1, 2. Ndiéjuunʼ dí ndayóoʼ muʼni má xúʼko̱ nda̱wa̱á dí nijngúlú iyááʼ ga̱jma̱a̱ náá numuu rá.

 NGUÁTHÁ nuthu tani̱ kaʼwi̱i̱ guʼwáaʼ ikháán. Mbáa nákha xóó tseraxtaa ikhí nitani̱ kaʼwi̱i̱ májánʼ wéñuuʼ. Mú ndiéjuunʼ gárígá á mu natatsíñááʼ ratani̱ kaʼwi̱i̱ rá. Xó má eʼyáá, maʼni yujndaʼ ma̱ngaa maʼni tsaga itháan nacha̱ á mu na̱nguá tani kaʼwi̱i̱. Mu guʼwá maʼni kaʼwu ga̱jma̱a̱ makujmaa májánʼ, ndayóoʼ dí maguma kaʼwi̱i̱ mbaʼa nuthu.

² Xúʼko̱ má kayuuʼ gíʼmaa muʼni ga̱jma̱a̱ dí xóo mundxaʼwáá edxu̱lú ma̱ngaa dí xóo nindxu̱lú. Gajkhun má dí nákha xóó tséjngulú iyááʼ ndiyóoʼ muʼnimijna muriʼkhui̱i̱ʼ dí xóo nindxu̱lú ga̱jma̱a̱ dí muʼni “kaʼwumijnáa náa xúgíʼ rí naʼni gachúu xuyulúʼ ga̱jma̱a̱ náa a̱jkiu̱lú” (2 Cor. 7:1). Mú rí mbiʼi xúgi̱ ikháanʼ ndayóoʼ muʼnimbulú consejo dí niʼthí apóstol Pablo: “Ndayóoʼ dí muriʼku̱u̱ i̱mba̱ nuxi̱ʼ xóo endxa̱ʼwa̱a̱ e̱dxa̱laʼ” (Efes. 4:23). Ndíjkha dí gíʼdoo wéñuuʼ numuu muʼnimijna má xúʼko̱ rá. Numuu dí “tsaga” ga̱jma̱a̱ “yujndaʼ” dí rígá náa tsu̱du̱u̱ numbaaʼ rígi̱ ma̱ndoo marigá mbá nacha̱ náa ikháanʼlú. Mu xágíʼnulú rúʼko̱, ndayóoʼ maʼni kaʼwáánʼ má xúʼko̱ náa inuu Jeobá. Gíʼmaa muyeximíjnalú xúgííʼ mbiʼi xóo e̱ndxa̱ʼwáá edxu̱lú, xóo kaʼniáánʼ ga̱jma̱a̱ ndiéjuunʼ enigulú mu̱ʼni̱.

3. Ndiéjuunʼ eyoo gáʼthúu̱n dí muriʼkui̱i̱ ku̱ma̱ ndrígúlú rá. (Romanos 12:2.)

³ Ndiéjuunʼ gíʼmaa muʼni mu muriʼkui̱i̱ ku̱ma̱ ndrígulú, xóo muʼthá, muriʼkhu̱u̱ xóo e̱ndxa̱ʼwáá edxu̱lú rá. (Atraxnuu Romanos 12:2.) Rígi̱ na̱nguá eyoo gáʼthúu̱n dí i̱ndó ndayóoʼ muʼni tikhu̱ú dí májánʼ mu makujmaa dí kuwáánʼ májánʼ. Dí itháán gíʼdoo numuu nindxu̱u̱ dí muʼnimijna mbuʼyáá xú káʼnii phú nindxu̱u̱ awúu̱n a̱jkiu̱lú, mu xúʼko̱ muriʼkhu̱u̱ xóo ni̱ndxu̱lú, xóo eʼnilú, mu muʼni dí nandoo Jeobá. Mú rígi̱ raʼkháa mbóó nuthu eyóoʼ muʼnilú, ndayóoʼ muʼni má xúʼko̱.

4. Ndiéjuunʼ gándoo muʼni mu numbaaʼ rígi̱ xáriʼkhuu dí nundxaʼwamíjna̱ rá.

⁴ Índo̱ gánindxu̱lú xa̱bu̱ jmbii, maʼngo̱o̱ muʼni xúgííʼ xó má nandoo Jeobá. Mú dí mbiʼi xúgi̱, naʼni miʼskhoo dí muʼni xúʼko̱ kaʼnii, ndayóoʼ muʼni mbá tsiakii mu muʼni dí nandoo ikhaa. Guʼyáá xú káʼnii niʼthí apóstol Pablo náa Romanos 12:2 dí ndayóoʼ muriʼkui̱i̱ ku̱ma̱ ndrígúlú ma̱ngaa dí mbuʼyáá ndiéjuunʼ dí phú nandoo Dios muʼnilú. Dí itháán gíʼdoo numuu nindxu̱u̱ dí mundxaʼwamíjna̱ ga̱jma̱a̱ mbuʼyáá á mu dí nuraʼwíí muʼnilú ga̱jma̱a̱ dí nuʼgíʼmíjna̱ muʼnilú nindxu̱u̱ xóo nandxa̱ʼwáminaʼ Dios, raʼkháa dí wíí mutriʼgáanʼlú ga̱jma̱a̱ xúniʼñáánʼ dí numbaaʼ rígi̱ mariʼkhuu xóo endxaʼwamíjna̱lú.

5. Xú káʼnii gándoo guʼyáá ndiéjuunʼ endxaʼwamíjna̱ ga̱jma̱a̱ numuu rí na̱jkha̱ rajngiyuu mbiʼi ndrígóo Jeobá rá. (Atayáá xtiʼkhuu.)

⁵ Mbá xkri̱da, Dios ndrígúlú nandoo dí makuwáánʼ xawii mu mbuʼyáá “índo̱ gáʼkha̱ mbiʼi ndrígóo Jeobá” (2 Ped. 3:12). Ikhaa jngóo gurajximíjna̱lú: “Lá nasngajmá náa vida ndrígóʼ dí nakro̱ʼo̱ʼ dí mbiʼi na̱jkha̱ ratumuu ráʼ. Lá nakujmaa dí naraʼwíí maʼni náa nanigajma̱a̱ ma̱ngaa náa nañajunʼ dí mani ñajuunʼ Jeobá  gíʼdoo itháán numuu ráʼ. Lá nda̱yo̱o̱ gajkhun dí Jeobá má gáñe̱wu̱nʼ ikhúún xó má bi̱ kúwíin náa goʼwóʼ ráʼ. O naxmiéjunʼ má xúʼko̱ dí magúʼdoo itháan cheʼ.” Jeobá nadxuu wéñuuʼ índo̱ ndaʼyoo dí nuʼni tsiakimíjna̱ mu makuwáanʼ xó má nandoo ikhaa (Mat. 6:25-27, 33; Filip. 4:12, 13).

6. Ndiéjuunʼ gíʼmaa muʼni má xúʼko̱ rá.

⁶ Gíʼmaa mbuʼyáá má xúʼko̱ ndiéjuunʼ endxaʼwamíjna̱lú ga̱jma̱a̱ guriʼkui̱i̱ náa dí ndayóoʼ muʼni dí májánʼ. Apóstol Pablo nixnúún consejo rígi̱ cristianos bi̱ nikúwá náa Corinto: “Guyajmamijná má xúʼko̱ mu mbu̱ya̱a̱ á mu kuaʼdáá mbá fe gújkhúʼ. Gusngajmá má xúʼko̱ mu mbu̱ya̱a̱ xóo nindxa̱la” (2 Cor. 13:5). Mu mbuʼyáá á mu kuaʼdáá fe, raʼkháa i̱ndó muʼgua náa reunión o nguána̱á gúʼtaraʼa, ma̱ngaa nandoo gáʼthúu̱n dí xú káʼnii endxaʼwamíjna̱lú, ndiéjuunʼ dí nuʼnilú ga̱jma̱a̱ ndiéjuunʼ dí exkajxáánʼ muʼnilú. Ikhaa jngóo ndayóoʼ dí mambá mbiʼi muriʼkhu̱u̱ xóo endxaʼwamíjna̱ índo̱ nuraxnuu Ajngá rawuunʼ Dios. Ndayóoʼ majmañulú mundxaʼwamíjna̱ xóo Dios endxaʼwóo edxu̱u̱ nda̱wa̱á muʼnimi̱jna̱ muriʼkui̱i̱ náa ndayóoʼ mu muʼni dí ikhaa nandoo (1 Cor. 2:14-16).

7. Xó má naʼthí náa Efesios 4:31, 32, ndiéjuunʼ imbo̱o̱ʼ dí gíʼmaa muʼni ga̱jma̱a̱ náá numuu dí naʼñulú miʼskhaa muʼni rá.

⁷ (Atraxnuu Efesios 4:31, 32). I̱mba̱ dí ndayóoʼ muʼni nindxu̱u̱ dí muriʼkui̱i̱ xóo xa̱bu̱ nindxu̱lú (Efes. 4:24). Mu ma̱ndoo muʼni rígi̱ xáguanúlú xúʼkhiínʼ. Mbá xkri̱da, ndayóoʼ muʼni tsiakimíjna̱ muriʼkui̱i̱ xóo xa̱bu̱ nindxu̱lú, xóo dí xúyejxíi sia̱nʼ, dí xákiʼnáanʼlú nacha̱ ga̱jma̱a̱ dí xájmangulú. Náá numuu dí naʼñulú miʼskhaa muʼnilú rígi̱ rá. Numuu dí tikhuanʼ nigu̱ʼwu̱nlú dí xúʼkhíin nindxu̱lú. Náa Biblia naʼthí ga̱jma̱a̱ numuu xa̱bu̱ bi̱ mbeguuʼ ejmangu̱u̱ʼ ga̱jma̱a̱ bi̱ mbá náchaá kiʼnáa (Prov. 29:22). Mu ma̱ndoo muriʼkumijnáalú ndayóoʼ muʼni tsiakimijna má xúʼko̱ maski ajndu nijngúlú má iyááʼ. Guʼyáá mbóoʼ experiencia dí naʼthí ga̱jma̱a̱ numuu rúʼko̱.

8, 9. Xú káʼnii esngájma xkri̱doo Stephen dí gíʼdoo wéñuuʼ numuu muriʼkumijnáa má xúʼko̱ xóo nindxu̱lú nákha ginii rá.

⁸ Mbáa ndxájulú bi̱ mbiʼyuu Stephen niʼñuu gakhi̱i̱ dí maniñuuʼ dí mbeguuʼ xúgi̱ najmangu̱u̱ʼ. Ikhaa naʼthí: “Maski ajndu nijngún’ má iyáá’, ndiyóo’ mañewu̱u̱n’ xóo jaʼniún. Mbá xkri̱da, mbóoʼ mbiʼi ni̱jkuáxu gúñuun mbá familia náa mbá colonia mu mutarúʼúnxu. Ikhú ndi̱yo̱o̱ dí mbáa kuʼwáʼ na̱jkha̱ kayóo radio ndrígóo cariúʼ, ikhaa jngóo niga̱yúʼ rajxkoo. Índo̱ itháán magujtuwíinʼ ikhaa nidaʼ radiúʼ, ikhú nigáyúu. Índo̱ ni̱thu̱u̱n grupo bi̱ nigajnúʼ gátaraʼa gajmíʼ xú kaʼnii niʼngo̱ʼ nixkamaa radiúʼ, mbáa ndxájulú bi̱ gíʼdoo experiencia niʼthúnʼ: “Ndiéjuunʼ gátani̱i̱ á mu nitaxkamaa xá.” Graxe̱ rúʼko̱ niʼni mba̱yo̱o̱ dí kaʼníí rígá náa ikhúún xóo nindxu̱ʼ nákha ginii”. b

⁹ Xkri̱doo Stephen nasngájma dí ma̱ndoo marmáʼáan a̱jkiu̱lú xóo nindxu̱lú nákha ginii, maski ajndu má nikumulú dí niriʼkumijnáalú. Á mu nagíʼnulú xúʼko̱ kaʼnii, xákáguabáanʼlú, ni má xúndxaʼwamíjna dí nindxu̱lú mbáa cristiano bi̱ ra̱májáanʼ. Asndu apóstol Pablo nigíʼnuu xúʼko̱ ma̱ngaa, ikhaa niʼthí: “Índo̱ nandoʼ ma̱ni̱ dí májánʼ, dí ra̱májánʼ wíji̱ ginii” (Rom. 7:21-23). Numuu dí nindxu̱lú xa̱bu̱ aʼkhá, mbáa nguáná ma̱ndoo mutangaánʼ muʼni xó má niʼni nákha ginii. Xó má mbá guʼwá natanga̱a̱ naʼni̱i̱ mitsaga ga̱jma̱a̱ nagu̱u̱ yujndaʼ. Ikhaa jngóo ndayóoʼ muʼni tsiakimíjna̱ mu makuwáanʼlu kaʼwáánʼ. Ndiéjuunʼ gándoo gámbáyulú rá.

10. Ndiéjuunʼ gáʼyóoʼ muʼni mu ma̱ndoo muriʼkumijnáanʼlú rá. (1 Juan 5:14, 15.)

 ¹⁰ Índo̱ gúʼtákáñíínlú Jeobá, guʼtháán ndiéjuunʼ dí naʼñulú miʼskhaa muriʼkumijnáalú. Guyáá gajkhun dí maʼdxawunlú ga̱jma̱a̱ mambáyulú (atraxnuu 1 Juan 5:14, 15). Gajkhun má dí Jeobá xáʼni jngudi̱i̱ mbájkhu̱ú náa dí ndayóoʼ muriʼkumijnáalú. Mú ma̱ndoo maxnúlú tsiakii mú xákaguabáanʼlú (1 Ped. 5:10). Xú káʼnii gúʼni̱ mu muʼnimbaníí dí nunda̱ʼa̱ rá. Gíʼmaa muʼni gáʼdu̱u̱n xúgííʼ dí naʼni matangaán muʼni xóo nindxu̱lú nákha ginii. Xáʼyóoʼ mbuʼyáá dí xámbáyulú, xóo películas o i̱ʼwáʼ canal ndrígóo tele o dí muraxnuu náa dí na̱ʼkha̱ mbóoʼ dí ikháanʼ kuwáánʼ ruʼnigajmiulú mu muriʼkumijnáánʼ. Xúrajthi náa edxu̱lú mbóoʼ dí maʼni magua̱ʼa̱ muʼni (Filip. 4:8; Col. 3:2).

11. Xú káʼnii gándoo guriʼkumijnáánʼ xóo nindxu̱lú rá.

¹¹ Ndayóoʼ muʼniñáánʼ rani̱ndxu̱lú xóo nákha ginii, mú gíʼdoo wéñuuʼ numuu dí manindxu̱lú imba̱a̱ nuxi̱i̱ʼ xa̱bu̱. Xú káʼnii gándoo gúʼni rá. Guʼgíʼmíjna̱ dí muniʼníiʼ itháán májánʼ Jeobá ga̱jma̱a̱ guʼyaridáá xkri̱da ndrígóo (Efes. 5:1, 2). Índo̱ guraxnuu náa Biblia xú káʼnii Jeobá naʼni mba̱a̱ a̱jkiu̱u̱n, gurajximíjnalú: “Lá na̱ni̱ mba̱a̱ a̱jkiu̱nʼ ikhúún kañun eʼwíinʼ ráʼ.” O índo̱ nuraxnuu xú káʼnii Jeobá nagawíinʼ a̱jkiu̱u̱n kaʼñún bi̱ kúwá gíná, gurajximíjnalú: “Lá naxmiéjunʼ kañun mangúún a̱ngiu̱lú bi̱ nda̱ñúunʼ ráʼ.” Guʼgíʼmíjna dí muriʼkhu̱u̱ xóo e̱ndxa̱ʼwa̱míjna̱ ma̱ngaa dí muʼgíʼ manindxu̱lú imba̱a̱ nuxi̱i̱ʼ xa̱bu̱ ga̱jma̱a̱ gaʼngo̱o̱ a̱jkiu̱lú kuʼñúún eʼwíinʼ.

12. Xú káʼnii esngájmulú xkri̱doo Stephen dí Biblia gíʼdoo tsiakii mu mariʼkuíín xa̱bu̱ rá.

¹² Stephen bi̱ niʼthá ga̱jma̱a̱ numuu náa kutriga̱ 8 mañu mañúú niriʼkumina̱a̱ʼ xóo xa̱bu̱ nindxu̱u̱, ikhaa naʼthí: “Asndu nákha má nijngúnʼ iyááʼ, nguáná naʼñunʼ gakhi̱i̱ mariʼkumina̱a̱ʼ xóo nindxu̱ʼ. Ikhaa jngóo dí tséʼgúnʼ náa nagiʼdu̱u̱n xa̱bu̱ o nani dí xágiʼdu̱u̱n itháan. Mbaʼiin nuthu̱nʼ dí nandún kuyoʼ, asndu a̱ʼgiu̱ʼ ma̱ngaa nadxuu numuu dí xúʼko̱ eni̱. Asndu mangúún tséʼkha̱ manimbo̱ʼ dí xígi̱ kaʼniún xúgi̱. Raʼkháa ikhúún eni̱ mu mariʼkumina̱a̱ʼ xóo nindxu̱ʼ. Biblia nindxu̱u̱ dí nimbáyuʼ, ikhaa gíʼdoo tsiaki̱i̱ mu mariʼkuíín xa̱bu̱”.

13. Ndiéjuunʼ gámbáyulú mu muʼni dí míjiánʼ rá. (Gálatas 5:16.)

¹³ (Atraxnuu Gálatas 5:16). Jeobá tsemídúu ga̱jma̱a̱ naxnúlú espíritu santo ndrígóo mu maʼngulú muʼni gajmiúlú dí xkawiʼ dí nagua̱ʼa̱ muʼni. Índo̱ nuʼnigajma̱a̱ Ajngá rawuunʼ nuniʼñáánʼ dí espíritu santo ndrígóo marigá náa ikháanʼlú. Ma̱ngaa nundriʼgú espíritu santo índo̱ najkua náa reunión, ikhí nduʼñún a̱ngiu̱lú, xó má ikháanʼ, ikhiin mangiin nunimijna̱ muni dí míjiánʼ, rúʼko̱ naʼni dí muʼda̱a̱lú tsiakii (Heb. 10:24, 25; 13:7). Índo̱ nuʼtákáñíí ga̱jma̱a̱ xúgííʼ a̱jkiu̱lú Jeobá mu mambáyulú maʼngulú muʼni ga̱jma̱a̱ mbóoʼ dí naʼni makáguabáánʼ, ikhaa naxnúlú espíritu santo ndrígóo mu xúʼko̱ xákaguabáanʼ ga̱jma̱a̱ maʼngulú muʼni gajmiúlú tsáʼkhá rúʼko̱. Gajkhun má, maski má nuʼni xúgííʼ rígi̱ xándátiga̱a̱ʼ mbújku̱ún dí xkawiʼ dí nagua̱ʼa̱ muʼnilú. Mú ikhaa maxnúlú tsiakii mu xúʼko̱ xájnguatíguáanʼlú náa dí xkawiʼ dí nagua̱ʼa̱ muʼni. Xó má naʼthúlú náa Gálatas 5:16, bi̱ nu̱ni̱ xó má nandoo espíritu santo “xúni̱ nimbá rí nandoo xuwiʼ”.

14. Ndíjkha dí gíʼdoo wéñuuʼ numuu dí muʼni má xúʼko̱ dí míjiánʼ rá.

¹⁴ Á mu dí xúgííʼ mbiʼi kuwaanʼ ru̱ʼni̱ má xúʼko̱ ñajuunʼ Dios, gíʼdoo wéñuuʼ numuu dí xúniʼñáánʼ ru̱ʼni̱. Ma̱ngaa gíʼmaa manigulú muʼni dí míjiánʼ, náá numuu rá. Numuu dí mbóoʼ dí sia̱nʼ gajmiúlú nindxu̱u̱ dí nagua̱ʼa̱ muʼni, ikhaa rígá má xúʼko̱ náa ikháanʼlú. Maski ajndu  nda̱wa̱á má dí nijngúlú iyááʼ, mbáa nanigulú xóó dí nduʼyáá, dí ragíʼmaa muʼnilú, xóo dí muʼtsíinlú ga̱jma̱a̱ mbújkha̱a̱, dí muʼwa̱a̱n wéñuuʼ iyáʼ najnga̱a̱ o dí mbuʼyáálú pornografía (Efes. 5:3, 4). Mbáa dxámá bi̱ nindxu̱u̱ testigo de Jeobá naʼthí: “Mbóoʼ dí ndayóoʼ maniga̱jmu̱ʼ nindxu̱u̱ dí naniguʼ kañun kaníkíín jiámá gajmíʼ. Nikumuʼ dí káaʼ mbáxnga̱á nindxu̱u̱ rúʼko̱, mú tséʼngo̱ʼ gáríyáaʼ xúgííʼ xóo ku̱mu̱ʼ”. Ndiéjuunʼ gámbáyulú á mu nagua̱ʼa̱ muʼni má xúʼko̱ dí xkawiʼ rá.

15. Ndíjkha dí nuʼda̱a̱lú tsiakii índo̱ nduʼyáá dí raʼkháa i̱ndó ikháanʼ nagua̱ʼa̱ muʼni dí xkawiʼ rá. (Atayáá xtiʼkhuu.)

¹⁵ Á mu dí nakumulú dí nánguá eʼngulú itháan e’ni mbóoʼ dí nagua̱ʼa̱ mu’ni rá. Náa Biblia naʼthí: “Nimbá tsáʼkhá rí na̱ʼkha̱nú náa inala xánindxu̱u̱ mixtiʼkhu ki xóo rí nuraʼníí xúgíinʼ xa̱bu̱” (1 Cor. 10:13a). Versículo rígi̱ najuiʼtájuíi xígi̱ kaʼnii náa i̱mba̱ Biblia: “Ikháanʼla nuraʼníí ikha̱á má tsáʼkhá xó má nuraʼníí eʼwíinʼ”. Ajngáa rígi̱ nijuiʼthúún cristianos bi̱ nikúwíin náa Corinto, numuu dí nikúwíin tikhuun bi̱ nibúúnʼ gajmiún bi̱ raʼkháa guʼñún o ajmbiu̱ún, xa̱bekha o gu̱ʼu̱ bi̱ a̱jma̱ ñajúúnʼ ga̱jma̱a̱ bi̱ niʼwa̱a̱n wéñuuʼ iyáʼ najnga̱a̱ (1 Cor. 6:9-11). Nda̱wa̱á dí ikhiin nijngún iyááʼ, lá táʼyóoʼ muni gajmiún mbóoʼ dí nagua̱ʼa̱ muni dí xkawiʼ xáʼ. Gajkhun má dí xúgíinʼ ikhiin ninindxu̱ún bi̱ nixtaʼwíin magúun mekhuíí, mú kaʼníí xóó ninindxu̱ún xa̱bu̱ aʼkhá. Ikhaa jngóo ndiyóoʼ muni gajmiún mbóoʼ dí nagua̱ʼa̱ muni̱ dí xkawiʼ. Rígi̱ naʼni dí muʼda̱a̱lú tsiaki̱i̱ numuu dí nikúwíin eʼwíinʼ ma̱ngaa bi̱ niraʼníí xó má dí kuwaanʼ ruraʼníí ikháanʼlú, mú ikhiin niʼngu̱u̱n. Ikhaa jngóo ndayóoʼ dí muʼni ‹gújkhúʼ má xúʼko̱ fe ndrígulú, numuu rí nduʼyáá má dí xúgíinʼ a̱ngiu̱lú kúwá rumíniinʼ ikha̱á xó má ikháanʼlu› (1 Ped. 5:9).

16. Xú káʼnii tsáʼkhá náa dí xáʼyóoʼ majnguatíguáánʼ ga̱jma̱a̱ náá numuu rá.

¹⁶ Xúndxaʼwamíjna dí nimbáa tsékro̱ʼo̱o̱ dí naʼni makáwabáanʼlú, numuu dí rúʼko̱ nindxu̱u̱  mbóoʼ tsáʼkhá, xóo dí mundxa̱ʼwa̱míjna̱ dí nándáa dí gándoo muʼni ga̱jma̱a̱ dí xáʼngulú gúʼni gajmiúlú mbóoʼ dí nagua̱ʼa̱ muʼni. Mú náa Biblia naʼthúlú ajngáa rígi̱: “Dios nindxu̱u̱ jmbii ga̱jma̱a̱ ikhaa xániñuuʼ ma̱ʼkha̱ tsáʼkhá rí xáʼngala gúraʼníí, índo̱ gáʼkha̱nú tsáʼkhá, ikhaa má gámbáyala mu maʼngala muraʼníí” (1 Cor. 10:13b). Maski ajndu ra̱ʼkhá tháán gakhii nindxu̱u̱ dí nagua̱ʼa̱ muʼni, mú ma̱ndoo maguajúnlú jmbu náa Jeobá. Ikhaa má gámbáyulú mu xájnguatíguáánʼ muʼni mbóoʼ dí nagua̱ʼa̱ maʼni xuyulú.

17. Ndiéjuunʼ dí ma̱ndoo muʼni maski ajndu nagua̱ʼa̱ muʼni dí raʼkhí rá.

¹⁷ Naʼñulú mingíjyúuʼ muniʼñááʼ dí nagua̱ʼa̱ muʼni dí xkawiʼ numuu dí nindxu̱lú xa̱bu̱ aʼkhá. Índo̱ nagua̱ʼa̱ muʼnilú dí raʼkhí guʼni gaʼdu̱u̱n mbajkhu̱ú xó má niʼni José. Ikhaa nigájnuu ragáyúu náa a̱ʼgiu̱u̱ Potifar (Gén. 39:12). Xátani̱ dí nagua̱ʼa̱ maʼni xuyaaʼ.

18, 19. Xú káʼnii graxe̱ gámbáyulú mu muʼni̱i̱ nuxi̱ʼ ku̱ma̱ ndrígulú rá.

¹⁸ Á mu muʼni̱i̱ nuxi̱ʼ ku̱ma̱ ndrígulú ndayóoʼ dí muʼni tsiakimíjna̱lú mu dí gúndxaʼwáá edxu̱lú ga̱jma̱a̱ dí gúʼni, manigu̱u̱ʼ Jeobá. Ikhaa jngóo gíʼmaa dí tsejtsíí mbuʼyáá ndiéjuunʼ dí nuʼni ga̱jma̱a̱ murajximíjnalú: “Ga̱jma̱a̱ dí xóo eni̱, lá nasngájma dí nda̱yo̱o̱ dí kuwáánʼ náa iwáá mbiʼi ráʼ. Lá nariʼkuminaaʼ má xúʼko̱ xóo xa̱bu̱ nindxu̱ʼ ráʼ. Lá naniʼñúuʼ dí espíritu santo ndrígóo Jeobá maxnúʼ ikha, mu xáni dí nagua̱ʼa̱ maʼni xuyuʼ ráʼ.”

¹⁹ Índo̱ gúʼyáá xóo nindxu̱lú, guʼyáá ndiéjuunʼ dí niʼngo̱o̱ má ni̱ʼni̱. Mú xúguaʼthíin má dí xúgííʼ magajnúu májánʼ. Á mu nduʼyáá dí rígá mbóoʼ rí ndayóoʼ muriʼkhui̱i̱ʼ, xákáguabáanʼlú. Itháán májánʼ muʼni dí naʼthí náa Filipenses 3:16: “Tséʼniuu má nguáthá ndijáanʼlú, gajngruigulú xó má gíʼmaa náa kamba̱a̱ rúʼko̱”. Á mu nuʼnimíjna̱ muʼni nuxi̱ʼ ku̱ma̱ ndrígulú, Jeobá maʼni tsajkurámuuʼ tsiakii dí gúʼni̱.