NÁKHA mbiʼi rí nikúwá israelitas dxámá bi̱ nacho̱o̱ manigúnʼ na̱jkha̱ kagu̱u̱ tsingijñaʼ náa goʼwóo anu̱u̱ dxáʼgú bi̱ mbayáa. Dí nagún kudúún nindxu̱u̱ dí gíʼdoo numuu, xujkhúʼ o mbújkha̱a̱. Ma̱ngaa ma̱ndoo mañajunʼ, xó má niʼni Jacob índo̱ nacho̱o̱ mbayáa Raquel. Ikhaa nimbánuu ga̱jma̱a̱ jmégiu̱u̱ dí mañajunʼ juwan tsiguʼ mu mbayáa Raquel (Gén. 29:17, 18, 20). Náá numuu dí asndu rí mbiʼi xúgi̱ kaʼnííʼ nagún kudúún tsingijñaʼ mu mudii wa̱ʼxa̱ʼ xá.

Carol Meyers bi̱ naʼnigajmaa jma̱a̱ numuu dí na̱ʼkha̱ raʼthí náa Biblia, naʼthí: “Rí nagún kudúún nindxu̱u̱ ga̱jma̱a̱ numuu rí ndxáʼgú maniñuuʼ rañajunʼ náa goʼwóo. Rígi̱ gíʼdoo wéñuuʼ numuu náa bi̱ nuñajunʼ xanáá o bi̱ nuni xtagiyáʼ”. Ma̱ngaa dí nagún kudún nayambáá mu mambájxu̱u̱n májánʼ nájmiin familia. Índo̱ narígá mbiʼi gakhii nájmiin familia numbayúmíjná. Ma̱ngaa dí nagún kudún nasngájma rí dxáʼgú mbayáa xa̱bu̱ ga̱jma̱a̱ dí xa̱bu̱ nikhi̱i̱ nánguá kajkuáa ñawúunʼ dí mañewu̱u̱n wáxioo, rí xúgi̱ kaʼyoo dxámá bi̱ mbayáa.

Dí nagún kudúún tsingijñaʼ, na̱nguá eyoo gáʼthúu̱n dí dxáʼgú najuiʼtsi̱i̱ o ma̱ndoo maxtangujua̱a̱ xó má eni̱ ga̱jma̱a̱ rí kuáʼdáá xa̱bu̱. libro Instituciones del Antiguo Testamento naʼthí: “Mbújkha̱a̱ o i̱ʼwáʼ rí gíʼdoo numuu dí nuxna ga̱jma̱a̱ numuu mbáa dxáʼgú, nakujmaa rí asndu xóo najuiʼtsi̱i̱ mu mbayáa dxámá. Rí phú gajkhun nindxu̱u̱ dí mbújkha̱a̱ rúʼko̱ na̱nguá juiʼtsi̱i̱ ga̱jma̱a̱ dxáʼgú, i̱ndó nindxu̱u̱ mu dxámá masngájma gamajkhu náa familia ndrígóo dxáʼgú”. *

Rí mbiʼi xúgi̱ káʼníí rígá tikhuu xuajen náa nuxna tsingijñaʼ ga̱jma̱a̱ numuu mbáa dxáʼgú. Á mu xabuanii bi̱ kúwá náa xuajen rúʼko̱ nindxu̱ún a̱ngiu̱lú ga̱jma̱a̱ tsénda̱ʼa̱ má wéñuuʼ dí makánún, xa̱bu̱ maguánú mbuyáá dí nindxu̱ún ‹xa̱bu̱ bi̱ nakru̱ʼu̱u̱n› (Filip. 4:5; 1 Cor. 10:32, 33). Á mu nuni xúʼko̱ musngajma dí na̱nguá ‹endún kuyáá wéñuuʼ mbújkha̱a̱› (2 Tim. 3:2). Á mu xabuanii na̱nguá má e̱nda̱ʼa̱ itháan xó má kaʼyoo, dxámá xáʼyóoʼ má magiʼthu̱u̱n wéñuuʼ asndu makánúu mbújkha̱a̱ xó má e̱nda̱ʼa̱ anu̱u̱ dxáʼgú. Itháán á mu dxámá nindxu̱u̱ precursor, xáʼyóoʼ asndu maniñuuʼ raʼni ñajuunʼ Jeobá mu mbayáʼ mbújkha̱a̱.

Náa tikhuu xuajen rígá xtángoo náa naʼthí nguáthá mba̱a̱ gúxna ga̱jma̱a̱ numuu mbáa dxáʼgú. A̱ngiu̱lú bi̱ kúwá náa xuajen rúʼko̱ munimbaníí xtángoo rúʼko̱. Nuni numuu dí Dios gíʼthu̱u̱n dí xúgíinʼ xa̱bi̱i̱ ‹munimbu̱ún dí nuthi Xa̱bu̱ ñajunʼ› ga̱jma̱a̱ munimbaníí xtángoo á mu tsenújngorámuuʼ dí naʼthí náa Biblia (Rom. 13:1; Hech. 5:29).