1, 2. a) Ndiéjuunʼ gáxkajxi̱i̱n matani̱ dí matatsaʼwamínáʼ xóo nixtáa ga̱jma̱a̱ índo̱ niʼtáráʼa Jesús rá. b) Ndiéjuunʼ guʼyáá náa artículo rígi̱ rá.

 RA̱ʼKHÁ tháán nakuwáanʼlu ngíná índo̱ nakháñúu mbáa bi̱ nandulú kuʼyáá. Mbáa índo̱ xíjkhoo nikháñúu nagawúnlú wéñuuʼ, itháán á mu ndiʼyáá dí xa̱bu̱ buʼko̱ ra̱ʼkhá tháán nimínuuʼ índo̱ nikháñúu. Mú índo̱ ga̱ʼga̱ ranújngoo mbiʼi marmáʼáan a̱jkiu̱lú tikhu dí mambáyulú mu makuwáanʼ gagi mbu̱júu̱ʼ. Mbóoʼ xkri̱da, ma̱ndoo mani̱ndxu̱u̱ mbá dí ikhaa niʼsngúlú o niʼni dí mbuʼyáalú tsiaki̱i̱ o mbá dí niʼni mundu̱ʼwa̱lú.

² Xúʼko̱ kayuuʼ kumulú índo̱ nduʼyáá xú káʼnii nimínuuʼ ga̱jma̱a̱ nikháñúu Jesús. Índo̱ narígá Conmemoración, ikhú nuriʼyáʼ mbiʼi mu mundxaʼwamíjná itháán dí na̱ʼkha̱ raʼthí náa Biblia, nagawúnlú índo̱ nduʼyáá xúgííʼ dí ikhaa nigíʼnuu. Ga̱jma̱a̱ na̱jkuánu nduʼyáá nguáthá mba̱a̱ gíʼdoo numuu dí ikhaa nikháñúu (1 Cor. 11:24, 25). Dí mundxaʼwamíjna̱ xúgííʼ rí niʼni ga̱jma̱a̱ dí niʼthí índo̱ nixtáa náa tsu̱du̱u̱ ku̱ba̱ʼ naʼni makuwáanʼlu gagi wéñuuʼ, náxnulú tsiaki̱i̱ índo̱ nduʼyáá xúgííʼ dí Jesús xtáa raʼni xúgi̱ ga̱jma̱a̱ dí wíji̱ maʼni nda̱wa̱á ga̱jma̱á numulú. Náa artículo rígi̱ mbuʼyáá dí á mu nundxa̱ʼwa̱míjna̱ náa xúgííʼ rúʼko̱ ga̱jma̱a̱ xkáʼnii Jesús nandoo kaʼyulú maxkajxáánʼ muxnáa núma̱aʼ.

3. Náá numuu dí ndayóoʼ muxnáa númaaʼ jma̱a̱ numuu dí nijuiʼtsiwáanʼlu rá.

³ Dí mundxa̱ʼwa̱míjna̱ xú káʼnii nixtáa ga̱jma̱a̱ xú káʼnii nikháñúu Jesús naʼni dí muxnáa númaaʼ. Índo̱ niʼtáráʼa náa tsu̱du̱u̱ ku̱ba̱ʼ niʼsngúún xa̱bu̱ ajngáa rí májánʼ dí maʼni Reino ndrígóo Dios. Ra̱ʼkhá tháán gíʼdoo wéñuuʼ numuu ajngáa rígi̱. Numuu  dí ikhaa nikháñúu ga̱jma̱a̱ numulú, rígi̱ nambáyulú mambájxu gajmiúlú Jeobá ga̱jma̱a̱ Jesús. Ikháánʼlú bi̱ guaʼdáá fe náa Jesús ma̱ngaa ma̱ndoo makuwáanʼlu kámuu mbiʼi ga̱jma̱a̱ matangáanʼ mbuʼñún mbu̱júu̱ʼ a̱ngiu̱lú bi̱ nikháñún (Juan 5:28, 29; Rom. 6:23). Gajkhun ma dí ikháanʼ nda̱a̱ dí niʼni mu ma̱ndoo makhánulú xúgííʼ dí májánʼ rígi̱. Nditháan wáa xáʼngulú guʼni núma̱a̱ Dios ga̱jma̱a̱ Jesús xúgííʼ dí nini̱ ga̱jma̱a̱ nindxu̱lú (Rom. 5:8, 20, 21). Guʼyáá xú káʼnii guxníi̱n núma̱aʼ dí nini̱ ga̱jma̱á numulú.

4. Ndiéjuunʼ niʼni María Magdalena mu maxnáa núma̱aʼ dí niʼni Jesús ga̱jma̱a̱ numuu rá. (Atayáá xtiʼkhuu.)

⁴ Gundxaʼwamíjna̱ xkri̱da ndrígóo mbá a̱ʼgú Judía bi̱ nigumbiʼyuu María Magdalena. Ikhaa nimínuuʼ wéñuuʼ numuu dí nigui̱i̱n mbá juwiin giñán guéenʼ bi̱ ra̱ʼkhá tháán nini̱ ngínáa. Mbáa nikumu̱u̱ dí nándáa dí gándoo gáʼni. Lá naʼngo̱o̱ nundxaʼwamíjna̱ xú káʼnii nikumu̱u̱ índo̱ Jesús nixkawíin mbáa xúgíinʼ giñán guéenʼ náa ikhaa xáʼ. Mbáa nixnáa wéñuuʼ núma̱aʼ. Ikhaa rúʼko̱ numuu dí ikhaa ni̱jkha̱ kidxuuʼ Jesús, nijmuu mbiʼi, tsiaki̱i̱ ndrígóo ga̱jma̱a̱ xúgííʼ dí gíʼdoo mu mambáyúu náa ni̱jkha̱ gáʼtaraʼa (Luc. 8:1-3). Maski ajndu María ndiʼyoo dí gíʼdoo wéñuuʼ numuu dí Jesús niʼni ga̱jma̱a̱ nindxu̱u̱, mú mbáa xóó tséʼngo̱o̱ gíkro̱ʼo̱o̱ dí inu maʼni. Ikhaa maxnáximinaʼ makhañúu ga̱jma̱a̱ numún xa̱bu̱, mu xúʼko̱ asndu tsáá bi̱ “gágiʼdoo fe náa ikhaa xákháñuu, maxtáa kámuu mbiʼi” (Juan 3:16). María niguiji jmbu, xúʼko̱ nisngájma dí ra̱ʼkhá tháán nixnáa núma̱aʼ. Ikhaa gajmíi̱n eʼwíinʼ a̱ngui̱i̱n, nixtáa náa nirájkhaa Jesús mu xúʼko̱ mambáyúu náa gáʼyóoʼ (Juan 19:25). María gajmíi̱n a̱jmi̱i̱n gu̱ʼu̱ nigún náa nibáaʼ Jesús mu muxtajmáán iná rí ndataun dí kandawooʼ aceite náa xuyuuʼ (Mar. 16:1, 2). Jeobá niʼni tsajkurámaaʼ María numuu dí májánʼ a̱jkiu̱u̱n. ¡Ra̱ʼkhá tháán nidxuu ikhaa índo̱ ndiʼyoo nigabi̱i̱ Jesús ga̱jma̱a̱ nindoo nitamíjná ga̱jma̱a̱! Numuu dí raʼkháa xúgíinʼ xa̱bi̱i̱ ndiyáá mbá nacha̱ ga̱jma̱a̱ nitamijná gajmiún Jesús (Juan 20:11-18).

5. Xú káʼnii gándoo guxnáa núma̱aʼ Jeobá ga̱jma̱a̱ Jesús dí nini̱ ga̱jma̱á numulú rá.

 ⁵ Ma̱ndoo muxnáa núma̱aʼ xúgííʼ dí niʼni Jeobá ga̱jma̱a̱ Jesús ga̱jma̱á numulú. Xú káʼnii gúʼni rá. Muriʼyaʼ mbiʼi, majmulú tsiaki̱i̱ ndrígúlú ga̱jma̱a̱ mbújkhu̱lú mu maguma itháán ñajuunʼ Dios. Mbá dí ma̱ndoo muʼni nindxu̱u̱, dí muxnaxímíjná muʼgua náa naguma ga̱jma̱a̱ naguma kaʼwii guʼwá dí najmulú mu mbuʼyamajkuíí Jeobá.

6. Ndíjkha dí nijuiʼtsiwáanʼlu nindxu̱u̱ mbá regalo náa mámbáa dí ikháánʼlú rá.

⁶ Índo̱ nundxa̱ʼwa̱míjna̱ dí Jeobá ga̱jma̱a̱ Jesús ra̱ʼkhá tháán nandún kuyulú naʼni rí maʼndulú kuʼñúún mangáánʼ (1 Juan 4:10, 19). Nandulú kuʼñúún itháán índo̱ na̱jkua̱nú nakru̱ʼu̱lú dí Jesús nikháñúu ga̱jma̱a̱ numuu mámbáa dí ikháánʼlú. Apóstol Pablo ra̱ʼkhá tháán nixnáa numaaʼ ga̱jma̱a̱ numuu regalo rígi̱. Ikhaa jngóo náa i̱yi̱ʼ dí nikuʼmá maʼgá inún bi̱ Gálatas niʼnirámáʼ: “A̱ʼdióo Dios […] nindoo kaʼyoʼ ga̱jma̱a̱ nixnáximinaʼ ga̱jma̱á numu’” (Gál. 2:20). Dí Jesús nikháñúu niʼni rí Jeobá ma̱ʼkha̱ kañáán ikháán mu mambajxáaʼ ga̱jma̱a̱ʼ (Juan 6:44). Lá tséʼni maraxtaa gagi matayaa dí Jeobá ndiʼyoo rí májánʼ náa ikháán ga̱jma̱a̱ ra̱ʼkhá tháán mba̱a̱ niʼni numuu ga̱jma̱a̱ numaaʼ mu ma̱ndoo mambajxáaʼ ga̱jma̱a̱ʼ xáʼ. Lá tséʼni rí maʼndaaʼ xtayáá Jeobá ga̱jma̱a̱ Jesús dí nini̱ ga̱jma̱á numaaʼ xáʼ. Ikhaa jngóo xúgiáanʼ ma̱ndoo murajximíjnalú. Ndiéjuunʼ gáxkajxuun ma̱ni̱ ga̱jma̱a̱ numuu dí nindúún kuyoʼ xá.

7. Xó má nakujmaa náa xtiʼkhuu xú káʼnii gándoo gusngajmá dí nandulú kuʼyáá Jeobá ga̱jma̱a̱ Jesús rá. (2 Corintios 5:14, 15; 6:1, 2.)

⁷ Dí maʼndulú kuʼyáá Dios ga̱jma̱a̱ Jesús naxkajxáánʼ maʼndulú kuʼñúún eʼwíinʼ (atraxnuu 2 Corintios 5:14, 15; 6:1, 2). Mbá dí xóo ma̱ndoo muʼni nindxu̱u̱ dí muʼtáruʼúún xúgíinʼ xa̱bu̱ ga̱jma̱a̱ xúgííʼ a̱jkiu̱lú, tséʼniuu ma náa guwáʼ, xóo nigaji̱i̱n, á mu kuaʼdáá mbújkha̱a̱ o gíníi.  Á nuʼni xúʼko̱ numbaʼyíí Jeobá numuu dí “ikhaa nandoo rí xúgíinʼ enii xa̱bu̱ makáwíin, ga̱jma̱a̱ rí maguánú muguaʼdáá mbá ku̱ma̱ kájxi̱ dí gajkhun” (1 Tim. 2:4).

8. Xú káʼnii gándoo gusngajmá dí nandulú kuʼñúún a̱ngiu̱lú rá.

⁸ Imbo̱o̱ dí xóo maʼndulú kuʼyáá Dios ga̱jma̱a̱ Jesús nindxu̱u̱ rí maʼndulú kuʼñúún a̱ngiu̱lú (1 Juan 4:21). Nuʼnilú rígi̱ índo̱ naxmiéjunlú kuʼñúún mámbáa dí ikhiin ga̱jma̱a̱ numbañún índo̱ nuraʼníí xkujndu gakhi̱i̱. Nuʼni maʼnii a̱jkiu̱ún índo̱ nakháñúu mbáa bi̱ nandún kuyáá, na̱jkua̱lu guʼñún índo̱ nandoo kañún, nuʼni xó má eʼngo̱o̱ mu muxnún tsiaki̱i̱ índo̱ kúwi̱i̱n ngíná (2 Cor. 1:3-7; 1 Tes. 5:11, 14). Ma̱ngaa nuʼtajkháan ga̱jma̱a̱ numún, numuu dí nduʼyáálú rí “índo̱ xa̱bu̱ jmbii naʼtájkáan gíʼdoo wéñuuʼ tsiakii” (Sant. 5:16).

9. Xú káʼnii i̱mba̱ xóo ma̱ndoo musngajmá dí nandulú kuʼñúún a̱ngiu̱lú rá.

⁹ I̱mba̱ xóo ma̱ndoo musngajmá dí nandulú kuʼñúún a̱ngiu̱lú nindxu̱u̱ dí muʼni mbá tsiaki̱i̱ mambáxulu májánʼ gajmiúlú. Nuʼnimíjna muʼni mba̱a̱ a̱jkiu̱lú kuʼñúún xó má eʼni Jeobá. Gundxaʼwámijnalú rígi̱: Jeobá nixnájxi̱ a̱ʼdióo makhañúu ga̱jma̱a̱ numuu aʼkhúlú. Ikhaa jngóo ikháánʼlú ma̱ngaa ndayóoʼ muʼni mba̱a̱ a̱jkiu̱lú kuʼñúún a̱ngiu̱lú bi̱ nakiéʼkúún náa inulú. Tsíyulú manindxu̱lú xóo ñumbáá bi̱ ra̱ʼkhá tháán mba̱a̱ nigiʼmaa náa inuu patriúun, ga̱jma̱a̱ patriúun niʼni mba̱a̱ a̱jkiu̱u̱n kaʼyoo, mú ikhaa táʼndoo gáʼni mba̱a̱ a̱jkiu̱u̱n kaʼyoo i̱mba̱a̱ ñumbáá bi̱ gíʼmaa itháan chíʼgíiʼ náa inuu ki xóo nigiʼmaa ikhaa (Mat. 18:23-35). Á mu xtáa mbáa ndxájulú bi̱ nakiʼnáa kaʼyaaʼ o ikháán nakiʼnáá xtayáá, atríya̱ʼ mbiʼi mu maratha̱a̱n dí maʼni mba̱a̱ a̱jkiu̱u̱n kaʼyaaʼ. Gunimbaníla xkujndu nákha xóó tséʼni Conmemoración (Mat. 5:23, 24). Á mu natani̱ xúʼko̱, matasnga̱jmá dí ra̱ʼkhá tháán nandaaʼ xtayáá Jeobá ga̱jma̱a̱ Jesús.

10, 11. Xkáʼnii gándoo gúsngajma dí nandún kuyáá Jeobá ga̱jma̱a̱ Jesús bi̱ kuya̱ edxu̱u̱ rá. (1 Pedro 5:1, 2.)

¹⁰ Bi̱ kuya̱ edxu̱u̱ ma̱ndoo muni̱ mbóoʼ dí gíʼdoo wéñuuʼ numuu mu musngajmáá Jeobá ga̱jma̱a̱ Jesús dí nandún kuyáá: Rí muñewu̱u̱n májánʼ mugiu̱u̱ Jesús (atraxnuu 1 Pedro 5:1, 2). A̱ʼdióo Dios niʼthúu̱n kaʼwu ndiéjuunʼ gíʼmaa maʼni Pedro. Numuu dí Pedro niʼni gáʼdu̱u̱ ajtsú aʼphu̱ dí naniniiʼ, mbáa ikhaa nindoo mbaʼyoo á mu ikhaa xóó nandoo kaʼyoo. Nda̱wa̱á dí ni̱ga̱bi̱i̱, Jesús nirajxu̱u̱: “Simón a̱ʼdióo Juan, nandaaʼ xta̱yo̱ʼ ráʼ.” Mbáa Pedro nindoo maʼni asndu ndiéjúúnʼ má mu masngájmuu dí nandoo kaʼyoo. Ikhú Jesús niʼthúu̱n: “Atiewu̱u̱nʼ tháan e̱jín múgiúʼ” (Juan 21:15-17). Asndu ma nákha ikhú Pedro nigíʼdu̱u̱ niñewu̱u̱n májánʼ wéñuuʼ mugiu̱u̱ Jesús, xúʼko̱ nisngájmuu dí nandoo kaʼyoo.

¹¹ Xú káʼnii gándoo gúsngajma bi̱ kuya̱ edxu̱u̱ índo̱ narígá Conmemoración dí nunimbaníí mangiin dí Jesús niʼthúu̱n Pedro rá. Ma̱ndoo musngajma dí ra̱ʼkhá tháán nandún kuyáá Jeobá ga̱jma̱a̱ Jesús á mu nuñewu̱u̱n májánʼ mugiu̱u̱ ga̱jma̱a̱ nuni̱ xó má eʼngo̱o̱ mu mumbañún bi̱ nuniñaanʼ ragún reunión (Ezeq. 34:11, 12). Ma̱ngaa ma̱ndoo mumbañún bi̱ ndiʼkhún egi̱ʼdi̱i̱ enigajmaa̱ Biblia, mangiin bi̱ ndiʼkhún nigún timbá aʼphu̱ náa Conmemoración. Nuthúún dí májánʼ nini̱ dí nigún numuu dí naguáʼthi̱i̱n dí xa̱bu̱ buʼko̱ maguánú mani̱ndxu̱ún xa̱bi̱i̱ Jesús nda̱wa̱á.

12. Ndíjkha dí nambayulú mu xámiñulu ajngáa dí niʼthí Jesús mbruʼun nákha inuu makhañúu rá. (Juan 16:32, 33.)

¹² Mbruʼun nákha makhañúu Jesús, niʼthúún xa̱bi̱i̱: “Náa numbaaʼ mumíniiʼla. Mú ¡xámiñalaʼ!, ikhúúnʼ niʼngo̱ʼ náa numbaaʼ” (atraxnuu Juan 16:32, 33). Dí maku̱mu̱u̱ kaʼyoo Jeobá nimbáyúu mu xámiñuu  Jesús índo̱ nini̱ ngínáa ga̱jma̱a̱ niguiji jmbu asndu índo̱ nikháñúu. Jesús ndiʼyoo dí xa̱bi̱i̱ maguáʼníí xó má nigíʼnuu ikhaa, ikhaa jngóo nindo̱ʼo̱o̱ Jeobá rí mañewu̱u̱n (Juan 17:11). Ndíjkha dí mbuʼyáá rígi̱ nambáyulú mu xámiñulu rá. Numuu dí Jeobá gíʼdoo itháán tsiaki̱i̱ ki xóo xa̱bu̱ sia̱nʼ ndrígúlú (1 Juan 4:4). Jeobá xtáa xawii mbaʼyoo xúgííʼ dí narígá. Nduʼyáá gajkhun dí á mu nakumulú kuʼyáá ikhaa nimbá xáʼni mamiñulú.

13. Xú káʼnii nisngájma dí támiñuun José bi̱ na̱ʼkha̱ náa Arimatea rá.

¹³ Gundxaʼwámíjná ga̱jma̱a̱ numuu José bi̱ na̱ʼkha̱ náa Arimatea, mbáa xa̱bu̱ bi̱ ndiyamajkuíí judío, numuu dí ikhaa ninindxu̱u̱ xa̱bu̱ ede̱ ndrígún. Mú índo̱ Jesús nixtáa raʼtáraʼa nimiñuu masngájma tsáá phú ninindxu̱u̱. Juan niʼthí: “Tásngájmaminaʼ pa̱jnu rí nindxu̱u̱ numuu rí namíñuu kaʼñún judíos” (Juan 19:38). Maski ajndu niniguuʼ ajngáa dí nidxawuun ga̱jma̱a̱ numuu Reino, mu nirkaʼwumúʼúun fe dí nigiʼdoo náa A̱ʼdióo Dios. Numuu dí nimiñuu dí xa̱bu̱ ní xúyamajkhuíí, tséʼniuu asndu xú káʼnii má dí nirígá, náa Biblia naʼthúlú dí nda̱wa̱á dí Jesús nikháñúu, José “nigíʼ níjníí gamíi mu maʼga gáʼyoo Pilato mu manda̱ʼa̱a̱ xuyuuʼ Jesús” (Mar. 15:42, 43). Rígi̱ niʼni dí xúgíinʼ mbuʼyáá fe dí nigiʼdoo José.

14. Ndiéjuunʼ gíʼmaa muʼni á mu naxmiéjunlú dí gúthi ga̱jma̱a̱ numulú xá.

¹⁴ Lá naxmiéjuaanʼ ndiéjuunʼ gúthi ga̱jma̱a̱ numaaʼ mangáán xó má nigíʼnuu José bi̱ na̱ʼkha̱ náa Arimatea ráʼ. Lá natiyaaʼ marata̱ dí nindxa̱a̱ʼ testigo de Jeobá náa escuela ga̱jma̱a̱ náa natiejunʼ rá. Lá natatsiñááʼ dí asndu nda̱wa̱á matani̱ publicador o majnguáanʼ iyááʼ ráʼ. Xátatsiʼñááʼ dí eʼwíinʼ gundxaʼwamíjna̱ ga̱jma̱a̱ numaaʼ maʼni dí xátani̱ dí májánʼ. Aratakáñii Jeobá mu mambáyáaʼ ga̱jma̱a̱ xámiñaaʼ matani̱ dí nandoo. Índo̱ gátayaa dí nariʼña̱a̱ dí naratájkáan rúʼko̱ gáʼni dí xámiñaaʼ (Is. 41:10, 13).

15. Ndiéjuunʼ nimbáñún xa̱bi̱i̱ Jesús índo̱ ndiyáá ni̱ga̱bi̱i̱ rá. (Lucas 24:52, 53.)

¹⁵ Índo̱ nikháñúu Jesús ra̱ʼkhá tháán nikúwi̱i̱n ngíná xa̱bi̱i̱. Xkáʼnii lá gakuma̱a̱ʼ á mu ikháán ma̱ngaa niraxtaa ikhí rá. Numuu dí nikháñúu mbáa bi̱ ra̱ʼkhá tháán nindúún kuyáá ga̱jma̱a̱ nikumu̱ún rí nándáa dí gájmiin muni̱ (Luc. 24:17-21). Mú nda̱wa̱á dí Jesús nisngájmaminaʼ náa ikhiin niriyaʼ mbiʼi mu maʼthúún dí ikhaa xtáa raʼnimbánuu mbá dí kiʼtáriyaʼ náa  Biblia. Ma̱ngaa nixnájxu̱u̱n muni̱ mbóoʼ ñajunʼ dí gíʼdoo wéñuuʼ numuu (Luc. 24:26, 27, 45-48). Mú 40 mbiʼi nda̱wa̱á dí Jesús nitsima̱a̱ mekhuíí, xa̱bi̱i̱ na̱nguá nikúwi̱i̱n ngíná numuu dí ndiyáá dí Jesús xtáa ndaʼya ga̱jma̱a̱ ikhaa mambáñún mu munimbaníí ñajunʼ dí nixnúún muni̱. Dí nidxúún rúʼko̱ niʼni dí muni̱ mba̱a̱ má xúʼko̱ Jeobá (atraxnuu Lucas 24:52, 53; Hech. 5:42).

16. Ndiéjuunʼ gándoo guʼni mu muʼni xó má nini̱ discípulos ndrígóo Jesús rá.

¹⁶ Xú káʼnii gándoo guʼyaridáá dí nini̱ discípulos ndrígóo Jesús rá. Dí muʼgíʼ muʼni ga̱jma̱a̱ gagi ñajuunʼ Jeobá xúgííʼ mbiʼi, raʼkháa i̱ndó mbiʼi dí narígá Conmemoración. Mu majmáánʼlu muʼni, gíʼmaa muʼgíʼ ginii muʼni ñajuunʼ Dios. Mbóoʼ xkri̱da, tikhuun nuríyaʼ májánʼ awan náa nuñajunʼ mu xúʼko̱ maguaʼdáá itháán mbiʼi mutaraʼa, magún reunión, munigajmaa xúgííʼ xmáná mbá guʼwíin. Tikhuun na̱nguá etsi maguaʼdáá wéñuuʼ dí eʼwíinʼ naku̱mu̱ún dí gíʼdoo numuu, mu xúʼko̱ ma̱ndoo muyambáá itháan náa congregación o magún gutaraʼa náa nda̱ñúunʼ itháán a̱ngiu̱lú. Gajkhun má dí ndayóoʼ maʼngulú má xúʼko̱ mu muʼni ñajuunʼ Jeobá, mú ikhaa nakudaminaʼ dí maʼni tsajkurámáanʼlu wéñuuʼ á mu nuʼgíʼ nuʼni ginii dí ikhaa nandoo (Prov. 10:22; Mat. 6:32, 33).

17. Ndiéjuunʼ gíʼma muʼni índo̱ gáʼni Conmemoración rá. (Atayáá xtiʼkhuu.)

¹⁷ Ra̱ʼkhá tháán nandulú maʼgánú maʼni martes 4 ñajuunʼ abril mu xúʼko̱ muʼni ku̱ma̱a̱ rí xú káʼnii nikháñúu Jesús. Mú xáʼyóoʼ ma maguáʼthi̱i̱n asndu mbiʼi rúʼko̱ mu mundxaʼwamíjná xú káʼnii nixtáa ga̱jma̱a̱ rí xú káʼnii nikháñúu Jesús ma̱ngaa dí xú káʼnii ikhaa ga̱jma̱a̱ Jeobá nisngajmulú dí ra̱ʼkhá tháán nandún kuyulú. Mú índo̱ nacho̱o̱ magíʼdu̱u̱ ga̱jma̱a̱ índo̱ gájngoo Conmemoración atríya̱ʼ mbiʼi mu matani̱ gajmaa tsumáá xúgííʼ dí nirígá ikhú xó má dí na̱ʼkha̱ náa mwb19.04 ináa 4 náa kayá edxu̱u̱ “Xú káʼnii gándoo gúʼniratamijná mu makuwáanʼ náa Conmemoración rá.” Atayáʼ matraxnuu texto dí maxkajxi̱i̱n maraxna̱a̱ numaaʼ, maraʼdáá ngajua, dí xámiñaaʼ ga̱jma̱a̱ maʼdxaaʼ má xúʼko̱. Atatsaʼwáminaʼ mbiʼi dí ma̱ndoo maraxna̱a̱ numaaʼ ga̱jma̱a̱ xúgííʼ a̱jkia̱a̱nʼ. Ma̱ndoo matayaa gajkhun dí Jesús mbaʼyoo dí gíʼdoo wéñuuʼ numuu tsiaki̱i̱ dí gúʼni mu marmáʼáan a̱jkiu̱lú kuʼyáá mbiʼi dí maʼni Conmemoración (Apoc. 2:19).