1. Ndiéjunʼ nigíʼnuu David rá.

 DAVID nagáyúu mu maʼnikriyamínáʼ numuu dí Saúl bi̱ nindxu̱u̱ rey náa Israel nandoo maxíyáa. Numuu rí nda̱a̱ dí mi̱khu̱, ikha jngóo ni̱jkha̱ náa xuajen dí mbiʼyuu Nob, ikhí ninda̱ʼa̱ witsu pan mi̱khu̱ (1 Sam. 21:1, 3). Nda̱wa̱á ikhaa gajmíi̱n xa̱bi̱i̱ nigún gurkaʼwumijná náa mbá tsíñu (1 Sam. 22:1). Náá numuu rí xúʼko̱ nixtáa David rá.

2. Ndiéjunʼ dí raʼkhí niʼni Saúl rá. (1 Samuel 23:16, 17.)

² Índo̱ Saúl ndiʼyoo dí David nijmaʼniiʼ wéñuʼ ga̱jma̱a̱ dí niʼngo̱o̱ mbaʼa nuthu náa ni̱jkha̱ gáxmínaʼ, ra̱ʼkhá tháán nixígúu kaʼyoo. Ma̱ngaa Saúl ndiʼyoo má dí ga̱jma̱a̱ numuu rí táʼnimbo̱o̱ kaʼyoo Jeobá, ikhaa nirígú káyúuʼ dí mani̱ndxu̱u̱ rey, mú nigíiʼ David maʼtáñajunʼ náa Israel (atraxnuu 1 Samuel 23:16, 17). * Ga̱jma̱a̱ numuu rí xóó ninindxu̱u̱ rey náa Israel, Saúl nigiʼdiin mbaʼin soldado ga̱jma̱a̱ nikúwá mbaʼin bi̱ nimbayíí, ikha jngóo David ndiyóoʼ magayúu mu maʼnikriyamínáʼ. Lá nikumu̱u̱ Saúl dí maʼngo̱o̱ marikhoo dí niʼthí Jeobá ga̱jma̱a̱ numuu David ráʼ. (Is. 55:11.) Náa Biblia na̱nguá eʼthí, mú nduʼyáá dí raʼkhí nindxu̱u̱ rí niʼni. Numuu rí bi̱ nuxmijná gajmiún Dios nditháan tséʼngu̱u̱n.

3. Ndiéjunʼ niʼni David maski ajndu mingíjyúuʼ nixtáa rá.

³ David ninindxu̱u̱ xa̱bu̱ wabaaʼ. Jeobá nigíiʼ mani̱ndxu̱u̱ rey náa Israel, raʼkháa ikháá nigíminaʼ (1 Sam. 16:1, 12, 13). Ga̱jma̱a̱  numuu rúʼko̱ Saúl niwiyu̱u̱ʼ kaʼyoo rí asndu nindoo maxíyáa. Mú David na̱nguá niʼthí rí Jeobá gíʼdoo aʼkhúun náa xúgíʼ dí xtáa ragíʼnuu. Ni má táxiéʼkhá numuu rí tágiʼdoo mbaʼa dí mi̱khu̱ ni má índo̱ ndiyóoʼ markaʼuminaʼ náa tsíñu. Mbáa índo̱ nixtáa náa tsíñu ikhú niríyaʼ ajmúú mitsaanʼ náa na̱ʼkha̱ ajngáa rí kayá edxu̱u̱ artículo rígi̱: “Bi̱ nduyáaʼ Jeobá maxáʼñúunʼ nimbá rí májánʼ” (Sal. 34:10).

4. Xkáʼnii graxe̱ gúriʼña̱a̱ ga̱jma̱a̱ ndíjkha rí gíʼdoo numuu rá.

⁴ Mbaʼin xa̱bi̱i̱ Jeobá rí mbiʼi xúgi̱ na̱nguá guáʼdáá mbaʼa dí mu̱phu̱ o i̱ʼwáʼ rí nda̱ñúunʼ mu makuwá ga̱jma̱a̱. * Mú itháan náa awúun pandemia. Ga̱jma̱a̱ maʼni itháan mingíjyúuʼ índo̱ na̱ʼkha̱ rajngiyuu “ga̱ʼkhu̱ rí majphú mba̱a̱” (Mat. 24:21). Ga̱jma̱a̱ numuu xúgíʼ rígi̱ mbuʼyáá xóo extiʼña̱a̱ a̱jkhu̱ graxe̱ rígi̱: Ndiéjunʼ nindoo gáʼthí David rí tándatígo̱o̱ “nimbá rí májánʼ” rá. Ndíjkha rí gíʼmaa maʼdxulu ga̱jma̱a̱ dí kuaʼdáá má rá. Ndíjkha nandoo nduʼyáá gajkhun dí Jeobá má gáñewunlú rá. Ga̱jma̱a̱ xú kaʼnii gúʼniratamijná xúgi̱ rí xóo makuwáánʼ nda̱wa̱á rá.

5, 6. Xkáʼnii embáyulú Salmo 23:1-6 makru̱ʼu̱lú ndiéjunʼ nindoo gáʼthí David índo̱ niʼthí rí xa̱bi̱i̱ Dios xáʼñúunʼ nimbá rí májánʼ rá.

⁵ Ndiéjunʼ nindoo gáʼthí David índo̱ niʼthí rí xa̱bi̱i̱ Jeobá xáʼñúunʼ “nimbá rí májánʼ” rá. Mbá rí ma̱ndoo mambáyulúʼ makru̱ʼu̱lú nindxu̱u̱ dí mbuʼyáá dí naʼthí náa Salmo 23 (atraxnuu Salmo 23:1-6). * David nagiʼduu raʼthí: “Jeobá nindxu̱u̱ báxtúu ndrígóʼ. Nimbá nda̱a̱ rí gáʼyóʼ”. I̱ʼwáʼ dí na̱ʼkha̱ raʼthí náa salmo rígi̱, David niʼthí mbaʼa dí gíʼdoo wéñuʼ numuu, ikhaa nindxu̱u̱  rí Dios mbaʼa xóo eʼni tsajkurámiinʼ xa̱bi̱i̱ numuu rí Jeobá nindxu̱u̱ báxtúu ndrígu̱ún. Jeobá naxnún “ikha náa kamba̱a̱ smídú rí nindxu̱u̱ jmbu” ga̱jma̱a̱ nambáyúu asndu xkáʼnii má xtáa. David ni̱jkha̱nú ndiʼyoo rí maski ajndu xtáa náa “xkua̱ dí rígá rajxa̱ maxaʼ” ndrígóo Jeobá ku magiʼdoo má xkujndu. Mbáa nguáná nikumu̱u̱ dí xtáa migíná wéñuʼ, rí nindxu̱u̱ xóo maʼga kúʼwuun “náa mata dí mikrína mbiʼ”, ga̱jma̱a̱ naʼthí dí makuwá bi̱ xáʼndun kuyáá. Mú numuu rí Jeobá nindxu̱u̱ báxtúu ndrígóo, David niʼthí: “Xamíñuʼ magíʼnuʼ nimbá dí raʼkhí”.

⁶ Á mu xúʼko̱, ndiéjuunʼ nindoo gáʼthí rí tándatígoo “nimbá rí májánʼ” David rá. Nindoo gáʼthí ga̱jma̱a̱ numuu rí xóo nimbájxu̱u̱ ga̱jma̱a̱ Dios, nigiʼdoo xúgíʼ rí ndiyóoʼ. Raʼkháa numuu dí ndiyóoʼ magiʼdoo wéñuʼ mu maxtáa gagi. Nidxuu má ga̱jma̱a̱ rí Jeobá nixnúu. David ndiʼyoo rí itháan gíʼdoo numuu rí Jeobá maʼni tsajkurámaaʼ ga̱jma̱a̱ mañewu̱u̱n.

7. Xó má naʼthí náa Lucas 21:20-24, ndiéjunʼ niraʼníí cristianos bi̱ nikúwá náa Judea nákha siglo timbá rá.

⁷ Ajngáa dí niʼthí David naʼsngúlú dí gíʼdoo wéñuʼ numuu mbuʼyáá awáán dí maguaʼdáá. Gajkhun má rí nanigulúʼ majmulú, xóo mbújkha̱a̱ ga̱jma̱a̱ dí kuaʼdáá, mú xáʼyóoʼ maʼni dí i̱ndó ikhí majmulú ginii mbiʼi ndrígúlú. Rúʼko̱ nindxu̱u̱ mbá dí gíʼdoo wéñuʼ numuu dí niguánú nikru̱ʼu̱u̱n cristianos bi̱ nikúwá náa Judea nákha siglo timbá (atraxnuu Lucas 21:20-24). * Jesús niʼthún dí maʼga̱nú mbá mbiʼi dí Jerusalén “muruguama̱ʼa̱a̱n soldados”. Índo̱ gárígá rúʼko̱ ndiyóoʼ magáñún náa inuu kúbá. Á mu nuni xúʼko̱, maguma káwíin, mú ndiyóoʼ muniñaʼ tsudií mbaʼa dí kuaʼdáá. Ninújngoo má tsiguʼ xúgi̱ dí náa mbá i̱yi̱i̱ʼ Bi̱ Nayejngoo niʼthí: “Niniñanʼ guʼwún ga̱jma̱a̱ mbaaʼ ndrígu̱ún ni má na̱nguá nirajxi̱i̱ dí kuaʼdáá náa guʼwún. Nikumu̱ún kuyáá Jeobá dí ikhaa má gáñewu̱u̱n ga̱jma̱a̱ mambáñún, ndiyamajkuíí Ikhaa ginii ki xóo muni i̱ʼwáʼ dí nikujmaa dí gíʼdoo numuu”.

8. Ndiéjunʼ ikha eʼsngúlú rí xóo niguáʼníí cristianos bi̱ nikúwá náa Judea rá.

⁸ Ndiéjunʼ ikha eʼsngúlú rí xóo niguáʼníí cristianos bi̱ nikúwá náa Judea rá. Náa i̱yi̱i̱ʼ Bi̱ Nayejngoo dí niʼthá náa kutriga̱ rí nijngoo niʼthí: “Mbáa muraʼníí tsáʼkhá ga̱jma̱a̱ numuu rí xóo eʼyáá mbújkha̱a̱ ga̱jma̱a̱ rí kuaʼdáá. Lá ikháanʼ mbuʼyáá dí itháan gíʼdoo numuu ikhaa ráʼ. O mbuʼyáá dí itháan magiʼdoo numuu rí xóo maguma káwáanʼ numuu rí makuwáánʼ gajmiúlú Dios dxe̱ʼ. Mbáa índo̱ gúgaʼyúlú maʼniulú mingíjyúuʼ ga̱jma̱a̱ xáguaʼdáá xúgíʼ rí nandulú ikháánʼ. Ndayóoʼ makuwáánʼ xawii mu̱ʼni̱ asndu ndiéjunʼ má gáʼyóoʼ, xó má nini̱ cristianos bi̱ nigáñún bi̱ nikúwá náa Judea nákhá siglo timbá”. *

9. Xú káʼnii embáyáaʼ ikháán dí niʼthún bi̱ hebreos Pablo rá.

⁹ Lá nundxaʼwamíjná xú káʼni gakhii niʼniún cristianos buʼko̱ muniñaaʼ xúgíʼ dí kuaʼdáá ga̱jma̱a̱ mugi̱ʼdi̱i̱ makuwá i̱mba̱ ríʼkhá xáʼ. Ndi̱ñúunʼ fe mu makumún kuyáá Jeobá dí ikhaa má gáxnún dí gáʼñúun. Mú, witsu tsiguʼ wapháá nákha xóó tséruguama̱ʼa̱a̱n bi̱ romanos náa Jerusalén, apóstol Pablo niʼthún bi̱ hebreos tikhu consejo rí mambáñún wéñuʼ. Ikhaa niʼthí: “Gusngajmá rí tséyala ku̱ya̱a̱ mbújkha̱a̱ ga̱jma̱a̱ gakuwáanʼ gagi ga̱jma̱a̱ rí kuaʼdáá. Numuu rí ikhaa niʼthí: ‹Nditháan xániʼñáánʼ ga̱jma̱a̱ nimbá miʼtsú xániʼñátíga̱a̱n›. Ikha jngóo ma̱ndoo muʼthá ga̱jma̱a̱ xúgíʼ a̱jkiu̱lú: ‹Jeobá nindxu̱u̱ bi̱ nambáyuʼ. Xámiñuʼ. Ndiéjunʼ lá gándoo maʼniuʼ  mbáa xa̱bu̱ú rá.›” (Heb. 13:5, 6.) Xú káʼnii nikúwá cristianos bi̱ ninimbánii ajngáa dí niʼthí Pablo nákha xóó túruguama̱ʼa̱a̱n bi̱ romanos rá. Mbáa tájyúuʼ má nigúʼwún rí xóo makuwá náa i̱mba̱ guʼwún. Ndiyáá dí Jeobá má gáxnún rí gáʼñuunʼ. Ajngáa rí niʼthí Pablo nambáyulúʼ wéñuʼ muguaʼthi̱i̱n xúʼko̱ mangáán.

10. Ndiéjunʼ ni̱jkha̱nú ndiʼyoo Pablo rí mambáyulú mangáánʼ rá.

¹⁰ Xúʼko̱ má kayuuʼ niʼthúu̱n Timoteo ma̱ngaa, rí asndu nambáyulúʼ mangáánʼ xúgi̱, niʼthí: “Ikha jngóo, á mu kuaʼdáá rí naphulu ga̱jma̱a̱ rí naguʼúnlu, gaʼdxulú ga̱jma̱a̱ numuu rúʼko̱” (1 Tim. 6:8). Lá rúʼko̱ eyoo gáʼthí dí xándoo muʼphu mbá ganitsu miʼtsí, maguaʼdáá mbá guʼwá náa kaʼnii makuwáánʼ o rí mu̱ʼtsi̱ xtíñúlúʼ nguáná ráʼ. Pablo na̱nguá nindoo gáʼthí rúʼko̱. Rí nindoo gáʼthí nindxu̱u̱ dí gíʼmaa maʼdxulu ga̱jma̱a̱ i̱ndó dí kuaʼdáá má (Filip. 4:12). Rúʼko̱ ni̱jkha̱nú “ndiʼyoo” Pablo. Rí itháan gíʼdoo numuu dí kuaʼdáá nindxu̱u̱ rí nambájxulúʼ gajmiúlú Dios, raʼkháa mbújkha̱a̱ ni má rí kuaʼdáálu (Hab. 3:17, 18).

11. Ndiéjunʼ ikha ejmañuluʼ rí niʼthún Moisés bi̱ israelita rá.

¹¹ Mbáa rígá tikhu dí ikháánʼ nakumulúʼ rí ndayúlú mú Jeobá ndaʼyoo mixtiʼkhu. Guʼyáá ndiéjunʼ niʼthún Moisés bi̱ israelita nda̱wa̱á rí nikúwá mbá 40 tsiguʼ náa mbaaʼ mijxooʼ: “Jeobá Dios ndrígáaʼ niʼni tsajkurámááʼ náa xúgíʼ dí nitani̱. Ikhaa niñewa̱a̱nʼ má xúʼko̱ náa nijngruiga̱a̱ʼ náa mbaaʼ mijxooʼ rígi̱. Náa mbá 40 tsiguʼ rígi̱, Jeobá Dios ndrígáaʼ nixtáa ga̱jma̱á nindxa̱a̱ʼ ga̱jma̱a̱ nda̱a̱ rí ndiʼyáaʼ nditháan” (Deut. 2:7). Náa mbá 40 tsiguʼ, Jeobá  nixnúún maná muphu̱. Ga̱jma̱a̱ xtíñún dí nigájnún ga̱jma̱a̱ náa Egipto, nditháan na̱nguá niguuʼ (Deut. 8:3, 4). Tikhun israelitas mbáa nikumu̱ún dí rúʼko̱ na̱nguá nigiʼdoo numuu, mú Moisés niʼni marmáʼáan a̱jkiu̱ún dí guáʼdáá má xúgíʼ rí ndiñúunʼ. Jeobá maʼdxuu wéñuʼ á mu najmañulúʼ maʼdxulu ga̱jma̱a̱ i̱ndó dí kuaʼdáá, xóo muʼthá, á mu nduʼyáá dí gíʼdoo numuu tséʼniuu má asndu chíʼgíiʼ dí naxnúlú, nduʼyáá dí xúʼko̱ nindxu̱u̱ xóo naʼni tsajkurámáanʼlu ga̱jma̱a̱ nuxnáalu núma̱aʼ ga̱jma̱a̱ numuu ikhaa.

12. Xú káʼnii eʼyáá dí David nikumu̱u̱ kaʼyoo Jeobá raʼkháa dí nikumu̱u̱ kaʼyaminaʼ ikhaa xá.

¹² David ni̱jkha̱nú ndiʼyoo dí nindxu̱u̱ jmbii ga̱jma̱a̱ naxmiéjuunʼ wéñuʼ kaʼñún bi̱ nandún kuyáá. Maski ajndu nduyáaʼ muxiyáa índo̱ niʼniriyaʼ Salmo 34, nigiʼdoo mbá fe gujkhuʼ rí nikumu̱u̱ dí asndu xóo mbáa ángel ndrígóo Jeobá xtáa mijngii náa ikhaa (Sal. 34:7). David niʼni mbríguii ángel ndrígóo Jeobá xóo mbáa soldado bi̱ xtáa xawii mbaʼyoo á mu na̱ʼkha̱ mbáa xa̱bu̱ sia̱nʼ. Maski ajndu David nijmañuu maxmínaʼ májánʼ ga̱jma̱a̱ Jeobá nikudaminaʼ dí ikhaa maʼga̱nú mani̱ndxu̱u̱ rey, na̱nguá nikumu̱u̱ kaʼyaminaʼ ikhaa dí najmañuu mada̱ʼ mbá itsí o rí majmuu espada magudíin xa̱bu̱ sia̱nʼ ndrígóo (1 Sam. 16:13; 24:12). Ikhaa nikumu̱u̱ kaʼyoo Dios ga̱jma̱a̱ ni̱jkha̱nú ndiʼyoo dí ángel ndrígóo Dios naʼni káwíin bi̱ nunimbu̱ún kuyáá ikhaa. Gajkhun má rí ikháánʼlú dí mbiʼi xúgi̱ xúguáʼthi̱i̱n maxtiewunlú ga̱jma̱a̱ mbá milagro. Mú nduʼyáá kaʼwu dí nimbáa xa̱bi̱i̱ Dios bi̱ naku̱mu̱u̱ kaʼyoo maguma gawíínʼ kámuu mbiʼi.

13. Índo̱ Gog ndrígóo Magog gáʼni gináánʼ, ndíjkha makujmaa rí ni̱ndxu̱lú xóo mugu̱ bi̱ nda̱wa̱a̱ tsáa eñawu̱u̱n rá. Mú ndíjkha rí xámiñulu rá. (Atayáá xtiʼkhu rí na̱ʼkha̱ náa timbá ináa.)

¹³ Dí marigá nda̱wa̱á, makujmaa á mu makumulúʼ dí Jeobá má gañewunlúʼ. Índo̱ Gog ndrígóo Magog, xóo muʼthá xa̱bu̱ bi̱ muruwamijná náa mixtiʼkhu xuajen gáʼni gínáanʼ, mbáa makumulúʼ dí muradiáánʼ. Ikhú gíʼmaa mbuʼyáá gajkhun dí Jeobá má gáʼni káwáanʼ. Xa̱bu̱ mbuyulú xóo mugu̱ bi̱ nda̱wa̱a̱ tsáa eñawu̱u̱n (Ezeq. 38:10-12). Maku̱mu̱ún dí xájyúuʼ gúradiáánʼ numuu rí na̱nguá kuaʼdáá ajua̱nʼ ni má na̱nguá nigumaratháánʼ muxmijná. Xúyáá mbá dí ikháánʼlú makumulúʼ rí nduʼñúún mbaʼin ángeles náa mbájndi rawuunʼ xuajñuu Dios bi̱ kúwá xawii mumbayúlú. Xándoo mbuyáá xúʼko̱ xa̱bu̱ numuu rí na̱nguá guáʼdáá fe náa Jeobá. ¡Asndu maʼniún tsiánguá índo̱ ángeles bi̱ kúwá mekhuíí maguwáʼ gúmbayúlú! (Apoc. 19:11, 14, 15).

14. Ndiéjunʼ gándoo mu̱ʼni̱ xúgi̱ mu muʼniratamijná dí ma̱ʼkha̱ nda̱wa̱á rá.

¹⁴ Ndiéjunʼ gándoo mu̱ʼni̱ xúgi̱ mu muʼniratamijná dí ma̱ʼkha̱ nda̱wa̱á rá. Ginii, gíʼmaa mbuʼyáá awáán mbújkha̱a̱ ga̱jma̱a̱ rí kuaʼdáá ga̱jma̱a̱ garmáʼáan a̱jkiu̱lú dí mbá mbiʼi ndayóo magajnúlu ga̱jma̱a̱ muniʼñááʼ xúgíʼ tsu̱díí. Ma̱ngaa, gíʼmaa maʼdxulu má ga̱jma̱a̱ dí kuaʼdáá ga̱jma̱a̱ rí makuwáánʼ gagi numuu rí ni̱ndxu̱lú bi̱ nambájxu̱u̱ ga̱jma̱a̱ Jeobá. Índo̱ nuniʼnííʼ itháan májánʼ Dios ndrígúlú, itháan má nduʼyáá gajkhun dí índo̱ gáʼni gínáanʼ Gog ndrígóo Magog mañewu̱nlú.

15. Ndiéjunʼ nigíʼnuu nákha ginii David náa ndiʼyoo dí Jeobá mambáyúu má xúʼko̱ rá.

¹⁵ Guʼyáá ndiéjunʼ i̱mba̱ nimbáyúu David maraʼnuu xkujndu. Ikhaa niʼthí: “Ganigua̱la ga̱jma̱a̱ gu̱ya̱a̱ rí Jeobá nindxu̱u̱ májáanʼ; gagi xtáa xa̱bu̱ bi̱ nambáyuminaʼ náa ikhaa” (Sal. 34:8). Ajngáa rúʼko̱ nasngájma ndíjkha rí David ndiʼyoo dí Jeobá má gámbáyúu. Mbaʼa nuthu nimbáyuminaʼ náa Dios, ga̱jma̱a̱ ikhaa nimbáyúu má xúʼko̱. Nákha dxámá xóó ninindxu̱u̱  David, nixmínaʼ ga̱jma̱a̱ Goliat mbáa filisteo bi̱ mba̱yi̱i̱ʼ wéñuʼ ga̱jma̱a̱ najmañuu naxmínaʼ, ikhaa niʼthúu̱n: “Mbiʼi rígi̱ Jeobá maxnájxi̱i̱n náa ñawúunʼ” (1 Sam. 17:46). Nda̱wa̱á índo̱ nixtáa raʼni ñajuunʼ rey Saúl, nindoo maxíyáa mbaʼa nuthu, mú “Jeobá nixtáa má xúʼko̱ ga̱jma̱a̱ David” (1 Sam. 18:12). Numuu rí ndiʼyoo xóo niʼni kríyaaʼ Jeobá nákha ginii, ni̱jkha̱nú ndiʼyoo gajkhun dí mambáyúu má xúʼko̱. Rúʼko̱ má gámbáyulú mangáánʼ muʼniratamijná muraʼníí dí gáʼkha̱.

16. Xú káʼnii gándoo gúʼyáá dí Jeobá gajkhun nindxu̱u̱ májáanʼ rá.

¹⁶ Á mu xúgi̱ nduʼyáaʼ dí Jeobá maxnúlú má xúʼko̱ ikha, mbuʼyáá gajkhun dí nda̱wa̱á mambáyulú. Mbá xkri̱da, gíʼmaa maguaʼdáá fe ga̱jma̱a̱ makumulúʼ kuʼyáá Jeobá mu muʼtháán bi̱ nuñajunʼ gajmiúlú dí maxnúlú permiso mu̱ʼgua̱ asamblea o mu mariʼkhu̱u̱ hora dí mu̱ʼgua̱ xúgíʼ reunión ga̱jma̱a̱ rí muʼtáraʼa itháan. Á mu rí tsíyoo gáxnulú permiso ga̱jma̱a̱ nandáti̱gu̱lúʼ ñajunʼ rá. Lá makumulúʼ kuʼyáá Jeobá dí ikhaa nditháan xániñulú rí mambáyulú má xúʼko̱ ga̱jma̱a̱ dí maxnúlú má xúʼko̱ dí gáʼyulúʼ xáʼ. (Heb. 13:5.) Mbaʼin a̱ngiu̱lú bi̱ kúwá runiñajuunʼ káxi̱ náa Jeobá nandoo nuthi xú káʼnii Jeobá nimbáñúún índo̱ itháan ndiñúunʼ. Jeobá gajkhun nindxu̱u̱ jmbii.

17. Xkáʼnii gánindxu̱u̱ texto rí mbayá edxu̱u̱ tsiguʼ 2022, ga̱jma̱a̱ ndíjkha dí májánʼ gánindxu̱u̱ rá.

¹⁷ Á mu Jeobá xtáa ga̱jma̱á ni̱ndxu̱lú, xáʼyóoʼ mamiñúlúʼ dí gáʼkha̱ nda̱wa̱á, á mu nuʼgíʼ nu̱ʼni̱ ñajuunʼ ikhaa ginii, ikhaa nditháan xániñulú. Mu marmáʼáan a̱jkiu̱lú dí gíʼmaa muʼniratamijná xúgi̱ dí ma̱ʼkha̱ nda̱wa̱á ga̱jma̱a̱ rí makumulúʼ kuʼyáá Jeobá dí ikhaa nditháan xániñulú, Cuerpo Gobernante niraʼwíí Salmo 34:10 mu mani̱ndxu̱u̱ texto rí mbayá edxu̱u̱ tsiguʼ 2022: “Bi̱ nduyáaʼ Jeobá maxáʼñúunʼ nimbá rí májánʼ”.