1. Xú káʼnii gárata ikháán rí xóo ninindxu̱ún bi̱ nikúwá náa goʼwóo Santiago rá.

 SANTIAGO, giʼtio̱o̱ Jesús, nigaja̱a̱ náa mbá guʼwá náa kúwá bi̱ nimbájxu̱u̱n májánʼ gajmiún Dios. * Anu̱u̱ bi̱ mbiʼyuu José ga̱jma̱a̱ ru̱dúu̱ bi̱ mbiʼyuu María, nindúún kuyáá wéñuʼ Jeobá ga̱jma̱a̱ ninimi̱jna̱ xó má eʼngo̱o̱ muni̱ ñajuunʼ. Mú rígá i̱mba̱ rí xóo niguma tsajkurámaaʼ Santiago, numuu rí ndxájuu bi̱ giʼnii ninindxu̱u̱ Mesías bi̱ nijuiʼthá ma̱ʼkha̱. ¡Ra̱ʼkhá tháán májánʼ ninindxu̱u̱ rí Santiago ma̱ngaa nixtáa náa guʼwá rúʼko̱!

2. Ndiéjunʼ dí májánʼ ni̱jkha̱nú ndiʼyoo Santiago náa ndxájuu rá.

² Rígá mbaʼa dí májánʼ dí ni̱jkha̱nú ndiʼyoo Santiago náa ndxájuu (Mat. 13:55). Mbá xkri̱da, Jesús nininuuʼ májánʼ dí naʼthí náa Escritura nákhá kaʼnííʼ gíʼdoo 12 tsiguuʼ, niʼni rí maguanún tsiánguá xa̱bu̱ guanii bi̱ kúwá náa Jerusalén bi̱ nijmañún rí naʼthí xtángoo (Luc. 2:46, 47). Ma̱ngaa mbáa Santiago niñajunʼ ga̱jma̱a̱ Jesús náa niʼtóo ixi̱. Á mu rí xúʼko̱, ni̱jkha̱nú nininiiʼ májánʼ ndxájuu. Ndxájulú Nathan Knorr mbaʼa nuthu niʼthí: “Índo̱ natiajunʼ ga̱jma̱a̱ʼ mbáa xa̱bu̱, rígá mbaʼa dí najmañaaʼ náa ikhaa”. * Mbáa Santiago ma̱ngaa ni̱jkha̱nú ndiʼyoo dí “Jesús ni̱jkha̱ ragaja̱a̱, ni̱jkha̱ ragiʼdoo itháan ku̱ma̱ ga̱jma̱a̱ ni̱jkha̱ raʼni rí Dios maʼdxuu a̱jkiu̱u̱n kaʼyoo ga̱jma̱a̱ xúʼko̱ má xa̱bu̱ ma̱ngaa” (Luc. 2:52). Mbáa nakumulú dí Santiago ninindxu̱u̱ timbáa bi̱ ninindxu̱u̱ xa̱bi̱i̱ Jesús, mú tárígá xúʼko̱.

3. Xú káʼnii niʼni Santiago nákha Jesús nigíʼdu̱u̱ raʼtáraʼa rá.

³ Nákha nixtáa raʼtáraʼa Jesús náa tsu̱du̱u̱ ku̱ba̱ʼ, Santiago na̱nguá  ninindxu̱u̱ mbáa xa̱bi̱i̱ ikhaa (Juan 7:3-5). Mbáa asndu Santiago ninindxu̱u̱ mbáa bi̱ niʼthí: “Niguajta skáguiinʼ” (Mar. 3:21). Ga̱jma̱a̱ tséxkamalú náa maʼthí rí Santiago nixtáa ga̱jma̱a̱ ru̱dúu̱ bi̱ mbiʼyuu María índo̱ nidujmaa náa ixi̱ Jesús (Juan 19:25-27).

4. Ndiéjunʼ nindxu̱u̱ a̱jma̱ dí gúʼyáá rá.

⁴ Nda̱wa̱á Santiago nigiʼdoo fe náa Jesús ga̱jma̱a̱ ninindxu̱u̱ mbáa cristiano bi̱ nijmaʼniiʼ náa congregación. Náa artículo rígi̱, mbuʼyáá a̱jma̱ dí najmañulúʼ náa xkri̱da ndrígóo Santiago: 1) Ndíjkha rí gíʼmaa manindxu̱lú xa̱bu̱ wabaaʼ rá. 2) Xú káʼnii gándoo gánindxu̱lú bi̱ naʼsngáa májánʼ rá.

5. Xú káʼnii niʼni Santiago índo̱ ndiʼyoo Jesús nda̱wa̱á rí ni̱ga̱bi̱i̱ rá.

⁵ Nguáná Santiago ninindxu̱u̱ xa̱bi̱i̱ Jesús rá. Nda̱wa̱á dí ni̱ga̱bi̱i̱ Jesús, “nisngájmaminaʼ náa Santiago ga̱jma̱a̱ nda̱wa̱á náa xúgíinʼ apóstoles” (1 Cor. 15:7). Índo̱ ndiʼyoo Jesús, nixtiʼkhu̱u̱ kayuuʼ rí xóo nixtáa Santiago. Nixtáa ma̱ngaa índo̱ apóstoles nigimbíin mudrigú espíritu santo rí nijuiʼthá makánún náa mbá cuarto rijma̱a̱ dí nirígá náa Jerusalén (Hech. 1:13, 14). Nda̱wa̱á, Santiago ma̱ngaa ninindxu̱u̱ cuerpo gobernante nákha siglo timbá (Hech. 15:6, 13-22; Gál. 2:9). Ga̱jma̱a̱ nákhá xóó tséʼni tsiguʼ 62, niʼnirámáʼ mbá carta náa inún cristianos bi̱ kaxtaʼwíin. Carta rúʼko̱ nambáyúlú xóó asndu mbiʼi xúgi̱, tséʼniuu á mu kuaʼti̱i̱n makuwáánʼ mekhuíí o náa tsu̱du̱u̱ Ku̱ba̱ʼ (Sant. 1:1). Bi̱ ndiʼyoo rí xóo nirígá nákha siglo timbá bi̱ mbiʼyuu Josefo, niʼthí dí mbáa ndxajkun judío bi̱ mbiʼyuu Ananías bi̱ giʼtháá, niʼtáñajunʼ dí muxiyáá Santiago. Ikhaa niwi̱ji̱ jmbu náa Jeobá asndu índo̱ nikháñuu náa tsu̱du̱u̱ Ku̱ba̱ʼ.

6. Xkáʼnii mixtiʼkhu niʼni Santiago ga̱jma̱a̱ rí xóo nini̱ ndxajkun bi̱ nikúwá nákha ikhú rá.

⁶ Santiago ninindxu̱u̱ xa̱bu̱ wabaaʼ. Guʼyáá rí xóo niʼni nda̱wa̱á Santiago ga̱jma̱a̱ rí xóo nini̱ ndxajkun bi̱ phú kuya̱ edxu̱u̱ bi̱ nikúwá nákha ikhú. Índo̱ Santiago ni̱jkha̱nú ndiʼyoo gajkhun dí Jesús nindxu̱u̱ A̱ʼdióo Dios ikhaa niʼnimbo̱o̱. Mú ndxajkun bi̱ phú kuya̱ edxu̱u̱ náa Jerusalén na̱nguá nini̱ xúʼko̱. Mbá xkri̱da, ndiyáá ga̱jma̱a̱ idún dí Jesús niʼniga̱bi̱i̱ Lázaro. Mú, ikhiin na̱nguá nindúún mbuyáá dí Jeobá nikungua̱a̱nʼ Jesús rí asndu nigíʼ muxiyáa Jesús ga̱jma̱a̱ Lázaro (Juan 11:53; 12:9-11). Nda̱wa̱á rí Jesús nigabi̱i̱ ninimi̱jna̱ muni̱ rí xa̱bu̱ xúyáá (Mat. 28:11-15). Numuu rí ndxajkun buʼko̱ nini̱ mbaʼumíjna̱ ikha jngóo táʼndún gúyáá Mesías.

7. Ndíjkha dí ragíʼmaa mu̱ʼni̱ mbaʼumíjna̱ rá.

⁷ Rí najmañulúʼ: Xúʼni mbaʼumíjna̱ ga̱jma̱a̱ guniʼñááʼ rí Jeobá maʼsngulúʼ. Xó má mbá nandii rí  ma̱ndoo maʼni gújkhúʼ ga̱ʼkhu̱ dí rígá náa a̱jkiu̱lú mu xáñajunʼ májánʼ, xúʼko̱ má kayuuʼ ma̱ndoo maʼni rí nu̱ʼni̱ mbaʼumíjna̱, maʼni gújkhúʼ a̱jkiu̱lú ga̱jma̱a̱ maʼniulú mingíjyúuʼ muʼnimbulú kuʼyáá Jeobá. Fariseos niniña̱a̱nʼ rí maʼni gújkhúʼ wéñuʼ a̱jkiu̱ún dí asndu ninigáʼdu̱u̱nʼ mbuyáá dí Jesús ninindxu̱u̱ A̱ʼdióo Dios ga̱jma̱a̱ rí gíʼdoo espíritu ndrígóo (Juan 12:37-40). Numuu dí xúʼko̱ nini̱ ikhiin xákúwá kámuu mbiʼi (Mat. 23:13, 33). Gíʼdoo wéñuuʼ numuu rí muniʼñámíjná dí Ajngá rawuunʼ Dios ga̱jma̱a̱ espíritu santo ndrígóo mariʼkhu̱u̱ xóo ni̱ndxu̱lú, xóo endxaʼwamíjna̱lú ga̱jma̱a̱ dí xóo nuraʼwíí mu̱ʼni̱ (Sant. 3:17). Santiago niniñaminaʼ rí Jeobá maʼsngóo numuu rí ninindxu̱u̱ mbáa xa̱bu̱ wabaaʼ. Ma̱ngaa xó má gúʼyáá xúgi̱, numuu rí ninindxu̱u̱ xa̱bu̱ wabaaʼ ikha jngóo ni̱jkha̱nú ninindxu̱u̱ mbáa bi̱ niʼsngáa májánʼ.

8. Ndiéjunʼ gámbáyúlú manindxu̱lú bi̱ naʼsngáa májánʼ rá.

⁸ Santiago na̱nguá ni̱jkha̱ mitsídánʼ escuela. Ndxajkun bi̱ phú kuya̱ edxu̱u̱ nákha ikhú, ndiyáá Santiago xó má ndiyáá Pedro ga̱jma̱a̱ Juan, rí nindxu̱ún xa̱bu̱ bi̱ raguáʼdáá numún ga̱jma̱a̱ “tágún mitsídánʼ escuela” (Hech. 4:13). Mú ni̱jkha̱nú ninindxu̱u̱ mbáa bi̱ niʼsngáa májánʼ, xó má eʼyáá, índo̱ nuraxnuu libro dí nayéjkha̱ mbiʼyuu. Mbáa ikháanʼ mangáánʼ na̱nguá nijkua mitsídánʼ escuela xó má Santiago. Maski ajndu xúʼko̱, ma̱ndoo manindxu̱lú bi̱ naʼsngáa májánʼ numuu rí espíritu santo nambáyulú ga̱jma̱a̱ rí xóo naʼniratháánʼlú xuajñuu Jeobá. Guʼyáá xkri̱da ndrígóo Santiago ga̱jma̱a̱ guʼyáá ndiéjunʼ ikha gándoo majmañulúʼ.

9. Xú káʼnii gárata ikháán dí xóo niʼsngáa Santiago rá.

⁹ Santiago na̱nguá nijmuu ajngáa ni má xkri̱da rí mingíjyúuʼ makrua̱ʼa̱a̱ʼ. Numuu rí na̱nguá mingíjyúuʼ niʼsngáa, ikha jngóo xa̱bu̱ ndiyáá ndiéjunʼ muni̱ ga̱jma̱a̱ xú káʼnii gúni̱. Guʼyáá mbá xkri̱da rí xóo Santiago niʼsngúún cristianos dí ragíʼmaa muyexi̱i̱ sia̱nʼ á mu nagu̱miin dí ra̱májánʼ. Ikhaa niʼnirámáʼ: “Kúwá gagi bi̱ naʼngu̱u̱n numíniiʼ. Nidxawíínla rí xóo káʼnii niʼngo̱o̱ Job ga̱jma̱a̱ ndi̱ya̱a̱la xú káʼnii Jeobá niʼni ga̱jma̱a̱ ikhaa, dí xúgi̱ ndu̱ya̱a̱ dí Jeobá májánʼ wéñuuʼ a̱jkiu̱u̱n ga̱jma̱a̱ nagáwíinʼ a̱jkiu̱u̱n” (Sant. 5:11). Nandoo nduʼyáá dí Santiago nijmuu Ajngá rawuunʼ Dios mu maʼsngáa. Nijmuu Ajngá rawuunʼ Dios mu mambáñún xa̱bu̱ mbuyáá dí Jeobá naʼni tsajkurámíinʼ má xúʼko̱ bi̱ naguájun jmbu  xó má Job. Santiago niʼsngáa ikha rúʼko̱ ga̱jma̱a̱ xkri̱da dí ra̱mingíjyúuʼ makrua̱ʼa̱a̱ʼ. Xúʼko̱ niʼni dí xa̱bu̱ mbuyamajkuíí Jeobá raʼkháa ikhaa.

10. Xú kaʼnii gándoo mbuʼyaridáá Santiago índo̱ nuʼsngáa rá.

¹⁰ Rí najmañulúʼ: Guʼsngáa ga̱jma̱a̱ ajngáa wabaʼ ma̱ngaa gajmulú Ajngá rawuunʼ Dios. Ragíʼmaa mu̱ʼni̱ mbaʼyoo xa̱bu̱ rí ikháánʼ nakru̱ʼu̱lú wéñuuʼ, gusngajmáá mbaʼyoo nguáthá ekro̱ʼo̱o̱ Jeobá ga̱jma̱a̱ dí ra̱ʼkhá tháán naxmiéjuunʼ kaʼyoo (Rom. 11:33). Ma̱ndoo mu̱ʼni̱ rígi̱ á mu najmulú má xúʼko̱ Biblia. Mbá xkri̱da, xáʼyóoʼ muʼtháán ndiéjunʼ gúʼni ikháánʼ á mu kuwáánʼ xóo xtáa ikhaa, rí itháan májánʼ mu̱ʼni̱ nindxu̱u̱ rí majmulú xkri̱da dí na̱ʼkha̱ náa Biblia mu mbaʼyoo xóo endxa̱ʼwáminaʼ ga̱jma̱a̱ xóo eku̱mu̱u̱ Jeobá. Rúʼko̱ gámbáñúún munimbáníí dí najmañún ga̱jma̱a̱ muni̱ rí manigu̱u̱ʼ Jeobá raʼkháa dí manigulúʼ ikháánʼ.

11. Xkáʼnii xkujndu niguáʼdáá tikhun cristianos, ga̱jma̱a̱ xú káʼnii consejo nixnún Santiago xá. (Sant. 5:13-15.)

¹¹ Santiago ni̱jkha̱nú ndiʼyoo dí gajkhun. Náa carta dí niʼnirámáʼ nakujmaa dí ndiʼyoo xkujndu dí guáʼdáá a̱ngui̱i̱n ga̱jma̱a̱ niʼthúún mbájmbu ndiéjunʼ gíʼmaa muni̱. Mbá xkri̱da, tikhun cristianos na̱nguá enimbánii nacha̱ rí nijuiʼthúún (Sant. 1:22). Eʼwíinʼ itháan má nandún kuñún bi̱ guáʼdáá mbújkha̱a̱ ki xóo xa̱bu̱ gíníi (Sant. 2:1-3). Ga̱jma̱a̱ eʼwíinʼ naʼniún miʼskhoo muñewa̱a̱n raju̱ún (Sant. 3:8-10). Cristianos buʼko̱ mbaʼa dí raʼkhí nini̱, mú Santiago na̱nguá nindxa̱ʼwáminaʼ rí xándoo muriʼkhumijná. Niʼthúún mbájmbu mú niʼthúún ga̱jma̱a̱ ajngáa wabaʼ ma̱ngaa niʼthúún bi̱ nda̱ñúunʼ mixtambáñúún rí muthúún bi̱ kuya̱ edxu̱u̱ (atraxnuu Santiago 5:13-15). *

12. Xú káʼnii gándoo gundxa̱ʼwa̱míjna̱ májánʼ índo̱ numbáyíí mbáa bi̱ nuʼsngáá rá.

¹² Rí najmañulúʼ: Guʼyáá gajkhun rí xóo kúwá eʼwíinʼ mú gundxaʼwámíjná dí májánʼ. Mbaʼin bi̱ nunigajmaa naʼniún mingíjyúuʼ munimbáníí dí naʼthí náa Biblia (Sant. 4:1-4). Mbáa ndajñúúnʼ mba̱yu̱u̱ʼ muri̱ʼkhu̱u̱ dí raʼkhí nuni̱. Ndayóo dí xámiñulu xó má Santiago, muʼthúún bi̱ nuʼsngúún náa eyóoʼ muriʼkumijná. Ma̱ngaa ndayóoʼ mundxaʼwamíjná dí májánʼ; gakumulúʼ dí Jeobá má gáʼkha̱ kagui̱i̱n xa̱bu̱ wabiinʼ ga̱jma̱a̱ dí maxnún tsiakii muriʼkhumijná (Sant. 4:10).

13. Ndiéjunʼ ni̱jkha̱nú ndiʼyoo Santiago rá. (Sant. 3:2.)

¹³ Santiago ni̱jkha̱nú ndiʼyoo dí nakiéʼkúun ma̱ngaa. Ikhaa na̱nguá nindxa̱ʼwáminaʼ dí gíʼdoo itháan numuu ki xóo eʼwíinʼ cristianos numuu rí nindxu̱u̱ giʼtio̱o̱ Jesús o ga̱jma̱a̱ numuu ñajunʼ dí nigiʼdoo. Ikhaa niʼthúún: “A̱ngui̱nʼ bi̱ nandoʼ ka̱ya̱la” (Sant. 1:16, 19; 2:5). Na̱nguá nisngájma rí ikhaa nditháan tákiéʼkúun. Niʼtáminaʼ asndu ma̱ngaa índo̱ niʼthí: “Xúgiáánʼ nakiéʼkulu mbaʼa nuthu” (atraxnuu Santiago 3:2 ga̱jma̱a̱ nota). *

14. Ndíjkha dí ndayóoʼ muʼthá dí mangáánʼ nakiéʼkulu rá.

¹⁴ Rí najmañulúʼ: Garmáʼáan a̱jkiu̱lú dí xúgiáanʼ nakiéʼkulu. Ragíʼmaa makumulúʼ dí ikháánʼ kuaʼdáá itháan numulú ki xóo bi̱ nuʼsngáá. Náá numuu rá. Á mu nusngajmá dí ikháanʼ nditháan na̱nguá kiéʼkulú, ikhaa migamíi mandxaʼwáminaʼ dí nditháan xájmaa gáʼni xóo nagi̱ʼthu̱u̱n Dios maʼni. Mú á mu nuʼtháán dí ikháanʼ ma̱ngaa niʼniulúʼ mingíjyúuʼ muʼnimbánii ikha dí na̱ʼkha̱ náa Biblia ga̱jma̱a̱ nuʼtháán xú káʼnii Jeobá nimbáyulúʼ muriʼkhui̱i̱ xóo kuwáánʼ, mumbáyiilu mbaʼyoo dí ma̱ngaa ma̱ndoo maʼni ñajuunʼ.

15. Xú káʼnii ninindxu̱u̱ xkri̱da dí nijmuu Santiago rá. (Sant. 3:2-6, 10-12).

¹⁵ Santiago nijmuu xkri̱da dí na̱jkha̱nú náa a̱jkiu̱ún xa̱bu̱. Gajkhun má dí xi̱ʼ kaʼwu nimbáyúu, mú ma̱ngaa mbáa nijmañuu maʼsngáa  índo̱ niʼnigajmaa xóo nijmuu xkri̱da Jesús bi̱ ninindxu̱u̱ ndxájuu. Xkri̱da dí nijmuu Santiago náa carta dí niʼnirámáʼ ra̱mingíjyúuʼ makruaʼa̱a̱ʼ ga̱jma̱a̱ rígá mbájmbu dí naʼsngáa (atraxnuu Santiago 3:2-6, * 10-12). *

16. Ndíjkha dí gíʼmaa majmulú xkri̱da dí nayambáá rá.

¹⁶ Rí najmañulúʼ: Gajmulú xkri̱da dí nayambáá. Índo̱ najmulú májánʼ xkri̱da, nambáñun xa̱bu̱ mbuyáá dí kúwá rudxawíín. Náa xkri̱da dí nu̱ʼni̱ mandxaʼwáminaʼ xa̱bu̱ mambáyúu marmáʼáan a̱jkiu̱u̱n mbá dí gíʼdoo wéñuʼ numuu dí naʼsngáa náa Biblia. Jesús nijmañuu majmuu májánʼ wéñuʼ xkri̱da ga̱jma̱a̱ Santiago bi̱ ninindxu̱u̱ giʼtio̱o̱ niʼni xúʼko̱ ma̱ngaa. Guʼyáá mbá xkri̱da dí niʼthí Santiago ga̱jma̱a̱ mbuʼyáá ndíjkha dí nayambáá wéñuʼ.

17. Ndíjkha dí nayambáá wéñuʼ xkri̱da dí na̱ʼkha̱ náa Santiago 1:22-25 rá.

¹⁷ (Atraxnuu Santiago 1:22-25). * Índo̱ nijmuu xkri̱da ndrígóo niwanʼ mu maʼsngáa rígá mbaʼa enii xóo nayambáá. Santiago ndiʼyoo kaʼwu ndiéjunʼ nindoo maʼsngáa: Á mu nandulú dí Ajngá rawuunʼ Dios mambáyulú, raʼkháa i̱ndó ndayóoʼ muraxnuu, gíʼmaa muʼgíʼ muʼnimbánii. Santiago niraʼwíí majmuu mbá xkri̱da dí xájyúuʼ makro̱ʼo̱o̱ xa̱bu̱: Índo̱ niʼthí ga̱jma̱a̱ numuu xa̱bu̱ bi̱ nayeximínaʼ náa niwanʼ. Ndiéjunʼ nindoo maʼsngáa xá. Rí xánindxu̱u̱ májánʼ á mu mbáa xa̱bu̱ bi̱ ndiʼyoo náa niwanʼ dí rígá dí ndayóo  maʼni májáanʼ mú nda̱a̱ dí eʼni mu mariʼkhuu. Xúʼko̱ má kayuuʼ, xánindxu̱u̱ májánʼ á mu na̱nguá riʼkumijná índo̱ nduʼyáá dí rígá mbá dí ndayóoʼ muriʼkhumijná índo̱ nuraxnuu Biblia.

18. Ndiéjunʼ nindxu̱u̱ ajtsú dí gíʼmaa mu̱ʼni̱ índo̱ gájmulú mbá xkri̱da rá.

¹⁸ Índo̱ gájmulúʼ mbá xkri̱da, ma̱ndoo mbuʼyaridáá Santiago á mu nu̱ʼni̱ ajtsú rígi̱: 1) Guʼyáá dí xkri̱da dí gájmulúʼ nambánii ga̱jma̱a̱ dí kuwáánʼ ruʼthá. 2) Gajmulú mbá xkri̱da dí xa̱bu̱ naninuuʼ. 3) Guʼthá kaʼwu ndiéjunʼ eyulú muʼsngáa. Á mu naʼniulú miʼskhaa muxkamaa mbá xkri̱da dí majmulú, guʼyáʼ náa Índice de las publicaciones Watch Tower. Náa naʼthí “Ejemplos” ikhí ma̱ndoo muxkamaa mbaʼa xkri̱da dí ma̱ndoo majmulú. Mú garmáʼáan a̱jkiu̱lú dí xkri̱da dí gájmulúʼ nindxu̱u̱ xóo micrófono numuu rí nayambáá magájnuriyo̱o̱ʼ mbá rí kuwáánʼ ruʼthá. Ikha jngóo, i̱ndó ndayóoʼ majmulú xkri̱da índo̱ nandulú muʼsngáa mbá rí gíʼdoo numuu. Gajkhun má rí ikháanʼ nandulú muʼsngáa itháan májánʼ numuu rí nandulú mumbaʼñún mbaʼin xa̱bu̱ xó má eʼngo̱o̱ maguwáʼ náa xuajñuu Jeobá, raʼkháa mu mbuyamajkulú ikháánʼ.

19. Xú káʼnii esngajmálu dí nandulú kuʼñúún a̱ngiu̱lú bi̱ nuni̱ ñajuunʼ Dios rá.

¹⁹ Gajkhun má rí ikháánʼ na̱nguá nigajáánʼ gajmiúlú mbáa ndxájulú jmbii, mú ra̱ʼkhá tháán májánʼ nindxu̱u̱ dí nu̱ʼni̱ ñajuunʼ Jeobá gajmiúlú mbaʼin a̱ngiu̱lú. Ma̱ndoo musngajmá dí nandulú kuʼñúún índo̱ nuríyaʼ mbiʼi makuwáánʼ gajmiúlú, índo̱ najmañulúʼ náa ikhiin ga̱jma̱a̱ nakuwáánʼ ru̱ʼni̱ ñajuunʼ mbóó gajmiúlú índo̱ nuʼtáraʼa ga̱jma̱a̱ nuʼsngáa. Índo̱ nuʼnimi̱jna̱ mbuʼyaridáá Santiago rí xóo ni̱ndxu̱lú, xóo eʼni̱ ga̱jma̱a̱ rí xóo nuʼsngáa, nuxnáá gamajkhu Jeobá ga̱jma̱a̱ numbáñuun xa̱bu̱ bi̱ májánʼ a̱jkiu̱ún maguwáʼ kanuu náa Anu̱lú bi̱ xtáa mekhuíí.