1. Náá numuu rí Jesús niʼthí dí xa̱bi̱i̱ ni̱ndxu̱ún xóo mugu̱ rá.

JESÚS niʼni mbríguminaʼ gajmíi̱n xa̱bi̱i̱ xóo mbáa báxtúu gajmíi̱n mugiu̱u̱ (Juan 10:14). Xkri̱da dí nijmuu ninindxu̱u̱ májánʼ numuu dí mugu̱ nuniʼniiʼ báxtúu ga̱jma̱a̱ nunimbu̱ún kuyáá. Mbáa xa̱bu̱ bi̱ na̱jkha̱ pasiá, niʼthí dí ndiʼyoo: “Ninduxu muríyaxuʼ video ndrígu̱ún tikhun mugu̱, ikha jngó ninixu rí maguwáʼ kanuu, mú na̱nguá niguwáʼ numuu rí na̱nguá eniʼnu̱ʼ aʼwúxu. Ikhú ni̱ʼkha̱ mbáa dxámá bi̱ nañewu̱u̱n, asndu xóó tsémbóo randxaʼwún índo̱ nigún kidxuuʼ”.

2, 3. a) Xú káʼnii esngajma xa̱bi̱i̱ Jesús dí nudxawíín aʼwóo rá. b) Ndiéjunʼ guʼyáá náa artículo rígi̱ ga̱jma̱a̱ imbo̱o̱ rá.

² Rí ndiʼyoo xa̱bu̱ bi̱ ni̱jkha̱ pasiá, naʼni marmáʼáan a̱jkiu̱lú rí Jesús niʼthí muni̱ mugiu̱u̱ índo̱ niʼthí: “Ikhiin [...] mudxawíín aʼwóʼ” (Juan 10:16). Mú, Jesús xtáa mekhuíí, xú káʼnii gándoo guʼdxawíín dí naʼthí xá. Mbá rí ikhaa nindxu̱u̱ rí muʼni dí ikhaa niʼsngáa (Mat. 7:24, 25).

³ Náa artículo rígi̱ ga̱jma̱a̱ imbo̱o̱, mbuʼyáá ndiéjunʼ nindxu̱u̱ tikhuu dí niʼsngáa Jesús. Mbuʼyáá dí Jesús bi̱ nindxu̱u̱ báxtúu bi̱ májáanʼ niʼsngúlúʼ tikhuu dí gíʼmaa muniʼñááʼ ru̱ʼni̱ ga̱jma̱a̱ tikhuu dí gíʼmaa mu̱ʼni̱ ikháánʼ. Ginii mbuʼyáá a̱jma̱ dí gíʼmaa muniʼñááʼ ru̱ʼni̱ rí niʼthúlú.

4. Xó má eʼthí náa Lucas 12:29, ndiéjunʼ rí migamíi maʼni ‹maxmiéjunlú wéñuuʼ› rá.

⁴ (Atraxnuu Lucas 12:29). * Jesús niʼthún xa̱bi̱i̱ rí ‹xáxmiéjúúnʼ  wéñuuʼ› mbuyáʼ rí nda̱ñúunʼ. Nduʼyáá dí ajngáa rígi̱ nindxu̱u̱ májánʼ ga̱jma̱a̱ nañambáá wéñuuʼ. Mú nguáná naʼni mingíjyúuʼ maski ajndu nandulú muʼnimbáníí. Mbuʼyáá náá numuu.

5. Ndíjkha rí naxmiéjúúnʼ tikhuun a̱ngiu̱lú rá.

 ⁵ Mbáa tikhuun a̱ngiu̱lú naxmiéjúnʼ wéñuuʼ rí xóo gúyáʼ ganitsu, xtíin ga̱jma̱a̱ náa makuwá. Mbáa naʼni gakhi̱i̱ wéñuuʼ ga̱jma̱a̱ numuu mbújkha̱a̱ náa xuajin dí kúwá. Mbáa naʼni mingíjyúuʼ mbuyáʼ mba̱a̱ mbújkha̱a̱ rí majmúún bi̱ kúwá náa guʼwún. O mbáa bi̱ nañajunʼ mu maxnúún rí nda̱ñúunʼ bi̱ kúwá náa guʼwóo nikháñuu, ikha jngóo bi̱ kúwá ikhí nánguá xóo mbuyáʼ mbújkha̱a̱. Nandii COVID-19 niʼni rí mbaʼiin wéñuuʼ xa̱bu̱ ní xáguáʼdáá ñajunʼ ga̱jma̱a̱ nándáa náa muda̱a̱ʼ mbújkha̱a̱ (Ecl. 9:11). Á mu kuwáánʼ xóo niʼthá o nuraʼníí i̱ʼwáʼ xkujndu, xú káʼnii gándoo gúʼnimbáníí consejo dí niʼthí Jesús rí muniʼñááʼ raxmiéjunlú wéñuuʼ rá.

6. Arathá ndiéjunʼ nigíʼnuu apóstol Pedro mbá miʼtsú.

⁶ Mbá miʼtsú, apóstol Pedro ga̱jma̱a̱ eʼwíinʼ apóstoles nagún ga̱jma̱a̱ barco náa lamáa ndrígóo Galilea índo̱ niʼni giñánʼ mbiʼ. Mú índo̱ ndiyáá rí Jesús na̱jkha̱ kruámuuʼ náa inuu iyaʼ, Pedro niʼthí: “Tátá, á mu ikháán, atani̱ dí maʼgá kruámuʼ náa inuu iyaʼ mu maʼgá gátsijnaaʼ”. Índo̱ Jesús niʼthúu̱n “¡Ayi̱!”, “ikhú Pedro nigajtaa náa barco ga̱jma̱a̱ ni̱jkha̱ kruámuuʼ náa inuu iyaʼ mu maʼga gátsijnuu Jesús. Mú índo̱ ndiʼyoo rí gakhi̱i̱ exnúu giñánʼ, nimíñuu ga̱jma̱a̱ nigíʼdu̱u̱ nirmáʼáan náa iyaʼ, ikhú nindxa̱ʼwá: ‹¡Tátá, atanikríñuuʼ!›”. Jesús “nikruiyaʼ ñawúunʼ” ga̱jma̱a̱ niʼni kríyaaʼ. Nduʼyáá dí Pedro niʼngo̱o̱ ni̱jkha̱ kruámuuʼ náa inuu iyaʼ índo̱ niyejxi̱ má xúʼko̱ náa Jesús, mú índo̱ niyejxi̱ náa naxnúu  giñánʼ mbiʼ, nimíñuu ikha jngóo nirmáʼáan náa iyaʼ (Mat. 14:24-31).

7. Ndiéjunʼ eʼsngúlúʼ dí nigíʼnuu Pedro rá.

⁷ Rí nigíʼnuu Pedro naʼsngúlú mbá ikha. Índo̱ nigajtaa náa barco ga̱jma̱a̱ ni̱jkha̱ kruámuʼ náa iyaʼ, na̱nguá nikumu̱u̱ rí maʼnijngaminaʼ ga̱jma̱a̱ rí marmáʼáan náa iyaʼ, ikhaa nikumu̱u̱ rí maʼga̱nú asndu náa wíji̱ Jesús, mú na̱nguá nijmaa numuu rí niyexi̱ náa naʼni giñánʼ mbiʼ. Gajkhun má ikháanʼlu xájmáán mu̱ʼgua̱ kruámulú náa inuu iyaʼ, mú nuraʼníí xkujndu rí naʼni makawábaaʼ fe ndrígúlú. Á mu tsékumulú kuʼyáá Jeobá ga̱jma̱a̱ rí nakudaminaʼ maʼni nda̱wa̱á, maʼni rí xámbáxulú májánʼ gajmiúlú. Tséʼniuu má asndu xkáʼnii xkujndu dí nuraʼníí, gakumulúʼ kuʼyáá Jeobá rí ikhaa majmaa mambáyulú. Xú káʼnii gándoo gúʼni̱ rá.

8. Ndiéjunʼ gámbáyulú mu xáxmiéjunlú ga̱jma̱a̱ numuu rí ndayúlú rá.

⁸ Mbá rí mambáyulú nindxu̱u̱ rí muriʼkuriya̱a̱ʼ dí naxmiéjunlú mu makumulúʼ kuʼyáá Jeobá. Á mu nuʼni ginii ñajuunʼ Jeobá ikhaa má nakudaminaʼ rí maxnúlú dí gáʼyulúʼ (Mat. 6:32, 33). Ikhaa naʼnimbánuu má xúʼko̱ rígi̱ (Deut. 8:4, 15, 16; Sal. 37:25). Á mu Jeobá nañewu̱u̱n ñu̱ʼu̱ ga̱jma̱a̱ ri̱ʼi̱, xáʼyóoʼ maxmiéjunlú ndiéjunʼ gúʼphu̱ o ndiéjunʼ guʼgíʼ (Mat. 6:26-30; Filip. 4:6, 7). Xó má xabuanii bi̱ gajkhun nandún kuñúún e̱jñún, nuxnún dí nda̱ñúunʼ e̱jñún, xúʼko̱ má Anu̱lú bi̱ xtáa mekhuíí numuu rí nandoo kaʼñún xa̱bi̱i̱ ikha jngóo naxnún rí nda̱ñúunʼ. Ma̱ndoo mbuʼyáá gajkhun dí Jeobá má gañewunlúʼ.

9. Ndiéjunʼ ejmañaaʼ ikháán dí nigíʼnún xa̱bu̱ gajmii rá.

⁹ Guʼyáá mbá náa nasngájma dí Jeobá ma̱ndoo maxnúlú rí ndayúlú. Xa̱bu̱ gajmii bi̱ kúwá runi̱ káxi̱ ñajuunʼ Jeobá nigún itháán rí mbá hora ga̱jma̱a̱ kárriu̱ún rí wayuu mu magún gúñiin tikhuun a̱ngiu̱lú gu̱ʼu̱ bi̱ kúwá runi̱ káwumíjná mu magún kudiin reunión. Ndxájulú xa̱biya̱ niʼthí: “Nda̱wa̱á dí nijngoo reunión, nithu̱u̱nxu a̱ngiu̱lú rí magún náa guʼwúxu guphiʼtsu. Mú nda̱wa̱á nirmáʼáan a̱jkiu̱xu dí nda̱a̱ nimbá dí muxnu̱u̱xu”. Ndiéjunʼ gúni a̱ngiu̱lú bugi̱ rá. Ikhaa má niʼthí xóó: “Índo̱ nijkuánuuxu, ndiya̱a̱xu dí náa riejuun guʼwá tri̱ga̱ a̱jma̱ bolsa mba̱ʼu̱ náa gajti mbaʼa ganitsu. Na̱nguá ndiya̱a̱xu tsáa niniñuuʼ. Jeobá niñewu̱u̱nxu”. Nguáthá mbiʼi nda̱wa̱á kárriu̱ún xa̱bu̱ gajmii bugi̱ nichúu. Nda̱ñúunʼ mu magún ga̱jma̱a̱ náa mutaraʼa, mú nánguá kuáʼdáá mbújkha̱a̱ muni̱ májáanʼ. Ikha jngóo nigún kuñu̱u̱n náa naguma májáanʼ carro mu mbuyáá nguáthá gagájnuu muni̱ májáanʼ. Ikhí nigájnuu mbáa xa̱bu̱ bi̱ nirajxi̱, tsáa kárriu̱u̱ rúʼko̱. Ikhú ndxájulú niʼthí dí ndrígóo ikhaa ga̱jma̱a̱ rí ndayóoʼ miʼni májáanʼ. Ikhú xa̱bu̱ buʼko̱ niʼthí: “Tséʼniuu má. A̱ʼgiu̱ʼ nandoo mbá carro xóo xígi̱ ga̱jma̱a̱ color rígi̱. Nguáthá gáʼndaaʼ ma̱ni̱ numuu”. Ndxájulú nikhánuu itháan mba̱a̱ mbújkha̱a̱ mu maʼtsí imbo̱o̱, ikhaa niʼthí: “Asndu tséyóoʼ má mata̱ xóo nikumuxu mbiʼi rúʼko̱. Ndiya̱a̱xu dí nirígá rúʼko̱ ninindxu̱u̱ numuu rí Jeobá nimbáyuxu”.

10. Xú káʼnii embáyulú Salmo 37:5 mu xáxmiéjunlú wéñuuʼ ga̱jma̱a̱ numuu rí ndayúlú rá.

¹⁰ Índo̱ nuʼdxawíín dí naʼthí báxtúu bi̱ májáanʼ ga̱jma̱a̱ nuniʼñááʼ raxmiéjunlú wéñuuʼ ga̱jma̱a̱ numuu mbújkha̱a̱, ma̱ndoo mbuʼyáá gajkhun dí Jeobá má gáxnulú dí ndayúlú (atraxnuu Salmo 37:5; * 1 Ped. 5:7). Gundxaʼwámíjná ga̱jma̱a̱ numuu xkujndu dí na̱ʼkha̱ raʼthí náa  kutriga̱ 5. Mbáa asndu xúgi̱ Jeobá najmiuu bi̱ kayá edxu̱u̱ náa guʼwúlú  mu mambáyulúʼ muguaʼdáá rí ndayúlú mámbá mbiʼi. Mú á mu bi̱ kayá edxu̱u̱ náa guʼwúlú nánguá xóo maxnúlú ganitsu o nindatígoo ñajunʼ, Jeobá má gáxnúlúʼ rí ndayúlú. Rí xúgi̱ mbuʼyáá i̱mba̱ dí naʼthúlú báxtúu bi̱ májáanʼ dí gíʼmaa muniʼñááʼ ru̱ʼni̱.

11. a) Xó má naʼthí náa Mateo 7:1, 2, ndiéjunʼ rí Jesús niʼthí dí muniʼñááʼ ru̱ʼni̱ rá. b) Ndíjkha rí naʼni mingíjyúuʼ rá.

¹¹ (Atraxnuu Mateo 7:1, 2). * Jesús má ndiʼyoo rí ni̱ndxu̱lú xa̱bu̱ aʼkhá ga̱jma̱a̱ rí i̱ndó nduʼyáá náa rí nakiéʼkúún eʼwíinʼ. Ikha jngóo niʼthí: “Xútha dí guáʼdáá aʼkhúún a̱ngia̱la”. Maski ajndu nuʼnimi̱jna̱ rí xúʼthá numún a̱ngiu̱lú nguáná naʼni mingíjyúuʼ. Ndiéjunʼ gándoo mu̱ʼni̱ á mu xúʼko̱ narígá rá. Gudxawíín rí niʼthí Jesús ga̱jma̱a̱ guʼnimi̱jna̱ muniʼñááʼ ruʼthá numún eʼwíinʼ.

12, 13. Xú káʼnii embáyuluʼ xkri̱da ndrígóo Jeobá mu xúʼthá numún eʼwíinʼ rá.

¹² Rí mundxaʼwamíjná xkri̱da ndrígóo Jeobá nambáyulúʼ, numuu rí ikhaa ndaʼyoo i̱ndó dí májánʼ rí nuni̱ eʼwíinʼ. Xúʼko̱ niʼni ga̱jma̱a̱ rey David bi̱ niʼni mbaʼa dí raʼkhí kayuuʼ. Mbá xkri̱da nibóoʼ ga̱jma̱a̱ Bat-Seba ma̱ngaa nikuʼma dí muxiyáa ajmbio̱o̱ (2 Sam. 11:2-4, 14, 15, 24). Raʼkháa i̱ndó ikhaa nimínuuʼ ma̱ngaa nimíniiʼ bi̱ kúwá náa goʼwóo asndu eʼwíinʼ gu̱ʼwi̱i̱ (2 Sam. 12:10, 11). I̱mba̱ aʼphu̱ na̱nguá nikumu̱u̱ kaʼyoo káxi̱ Jeobá índo̱ niʼtáñajunʼ mbá dí rakáʼyoo, dí muni̱ censo mu mbaʼyoo nguáthi̱i̱n soldados kúwá náa Israel. Mbáa numuu rí niʼnimbamínáʼ ikha jngóo nindoo mbaʼyoo nguáthi̱i̱n soldados gíʼdiin. Ndiéjunʼ nirígá nda̱wa̱á rá. Ga̱jma̱a̱ numuu rúʼko̱ nikháñún mbá 70,000 israelita ga̱jma̱a̱ numuu nandii (2 Sam. 24:1-4, 10-15).

¹³ Á mu ikháanʼ nikuwáánʼ náa Israel nákha ikhú, ndiéjunʼ nindxaʼwamíjna ga̱jma̱a̱ numuu David rá. Lá niʼthá dí ikhaa gíʼdoo aʼkhúun ga̱jma̱a̱ rí na̱nguá kaʼyoo rí Dios maʼni mba̱a̱ a̱jkiu̱u̱n kaʼyoo xáʼ. Jeobá na̱nguá nidxaʼwáminaʼ xúʼko̱. Ikhaa ndiʼyoo rí David ninindxu̱u̱ jmbii mbayuuʼ mbiʼi rí nixtáa ga̱jma̱a̱ rí nitanga̱a̱ a̱jkiu̱u̱n. Ikha jngóo niʼni mba̱a̱ a̱jkiu̱u̱n kaʼyoo náa aʼkhá dí nikudaminaʼ. Ndiʼyoo dí David nindoo kaʼyoo wéñuuʼ ga̱jma̱a̱ rí nandoo maʼni dí májánʼ. Lá ragájkhun dí nadxuu a̱jkiu̱lú índo̱ nduʼyáá rí Dios ndaʼyoo rí májánʼ rí nuʼni ráʼ. (1 Rey. 9:4; 1 Crón. 29:10, 17.)

14. Ndiéjunʼ nimbáñún tikhuun a̱ngiu̱lú muniñaaʼ rutha numún eʼwíinʼ rá.

¹⁴ Á mu Jeobá ndaʼyoo náa májánʼ dí nuni̱ xa̱bu̱ aʼkhá, ikháanʼlu ma̱ngaa ma̱ndoo mu̱ʼni̱ xúʼko̱ gajmiúlú eʼwíinʼ. Ra̱mingíjyúuʼ mbuʼyáá rí nakiéʼkúún ga̱jma̱a̱ muʼthá muʼthá numún. Mú xa̱bu̱ bi̱ ndaʼyáridoo Jeobá nambáxu̱u̱ gajmíi̱n eʼwíinʼ maski ajndu ndaʼyoo náa dí tséʼngu̱u̱n gúni májánʼ. Mbá diamante dí xóó tsejuiʼtháá mbáa nakujmaa xkawiʼ, mú xa̱bu̱ bi̱ nakro̱ʼo̱o̱ raʼkháa i̱ndó ndaʼyoo dí mbájníí, na̱jkha̱nú ndaʼyoo nguáthá gágiʼdoo numuu. Xó má eʼni Jeobá ga̱jma̱a̱ Jesús, ikháanʼ ma̱ngaa gíʼmaa mbuʼyáá rí májánʼ dí nuni eʼwíinʼ raʼkháa i̱ndó dí xóo nakujmiin rí mbájníí.

15. Xú káʼnii embáyulú mbuʼyáá xóo kúwá eʼwíinʼ mu xúʼthá numún rá.

¹⁵ Raʼkháa i̱ndó ndayóoʼ mbuʼyáá dí májánʼ dí nuni̱ eʼwíinʼ mu xúʼthá dí raʼkhí ga̱jma̱a̱ numún, ndiéjunʼ i̱mba̱ gámbáyulú rá. Rí muʼnimi̱jna̱ mbuʼyáá xóo kúwá. Guʼyáá mbá xkri̱da ga̱jma̱a̱ numuu rígi̱. Mbá mbiʼi índo̱ Jesús xtáa náa templo, ndiʼyoo mbáa a̱ʼgú xuáʼa̱ dí nigruiʼyáʼ a̱jma̱ mbújkha̱a̱ ma̱jkha̱ʼ dí ragíʼdoo  wéñuuʼ numuu náa mbá rí najti mbújkha̱a̱. Ikhaa na̱nguá niraxi̱ náá numuu rí na̱nguá nigruiʼyáʼ itháan mbújkha̱a̱. Ikhaa ndiʼyoo náá numuu rí naʼni ga̱jma̱a̱ xóo xtáa, ga̱jma̱a̱ ndiʼyamajkuu numuu rí niʼni xóo má eʼngo̱o̱ (Luc. 21:1-4).

16. Ndiéjunʼ eʼsngáaʼ ga̱jma̱a̱ numuu rí niʼni Verónica rá.

¹⁶ Rí xóo ndiʼyoo Verónica naʼsngúlú dí gíʼdoo wéñuʼ numuu mundxaʼwamíjná rí xóo kúwá eʼwíinʼ. Náa congregación ndrígóo, xtáa mbáa a̱ʼgu̱ bi̱ naʼni mbaja̱a̱ mbáwíí a̱ʼdióo. Verónica niʼthí: “Niku̱mu̱ʼ rí na̱nguá eñambáá wéñuuʼ náa congregación, ikha jngóo nindxa̱ʼwa̱mínáʼ dí raʼkhí ga̱jma̱a̱ numún. Mú mbóʼ mbiʼi nigájnuʼ gátaraʼa gajmuʼ ru̱dúu̱ dxámá. Niʼthúnʼ xkujndu dí naraʼnuu ga̱jma̱a̱ numuu rí a̱ʼdióo gíʼdoo mbá nandii rí naʼniuu mingíjyúuʼ mambajxúu gajmíi̱n eʼwíinʼ. Naʼni xúgíʼ xóo eʼngo̱o̱ mu maxnúu rí ndayóoʼ dí maxtáa ga̱jma̱a̱ ma̱ngaa rí maʼni ñajuunʼ Dios. Nguáná rí a̱ʼdióo nandoo kháñuu wéñuuʼ, ndayóoʼ maʼga̱ reunión náa i̱mba̱ congregación”. Nda̱wa̱á Verónica ni̱jkha̱nú niʼthí: “Nditháan táku̱mu̱ʼ rí xúʼko̱ gakhii wéñuuʼ xtáa. Rí xúgi̱ nandoʼ ka̱yo̱o̱ itháan ga̱jma̱a̱ ndayamajkhuu xúgíʼ rí naʼni ga̱jma̱a̱ numuu Jeobá”.

17. Ndiéjunʼ eʼthúlú mu̱ʼni̱ Santiago 2:8, ga̱jma̱a̱ xóo gándoo muʼnimbaníí rá.

¹⁷ Ndiéjunʼ gíʼmaa mu̱ʼni̱ á mu nduʼyáá dí nuʼthá dí raʼkhí ga̱jma̱a̱ numún a̱ngiu̱lú rá.  Garmáʼáan a̱jkia̱a̱nʼ dí gíʼmaa maʼndulú kuʼñúún a̱ngiu̱lú (atraxnuu Santiago 2:8). * Ma̱ngaa gíʼmaa muʼtákáñii Jeobá mu mambáyulúʼ muniʼñááʼ ruʼthá numún a̱ngiu̱lú. Gu̱ʼni̱ xó má nuʼtájkáan índo̱ nduʼyáʼ muʼthámijna gajmiúlú ndxájulú. Mbáa rúʼko̱ gambáyulú rí muniʼníiʼ. Ma̱ngaa ma̱ndoo muʼthán dí maʼtáraʼa gajmiúlú o muphiʼtsu mbóó gajmiúlú. Índo̱ gúʼgua̱ runiʼníiʼ itháan, ma̱ndoo muʼnimi̱jna̱ mbuʼyaridáá Jeobá ga̱jma̱a̱ Jesús rí mbuʼyáʼ dí májánʼ rí naʼni ndxájulú. Xúʼko̱ gusngajmá rí nuʼnimbulú kiʼtáñajunʼ dí niʼthí báxtúu bi̱ májáanʼ rí muniʼñááʼ ruʼthá numún eʼwíinʼ.

18. Xú káʼnii gusngajmá rí nuʼdxawíín dí naʼthí báxtúu bi̱ májáanʼ rá.

¹⁸ Xó má mugu̱ nudxawíín dí naʼthí báxtúu, xúʼko̱ má bi̱ ni̱ndxu̱lú xa̱bi̱i̱ Jesús nuʼdxawíín dí naʼthí. Á mu nuʼnimi̱jna̱ muniʼñááʼ raxmiéjunlú ga̱jma̱a̱ rí maguaʼdáá ma̱ngaa rí muniʼñááʼ ruʼthá numún eʼwíinʼ, Jeobá ga̱jma̱a̱ Jesús maʼni tsajkurámáanʼlu. Tséʼniuu á mu ni̱ndxu̱lú “mugu̱ bi̱ rambáʼin” o bi̱ “eʼwíinʼ mugu̱”, guʼdxawíín ga̱jma̱a̱ guʼnimbulúʼ dí naʼthí báxtúu bi̱ májáanʼ (Luc. 12:32; Juan 10:11, 14, 16). Náa i̱mba̱ artículo mbuʼyáá a̱jma̱ dí niʼthí Jesús dí gíʼmaa muʼni bi̱ ni̱ndxu̱lú xa̱bi̱i̱.