Índo̱ ndiyáa tsiguʼ 1920 anu̱ʼ ga̱jma̱a̱ ru̱dúʼ nijmañún dí gajkhun nákhá xóó kúwá ndajkuíín. Ikhúúnʼ nixtáá tsiguʼ 1939. Nákhá ka̱ʼníí chíʼgiúnʼ na̱jkhá ga̱jmu̱ʼ anu̱ʼ ga̱jma̱a̱ ru̱dúʼ náa reunión ga̱jma̱a̱ ninigu̱ʼ wéñuʼ índo̱ nanújngoo náa Najuiʼsngáa xú Miʼtáraʼa Májánʼ. Narmáʼáan xóó a̱jkiu̱nʼ índo̱ ni̱xna̱ timbá discurso, ndiyóoʼ matsimuʼ náa mbá caja mu ma̱ndoo makrúʼún náa atril. Ikhúúnʼ gúʼdoʼ 6 tsiguʼ nákhá ikhú ga̱jma̱a̱ ra̱ʼkhá tháán nimíñúʼ índo̱ ndi̱ñu̱u̱n xúgíinʼ bi̱ itháan guanii.

Anu̱ʼ niʼnirámáʼ náa mbá chíʼgíiʼ i̱yi̱i̱ʼ rí ma̱ndoo ma̱ta̱ índo̱ na̱jkhá gátaraʼa. Gúʼdoʼ 8 tsiguʼ índo̱ ni̱jkhá gátaraʼa timbá aʼphu̱, ra̱ʼkhá tháán nidxuʼ índo̱ xa̱bu̱ bi̱ nitaróʼoo niguxnuu i̱yu̱ʼ ga̱jma̱a̱ mbá nacha̱ nigruigú libro “¡Sea Dios Veraz!”. Ikha jngóo niga̱yúʼ nijkháaʼ gáthu̱u̱n anu̱ʼ. Rí mataraʼa ga̱jma̱a̱ rí maʼgá reunión niʼni rí maxtáá gagi, ma̱ngaa nimbáyuʼ manigu̱ʼ ma̱ni̱ kájxi̱ ñajuunʼ Jeobá.

Mámbá mbiʼi ni̱jkha̱ ranigu̱ʼ itháan Biblia numuu rí anu̱ʼ nindoo nikúdúnʼ náa ma̱ndoo magruigú revista Bi̱ Nayejngoo. Nigúxnuu xúgíʼ revista dí nigruigú. Dí maku̱mu̱ʼ ka̱yo̱o̱ Jeobá ni̱jkha̱ ra̱ja̱a̱ mámbá mbiʼi, ikha jngóo niraʼwíí dí maxnaxíminaʼ náa ikhaa.

Nákhá tsiguʼ 1950 nijuiʼtháán anu̱ʼ rí mu̱ʼguáxu náa asamblea internacional dí nirígá náa Nueva York, rí nigumbiʼyuu “Aumento de la Teocracia”. Nákha jueves 3 ñajunʼ gu̱nʼ agosto, mbiʼi rúʼko̱ ndiyá edxu̱u̱ “Día del misionero”. Mbiʼi rúʼko̱, ndxájulú Carey Barber, bi̱ nda̱wa̱á ninindxu̱u̱ Cuerpo Gobernante, nixná discurso ndrígu̱ún bi̱ majngún iyááʼ. Nda̱wa̱á dí ndxájulú niʼniuxu a̱jma̱ graxe̱, ikhú nigújun ga̱jma̱a̱ gakhi̱i̱ ni̱tha̱: “¡Xúʼko̱!” Maski ajndu nákhá ikhú gúʼdoʼ 11 tsiguʼ, ni̱jkhánú ndi̱yo̱o̱ dí ni̱ni̱ mbá dí gíʼdoo wéñuʼ numuu. Mú, nimíñúʼ wéñuʼ majngúnʼ náa iyaʼ numuu rí tséjmañuʼ  maʼgá inuu iyaʼ. A̱muʼ ni̱jkha̱ kañúún náa alberca ga̱jma̱a̱ niʼthúnʼ rí xúgíʼ magajnúu má májánʼ. Xúʼko̱ má niʼni, mbá nacha̱ má nixumu̱u̱nʼ náa iyaʼ rí asndu na̱nguá nijngríga̱ awúu̱n alberca. Mbaʼin a̱ngiu̱lú nirtu̱wún mu xámúʼúún, mbáa nikúmúúnʼ náa iyaʼ ga̱jma̱a̱ imba̱a̱ niríñu̱únʼ. Asndu má mbiʼi rúʼko̱, Jeobá niʼni jmbu̱u̱ má xúʼko̱ kambo̱ʼ.

Índo̱ niniʼñúuʼ escuela, nindoʼ mani̱ndxu̱ʼ precursor, mú bi̱ nisngóʼ nitsudúún manigajmaa náa mbá escuela rí mitsídánʼ. Ni̱ni̱ xó má ikhiin nitsudún, mú tájyúuʼ má ni̱jkhánú ndi̱yo̱o̱ dí xándoo ma̱ni̱ májánʼ ñajuunʼ Jeobá ga̱jma̱a̱ maʼgíʼ manigajmaa, ikha jngóo niniʼñúʼ ranigajmaa. Nitakáñuu Jeobá ga̱jma̱a̱ nda̱wa̱á niniraʼmáʼ carta náa ni̱thu̱u̱n ga̱jma̱a̱ ajngáa gamajkhu rí maniʼñúʼ ranigajma̱a̱ índo̱ gámbáa tsiguʼ rúʼko̱. Niku̱mu̱ʼ ka̱yo̱o̱ Jeobá ga̱jma̱a̱ mbá nacha̱ má ninindxu̱ʼ precursor regular.

Nákhá julio tsiguʼ 1957 nigíʼdu̱u̱ ni̱ni̱ kájxi̱ ñajuunʼ Jeobá náa mbá xuajin dí mbiʼyuu Wellingborough. Nindu̱ʼu̱u̱n a̱ngiu̱lú bi̱ kúwá náa Betel dí rígá náa Londres mutu̱nʼ tsáá ndxájulú precursor bi̱ najmañuu ma̱ndoo mañajunʼ ga̱jmu̱ʼ. Ndxájulú Bert Vaisey mbaʼa rí niʼsngóʼ, ikhaa ninindxu̱u̱ mbáa bi̱ tsémiñuu maʼtáraʼa, ikhaa nimbáyuʼ maríyáʼ májánʼ awan ga̱jma̱a̱ mbiʼi dí mataraʼa. Náa congregación rí nikúwáanʼxu nikúwá mbá majuiin a̱ngiu̱lú gu̱ʼu̱ guanii, ndxájulú Vaisey ga̱jma̱a̱ ikhúúnʼ. Rí ma̱ni̱ rataminaʼ ga̱jma̱a̱ rí maniu̱u̱ comentar náa xúgíʼ reunión nimbáyuʼ maku̱mu̱ʼ ka̱yo̱o̱ Jeobá ga̱jma̱a̱ xúʼko̱ nisngajmá fe dí gúʼdoo.

Nda̱wa̱á dí nigájnáaʼ náa guʼwá e̱jua̱nʼ dí ni̱jkhá mbáxngaa ga̱jma̱a̱ numuu rí táʼndoo mani̱ndxu̱ʼ soldado, niniʼniiʼ Bárbara, mbáa ndxájulú precursora especial. Nidamíjnáxu nákha tsiguʼ 1959, nikúwáanʼxu xawii mu̱ʼguáxu asndu náá má gúxunguánʼxu. Ginii kayuuʼ ni̱jkuáxu náa Lancashire náa mbá xuajen dí rígá náa Inglaterra. Nda̱wa̱á, enero tsiguʼ 1961, nithu̱nʼ maʼgá náa mbá curso rí ndijyúuʼ mbagu̱nʼ náa Najuiʼsngúún ga̱jma̱a̱ numuu Reino náa Betel dí rígá náa Londres. Asndu tsiánguá niguanúʼ índo̱ niguámbá curso numuu rí nithu̱nʼ mani̱ndxu̱ʼ circuito. A̱jma̱ xmáná niʼsngóʼ mbáa ndxájulú circuito bi̱ najmañuu náa Birmingham ma̱ngaa nitháán Bárbara maxtáa ga̱jma̱á ni̱ndxu̱ʼ. Nda̱wa̱á ni̱jkuáxu náa nixuʼmáanʼxu muʼguá náa xuajin Lancashire ga̱jma̱a̱ Cheshire.

Náa ni̱jkuájxu pasiá nákhá agosto tsiguʼ 1962, nindrígúxu mbá carta dí nikunguanʼ Betel. ¡Nixunguanʼ mbá solicitud rí munimajtííʼxu mu muʼguáxu náa Escuela ndrígóo Galaad! Nda̱wa̱á dí nitajkáanxu̱, ikhúún ga̱jmu̱ʼ Bárbara ninimajtííʼxu i̱yi̱i̱ʼ muxuʼnguáanʼxu mbá nacha̱ náa Betel xó má nithuxu. Witsu igu̱nʼ nda̱wa̱á nijkuájxu náa Brooklyn, Nueva York, mu muguaʼdááxu clase 38 ndrígóo Galaad, ikhí nikuwáanʼ runigajmaxu mbá gu̱wa̱ʼ igu̱nʼ.

Náa Galaad raʼkháa i̱ndó nijmañuxu itháan ga̱jma̱a̱ numuu Biblia, xuajñuu Dios ma̱ngaa nijmañuxu ga̱jma̱a̱ xóo embájxulú. Numuu rí asndu xóó tséʼni má 25 tsiguxu ikha jngóo, nijmañuxu itháan náa bi̱ mbóó ninigajmaa gajmiúxu̱. Ra̱ʼkhá tháán  májánʼ ninindxu̱u̱ dí xúgíʼ mbiʼi niñajunʼ ga̱jmu̱ʼ mbóó ndxájulú Fred Rusk, mbáa bi̱ niʼsngúxu. Mbá rí gíʼdoo wéñuʼ numuu rí nijmañuʼ náa ikhaa nindxu̱u̱ rí índo̱ gáxna xtágabu gíʼmaa majmuʼ rí naʼthí náa Biblia. Tikhun a̱ngiu̱lú bi̱ nixna discurso ninindxu̱ún bi̱ nijmañún wéñuʼ xóo Nathan Knorr, Frederick Franz ga̱jma̱a̱ Karl Klein. Ma̱ngaa nijmañuxu wéñuʼ náa ndxájulú Alexander Hugh Macmillan mbáa bi̱ ninindxu̱u̱ xa̱bu̱ wabaaʼ. Ikhaa nixná mbá discurso rí nimbáyuxu mikru̱ʼu̱xu xú káʼnii Jeobá nixnúún ikha a̱ngiu̱lú tsiguʼ dí niguma gíníi wéñuʼ nákhá nigi̱ʼdu̱u̱ tsiguʼ 1914 asndu tsiguʼ 1919.

Índo̱ na̱jkha̱ rámbá curso, ndxájulú Knorr niʼthúxu, dí muxuʼmáanʼxu náa xuajen dí mbiʼyuu Burundi mbayuuʼ África. Nigayúxu nijkuá náa biblioteca dí rígá náa Betel mu mbuʼyáaʼxu náa Anuario nguáthi̱i̱n publicadores kúwá náa Burundi mbiʼi rúʼko̱. Mú, nditháan túxkamaaxu náa naʼthí nguáthi̱i̱n kúwi̱i̱n náa xuajen rúʼko̱. Mu̱ʼguáxu náa nditháan tájuiʼtáraʼa ga̱jma̱a̱ náa na̱nguá eniʼnuuʼxu májánʼ. Ikhú nigíʼdu̱u̱ nimíñuxuʼ, mú nimbáyúxu wéñuʼ rí mutajkáanxu má xúʼko̱.

Náa ni̱jkuáxu, mixtiʼkhu kayuuʼ ninindxu̱u̱ rí xóo náa nikúwáanʼxu nákhá ginii: Rí xóo kaʼnii clima, rí xóo kúwá xa̱bu̱ ga̱jma̱a̱ ajngáa rí nuthi. Ikhú ndiyóoʼ majmañuxu ajngáa francés. Ma̱ngaa niʼniuxu mingíjyúuʼ mbuʼyáʼ náa makúwáanʼxu. A̱jma̱ mbiʼi nda̱wa̱á rí nijkuánuxu, mbáa ndxájulú bi̱ mbóó ninigajmaa gajmiúxu náa Galaad bi̱ mbiʼyuu Harry Arnott ninújngoo gáʼyuxu índo̱ xtáa ra̱jkha̱ náa Zambia náa nixungua̱a̱nʼ maʼga gáʼtáraʼa. Nimbáyuxu ndiyáʼ mbá guʼwá náa makúwáanʼxu, ikhaa ninindxu̱u̱ timbá guʼwá náa nikúwáanʼxu xóo misioneros. Mú, tájyúuʼ má niʼni rí Xa̱bu̱ Ñajunʼ bi̱ kúwá ikhí bi̱ nditháan na̱nguá eyáá ga̱jma̱a̱ numún xa̱bi̱i̱ Jeobá nikiʼníin. Mbiʼi rí nigíʼdu̱u̱ ni̱jkha̱ raguʼunxu ikhí, Xa̱bu̱ ñajunʼ nithuxu dí xándoo maguánúxu ikhí á mu na̱nguá kuaʼdááxu permiso rí muñajunʼxu. Migíná ninindxu̱u̱ numuu rí ndiyóoʼ magajnáaxu ikhí mu mu̱ʼguáxu náa i̱mba̱ país, náa Uganda.

Rí makumuxu ku̱ya̱a̱ Jeobá nimbáyúxu dí xámiñúxu muʼguá náa Uganda, maski ajndu na̱nguá niguáʼdááxu visa. Mbáa ndxájulú bi̱ na̱ʼkha̱ Canadá bi̱ xtáa rayambáá niʼtáminaʼ ga̱jma̱a̱ numuxu mbáa policía bi̱ tséniñu̱u̱nʼ matu̱ʼu̱u̱n xa̱bu̱ bi̱ naguwáʼ i̱mba̱ ríʼkhá. Numa̱a̱ má rúʼko̱, niniñuxu makúwáanʼxu  nguáthá igu̱nʼ ikhí mu ma̱ndoo muríyáʼxu permiso mu maguanúxu náa país rúʼko̱. Ndiya̱a̱xu rí Jeobá nixtáa rambáyuxu.

Rí xóo nikúwáanʼxu ikhí ninindxu̱u̱ mixtiʼkhu wéñuʼ ki xóo náa Burundi. Ikhí nijuiʼtáraʼa má, maski ajndu káaʼ kúwá mbá 28 xa̱bi̱i̱ Jeobá náa xúgíʼ país. Náa ni̱jkuáxu gútaráʼa nixkamiixu xa̱bu̱ bi̱ nuthi Inglés. Tájyúuʼ má ndiya̱a̱xu rí á mu nanduxu mumbáñun xa̱bu̱ majmañún, ndayóoʼ majmañuxu mbóoʼ ajngáa dí nuthi xa̱bu̱ maski ajndu rígá mbaʼa wéñuʼ. Niʼgímíjnaxu majmañuxu ajngáa luganda rí nuthi náa mbaaʼ ndrígóo Kampala náa nigíʼdi̱i̱xu nitaráʼa, ikhí mbaʼin wéñuʼ xa̱bu̱ nuthi ajngáa Luganda, ikha jngóo niraʼwíí majmañuxu ikhaa. Ndiyóoʼ mba̱yu̱u̱ʼ tsiguʼ majmañuxu muthaxu májánʼ, rí muthaxu ajngáa rúʼko̱ nimbáyúxu wéñuʼ náa nitaráʼaxu. Nijkuánú ndiya̱a̱xu xú káʼnii gándoo mumbáñuun itháan bi̱ nusngúnxu. Ma̱ngaa niʼni dí ikhiin muthu̱xu xúgíʼ dí ekumu̱ún ga̱jma̱a̱ numuu dí kúwá ra̱jma̱ñún.

Nikúwáanʼxu gagi wéñuʼ índo̱ nimbáñunxu xa̱bu̱ majmañún dí gajkhun. Mú nikúwáanʼxu itháan gagi índo̱ nithuxu dí mani̱ndxu̱xuʼ circuito náa mbá kañiʼ país rúʼko̱. Betel dí rígá náa Kenia nikuʼmaaʼxu “mu̱ʼguá” náa mixtiʼkhu xuajin mu mbu̱ya̱a̱xu náa eñúnʼ itháan precursor especial. Mbaʼa aʼphu̱ mbaʼin xa̱bu̱ bi̱ nimbá miʼtsú túniʼniunʼ xa̱bi̱i̱ Jeobá nindriguáanʼxu májánʼ wéñuʼ asndu nini̱ májáánʼ ganitsu rí muphúxu.

Nda̱wa̱á mixtiʼkhu xóo nijngruiguxu. Náa Kampala ni̱jkhá a̱jma̱ mbiʼi ga̱jma̱a̱ tren mu maʼgánú asndu náa rawuunʼ iyaʼ ndrígóo Mombasa dí rígá náa Kenia, ikhí ni̱jkhá ga̱jma̱a̱ barco mu maʼgánú náa xuajen dí rígá náa tapo̱o̱ iyaʼ ndrígóo Seychelles dí rígá náa Océano Índico. Nda̱wa̱á, índo̱ niʼni 1965 asndu 1972, ni̱jkhá ga̱jmu̱ʼ Barbara gáñuun a̱ngiu̱lú náa xuajin dí rígá náa tapo̱o̱ iyaʼ ndrígóo Seychelles. Nákha ikhú káaʼ a̱jmi̱i̱n publicador nikúwá, nda̱wa̱á nirígá mbá grupo ga̱jma̱a̱ nda̱wa̱á kayuuʼ nirígá mbá congregación náa nikúwá mbaʼin a̱ngiu̱lú. I̱ʼwáʼ “náa ni̱jkuáxu” gúñuun a̱ngiu̱lú nindxu̱u̱ náa Eritrea, Etiopía ga̱jma̱a̱ Sudán.

Náa Uganda, mbá nguéjmiin soldado nigi̱ʼdi̱i̱ nitañajunʼ náa país, rúʼko̱ niʼni rí maxtiʼkhuu mbá nacha̱ xóo nikúwi̱i̱n xa̱bu̱. Xúgíʼ tsiguʼ migamíi dí nixtáá ikhí, nijmañuʼ dí itháan májánʼ manimbánuu kiʼtáñajunʼ dí na̱ʼkha̱ náa Biblia, náa naʼthí: “Guxna̱a̱ César rí kaʼyoo má César” (Mar. 12:17). Ikha jngóo mbá nacha̱ ninimbuxu índo̱ nithuxu rí xúgíinʼ xa̱bu̱ bi̱ naguwááʼ bi̱ kúwi̱i̱n ikhí ndayóoʼ muxuda̱ʼ mbiʼñún náa policía bi̱ kúwi̱i̱n itháán mijngii náa kúwá. Mba̱yu̱u̱ʼ mbiʼi nda̱wa̱á índo̱ kuwáanʼ rajkuájxu náa Kampala tikhun policía bi̱ niñajunʼ ngo̱ʼo̱o̱ nitsiji kárriuxu. ¡Ra̱ʼkhá tháán nimíñuxuʼ! Numuu dí nituxu rí nindxuxu bi̱ nuyama, ikha jngóo nigún kudáanʼxu náa guʼwá e̱jua̱nʼ, ikhí nithu̱u̱nxu dí nindxuxu misionero ga̱jma̱a̱ nithu̱u̱nxu dí nixuʼdáaʼxu má mbiʼyuxu náa policía, mú túnimbu̱ún kuyuxu ikha jngóo niruguáanʼxu ga̱jma̱a̱ nigún kudáanʼ náa gíi̱nʼ policía bi̱ kúwá itháán mijngii náa kúwáanʼxu. Niʼni̱i̱ a̱jkiu̱xu índo̱ ndiya̱a̱xu dí policía bi̱ ndiʼyoo nákha ginii xóo nixuʼdaaʼ mbiʼyuxu nininianʼ ga̱jma̱a̱ niʼthúún dí muniñuxu muʼguáaʼ.

Nákha ikhú tsejtsi mbiʼi nikúwáanʼxu ga̱jma̱a̱ gamíi rí manújnguxu náa kúwi̱i̱n soldado, itháan índo̱ najngi̱i̱n. Nutájkáanxu mámbá índo̱ naguáʼníí xúʼko̱, naʼni̱i̱ a̱jkiu̱xu índo̱ nuniñuxu manújnguxu. Phú migíná índo̱ ndiyáa tsiguʼ 1973, nijuiʼthúún xúgíinʼ misionero bi̱ naguwáʼ i̱mba̱ ríʼkhá dí ni xákúwi̱i̱n náa Uganda.

 Nda̱wa̱á nithuxu dí muʼguá guyámbáxu i̱mba̱ ríʼkhá náa Costa de Marfil dí gíʼ náa narámáʼ a̱jkha̱ʼ náa África, rígi̱ nimbáyúxu mu majmañuxu imbo̱ʼ nuxi̱ʼ xóo kúwá xa̱bu̱, dí muthaxu itháan francés ga̱jma̱a̱ rí makuwáanʼ gajmiúxu eʼwíinʼ misionero bi̱ naguwáʼ mixtiʼkhu xuajen. Ndiya̱a̱xu dí Jeobá nindxu̱u̱ bi̱ ni̱jkha̱ kaguáanʼxu numuu dí ikhí nixkamiinxu xa̱bu̱ guabiinʼ ga̱jma̱a̱ bi̱ nuthi dí gajkhun numuu rí mbá nacha̱ nindrígu ajngáa dí májánʼ. Ndiya̱a̱xu rí makumuxu kuya̱a̱ Jeobá nimbáyúxu dí maʼni jmbu̱u̱ kambuxu.

Nda̱a̱ tsu̱ma̱ nitháán Barbara dí gíʼdoo cáncer. Mbaʼa nuthu ni̱jkuáxu náa Europa, mu ikhaa maʼga̱ gáʼñun xa̱bu̱ bi̱ najmañún itháan thana, mú índo̱ niʼni tsiguʼ 1983 ndiya̱a̱xu dí xáʼnguxu gákuwáanʼ xóó muñambáá náa África. ¡Ndiya̱a̱xu dí ra̱ʼkhá tháán migíná ninindxu̱u̱ rúʼko̱!

Índo̱ kúwáanʼxu ruyambáá náa Betel dí rígá náa Londres, cáncer dí gíʼdoo Barbara ni̱jkha̱ raʼñúu itháan rí asndu nikháñuu. A̱ngiu̱lú bi̱ kúwi̱i̱n náa Betel nimbayúʼ wéñuʼ. Mbáa ndxájulú ga̱jma̱a̱ a̱ʼgiu̱u̱ nimbayúʼ maguʼwunʼ maxtáá ga̱jma̱a̱ dí maku̱mu̱ʼ ka̱yo̱o̱ má xúʼko̱ Jeobá. Nda̱wa̱á niniʼniiʼ mbáa ndxájulú bi̱ na̱ʼkha̱ rayambáá nguáthá mbiʼi náa Betel bi̱ mbiʼyuu Ann, bi̱ ninindxu̱u̱ precursora especial. Nandoo kaʼyoo Jeobá ga̱jma̱a̱ nasngájma dí nindxu̱u̱ mbáa xa̱bu̱ bi̱ nambájxu̱u̱ májánʼ ga̱jma̱a̱. Ndi̱ya̱a̱ Ann nákhá 1989, asndu nákhá má ikhú niyambááxu má xúʼko̱ náa Betel dí rígá náa Londres.

Nákha 1995 asndu 2018, nikhánuʼ mbá ñajunʼ rí mitsaanʼ mu mani̱ndxu̱ʼ mbáa bi̱ naxungua̱a̱nʼ a̱ngiu̱lú bi̱ kúwá náa guʼwá dí phú nákha ikha (nákha ginii nigumbiʼñún xóo superintendente de zona), ni̱jkhá náa mbá 60 mixtiʼkhu país. Mámbá náa na̱jkhá, ndi̱yo̱o̱ xú kaʼnii Jeobá eʼni tsajkurámiinʼ xa̱bi̱i̱ ajndu xkáʼníí má kúwá.

Nákha 2017 ga̱jma̱a̱ numuu dí najngruʼuxu ruñu̱u̱n a̱ngiu̱lú nindoo nitangáanʼxu náa África. ¡Ra̱ʼkhá tháán mitsaanʼ ninindxu̱u̱ dí ni̱jkhá ka̱ya̱a̱ Ann mu mbaʼya Burundi ga̱jma̱a̱ dí mbuya̱a̱xu xú káʼnii mitsaanʼ ndija̱a̱ ñajunʼ náa xuajen rúʼko̱! Náa ikháá má kamba̱a̱ dí ni̱jkuáxu rutaráʼa náa mámbá guʼwá nákhá 1964, dí xúgi̱, ikhí kri̱ga̱ mbá mitsaanʼ guʼwá Betel náa nuñajunʼ mu mumbañún itháan dí 15,500 a̱ngiu̱lú bi̱ nutaraʼa.

Ra̱ʼkhá tháán nidxuʼ índo̱ nigruígú calendario náa katima mbiʼyuu xuajin dí maʼgá nákhá 2018. Náa lista katima dí maʼgá náa Costa de Marfil. Índo̱ nijkuánuxu náa capital rí mbiʼyuu Abiyán, ikhúúnʼ ndi̱yo̱o̱ rí asndu xóo nitanga̱án náa goʼwóʼ. Índo̱ ndi̱yo̱o̱ náa lista náa katima número ndrígóo teléfono ninduxu mbuya̱a̱ tsáá xtáa mijngii náa kuartiuxu dí rígá Betel, niku̱mu̱ʼ dí ninindxu̱u̱ mbáa ndxájulú bi̱ niniʼniiʼ mbiʼyuu Sossou. Nirmáʼáan a̱jkiu̱nʼ dí ikhaa ninindxu̱u̱ superintendente náa xuajen rúʼko̱ nákhá nixtáá náa Abiyán. Mú raʼkháa ikhaa, nindxu̱u̱ a̱ʼdióo Sossou.

Jeobá naʼnimbánuu má xúʼko̱ ajngóo. Náa xúgíʼ ga̱ʼkhu̱ dí niraʼnuu, ni̱jkhánú ndi̱yo̱o̱ gajkhun rí á mu nakumulú kuʼyáá Jeobá, ikhaa naʼni jmbu̱u̱ kambulú. Dí xúgi̱ nanduxu muni̱ xó má eʼngo̱o̱ mu mu̱ʼguáxu má xúʼko̱ náa kamba̱a̱ dí na̱jkha̱ kaguáánʼ makuwáánʼ kámuu mbiʼi náa numbaaʼ nuxi̱ʼ (Prov. 4:18).