Ninduʼwajmáa. Numuu dí taku̱mu̱ʼ dí ikhaa nákhi ginii ni̱jkha̱ náa mbóoʼ religión. Ikhú nirajxu̱u̱, “xkáʼnii tayáá ikháán dí eʼthí náa Biblia rá.” Ikhú nándáa dí niʼthúnʼ. Mú, nda̱wa̱á nigíʼdu̱u̱ niʼthí dí ru̱dúu̱ ninindxu̱u̱ testigo de Jeobá, ikhaa jngóo niʼsngóo tikhu dí eʼthí náa Biblia. Nindoʼ mbayo̱o̱ itháán ikhaa jngóo ni̱thu̱u̱n dí maʼthunʼ xóó.

Nitamíjnáxu kañiiʼ mbruʼun. Migiuʼ niʼthúnʼ dí náa Biblia naʼthí dí Gixa̱a̱ nindxu̱u̱ bi̱ naʼtáñajunʼ náa numbaaʼ (Juan 14:30). Mbáa ikháán niʼníí má tayáá rígi̱, mú ikhúún rígi̱ nindxu̱u̱ timbá miʼtsú dí nadxawuun ga̱jma̱a̱ nindoʼ majmañuʼ xóó itháán. Ikhúún nidxawuun dí mbáa Dios májáanʼ nindxu̱u̱ bi̱ naʼtáñajunʼ náa numbaaʼ. Mú tsékujmaa dí gajkhun nindxu̱u̱ rúʼko̱ ga̱jma̱a̱ numuu xúgííʼ dí nda̱yo̱o̱ narígá. Ndi̱yo̱o̱ mbaʼa dí asndu tséniñuʼ migú maski ajndu gúʼdoʼ káaʼ 26 tsiguʼ.

Anu̱ʼ ninindxu̱u̱ bi̱ nijkha kayóo avión náa nagún soldado bi̱ kúwá náa Estados Unidos. Asndu nákhi chíʼgiúúnʼ ni̱jkhánú ndi̱yo̱o̱ dí gajkhun nindxu̱u̱ dí marígá mbóoʼ guerra dí mambáa xúgííʼ numbaaʼ. Numuu dí nákhi ikhú soldado nikúwíin má xawii i̱ndó ndiyóoʼ muxujmbi̱i̱ mbóoʼ iduu ajua̱nʼ. Na̱nguá nixtáá tsímáá índo̱ ni̱jkhá náa universidad dí rígá náa California ga̱jma̱a̱ numuu guerra dí nirígá náa Vietnam. Mangúún ni̱jkhá náa plantúun dí nini ejín escuela, policía nigún ruxkujxu̱ ga̱jma̱a̱ ixi̱, nigájnu ragayúxu numuu dí nikájxu̱xu̱ ga̱jma̱a̱ na̱nguá ekruíguxu náa mu̱ʼguáxu eʼni guniu̱u̱n gas lacrimógeno. Ra̱ʼkhá tháán gakhi̱i̱ niʼni nákha ikhú. Niradíin bi̱ kuya̱ edxu̱u̱ náa política ga̱jma̱a̱ xa̱bu̱ nurnguximíjna̱ nagún plantúun. Ra̱ʼkhá tháán mbaʼa enii xóo endxaʼwamíjna̱ muni xa̱bu̱ ga̱jma̱a̱ ikhúún na̱nguá eyoo ndiéjuunʼ garaʼwíí mani.

Nákha 1970 ni̱jkhá gáñajunʼ náa xuajen dí rígá náa xígií norte ndrígóo Alaska, ikhí nidaaʼ wéñuuʼ mbújkha̱a̱. Nda̱wa̱á ni̱jkhá náa Londres (Inglaterra), ikhí nitsi mbá moto ga̱jma̱a̱ ni̱jkhá náa xígií sur dí asndu tséyóo náa maʼgánú. Mbayuuʼ igu̱nʼ nda̱wa̱á nijkhánú náa África. Náa ni̱jkhá  nixkami̱i̱n mbaʼin xa̱bu̱ bi̱ xó má ikhúún nandún magajnún magún eʼni xkujndu náa kúwíin ga̱jma̱a̱ makuwíin xó má eñún ikhiin.

Xúgííʼ dí ndi̱yo̱o̱ ga̱jma̱a̱ dí nidxawuun niʼni maku̱mu̱ʼ dí gajkhun nindxu̱u̱ dí eʼthí náa Biblia rí náa numbaaʼ xtáa raʼtáñajunʼ mbáa bi̱ ra̱májáanʼ kayuuʼ. Mú, nindoʼ mba̱yo̱o̱ ndíjkha rí Dios nda̱a̱ nimbá rí eʼni.

Mbayuuʼ igu̱nʼ nda̱wa̱á nixtiʼña̱a̱ graxe̱ ndrígóʼ. Nda̱wa̱á ni̱jkhánú niniʼniúnʼ ga̱jma̱a̱ nindoʼ ka̱ñu̱u̱n mbaʼin xa̱bu̱ numuu dí ikhiin nini̱ má xúʼko̱ ñajuunʼ Dios bi̱ gajkuwin maski ajndu mixtiʼkhu enii dí niraʼníí.

Índo̱ nitangu̱ún náa Londres, nitaróʼoo ru̱dúu̱ bi̱ nimbájxuʼ gajmuʼ, ikhaa nixnúʼ mbóoʼ Biblia. Nda̱wa̱á ni̱jkhá náa Ámsterdam (Países Bajos). Mbóoʼ mbiʼi, gúnʼ raguxnuu Biblia náa wíji̱ mbóoʼ lámpara náa kamba̱a̱. Ikhí ninújngoo mbáa testigo, ikhaa niʼthí dí maʼsngó’ itháán dí na̱ʼkha̱ raʼthí ikhí. Índo̱ ni̱jkhá náa Dublín (Irlanda), ni̱jkhá náa sucursal ndrígún testigo de Jeobá. Ni̱du̱u̱ xkrugua, ikhú niniʼníiʼ ndxájulú Arthur Matthews, ikhaa gíʼdoo wéñuuʼ experiencia. Ni̱thu̱u̱n dí nandoʼ manigajmaa Biblia, ikhú ikhaa nigíʼdu̱u̱ niʼsngóʼ.

Niniguʼ wéñuuʼ dí nijmañuʼ, niguxnuu má xúʼko̱ libro ga̱jma̱a̱ i̱ʼwáʼ i̱yi̱ʼ dí nirawíi Testigo. Ga̱jma̱a̱ tséniʼñúunʼ raguxnuu Biblia. Niʼniuʼ tsiánguá dí ndi̱yo̱o̱ náa reunión dí asndu e̱ji̱n najmiin eriʼña̱a̱ graxe̱ dí xa̱bu̱ niʼníí má tsiguʼ eyaʼ mbuyáá xkáʼnii gáxti̱ʼña̱a̱ graxe̱ xóo rígi̱, xóo ndíjkha dí rígá wéñuuʼ dí raʼkhí, tsáá nindxu̱u̱ Dios, ga̱jma̱a̱ lá najkua gákuwáanʼ imbríʼká nda̱wa̱á dí nakháñulú ráʼ. Xúgíinʼ bi̱ nambájxuʼ gajmíʼ nindxu̱ún Testigo, taʼñuʼ miʼskhaa maxkamiin, numuu dí i̱ndó ikhiin eniʼniúunʼ náa país rúʼko̱. Ikhiin nimbayúʼ maʼndoʼ ka̱yo̱o̱ Jeobá ga̱jma̱a̱ nini̱ dí maʼndoʼ mani ñajuunʼ.

Nijngúnʼ iyááʼ nákha tsiguʼ 1972. Mbá tsiguʼ nda̱wa̱á ninindxu̱ʼ precursor ga̱jma̱a̱ ni̱jkhá gaxtáa náa mbá congregación chíʼgíiʼ dí gíʼ náa Newry (Irlanda del Norte). Ni̱ni̱ númuu mbóoʼ guʼwá dí niguma ga̱jma̱a̱ itsí dí rígá náa kúbá mu maxtáa. Mijngii ikhí, kúwíin xede̱ ikhaa jngóo na̱jkhá náa inún ikhiin mu mañu̱u̱ ensayar discursiuʼ. Índo̱ ikhiin nunu̱u̱n dí ni̱ʼphu̱ naku̱mu̱ʼ dí nanigu̱u̱nʼ dí natha. Gajkhun má dí ikhiin na̱nguá ethu̱nʼ nimbá, mú nimbayúʼ mba̱yo̱o̱ xkáʼnii gátha índo̱ gaguajún náa inún mbaʼin. Nákha 1974 ni̱thu̱nʼ mani̱ndxu̱ʼ precursor especial, Nigel Pitt ni̱jkha̱ compañeriuʼ, bi̱ asndu dí mbiʼi xúgi̱ kaʼníí embájxuʼ wéñuuʼ gajmuʼ.

 Nákha ikhú, ra̱ʼkhá tháán nigi̱ʼdu̱u̱n xa̱bu̱ náa Irlanda del Norte. Tikhuun xa̱bu̱ nixná mbiʼí xuajen rúʼko̱ xóo “mbaaʼ náa nu̱da̱ʼ bomba ga̱jma̱a̱ nurmidá ajua̱nʼ”. Ikhí ma̱ta̱ya̱a̱ dí nagiʼdu̱u̱n má xúʼko̱ xa̱bu̱ náa kamba̱a̱, nurmidá ajua̱nʼ asndu náá ga̱jma̱a̱ nakha̱a̱ carro. Xúgííʼ xkujndu rígi̱ nuni̱ marigá xa̱bu̱ bi̱ nagún náa i̱ʼwáʼ religión ga̱jma̱a̱ político. Mú ikhiin nduyáá dí Testigo tséxudami̱jna̱ náa política, ikhaa jngóo nindoo nitaráʼaxu. Tikhun xa̱bu̱ nuthuxu náa mbiʼi dí xáʼyóoʼ muʼguáxu náa mbóoʼ xuajen mú xúʼko̱ xaguáʼnííxu mbóoʼ dí ra̱májánʼ.

Maski ma xúʼko̱ nirígá, nguáná niraʼníí dí niʼni mamiñúxu. Ni̱jkhá gátaraʼa gajmuʼ Dennis Carrigan náa mbóoʼ xuajen dí gíʼ mijngii náa kúwáanʼxu. Nimbáa Testigo na̱nguá xtáa ikhí ga̱jma̱a̱ káaʼ mbóó nuthu ni̱jkua̱ gutaraʼaxu. Ikhí mbáa a̱ʼgu̱ nikruiga̱a̱nʼxu, niʼthí dí ni̱ndxu̱xu soldado británico, mbáa numuu dí na̱nguá ethaxu xó má ethi xa̱bu̱ Irlanda. Ra̱ʼkhá tháán nimiñuxu. Niku̱mu̱xu dí á mu nurajxinxu soldado gamíi makhañúxu o muxnuxu ga̱jma̱a̱ ajua̱nʼ. I̱ndó ikháanʼ nitrigáanxu̱ ruguáʼthi̱i̱n mbóoʼ autobús ga̱jma̱a̱ ra̱ʼkhá tháán migúwán eʼni. Ikhú ndi̱ya̱a̱xu dí mbóoʼ carro ni̱ʼkha̱nú náa naxtagojo̱o̱ café, ikhú a̱ʼgu̱ bi̱ niʼthí ga̱jma̱a̱ numuxu nigájnuu nitamijná gajmíi̱n ga̱jma̱a̱ ra̱ʼkhá tháán kiʼnáa eʼni ñawúunʼ náa katrigaanʼxu. Nda̱wa̱á xa̱bu̱ buʼko̱ mañu niguwáʼ gutsiji carro náa giáanʼxu ga̱jma̱a̱ nithuxu náa hora gagájnuu autobús. Índo̱ ni̱ʼkha̱nú autobús nigún gutamíjná gajmiún chofer, mú táʼngo̱o̱ gádxawuun dí nithi̱. I̱ndó ikháanʼ nijcháan nijkhuáaʼxu náa ikhí, ikhaa jngóo niku̱mu̱xu dí nindúún murawáanʼxu náa xuajen mu muniuxu mbóoʼ dí ra̱májánʼ, mú tárígá ma nimbá. Índo̱ nigájtaaʼ, ni̱thu̱u̱n chofer: “Ndiéjuunʼ ni̱tha̱a̱nʼ xa̱bu̱ bi̱ niratamíjná gajmiáanʼ”. Ikhaa niʼthúxu: “Xámiñalaʼ. Ni̱thu̱u̱n má tsáá nindxa̱la. Nda̱a̱ má dí gúgíʼníín”.

Náa mbóoʼ asamblea dí distrito a dí nirígá náa Dublín nákha tsiguʼ 1976, ikhí niniʼniiʼ Pauline Lomax, mbáa precursora especial bi̱ na̱ʼkha̱ náa Inglaterra. Ikhaa nindxu̱u̱ mbá ndxájulú bi̱ nambájxu májánʼ ga̱jma̱a̱ Dios, mbáa dxáʼgú wabaaʼ ga̱jma̱a̱ xnduʼwáa. Ikhaa ga̱jma̱a̱ ndxájuu bi̱ mbiʼyuu Ray, niniʼnuuʼ dí gajkhun asndu nákha majkhiinʼ. Mbá tsiguʼ nda̱wa̱á nidamíjnáxu, nikúwáanʼxu ruyambáá má xúʼko̱ xóo precursor especial náa Ballymena (Irlanda del Norte).

Mbayuuʼ nikuwáanʼ ruyambááxu xóo circuito náa Belfast, Londonderry ga̱jma̱a̱ náa i̱ʼwáʼ xuajen dí gamíi mi̱dxu̱ʼ. Ra̱ʼkhá tháán niniguxu dí a̱ngiu̱lú niguáʼdáá mbóoʼ fe gujkhuʼ ga̱jma̱a̱ niraʼwíí muniñaaʼ makuwíin ga̱jma̱a̱ munimbu̱ún xó má nijuiʼsngúún náa i̱ʼwáʼ religión, niniñaaʼ rawi̱ñu̱u̱ʼ kuyamijná mu muni̱ ñajuunʼ Jeobá. Nikujmaa kaʼwu dí ikhaa naʼni tsajkurámiinʼ wéñuuʼ ga̱jma̱a̱ nañewu̱u̱n.

Nikúwáanʼxu mbá 10 tsiguʼ náa Irlanda. Nákha 1981 nithuxu muʼguáxu náa clase 72 ndrígóo Galaad. Índo̱ nirámuxu náa escuela nixuʼmáanʼ muʼguáxu náa Sierra Leona (África Occidental).

Nikúwáanʼ gajmiúnxu mbáa 11 misioneros bi̱ ra̱ʼkhá tháán májánʼ a̱jkiu̱ún náa mbóoʼ guʼwá. Mbá xúgiáanʼ najmuxu̱ mbá cocina, ajtsú baño, a̱jma̱ náa nunaxu, mbá teléfono, mbá lavadora ga̱jma̱a̱ náa nujndooʼ xtíñúxu. Nángi eʼni ejkha̱ aguʼ ga̱jma̱a̱ náa xpóo guʼwá kajchún tsi̱jní, náa cuarto dí rígá awúu̱n ku̱ba̱ʼ natu̱ʼu̱u̱n a̱bu̱nʼ cobra.

Maski ajndu niʼniuxu̱ gakhi̱i̱ makuwáanʼ, mú ninigu̱xu̱ wéñuuʼ mutaráʼa. Xa̱bu̱ nduyamajkuíí Biblia  ga̱jma̱a̱ nudxawíín dí nutunxu̱. Mbaʼin ninigajmaa ga̱jma̱a̱ niguánú ninindxu̱ún Testigo. Xa̱bu̱ xuajen rúʼko̱ nixná mbiʼyuʼ “Tátá Robert”, Pauline nijuiʼtháán “Náná Robert”. Mu nda̱wa̱á nigíʼdu̱u̱ niñajunʼ itháán gajmíi̱n bi̱ náa sucursal, rúʼko̱ niʼni dí xágajnúʼ gátaraʼa wéñuuʼ. Ikhaa jngóo Pauline nigíʼdi̱i̱ nitháán “Náná Pauline”, ikhúún nijuiʼthunʼ “Tátá Pauline”. A̱ʼgiu̱ʼ nidxuu wéñuuʼ ga̱jma̱a̱ numuu rúʼko̱.

Mbaʼin a̱ngiu̱lú gíníi, mú Jeobá nixnúún dí ndiñún ga̱jma̱a̱ dí asndu na̱nguá guáʼthi̱i̱n (Mat. 6:33). Narmáʼáan a̱jkiu̱nʼ eʼni mbáa ndxájulú a̱ʼgu̱, bi̱ i̱ndó nigiʼdoo mbújkha̱a̱ mu makuiʼtsu gajmíi̱n e̱ji̱n mbiʼi rúʼko̱. Mú ikhaa nixnúu mbújkho̱o̱ mbáa ndxájulú bi̱ na̱nguá gíʼdoo mbújkha̱a̱ mu maʼtsi̱i̱ thanuu numuu dí nandoo kháñuun eʼni nandii malaria. Ikhaa má mbiʼi rúʼko̱ mbáa a̱ʼgu̱ ni̱jkhá gáʼyoo mu maxtígúu edxuu. Mbaʼa nuthu Jeobá nimbáñún a̱ngiu̱lú bugi̱.

Nikúwáanʼxu náa Sierra Leona mbá 9 tsiguʼ. Mú nda̱wa̱á nixuʼmáanʼxu náa Betel ndrígóo Nigeria, mbá sucursal mba̱a̱ wéñuuʼ. Ikhúún nini ikháá má ñájunʼ dí nini náa Sierra Leona, mú Pauline nixtiʼkhu̱u̱ kayuuʼ xóo nixtáa numuu dí nákha ginii naʼtáraʼa 130 hora mámbá igu̱nʼ ga̱jma̱a̱ bi̱ niʼsngúún nugíʼ nuni̱ dí nandoo Dios. Dí xúgi̱ xtáa náa mbóoʼ cuarto chíʼgíiʼ náa naʼxmíin xtíin xúgííʼ mbiʼi. Niʼñuu miʼskhaa maguʼun, mú nda̱wa̱á nijkhánú ndiʼyoo dí a̱ngiu̱lú nuxnaa wéñuuʼ númaaʼ ga̱jma̱a̱ xúgííʼ dí ikhaa naʼni, ikhaa jngóo niʼni xúgííʼ xó má eʼngo̱o̱ mu maxnún tsiaki̱i̱ eʼwíinʼ betelitas.

Mixtiʼkhu kayuuʼ ndi̱ya̱a̱xu̱ índo̱ ni̱jkuáxu náa Nigeria, ikhí ndiyóoʼ majmañuxu i̱mba̱ nuxi̱ʼ xóo makuwáanʼxu. Narmáʼáan a̱jkiu̱nʼ dí mbáa ndxájulú ni̱jkha̱ náa oficina ndrígóʼ mu maʼñuʼ presentar mbáa ndxájulú a̱ʼgu̱ bi̱ ndiʼkhún ni̱ʼkha̱nú náa Betel. Ikhúún nikruíyaʼ ñawúnʼ marajxi̱i̱, mu ikhaa nismbáti̱go̱o̱ náa rajkúʼ. Ra̱ʼkhá tháán niguanúʼ tsiánguá, mbá nacha̱ nirmáʼáan a̱jkiu̱nʼ dí naʼthí Hechos 10:25, 26 ga̱jma̱a̱ Apocalipsis 19:10. Nirajximína̱ʼ, “lá mathu̱u̱n xáʼ.” Mú nda̱wa̱á niku̱mu̱ʼ. “Á mu dí nitháán ma̱ʼkha̱ náa Betel, ndaʼyoo má dí naʼthí náa Biblia”.

Maski ajndu tániguʼ dí xúʼko̱ niʼni, mu niniminaʼ dí matamíjná gajmuʼ xó má eʼngo̱o̱. Ndiʼyáʼ mba̱yo̱o̱ itháán ndíjkha dí xúʼko̱ niʼni. Nijkhánú ndi̱yo̱o̱ dí xúʼko̱ káʼnii esngajma gamajkhu náa xuajen dí e̱ʼkha̱, raʼkháa dí muni̱ mba̱a̱ mbáa xa̱bu̱. Asndu xa̱bekha ma̱ngaa nuni̱ xúʼko̱ kaʼnii. Náa Biblia ma ma̱ngaa naʼthí dí xúʼko̱ káʼnii niguáʼníí  tikhuun (1 Sam. 24:8). ¡Ra̱ʼkhá tháán májánʼ dí táthu̱u̱n ndxájulú mbóoʼ dí maʼni gawúunʼ!

Niniʼniúunʼ mbaʼin a̱ngiu̱lú bi̱ niguáʼdáá mbóoʼ fe gujkhuʼ náa Nigeria. Mbáa dí ikhiin ninindxu̱u̱ Isaiah Adagbona. b Ikhaa nininuuʼ dí gajkhun asndu nákha dxámá, mú nda̱wa̱á nitháán dí gíʼdoo lepra, ikhaa jngóo nixuʼmaa maʼga gaxtáa náa kúwi̱i̱n bi̱ guáʼdáá nandii rúʼko̱, káaʼ mbáwíí ninindxu̱u̱ Testigo ikhí, maski má táʼndún guyáá numuu rúʼko̱, mú ikhaa nimbañúún mbá 30 xa̱bu̱ mani̱ndxu̱ún Testigo ga̱jma̱a̱ nigíʼ mbóo congregación ikhí.

Nixuʼmáaʼxu muʼguá guñambáá náa Betel dí rígá náa Kenia nákha 1996, mbayuuʼ eʼni dí na̱nguá nitangu̱ún náa xuajen rúʼko̱ asndu nákhá nitamíjná gajmuʼ migiuʼ. Náa Betel naguwáʼ gúyuxu changunʼ bi̱ mbiʼñún cercopiteco verde. Changunʼ buʼko̱ nuni̱ kúʼwúnʼ fruta a̱ngiu̱lú. Mbáa ndxájulú niniñuuʼ kapa̱ʼtha̱ ventana ndrígóo cuartiu̱u̱, índo̱ nitanga̱a̱ ndiʼyoo dí mbaʼin changunʼ katramíinʼ ra̱ʼphu̱ ganitsu dí niniñuuʼ. Ikhaa nigájnuu ragáyúu randxaʼwá, xúʼko̱ má nini̱ changunʼ ma̱ngaa, nigájnáa ragadijxiin radxaʼwa náa ventana numuu dí nimíñúún.

Nigíʼdi̱i̱ niyambááxu náa congregación dí nuthi ajngáa suajili. Táʼni ma mbayuuʼ dí nithu̱nʼ manújngoʼ maxna Estudio de Libro náa Congregación (dí xúgi̱ najmaʼnuuʼ xóo Najmañulúʼ ga̱jma̱a̱ numuu Biblia náa congregación). Numuu dí tséjmañuʼ májánʼ gáthá ajngáa rúʼko̱ ikhaa jngóo ndiyóoʼ manigajmaa wapháá mu xúʼko̱ ma̱ni̱ májánʼ graxe̱, tsékro̱ʼo̱ʼ nditháan dí eʼthí mbáa bi̱ tsériʼña̱a̱ ikháá kayuuʼ xó má eʼthí náa libro, nigáwíinʼ a̱jkiu̱nʼ dí tséjmún gátha májánʼ ajngáa rúʼko̱, mu xúʼko̱ a̱ngiu̱lú makru̱ʼu̱u̱n. Mú ikhiin niʼngu̱u̱n a̱jkiu̱ún kuyoʼ, ninindxu̱ún xa̱bu̱ wabiinʼ ga̱jma̱a̱ ninimíjna̱ makru̱ʼu̱u̱n dí nitha̱.

Ní táʼni mbá tsiguʼ nikúwáanʼxu náa Kenia. Nákha 1997 nithuxu muʼguáxu náa Betel dí rígá náa Brooklyn (Nueva York). Gejyooʼ nindxu̱u̱ mbóoʼ xuajen dí rígá mbújkha̱a̱ ga̱jma̱a̱ naʼni gakhi̱i̱ matraʼwíí xóo maraxtaa (Prov. 30:8, 9). Mú a̱ngiu̱lú bi̱ kúwíin gi̱i̱ ma̱ngaa nuni̱ ga̱jma̱a̱ kájxi̱ a̱jkiu̱ún ñajuunʼ Jeobá, najmún mbiʼi ndrígún ga̱jma̱a̱ dí guaʼdáá mu muñambáá náa ñajunʼ dí naguma náa xuajñuu ikhaa, raʼkháa dí maguaʼdáá itháán.

Náa xúgííʼ xuajen dí nijkhuáxu, niniʼniúunʼ a̱ngiu̱lú bi̱ guáʼdáá mbóoʼ fe gujkhuʼ: Maski ajndu nagiʼdu̱u̱n wéñuuʼ xa̱bu̱ náa Irlanda, náa África ngíná ga̱jma̱a̱ tsínguáʼ kúwi̱i̱n, náa Estados Unidos tséʼni gakhi̱i̱ wéñuuʼ ga̱jma̱a̱ numuu mbújkha̱a̱. Ra̱ʼkhá tháán edxu̱u̱ a̱jkiu̱u̱n Jeobá índo̱ ndaʼyoo dí xa̱bi̱i̱ nuraʼwíí maʼndún kuyáá tséʼniún asndu xkáʼnii má gaʼkhu kúwíin.

Tájyúuʼ kayuuʼ nijngoo mbiʼi, xó má naʼthí náa Job 7:6, ninújngoo “itháan nacha̱ ki xóo eʼba̱a̱n mbóoʼ ixi̱ náa nagi̱da̱ʼ gúmá”. Xúgi̱ kúwáanʼxu ruñambáá gajmiúxu̱ eʼwíinʼ xa̱bu̱ bi̱ gajkhun nandún kuyamíjna̱, náa Warwick (Nueva York), náa Guʼwá dí nuxna ikha xúgííʼ numbaaʼ. Ra̱ʼkhá tháán naniguxu ga̱jma̱a̱ naʼni maʼdxuxu dí muni̱ xó má eʼngo̱o̱ mu mumbayíí Jesucristo bi̱ nindxu̱u̱ Rey ndrígúlú, bi̱ nánguá má mbayuuʼ maʼni tsajkurámiinʼ bi̱ naguájun jmbu (Mat. 25:34).