ARTÍCULO RÍ MUʼNIGAJMAA 4
Náá numuu rí nakuwáánʼ náa Conmemoración rá.
“Gu̱ni̱la̱ má xúʼko̱ rígi̱ mu marmáʼáan a̱jkia̱la kuyo̱ʼ” (LUC. 22:19).
AJMÚÚ 20 Nitaxúnguanʼ Jesús, A̱ʼdiáaʼ bi̱ nandaʼ xtayáá
RÍ MUʼNIGAJMAA *
1, 2. a) Náá mbi̱ʼi̱i̱ rí itháán narmáʼáan a̱jkiu̱lú eʼni mbáa bi̱ nikháñuu bi̱ nandulú kuʼyáá rá. b) Ndiéjunʼ rí nigíʼ Jesús náa iwáá mbruʼun dí makhañúu rá.
MASKI ajndu ninújngoo mba̱yu̱u̱ʼ tsiguʼ rí nikháñuu mbáa bi̱ nandulú kuʼyáá narmáʼáan a̱jkiu̱lú má xúʼko̱ eʼni, itháán índo̱ narámaaʼ tsiguʼ dí ikhaa nikháñuu.
2 Xúgíʼ tsiguʼ mbaʼin wéñuuʼ xa̱bu̱ bi̱ kúwíin náa xúgíʼ tsu̱du̱u̱ numbaaʼ nagimbúun ga̱jma̱á ni̱ndxu̱lú mu muniriya̱a̱ʼ tsiguʼ rí nikháñuu Jesucristo (1 Ped. 1:8). Nu̱ʼni̱ rígi̱ mu marmáʼáan a̱jkiu̱lú dí ikhaa nixnáximinaʼ mu xúʼko̱ maʼtsiwáánʼ náa aʼkhá ga̱jma̱a̱ dí nakháñulú (Mat. 20:28). Jesús nindoo rí xa̱bi̱i̱ marmáʼáan a̱jkiu̱ún mbiʼi dí ikhaa nikháñuu. Iwáá mbruʼun dí ikhaa makhañúu nigíʼ mbá ganitsu kiejuunʼ, ikhú niʼthún ajngáa rígi̱ xa̱bi̱i̱: “Gu̱ni̱la̱ má xúʼko̱ rígi̱ mu marmáʼáan a̱jkia̱la kuyo̱ʼ” (Luc. 22:19).
3. Ndiéjunʼ gúʼyáá náa artículo rígi̱ rá.
3 Mbaʼin wéñuuʼ xa̱bu̱ bi̱ guáʼthi̱i̱n makuwá kámuu náa tsu̱du̱u̱ Ku̱ba̱ʼ nagún náa nagumariya̱a̱ʼ xóo nikháñuu Cristo, mú na̱nguá mbaʼin bi̱ guáʼthi̱i̱n magúun náa mekhuíí nagún ikhí. Náa artículo rígi̱ mbuʼyáá mbaʼa numuu ndíjkha rí a̱jmi̱i̱n grupo bugi̱ nandún makuwá xúgíʼ tsiguʼ náa nagumariya̱a̱ʼ Conmemoración, ma̱ngaa mbuʼyáá ndíjkha rí nambáyulú dí makuwáánʼ ikhí. Muguáʼdi̱i̱ mbuʼyáá náá numuu rí nakúwíin a̱ngiu̱lú bi̱ kaxtaʼwíin.
NÁÁ NUMUU RÍ NAKÚWÍIN A̱NGIU̱LÚ BI̱ KAXTAʼWÍIN RÁ.
4. Náá numuu rí a̱ngiu̱lú bi̱ kaxtaʼwíin naʼphu̱ pan ga̱jma̱a̱ naʼwa̱a̱n vino náa Conmemoración rá.
4 Mbá numuu nindxu̱u̱ rí a̱ngiu̱lú bi̱ kaxtaʼwíin nandún magún mámbá tsiguʼ náa Conmemoración nindxu̱u̱ mu mu̱phu̱ pan ga̱jma̱a̱ mu̱wa̱a̱n vino. Náá numuu rí ikhiin ma̱ndoo muni̱ rígi̱ xá. Mu mbuʼyáá náá numuu, garmáʼáan a̱jkiu̱lú dí niʼni Jesús náa iwáá mbruʼun dí nixtáa náa tsu̱du̱u̱ Ku̱ba̱ʼ. Nda̱wa̱á dí niʼniriya̱a̱ʼ ndxa̱a̱ Pascua, Jesús nigíʼ dí xúgi̱ najmaʼnuuʼ xóo Ganitsu wañuu Señor, ikhaa nixnúún pan ga̱jma̱a̱ vino bi̱ mbá 11 xa̱bi̱i̱ bi̱ niguájun jmbu, niʼthúún rí mu̱wa̱a̱n ga̱jma̱a̱ rí mu̱phu̱. Ma̱ngaa niʼthún a̱jma̱ rí nambánuu, ikhaa nindxu̱u̱ rí: Nambánuu nuxi̱ʼ ga̱jma̱a̱ rí nambánúún náa mutañajunʼ (Luc. 22:19, 20, 28-30). * Dí nimbánúún rígi̱ niyambáá mu xa̱bi̱i̱ gajmiún mbá nguéjmi̱i̱n cristianos bi̱ kaxtaʼwíin mani̱ndxu̱ún reyes ga̱jma̱a̱ ndxajkuun náa mekhuíí (Apoc. 5:10; 14:1). Mangiin a̱ngiu̱lú bi̱ kaxtaʼwíin bi̱ xóó naguanún * kúwíin náa a̱jma̱ rí nimbánuu rígi̱, ikha jngóo i̱ndó ikhiin ma̱ndoo mu̱phu̱ pan ga̱jma̱a̱ mu̱wa̱a̱n vino náa Conmemoración.
5. Ndiéjunʼ rí nduyáá ga̱jma̱a̱ numuu rí mundrigúu a̱ngiu̱lú bi̱ kaxtaʼwíin rá.
5 Imbo̱o̱ʼ numuu rí a̱ngiu̱lú bi̱ kaxtaʼwíin nandún makuwíin náa Conmemoración nindxu̱u̱ dí ikhí ma̱ndoo mundxa̱ʼwa̱míjna̱ náa dí mundrigúu. Ikhiin kuáʼti̱i̱n mbá rí kiejuunʼ dí Jeobá nixnúún, dí makuwá kámuu ga̱jma̱a̱ muni rí nindxu̱u̱ májánʼ náa mekhuíí, muñajunʼ gajmiún bi̱ mbá 144,000 náa Jesucristo bi̱ niguma mba̱a̱, ma̱ngaa mbuyáá mínaaʼ Jeobá (1 Cor. 15:51-53; 1 Juan 3:2). Bi̱ kaxtaʼwíin nduyáá dí ikhiin nindrigú rí magúun mekhuíí. Mu ma̱ndoo marigá rígi̱ ndayóoʼ rí maguajún jmbu asndu índo̱ gákhañun (2 Tim. 4:7, 8). Asndu nadxún rí mundxaʼwamíjna̱ ga̱jma̱a̱ numuu rí mundrígúu (Tito 2:13). Mú ndiéjunʼ gúʼthá ga̱jma̱a̱ numún bi̱ “eʼwíinʼ mugu̱” rá. Náá numuu rí nakúwíin náa Conmemoración ikhiin xá. (Juan 10:16.) Guʼyáá tikhuu numuu.
NÁÁ NUMUU RÍ NAKÚWÍIN BI̱ EʼWÍINʼ MUGU̱ RÁ.
6. Náá numuu rí nakúwíin náa Conmemoración bi̱ “eʼwíinʼ mugu̱” rá.
6 Mbá numuu rí nakúwíin bi̱ eʼwíinʼ mugu̱ náa Conmemoración nindxu̱u̱ mu mbuyáá raʼkháa mu mu̱phu̱ o mu̱wa̱a̱n. Timbá miʼtsu rí nijuiʼthúún makuwá náa nagumariya̱a̱ʼ ndxa̱a̱ rígi̱ bi̱ guáʼthi̱i̱n makuwá náa tsu̱du̱u̱ Ku̱ba̱ʼ nindxu̱u̱ nákha 1938. Mbá i̱yi̱i̱ʼ dí nigájnuu náa La Torre del Vigía nákha abril tsiguʼ 1938 niʼthí: “Dí maguma rígi̱ nindxu̱u̱ májánʼ ga̱jma̱a̱ jmbu”, rí mangiin bi̱ nindxu̱ún eʼwíinʼ mugu̱ “makuwíin náa narígá reunión rígi̱ ga̱jma̱a̱ mbuyáá xú káʼnii eguma”. Ikhí naʼthí xóó: “Xúʼko̱ gíʼmaa marigá ga̱jma̱a̱ ni̱jkha̱nú má mbiʼi dí mangiin maʼdxúún”. Xó má erígá náa mbá ndxa̱a̱ gatsigúnʼ, nakúwíin gagi migiúu bi̱ nanigúnʼ ga̱jma̱a̱ rí mbuyáá xú káʼnii erígá, ikhaa má kayuuʼ bi̱ eʼwíinʼ mugu̱ nakúwíin gagi dí mbuyáá xú káʼnii egumariya̱a̱ʼ Conmemoración.
7. Náá numuu rí eʼwíinʼ mugu̱ nandún mudxawíín discurso dí najuixná náa Conmemoración rá.
7 Bi̱ eʼwíinʼ mugu̱ ma̱ngaa nandún mundxa̱ʼwa̱míjna̱ náa rí guáʼthi̱i̱n mundrígúu. Ma̱ngaa nandún mudxawíín discurso rí najuixná náa Conmemoración numuu dí ikhí najuiʼthá xú káʼnii bi̱ mbá 144,000 bi̱ maʼtáñajunʼ gajmíi̱nʼ Jesucristo, muni̱ ga̱jma̱a̱ numún xa̱bu̱ bi̱ gúguajún jmbu náa mbá 1,000 tsiguʼ dí ikhiin mutañajunʼ. Índo̱ gútañajunʼ gajmiún Jesucristo, ikhiin muyambáá mu muni̱ dí Ku̱ba̱ʼ rígi̱ maʼni̱i̱ mbá Ku̱ba̱ʼ mitsaanʼ ga̱jma̱a̱ xa̱bu̱ bi̱ nunimbu̱ún maguánú mani̱ndxu̱ún jmbiin. Ra̱ʼkhá tháán nadxún xa̱bu̱ bi̱ mbaʼin wéñuuʼ índo̱ nduyáá xú káʼnii rígá Conmemoración ga̱jma̱a̱ mundxa̱ʼwa̱míjna̱ xú káʼnii gámbánuu profecía dí naʼthí náa Biblia, xóo dí na̱ʼkha̱ náa Isaías 35:5, 6; 65:21-23 ga̱jma̱a̱ Apocalipsis 21:3, 4. Dí mundxa̱ʼwa̱míjna̱ dí kúwíin náa Ku̱ba̱ʼ nuxi̱ʼ gajmiún bi̱ nandún kuñún naʼni mbuyáá rí gajkhun nindxu̱u̱ rí wíji̱ mundrígúu ga̱jma̱a̱ naxnún tsiakii dí muni̱ má xúʼko̱ ñajuunʼ Jeobá (Mat. 24:13; Gál. 6:9).
8. Xú káʼnii imbo̱o̱ʼ numuu dí bi̱ eʼwíinʼ mugu̱ nandún makuwíin náa Conmemoración rá.
8 Imbo̱o̱ʼ numuu dí bi̱ eʼwíinʼ mugu̱ nandún makuwíin náa Conmemoración nindxu̱u̱ mu musngajmúún dí nandún kuñún ga̱jma̱a̱ dí numbañún a̱ngiu̱lú bi̱ kaxtaʼwíin. Náa Biblia naʼthí dí bi̱ kaxtaʼwíin ga̱jma̱a̱ bi̱ guáʼthi̱i̱n makuwíin náa tsu̱du̱u̱ Ku̱ba̱ʼ makuwá mbóó jnduʼ. Guʼyáá tikhuu profecía dí nasngájma rígi̱.
9. Xó má eʼthí profecía dí na̱ʼkha̱ náa Zacarías 8:23 ndiéjunʼ esngajma bi̱ eʼwíinʼ mugu̱ náa a̱ngiu̱ún bi̱ kaxtaʼwíin rá.
9 (Atraxnuu Zacarías 8:23). * Profecía rígi̱ nasngájma kaʼwu xú kaʼnii bi̱ eʼwíinʼ mugu̱ nusngajma rí nandún kuñún a̱ngiu̱ún bi̱ kaxtaʼwíin. “Mbáa judío” ga̱jma̱a̱ “ikháanʼla” nandoo gáʼthúu̱n mbáwíí xa̱bu̱, ikhiin nindxu̱ún bi̱ kaxtaʼwíin bi̱ xóó naguanún (Rom. 2:28, 29). ‹Mbá gu̱wi̱i̱nʼ xa̱bekha bi̱ nuthi xúgíʼ ajngáa bi̱ naguwáʼ náa xuajen mba̱ʼo̱› nandoo gáʼthúu̱n bi̱ eʼwíinʼ mugu̱. Nurtuwiin xa̱ʼ bi̱ kixtiʼyáaʼ xóo muʼthá naguajún jmbu náa bi̱ kaxtaʼwíin ga̱jma̱a̱ nakúwíin mbóó jnduʼ mu mbuyamajkuíí Jeobá. Índo̱ naʼni wakíʼ dí nagumariya̱a̱ʼ Conmemoración, bi̱ eʼwíinʼ mugu̱ nusngajma dí kúwíin mbóó gajmiún bi̱ kaxtaʼwíin índo̱ nakúwíin ikhí.
10. Ndiéjunʼ niʼni Jeobá mu maʼnimbánuu profecía dí na̱ʼkha̱ raʼthí náa Ezequiel 37:15-19, 24, 25 rá.
10 (Atraxnuu Ezequiel 37:15-19, * 24, 25). * Jeobá niʼnimbánuu profecía rígi̱, xú káʼnii rá. Índo̱ bi̱ kaxtaʼwíin ga̱jma̱a̱ eʼwíinʼ mugu̱ ndiwi̱ín mu muñajunʼ mbóó jnduʼ. Profecía ma̱ngaa naʼthí ga̱jma̱a̱ numuu a̱jma̱ ixi̱, timbá nindxu̱u̱ bi̱ guáʼthi̱i̱n makuwá mekhuíí xóo ixi̱ dí nagájnuu náa “Judá” (mbá tribu náa dí nigájnún reyes bi̱ nitañajunʼ náa Israel). Bi̱ guáʼthi̱i̱n makuwá náa Ku̱ba̱ʼ nindxu̱ún xóo ixi̱ dí nagájnuu “náa Efraín”. * Jeobá maruwiin a̱jma̱ enii xa̱bu̱ bugi̱ mu maʼni̱i̱ “mbóó ixi̱”, rígi̱ nandoo gáʼthúu̱n rí makuwá mbóó jnduʼ runi̱ ñajuunʼ Rey Jesucristo. Mámbá tsiguʼ bi̱ kaxtaʼwíin gajmiún bi̱ eʼwíinʼ mugu̱ nakúwíin náa Conmemoración raʼkháa xóo a̱jma̱ ixi̱ dí na̱nguá ka̱xtu̱waa, ikhiin ‹ndawi̱ín ga̱jma̱a̱ mbawíí mbaxtú ndrígu̱ún eʼni̱i̱› (Juan 10:16).
11. Xú káʼnii embañún a̱ngui̱i̱n Cristo bi̱ eʼwíinʼ “mugu̱” bi̱ na̱ʼkha̱ raʼthí náa Mateo 25:31-36, 40 rá.
11 (Atraxnuu Mateo 25:31-36, * 40). * “Mugu̱” bi̱ na̱ʼkha̱ raʼthí gi̱i̱ nandoo gáʼthúu̱n xa̱bu̱ bi̱ nuni̱ rí májánʼ bi̱ kúwíin náa iwáá mbiʼi rígi̱ ga̱jma̱a̱ guáʼthi̱i̱n makuwá náa Ku̱ba̱ʼ mitsaanʼ, xóo muʼthá bi̱ eʼwíinʼ mugu̱. Ikhiin numbañún a̱ngui̱i̱n Cristo bi̱ kaxtaʼwíin bi̱ xóó naguanún náa ñajunʼ mba̱a̱ rí kajkuáa ñawún muni̱, xóo dí majuiʼtáraʼa náa mbájndi numbaaʼ ga̱jma̱a̱ majuiʼsngáa (Mat. 24:14; 28:19, 20).
12, 13. Náá i̱ʼwáʼ ñajunʼ eruguambáá bi̱ eʼwíinʼ mugu̱ mu mumbañún a̱ngui̱i̱n Cristo rá.
12 Xúgíʼ tsiguʼ índo̱ nacho̱o̱ magi̱ʼdu̱u̱ Conmemoración bi̱ eʼwíinʼ mugu̱ nusngajma rí numbañún a̱ngui̱i̱n Cristo, xú káʼnii rá. Nuyambáá mu majuixnáráʼa invitación ndrígóo Conmemoración náa xúgíʼ numbaaʼ, mu xúʼko̱ xa̱bu̱ bi̱ nanigu̱u̱nʼ ma̱ndoo makuwíin ikhí (atayáá náa kúgumaʼá “ Lá xtaa ratani̱ rataminaʼ mu matiambáá náa majuixnáráʼa invitación ndrígóo Conmemoración ráʼ.”) A̱ngiu̱lú bi̱ kúwíin náa xúgíʼ numbaaʼ nuniratáá rí gáʼyóoʼ mu maguma Conmemoración, maski asndu náa congregación dí ikhiin kúwíin nda̱wi̱i̱n a̱ngiu̱lú bi̱ kaxtaʼwíin. Bi̱ eʼwíinʼ mugu̱ nadxún dí muru̱gua̱mbañúún a̱ngui̱i̱n Cristo, ikhiin nduyáá dí Jesús ndaʼyoo xúgíʼ dí nuni̱ ga̱jma̱a̱ numún bi̱ kaxtaʼwíin, nindxu̱u̱ xóo muni̱ ga̱jma̱a̱ numuu Cristo (Mat. 25:37-40).
13 Náá numuu rí mbá xúgiáánʼ nakuwáánʼ náa Conmemoración maski asndu mixtiʼkhu náa rí kuáʼti̱i̱n makuwáánʼ rá.
NÁÁ NUMUU RÍ NAKUWÁÁNʼ MBÁ XÚGIÁÁNʼ RÁ.
14. Xú káʼnii nisngájmulú ngajua rí gíʼdoo Jeobá ga̱jma̱a̱ Jesús rá.
14 Numuu rí nandulú muxnáa núma̱aʼ Jeobá ma̱ngaa Jesús ga̱jma̱a̱ numuu ngajua rí ikhiin nisngajmulú. Jeobá mbaʼa enii xóo nisngájma ngajua ndrígóo, mú dí itháán nagájnuriyo̱o̱ʼ ikhaa nindxu̱u̱ dí nikungua̱a̱nʼ A̱ʼdióo mu mamínuuʼ ga̱jma̱a̱ makhañúu ga̱jma̱á numulú (Juan 3:16). Jesús ma̱ngaa nisngájma ngajua ndrígóo índo̱ nixtáa xawii mu maxnáximinaʼ mu makhañúu ga̱jma̱á numulú (Juan 15:13). Gajkhun má dí xáʼngulú gúʼninumíín xúgíʼ dí nini ga̱jma̱á numulú ga̱jma̱a̱ numuu ngajua rí guáʼdáá, mú ma̱ndoo musngajmá dí nuxníí núma̱aʼ ga̱jma̱a̱ numuu xóo kaʼnii kuwáánʼlú (Col. 3:15). Índo̱ nakuwáanʼ náa Conmemoración nusngajmá rí nuxníí núma̱aʼ ga̱jma̱a̱ numuu ngajua rí ikhiin nisngajma ga̱jma̱a̱ xúʼko̱ nusngajmá mangáánʼ rí nandulú kuʼñúún.
15. Náá numuu rí nuxna̱a̱ núma̱aʼ ga̱jma̱a̱ numuu tsingijñaʼ dí nixnájxi̱ Jesús bi̱ kaxtaʼwíin ga̱jma̱a̱ eʼwíinʼ mugu̱ rá.
15 Numuu rí nuxnáa wéñuuʼ núma̱aʼ ga̱jma̱a̱ numuu rí nijuiʼtsiwáánʼ (Mat. 20:28). Bi̱ kaxtaʼwíin nduyamajkuíí wéñuuʼ rí nijuiʼtsiwíin numuu dí rígi̱ nayambáá mu maguaʼthi̱i̱n mbá rí májánʼ. Ga̱jma̱a̱ numuu fe rí guáʼdáá náa tsingijñaʼ dí nixnájxi̱ Jesucristo, Jeobá naʼthúún rí nindxu̱ún jmbiin ga̱jma̱a̱ nagruiguíin xóo e̱ji̱i̱n (Rom. 5:1; 8:15-17, 23). Bi̱ eʼwíinʼ mugu̱ mangiin nduyamajkuíí dí nijuiʼtsiwíin numuu rí ga̱jma̱a̱ fe rí guáʼdáá náa dí nikháñuu Jesucristo ma̱ndoo magruiguíin Dios ga̱jma̱a̱ muni̱ ñajuunʼ mitsúʼkháan ma̱ngaa dí makáwíin náa ‹ga̱ʼkhu̱ rí phú mba̱a̱› (Apoc. 7:13-15). Índo̱ a̱jma̱ enii xa̱bu̱ bugi̱ nakúwíin mbóó náa Conmemoración nusngajma rí nuxna̱a̱ núma̱aʼ ga̱jma̱a̱ numuu rí nijuiʼtsiwíin.
16. Ndiéjunʼ imbo̱o̱ʼ numuu rí nakuwáánʼ náa Conmemoración rá.
16 Numuu rí nandulú muʼnimbulú kuʼyáá Jesús. Tséʼñuu asndu náá má guáʼthi̱i̱n makuwáánʼlú xúgiáánʼ nuʼnimbulú dí niʼtáñajunlú Jesús, dí muʼniriya̱a̱ʼ xóo nikháñuu, ikhaa niʼthí: “Gu̱ni̱la̱ má xúʼko̱ rígi̱ mu marmáʼáan a̱jkia̱la kuyo̱ʼ” (1 Cor. 11:23, 24).
XÚ KÁʼNII EMBÁYULÚ RÍ MAKUWÁANʼLU XÚGIÁÁNʼ RÁ.
17. Náá numuu rí makuwáánʼ náa Conmemoración naʼni rí makuwáánʼ mijngii náa Jeobá rá.
17 Numuu dí nambáyulú makuwáánʼ mijngii náa Jeobá (Sant. 4:8). Xó má ndiʼyáá rí makuwáánʼ náa Conmemoración nindxu̱u̱ náa ma̱ndoo mundxa̱ʼwa̱míjna̱lú dí kuáʼti̱i̱n náa dí Jeobá nixnúlú ma̱ngaa ngajua rí ikhaa nisngájmulú (Jer. 29:11; 1 Juan 4: 8-10). Nduʼyáá dí gajkhun nindxu̱u̱ dí kuaʼthi̱i̱nlú ga̱jma̱a̱ dí ngajua dí ikhaa gíʼdoo nditháan tsétumuu. Índo̱ nundxa̱ʼwa̱míjna̱ ga̱jma̱a̱ numuu rígi̱ naʼni dí maʼndulú kuʼyáá itháán Jeobá ga̱jma̱a̱ naʼni dí makuwáánʼ itháán mijngii náa ikhaa (Rom. 8:38, 39).
18. Ndiéjunʼ exkajxáánʼ mu̱ʼni̱ índo̱ nundxa̱ʼwa̱míjna̱ náa xkridoo Jesús rá.
18 Numuu rí naxkajxáánʼ mbuʼyaridáá Jesús (1 Ped. 2:21). Mbá xmáná wapháá índo̱ nacho̱o̱ magi̱ʼdu̱u̱ Conmemoración nuraxnuu dí na̱ʼkha̱ raʼthí náa Biblia ga̱jma̱a̱ numuu iwáá mbiʼi xóo nixtáa Jesús náa tsu̱du̱u̱ Ku̱ba̱ʼ, xóo nikháñuu ga̱jma̱a̱ xóo nigabi̱i̱. Índo̱ najuixná discurso náa Conmemoración naʼni marmáʼáan a̱jkiu̱lú xú káʼnii Jesucristo nandoo kaʼyulú (Efes. 5:2; 1 Juan 3:16). Dí muraxnuu náa naʼthí xú kaʼnii nixnáximinaʼ Jesús ga̱jma̱a̱ mundxa̱ʼwa̱míjna̱, ‹naxkajxáánʼ majngruigulú xó má nijngruigo̱o̱ ikhaa› (1 Juan 2:6).
19. Ndiéjunʼ gíʼmaa mu̱ʼni̱ mu Dios ma̱ndoo kaʼyulú má xúʼko̱ rá.
19 Naʼni dí maʼndulú kuʼyáá má xúʼko̱ Dios (Jud. 20, 21). Índo̱ nu̱ʼni̱ asndu xó má eʼngo̱o̱ mu muʼnimbulú kuʼyáá ga̱jma̱a̱ mu̱ʼni̱ kaʼwi̱i̱ mbiʼyuu ma̱ngaa mu̱ʼni̱ rí maʼdxuu, rúʼko̱ naʼni rí ma̱ndoo kaʼyulú má xúʼko̱ (Prov. 27:11; Mat. 6:9; 1 Juan 5:3). Dí makuwáánʼ náa Conmemoración naxnúlú tsiakii mu muʼthán Jeobá: “¡Nandoʼ dí mambajxúlú má xúʼko̱!”.
20. Náá numuu rí nakuwáánʼ náa Conmemoración rá.
20 Tséʼñuu asndu náá má gákuwáánʼlú, á mu mekhuíí o náa tsu̱du̱u̱ Ku̱ba̱ʼ gi̱i̱, xúgiáánʼ kuaʼdáá mbá numuu kiejuunʼ dí makuwáánʼ náa Conmemoración mámbá tsiguʼ. Mámbá índo̱ nagimbáanʼlú mu muʼniriya̱a̱ʼ ndxa̱a̱ rígi̱, narmáʼáan a̱jkiu̱lú eʼni mbáa bi̱ nikháñuu bi̱ nandulú kuʼyáá wéñuuʼ: Ikhaa nindxu̱u̱ Jesucristo. Ga̱jma̱a̱ naʼni marmáʼáan a̱jkiu̱lú kuʼyáá mbáa bi̱ nisngájmaa itháan mba̱a̱ ngajua: Ikhaa nindxu̱u̱ Jeobá bi̱ nixnájxi̱ A̱ʼdióo mu maʼtsiwáánʼlú. Tsiguʼ rígi̱ Conmemoración marigá wakíʼ viernes 15 ñajunʼ gu̱nʼ abril tsiguʼ 2022. Numuu rí nandulú kuʼyáá wéñuuʼ Jeobá ga̱jma̱a̱ A̱ʼdióo, ikha jngóo ndaa imbo̱o̱ʼ rí itháán gíʼdoo numuu ki xóo rí makuwáánʼ náa Conmemoración náa nagumariya̱a̱ʼ xóo nikháñuu Jesucristo.
AJMÚÚ 16 Guʼni mba̱a̱ Jeobá ga̱jma̱a̱ numuu A̱ʼdióo
^ Xúgíʼ tsiguʼ nandulú makuwáánʼ náa narígá Conmemoración, tséʼñuu á mu ni̱ndxu̱lú bi̱ makuwáánʼ náa mekhuíí o náa tsu̱du̱u̱ Ku̱ba̱ʼ gi̱i̱. Náa artículo rígi̱ mbuʼyáá rí naʼthí náa Biblia ndíjkha rí gíʼdoo numuu rí makuwáánʼ náa Conmemoración ga̱jma̱a̱ xú káʼnii embáyulú dí muʼnilú rígi̱.
^ Mataxkamaa itháán ga̱jma̱a̱ numuu rí nambánuu nuxi̱ʼ ga̱jma̱a̱ rí nimbánúún náa mutañajunʼ náa i̱yi̱i̱ʼ Bi̱ Nayejngoo dí nigájnuu 15 ñajunʼ gu̱nʼ octubre tsiguʼ 2014, ináa 15 asndu 17, rí kayá edxu̱u̱ “Llegarán a ser ‘un reino de sacerdotes’”.
^ KUMA RÍ GÍʼDOO NUMUU: Ajngáa bi̱ kaxtaʼwíin bi̱ xóó naguanún nandoo gáʼthúu̱n cristianos bi̱ kaxtaʼwíin bi̱ xóó kúwíin mbiʼñún náa tsu̱du̱u̱ ku̱ba̱ʼ.
^ Zacarías 8:23: “Rígi̱ nindxu̱u̱ rí naʼthí Jeobá bi̱ gíʼdiin mbaʼin ejército: ‹Mbiʼi rúʼko̱, mbá gu̱wi̱i̱nʼ xa̱bekha bi̱ nuthi xúgíʼ ajngáa náa xuajin mba̱ʼu̱ murajtuun, xúʼko̱, murajtuun xa̱ʼ jnáwu̱u̱n mbáa judío ga̱jma̱a̱ muthi: “Nanduxu muʼguá ga̱jma̱á nindxa̱laʼ, numuu rí nidxáwinxu rí Dios xtáa ga̱jma̱á nindxa̱laʼ›”.
^ Ezequiel 37:15-19: “Ga̱jma̱a̱ ajngóo Jeobá ni̱ʼkha̱ náa ikhúúnʼ ga̱jma̱a̱ niʼthúunʼ: Ga̱jma̱a̱ ikháánʼ a̱ʼdióo xa̱biya̱, ayá mbá ixi̱ ga̱jma̱a̱ ataniraʼmáʼ ikhí: ‹Maʼga̱ náa Judá ga̱jma̱a̱ náa e̱ji̱i̱n Israel bi̱ xtáa gajmíi̱n›. Ga̱jma̱a̱ nda̱wa̱á ayá i̱mba̱ ixi̱ ga̱jma̱a̱ ataniraʼmáʼ ikhí: ‹Maʼga̱ náa inuu José, ixi̱ ndrígóo Efraín, ga̱jma̱a̱ xúgínʼ bi̱ kuwa náa goʼwóo Israel mangiin bi̱ xtáa gajmíi̱n›. Ga̱jma̱a̱ atani rí muxuʼmamijná mámbáa rí ikhiin asndu maʼni̱i̱ imbóó ixi̱ náa ñawáanʼ ikháánʼ. Arathún: ‹Rígi̱ rí niʼthí Jeobá, Tátá bi̱ kaʼyoo maʼtáñajunʼ xúgíʼ numbaaʼ: “Gu̱ya̱a̱, magujtúun ixi̱ ndrígóo José, dí rígá náa ñawúunʼ Efraín, ga̱jma̱a̱ xuajen ma̱jkha̱ʼ ndrígóo Israel ga̱jma̱a̱ bi̱ xtáa gajmíi̱n, ga̱jma̱a̱ maʼgíiʼ náa ikhaa, xóo muʼthá, ixi̱ ndrígóo Judá, ga̱jma̱a̱ mani rí mani̱ndxu̱u̱ mbóó ixi̱, ga̱jma̱a̱ maguanu mani̱ndxu̱u̱ mbóó náa ñawúunʼ”›”.
^ Ezequiel 37: 24, 25: “Ga̱jma̱a̱ xa̱bi̱ʼ David mani̱ndxu̱u̱ rey náa ikhiin, ga̱jma̱a̱ mbáwíi báxtúu bi̱ maguanu maguaʼdáá xúgínʼ. Ga̱jma̱a̱ náa xtángoo ndrígóʼ gajngruigu̱u̱n, ga̱jma̱a̱ munimbu̱ún rí natañájunʼ, ga̱jma̱a̱ munimbánii tsumáá. Makuwíin náa ku̱ba̱ʼ rí nixnúu xa̱bi̱ʼ Jacob, náa nikuwá wajinʼ xiʼñála. Ikhí makuwíin kámuu, ikhiin gajmiún e̱jñún ga̱jma̱a̱ ejín xíñúnʼ; David bi̱ nindxu̱u̱ xa̱bi̱ʼ maʼtáñajúúnʼ asndu kámuu mbiʼi”.
^ Mataxkamaa itháán ga̱jma̱a̱ numuu profecía rígi̱ dí naʼthí ga̱jma̱a̱ numuu a̱jma̱ ixi̱, dí na̱ʼkha̱ náa Ezequiel capítulo 37, atayáá náa “Graxe̱ rí nuni bi̱ nuraxnuu” náa i̱yi̱i̱ʼ Bi̱ Nayejngoo dí nigájnuu julio tsiguʼ 2016 náa ináa 31 ga̱jma̱a̱ 32.
^ Mateo 25:31-36: “Índo̱ A̱ʼdióo xa̱biya̱ gátanga̱a̱ ga̱jma̱a̱ tsiakii ndrígóo, ma̱ngaa gajmíi̱n xúgíinʼ ángeles, ikhú magi̱ʼi̱ náa xílí dí mitsaanʼ rí kaʼyoo magi̱ʼi̱. Xúgíinʼ xa̱bu̱ numbaaʼ magimbíin náa ikhaa, ga̱jma̱a̱ ikhaa markuájíinʼ, xó má eʼni mbáa báxtúu rí narkuájíinʼ mugu̱ náa tsu̱jtuunʼ. Ikhú matsuajiin mugu̱ náa níjniú mújúunʼ ga̱jma̱a̱ tsu̱jtuunʼ náa níjniú xti̱yu̱u̱ʼ. Ikhú Rey maʼthúún bi̱ guájun níjniú mújúunʼ: ‹Aguwaʼla, ikháanʼ bi̱ Anu̱ʼ niʼni tsajkurámáanʼla, gundrígúula rí májánʼ dí maxná Xa̱bu̱ Ñajunʼ ndrígóo Dios, rí niguma májáánʼ makánála asndu nákha nigi̱ʼi̱ numbaaʼ. Numuu rí nixkidxuʼ, ikháanʼla nixníʼtsuʼ. Nikándawuʼ, ikháanʼla nixnuʼ rí ma̱ga̱nʼ. Maski ajndu túniʼniúnʼla mú ikháanʼ nindrígún náa guʼwála. Tagúʼdoʼ xtíñúʼ, mú ikháanʼ nixnuʼla rí maguʼwúnʼ. Niʼniuʼ nandii, mú ikháanʼla niñewu̱nʼ. Ni̱jkhá guʼwá e̱jua̱nʼ, mú ikháanʼla nijkua̱ gúyóʼ›”.
^ Mateo 25: 40: “Ga̱jma̱a̱ Rey maʼthúún: ‹Nata̱la gajkhun rí xúgíʼ dí nini̱i̱ mbáa ndxájuʼ bi̱ itháan chíʼgíiʼ bugi̱, ikhúúnʼ má niniuʼ›”.
