1, 2. Ndiéjuunʼ nijmañuu mbáa ndxájulú bi̱ kayá edxu̱u̱ índo̱ nixnúu consejo mbáa ndxájulú a̱ʼgu̱ rá.

 NIʼNI má mba̱yu̱u̱ʼ tsiguʼ dí a̱jmi̱i̱n a̱ngiu̱lú bi̱ kuya̱ edxu̱u̱ nigún gúyáá mbáa ndxájulú a̱ʼgu̱ bi̱ niniñuuʼ ra̱jkha̱ reunión. Mbáa ndxájulú bi̱ kuya̱ edxu̱u̱ niguxnuu mbaʼa texto ndrígóo Biblia náa naʼthí ga̱jma̱a̱ numuu dí gíʼmaa makuwáánʼlú náa reunión. Ikhaa nikumu̱u̱ dí nimbáyúu ndxájulú a̱ʼgu̱ dí niʼni, mú índo̱ nachu̱u̱n maguáan, ndxájulú a̱ʼgu̱ niʼthúún: “Ikháanʼla tséya̱a̱ nditháan kayuuʼ xóo kaʼnii xtáá”. A̱ngiu̱lú nixna consejo dí asndu túrajxi̱i̱ xú káʼnii xkujndu rí gíʼdoo. Ikha jngóo ndxájulú a̱ʼgu̱ nikumu̱u̱ rí nditháan má támbáyúu dí nitháán.

² Ndxájulú bi̱ niguxnuu texto narmáʼáan a̱jkiu̱u̱n dí nirígá, ikhaa naʼthí: “Nákhá ikhú niku̱mu̱ʼ dí ikhaa tasngájma gamajkhu. Mú índo̱ nindxaʼwamínáʼ májánʼ ga̱jma̱a̱ numuu dí nirígá, ikhú ndi̱yo̱o̱ dí táʼyooʼ má magúxnuu xúgíʼ texto rúʼko̱, itháán májánʼ gáʼni á mu nirajxu̱u̱ ‹xú káʼnii xtáa›, ‹xú káʼnii ku̱mu̱u̱›, ga̱jma̱a̱ ‹xú káʼnii gándoo gámbáyúu›”. Ndxájulú bi̱ kayá edxu̱u̱ bugi̱ nijmañuu mbá rí gíʼdoo wéñuuʼ numuu, dí xúgi̱ ikhaa nindxu̱u̱ mbáa ndxájulú bi̱ nakro̱ʼo̱o̱ kaʼñún eʼwíinʼ.

3. Tsíín gándoo muxna consejos rá.

 ³ A̱ngiu̱lú bi̱ kuya̱ edxu̱u̱, kajkuáa ñawúnʼ rí muxnún consejo bi̱ nda̱ñúunʼ. Mú nguáná ma̱ndoo maʼni dí eʼwíinʼ a̱ngiu̱lú bi̱ kúwá náa congregación mbaʼyóoʼ dí muxnún consejo eʼwíinʼ. Mbá xkri̱da, ma̱ndoo muxnáálú consejo dí na̱ʼkha̱ raʼthí náa Biblia mbáa bi̱ nambájxu̱lú gajmiúlú (Sal. 141:5; Prov. 25:12).  O ma̱ngaa ma̱ndoo dí mbáa ndxájulú a̱ʼgú nikhi̱i̱ ma̱ndoo maxnúu consejo mbáa bi̱ waxaá ga̱jma̱a̱ numuu dí na̱ʼkha̱ raʼthí náa Tito 2:3-5. Xó má eʼyáá dí xabuanii kaʼyoo má muxnún consejo e̱jñu̱ún ga̱jma̱a̱ muxprigún. Ikha jngóo maski ajndu artículo rígi̱ nigumaratáá mu maʼga inún bi̱ kuya̱ edxu̱u̱, mú májánʼ nindxu̱u̱ dí mangáánʼ mbuʼyáá xú káʼnii ma̱ndoo muxná consejo dí mambáñún ga̱jma̱a̱ rí “maʼni̱i̱ a̱jkiu̱ún” eʼwíinʼ (Prov. 27:9).

4. Ndiéjuunʼ graxe̱ gúriʼña̱a̱ náa artículo rígi̱ rá.

⁴ Náa artículo rígi̱ muriʼña̱a̱ mbá a̱jkhu̱ graxe̱ dí naʼthí ga̱jma̱a̱ numuu rí muxná consejo: Ndiéjunʼ gáxkajxáánʼlú muxná consejo rá. Lá gajkhun ndayóoʼ muxná consejo ráʼ. Tsiéjúúnʼ gáʼyóoʼ muxna consejo rá. Ga̱jma̱a̱ xóo gándoo gúxna consejo dí ma̱ndoo mambáñún xá.

5. Náá numuu rí xáʼñuu mingíjyúuʼ magruigú consejo mbáa índo̱ gáʼyoo dí gajkhun naxmiéjunlú kuʼyáá rá. (1 Corintios 13:4, 7.)

⁵ A̱ngiu̱lú bi̱ kuya̱ edxu̱u̱ nandún kuñún a̱ngiu̱lú. Nguáná ngajua rí guáʼdáá nusngajma índo̱ nuxnún consejo a̱ngiu̱lú bi̱ nagún majngutíguíin náa mbá tsáʼkhá (Gál. 6:1). Índo̱ mbáa bi̱ kayá edxu̱u̱ nandoo maxnúu consejo mbáa, gíʼmaa mandxaʼwáminaʼ ga̱jma̱a̱ numuu ngajua rí niʼthí apóstol Pablo gi̱i̱: “Ngajua naʼngo̱o̱ a̱jkiu̱u̱n ga̱jma̱a̱ májánʼ a̱jkiu̱u̱n. […] Xúgíʼ naʼngo̱o̱ naraʼnuu, xúgíʼ naʼnimbo̱o̱, xúgíʼ nagiʼtu̱u̱n, xúgíʼ naʼngo̱o̱ namínuuʼ” (atraxnuu 1 Corintios 13:4, * 7). * Dí mandxaʼwáminaʼ versículo rígi̱ ndxájulú bi̱ kayá edxu̱u̱ mambáyúu mbaʼyoo á mu dí naxkajxi̱i̱ maxná consejo nindxu̱u̱ ngajua rí gíʼdoo ga̱jma̱a̱ maʼni xó má kaʼyoo. Xa̱bu̱ bi̱ gágruigú consejo xáʼniuu mingíjyúuʼ maʼdxawuun índo̱ gáʼyoo dí bi̱ naxnúu consejo gajkhun naxmiéjuunʼ kaʼyoo (Rom. 12:10).

6. Xú káʼnii májánʼ xkri̱da niniñuuʼ Apóstol Pablo rá.

⁶ Apóstol Pablo niniñuuʼ mbá májánʼ xkri̱da dí ma̱ndoo mbuyaridáá bi̱ kuya̱ edxu̱u̱. Mbá xkri̱da, ikhaa táʼni a̱jma̱ a̱jkiu̱u̱n dí maxnún consejo a̱ngiu̱lú bi̱ kúwá náa Tesalónica índo̱ ndiyóoʼ. Náa carta dí niʼnirámáʼ ginii niʼthúún dí májánʼ ñajunʼ dí kúwá runi̱, numuu rí nuni ga̱jma̱a̱ ngajua ga̱jma̱a̱ rí naʼngu̱u̱n. Ma̱ngaa nindxa̱ʼwáminaʼ ga̱jma̱a̱ numuu xóo kaʼnii kúwíin ga̱jma̱a̱ niʼthúún rí ndaʼyoo dí ikhiin kúwíin raʼngu̱u̱n náa xkujndu ga̱jma̱a̱ rí naguma gíníi (1 Tes. 1:3; 2 Tes. 1:4). Ma̱ngaa asndu niʼthúún rí nindxu̱ún májánʼ xkri̱da náa eʼwíinʼ cristianos (1 Tes. 1:8, 9). Ra̱ʼkhá tháán gagi nikúwi̱i̱n ga̱jma̱a̱ numuu ajngáa rí nijuiʼthúún, ikhiin túni a̱jma̱ a̱jkiu̱ún dí Pablo gajkhun nindoo kaʼñún. Ikha jngóo consejo rí nixnúún rí na̱ʼkha̱ raʼthí náa a̱jma̱ carta ndrígóo ra̱ʼkhá tháán nimbáñún (1 Tes. 4:1, 3-5, 11; 2 Tes. 3:11, 12).

7. Náá numuu dí gamíi makiʼnáa mbáa xa̱bu̱ índo̱ nuxnáá consejo rá.

⁷ Á mu dí naxkajxáánʼ muxná consejo na̱nguá nindxu̱u̱ mbá numuu májánʼ, gamíi magíʼnulú xó má eʼthí mbáa ndxájulú bi̱ kayá edxu̱u̱ bugi̱: “Kúwíi̱n tikhun bi̱ nakiʼníin índo̱ najuixnún consejo, raʼkháa ga̱jma̱a̱ numuu dí consejo nindxu̱u̱ ra̱májánʼ, nindxu̱u̱ ga̱jma̱a̱ numuu rí tséjuixná consejo ga̱jma̱a̱ ngajua”. Ndiéjunʼ eʼsngúlú rá. Rí itháán tséʼni mingíjyúuʼ mundrigú consejo á mu dí naxkajxáánʼ nindxu̱u̱ ngajua, raʼkháa ga̱jma̱a̱ numuu rí nakiʼnáánʼlú.

8. Ndiéjuunʼ eyóoʼ marajxi̱mínáʼ mbáa bi̱ kayá edxu̱u̱ nákha xóo tsexná consejo rá.

⁸ A̱ngiu̱lú bi̱ kuya̱ edxu̱u̱ ragíʼmaa maʼchu̱u̱n dí muxna mbá consejo. Nákha xóó tséxnáá  consejo mbáa, a̱ngiu̱lú bi̱ kuya̱ edxu̱u̱ gíʼmaa murajxi̱míjna̱: “Lá gajkhun ndayóoʼ mathu̱u̱n xáʼ. Lá nda̱yo̱o̱ gajkhun rí xtáa raʼni mbá dí ra̱májánʼ xáʼ. Xtáa ranújngorámuuʼ mbá dí na̱ʼkha̱ raʼthí náa Biblia o i̱ndó xtáa raʼni dí ikhúún xáni che̱ʼ”. Mbáa ndxájulú bi̱ najmañuu bi̱ kayá edxu̱u̱ “xáʼthi mbá nacha̱” (Prov. 29:20). Á mu gíʼdoo graxe̱, ma̱ngoo marajxu̱u̱ imba̱a̱ ndxájulú bi̱ kayá edxu̱u̱ ga̱jma̱a̱ numuu rúʼko̱, mu xúʼko̱ mbaʼyoo á mu xtáa ranújngorámuuʼ dí na̱ʼkha̱ raʼthí náa Biblia, mu ma̱ndoo maxnúu consejo (2 Tim. 3:16, 17).

9. Xóo gándoo gúyaridáá apóstol Pablo a̱ngiu̱lú á mu muxna consejo ga̱jma̱a̱ numuu xóo mugíʼ xtiin o muniratamijná xá. (1 Timoteo 2:9, 10.)

⁹ Guʼyáá mbá xkri̱da. Gundxaʼwamíjna̱ dí mbáa ndxájulú bi̱ kayá edxu̱u̱ naxmiéjuunʼ ga̱jma̱a̱ numuu xóo egíʼ xtíñuu ga̱jma̱a̱ xóo eʼnirataminaʼ mbáa ndxájulú. Ma̱ngoo marajximínáʼ: “Lá xtáa ranújngorámuuʼ dí na̱ʼkha̱ raʼthí náa Biblia mu mathu̱u̱n xáʼ”. Ga̱jma̱a̱ numuu rí tsíyoo maraʼwíí mbáwíí ikhaa dí maʼni ma̱ndoo marajxu̱u̱ imba̱a̱ ndxájulú bi̱ kayá edxu̱u̱ o mbáa ndxájulú bi̱ nambájxu̱u̱ májánʼ ga̱jma̱a̱ Dios, nájmi̱i̱n ma̱ndoo mbuyáʼ dí niʼthí Pablo ga̱jma̱a̱ numuu xóo mugíʼ xtiin ma̱ngaa xóo muni̱ tsiʼyamijná (atraxnuu 1 Timoteo 2:9, 10). * Pablo na̱nguá nixná mbá lista xú káʼnii gíʼmaa mu̱ʼni̱ ga̱jma̱a̱ rí na̱nguá. I̱ndó ikhaa nixná ikha dí xóo gíʼmaa muʼniratamijnálú, xóo rí masngájma gamajkhu ga̱jma̱a̱ dí makujmaa rí nundxa̱ʼwáá májánʼ edxu̱lú. Ikhaa ndiʼyoo dí cristianos ma̱ngoo muraʼwíí xú káʼnii gúgíʼ xtíñún ga̱jma̱a̱ xóo gúni̱ tsiʼyámijná dí xánujngorámuuʼ dí na̱ʼkha̱ raʼthí náa Biblia. Á mu a̱ngiu̱lú bi̱ kuya̱ edxu̱u̱ nuraʼwíí dí muxnáá consejo mbáa, gíʼmaa mbuyáá á mu xa̱bu̱ buʼko̱ nasngájma gamajkhuu ga̱jma̱a̱ rí nandxa̱ʼóo májánʼ edxu̱u̱.

10. Lá xúgíinʼ gúraʼwíí ikha̱á dí muni̱ ráʼ.

¹⁰ Gíʼdoo wéñuuʼ numuu marmáʼáan a̱jkiu̱lú dí a̱jmi̱i̱n a̱ngiu̱lú bi̱ kuya̱ edxu̱u̱ ma̱ndoo muraʼwíí mixtiʼkhu enii dí muni̱. Mú rúʼko̱ na̱nguá eyoo gáʼthí dí mbáa xtáa raʼni dí májánʼ ga̱jma̱a̱ i̱mba̱a̱ na̱nguá. Ikha jngóo, xátsuʼdiin muni̱ a̱ngiu̱lú dí ikháánʼ nakumulú dí nindxu̱u̱ májánʼ (Rom. 14:10).

11, 12. Á mu gajkhun ndayóoʼ maxná consejo mbáa bi̱ kayá edxu̱u̱, ndiéjuunʼ gíʼmaa marajximínáʼ ga̱jma̱a̱ náá numuu rá.

¹¹ Gajkhun nindxu̱u̱ rí ndayóoʼ muxnáá consejo mbáa, mú graxe̱ nindxu̱u̱, tsáá kaʼyoo maʼni rígi̱ rá. Mbá xkri̱da, nákha xóó tséjuixnáá consejo mbáa a̱ʼgu̱ bi̱ ninújunʼ má o mbáa bi̱ kaʼníí chíʼgíiʼ, bi̱ kayá edxu̱u̱ náa Guʼwá nagimbáanʼ gíʼmaa maʼthúu̱n bi̱ kayá edxu̱u̱ náa mbáa guʼwíin o xa̱bu̱ nikhi̱i̱. Mbáa maʼthí  dí ikhaa má gáxnúu consejo o ma̱ndoo maxtáa náa gájuixnúún consejo. * Á mu nindxu̱u̱ mbáa dxáʼgú, itháan májánʼ gáʼni dí mbáa ndxájulú a̱ʼgú nikhi̱i̱ maxnúu consejo, xó má nijuiʼthá náa  kutriga̱ 3.

¹² Rígá imbo̱o̱ graxe̱ rí gíʼdoo wéñuuʼ numuu muni̱ bi̱ kuya̱ edxu̱u̱: “Lá itháán májánʼ dí ikhúún gáxna̱ consejo o i̱mba̱a̱ che̱ʼ”. Mbá xkri̱da, mbáa xa̱bu̱ bi̱ naku̱mu̱u̱ dí na̱nguá gíʼdoo numuu, mbáa itháan májánʼ gáʼni dí maxnúu consejo mbáa ndxájulú bi̱ kayá edxu̱u̱ bi̱ ma̱ngaa nikumu̱u̱ xúʼko̱ nákhá ginii. Numuu rí ma̱ndoo masngájma dí xóo naku̱mu̱u̱ ikhaa. Gajkhun dí xúgíinʼ bi̱ kuya̱ edxu̱u̱ kajkuáa ñawúúnʼ dí muxnún tsiakii a̱ngiu̱lú mu xúʼko̱ muriʼkumijnáá ga̱jma̱a̱ makuwíin xó má e̱ʼkha̱ raʼthí náa Biblia. Á mu mbáa ndayóoʼ rí muxpriguíí, gíʼdoo numuu rí magruigú má consejo.

13, 14. Ndíjkha rí gíʼdoo wéñuuʼ numuu rí a̱ngiu̱lú bi̱ kuya̱ edxu̱u̱ muxnatiʼñamijná mudxawíín rá.

¹³ Atadxawíín. Índo̱ mbáa bi̱ kayá edxu̱u̱ xtáa raʼni rataminaʼ mu maxná consejo, gíʼmaa maraximínáʼ: “Lá gajkhun nda̱yo̱o̱ xóo kaʼnii xtáa ndxájulú rá. Lá nda̱yo̱o̱ ndiéjunʼ xkujndu xtáa raraʼnuu xáʼ. Xtáa raraʼnuu xkujndu dí ikhúún tséniʼnuuʼ xáʼ. Ndiéjuunʼ dí itháan ndayóoʼ ikhaa xúgi̱ xá”.

¹⁴ Ikha dí na̱ʼkha̱ náa Santiago 1:19 na̱jkha̱ inún xúgíinʼ bi̱ nuxna consejo, ikhí naʼthí: “Xúgiáanʼla gíʼmaa makuwáanʼ xawii mudxawíín, mú xútala mbá nacha̱ ga̱jma̱a̱ xákiʼnáanʼla mbá nacha̱”. Bi̱ kayá edxu̱u̱ náa Guʼwá nagimbáanʼ ragíʼmaa maku̱mu̱u̱ rí ndaʼyoo má xúgíʼ xóo kaʼnii xtáa mbáa ndxájulú bi̱ maxnúu consejo. Proverbios 18:13 naʼni marmáʼáan a̱jkiu̱lú rígi̱: “Rí matriʼña nákhá xóó tsétadxuun dí nirígá nindxu̱u̱ skágu̱nʼ ga̱jma̱a̱ ma̱jti̱ʼ”. Itháan májánʼ rí matrajxi̱i̱ xa̱bu̱ ga̱jma̱a̱ matadxawíín dí gáʼthí nákhá xóó tsératháán ikháán. Rúʼko̱ dí nijmañuu mbáa ndxájulú bi̱ kayá edxu̱u̱ bi̱ niʼthá náa nigi̱ʼdu̱u̱ artículo rígi̱. Ikhaa ni̱jkha̱nú ndiʼyoo dí nákhá xóó tségíʼdu̱u̱ maʼthúu̱n ndxájulú ga̱jma̱a̱ dí ikhaa niʼnirataminaʼ, itháan májánʼ niʼni á mu “nirajxu̱u̱ xú káʼnii xtáa”, “xú káʼnii ku̱mu̱u̱” ga̱jma̱a̱ “xú káʼnii gándoo gámbáyúu”. Á mu bi̱ kuya̱ edxu̱u̱ gajkhun naxmiéjúúnʼ mbuyáá xú káʼnii kúwíin a̱ngiu̱lú, rúʼko̱ dí itháan gámbañún ga̱jma̱a̱ maxnún tsiakii.

15. Xóo gándoo mugíʼ munimbáníí ikha rí na̱ʼkha̱ náa Proverbios 27:23 a̱ngiu̱lú bi̱ kuya̱ edxu̱u̱ rá.

¹⁵ Atatsinúnʼ májánʼ mugia̱a̱ʼ. Xó má ndiʼyáá, mu magajnúu májánʼ índo̱ nuxnáá consejo mbáa, raʼkháa i̱ndó ndayóoʼ muraxnuu nguáthá texto ga̱jma̱a̱ muʼtháán ndiéjunʼ rí ma̱ndoo maʼni. A̱ngiu̱lú nda̱ñúunʼ mbuyáá dí gajkhun naxmiéjunlú kuʼñúún, dí nakru̱ʼu̱lú kuʼñúún ga̱jma̱a̱ dí nandulú mumbáñún (atraxnuu Proverbios 27:23). * A̱ngiu̱lú bi̱ kuya̱ edxu̱u̱  gíʼmaa munitsiakimi̱jna̱ dí mambajxúu̱n gajmiún xúgíinʼ a̱ngiu̱lú.

16. Ndiéjunʼ dí gíʼmaa maguʼwún muni̱ bi̱ kuya̱ edxu̱u̱ mu xáʼniún mingíjyúuʼ muxna consejo rá.

¹⁶ A̱ngiu̱lú bi̱ kuya̱ edxu̱u̱ ragíʼmaa muni̱ dí maku̱mu̱ún a̱ngiu̱lú dí i̱ndó nandún mutamijná gajmiún índo̱ nuni̱ mbá dí ra̱májánʼ. Dí itháan májánʼ muni nindxu̱u̱ dí maguʼwún mutamijná gajmiún ikhiin ga̱jma̱a̱ maxmiéjúúnʼ gajkhun kuñúún índo̱ nuraʼníí mbá xkujndu. Mbáa ndxájulú bi̱ kayá edxu̱u̱ naʼthí, á mu natani̱ rígi̱ mambájxa̱a̱ʼ gajmiáanʼ xúgíinʼ a̱ngiu̱lú. Naʼthí xóó: “Índo̱ gáʼyóoʼ maraxna mbá consejo, xáʼni miʼskhoo wéñuuʼ”. Ga̱jma̱a̱ xúʼko̱ bi̱ gágruigú consejo xáʼniuu mingíjyúuʼ.

17. Nguáná dí itháan gíʼdoo numuu musngajma bi̱ kuya̱ edxu̱u̱ rí naʼngo̱o̱ a̱jkiu̱ún ga̱jma̱a̱ rí nandún kuñún a̱ngiu̱lú xá.

¹⁷ Atasngájma rí naʼngo̱o̱ a̱jkia̱a̱nʼ ga̱jma̱a̱ rí nandaaʼ xtayáá. Bi̱ kayá edxu̱u̱ ragíʼmaa makiʼnáa mbá nacha̱, gíʼmaa masngájma rí naʼngo̱o̱ a̱jkiu̱u̱n ga̱jma̱a̱ rí nandoo kaʼyoo ndxájulú. Itháan á mu bi̱ naʼdxawuun consejo na̱nguá eyoo gáʼnimbánuu o ndajyúuʼ mu magíʼ maʼni. Gíʼmaa mbuyaridáá xkri̱da ndrígóo Jesús dí najuiʼthá ga̱jma̱a̱ numuu náa Mateo 12:20, naʼthí: “Xáxpigawóo e̱ʼe̱n rí na̱jkha̱ rajmigaʼ ni má xándijyúuʼ ndélá rí na̱jkha̱ rajuíyuuʼ”. Ikha jngóo, bi̱ kayá edxu̱u̱ gíʼmaa ma̱ndo̱ʼo̱o̱ Jeobá mambáyúu xa̱bu̱ bi̱ najuixnáá consejo, mu xúʼko̱ mbaʼyoo náá numuu rí ndayóoʼ consejo rúʼko̱ ga̱jma̱a̱ magíʼ maʼnimbánuu. Mbaʼyóoʼ mbiʼi mu ikhaa mandxaʼwáminaʼ ga̱jma̱a̱ rí nijuiʼtháán, á mu bi̱ kayá edxu̱u̱ nasngájma rí naʼngo̱o̱ a̱jkiu̱u̱n ga̱jma̱a̱ rí nandoo kaʼyoo, xa̱bu̱ bi̱ magruigú consejo mbaʼyoo náá numuu rí nijuixnáá consejo, raʼkháa ga̱jma̱a̱ xkáʼnii nijuiʼtháán. Xúgíʼ consejo dí gajuixná gíʼmaa magajnúu náa Ajngá rawuunʼ Dios.

18. a) Ndiéjuunʼ gíʼmaa marmáʼáan a̱jkiu̱lú índo̱ guxná mbá consejo rá. b) Xó má ekujmaa náa xtiʼkhuu ga̱jma̱a̱ rí kúgumaʼá, ndiéjunʼ gíʼmaa mbuyáá xabuanii nákha xóó tséxnún consejo e̱jñún rá.

¹⁸ Gájmañaaʼ náa rí nikiéʼkháanʼ. Numuu dí xúgiáánʼ najngawáánʼlú, xáʼngo̱o̱ gúʼnimbáníí xó má kaʼyoo xúgíʼ rí na̱ʼkha̱ raʼthí náa artículo rígi̱ (Sant. 3:2). Índo̱ najngawáánʼlú gíʼmaa  majmañulú ga̱jma̱a̱ numuu rúʼko̱. Á mu a̱ngiu̱lú nduyáá rí nandulú kuʼñúún, xáʼñún gakhi̱i̱ muni̱ mba̱a̱ a̱jkiu̱ún kuyulú á mu nuʼthá rí naʼnigawúúnʼ. (Atayáá ma̱ngaa náa kúgumaʼá “ Mbá ajngáa rí gíʼdoo numuu dí na̱jkha̱ inún xabuanii”.)

19. Ndiéjuunʼ dí nijmañulú xóo muxná consejo rá.

¹⁹ Xó má ndiʼyáá, gakhi̱i̱ nindxu̱u̱ dí maraxna consejo dí mayambáá. Numuu dí xúgiáánʼ nindxu̱lú xa̱bu̱ aʼkhá, xó má bi̱ naxná consejo ga̱jma̱a̱ bi̱ nagruigú. Ikha jngóo gíʼmaa marmáʼáan’ a̱jkiu̱lú ikha rí ndi’yáá náa artículo rígi̱. Índo̱ guxnáá consejo mbáa gu̱ʼni̱ ga̱jma̱a̱ mbá numuu májánʼ. Ma̱ngaa guʼyáá á mu gajkhun ndayóoʼ muxnáá consejo ga̱jma̱a̱ tsáá phú kaʼyoo maxná consejo rúʼko̱. Guraximíjnalú ga̱jma̱a̱ guʼdxawíín dí gáʼthí xa̱bu̱ mu mbuʼyáá xóo káʼnii phú xtáa. Guʼni tsiakimijnalú makumulú xó má ikhaa. Gusngájma dí nandulú kuʼñúún a̱ngiu̱lú ga̱jma̱a̱ gambájxulú májánʼ gajmiúlú. Xámbumulú dí phú nandulú mu̱ʼni̱, dí muxnúún consejo dí mambáñún ga̱jma̱a̱ maʼni makuwíin gagi (Prov. 27:9).