Nákha Jesús nixtáa mekhuíí nijmañuu rí mañajunʼ gajmíi̱n eʼwíinʼ. Índo̱ ni̱ʼkha̱ náa tsu̱du̱u̱ Ku̱ba̱ʼ, niniñuuʼ májánʼ xkri̱da náa bi̱ nimbayíí. Xú káʼnii embáyulú xkri̱da ndrígóo xá. Mbuʼyáá ajtsú ikha dí mambáyulú manindxu̱lúʼ bi̱ nañajunʼ májánʼ gajmíi̱n eʼwíinʼ, ma̱ngaa rí muñejunʼ mbá kambáxulú gajmiúlú eʼwíinʼ.

Xa̱bu̱ bi̱ najmañuu nañajunʼ gajmíi̱n eʼwíinʼ nindxu̱u̱ xa̱bu̱ wabaaʼ, nandoo kaʼñún bi̱ nañajunʼ gajmíi̱n ga̱jma̱a̱ tséʼnimbamínáʼ. Jesús nijmañuu náa Anu̱u̱ dí mani̱ndxu̱u̱ xa̱bu̱ wabaaʼ. Maski ajndu i̱ndó Jeobá kaʼyoo magumbiʼyuu bi̱ Niʼniwíi, mú niʼni dí magájnuriyo̱o̱ʼ ñajunʼ dí niʼni A̱ʼdióo índo̱ niñajunʼ ga̱jma̱a̱. Nakujmaa kaʼwu rígi̱ náa ajngáa rí niʼthí Dios: “Guʼni̱i̱ xa̱bu̱ xó má kaʼniáanʼlú” (Gén. 1:26). Índo̱ niʼthí xúʼko̱, Jesús ndiʼyoo rí Anu̱u̱ nindxu̱u̱ xa̱bu̱ wabaaʼ (Sal. 18:35).

Índo̱ Jesús ni̱ʼkha̱ náa tsu̱du̱u̱ Ku̱ba̱ʼ ninindxu̱u̱ xa̱bu̱ wabaaʼ. Índo̱ xa̱bu̱ nithi dí ra̱ʼkhá tháán májánʼ niʼni, nixnúu má xúʼko̱ gamajkhu Jeobá (Mar. 10:17, 18; Juan 7:15, 16). Ma̱ngaa, niʼniminaʼ rí maxtáa tsímáá gajmíi̱n xa̱bi̱i̱ ga̱jma̱a̱ niʼniún xóo bi̱ nimbáxu̱u̱ gajmíi̱n raʼkháa xóo ñumbáá ndrígóo (Juan 15:15). Asndu niʼjñáan rajkúún xa̱bi̱i̱ mu maʼsngúún dí gíʼmaa mani̱ndxu̱ún xa̱bu̱ wabiinʼ (Juan 13:5, 12-14). Xó má Jesús, gíʼmaa mangajulúʼ kuʼñúún a̱ngiu̱lú ga̱jma̱a̱ guʼyáá ndiéjunʼ eñu̱ún ikhiin ginii ki xóo ikháanʼlu. Índo̱ nduʼyamajkumijnálu ga̱jma̱a̱ na̱nguá eʼyáʼ mbuʼyáá tsáa gíʼmaa mbiʼyamajkuíí  itháan, rígá mbaʼa rí magajnúu májánʼ (Rom. 12:10).

Xa̱bu̱ bi̱ nindxu̱u̱ wabaaʼ ma̱ngaa nakro̱ʼo̱o̱ rí “náa kuwa mbaʼin bi̱ nuxna xtágabu nagájnuu májánʼ rí nuni” (Prov. 15:22). Tséʼniuu má nguáthá mba̱yu̱u̱ʼ eñajunʼ o dí najmañulúʼ, garmáʼáan a̱jkiu̱lú rí nimbáa xa̱bu̱ numbaaʼ na̱nguá má eʼyoo xúgíʼ. Asndu Jesús ni̱jkha̱nú ndiʼyoo dí na̱nguá má eʼyoo xúgíʼ (Mat. 24:36). Ma̱ngaa nixmiéjuunʼ mbaʼyoo xóo endxaʼwamíjna xa̱bi̱i̱ bi̱ ni̱ndxu̱ún xa̱bu̱ aʼkhá (Mat. 16:13-16). Ikhaa jngóo, bi̱ nimbayíí ninigu̱u̱nʼ makuwá gajmiún ikhaa. Xúʼko̱ má kayuuʼ, índo̱ ni̱ndxu̱lú xa̱bu̱ wabaaʼ ga̱jma̱a̱ nduʼyáá rí tséʼngo̱o̱ má gúʼni xúgíʼ ma̱ngaa rí muʼdxawíín dí gúthi eʼwíinʼ, maʼni makuwáánʼ tsímáá ga̱jma̱a̱ rí xúgiáánʼ muʼni rí “nagájnuu májánʼ rí nuni”.

Gíʼdoo wéñuuʼ numuu rí bi̱ kuya̱ edxu̱u̱ mbuyaridáá Jesús dí ninindxu̱ún xa̱bu̱ wabiinʼ índo̱ nuñajunʼ mbá jnduʼ. Gíʼmaa marmáʼáan a̱jkiu̱ún dí espíritu santo ma̱ndoo mambáyúu asndu tsáa bi̱ kayá edxu̱u̱ dí maʼthí mbá rí mambáñún xúgíinʼ bi̱ kuya̱ edxu̱u̱ rí muraʼwíí májánʼ dí muni̱. Á mu náa nagimbíi̱n nunimi̱jna̱ rí xúgíinʼ ma̱ndoo muthi rí endxaʼwamijna rúʼko̱ gáʼni dí gúraʼwi̱i̱ muni̱ mambáñún xúgíinʼ bi̱ kúwá náa nagimbáánʼ.

Mbáa bi̱ nañajunʼ májánʼ gajmíi̱n eʼwíinʼ nakro̱ʼo̱o̱ kaʼñún eʼwíinʼ. Numuu rí naxnátiʼñaminaʼ maʼdxawuun o maʼni xó má nandún eʼwíinʼ. Jesús mbaʼa nuthu ndiʼyoo dí xúʼko̱ nindxu̱u̱ Anu̱u̱. Mbá xkri̱da, Jeobá nikuʼmaa mu maʼni káwíin xa̱bu̱ numbaaʼ (Juan 3:16).

Jesús ma̱ngaa nixnatiʼñaminaʼ maʼni xó má nindúún eʼwíinʼ. Garmáʼáan a̱jkiu̱lú xóo nimbáyúu mbáa a̱ʼgu̱ bi̱ na̱ʼkha̱ náa fenicia maski ajndu i̱ndó kaxúnguáanʼ mambáñún xa̱bu̱ bi̱ kúwá náa Israel (Mat. 15:22-28). Ma̱ngaa na̱nguá niʼni gújkhúʼ a̱jkiu̱u̱n kaʼñún xa̱bi̱i̱ rí mandu̱ʼu̱u̱n muni̱ mbá rí xáʼngu̱u̱n gúni̱. Índo̱ Pedro bi̱ nimbájxu̱u̱ ga̱jma̱a̱ májánʼ niʼni gaʼduunʼ dí tséniniiʼ náa inún xa̱bu̱, Jesús niʼni mba̱a̱ a̱jkiu̱u̱n kaʼyoo ga̱jma̱a̱ nda̱wa̱á nixnúu ñajunʼ mba̱ʼu̱ maʼni (Luc. 22:32; Juan 21:17; Hech. 2:14; 8:14-17; 10:44, 45). Xkri̱da ndrígóo Jesús nasngájma kaʼwu dí gíʼmaa muxnatiʼñamijná muʼdxawíín o muʼni dí nandún eʼwíinʼ, mu xúgíinʼ mbuyáá dí ikháanʼ nakru̱ʼu̱lú kuʼñúún eʼwíinʼ (Filip. 4:5).

 Á mu nuxnatiʼñamijná muʼdxawíín o muʼni dí gúthi eʼwíinʼ, ma̱ngaa makuwáánʼ xawii maguʼwunlu muñajunʼ mbá kambáxulú gajmiúlú mixtiʼkhu enii xa̱bu̱. Jesús nimbáxu̱u̱ májánʼ gajmíi̱n xa̱bu̱ rí asndu xa̱bu̱ sia̱nʼ nixíñúun kuyáá ga̱jma̱a̱ nithi rí nimbájxu̱u̱ májánʼ gajmíi̱n bi̱ niru̱ma mbújkha̱a̱ ga̱jma̱a̱ bi̱ nuni̱ aʼkhá bi̱ nidxawíín dí niʼtáráʼa ikhaa (Mat. 11:19). Lá ma̱ndoo mbuʼyaridáá Jesús ga̱jma̱a̱ muñajunʼ mbá kambáxulú gajmiúlú eʼwíinʼ maski ajndu mixtiʼkuiin ki xóo ikháanʼ xá. Mbáa ndxájulú bi̱ mbiʼyuu Louis, bi̱ ninindxu̱u̱ circuito ga̱jma̱a̱ niñajunʼ náa Betel ma̱ngaa niñajunʼ gajmíi̱n mbaʼin a̱ngiu̱lú bi̱ mixtiʼkhu xóo nikúwá, niʼthí: “Ikhúún nda̱yo̱o̱ dí a̱ngiu̱lú ni̱ndxu̱ún xóo mbá pared dí ki̱ʼni̱ ga̱jma̱a̱ mixtiʼkhu enii ga̱jma̱a̱ rí xóo mba̱ʼu̱ itsí. Rí ma̱ta̱ya̱a̱ xóo matagíʼma itsí ma̱ndoo maguanúu mbá pared jmbu. Ma̱ngaa naniminaʼ mariʼkhu̱u̱ xóo ni̱ndxu̱ʼ mu mañajunʼ mbá tsímáá gajmíʼ eʼwíinʼ mu xúʼko̱ ñajunʼ magajnúu májánʼ”. ¡Ra̱ʼkhá tháán májánʼ xóo niʼni ndxájulú!

Xú káʼnii gándoo muxnatiʼñamijná muʼdxawíín o mu̱ʼni̱ xóo gúthi eʼwíinʼ náa congregación rá. Mbá xkri̱da, mbáa náa grupo dí kuwáanʼlu kúwá mixtiʼkuiin a̱ngiu̱lú bi̱ mixtiʼkhu tsigúúnʼ o mixtiʼkhu ñajunʼ kuáʼdáá náa guʼwún ki xóo ikháanʼlu. Índo̱ gúʼtáráʼa gajmiúlú, lá ma̱ndoo muʼtáraʼa xóo má rí ikhiin nanigu̱u̱ʼ mu xúʼko̱ maʼndún mutaraʼa itháan xáʼ.

Bi̱ ni̱ndxu̱ún míjíinʼ bi̱ nuñajunʼ gajmiúlú “maʼndún muxna rí guáʼdáá” (1 Tim. 6:18). Índo̱ Jesús niñajunʼ ga̱jma̱a̱ Anu̱u̱ ndiʼyoo dí na̱nguá egujxi̱i̱ i̱ndó ikhaa dí najmañuu. Índo̱ Jeobá “niʼni mekhu”, Jesús “nixtáa raʼyoo” ga̱jma̱a̱ nindoo nijmañuu náa ikhaa (Prov. 8:27). Nda̱wa̱á, Jesús niʼthúún xa̱bi̱i̱ dí niʼdxawuun niʼthí Anu̱u̱ (Juan 15:15). Guʼyaridáá Jeobá, nu̱ʼni̱ xúʼko̱ índo̱ nuʼthúún a̱ngiu̱lú dí najmañulúʼ nu̱ʼni̱. Nakujmaa kaʼwu dí mbáa xa̱bu̱ májáanʼ na̱nguá erkaʼwumúʼuun dí gíʼdoo numuu mu i̱ndó ikhaa eyoo majmañuu maʼni. Rí phú naʼni, nanigu̱u̱ʼ maʼthúún eʼwíinʼ rí májánʼ dí nijmañuu.

I̱mba̱ rí xóo ma̱ndoo muxná rí kuaʼdáá nindxu̱u̱ dí muxnún tsiakii a̱ngiu̱lú. Lá ragájkhun dí nakumulú májánʼ índo̱ mbáa ndaʼyoo tsiakii dí nu̱ʼni̱ ga̱jma̱a̱ naxnáaʼlu núma̱aʼ xáʼ. Jesús niríyáʼ mbiʼi maʼthúún bi̱ nimbayíí dí májánʼ dí ndaʼyoo náa ikhiin (atayáá ma̱ngaa Mateo 25:19-23; Luc. 10:17-20). Asndu niʼthúún rí muni̱ “ñajunʼ itháan mba̱ʼu̱” ki xóo ikhaa (Juan 14:12). Mbruʼun rí inu makhañúu niʼthúún dí májánʼ eni̱ apóstoles ndrígióo bi̱ niguájun jmbu. Niʼthún: “Ikháanʼ nindxa̱la bi̱ nikuwáanʼ ga̱jma̱á ni̱ndxu̱ʼ náa xúgíʼ rí nigíʼnuu” (Luc. 22:28). Ajngáa rí niʼthí mbáa nixnúún tsiakii mu munimi̱jna̱ má xúʼko̱. Á mu ikháanʼlu ma̱ngaa muríyaʼ mbiʼi muʼthúún náa dí májánʼ nuni a̱ngiu̱lú, makuwá itháan gagi ga̱jma̱a̱ mbáa muni̱ itháan májánʼ ñajunʼ.

Mbáa ndxájulú mbiʼyuu Kayode naʼthí: “Tséyóoʼ má ma̱nindxa̱a̱ʼ xa̱bu̱ jmbii mu matiejun májánʼ gajmiáanʼ eʼwíinʼ, mú ma̱ndoo matani rí makuwá gagi eʼwíinʼ ga̱jma̱a̱ marathu̱u̱n dí májánʼ eni̱ náa ñajunʼ ndrígu̱ún”. Lá xúʼko̱ ma̱ndoo miʼtá ga̱jma̱a̱ numaaʼ ikháán ráʼ. Ndíjkha dí tsétrajxu̱u̱n eʼwíinʼ a̱ngiu̱lú á mu nduyaaʼ xóo bi̱ nañajunʼ májánʼ gajmíi̱n eʼwíinʼ rá. Lá nadxún kuyaaʼ matiejunʼ gajmiáanʼ xó má xa̱bi̱i̱ Jesús nikumu̱ún gajmiún ikhaa xáʼ. Á mu xúʼko̱, ma̱ndoo marata xó má niʼthí apóstol Pablo: “Ikháanʼ ni̱ndxu̱xu̱ʼ bi̱ numbáyala mu xúʼko̱ makuwáanʼ tsímáá” (2 Cor. 1:24).