Nitraxnuu tsumáá náa iwáá revista Bi̱ Nayejngoo dí nigájnuu ráʼ. Atayáá á mu majmáán matriʼña̱a̱ graxe̱ rígi̱:

Ndiéjunʼ eʼni mbuʼyáá dí naʼthí náa Santiago 5:11 índo̱ naʼthí dí Jeobá “májánʼ wéñuuʼ a̱jkiu̱u̱n ga̱jma̱a̱ nagáwíinʼ a̱jkiu̱u̱n” rá.

Nduʼyáá dí ga̱jma̱a̱ numuu dí Jeobá nagáwiinʼ a̱jkiu̱u̱n, xtáa xawii maʼni mba̱a̱ a̱jkiu̱u̱n kaʼyulú índo̱ nakiéʼkulu. Santiago 5:11 naʼni mbuʼyáá dí ikhaa nandoo mambáyulúʼ. Májánʼ gáʼni dí mbuʼyaridáá (w21.01, ináa 21).

Náá numuu rí Jeobá nigíʼ awan rí mbáa mayéʼga edxu̱u̱ rá.

Niʼni numuu rí nandoo kaʼyulú. Ga̱jma̱a̱ numuu awan rígi̱, bi̱ kúwá náa xuajñuu Jeobá naʼni rí makuwá tsímáá ga̱jma̱a̱ marígá májánʼ awan. Mbá guʼwíin bi̱ nduyamajkuíí awan rígi̱ nduyáá tsáa gíʼdoo iwáá ajngáa dí maʼthí índo̱ rígá mbá dí nuraʼwíí muni̱ ga̱jma̱a̱ tsáa eyá edxu̱u̱ dí maʼnimbánuu (w21.02, ináa 3).

Náá numuu rí gíʼmaa mu̱ʼni̱ tsumáá índo̱ najmulú aplicación rí muxuʼmá mensaje bi̱ ni̱ndxu̱lú cristiano rá.

Á mu mbáa naraʼwíí majmuu aplicación rígi̱, gíʼmaa maraʼwíin tsumáá xa̱bu̱ bi̱ mambáxu̱u̱ gajmíi̱n. Mú naʼni mingíjyúuʼ rígi̱ índo̱ kúwá mbaʼiin wéñuuʼ xa̱bu̱ náa mbá grupo bi̱ nuxuʼma mensaje (1 Tim. 5:13). Ma̱ngaa migamíi muthi mbá dí nirígá mú tséyáá á mu gajkhun nindxu̱u̱ ga̱jma̱a̱ dí majmiún a̱ngiu̱lú mbuʼyáʼ mbújkha̱a̱ (w21.03, ináa 31).

Ndíjkha rí Dios niniñuuʼ rí Jesús mamínuuʼ ga̱jma̱a̱ makhañúu rá.

Timbá, índo̱ nirajkaa náa ixi̱, Jesús nindoo niʼni káwíin bi̱ judío náa nijuiʼthá tsríguíin (Gál. 3:10, 13). Raga̱jma̱, xúʼko̱ niʼnirataa Jeobá mu mani̱ndxu̱u̱ Ndxajkun bi̱ mbayá edxu̱u̱. Ga̱jma̱a̱ ragajtsú, índo̱ Jesús niwi̱ji̱ jmbu nisngájma dí xa̱bu̱ numbaaʼ ma̱ndoo maguajún jmbu maski ajndu nuraʼníí xkujndu dí itháan gakhii (Job 1:9-11) (w21.04, ináa 16 ga̱jma̱a̱ 17).

Ndiéjunʼ gándoo mu̱ʼni̱ mu ma̱ndoo muʼtámíjná gajmiúlú xa̱bu̱ bi̱ naʼni mingíjyúuʼ muxkamiin náa guʼwún rá.

Ma̱ndoo muʼnimijna muʼtáraʼa hora rí kaʼnii muxkamiin náa guʼwún xa̱bu̱. Ma̱ngaa ma̱ndoo muʼtáraʼa mixtiʼkhu náa ma̱ndoo muxkamiin. Ga̱jma̱a̱ muriʼkhuíí xóo eʼtáraʼa, xóo muʼnirámáʼ carta (w21.05, ináa 15 ga̱jma̱a̱ 16).

Ndiéjunʼ nindoo gáʼthí apóstol Pablo índo̱ niʼthí: “Náa majñu̱u̱ʼ xtángoo asndu xóo nikháñuʼ náa xtángoo” rá. (Gál. 2:19.)

Náa Xtángoo ndrígóo Moisés nisngájma dí xa̱bu̱ numbaaʼ rígá mbaʼa dí nakiéʼkúún ma̱ngaa nixná ikhúún bi̱ Israel dí na̱jkha̱ kagui̱i̱n asndu náa Cristo (Gál. 3:19, 24). Rúʼko̱ nimbáyúu Pablo dí magruiguíi Jesús. Xúʼko̱ niʼni rí “nikháñuu náa xtángoo” numuu rí niʼthí ikhí nánguá nigiʼdoo tsiakii náa ikhaa (w21.06, ináa 31).

Dí najmañulú rí xóo Jeobá naʼngo̱o̱

Jeobá naʼngo̱o̱ a̱jkiu̱u̱n dí niguma gachíí mbiʼyuu, dí ninigaʼduunʼ dí ikhaa kaʼyoo maʼtáñajunʼ, dí tikhun e̱ji̱i̱n túnimbu̱ún, rí Gixa̱a̱ naʼni nduwaʼ má xúʼko̱, rí numíniiʼ xa̱bi̱i̱, rí nakháñún bi̱ nambájxu̱u̱ gajmíi̱n, dí raʼkhí eni̱ xa̱bu̱ ra̱míjíinʼ náa xa̱bi̱i̱ ga̱jma̱a̱ rí naguma gámbáa dí ikhaa niʼniwíi (w21.07, ináa 9 asndu 12).

Ndiéjunʼ ejmañuluʼ xóo niʼngo̱o̱ a̱jkiu̱u̱n José rá.

José niʼngo̱o̱ a̱jkiu̱u̱n dí raʼkhí nini̱i̱ a̱ngui̱i̱n. Ga̱jma̱a̱ numuu dí a̱ngui̱i̱n nigujua̱a̱, nini̱ tsu̱di̱i̱ mbá rí na̱nguá niʼni, ikha jngóo ni̱jkha̱ guʼwá e̱jua̱nʼ mbayuuʼ tsiguʼ náa Egipto (w21.08, ináa 12).

Ndiéjunʼ niʼtáriyaʼ marigá Ageo náa capítulo 2:6-9, 20-22 rá.

Xa̱bu̱ xánigu̱u̱nʼ mudxawíín ajngáa numuu Reino, mú mbaʼin manigu̱u̱nʼ majmañún dí gajkhun. Xájyúuʼ má mumíniiʼ iwáá kayuʼ xa̱bu̱ índo̱ gaguma gámbíin (w21.09, ináa 15 asndu 19).

Ndíjkha xáʼyóoʼ makanájkulu dí muʼtáraʼa rá.

Jeobá ndaʼyoo tsiakii dí nuʼni ga̱jma̱a̱ nadxuu a̱jkiu̱u̱n ga̱jma̱a̱ numuu rúʼko̱. Á mu tsékanajkulú ga̱jma̱a̱ tséniʼñááʼ ruʼtáráʼa, makuwáánʼ kámuu mbiʼi (w21.10, ináa 25 ga̱jma̱a̱ 26).

Xú káʼnii embáyulú Levítico 19 muʼnimbáníí consejo rígi̱: “Ganindxu̱u̱ kaʼwu náa xúgíʼ dí gúnila” rá. (1 Ped. 1:15.)

Mbáa versículo rígi̱ nigájnuu dí naʼthí náa Levítico 19:2. Náa capítulo 19 naʼthí mbaʼa xkri̱da rí xú káʼnii gándoo muʼnimbáníí mámbá mbiʼi dí kuwáánʼ dí naʼthí náa 1 Pedro 1:15 (w21.12, ináa 3 ga̱jma̱a̱ 4).