ARTÍCULO RÍ MUʼNIGAJMAA 6
Natayáá gajkhun dí Jeobá naʼni xúgíʼ xóo gíʼmaa ráʼ.
“Ikhaa nindxu̱u̱ xóo mbá Tsíñu, xúgíʼ rí naʼni ra̱ʼkhá tháán májánʼ, numuu rí xúgíʼ kambo̱o̱ nindxu̱u̱ jmbu. Nindxu̱u̱ mbáa Dios bi̱ naʼnimbánuu rí naʼthí, bi̱ nditháan tséʼni dí raʼkhí. Ikhaa nindxu̱u̱ jmbii ga̱jma̱a̱ naʼni xóo phú gíʼmaa” (DEUT. 32:4).
AJMÚÚ 3 Ikháánʼ naraxnúʼ tsiakii, jma̱a̱ natani rí xamíñuʼ
RÍ MUʼNIGAJMAA *
1, 2. a) Náá numuu rí mbaʼin naʼniún mingíjyúuʼ makumu̱ún kuñún bi̱ guaʼdáá mbá ñajunʼ rá. b) Ndiéjunʼ guʼyáá náa artículo rígi̱ rá.
MBAʼIN bi̱ kúwá mbiʼi xúgi̱ naʼniún mingíjyúuʼ makumu̱ún kuñún bi̱ guaʼdáá mbá ñajunʼ. Nduyáá rí xa̱bu̱ ñajunʼ ga̱jma̱a̱ xtángoo dí rígá numbañún itháan xa̱bu̱ bi̱ guaʼdáá ñajunʼ mba̱ʼu̱ ga̱jma̱a̱ bi̱ guaʼdáá mbújkha̱a̱ mú na̱nguá embañún wéñuʼ xa̱bu̱ miginíin. Náa Biblia naʼthí kaʼwu: “Xa̱biya̱ naʼtáñajunʼ xa̱biya̱ mu maʼniuu dí raʼkhí” (Ecl. 8:9). Ma̱ngaa, tikhun dxajkun nuni dí raʼkhí. Rúʼko̱ naʼni dí tikhun xa̱bu̱ xákumu̱ún kuyáá Dios. Ikha jngóo, á mu nuʼsngáá mbáa ga̱jma̱a̱ numuu Biblia ndayóoʼ mumbayíí majmañuu maku̱mu̱u̱ kaʼyoo Jeobá ga̱jma̱a̱ bi̱ ikhaa nigruigi̱i̱n mbu̱ya̱ edxu̱u̱ náa xuajñuu.
2 Gajkhun má raʼkháa i̱ndó bi̱ nuʼsngúún ga̱jma̱a̱ numuu Biblia ndayóoʼ majmañún makumu̱ún kuyáá Jeobá ga̱jma̱a̱ bi̱ kuya̱ edxu̱u̱ náa xuajñuu. Maski ajndu ikháanʼ kuwáánʼ má mbayuuʼ tsiguʼ ru̱ʼni̱ ñajunʼ Jeobá nditháan tséyóo mambumulú dí xúgíʼ rí naʼni Jeobá nindxu̱u̱ itháan májánʼ. Mbáa nguáná narígá tikhu rí naʼni dí xákumulúʼ kuʼyáá wéñuʼ Jeobá. Náa artículo rígi̱ mbuʼyáá ajtsú náa migamíi maʼni rí xákumulúʼ kuʼyáá: 1) Índo̱ nuraxnuu tikhu dí naʼthí náa Biblia, 2) índo̱ nundrígú tikhu ikha dí nuthi bi̱ kuya̱ edxu̱u̱ náa xuajñuu Jeobá, ga̱jma̱a̱ 3) índo̱ gúraʼníí xkujndu nda̱wa̱á.
GAKUMAAʼ XTAYÁÁ JEOBÁ ÍNDO̱ NATRAXNUU BIBLIA
3. Xu káʼnii gáʼni dí tikhu dí na̱ʼkha̱ raʼthí náa Biblia migamíi maʼni rí xákumulúʼ kuʼyáá Jeobá rá.
3 Índo̱ nuraxnuu Ajngá rawuunʼ Dios, mbáa naʼni murajximíjna̱ ndíjkha rí Jeobá mixtiʼkhu xóo niʼniún xa̱bu̱ ga̱jma̱a̱ ndíjkha rí niraʼwíí maʼni mixtiʼkhu enii. Mbá xkri̱da, náa libro ndrígóo Números, na̱ʼkha̱ raʼthí dí Jeobá niʼthí makhañúu mbáa israelita numuu rí ni̱jkha̱ gágu ixi̱ mbiʼi dí ragíʼmaa muñajunʼ. Náa Raga̱jma̱ i̱yi̱i̱ʼ ndrígóo Samuel, na̱ʼkha̱ raʼthí dí mbayuuʼ tsiguʼ nda̱wa̱á, Jeobá niʼni mba̱a̱ a̱jkiu̱u̱n kaʼyoo rey David índo̱ niba̱ʼkhúun ga̱jma̱a̱ a̱ʼgiu̱u̱ i̱mba̱ xa̱bu̱ ga̱jma̱a̱ dí nixiyáa (Núm. 15:32, 35; 2 Sam. 12:9, 13). Mbáa naʼni muraximijnalú, ‹ndíjkha rí Jeobá niʼni mba̱a̱ a̱jkiu̱u̱n kaʼyoo David bi̱ nibaʼkhúun ga̱jma̱a̱ a̱ʼgiu̱u̱ imba̱a̱ xa̱bu̱ ga̱jma̱a̱ rí asndu nixiyáa, mú niʼthí rí makhañúu israelita ga̱jma̱a̱ numuu mbá dí na̱nguá má mbiiʼ wéñuʼ dí niʼni xá.› Mu muriʼña̱a̱ graxe̱ rígi̱, rígá ajtsú dí ndayóoʼ marmáʼáan a̱jkiu̱lú índo̱ nuraxnuu Biblia.
4. Xú káʼnii eʼni makumulúʼ kuʼyáá itháan Jeobá ga̱jma̱a̱ numuu rí xóo niraʼwíí maʼnii dí naʼthí náa Génesis 18:20, 21 ga̱jma̱a̱ Deuteronomio 10:17 rá.
4 Raʼkháa xúgíʼ historia dí naʼthí náa Biblia na̱ʼkha̱ kuduun. Mbá xkri̱da, nduʼyáá dí David gajkhun nitanga̱a̱ a̱jkiu̱u̱n dí niʼni (Sal. 51:2-4). Mú, xóo phú ninindxu̱u̱ israelita bi̱ ninújgorámuuʼ xtángoo ga̱jma̱a̱ numuu mbiʼi sábado rá. Lá nitanga̱a̱ a̱jkiu̱u̱n dí niʼni xá. Lá ninújngorámuuʼ má xtángoo ndrígóo Jeobá nákha ginii xáʼ. Lá tánimboo rí nijuiʼtháán má nákha ginii xáʼ. Náa Biblia na̱nguá eʼthí. Mú nandoo nduʼyáá gajkhun dí Jeobá “nditháan tséʼni dí ra̱májánʼ” (Deut. 32:4). Ikhaa naraʼwíí maʼni ga̱jma̱a̱ xúgíʼ rí ni̱jkha̱nú ndiʼyoo, raʼkháa i̱ndó dí nuthi̱ eʼwíinʼ o numuu rí tsíyoo má gáʼyoo o i̱mba̱ numuu rí nguáná xa̱bu̱ na̱jkha̱ kagui̱i̱n mbuyáá dí raʼkhí nindxu̱u̱ (atraxnuu Génesis 18:20, 21; * Deuteronomio 10:17). * Índo̱ najmañulúʼ itháan ga̱jma̱a̱ numuu Jeobá ga̱jma̱a̱ ikha ndrígóo, itháan má na̱jkuánu nduʼyáá dí naraʼwíí maʼni nindxu̱u̱ májánʼ. Nguáná maski ajndu mbá dí na̱ʼkha̱ raʼthí náa Biblia naʼni murajximíjna̱ mbá rí tséʼngulú gúriʼña̱a̱ mbiʼi xúgi̱, nduʼyáá má rí Dios ndrígúlú “Jeobá nindxu̱u̱ jmbii náa xúgíʼ kambo̱o̱” (Sal. 145:17).
5. Xú káʼnii eʼni dí xúraʼwíí muʼni dí májánʼ ga̱jma̱a̱ numuu dí ni̱ndxu̱lú xa̱bu̱ aʼkhá rá. (Atayáá ma̱ngaa náa kúgumaʼá “ Numuu rí ni̱ndxu̱lú xa̱bu̱ aʼkhá naʼni dí xuraʼwíí muʼni dí májánʼ”.)
5 Nguáná tseraʼwíí muʼni dí májánʼ numuu rí ni̱ndxu̱lú xa̱bu̱ aʼkhá. Dios niʼniwáánʼ xó má kaʼnii ikhaa, ikha jngóo nandulú dí xa̱bu̱ magumiin xó má kaʼyoo (Gén. 1:26). Mú ga̱jma̱a̱ numuu dí ni̱ndxu̱lú xa̱bu̱ aʼkhá, nguáná tséraʼwíí muʼthá dí májánʼ, maski ajndu nakumulú dí ndiʼyáá xúgíʼ. Mbá xkri̱da, garmáʼáan a̱jkia̱a̱nʼ xú káʼnii nikiʼnáa Jonás ga̱jma̱a̱ numuu dí xóo niraʼwíí Jeobá maʼni mba̱a̱ a̱jkiu̱u̱n kaʼñún bi̱ kúwá náa Nínive (Jon. 3:10–4:1). Mú atatsaʼwáminaʼ ndiéjunʼ nirígá numuu rí Jeobá niʼni mba̱a̱ a̱jkiu̱u̱n. ¡Nikáwíin itháan dí 120,000 xa̱bu̱ bi̱ nikúwá náa Nínive numuu rí nitanga̱a̱ a̱jkiu̱ún! Nda̱wa̱á nikujmaa rí Jonás ndiyóoʼ mariʼkhuu xóo nindxa̱ʼóo edxu̱u̱, raʼkháa Jeobá.
6. Lá ndayóoʼ maʼthúlú Jeobá náá numuu rí xúʼko̱ naraʼwíí mbá rí maʼni rá.
6 Na̱nguá má eyóoʼ maʼthúún xa̱bu̱ numbaaʼ Jeobá ndíjkha xúʼko̱ eraʼwíí mbá rí maʼni. Gajkhun má rí Jeobá niniñuuʼ dí xa̱bi̱i̱ muthi xóo ekumu̱ún ga̱jma̱a̱ numuu mbá rí Jeobá niraʼwíí maʼni o ndiʼkhún maʼni (Gén. 18:25; Jon. 4:2, 3). Nguáná niʼthúún ndiéjunʼ niraʼwíí maʼni (Jon. 4:10, 11). Mú Jeobá na̱nguá má eyóoʼ maʼthúlú ndíjkha niraʼwíí maʼni xúʼko̱ náa mbá rí niʼni. Numuu rí ikhaa Niʼniwáánʼ, na̱nguá má eyóoʼ muʼthán á mu májánʼ o ra̱májánʼ mbá rí ikhaa ndiʼkhún maʼni o rí niʼni má (Is. 40:13, 14; 55:9).
GAKUMULÚ KUʼYÁÁ JEOBÁ ÍNDO̱ NUNDRÍGULÚ IKHA
7. Ndiéjunʼ dí mbáa maʼniulú mingíjyúuʼ ikháanʼlu, ga̱jma̱a̱ ndíjkha rá.
7 Nduʼyáá ga̱jma̱a̱ xúgíʼ a̱jkiu̱lú dí xúgíʼ dí naʼni Jeobá nindxu̱u̱ májánʼ. Mú mbáa maʼniulú mingíjyúuʼ makumulúʼ kuñúún bi̱ kuya̱ edxu̱u̱ náa xuajñuu. Mbáa maʼni murajximíjna̱ á mu ikhiin nunimbánii xó má ikha dí naxná Jeobá o nuni xó má endxaʼwamíjna ikhiin. Mbáa xúʼko̱ nindxaʼwami̱jna̱ tikhun bi̱ na̱ʼkha̱ raʼthí náa Biblia. Gagutangáanʼ mbuʼyáá mbu̱júu̱ʼ xkri̱da ndrígu̱ún bi̱ niʼthá náa kutriga̱ 3. Bi̱ kaʼyoo xa̱biya̱ bi̱ ninújngorámuuʼ xtángoo ga̱jma̱a̱ numuu mbiʼi sábado mbáa niraximínaʼ á mu Moisés gajkhun niraxu̱u̱ Jeobá nákha xóó tsejuiʼthá dí makhañúu xa̱bu̱ buʼko̱. Ma̱ngaa bi̱ nimbájxu̱u̱ ga̱jma̱a̱ Urías bi̱ nindxu̱u̱ hitita, bi̱ a̱ʼgiu̱u̱ nibaʼkhúun ga̱jma̱a̱ David, mbáa nindxaʼwámi̱na̱ʼ dí David nijmuu ñajunʼ dí nindxu̱u̱ rey mu maʼnikriaminaʼ dí xákhañuu. Jeobá naku̱mu̱u̱ kaʼñún bi̱ ikhaa nigruigi̱i̱n mbu̱ya̱ edxu̱u̱ náa xuajñuu ga̱jma̱a̱ náa congregación. Ikha jngó á mu tsékumulúʼ kuʼñúún xa̱bekha bugi̱, xándoo muʼthá dí nakumulú kuʼyáá Jeobá.
8. Xú káʼnii mbríguii dí naʼthí náa Hechos 16:4, 5 ga̱jma̱a̱ xóo awan erígá náa congregación rí mbiʼi xúgi̱.
8 Rí mbiʼi xúgi̱ Jeobá najmiuu “ñumbáá jmbii bi̱ májánʼ endxa̱ʼwáminaʼ” mu maxná ikha náa xuajñuu dí rígá náa tsu̱du̱u̱ ku̱ba̱ʼ (Mat. 24:45). Xó má Cuerpo Gobernante bi̱ nikúwá nákha siglo timbá, ñumbáá bugi̱ nañewu̱u̱n xuajñuu Dios di rígá náa xúgíʼ tsu̱du̱u̱ ku̱ba̱ʼ ga̱jma̱a̱ naxnún ikha bi̱ kuya̱ edxu̱u̱ náa congregación (atraxnuu Hechos 16:4, 5). * Bi̱ kuya̱ edxu̱u̱ nuni rí maguma mbánii ikha rúʼko̱ náa congregación. Nusngajmá dí nakumulú rí májánʼ xóo eʼni Jeobá á mu nuʼnimbánii ikha dí nakhánulú náa xuajñuu ga̱jma̱a̱ dí nuthi a̱ngiu̱lú bi̱ kuya̱ edxu̱u̱.
9. Nguáná naʼni mingíjyúuʼ muñambáá dí xóo nuraʼwíí muni bi̱ kuya̱ edxu̱u̱, ga̱jma̱a̱ náá numuu rá.
9 Nguáná naʼni mingíjyúuʼ muñambáá dí xóo nuraʼwíí muni bi̱ kuya̱ edxu̱u̱. Mbá xkri̱da, náa iwáá tsiguʼ nixtiʼkhuu mbaʼa congregación ga̱jma̱a̱ circuito. Nirígá tikhu náa a̱ngiu̱lú bi̱ kuya̱ edxu̱u̱ ndiyóoʼ muthúún publicadores rí magún gúyambáá náa i̱mba̱ congregación mu xúʼko̱ majmaa májánʼ xúgíʼ xílí dí rígá náa Salón. Á mu nutulúʼ rí mu̱ʼgua̱ náa i̱mba̱ congregación, mbáa maʼniulú mingíjyúuʼ muniʼñún bi̱ nambáxulúʼ gajmiúlú ga̱jma̱a̱ bi̱ kuʼñúún. Lá Dios naʼthúún mbájmbu bi̱ kuya̱ edxu̱u̱ náá gúxungui̱i̱n magún mámbáa publicador rá. Na̱nguá. Mbáa ga̱jma̱a̱ numuu rúʼko̱ maʼniulú mingíjyúuʼ muʼnimbánii ikha rí nuxnulú. Mú Jeobá naku̱mu̱u̱ kaʼñún a̱ngiu̱lú bi̱ kuya̱ edxu̱u̱ rí muraʼwíí májánʼ rí muni ga̱jma̱a̱ ikháanʼlu ndayóoʼ makumulúʼ kuʼñúún ikhiin. *
10. Xó má naʼthí Hebreos 13:17, ndíjkha rí gíʼmaa mumbáñuun bi̱ kuya̱ edxu̱u̱ rá.
10 Ndíjkha rí gíʼmaa muñambáá náa dí nuraʼwíi muni bi̱ kuya̱ edxu̱u̱ maski ajndu na̱nguá enigulúʼ dí niraʼwíí muni xá. Numuu rí índo̱ nuʼni xúʼko̱ nuyambáá dí makuwáánʼ mbá kambáxulú náa xuajñuu Dios (Efes. 4:2, 3). Narígá dí májánʼ náa congregación índo̱ xúgínʼ nunimbánii dí naraʼwíí maʼni bi̱ kayá edxu̱u̱ (atraxnuu Hebreos 13:17). * Mú rí itháan gíʼdoo numuu nindxu̱u̱ rí xúʼko̱ nusngajmáá Jeobá dí nakumulú kuʼyáá índo̱ numbañún bi̱ ikhaa nigruigi̱i̱n muñewunlú (Hech. 20:28).
11. Ndiéjunʼ gándoo gambáyulú muʼnimbánii ikha dí nuxna bi̱ kuya̱ edxu̱u̱ rá.
11 Ma̱ndoo mambáyulú muʼnimbánii ikha dí nuxna bi̱ kuya̱ edxu̱u̱ á mu narmáʼáan a̱jkiu̱lú dí ikhiin nutajkháan mu munda̱ʼa̱a̱ xi̱ kaʼwu Jeobá índo̱ rígá dí muraʼwíí muni ga̱jma̱a̱ numuu congregación. Ma̱ngaa ikhiin nuraxnuu ikha dí na̱ʼkha̱ náa Biblia ga̱jma̱a̱ nuraxnuu ikha dí naxná xuajñuu Jeobá. Rí phú nandún ikhiin nindxu̱u̱ dí muni rí nandoo Jeobá ga̱jma̱a̱ nuni xó má eʼngo̱o̱ mbá rí itháan mambáyúu xuajñuu. Xa̱bekha bugi̱ naguánu nduyáá rí muxnaxi̱i̱ cuenta náa inuu Dios ga̱jma̱a̱ rí xóo eñawu̱u̱n bi̱ kúwá náa xuajñuu (1 Ped. 5:2, 3). Atatsaʼwáminaʼ rígi̱: Numbaaʼ dí kuwáánʼ náa kúwá mixtiʼkhu raza, náa rígá mixtiʼkhu religión ga̱jma̱a̱ mixtiʼkuiin xa̱bu̱ ñajunʼ, mú náa xuajñuu Jeobá kuwáánʼ mbá kambáxulú ruʼyamajkuíí mbáwíi Dios bi̱ gajkuwiin. ¡I̱ndó nandoo narígá rígi̱ numuu rí Jeobá nambáyúu xuajñuu!
12. Ndiéjunʼ gáʼyóoʼ mbuyáá tsumáá wéñuʼ bi̱ kuya̱ edxu̱u̱ índo̱ gúyáá á mu mbáa xa̱bu̱ natanga̱a̱ a̱jkiu̱u̱n rá.
12 Jeobá nixnúún ñajunʼ bi̱ kuya̱ edxu̱u̱ rí muni marigá má xúʼko̱ mikaʼwu náa congregación. Á mu mbáa cristiano nakudaminaʼ aʼkhá, Jeobá nandu̱ʼu̱u̱n bi̱ kuya̱ edxu̱u̱ mbuyáá á mu xa̱bu̱ ma̱ndoo xóó maxtáa náa congregación. Tikhu rí gíʼmaa mbuyáá nindxu̱u̱ á mu xa̱bu̱ buʼko̱ gajkhun natanga̱a̱ a̱jkiu̱u̱n dí niʼni. Mbáa ma̱ndoo maʼthí dí gajkhun natanga̱a̱ a̱jkiu̱u̱n, mú lá gajkhun naguiyu̱u̱ʼ kaʼyoo dí niʼni xá. Lá naʼthí dí gajkhun xátanga̱a̱ maʼni aʼkhá dí niʼni xá. Á mu mbá rí niʼni makudaminaʼ aʼkhá nindxu̱u̱ ga̱jma̱a̱ numuu bi̱ nambáxu̱u̱ gajmíi̱n, lá ma̱ndoo maniñuuʼ rambájxu̱u̱ gajmíi̱n xa̱bu̱ buʼko̱ xá. Bi̱ kuya̱ edxu̱u̱ nutakáñii Jeobá, nduyáá xóo phú nirígá ga̱jma̱a̱ ndiéjunʼ eʼthí náa Biblia, ma̱ngaa nduyáá xóo eku̱mu̱u̱ bi̱ nikudaminaʼ aʼkhá ga̱jma̱a̱ numuu rí niʼni. Nda̱wa̱á nuraʼwíí mbuyáá á mu bi̱ niʼni dí raʼkhí maxtáá xóó náa congregación o maguma̱a̱ expulsar (1 Cor. 5:11-13).
13. Ndiéjunʼ eʼni maxmiéjunlú á mu bi̱ nambáxulúʼ gajmiúlú o mbáa bi̱ kuʼyáá na̱jkha̱ expulsado rá.
13 Nguáná migamíi maʼni rí xákumulú kuʼñúún bi̱ kuya̱ edxu̱u̱ rá. Mbáa xáʼniulu mingíjyúuʼ mudrigú índo̱ bi̱ kuya̱ edxu̱u̱ nuthi rí maʼga̱ expulsado mbáa bi̱ na̱nguá kuʼyáá o na̱nguá embáxulú gajmiúlú. Mú mbáa mixtiʼkhu xóo gákumulúʼ á mu nagumaa expulsar mbáa bi̱ nambáxulúʼ májánʼ gajmiúlú. Mbáa maxmiéjunlú muʼthá á mu bi̱ kuya̱ edxu̱u̱ gajkhun ndiyáá xúgíʼ xóo nirígá, o maʼni murajximíjna̱ á mu nini xó má Jeobá gáʼni. Ndiéjunʼ gambáyulú mundxaʼwáá májánʼ edxu̱lúʼ dí xóo niraʼwíí muni xá.
14. Ndiéjunʼ gambáyuluʼ á mu bi̱ kuya̱ edxu̱u̱ nuthi dí mbáa bi̱ kuʼyáá o bi̱ nambáxulúʼ gajmiúlú gíʼmaa maʼga̱ expulsado rá.
14 Gíʼmaa marmáʼáan a̱jkiu̱lú rí índo̱ mbáa nagumaa expulsar nindxu̱u̱ mbáa awan dí Jeobá má niríyaʼ ga̱jma̱a̱ nayambáá náa congregación ma̱ngaa nambáyúu má bi̱ niʼni dí raʼkhí. Á mu mbáa bi̱ tsiriʼkuminaʼ naxtáa má xúʼko̱ náa congregación migamíi maʼni rí eʼwíinʼ ma̱ngaa muxudamijná aʼkhá (Gál. 5:9). Ma̱ngaa mbáa asndu maku̱mu̱u̱ dí na̱nguá má mbiiʼ wéñuʼ dí niʼni, ma̱ngaa rí tséyóo má mariʼkhuu xóo endxa̱ʼwáminaʼ ga̱jma̱a̱ dí xóo naʼni mu Jeobá ma̱ndoo kaʼyoo mbu̱júu̱ʼ (Ecl. 8:11). Nandoo nduʼyáá gajkhun dí índo̱ bi̱ kuya̱ edxu̱u̱ nuraʼwíí maʼga̱ expulsado mbáa, nugíʼ nunimbánii ñajunʼ ndrígu̱ún. Naguánu nduyáá dí xóo má nini jueces náa Israel nákha wájyúuʼ, ikhiin mangiin nduyáá “rí xóo nuraʼwíí muni na̱jkha̱ náa Jeobá raʼkháa náa mbáa xa̱bu̱” (2 Crón. 19:6, 7).
DÍ MAKUMULÚʼ KUʼYÁÁ JEOBÁ XÚGI̱ NAʼNIRATHÁANʼ MAKUWÁÁNʼ XAWII NDA̱WA̱Á
Ndiéjunʼ gambáyulú munimbulú ikha dí gakhánulúʼ índo̱ gáʼni majphú mba̱a̱ gaʼkhu rá. (Atayáá kutriga̱ 15).
15. Ndíjkha rí itháan ndayóoʼ makumulúʼ kuʼyáá ikha ndrígóo Jeobá rí mbiʼi xúgi̱ rá.
15 Índo̱ na̱jkha̱ ratumuu mbiʼi rí mambáa dí raʼkhí, itháan ndayóoʼ makumulúʼ kuʼyáá ikha dí naxná Jeobá. Numuu rí índo̱ gáʼni majphú mba̱a̱ gaʼkhu, mbáa mundrígúlú tikhu ikha rí maʼniuluʼ mingíjyúuʼ makru̱ʼu̱lú o muʼnimbánii. Gajkhun má Jeobá xáʼthúlú mbájmbu. Mbáa majmiuu xa̱bi̱i̱ bi̱ kuya̱ edxu̱u̱ muxnulu ikha. Ikhú na̱nguá eyóoʼ muʼni a̱jma̱ a̱jkiu̱lú muʼnimbánii ikha dí gúxnulú o murajximíjna̱ ‹lá ikha rígi̱ na̱ʼkha̱ náa Jeobá o i̱ndó nindxu̱u̱ xóo nundxaʼwamíjná a̱ngiu̱lú bi̱ kuya̱ edxu̱u̱ dxe̱ʼ.› Lá makumaaʼ xtayáá Jeobá ga̱jma̱a̱ xuajñuu mbiʼi rúʼko̱ dí giʼdoo wéñuʼ numuu ráʼ. Rí xóo natatsaʼwáminaʼ ga̱jma̱a̱ numuu ikha dí naxná xuajñuu Jeobá mbiʼi xúgi̱ mambáyaʼ ma̱ta̱ya̱a̱ xóo gátriʼña̱a̱ graxe̱ rúʼko̱. Á mu natayáá dí májánʼ nindxu̱u̱ ikha dí nundrígúlú xúgi̱ ga̱jma̱a̱ mbá nacha̱ enimbaaʼ, mbáa xúʼko̱ má gátani índo̱ gáʼni majphú mba̱a̱ gaʼkhu ma̱ngaa (Luc. 16:10).
16. Ndiéjunʼ gamíi maʼni rí mbáa xákumulúʼ kuʼyáá Jeobá ga̱jma̱a̱ numuu dí garaʼwíí maʼni nda̱wa̱á rá.
16 Ma̱ngaa ndayóoʼ mundxaʼwamíjná tsumáá xóo gákumulúʼ rí xóo garaʼwíí maʼni nda̱wa̱á Jeobá índo̱ inu mambáa dí raʼkhí náa tsu̱du̱u̱ ku̱ba̱ʼ. Rí mbiʼi xúgi̱ naguaʼthíinʼlu dí mbaʼin bi̱ na̱nguá eni̱ ñajuunʼ Jeobá, asndu bi̱ kuʼñúún bi̱ na̱nguá xóó ni̱ndxu̱ún Testigos, maguánu muni ñajuunʼ nákhá xóó tséguma gámbáa dí raʼkhí. Mú índo̱ gáʼni Armagedón, Jeobá majmiuu Jesús maraʼwíí ndiéjunʼ phú gáʼni nda̱wa̱á (Mat. 25:31-33; 2 Tes. 1:7-9). Rakáʼyulú ikháanʼ muʼthá tsáa gáʼni kríyaaʼ Jeobá ga̱jma̱a̱ tsáa na̱nguá (Mat. 25:34, 41, 46). Lá muniʼñááʼ ru̱ʼni̱ ñajunʼ Jeobá numuu rí xánigulú xóo garaʼwíí maʼni xáʼ. Nakujmaa kaʼwu dí xúgi̱ eyóoʼ makumulúʼ kuʼyáá itháan Jeobá mu makumulúʼ kuʼyáá káxi̱ nda̱wa̱á.
17. Ndiéjunʼ gambáyulú ga̱jma̱a̱ numuu dí xóo garaʼwíí maʼni Jeobá nda̱wa̱á dí gájngoo xúgíʼ dí raʼkhí rá.
17 Atatsaʼwáminaʼ xóo gákumulúʼ náa numbaaʼ nuxi̱ʼ índo̱ guʼyáá rí xóo niʼni Jeobá. Ni xárígá religión rí mindu̱wa̱ʼ, ni xárígá empresa o xa̱bu̱ ñajunʼ bi̱ nini gíníi xa̱bu̱ mbayuuʼ tsiguʼ. Ni xándoo kháñulú, xáni waniáánʼ ni má nimbáa xákhañuu. Gixa̱a̱ gajmíi̱n xa̱bu̱ wéñiʼ xándoo muniu̱u̱ nimbá dí raʼkhí xa̱bu̱ numbaaʼ mbá míi tsiguʼ. Xúgíʼ dí raʼkhí dí nirígá ga̱jma̱a̱ numuu dí túnimbu̱ún ni xárígá (Apoc. 20:2, 3). ¡Muxnáalu wéñuuʼ núma̱aʼ Jeobá numuu rí nikumulú kuʼyáá dí xúgíʼ dí niraʼwíí maʼni nindxu̱u̱ májánʼ!
18. Xó má naʼthí náa Números 11:4-6 ga̱jma̱a̱ 21:5, ndiéjunʼ ikha ejmañuluʼ rí xóo niguáʼníí bi̱ israelitas rá.
18 Rí xóo makuwáánʼ náa numbaaʼ nuxi̱ʼ, lá migamíi muraʼníí tikhu xkujndu dí mbáa maʼni dí xákumulúʼ kuʼyáá Jeobá ga̱jma̱a̱ numuu dí xóo garaʼwíí maʼni rá. Mbá xkri̱da, garmáʼáan a̱jkiu̱lú dí nirígá nda̱wa̱á dí israelitas niguma káwíin náa Egipto. Tikhun nixieʼkhá numuu rí ndiyáaʼ ganitsu dí ni̱ʼphu̱ ikhí ga̱jma̱a̱ nánguá ninigu̱u̱nʼ ganitsu dí Jeobá nixná (atraxnuu Números 11:4-6; * 21:5). * Lá migamíi mundxaʼwamíjná xúʼko̱ nda̱wa̱á dí gájngoo majphú mba̱a̱ gaʼkhu ráʼ. Na̱nguá eʼyáá nguáthá mba̱a̱ ñajunʼ eyóoʼ muʼni mu muʼni kaʼwii ku̱ba̱ʼ ga̱jma̱a̱ maʼni dí mañu mañúú maʼni̱i̱ ku̱ba̱ʼ mitsaanʼ. Mbáa marigá wéñuʼ ñajunʼ ga̱jma̱a̱ mbáa maʼni mingíjyúuʼ ginii. Lá muxieʼkhá ga̱jma̱a̱ dí gáxnulú Jeobá mbiʼi rúʼko̱ ráʼ. Á mu nandulú kuʼyáá dí Jeobá naxnúlú mbiʼi xúgi̱, xúʼko̱ má gúʼni ma̱ngaa nda̱wa̱á.
19. Arathá dí nigájnuriyoʼ náa artículo rígi̱.
19 Gíʼmaa mbuʼyáá gajkhun dí xúgíʼ dí xóo naraʼwíí maʼni Jeobá nindxu̱u̱ májánʼ. Ma̱ngaa ndayóoʼ makumulúʼ kuʼñúún bi̱ Jeobá nigruigi̱i̱n mbu̱ya̱ edxu̱u̱ náa xuajñuu. Nditháan xámbumaaʼ ajngáa dí Jeobá niʼthúu̱n gaʼyee Isaías maʼthí: “Maguaʼdáá tsiakii á mu naguaʼthi̱i̱n ga̱jma̱a̱ nakumalaʼ kuyoʼ” (Is. 30:15).
AJMÚÚ 98 Rí kiʼniraʼmáʼ náa Biblia nindxu̱u̱ Ajngóo Dios
^ párr. 5 Náa artículo rígi̱ mbuʼyáá ndíjkha gíʼdoo numuu rí makumulúʼ kuʼyáá itháan Jeobá ga̱jma̱a̱ bi̱ ikhaa nigruigi̱i̱n mbu̱ya̱ edxu̱u̱ náa xuajñuu. Ma̱ngaa mbuʼyáá xú káʼnii embáyulú xúgi̱ ga̱jma̱a̱ xú kaʼnii eʼniratáanʼ rígi̱ mu makuwáánʼ xawii nda̱wa̱á.
^ párr. 4 Génesis 18:20, 21: “Ikha jngóo Jeobá niʼthí: ‹Rí nundxa̱ʼwa̱ ga̱jma̱a̱ numuu dí raʼkhí narígá náa Sodoma ga̱jma̱a̱ Gomorra nindxu̱u̱ gakhii wéñuʼ, ma̱ngaa aʼkhá dí nuni nindxu̱u̱ mbiiʼ wéñuuʼ. Magájtáa mba̱yo̱o̱ á mu gajkhun nindxu̱u̱ rí xóo nidxawun ga̱jma̱a̱ á mu gajkhun nindxu̱u̱ rí nuni dí raʼkhí wéñuuʼ. Ikhú má gáyóo á mu ragájkhun nindxu̱u̱›”.
^ párr. 4 Deuteronomio 10:17: “Numuu rí Jeobá nindxu̱u̱ Dios, ikhaa nindxu̱u̱ Dios ndrígu̱ún dioses ga̱jma̱a̱ Tátá ndrígu̱ún tátá, ikhaa nindxu̱u̱ mbáa Dios bi̱ mba̱a̱, bi̱ gíʼdoo tsiakii ga̱jma̱a̱ tsembríguii ga̱jma̱a̱ nimbáa, bi̱ na̱nguá eraʼwíin xa̱bu̱ mambáxu̱u̱ gajmíi̱n ni má na̱nguá nindxu̱u̱ xóo mbáa juez bi̱ nagruigú regalo mu maʼni rí nandoo mbáa”.
^ párr. 8 Hechos 16:4, 5: “Índo̱ kúwá ragún náa mámbá xuajen, nithúún a̱ngiu̱xu awan dí niriya̱ʼ apóstoles ga̱jma̱a̱ bi̱ kuya̱ edxu̱u̱ bi̱ kúwá náa Jerusalén mu rí munimbánii. Rígi̱ niʼni rí a̱ngiu̱xu bi̱ nagimbíi̱n maʼni itháán gújkhúʼ fe ndrígu̱ún, ga̱jma̱a̱ ni̱jkha̱ raʼni itháán mbaʼin mámbá mbiʼi”.
^ párr. 9 Nguáná rígá mbá rí gíʼdoo wéñuʼ numuu rí ndayóoʼ tsiakii rí mbáa ndxájulú o mbá guʼwíin maguanún náa congregación rí kúwá má. Atayáá ma̱ngaa Nuestro Ministerio del Reino, noviembre tsiguʼ 2002, “Sección de preguntas”.
^ párr. 10 Hebreos 13:17: “Gunimbala ku̱ñu̱u̱n ga̱jma̱a̱ gunimbaníí rí nuthi bi̱ nuxna ikhala, numuu rí ikhiin kúwá ruñewanla ga̱jma̱a̱ mixtandiʼíín cuenta ga̱jma̱a̱ numuu rúʼko̱, mu xúʼko̱ ikhiin muni̱ ga̱jma̱a̱ gagi ma̱ngaa rí xájmáan a̱jkiu̱ún numuu dí rúʼko̱ maʼni gínáanʼla ikháanʼ”.
^ párr. 18 Números 11:4-6: “Ga̱jma̱a̱ xa̱bu̱ bi̱ naguwáʼ i̱mba̱ ni̱ʼkha̱ bi̱ kúwá náa majñúnʼ ikhiin nixieʼkhá. Mangiin bi̱ israelita nimbiyaʼ mbu̱júu̱ʼ ga̱jma̱a̱ nithi: ‹Tsáa gáxnulú xuwiʼ mu̱ʼphu̱ rá. ¡Ra̱ʼkhá tháán nduʼyáalú egi̱ bi̱ tseʼni numún bi̱ niʼphún náa Egipto, pepino, sandía, mágá mbi̱jua̱, mágá ga̱jma̱a̱ áxu!. Rí xúgi̱ na̱jkha̱ rámbá tsiakiuxu. I̱ndó rí ndu̱ya̱a̱xu nindxu̱u̱ maná rígi̱›”.
^ párr. 18 Números 21:5: “Xa̱bu̱ xuajen nixieʼkhá má xúʼko̱ náa Dios ga̱jma̱a̱ náa Moisés. Nithi: ‹Náá numuu nitrawáanʼxu náa Egipto, mu makhañúxu náa mbaaʼ mijxooʼ rígi̱ ráʼ. Ndaa ganitsu ni ma nda̱a̱ iyaʼ, ga̱jma̱a̱ niguiyuxu má eʼni pan xkawiʼ rígi̱›”.
