1, 2. Ndíjkha dí tsetígulú wáa Conmemoración rá.

 NINÚJNGOO má itháán dí 2 mil tsiguʼ dí Jesús nixnájximinaʼ makhañúu ga̱jma̱á numulú. Núma̱a̱ má ikhaa, ma̱ndoo makuwáánʼ kámuu mbiʼi. Nákha mbruʼun dí inuu makhañúu, ikhaa nixnúún pan ga̱jma̱a̱ vino discípulos ndrígóo ga̱jma̱a̱ niʼthún dí mbaʼyóoʼ muniku̱ma̱a̱ má xúʼko̱ ngajua dí nisngájma índo̱ nixnájximinaʼ makhañúu ga̱jma̱a̱ numulú (1 Cor. 11:23-26).

² Ikháanʼ bi̱ nindxu̱lú cristianos nuʼnimbulú dí Jesús niʼtáñajunlú numuu dí nandulú kuʼyáá (Juan 14:15). Índo̱ naʼni Conmemoración nduʼyáá dí gíʼdoo wéñuuʼ numuu dí ikhaa niʼni ga̱jma̱a̱ numulú. Mbá xkri̱da, nuriʼyáʼ mbiʼi mu muʼtájkáan ga̱jma̱a̱ mundxaʼwamíjna̱ ndiéjuunʼ phú eyoo gáʼthúu̱n dí ikhaa nixnájximinaʼ makhañúu. Ma̱ngaa ra̱ʼkhá tháán nanigulú muriʼyáʼ mbiʼi mu muʼgua guʼthúún eʼwíinʼ xa̱bu̱ mu magún náa mbiʼi kiejuunʼ rúʼko̱. Ga̱jma̱a̱ ikháánʼlú nuʼni xó má eʼngo̱o̱ mu xúʼko̱ makuwa̱a̱nʼ náa Conmemoración.

3. Ndiéjuunʼ guʼyáá náa artículo rígi̱ rá.

³ Ikháanʼlú bi̱ nindxu̱lú xa̱bi̱i̱ Jeobá nuʼni xó má eʼngo̱o̱ mu muʼni ku̱ma̱a̱ dí xóo nikháñuu Cristo. Náa artículo rígi̱ mbuʼyáá ajtsú enii dí xú káʼnii eʼni̱lú: 1) Nuʼni ku̱ma̱a̱ dí xóo nikháñuu Jesús xó má ikhaa niʼthí. 2) Nuʼthúún eʼwíinʼ xa̱bu̱ mu magún. 3) Nuʼni ku̱ma̱a̱ xóo nikháñuu maski ajndu nuraʼníí xkujndu.

4. a) Ndiéjuunʼ dí nuni̱ marmáʼáan a̱jkiu̱lú xúgííʼ tsiguʼ índo̱ narígá Conmemoración rá. (Lucas 22:19, 20.) b) Ndíjkha dí gíʼdoo numuu makru̱ʼu̱lú rígi̱ rá.

⁴ Xúgííʼ tsiguʼ índo̱ na̱jkua̱ náa Conmemoración nuʼdxawíín mbá discurso náa najuaxtiʼña̱a̱ tikhuu graxe̱ ga̱jma̱a̱ Biblia.  Mbá xkri̱da, ikhí najuaxtiʼña̱a̱ graxe̱ rígi̱, náá numuu dí ndayóoʼ majuiʼtsiwáanʼ, xú káʼnii gándoo dí ga̱jma̱a̱ numuu rí nikháñuu mbawíí xa̱bu̱ niʼni rí majngudi̱i̱ aʼkhúún mbaʼin xa̱bu̱ rá. Ma̱ngaa nuni̱ marmáʼáan a̱jkiu̱lú tsíín ñajúúnʼ bi̱ naʼphu̱ pan ga̱jma̱a̱ bi̱ naʼwa̱a̱n vino ma̱ngaa ndiéjuunʼ eyoo gáʼthúu̱n rúʼko̱ (atraxnuu Lucas 22:19, 20). Náa discurso rúʼko̱ naʼni dí mundxaʼwamíjna̱ xúgííʼ dí gakhánún bi̱ makuwá náa tsu̱du̱u̱ Ku̱ba̱ʼ (Is. 35:5, 6; 65:17, 21-23). Dí mbuʼyáá xúgííʼ rígi̱, naʼni mbuʼyáá dí gíʼdoo wéñuuʼ numuu, xúniʼñáánʼ manújngoo xúʼkhiín. Kúwá mbaʼin xa̱bu̱ bi̱ na̱nguá ekru̱ʼu̱u̱n ga̱jma̱a̱ na̱nguá eyáá dí gíʼdoo numuu dí Jesús nikháñúu ga̱jma̱a̱ numulú. Ga̱jma̱a̱ na̱nguá eni̱ ku̱ma̱a̱ xóo nikháñuu Jesús xó má ikhaa niʼthí dí maguma. Náá numuu dí xúʼko̱ eni̱ xá.

5. Xú káʼnii nini ku̱ma̱a̱ xa̱bu̱ dí xóo nikháñuu Jesús nda̱wa̱á dí nikháñún apóstoles rá.

⁵ Índo̱ apóstoles ndrígóo Jesús nijkha rakháñun, ikhú cristianos bi̱ ragájkhun nigíʼdu̱u̱ nitu̱ʼu̱u̱n náa congregación (Mat. 13:24-27, 37-39). Ikhiin nithi “ajngáa dí ragájkhun mu muninduwiinʼ xa̱bi̱i̱ Jesús, ga̱jma̱a̱ magún kidxu̱únʼ ikhiin” (Hech. 20:29, 30). Mbóo’ nduwaʼ dí ikhiin nisngáa o nithi nindxu̱u̱ dí Jesús taxnájximinaʼ makhañúu “káaʼ mbóó miʼtsú mu magu̱ aʼkhá ndrígu̱ún mbaʼin xa̱bu̱”. Mú kiʼsngáa rúʼko̱ tséʼkha̱ náa Biblia, ikhiin nuthi dí xóo nixnájximinaʼ makháñúu Jesús ndayóoʼ maguma má xúʼko̱ (Heb. 9:27, 28). Dí mbiʼi xúgo̱ mbaʼin xa̱bu̱ bi̱ niniʼnuuʼ dí gajkhun nduyáá dí nduwaʼ nindxu̱u̱ kiʼsngáa rúʼko̱. Mbaʼin xa̱bu̱ nagún misa b náa guʼwá dxájkuun xúgííʼ xmáná ga̱jma̱a̱ mbiʼi. Ma̱ngaa rígá tikhuu religión náa dí tseni ku̱ma̱a̱ nángi eʼni dí xóo nikháñúu Jesús, mú mbaʼin dí ikhiin tséyáá ndiéjuunʼ phú eyoo gáʼthúu̱n. Mbáa tikhuun nurajximi̱jna̱, lá gajkhun dí ma̱ndoo majngudi̱i̱ aʼkhúnʼ numuu dí Jesús nixnájximinaʼ makhañúu ráʼ. Mbaʼin nurajximíjna̱ xúʼko̱ kaʼnii numuu dí nithúún dí nda̱a̱ dí ejmaa dí Jesús nixnájximina̱ʼ makhañúu. Mú ndiéjuunʼ ekumu̱ún bi̱ gajkhun nindxu̱ún xa̱bi̱i̱ Cristo rá. Nda̱wa̱á dí nikháñún mbaʼin apóstoles, xú káʼnii nigíʼdi̱i̱ nini ku̱ma̱a̱ xóo nikháñúu Jesús xá.

6. Ndiéjuunʼ dí niguánú nikru̱ʼu̱u̱n mbá nguéjmi̱i̱n bi̱ ninigajma̱a̱ Biblia nákha 1872 rá.

⁶ Nákha tsiguʼ 1870 mbá nguéjmi̱i̱n xa̱bu̱ bi̱ nuniga̱jma̱a̱ Biblia gajmiún Charles Russell, nigíʼdi̱i̱ ndi̱ya̱ʼ mu mbuyáá itháan ndiéjuunʼ phú eʼthí náa Biblia. Ikhiin nindúún makru̱ʼu̱u̱n ndiéjuunʼ phú eyoo gáʼthúu̱n dí nikháñuu Jesús ga̱jma̱a̱ nindúún makru̱ʼu̱u̱n xú káʼnii phú gíʼmaa maguma ku̱ma̱a̱ dí xóo nikháñuu Jesús. Nákha tsiguʼ 1872 Biblia nimbáñún makru̱ʼu̱u̱n dí índo̱ nikháñúu Jesús niʼngo̱o̱ niʼni numa̱a̱ aʼkhá ndrígu̱ún xúgíinʼ xa̱bu̱. Ikhiin túrkaʼwumáʼán índo̱ ndiyáá rígi̱. Nigíʼdi̱i̱ niniraʼmáʼ náa libros, periódicos ga̱jma̱a̱ náa i̱ʼwáʼ i̱yi̱ʼ. Nda̱wa̱á nigíʼdi̱i̱ nini ku̱ma̱a̱ dí xóo nikháñuu Cristo káaʼ mbóó miʼtsú dí mbá tsiguʼ, xó má nini̱ cristianos bi̱ nikúwá nákha timbá siglo.

7. Xú káʼnii embáyulú ikháanʼ dí mbiʼi xúgi̱ ga̱jma̱a̱ numuu xúgííʼ dí ndi̱ya̱ʼ makru̱ʼu̱u̱n itháan cristianos bi̱ nikúwá nákha ginii rá.

⁷ Xú káʼnii embáyulú ikháanʼ dí mbiʼi xúgi̱ ga̱jma̱a̱ numuu xúgííʼ dí ndi̱ya̱ʼ makru̱ʼu̱u̱n itháan cristianos bi̱ nikúwá nákha ginii rá. Jeobá niʼni tsajkurámuuʼ tsiaki̱i̱ dí nini̱. Ga̱jma̱a̱ numuu rúʼko̱ naʼni dí ikháanʼ makru̱ʼu̱lú ndiéjuunʼ phú eyoo gáʼthúu̱n dí Jesús nixnájximinaʼ mu makhañúu ma̱ngaa ndiéjuunʼ gáʼngo̱o̱ gárígá ga̱jma̱a̱ numuu rúʼko̱ (1 Juan 2:1, 2). Ma̱ngaa nijmañulú dí náa Biblia naʼthí dí rígá a̱jma̱ dí kuaʼti̱i̱n xa̱bu̱ bi̱ nunimbu̱ún kuyáá  Dios. Tikhuun bi̱ xákháñún magúun mekhuíí, eʼwíinʼ xa̱bu̱ bi̱ mbaʼin wéñuuʼ maguanún náa tsu̱du̱u̱ Ku̱ba̱ʼ gi̱i̱ mu makuwá kámuu mbiʼi. Índo̱ nundxa̱ʼwa̱míjna̱ dí ra̱ʼkhá tháán eyoo kaʼyulú Jeobá naʼni dí makuwaanʼ mijngii náa ikhaa ga̱jma̱a̱ dí mambáa dí ikháanʼ nambáyúu dí Jesús nixnájximinaʼ (1 Ped. 3:18; 1 Juan 4:9). Ikhaa má kayuuʼ xó má nini̱ a̱ngiu̱lú bi̱ nikúwá nákha ginii, ikháanʼ ma̱ngaa nuʼthúún eʼwíinʼ xa̱bu̱ mu magún índo̱ nuʼni ku̱ma̱a̱ dí xóo nikháñuu Jesús, xó má niʼthá ñajunʼ maguma ikhaa.

8. Ndiéjuunʼ eni̱ xa̱bi̱i̱ Jeobá mu muthún maguwáʼ eʼwíinʼ xa̱bu̱ náa Conmemoración rá. (Atayáá xtiʼkhuu.)

⁸ Mbayuuʼ tsiguʼ xa̱bi̱i̱ Jeobá nuthúún xa̱bu̱ magún ga̱jma̱á nindxu̱lú mu muʼniriya̱a̱ʼ xóo nikháñuu Jesús. Tsiguʼ 1881 revista rígi̱ nijmún a̱ngiu̱lú mu muthún dí magimbíin náa xuajen Allegheny (Pensilvania) a̱ngiu̱lú bi̱ kúwá náa Estados Unidos mu muniriyaaʼ xóo nikháñuu Jesús. Nda̱wa̱á nini Conmemoración náa mambá congregación. Nákha marzo tsiguʼ 1940 nijuiʼthúún publicadores di ma̱ndoo muthún eʼwíinʼ xa̱bu̱ bi̱ nanigu̱u̱nʼ mudxawíín mu magún mangiin. Índo̱ niʼni tsiguʼ 1960 timbá miʼtsú dí Betel nikuʼma invitación náa congregación mu muxnún xa̱bu̱. Asndu nákha má tsiguʼ rúʼko̱ xa̱bi̱i̱ Jeobá nigíʼdi̱i̱ nixnaraʼa mbaʼa wéñuuʼ invitación. Náá numuu dí nuʼni tsiakimijna muʼni ñajunʼ rígi̱ rá.

9, 10. Tsiéjúúnʼ ma̱ngaa eʼthúún maguwáʼ náa Conmemoración ga̱jma̱a̱ xú káʼnii embáñún rígi̱ xá. (Juan 3:16.)

⁹ Mbá numuu dí nuʼthúún maguwáʼ xa̱bu̱ náa Conmemoración nindxu̱u̱ dí ikhiin mbuyáá ndiéjuunʼ dí niʼni Jeobá ga̱jma̱a̱ Jesús ga̱jma̱á numún xa̱bu̱ numbaaʼ (atraxnuu Juan  3:16). Nandulú dí guyáá ga̱jma̱a̱ dí gudxawíín náa timbá miʼtsú dí gáguwáʼ rúʼko̱ maxkajxi̱i̱n muniʼniiʼ itháán míjiánʼ Jeobá ga̱jma̱a̱ mani̱ndxu̱ún xa̱bi̱i̱. Mú raʼkháa i̱ndó ikhiin embáñún índo̱ nuʼni mbá tsiaki̱i̱ muʼthúún eʼwíinʼ maguwáʼ mbiʼi rúʼko̱.

¹⁰ Ma̱ngaa nuʼthúún maguwáʼ náa Conmemoración bi̱ niniña̱a̱nʼ runi ñajuunʼ Jeobá. Nuʼni rígi̱ numuu dí nandulú dí ikhiin marmáʼáan a̱jkiu̱ún dí Jeobá nandoo kaʼñún má xúʼko̱. Nadxulú índo̱ nduʼñún. Mbruʼun rúʼko̱ naʼni narmáʼáan a̱jkiu̱ún dí nikúwá gagi índo̱ nini̱ ñajuunʼ Jeobá. Guʼthá mbá chíʼgíiʼ ga̱jma̱a̱ numuu Mónica. c Índo̱ nirígá nandii COVID-19 ikhaa nigíʼdu̱u̱ niʼtáráʼa mbu̱júu̱ʼ. Nda̱wa̱á dí nijkha náa Conmemoración tsiguʼ 2021 ikhaa niʼthí: “Conmemoración rígi̱ ninindxu̱u̱ kiejuunʼ, niʼni má 20 tsiguʼ xúgi̱ dí niniʼñúuʼ ra̱thu̱u̱n xa̱bu̱, mú rígi̱ nindxu̱u̱ timbá miʼtsú dí ikhúún natarúʼúún ga̱jma̱a̱ na̱thu̱u̱n maguwáʼ xa̱bu̱ náa Conmemoración. Ni̱ni̱ ga̱jma̱a̱ xúgííʼ a̱jkiu̱nʼ numuu dí nda̱a̱ ajngáa mu maxna̱a̱ núma̱aʼ Jeobá ga̱jma̱a̱ Jesús dí niʼni ga̱jma̱á numuʼ” (Sal. 103:1-4). Tséʼñuu á mu xa̱bu̱ nandún maguwáʼ náa Conmemoración o na̱nguá, mú ikháánʼlú nuʼni asndu xó má eʼngo̱o̱ numuu dí nduʼyáá dí Jeobá ndaʼyamajkuu xúgííʼ tsiaki̱i̱ dí nuʼnilú.

11. Xú káʼnii eʼni tsajkurámuuʼ Jeobá tsiaki̱i̱ dí nuʼnilú mu muʼthúún xa̱bu̱ maguwáʼ náa Conmemoración rá. (Ageo 2:7.)

¹¹ Jeobá naʼni tsajkurámuuʼ xúgííʼ tsiaki̱i̱ dí nuʼnilú mu muʼthúún xa̱bu̱ maguwáʼ náa Conmemoración. Mbá xkri̱da, nákha tsiguʼ 2021 maski ajndu nirígá nandii COVID-19 dí tániñu magajnulú guʼtáraʼa, mú nikúwíin mbaʼin wéñuuʼ náa Conmemoración, itháán dí 21 millón 367 mil 603 xa̱bu̱. Ninindxu̱ún itháan mbaʼin ki xóo xúgíinʼ testigos de Jeobá bi̱ kúwá náa xúgííʼ tsu̱du̱u̱ ku̱ba̱ʼ. Gajkhun má dí Jeobá na̱nguá má eʼyoo dí gíʼdoo wéñuuʼ numuu nguáthiin xa̱bu̱ niguwáʼ, mú dí itháán gíʼdoo numuu eʼyoo ikhaa xú káʼnii nindxu̱u̱ a̱jkiu̱ún xa̱bu̱ (Luc. 15:7; 1 Tim. 2:3, 4). Nduʼyáá gajkhun dí Jeobá najmuu campaña ndrígóo Conmemoración mu mambáyulú muxkamiin xa̱bu̱ bi̱ májánʼ a̱jkiu̱ún (atraxnuu Ageo 2:7). d

12. Ndiéjuunʼ gaʼkhu o gamiéjunʼ gáʼni dí xándoo muguaʼdáá Conmemoración rá. (Atayáá xti’khuu.)

¹² Jesús niʼthí dí náa iwáá mbiʼi mbaʼyóoʼ muraʼníí mbaʼa gaʼkhu o gamiéjunʼ, xóo dí xáʼndúún gúyulú bi̱ kúwíin náa guʼwúlú, majuixkulú, marígá guerra, nandii ga̱jma̱a̱ i̱ʼwáʼ (Mat. 10:36; Mar. 13:9; Luc. 21:10, 11). Asndu ndiéjúúnʼ má gamiéjunʼ rígi̱ maʼni dí xándoo guguaʼdáálú Conmemoración. Mú ndiéjuunʼ eni̱ a̱ngiu̱lú índo̱ nuraʼníí gamiéjunʼ xóo xígi̱ ga̱jma̱a̱ xú káʼnii embáñún Jeobá xá.

13. Xú káʼnii niʼni tsajkurámaaʼ Jeobá ndxájulú Artiom numuu dí támíñúu maʼniriya̱a̱ʼ Conmemoración náa guʼwá ejua̱a̱nʼ rá.

¹³ Guʼwá ejua̱a̱nʼ. A̱ngiu̱lú bi̱ kajchún náa guʼwá ejua̱a̱nʼ nuni̱ mbá tsiaki̱i̱ mu muniriya̱a̱ʼ Conmemoración. Guʼyáá xkri̱doo Artiom. Índo̱ nirígá Conmemoración tsiguʼ 2020 ikhaa kraʼaa náa guʼwá ejua̱a̱nʼ náa mbá cuarto chíʼgíiʼ náa nuxudiinʼ asndu witsiin xa̱bu̱. Maski ajndu xúʼko̱, mú ikhaa niʼngo̱o̱ nixkamaa dí ma̱ndoo majmuu mu maʼniriya̱a̱ʼ Conmemoración ga̱jma̱a̱ niríyaʼ awan xóo maxnájxi̱ discurso mu maʼdxawu̱u̱n má ikhaa. Mú bi̱ kraʼaa gajmíi̱n náa guʼwá ejua̱a̱nʼ nutsikha ndíí ga̱jma̱a̱ nuthi ajngáa rí xkawiʼ xúgííʼ mbiʼi. Ndiéjuunʼ niʼni Artiom rá. Ikhaa nirajxu̱u̱n  á mu dí ma̱ndoo maʼni wíñúún mbáxnga̱a̱, xóo káaʼ mbá hora wáa ga̱jma̱a̱ dí xútsikha ndíí. Niʼñuu tsiánguá índo̱ nitháán dí ma̱ndoo má. Ikhaa naʼthí: “Nirajxu̱u̱n á mu dí ma̱ndoo mathu̱u̱n náá numuu dí nuni̱riya̱a̱ʼxu Conmemoración”. Maski ajndu nitháán dí na̱nguá exmiéjúúnʼ mbuyáá ga̱jma̱a̱ numuu rúʼko̱, mú índo̱ ndiyáá dí xtáa raʼni, nitháán dí maʼthúún itháán ga̱jma̱a̱ numuu Conmemoración.

14. Ndiéjuunʼ niʼni xuajñuu Jeobá mu maʼniriya̱a̱ʼ Conmemoración maski ajndu nirígá nandii COVID-19 rá.

¹⁴ Nandii COVID-19. Ga̱jma̱a̱ numuu nandii rígi̱ mbaʼin a̱ngiu̱lú na̱nguá nindoo makuwá Conmemoración náa guʼwá nagimbáanʼ. Maski ajndu xúʼko̱, mú nimbá tárikhún dí muniriyaaʼ Conmemoración. e Bi̱ guáʼdáá Internet nindoo ndiyáá ga̱jma̱a̱ videollamada. Ndiéjuunʼ nini̱ a̱ngiu̱lú bi̱ na̱nguá guaʼdáá Internet rá. Náa tikhuu xuajin nijuixná discurso náa tele ga̱jma̱a̱ náa radio. Ma̱ngaa sucursal niʼñuu grabar discurso náa itháán dí 500 ajngáa mu ma̱ndoo mudxawíín bi̱ kúwíin náa kúbá, mu xúʼko̱ ma̱ndoo muniriyaaʼ Conmemoración. Ma̱ngaa nikúwíin tikhuun a̱ngiu̱lú  bi̱ nigún kudúún grabación rúʼko̱ asndu náa guʼwún eʼwíinʼ a̱ngiu̱lú.

15. Ndiéjuunʼ ejmañulú ga̱jma̱a̱ numuu Sue rá.

¹⁵ Índo̱ tsíñún gúyulú bi̱ kúwíin náa guʼwúlú. Xkujndu dí itháán gakhi̱i̱ dí naraʼnuu mbáa índo̱ nagumariya̱a̱ʼ Conmemoración nindxu̱u̱ índo̱ tsíñún guyáá bi̱ kúwíin náa goʼwóo. Rúʼko̱ ndiyóoʼ maraʼnuu mbáa bi̱ naʼniga̱jma̱a̱ Biblia bi̱ mbiʼyuu Sue. Nákhi tsiguʼ 2021, mbiʼi wapháá nákha xóó tserígá Conmemoración Sue niʼthúu̱n ndxájulú bi̱ naʼsngóo dí xándoo maʼniriya̱a̱ʼ Conmemoración numuu dí tsíñún guyáá bi̱ kúwíin náa goʼwóo. Ikhú ndxájulú bi̱ naʼsngóo niguxnuu Lucas 22:44, ga̱jma̱a̱ niʼthúu̱n dí índo̱ naguaʼdáá xkujndu, dí itháán májánʼ dí ma̱ndoo muʼni nindxu̱u̱ dí mbuʼyaridáá Jesús ga̱jma̱a̱ muʼtákáñii Jeobá numuu dí ikhaa gajkhun mambáyulú. I̱mba̱ néjtsuu, Sue niʼni mújúunʼ pan ga̱jma̱a̱ vino, ma̱ngaa ndiʼyoo náa jw.org discurso dí nigumaa grabar dí na̱ʼkha̱ náa reunión kiejuunʼ ndrígóo texto dí nagixnuu mambá miʼcha̱. Índo̱ niʼni wakíʼ ikhú nita̱ʼa̱a̱ náa kuártiúu ga̱jma̱a̱ niʼdxawuun Conmemoración náa celular ndrígóo. Nda̱wa̱á niʼnirámáʼ ajngáa rígi̱ náa ndxájulú bi̱ naʼsngóo: “Ri̱xi̱ ra̱ʼkhá tháán niraxnúʼ tsiaki̱i̱. Ni̱ni̱ xó má eʼngo̱o̱ mu maxtáá náa Conmemoración ga̱jma̱a̱ Jeobá má nimbáyúʼ. Naxna̱a̱ wéñuuʼ númaaʼ numuu dí ra̱ʼkhá tháán nixtáá gagi”. Lá ma̱ndoo mambáyáaʼ Jeobá mangáán á mu xtaa ratraʼníí xkujndu xóo rígi̱ ráʼ.

16. Náá numuu nduʼyáá gajkhun dí Jeobá maʼni tsajkurámáánʼ á mu nuʼni xó má eʼngo̱o̱ mu makuwáánʼ náa Conmemoración rá. (Romanos 8:31, 32.)

¹⁶ Jeobá ndaʼyamajkuu wéñuuʼ tsiaki̱i̱ rí nuʼni mu muʼni riya̱a̱ʼ xóo nikháñuu A̱ʼdióo. Nduʼyáá gajkhun dí ikhaa maʼni tsajkurámáánʼ á mu nduʼyamajkuíí dí ikhaa niʼni ga̱jma̱a̱ numulú (atraxnuu Romanos 8:31, 32). Guʼni mbá tsiaki̱i̱ mu makuwáánʼ náa Conmemoración tsiguʼ rígi̱ ga̱jma̱a̱ guʼni xó má eʼngo̱o̱ mu muʼthúún xa̱bu̱ maguwáʼ náa Conmemoración