1. Ndíjkha jngóo dí naraxnáa númaaʼ ikháán numuu dí nikhánaaʼ Biblia rá.

 ¡RA̱ʼKHÁ tháán exnáa númaaʼ Jeobá numuu dí nixnúlú Biblia! Numuu dí ikhí naxnúlú consejo dí ma̱ndoo mambáyulú mbuʼyáá ndiéjuunʼ gúʼni índo̱ naguaʼdáá xkujndu. Ma̱ngaa ikhí naʼthúlú dí wíji̱ makhánulúʼ nda̱wa̱á. Mú, dí itháán gíʼdoo numuu dí na̱ʼkha̱ ikhí nindxu̱u̱ rí ma̱ndoo muniʼníiʼ Jeobá. Dí mundxa̱ʼwa̱míjna̱ xúgííʼ mitsaanʼ cualidad dí ikhaa gíʼdoo, naʼni dí maʼndulú kuyáá, muʼgua kanuu náa ikhaa ga̱jma̱a̱ mambajxúlú gajmiúlú (Sal. 25:14).

2. Ndiéjuunʼ nijmuu Jeobá mu maʼthúlú numuu ikhaa rá.

² Jeobá nandoo dí xa̱bu̱ muniʼniiʼ. Nákha wajyúuʼ, nijmuu xnuʼndaa, visión asndu ángeles mu muthulú numuu ikhaa (Núm. 12:6; Hech. 10:3, 4). Á mu xúgííʼ rígi̱ tájuiʼniraʼmáʼ xándoo gúʼnigajma̱a̱. Ikhaa rúʼko̱ numuu jngóo dí Jeobá nikuʼmiin tikhuun xa̱bu̱ muniraʼmáʼ ‹mbá libro› dí ikhaa nindoo dí mbuʼyáálú (Jer. 30:2). Numuu dí kambo̱o̱ Dios bi̱ gajkuwin naxnúlú májánʼ ikha, ikhaa jngóo ma̱ndoo mbuʼyáálú gajkhun dí na̱ʼkha̱ ikhí ma̱ndoo mambáyúlú (Sal. 18:30).

3. Ndiéjuunʼ eʼsngúlú numuu Jeobá dí Biblia rígá asndu mbiʼi xúgi̱ rá. (Isaías 40:8.)

 ³ (Atraxnuu Isaías 40:8). b Ajngá rawuunʼ Dios nimbáñún xa̱bi̱i̱ asndu nákhi niʼníí. Numuu dí Biblia nijuiʼniraʼmáʼ náa dí tséjyúuʼ egudiriga̱a̱, ikhaa jngóo xúgi̱ na̱nguá kuaʼdáá i̱yi̱ʼ náa dí phú nigumaraʼmáʼ. Jeobá niʼni dí majuiʼtáriyaʼ i̱yi̱ʼ dí gíʼdoo numuu rígi̱. Maski ajndu xa̱bu̱ aʼkhá nindxu̱ún bi̱ nitariyaʼ mú tsumáá kayuuʼ nini̱. Mbáa xa̱bu̱ bi̱ najmañuu numuu Biblia niʼthí ga̱jma̱a̱ numuu Escrituras Hebreas: ‹Ndaa nimbá i̱yi̱ʼ dí nirígá nákha wajyúuʼ dí nijuiʼniraʼmáʼ bajmbu xóo i̱yi̱ʼ rígi̱›. Maski ajndu niniraʼmáʼ xa̱bu̱ aʼkhá ga̱jma̱a̱ náa dí tséjyúu egudiriga̱a̱ mu xúgííʼ dí nuraxnuu ikhí naʼthí xóo endxa̱ʼwáminaʼ Jeobá.

4. Ndiéjunʼ guʼnigajmaa náa artículo rígi̱ rá.

⁴ Xúgííʼ dí na̱ʼkha̱ náa Dios “nindxu̱u̱ májánʼ ga̱jma̱a̱ nindxu̱u̱ kájxi̱” (Sant. 1:17). Biblia nindxu̱u̱ mbóoʼ dí gíʼdoo wéñuuʼ numuu dí nikhánúlú. Dí naxnúlú mbáa naʼni muniʼníiʼ ga̱jma̱a̱ naʼni mbuʼyáá á mu gajkhun naniniáánʼlú ga̱jma̱a̱ ndaʼyoo dí ndayúlú. Ikhaa ma kayuuʼ Biblia ma̱ngaa. Índo̱ nuniʼga̱jma̱a̱ najmañulú numuu Jeobá. Na̱jkua̱núlú nduʼyáá dí naniniáanʼ májánʼ ma̱ngaa ndaʼyoo dí ndayúlú. Náa artículo rígi̱ majmañulúʼ ajtsú cualidad ndrígóo Jeobá dí nasngájmulú náa Biblia, ku̱ma̱, tséraʼwíin xa̱bu̱ ga̱jma̱a̱ nandoo kaʼyulú. Gugíʼdi̱i̱ guʼyáá dí timbá.

5. Ndiéjuunʼ esngájma dí Biblia dí gíʼdoo ku̱ma̱ ndrígóo Dios rá.

⁵ Jeobá nixnúlú Biblia numuu dí ikhaa ndaʼyoo dí ndayúlú consejo ndrígóo, Biblia gíʼdoo ku̱ma̱ ndrígóo ikhaa ga̱jma̱a̱ naʼngo̱o̱ nariʼkhuíín xa̱bu̱. Índo̱ Moisés niʼnirámáʼ Biblia niʼthúún israelita: ‹Ajngá rígi̱ na̱nguá nigumaraʼmáʼ xuʼkhuíínʼ, nigumaraʼmáʼ mu maʼni dí makuwáanʼla› (Deut. 32:47). Bi̱ gunimbu̱ún dí na̱ʼkha̱ náa Biblia makuwíin gagi ga̱jma̱a̱ makuwíin májánʼ (Sal. 1:2, 3). Maski ajndu Biblia niʼníí tsiguʼ nigumaraʼmáʼ mu kaʼníí naʼngo̱o̱ nariʼkuíín xa̱bu̱. Mbá xkri̱da, náa jw.org na̱ʼkha̱ mbóoʼ ináa dí mbiʼyuu “Biblia niriʼkhu̱u̱ rí xóo makuwá”, ikhí mataxkamaa mbaʼa historia ndrígún xa̱bu̱ bi̱ niʼngu̱u̱n niriʼkumijnáa numuu dí nigíʼ ninimbaníí consejo ndrígóo Biblia (1 Tes. 2:13).

6. Náá numuu nuʼthá dí nda̱a̱ imbo̱o̱ʼ libro xóo Biblia rá.

⁶ Numuu dí Jeobá nindxu̱u̱ bi̱ ajngóo, bi̱ gíʼdoo xúgííʼ tsiaki̱i̱, ga̱jma̱a̱ xtáa kámuu ma̱ngaa gíʼdoo wéñuuʼ ku̱ma̱, ikhaa jngóo nda̱a̱ imbo̱o̱ʼ libro xóo Biblia. Maski ajndu xa̱bu̱ nuraxnuu i̱ʼwáʼ libro dí niniraʼmáʼ xa̱bu̱ bi̱ ndáwiin ma xúgi̱, consejo dí na̱ʼkha̱ ikhí na̱nguá embañún. Mixtiʼkhu kayuuʼ nindxu̱u̱ Biblia numuu dí consejo dí na̱ʼkha̱ nambáñúún má xúʼko̱ xa̱bu̱ bi̱ ni̱ʼkha̱ rakúwíin. Índo̱ nuraxnuu libro rígi̱ ga̱jma̱a̱ nundxaʼwamíjná dí na̱ʼkha̱ ikhí, bi̱ ajngóo najmuu espíritu santo ndrígóo mu mambáyulú muʼgíʼ muʼni dí najmañulú (Sal. 119:27; Mal. 3:16; Heb. 4:12). Numáá atatsaʼwáminaʼ rígi̱, Jeobá nandoo mambáyulú. Lá tsékajxi̱i̱n rígi̱ mu maguʼwaanʼ matraxnuu má xúʼko̱ Biblia ráʼ.

7. Xú káʼnii nimbáñún Biblia xa̱bi̱i̱ Dios bi̱ nikúwá nákha wajyúuʼ mu makuwá mbá jnduʼ rá.

⁷ Nambáyulú makuwáanʼ mbá jnduʼ, rígi̱ nindxu̱u̱ imbo̱o̱ʼ dí nasngájmulú dí Biblia na̱ʼkha̱ ku̱ma̱ ndrígóo Dios. Índo̱ israelitas nitu̱ʼu̱u̱n náa Ku̱ba̱ʼ dí nijuiʼthá makánún, nikúwíin mixtiʼkhu xuajen, tikhuun nirawíin e̱gi̱ʼ, eʼwíinʼ niguaʼdiin xujkhúʼ ga̱jma̱a̱ eʼwíinʼ nidu. Rúʼko̱ gamíi maʼni dí israelitas mambumún kuyamijná, mú tárígá xúʼko̱. Numuu dí Jeobá niʼni dí tsejtsí magimbíin mu mudxawíín ajngóo ga̱jma̱a̱  makru̱ʼu̱u̱n dí naʼthí ikhí (Deut. 31:10-13; Neh. 8:2, 8, 18). Gundxaʼwámíjná xú káʼni nikumu̱u̱ mbáa israelita índo̱ na̱jkha̱nú náa Jerusalén ga̱jma̱a̱ ndaʼñún mbaʼin wéñuuʼ israelitas bi̱ niguwáʼ imbríʼkhá xuajen mu mbuyamajkuíí Jeobá, rígi̱ niʼni makuwíin mbá jnduʼ, xúʼko̱ ma kayuuʼ nirígá nákha siglo timbá, maski ajndu mbaʼin xa̱bekha ga̱jma̱a̱ gu̱ʼu̱ bi̱ nikúwíin niguaʼdáá numún ga̱jma̱a̱ mixtiʼkhu ajngáa ethi, mú nikúwíin mbá kambájxu̱u̱n numuu dí nindúún kuyáá Ajngá rawuunʼ Dios. Tikhuin bi̱ niʼkhúún nitu̱ʼu̱u̱n náa congregación nikru̱ʼu̱u̱n dí naʼthí náa Biblia numuu dí eʼwíinʼ cristianos nithúún ga̱jma̱a̱ nimbañúún ma̱ngaa nikúwíin mbá jnduʼ gajmiún (Hech. 2:42; 8:30, 31).   

8. Xú káʼnii ejmuu Biblia Jeobá mu maʼni rí makuwíin mbá kambájxu̱u̱n xa̱bi̱i̱ mbiʼi xúgi̱ rá.

⁸ Jeobá najmuu ma xúʼko̱ xóó Biblia mbiʼi xúgi̱ mu maʼsngúún xa̱bi̱i̱ ga̱jma̱a̱ makuwíin mbá jnduʼ. Ikhí nagájnuu xúgííʼ ganitsu dí nundrigú. Najkhualu má xúʼko̱ reunión ga̱jma̱a̱ asamblea, ikhí nuraxnuu Biblia ga̱jma̱a̱ najmañulú itháán dí naʼthí. Nandoo nduʼyáá gajkhun dí Jeobá najmuu Biblia mu maʼnimbánuu rí nandoo mu xúʼko̱ xa̱bi̱i̱ muni̱ “ñajuunʼ mbá kambájxu̱u̱n’” (Sof. 3:9).

9. Xkáʼnii cualidad ndayúlú makru̱ʼu̱lú dí naʼthí náa Biblia rá. (Lucas 10:21.)

⁹ Mbuʼyáá imbo̱o̱ʼ náa nasngájma dí ku̱ma̱ ndrígóo Jeobá na̱ʼkha̱ náa Biblia. Ikhaa niniñuuʼ dí tikhu dí magumaraʼmáʼ náa Biblia  i̱ndó makru̱ʼu̱u̱n xa̱bu̱ wabiinʼ (atraxnuu Lucas 10:21). Biblia nindxu̱u̱ mbóoʼ libro dí nuraxnuu xa̱bu̱ bi̱ kúwíin náa xúgííʼ numbaaʼ, mbáa xa̱bu̱ bi̱ najmañuu Biblia niʼthí dí libro rígi̱ ‹nuraxnuu itháán ga̱jma̱a̱ naniguunʼ›, xóo muʼthá ndu̱ya̱ʼ makru̱ʼu̱u̱n itháán dí naʼthí. Mú i̱ndó xa̱bu̱ wabiinʼ nandoo nakru̱ʼu̱u̱n ga̱jma̱a̱ nugíʼ nunimbaníí dí naʼthí (2 Cor. 3:15, 16).

10. Xkáʼnii imbo̱o̱ʼ eʼyáá dí Biblia na̱ʼkha̱ ku̱ma̱ ndrígóo Jeobá rá.

¹⁰ Guʼyáá imbo̱o̱ʼ dí nasngájmulú dí Biblia na̱ʼkha̱ ku̱ma̱ ndrígóo Jeobá. Raʼkháa i̱ndó najmuu Biblia mu maʼsngulúʼ náa kuwáánʼ mbaʼáánʼ ma̱ngaa najmuu mu maʼsngulúʼ ga̱jma̱a̱ maʼni̱i̱ a̱jkiu̱u̱n mámbá dí ikháánʼlú. Índo̱ nuraxnuu Ajngá rawuunʼ na̱jkua̱nú nduʼyáálú dí ikhaa xtáa xawii mambáyúu mámbáa dí ikháanʼ (Is. 30:21). Lá niraxnuu mbóoʼ texto dí nimbáyaaʼ índo̱ niraʼdáá xkujndu ráʼ. Mbáa mbaʼa nuthu nigíʼnaaʼ xúʼko̱. Maski ajndu Biblia nigumaraʼmáʼ mu mambáñún mbaʼin wéñuuʼ xa̱bu̱, mú ma̱ngaa ma̱ndoo mambáyúlú náa dí ndayóoʼ mámbáa dí ikháanʼ. Nandoo narígá rígi̱ numuu dí bi̱ niʼthí magumaraʼmáʼ Biblia ra̱ʼkhá tháán ejmañuu (2 Tim. 3:16, 17).

11. Xú káʼnii nisngájma Jeobá dí tséraʼwíin xa̱bu̱ índo̱ nigumaraʼmáʼ Biblia rá.

¹¹ Dí maʼni rí májánʼ nindxu̱u̱ imbo̱o̱ʼ cualidad dí nagájnuriyo̱o̱ʼ dí gíʼdoo Jeobá (Deut. 32:4). Cualidad nambríguii ga̱jma̱a̱ bi̱ tséraʼwíin xa̱bu̱, ikhaa jngóo Jeobá tséraʼwíin xa̱bu̱ (Hech. 10:34, 35; Rom. 2:11). Rígi̱ nisngajmá índo̱ niraʼwíí ajngáa dí magumaraʼmáʼ náa Biblia. Niraʼwíí dí magumaraʼmáʼ ajngáa hebreo mbá 39 libro ndrígóo Biblia numuu dí ajngáa rúʼko̱ nikru̱ʼu̱u̱n xa̱bi̱i̱ nákha ikhú. Mú índo̱ nigíʼdi̱i̱ nikúwíin timbíin cristianos, xa̱bu̱ nithi griego, ikhaa jngóo rí mbá 27 libro ndrígóo Biblia nigumaraʼmáʼ náa ajngáa rúʼko̱. Xígi̱ nisngájma Jeobá dí tséraʼwíin xa̱bu̱ numuu dí táraʼwíí káaʼ mbóó ajngáa mu magumaraʼmáʼ ajngóo. Rí xúgi̱ itháán maʼni 8 mil millón xa̱bu̱ bi̱ kúwíin náa xúgííʼ tsu̱du̱u̱ ku̱ba̱ʼ nuthi mixtiʼkhu ajngáa. Mú xúgíinʼ ikhiin ma̱ndoo muniʼniiʼ Jeobá. Xú káʼnii endoo rígá rúʼko̱ rá.

12. Xú kaʼnii nimbánuu Daniel 12:4 náa iwáá mbiʼi rá.

¹² Jeobá niʼthúu̱n profeta Daniel dí índo̱ gáʼni iwáá mbiʼi ‹ku̱ma̱ rí gajkhun mbajo̱o̱ wéñuuʼ›, xóo muʼthá mbaʼin xa̱bu̱ maguánú makru̱ʼu̱u̱n dí naʼthí náa Biblia (atraxnuu Daniel 12:4). c Mbá dí niʼni rí xúgíinʼ xa̱bu̱ makru̱ʼu̱u̱n, nindxu̱u̱ numuu dí nijuiʼtájuíi, nigájnuu ga̱jma̱a̱ najuixnáraʼa mbaʼa wéñuuʼ Biblia ga̱jma̱a̱ i̱yi̱ʼ dí nigájnuu ikhí. Biblia nindxu̱u̱ mbóoʼ libro dí itháán najuiʼtájuíi ga̱jma̱a̱ najuixnáraʼa. Mú Biblia dí rígá mbaʼin xa̱bu̱ nugujua̱ minumuu wéñuuʼ. Mú xuajñuu Jeobá na̱nguá gujua ga̱jma̱a̱ naʼtájuíi itháán dí 240 ajngáa. Xúgííʼ rígi̱ naʼni dí mbaʼin xa̱bu̱ mudxawíín “ajngáa rí májánʼ ga̱jma̱a̱ numuu Xa̱bu̱ Ñajunʼ ndrígóo Dios” (Mat. 24:14). Jeobá nindxu̱u̱ mbáa Dios májáanʼ ga̱jma̱a̱ ikhaa nandoo dí mbaʼin xa̱bu̱ muniʼniiʼ náa ajngóo. Xúgííʼ rígi̱ naʼni numuu dí nandoo kaʼyulú.

13. Náá numuu eʼyáá dí Biblia nasngájma dí Dios nandoo kaʼyulú rá. (Juan 21:25.)

¹³ Náa Biblia nasngájmulú mbóoʼ cualidad dí itháán gíʼdoo Jeobá, ikhaa nindxu̱u̱ ngajua (1 Juan 4:8). Mbá xkri̱da gundxaʼwámíjná  dí ikhaa niniñuuʼ magumaraʼmáʼ náa Biblia ga̱jma̱a̱ xkáʼnii dí na̱nguá. Ikhaa niʼthúlú ndiéjuunʼ dí phú ndayúlú muʼni mu xúʼko̱ ma̱ndoo mambajxúlú gajmiúlú, ma̱ndoo makuwáanʼlu tsímáá ga̱jma̱a̱ ma̱ndoo makuwáanʼlu kámuu mbiʼi. Mú numuu dí Jeobá ra̱ʼkhá tháán nandoo kaʼyulú, ikhaa jngóo tániñuuʼ magumaraʼmáʼ mbá xúgííʼ dí xambáyulu (atraxnuu Juan 21:25).

14. Xkáʼnii imbo̱o̱ʼ esngájmulú Biblia dí Dios nandoo kaʼyulú rá.

¹⁴ Jeobá ma̱ngaa nasngájmulú dí nandoo kaʼyulú índo̱ naʼtámíjná ga̱jma̱á nindxu̱lú ga̱jma̱a̱ gamajkhu. Ikhaa na̱nguá exnúlú mbóoʼ lista náa Biblia náa naʼthúlú xúgííʼ dí gíʼmaa muʼni. Dí phú naʼni nindxu̱u̱ dí niniñuuʼ magumaraʼmáʼ historia dí gajkhun nirígá ga̱jma̱a̱ profecías ma̱ngaa consejo dí ma̱ndoo mambáyulú muraʼwíí májánʼ dí muʼni. Xígi̱ kaʼnii exkajxáánʼ Biblia muʼnimbulú ga̱jma̱a̱ maʼndulú kuʼyáá ga̱jma̱a̱ xúgííʼ a̱jkiu̱lú Dios.

15. a) Xkáʼnii esngájmulú náa Biblia dí Jeobá naxmiéjuunʼ kaʼyulú rá. b) Tsíín xa̱bíi̱ bi̱ naguwáʼ náa Biblia endxaʼwamínáʼ mbáa ndxáʼgú, ndxájulú dxámá ga̱jma̱a̱ mbáa ndxájulú nikhi̱i̱ bi̱ na̱ʼkha̱ náa xtiʼkhuu rá. (Gén. 39:1, 10-12; 2 Rey. 5:1-3; Luc. 2:25-38.)

¹⁵ Náa Biblia nasngájmulú dí Jeobá ra̱ʼkhá tháán naxmiéjuunʼ xóo kumulú. Nduʼyáálú rígi̱ numuu dí náa Ajngá rawuunʼ na̱ʼkha̱ xú káʼnii nithi̱ xa̱bu̱ bi̱ nikumu̱ún xóo má ikháánʼlú (Sant. 5:17). Índo̱ nduʼyáá xkáʼnii niʼni Jeobá gajmíi̱n xa̱bu̱, na̱jkua̱nú nakru̱ʼu̱lú itháán kaʼwu dí “Jeobá májánʼ wéñuuʼ a̱jkiu̱u̱n ga̱jma̱a̱ nagáwíinʼ a̱jkiu̱u̱n” (Sant. 5:11).

16. Ndiéjuunʼ eʼsngúlú ga̱jma̱a̱ numuu Jeobá dí nikiéʼkúún xa̱bu̱ bi̱ na̱ʼkha̱ raʼthí náa Biblia rá. (Isaías 55:7.)

¹⁶ Náa Biblia nuxkamaa imbo̱o̱ʼ xú káʼnii Jeobá nasngájmulú dí nandoo kaʼyulú. Ikhí  naʼthúlú dí Dios xániñulú á mu rígá mbóoʼ náa nakiéʼkulu. Israelitas nikiéʼkhúún má xúʼko̱ náa Jeobá, mú ikhaa niʼni mba̱a̱ a̱jkiu̱u̱n kaʼñúún índo̱ nisngajma dí gajkhun nitanga̱a̱ a̱jkiu̱ún (atraxnuu Isaías 55:7). d Cristianos bi̱ nikúwíin nákha siglo timbá ma̱ngaa ndiyáá xú kaʼnii Jeobá ra̱ʼkhá tháán nindoo kaʼñún. Mbá xkri̱da, ikhaa niʼni dí apóstol Pablo maʼthúún dí muni̱ mba̱a̱ a̱jkiu̱ún ga̱jma̱a̱ muni̱ maʼnii a̱jkiu̱u̱n mbáa xa̱bu̱ bi̱ gajkhun natanga̱a̱ a̱jkiu̱u̱n ga̱jma̱a̱ aʼkhá mbiiʼ dí niʼni (2 Cor. 2:6, 7; 1 Cor. 5:1-5). Naʼni̱i̱ a̱jkiu̱lú mbuʼyáá dí Jeobá nindoo kaʼñún má xúʼko̱ xa̱bi̱i̱ bi̱ nikiéʼkúún, nimbáñun ma̱ngaa naxprígún ga̱jma̱a̱ niʼthúún dí matangi̱ín náa ikhaa. Ikhaa naʼthúlú dí xúʼko̱ má gáʼni xúgi̱ ma̱ngaa (Sant. 4:8-10).

17. Ndíjkha dí gíʼdoo wéñuuʼ numuu Biblia rá.

¹⁷ Jeobá nixnúlú mbóoʼ dí gíʼdoo wéñuuʼ numuu, ndíjkha rá. Numuu dí Biblia nindxu̱u̱ mbóoʼ libro náa naʼsngúlú rí Dios nindxu̱u̱ májáanʼ, najmañuu wéñuuʼ ga̱jma̱a̱ nandoo kaʼyulú. Náa libro rígi̱ ma̱ngaa nasngájma dí Jeobá nandoo dí muniʼníiʼ ga̱jma̱a̱ dí mambájxulú gajmiúlú.

18. Xkáʼnii gándoo gusngajmá dí nuxnáa núma̱aʼ numuu dí nikhánulú Biblia rá.

¹⁸ Ajngá rawuunʼ Dios nindxu̱u̱ mbóoʼ ‹regalo dí gíʼdoo wéñuuʼ numuu› dí nikhánulú (Sant. 1:17). Nuxnáalú núma̱aʼ Jeobá índo̱ nuraxnulú Biblia ga̱jma̱a̱ nundxa̱ʼwa̱míjna̱ dí na̱ʼkha̱ raʼthí ikhí. Jeobá bi̱ niʼthí dí magumaraʼmáʼ Biblia maʼni tsajkurámuuʼ tsiaki̱i̱ dí guʼni ga̱jma̱a̱ makru̱ʼu̱lú “ku̱ma̱ ndrígóo Dios” (Prov. 2:5).