a̱nʼ mbá kayuuʼ ga̱jma̱a̱ nánguá egún gúyáá mu mumbayíí matanga̱a̱ náa Jeobá xáʼ. ¡Na̱nguá! Índo̱ comité bi̱ nindxu̱ún anciano nutháán mbáa xa̱bu̱ dí ikhaa ni xáxtáa náa congregación, nutháán tikhuu ndiéjunʼ gáʼyóoʼ maʼni mu matanga̱a̱. Raʼkháa i̱ndó rúʼko̱, á mu xa̱bu̱ buʼko̱ nasngájma dí nandoo matanga̱a̱ a̱jkiu̱u̱n, ikhiin nutháán dí manigu̱u̱nʼ dí mutamijná gajmiún nguáthá igu̱nʼ nda̱wa̱á mu mbuyáá á mu niriʼkhu̱u̱ xóo endxa̱ʼwáminaʼ. Á mu xa̱bu̱ naʼthí dí ma̱ndoo, ikhú ancianos nagún gúyáá mu mumbayíí matanga̱a̱ a̱jkiu̱u̱n ga̱jma̱a̱ ma̱ʼkha̱a̱ náa congregación. Mú, á mu xa̱bu̱ tsíyoo gáriʼkumina̱a̱ʼ ancianos tsémbumún kuyáá, ikhiin natangiín gúyáá nda̱wa̱á mu ma̱ndoo mutamijná gajmiún.
7. Xú káʼnii esngajmá ancianos dí nduyaridáá dí xóo nagáwíinʼ a̱jkiu̱u̱n Jeobá índo̱ nunimbaníí numuu mbáa bi̱ nuri̱ya̱a̱ʼ náa congregación xá. (Jeremías 3:12.)
7 Ancianos gíʼmaa mbuyaridáá dí xóo nagáwíinʼ a̱jkiu̱u̱n Jeobá índo̱ nunimbaníí numuu mbáa bi̱ naniñuuʼ congregación. Mbá xkri̱da, índo̱ israelitas túnimbu̱u̱n, Jeobá na̱nguá nigi̱ʼthu̱u̱n dí asndu índo̱ gátanga̱a̱ a̱jkiu̱ún ma̱ndoo mambáñún. Ikhaa nikuʼmiin profetas ndrígio̱o̱ mu dí mumbañún maski ajndu ikhiin xóó tsériʼkumijnáa o xóó tsétanga̱a̱ a̱jkiu̱ún. Xó má nijmañulúʼ náa raga̱jma̱ artículo dí kaʼyoo i̱yi̱i̱ʼ rígi̱, Jeobá nijmiuu profeta Oseas mu masngájma dí ikhaa gajkhun nagáwíinʼ a̱jkiu̱u̱n. Niʼthúu̱n Oseas dí ma̱ndoo mbayáa a̱ʼgiu̱u̱ maski ajndu kaʼníí xtáa rakudaminaʼ aʼkhá (Os. 3:1; Mal. 3:7). Xó má Jeobá, a̱ngiu̱lú ancianos nandún ga̱jma̱a̱ xúgíʼ a̱jkiu̱ún dí xa̱bu̱ matanga̱a̱ a̱jkiu̱u̱n ga̱jma̱a̱ ikhiin tsérikháá dí matanga̱a̱ (atraxnuu Jeremías 3:12). b
8. Xú káʼnii embáyulú xkridoo dxámá bi̱ nitanga̱a̱ mu makru̱ʼu̱lú májánʼ dí nagáwíinʼ a̱jkiu̱u̱n Jeobá rá. (Lucas 15:7.)
8 Garmáʼáan a̱jkiu̱lú xkri̱da ndrígóo dxámá bi̱ nitanga̱a̱, bi̱ niʼtálú ga̱jma̱a̱ numuu náa raga̱jma̱ artículo dí kaʼyoo i̱yi̱i̱ʼ rígi̱. Índo̱ anu̱u̱ ndiʼyoo, mbá nacha̱ “ni̱jkha̱ ragáyúu gátsijnuu, ndiyáraʼaa ga̱jma̱a̱ nixnúu beso” (Luc. 15:20). Texto rígi̱ naʼni mbuʼyáá dí xa̱bu̱ nikhi̱i̱ buʼko̱ tági̱ʼthu̱u̱n rí a̱ʼdióo maʼthúu̱n dí maʼni mba̱a̱ a̱jkiu̱u̱n kaʼyoo mu magruiguíi náa goʼwóoʼ. Dí niʼni, nigáyúu ni̱jkha̱ gágruiguíi a̱ʼdióo numuu dí nandoo kaʼyoo. Xúʼko̱ kaʼnii ku̱mu̱ún ancianos índo̱ tikhuun mugu̱ nandáti̱gi̱i̱n, ikhiin nunimíjna̱ dí mumbañún mu matangi̱ín náa guʼwún (Luc. 15:22-24, 32). Ra̱ʼkhá tháán edxún bi̱ kúwá mekhuíí índo̱ mbáa natanga̱a̱... ¡ga̱jma̱a̱ xúʼko̱ má nadxún mangiin bi̱ kúwá náa tsu̱du̱u̱ Ku̱ba̱ʼ! (Atraxnuu Lucas 15:7).
9. Ndiéjunʼ eʼthúún Jeobá muni̱ bi̱ nixudamíjna̱ aʼkhá mbiiʼ rá.
9 Náa mbá xúgíʼ dí nijmañulúʼ, na̱jkua̱nú nduʼyáá dí Jeobá tsénigu̱u̱ʼ dí maxtáa má xúʼko̱ náa congregación mbáa bi̱ nikudaminaʼ aʼkhá mbiiʼ. Mú, maski ajndu xúʼko̱ Jeobá tséniñuuʼ xa̱bu̱ buʼko̱, ikhaa naʼniminaʼ dí mambáyúu mu matanga̱a̱ a̱jkiu̱u̱n. Náa Oseas 14:4 naʼthí xú kaʼnii eʼñún Jeobá xa̱bu̱ bi̱ natanga̱a̱ a̱jkiu̱ún: “Mani̱i̱ a̱jkiu̱ún ga̱jma̱a̱ maguajún jmbu má xúʼko̱. Náa a̱jkiu̱nʼ gágajnúu rí maʼndoʼ ka̱ñu̱u̱n, numuu rí nakásngañu̱ʼ nitsíngúunʼ”. ¡Gíʼdoo wéñuuʼ numuu dí ancianos makuwá xawii mbuyáá á mu mbáa bi̱ nikudaminaʼ aʼkhá nagíʼdu̱u̱ natanga̱a̱ a̱jkiu̱u̱n! ¡Xúʼko̱ má gíʼdoo numuu dí bi̱ niniña̱a̱nʼ Jeobá munimíjna̱ dí matangi̱ín nacha̱ náa ikhaa!
10, 11. Xú káʼnii eni̱ ancianos mu mumbañún bi̱ naʼni má mba̱yu̱u̱ʼ tsiguʼ nirawíin náa congregación xá.
10 Xú káʼnii eni̱ ancianos mu mumbañún bi̱ kúwá má mba̱yu̱u̱ʼ tsiguʼ rexa̱a̱ ga̱jma̱a̱ numuu dí nirawíin náa congregación xá. Mbáa nánguá má kúwá ruxudamíjna̱ aʼkhá, xóo aʼkhá dí nini̱ nákha nirawíin, o mbáa asndu nimbumún má náá numuu nigájni̱ín náa congregación. Tséʼniuu á mu nimbumún o narmáʼáan a̱jkiu̱ún, ancianos nunimíjna̱ dí mbuñiínʼ ga̱jma̱a̱ magún gúñún. Índo̱ gágún gúñún, ma̱ndoo mutajkáan gajmiún ga̱jma̱a̱ muxnún tsiaki̱i̱ mu matangi̱ín mbu̱júu̱ náa congregación. Á mu mba̱yu̱u̱ʼ tsiguʼ má xtáa mbáa rexa̱a̱, ikhaa nánguá embájxu̱u̱ májánʼ ga̱jma̱a̱ Jeobá. Ikha jngóo, á mu ikhaa nandoo matanga̱a̱ náa congregación, ancianos gíʼmaa dí mbuyáaʼ mbáa ndxájulú xa̱biya̱ o a̱ʼgu̱ mu maʼsngóo ga̱jma̱a̱ Biblia, maski ajndu ikhaa xóó tsétanga̱a̱ mani̱ndxu̱u̱ xa̱bi̱i̱ Jeobá. Ancianos kaʼñún muri̱ya̱ʼ awan rígi̱.
11 Ancianos nandún mbuyaridáá dí nagáwíinʼ a̱jkiu̱u̱n Jeobá. Ikha jngóo nunimi̱jna̱ mbuñiínʼ ga̱jma̱a̱ mumbañún mbá xúgíinʼ xa̱bu̱ bi̱ nini̱ tsíngumi̱jna̱ náa Jeobá, ma̱ngaa mu nuxnún tsiaki̱i̱ mu matangi̱ín náa ikhaa. Á mu mbáa nasngájma dí natanga̱a̱ a̱jkiu̱u̱n ga̱jma̱a̱ naniñuuʼ aʼkhá dí niʼni, mbá nacha̱ ma̱ndoo matanga̱a̱ mani̱ndxu̱u̱ xa̱bi̱i̱ Jeobá (2 Cor. 2:6-8).
12. a) Nguáná gáʼyóoʼ rí ancianos munimbaníí tsu̱ma̱á numuu mbáa rá. b) Náá numuu dí xáʼyóoʼ mundxaʼwami̱jna̱ dí Jeobá xáʼni mba̱a̱ a̱jkiu̱u̱n kaʼñún tikhuun bi̱ nixudamíjna̱ aʼkhá rá. (Atayáá ma̱ngaa nota.)
12 Nguáná ancianos ndayóoʼ munimbaníí tsu̱ma̱á numuu mbáa, nákha xóó tsétanga̱a̱ náa congregación, mbá xkri̱da á mu xa̱bu̱ bi̱ nandoo matanga̱a̱ niʼnigínáa mbáa ada̱ chíʼgíiʼ, niʼthí dí raʼkhí ga̱jma̱a̱ numuu xuajñuu Jeobá o nikudaminaʼ aʼkhá ga̱jma̱a̱ i̱mba̱a̱ a̱ʼgu̱ mu ma̱ndoo maniña̱a̱ʼ a̱ʼgiu̱u̱. Á mu nikudaminaʼ mbá aʼkhá dí xóo xígi̱ kaʼnii, ancianos ndayóoʼ mbuyáá á mu gajkhun natanga̱a̱ a̱jkiu̱u̱n (Mal. 2:14; 2 Tim. 3:6). Ikhiin ndayóoʼ dí muñewu̱u̱n mugu̱. Mú, ma̱ngaa gíʼmaa marmáʼáan a̱jkiu̱lú dí Jeobá ma̱ndoo magruiguíin mbu̱júu̱ xa̱bu̱ bi̱ gajkhun natanga̱a̱ a̱jkiu̱ún ga̱jma̱a̱ á mu nuniña̱a̱nʼ ruxudamíjna̱ aʼkhá dí mbiiʼ. Maski ajndu ancianos nunimbaníí numuu mbáa bi̱ niʼni dí raʼkhí kayuuʼ o niʼniún dí raʼkhí eʼwíinʼ, ikhiin ragíʼmaa mundxa̱ʼwa̱míjna̱ dí Jeobá nditháan xáʼni mba̱a̱ a̱jkiu̱u̱n kaʼyoo xa̱bu̱ buʼko̱ (1 Ped. 2:10). c
DÍ MA̱NDOO MUNI̱ BI̱ KÚWÍIN NÁA CONGREGACIÓN
13. Xú káʼni mixtiʼkhu eʼni gajmiúlú mbáa bi̱ xtáa censurado ga̱jma̱a̱ bi̱ niri̱ya̱a̱ʼ náa congregación rá.
13 Xó má ndiʼyáá náa artículo dí ninújngoo, nguáná nanújngoo anuncio dí mbáa xtáa censurado (nijuaxpríguii). Á mu dí xúʼko̱ ma̱ndoo má mambaxú gajmiúlú, numuu rí nduʼyáá dí nitanga̱a̱ a̱jkiu̱u̱n ga̱jma̱a̱ niniñuuʼ rakudaminaʼ aʼkhá (1 Tim. 5:20). Ikhaa xtáa má xúʼko̱ náa congregación ga̱jma̱a̱ ndayóoʼ dí a̱ngiu̱lú muxnáá tsiaki̱i̱ mu maʼni má xúʼko̱ dí nindxu̱u̱ májánʼ (Heb. 10:24, 25). Mú i̱mba̱ núthu nindxu̱u̱ índo̱ mbáa nuri̱ya̱a̱ʼ náa congregación. Ni xándoo mambaxúlúʼ gajmiúlú ikhaa ni má xándoo muphiʼtsu mbóó gajmiúlú (1 Cor. 5:11).
14. Ndiéjunʼ gíʼmaa maraʼwíí maʼni mámbáa cristiano ga̱jma̱a̱ numún bi̱ nirawíin náa congregación rá. (Atayáá ma̱ngaa xtiʼkhuu.)
14 Lá nditháan ragíʼmaa muʼtámíjná gajmiúlú mbáa bi̱ niriya̱a̱ʼ náa congregación ráʼ. Na̱nguá má. Dí ragíʼmaa mu̱ʼni̱ nindxu̱u̱ dí mambajxúlúʼ gajmiúlú. Á mu dí ku̱ma̱ ndrígulú dí nigumaratáá ga̱jma̱a̱ Biblia naniñulú dí muʼthán xa̱bu̱ buʼko̱ dí ma̱ʼkha̱ náa reunión ma̱ndoo má muʼthán, mbáa xa̱bu̱ buʼko̱ nindxu̱u̱ bi̱ kuʼyáá o mbáa bi̱ nimbájxulú gajmiúlú. Á mu na̱jkha̱ náa reunión, ndiéjunʼ gíʼmaa mu̱ʼni̱ rá. Nákha ginii nakru̱ʼu̱lú dí ragíʼmaa muʼtamíjná gajmiúlú. Mú dí xúgi̱, á mu ku̱ma̱ ndrígulú naniñulú, ma̱ndoo má murajxi̱i̱ o muʼthán rí májánʼ niʼni dí ni̱ʼkha̱ náa reunión. Mú xándoo má muʼtámíjná gajmiúlú wéñuuʼ o dí mambájxu gajmiúlú.
Mámbáa cristiano gíʼmaa majmuu májánʼ ku̱ma̱ ndrígóo dí nigumaratáá ga̱jma̱a̱ Biblia mu maraʼwíí á mu ma̱ndoo maʼthúu̱n mbáa bi̱ niriya̱a̱ʼ náa congregación mu ma̱ʼkha̱ náa reunión o marajxi̱i̱ ga̱jma̱a̱ maʼthúu̱n dí májánʼ niʼni rí ni̱ʼkha̱. (Atayáá kutriga̱ 14).
15. Tsíín eʼthí ga̱jma̱a̱ numún náa 2 Juan 9-11 rá. (Atayáá ma̱ngaa kúgumaʼá “ Lá nindxu̱u̱ ikháá má aʼkhá dí niʼthí Juan ga̱jma̱a̱ Pablo ráʼ”.)
15 Mbáa nurajximíjnalú: “Náá numuu dí náa Biblia naʼthí dí, bi̱ narajxi̱i̱ xa̱bu̱ buʼko̱ ‹nagiʼdoo aʼkhúun náa dí ra̱májánʼ eʼni› rá.” (Atraxnuu 2 Juan 9-11.) Ajngáa dí na̱ʼkha̱ raʼthí náa i̱ʼwáʼ versículos naʼni makru̱ʼu̱lú dí gi̱i̱ naʼthí ga̱jma̱a̱ numún bi̱ nindxu̱ún apóstatas, ga̱jma̱a̱ bi̱ nuni̱ dí eʼwíinʼ muni̱ rí náa Biblia naʼthí dí nindxu̱u̱ ra̱májánʼ (Apoc. 2:20). Ikha jngóo, á mu mbáa xa̱bu̱ naʼsngáa rí nindxu̱u̱ minduwaʼ o naʼni rí eʼwíinʼ muxudamijná aʼkhá, ancianos ragíʼmaa magún gúyáá. Gajkhun má dí nda̱wa̱á xa̱bu̱ buʼko̱ ma̱ndoo mariʼkumina̱a̱ʼ. Mú á mu xóó tsériʼkumina̱a̱ʼ, ikháánʼlú ragíʼmaa murajxi̱i̱ ni má ragíʼmaa muʼthán dí maʼga náa reunión.
GUʼYARIDÁÁ DÍ NAGÁWÍINʼ A̱JKIU̱U̱N JEOBÁ GA̱JMA̱A̱ DÍ NANDOO KAʼYULÚ
16, 17. a) Ndiéjunʼ eyoo Jeobá muni̱ bi̱ nixudamíjna̱ aʼkhá rá. (Ezequiel 18:32.) b) Xú káʼnii gándoo gúñajunʼ mbóó gajmiún Jeobá ancianos rá.
16 Náa mbá witsu artículo rígi̱ nijmañulúʼ dí Jeobá tsíyoo dí nimbáa maguma gámbáa (atraxnuu Ezequiel 18:32). d Nandoo dí bi̱ nixudamíjna̱ aʼkhá matangi̱ín mambajxúún gajmiún ikhaa (2 Cor. 5:20). Ikha jngó asndu nákha niʼníí má Jeobá naʼthúún bi̱ niniña̱a̱nʼ, dí matangi̱ín náa ikhaa. Ra̱ʼkhá tháán mitsaanʼ dí a̱ngiu̱lú ancianos ma̱ndoo muñajunʼ mbóó gajmiún Jeobá mu mumbañún matangi̱ín bi̱ nixudamíjna̱ aʼkhá mbiiʼ (Rom. 2:4; 1 Cor. 3:9).
17 ¡Ra̱ʼkhá tháán edxún bi̱ kúwá mekhuíí índo̱ mbáa natanga̱a̱ a̱jkiu̱u̱n! Anu̱lú Jeobá bi̱ xtáa mekhuíí, ra̱ʼkhá tháán gagi xtáa índo̱ mbáa mugiu̱u̱ bi̱ nindáti̱ga̱a̱ natanga̱a̱ mbu̱júu̱ náa congregación. Gundxaʼwámíjná má xúʼko̱ ga̱jma̱a̱ numuu dí nagáwíinʼ a̱jkiu̱u̱n, dí nandoo kaʼyulú ga̱jma̱a̱ dí xóo májáanʼ wéñuuʼ a̱jkiu̱u̱n Jeobá, xúʼko̱ gáʼni dí mámbá mbiʼi maʼndulú kuʼyáá itháan (Luc. 1:78).
AJMÚÚ 111 Rígá mbaʼa wéñuʼ numuu rí kuwáanʼ gagi
a Ni xúʼthá dí mbáa xa̱bu̱ nigumaa expulsar. Xó má niʼnirámáʼ Pablo náa 1 Corintios 5:13, dí xúgi̱ muʼthá dí niri̱ya̱a̱ʼ náa congregación mbáa ndxájulú xa̱biya̱ o a̱ʼgu̱ bi̱ nikudaminaʼ mbá aʼkhá ga̱jma̱a̱ tsétanga̱a̱ a̱jkiu̱u̱n. Ikha jngóo a̱ngiu̱lú ancianos ndayóoʼ muraʼwi̱i̱ dí xa̱bu̱ buʼko̱ ni xánindxu̱u̱ xa̱bi̱i̱ Jeobá.
b Jeremías 3:12: “Ayuʼ gárátha̱ ajngáa rígi̱ náa norte: Gatanga̱án Israel bi̱ tséʼnimbo̱o̱, eʼthí Jeobá. Xáyala ga̱jma̱a̱ sia̱nʼ, numuu rí ikhúún na̱ni̱ rí jmbu, eʼthí Jeobá. Xákiʼnún asndu kámuu”.
c Náa Biblia naʼthí dí Dios xándoo maʼni mba̱a̱ a̱jkiu̱u̱n kaʼñún tikhuun bi̱ nixudamíjna̱ aʼkhá, numuu dí xa̱bu̱ buʼko̱ nuthi má xúʼko̱ dí raʼkhí ga̱jma̱a̱ numuu Dios. Mú i̱ndó Jeobá ga̱jma̱a̱ Jesús ma̱ndoo muthi á mu muni̱ mba̱a̱ a̱jkiu̱ún kuyáá o na̱nguá mbáa bi̱ nikudaminaʼ aʼkhá (Mar. 3:29; Heb. 10:26, 27).
d Ezequiel 18:32: “Tséʼni maʼdxuʼ índo̱ mbáa nakháñuu. Ikha jngóo gagutangáanʼla náa ikhúún ga̱jma̱a̱ xúʼko̱ makuwáanʼla. Eʼthí Tátá Jeobá bi̱ itháán mba̱a̱”.
