1. Xú káʼnii e̱ʼni̱ mu makuwáánʼ gajmiúlú Jeobá rá.

 GAJKHUN dí xúgiáánʼ ikháanʼ nanigulúʼ makuwáanʼ gajmiúlú xa̱bu̱ bi̱ nandulú kuʼñúún. Mbá xkri̱da, xa̱bu̱ gajmii nanigu̱u̱nʼ nakúwíin mbóó. Jiáma ga̱jma̱a̱ wa̱ʼxa̱ʼ nanigu̱u̱nʼ makuwíin gajmiún migiún, mú xúgiáanʼ ikháanʼ nanigulúʼ makuwáánʼ gajmiúlú a̱ngiu̱lú. Dí itháán nanigulúʼ ikhaa nindxu̱u̱ rí makuwáánʼ gajmiúlú Dios ndrígúlú. Xú kaʼnii e̱ʼni̱ rá. Índo̱ nuraxnuu Ajngá rawuunʼ, nuʼtájkáan, nundxaʼwamíjná rí wíji̱ maʼni ga̱jma̱a̱ cualidades ndrígóo. ¡Ra̱ʼkhá tháán eʼyamajkuíí mbiʼi rí kuwáanʼ gajmiúlú Jeobá! (Sal. 139:17).

2. Náá numuu rí nguáná naʼni mingíjyúuʼ muríyaʼ mbiʼi makuwáanʼ gajmiúlú Jeobá rá.

² Maski asndu nanigulú makuwáanʼ gajmiúlú Jeobá, mú nguáná naʼni mingíjyúuʼ numuu rí tséguapháánʼlú. Ga̱jma̱a̱ naʼni mingíjyúuʼ muríyaʼ mbiʼi mu mu̱ʼni̱ dí ma̱ndoo mambáyu mambájxulú gajmiúlú Jeobá. Ga̱jma̱a̱ numuu ñajunʼ, dí muñewu̱u̱n bi̱ kúwíin náa guʼwúlú o i̱ʼwáʼ ñajunʼ dí rígá, xúgíʼ rígi̱ naʼni rí xáguapháánʼlú ga̱jma̱a̱ muríyaʼ mbiʼi mu muʼtájkáan, muʼnigajmaa o mundxaʼwamíjná.

3. Náá imbo̱o̱ʼ rí ndayóoʼ muñewumíjnalú rá.

³ Mú rígá dí itháan gamíi marígú kaʼyulú mbiʼi ndrígúlú ga̱jma̱a̱ ndayóoʼ muñewumíjnalúʼ ikhí. Tikhuu rí nuʼnilú maski asndu na̱nguá má nindxu̱u̱ ra̱májánʼ, ma̱ndoo marígú kaʼyulú mbiʼi dí makuwáanʼ gajmiúlú Jeobá. Mbá xkri̱da, xúgiáánʼ nanigulúʼ mbuʼyáaxulú ga̱jma̱a̱ dí mu̱ʼni̱ gagimijnálú wáa mbáxngaa. Mú, á mu ikháanʼ tséʼni awa̱án xúgíʼ rígi̱ ma̱ngoo maʼni dí xáguaʼdáá  mbiʼi mu mu̱ʼni̱ rí ma̱ndoo mambájxulú itháán gajmiúlú Jeobá. Ikha jngóo gíʼdoo wéñuuʼ numuu dí awa̱án gúʼni̱ gagimijnálú (Prov. 25:27; 1 Tim. 4:8).

4. Ndiéjunʼ gúʼyáá náa artículo rígi̱ rá.

⁴ Náa artículo rígi̱ muʼthá ndíjkha rí gíʼdoo numuu mbuʼyáá ndiéjunʼ rí itháán gíʼdoo numuu. Ma̱ngaa mbuʼyáá xú káʼnii gándoo majmulú májánʼ mbiʼi dí nakuwáánʼ gajmiúlú Jeobá ga̱jma̱a̱ xú káʼnii gámbáyulú á mu nu̱ʼni̱ rígi̱.

5. Xú káʼnii gándoo gámbañún Efesios 5:15-17 jiáma ga̱jma̱a̱ wa̱ʼxa̱ʼ bi̱ nandún muraʼwi̱i̱ májánʼ rí muni̱ rá.

⁵ Gúraʼwíí májánʼ rí mu̱ʼni̱ náa vida ndrígúlú. Rígi̱ dí mbaʼiin wéñuuʼ jiáma ga̱jma̱a̱ wa̱ʼxa̱ʼ naʼni maxmiéjúnʼ. Mbáa nguáná ma̱ndoo maʼni dí maestriu̱ún ga̱jma̱a̱ bi̱ kuñún bi̱ na̱nguá nindxu̱ún xa̱bi̱i̱ Jeobá, muthún dí munigajmaa náa escuela dí mitsídánʼ náa ma̱ndoo muguaʼdáá mbá ñajunʼ májánʼ ga̱jma̱a̱ mudaʼ májánʼ mbújkha̱a̱. Mú dí muni̱ rígi̱ marígú kaʼñún wéñuuʼ mbiʼi ndrígu̱ún. Mbáa ma̱ngaa ma̱ndoo maʼni dí anu̱ún ga̱jma̱a̱ a̱ngiu̱lú bi̱ kúwíin náa congregación muthún dí muxnaximi̱jna̱ muni̱ ñajuunʼ Jeobá. Ndiéjunʼ gámbáyulú á mu ni̱ndxu̱lú jiáma ga̱jma̱a̱ wa̱ʼxa̱ʼ bi̱ nandulú kuʼyáá Jeobá mu muraʼwíí májánʼ rí mu̱ʼni̱ rá. Ma̱ndoo muraxnuu dí naʼthí náa Efesios 5:15-17 (atraxnuu). * Índo̱ gámbulú rundxaʼwamíjna̱ dí naʼthí ikhí ma̱ndoo murajximíjnalú: “Ndiéjunʼ dí nandoo Jeobá ma̱ni̱ ikhúún rá. Ndiéjunʼ dí gáraʼwíí ma̱ni̱ manigu̱u̱ʼ Jeobá rá. Ndiéjunʼ rí gáraʼwíí ma̱ni̱ mambáyúʼ majmuʼ májánʼ mbiʼi ndrígóʼ rá.” Garmáʼáan a̱jkiu̱lú rí “mbiʼi nindxu̱u̱ mingíjyúuʼ” ga̱jma̱a̱ náa numbaaʼ rígi̱ dí naʼtáñajunʼ Gixa̱a̱ inuu má magumaa gámbáa. Dí itháan májánʼ rí ma̱ndoo muraʼwíí mu̱ʼni̱ nindxu̱u̱ dí mu̱ʼni̱ maxtáa gagi Jeobá.

6. Ndiéjunʼ rí itháán gíʼdoo numuu niraʼwíí maʼni María rá.

⁶ Guʼyáá ndiéjunʼ rí itháan gíʼdoo numuu mu̱ʼni̱. Nguáná rígá a̱jma̱ ñajunʼ dí mu̱ʼni̱, mú káaʼ mbóó rígá dí itháan gíʼdoo numuu rí ma̱ndoo muraʼwíí mu̱ʼni̱ mu majmulú májánʼ mbiʼi ndrígúlú, maski asndu a̱jma̱ na̱nguá má nindxu̱u̱ ra̱májánʼ. Rúʼko̱ dí nigíʼnuu María ga̱jma̱a̱ Marta índo̱ Jesús ni̱jkha̱ gáʼñúún. Numuu dí Marta nanigu̱u̱ʼ maxná dí gíʼdoo ikha jngóo ra̱ʼkhá tháán nidxuu dí Jesús ni̱ʼkha̱ náa goʼwóo, ikhaa nigíʼdúu niʼni mújúunʼ ganitsu dí ra̱ʼkhá tháán májánʼ. Mú María niraʼwíí magi̱ʼi̱ ga̱jma̱a̱ Jesús mu maʼdxaun xú káʼnii eʼsngáa. Marta na̱nguá má niʼni dí ra̱májánʼ mú Jesús niʼthí dí “María niraʼwíí rí itháan májánʼ” (Luc. 10:38-42). Mbáa María mambumuu dí ni̱ʼkhu̱ mbiʼi rúʼko̱, mú dí nijmañúu náa Jesús nditháan xámbumuu. Nakujmaa dí María ndiʼyamajkuu mbiʼi rí nixtáa ga̱jma̱a̱ Jesús, xúʼko̱ má mangáánʼ nduʼyamajkuíí mbiʼi dí nakuwáánʼ gajmiúlú Jeobá. Mú, xú káʼnii gándoo gájmulú májánʼ mbiʼi dí nakuwáánʼ gajmiúlú Jeobá rá.

7. Ndíjkha dí gíʼdoo wéñuuʼ numuu muʼtájkáan, muʼnigajmaa ga̱jma̱a̱ mundxaʼwamíjna̱ rá.

⁷ Garmáʼáan a̱jkiu̱lú dí muʼtájkáan, muʼnigajmaa ga̱jma̱a̱ dí mundxaʼwamíjna̱ nindxu̱u̱ mbá rí xóo nduʼyamajkuíí Jeobá. Índo̱ ikháanʼlú nuʼtajkháan kuwáánʼ ruʼtámíjná gajmiúlú Anu̱lú bi̱ xtaa mekhuíí bi̱ nandoo kaʼyulú wéñuuʼ (Sal. 5:7). Índo̱ ikháánʼ nuʼnigajmaa Biblia kuwáánʼ “ruʼyáʼ ku̱ma̱ ndrígóo Dios”, mbáa bi̱ itháan najmañúu bi̱ xtaa náa xúgíʼ tsu̱du̱u̱ numbaaʼ (Prov. 2:1-5). Índo̱ ikháánʼ kuwáánʼ rundxa̱ʼwa̱míjna̱, nduʼyáá cualidad ndrígóo  Jeobá xóo rí maʼni ga̱jma̱a̱ numulú ma̱ngaa ga̱jma̱a̱ numún xa̱bu̱ numbaaʼ. Lá rígá imbo̱o̱ʼ xóo majmulú itháán májánʼ mbiʼi ndrígúlú ráʼ. Rígá. Numuu rí nánguá kuaʼdáá mba̱yu̱u̱ʼ mbiʼi, ikha jngóo ndiéjunʼ gámbáyulú majmulú itháan májánʼ mbiʼi rá.

8. Xkáʼnii májánʼ xkri̱da niniñuuʼ Jesús índo̱ ni̱jkha̱ náa ku̱ba̱ʼ mijxooʼ rá.

⁸ Atayáʼ maraxtaa náa rí nimbáa xáʼnijnga̱a̱n. Gundxaʼwamíjna̱ rí niʼni Jesús índo̱ nigíʼdúu niʼtáráʼa náa tsu̱du̱u̱ Ku̱ba̱ʼ, ikhaa nixtáa mbá 40 mbiʼi náa ku̱ba̱ʼ mijxooʼ (Luc. 4:1, 2). Ikhí nindoo niʼtájkháan ga̱jma̱a̱ nindxa̱ʼwáminaʼ ndiéjunʼ nindoo Anu̱u̱ rí maʼni ikhaa. Rígi̱ niʼnirataa mu maʼngo̱o̱ maraʼnuu tsáʼkhá dí gáʼkha̱ náa inuu. Dí ejmañulú náa xkri̱doo xá. Á mu bi̱ kúwíin náa guʼwúlú mbaʼin wéñuuʼ, mbáa maʼniulú mingíjyúuʼ dí xúnijngáanʼ. Á mu dí xúʼko̱ kuwáanʼlu, ma̱ndoo magajnulú rexa̱a̱. Rúʼko̱ dí naʼni Julie índo̱ nandoo maríyáʼ mbiʼi mu maʼtámíjná ga̱jma̱a̱ Jeobá. Ikhaa xtáa náa mbáa cuarto chíʼgíiʼ náa Francia ga̱jma̱a̱ naʼniuu mingíjyúuʼ rí maxtáa mbáwíí ga̱jma̱a̱ rí nimbáa xáʼnijnga̱a̱. Ikhaa naʼthí: “Xúgíʼ mbiʼi na̱jkhá pasia náa parque, ikhí nandoo naxtáá mbáwún ga̱jma̱a̱ nimbáa tséʼnijngu̱u̱n, na̱ndoo natamíjná ga̱jmu̱ʼ Jeobá májánʼ”.

9. Maski asndu Jesús gíʼdoo wéñuuʼ dí maʼni, xú káʼnii nisngájma rí ndiʼyamajkuu dí nimbájxu̱u̱ ga̱jma̱a̱ Anu̱u̱ xá.

⁹ Jesús nindxu̱u̱ mbáa xa̱bu̱ bi̱ gíʼdoo wéñuuʼ dí maʼni. Asndu náa má minaaʼ ejkha̱, xtáa má xúʼko̱ gajmíi̱n xa̱bu̱ bi̱ nunda̱ʼa̱a̱ rí mambáñún. Náa Biblia naʼthí rí mbóo mbiʼi “xúgíinʼ xa̱bu̱ xuajin nigimbíin náa riejuun guʼwá” mu mbuyáá. Maski asndu xúʼko̱ niríyaʼ mbiʼi mu mañewu̱u̱n dí nambájxu̱u̱ ga̱jma̱a̱ Anu̱u̱. Índo̱ nacho̱o̱ majtsi, ikhaa ni̱jkha̱ náa ndawi̱i̱n xa̱bu̱ mu xúʼko̱ mariyáʼ mbiʼi maʼtámíjná ga̱jma̱a̱ Anu̱u̱ (Mar. 1:32-35).

10, 11. Xó má eʼthí Mateo 26:40, 41 ndiéjunʼ rí niʼthún xa̱bi̱i̱ Jesús náa ixi̱ ri̱ʼi̱ Getsemaní, mú ndiéjunʼ nini̱ ikhiin xá.

¹⁰ Iwáá mbruʼun rí Jesús nixtáa náa tsu̱du̱u̱ Ku̱ba̱ʼ, índo̱ inún mambóo ñajunʼ rí nikhánuu, ikhaa niraʼwíí dí maxtáa mbáwíí mbu̱júu̱ʼ náa ixi̱ ri̱ʼi̱ Getsemaní: Mu xúʼko̱ ma̱ndoo maʼtájkháan ga̱jma̱a̱ mandxaʼwáminaʼ (Mat. 26:36). Ikhí niʼthún xa̱bi̱i̱ ndíjkha rí gíʼdoo wéñuuʼ mutajkáan.

¹¹ Guʼyáá ndiéjunʼ nirígá índo̱ niguánú náa ixi̱ ri̱ʼi̱ Getsemaní, mbáa niʼni má tikhu mbruʼun índo̱ Jesús nindu̱ʼu̱u̱n xa̱bi̱i̱ dí maxúnuʼ, ikhú ikhaa ni̱jkha̱ gáʼtájkáan (Mat. 26:37-39). Índo̱ nitanga̱a̱ ndiʼyoo rí kúwíin runuʼ. Ikha jngóo niʼthún mbu̱júu̱ʼ: “Maxúnuʼla ga̱jma̱a̱ gutajkáan má xúʼko̱” (atraxnuu Mateo 26:40, 41). * Ikhaa ndiʼyoo má rí xa̱bi̱i̱ nagiinʼ  ga̱jma̱a̱ néʼngu̱u̱n má wéñuuʼ. Ikha jngóo nigáwiinʼ a̱jkiu̱u̱n ga̱jma̱a̱ niʼthún “xuwiʼ tséʼngo̱o̱”. Maski asndu xúʼko̱, a̱jma̱ nuthu dí ikhaa ni̱jkha̱ gáʼtájkáan, índo̱ nitanga̱a̱ ndiʼyoo dí xa̱bi̱i̱ kúwíin runuʼ, na̱nguá lá kúwíin rutajkáan (Mat. 26:42-45).

12. Ndiéjunʼ gándoo mu̱ʼni̱ á mu nakumulú dí néʼngulú ga̱jma̱a̱ nagáanʼ wéñuuʼ mu muʼtájkáan rá.

¹² Guríyáʼ májánʼ mbiʼi muʼtájkáan. Mbáa nguáná makumulú dí néʼngulú wéñuuʼ ga̱jma̱a̱ nagáanʼ mu muʼtájkáan, mú raʼkháa i̱ndó ikháanʼlu. Ndiéjunʼ gándoo gúʼni̱ á mu naguáʼníí xúʼko̱ rá. Tikhu a̱ngiu̱lú naguʼwún mutajkáan wakíʼ mú nduyáá rí itháan májánʼ rí mutajkáan miʼcha̱á, índo̱ xóó tségi̱i̱nʼ wéñuuʼ. Eʼwíinʼ nduyáá rí itháán májánʼ dí mutrigi̱i̱n o musmbati̱gu̱u̱n mutajkáan. Mú ndiéjunʼ gúʼni̱ á mu naxmiéjunlú wéñuuʼ ga̱jma̱a̱ nakáguabáanʼlú mu muʼtájkáan rá. Guʼtháán Jeobá numuu rí ikhaa magáwíínʼ a̱jkiu̱u̱n ga̱jma̱a̱ makro̱ʼo̱o̱ kaʼyulú (Sal. 139:4).

13. Xú káʼnii gáʼnijnga̱a̱n celular o tablet ndrígáaʼ índo̱ xtaa ratanigajmaa rá.

¹³ Xúniʼñáʼ rí nimbá maʼnijngáanʼ índo̱ kuwáánʼ ruʼnigajmaa. Imbo̱o̱ʼ rí ma̱ndoo mambáyulú mu mambájxulú itháán májánʼ gajmiúlú Jeobá nindxu̱u̱ rí muʼnigajmaa Ajngá rawuunʼ, makuwáánʼ náa reunión dí narígá náa Guwáʼ nagimbáanʼ. Lá rígá mbá rí ma̱ndoo mu̱ʼni̱ mu xúʼko̱ muʼnigajmaa májánʼ ma̱ngaa índo̱ najkua náa reunión ráʼ. Guraximíjna̱: Ndiéjunʼ rí naʼnijngu̱u̱n índo̱ xtáá raʼnigajmaa rá. Lá llamada, correos electrónicos, mensaje o i̱ʼwáʼ ajua̱nʼ ráʼ. Gajkhun má rí ajua̱nʼ rígi̱ nayambáá wéñuuʼ rí mbiʼi xúgi̱ ga̱jma̱a̱ najmún mbaʼin xa̱bu̱. Tikhun xa̱bu̱ bi̱ najmañún nuthi dí índo̱ mbáa nagíʼ edxu̱u̱ náa rí xtáa raʼni, i̱ndó á mu kaʼmáʼ mijngii celular ndrígóo náa mijngii eʼgíʼ rúʼko̱ maʼnijnga̱a̱n. Mbáa bi̱ najmañuu ga̱jma̱a̱ xóo eni̱ xa̱bu̱ naʼthí: “Tsíyoo gátaʼgíʼ edxa̱a̱ʼ náa rí xtaa ratani̱, imbo̱o̱ʼ rí e̱ʼni̱ matatsaʼwamínáʼ”. Nákhá xóó najkualú náa asambleas nundu̱ʼu̱lú rí mutsi̱ji̱ dí xáwáán ajua̱nʼ rí kuʼdalú mu xúʼko̱ xáʼnijngánʼ nimbá. Lá ma̱ndoo mu̱ʼni̱ xúʼko̱ índo̱ kuwáánʼ ruʼtháán Jeobá mu xúʼko̱ xáʼnijngáanʼ mangáánʼ rá.

14. Xó má eʼthí Filipenses 4:6, 7 ndiéjunʼ gáʼni Jeobá mu mambáyulú mu muʼgíʼ edxu̱lú rá.

¹⁴ Gunda̱ʼa̱a̱ Jeobá rí mambáyulú muʼgíʼ edxu̱lú. Á mú kuwáánʼlú ruʼnigajmaa o kuwáánʼ náa reunión ga̱jma̱a̱ nduʼyáá dí tséʼngo̱o̱ guʼgíʼ edxu̱lú, gunda̱ʼa̱a̱ Jeobá rí mambáyulú. Á mu  rígá rí naʼni maxmiéjunlú mbáa maʼni mingíjyúuʼ muniʼñááʼ rundxa̱ʼwa̱míjna̱ rúʼko̱ ga̱jma̱a̱ muʼgíʼ edxu̱lú náa rí nuʼnigajmaa, mú rúʼko̱ rí gíʼdoo wéñuuʼ numuu mu̱ʼni̱. Guʼtákáñii Jeobá mu maxnúlú rí tsímáá mu mañewu̱u̱n ku̱ma̱ ndrígúlú raʼkháa i̱ndó a̱jkiu̱lú (atraxnuu Filipenses 4:6, 7). *

15. Ndiéjunʼ gámbáyulú á mu nuríyaʼ mbiʼi makuwáánʼ gajmiúlú Jeobá rá.

¹⁵ Mbaʼa xóo ma̱ndoo mambáyulú á mu nuríyaʼ mbiʼi muʼtámíjná gajmiúlú Jeobá, dí muʼdxawíín ga̱jma̱a̱ dí mundxa̱ʼwa̱míjna̱lú ga̱jma̱a̱ numuu ikhaa. Ndiéjunʼ gámbáyulú rá. Timbá, muraʼwíí májánʼ dí muʼnilú. Náa Biblia naʼthí: “Bi̱ najngrui̱go̱o̱ gajmíi̱n xa̱bu̱ bi̱ nundxa̱ʼwa̱a̱ májánʼ edxu̱ún xúʼko̱ má gándxa̱ʼóo májánʼ edxu̱u̱ ma̱ngaa” (Prov. 13:20). Ikha jngóo, á mu nanújngulú itháan mbiʼi gajmiúlú Jeobá bi̱ itháán najmañuu náa xúgíʼ tsu̱du̱u̱ Ku̱ba̱ʼ, itháán gájmañulú mangáánʼ. Ma̱ngaa makru̱ʼu̱lú májánʼ ndiéjunʼ gúʼni̱ rí manigu̱u̱ʼ ikhaa ga̱jma̱a̱ xúraʼwíí mu̱ʼni̱ dí ikhaa maʼni gawúunʼ.

16. Náá numuu dí muríyaʼ mbiʼi rí makuwáánʼ gajmiúlú Jeobá naʼni dí muʼsngáa májánʼ rá.

¹⁶ Raga̱jma̱, manindxu̱lú mbáa bi̱ naʼsngáa májánʼ. Índo̱ nuʼsngáa ga̱jma̱a̱ numuu Biblia, mbá rí nandulú mu̱ʼni̱ nindxu̱u̱ dí mumbáyíí bi̱ nuʼsngáá rí maʼga kanuu náa Jeobá. Índo̱ itháán nuʼtámíjná gajmiúlú Anu̱lú bi̱ xtáa mekhuíí itháán gáʼndulú kuʼyáá ga̱jma̱a̱ xáʼniulu mingíjyúuʼ mu̱ʼni̱ dí bi̱ nuʼsngáá maʼndoo kaʼyoo Jeobá. Rúʼko̱ dí niʼni Jesús índo̱ naʼthí ga̱jma̱a̱ numuu Anu̱u̱, naʼni ga̱jma̱a̱ ngajua ga̱jma̱a̱ xa̱bi̱i̱ bi̱ niguájun jmbu rúʼko̱ niʼni rí maʼndún kuyáá Jeobá mangiin (Juan 17:25, 26).

17. Náá numuu rí nambáyulú rí muʼtájkáan ga̱jma̱a̱ dí muʼnigajmaa maʼni gujkhuʼ fe ndrígúlú rá.

¹⁷ Dí maʼni ragajtsú, fe ndrígúlú naʼni itháán gujkhuʼ. Gundxaʼwamíjna̱ ndiéjunʼ narígá índo̱ nunda̱ʼa̱a̱ Dios maxnúlú ikha, maʼni̱i̱ a̱jkiu̱lú ga̱jma̱a̱ mambáyulú. Mámbá índo̱ nariʼña̱a̱ dí nuʼtájkáan, fe ndrígúlú naʼni itháán gújkhúʼ (1 Juan 5:15). Imbo̱o̱ʼ dí ma̱ndoo mambáyulú mu muguaʼdáá mbá fe gújkhúʼ nindxu̱u̱ rí muʼnigajmaa ndajkuáanʼ. Numuu dí “fe narígá índo̱ mbáa naʼdxawuun ajngáa” (Rom. 10:17). Rígi̱ nasngájma kaʼwu á mu nandulú muguaʼdáá mbá fe gújkhúʼ raʼkháa i̱ndó ndayóoʼ majmañulú. Ndiéjunʼ i̱ʼwáʼ ndayóoʼ mu̱ʼni̱ rá.

18. Arathá ga̱jma̱a̱ mbá xkri̱da náá numuu rí gíʼmaa mundxa̱ʼwa̱míjna̱lú rá.

¹⁸ Gíʼmaa mundxaʼwamíjna̱lú náa dí najkua  rajmañulú. Gundxaʼwamíjna̱ náa bi̱ niʼnirámáʼ Salmo 77. Ikhaa nixtáa gíná wéñuuʼ numuu rí ndiʼyoo dí ikhaa gajmíi̱nʼ eʼwíinʼ israelitas nindáti̱gu̱u̱n rí nambájxu̱u̱n gajmiún Jeobá. Ra̱ʼkhá tháán gíná nixtáa dí asndu nánguá eyoo gígú dí mbruʼun (Salmo 77:2-8). Ndiéjunʼ niʼni xá. Ikhaa niʼthúu̱n Jeobá: ‹Gajkhun rí mandxa̱ʼwa̱mínáʼ náa xúgíʼ rí natani̱ ga̱jma̱a̱ mandxa̱ʼwa̱mínáʼ xú káʼnii etani̱› (Salmo 77:12). Gajkhun má dí ikhaa ndiʼyoo mbaʼa wéñuuʼ dí niʼni Jeobá ga̱jma̱a̱ numuu xuajñuu nákhá ginii, maski asndu xúʼko̱ ikhaa nirajximínáʼ: “Lá nimbumuu Dios masngájmulú dí ikhaa xtáa ga̱jma̱á nindxalú ráʼ. O rí nikiʼnáa niʼni dí mámbáa dí nagáwíin a̱jkiu̱u̱n xáʼ.” (Salmo 77:9.) Bi̱ niniraʼmáʼ salmo nindxa̱ʼwa̱mínáʼ dí niʼni Jeobá, xú kaʼnii nigáwiinʼ a̱jkiu̱u̱n ga̱jma̱a̱ numuu xuajñuu dí nirígá nákhá ginii (Salmo 77:11). Rígi̱ nimbáyúu maʼga̱nú mbaʼyoo dí Jeobá nditháan xániñuuʼ xuajñuu (Salmo 77:15). Ikháá má kayuuʼ, fe ndrígúlú maʼni itháán gújkhúʼ á mu nundxa̱ʼwámíjna̱ ndiéjunʼ dí niʼni Jeobá ga̱jma̱a̱ numuu xuajñuu nákhá giʼnii ga̱jma̱a̱ ndiéjunʼ niʼni ga̱jma̱a̱ numulú ikháánʼ.

19. Ndiéjunʼ imbo̱o̱ʼ embáyulú rí muríyaʼ mbiʼi makuwáanʼ gajmiúlú Jeobá rá.

¹⁹ Dí maʼni raga̱jkhu̱, maʼni dí maʼndulú kuʼyáá itháan Jeobá. Rígi̱ rí itháán gíʼdoo numuu dí nambáyulú. Náá numuu rá. Numuu dí ngajua nindxu̱u̱ mbá cualidad dí naxkajxáánʼ muʼnimbulú kuʼyáá Jeobá ga̱jma̱a̱ mu̱ʼni̱ rí nanigu̱u̱ʼ ikhaa, ma̱ngaa mu maʼngulú asndu náʼya̱á má ga̱ʼkhu̱ dí gúraʼníí (Mat. 22:37-39; 1 Cor. 13:4, 7; 1 Juan 5:3). Nda̱a̱ imbo̱o̱ʼ dí itháán gíʼdoo numuu ki xóo mambájxulú gajmiúlú Jeobá, Dios ndrígúlú (Sal. 63:1-8).

20. Ndiéjunʼ tatsaʼwáminaʼ matani ikháán mu matríyaʼ mbiʼi maraxtaa ga̱jma̱a̱ʼ Jeobá rá.

²⁰ Xó má ndiʼyáá dí muʼtájkáan, muʼnigajmaa ma̱ngaa dí mundxa̱ʼwa̱míjna̱lú nindxu̱u̱ mbá rí xóo nduʼyamajkuíí Jeobá. Gu̱ʼni̱ xó má niʼni Jesús, gakuwáanʼlú náa nimbá xáʼnijngáanʼ mu xúʼko̱ makuwáánʼ gajmiúlú Jeobá. Xúniʼñáánʼ rí nimbá maʼnijngáanʼlú índo̱ kuwáánʼ ruʼnigajmaa, gunda̱ʼa̱a̱ Jeobá rí mambáyulú muʼgíʼ edxu̱lú. Á mu nu̱ʼni̱ mbá tsiakii mu majmulú májánʼ mbiʼi xúgi̱, Jeobá maʼni tsajkurámáanʼlu mu makuwáánʼ kámuu mbiʼi náa ku̱ba̱ʼ nuxi̱ʼ (Mar. 4:24).