YOMARA, Marcelo ga̱jma̱a̱ Hiver nindxu̱ún ajtsíin bi̱ kuyamijná bi̱ na̱nguá krui̱gu̱u̱n, kúwá náa mbóoʼ xuajen chíʼgíiʼ dí rígá náa Guatemala. Yomara nigíʼdu̱u̱ niʼnigajmaa Biblia gajmíi̱n Testigos, nda̱wa̱á a̱ngui̱i̱n nigíʼdi̱i̱ ninigajmaa mangiin. Mu nirígá mbá dí niraʼníí: Mbá nájtsíin na̱nguá ejmiin guraxnuu braille. Ikhaa jngóo bi̱ naʼsngúún mbá nájtsíin, ndiyóoʼ dí maguxnuu kutriga̱ ga̱jma̱a̱ texto dí na̱ʼkha̱ náa i̱yu̱lúʼ.

Ma̱ngaa niʼniún gakhi̱i̱ magún náa reunión numuu dí ndayóoʼ magún mbá 40 minutos mu maguánu náa Salón ga̱jma̱a̱ ikhiin na̱nguá xó magún ndajkuíin asndu ikhí. Ikhaa jngóo a̱ngiu̱lú bi̱ kúwá náa congregación niriyaʼ awan dí magún kudiin reunión. Ma̱ngaa índo̱ mbá nájtsíin nigi̱ʼdi̱i̱ ninújngún náa plataforma, a̱ngiu̱lú nimbañúún magida̱ʼ edxu̱ún dí muthi índo̱ ganújngún.

Nákha mayo 2019, bi̱ nindxu̱ún Testigo nigi̱ʼdi̱i̱ nini marigá reunión náa xuajñún, ga̱jma̱a̱ a̱jmi̱i̱n xa̱bu̱ gajmii bi̱ nindxu̱ún precursores regulares nigún gúyambáá ikhí. Xa̱bu̱ gajmii bugi̱ niriyaʼ awan dí musngúún muraxnuu ga̱jma̱a̱ muniraʼmáʼ braille, maski ajndu ikhiin mangiin na̱nguá ndiyáá xóo muni. Ikhaa jngóo nigún náa guʼwá dí rígá mbaʼa libro mu majmañún muraxnuu braille ma̱ngaa ninigajmaa mbuyáá xú káʼnii gándoo muni dí musngúún eʼwíinʼ.

Nguáthá gu̱nʼ nda̱wa̱á mbá nájtsíin bi̱ kuyamijná nijmiin niraxnuu braille ga̱jma̱a̱ rúʼko̱ nimbáñún mambájxuun itháán gajmiún Jeobá. a Yomara, Marcelo ga̱jma̱a̱ Hiver xúgi̱ nindxu̱ún precursores regulares ga̱jma̱a̱ Marcelo nindxu̱u̱ siervo ministerial. Náa xúgííʼ xmáná ikhiin guaʼdáá wéñuuʼ ñajuunʼ náa xuajñuu Jeobá. Nutaraʼa ga̱jma̱a̱ gagi dí asndu eʼwíinʼ nuni̱ xúʼko̱ ma̱ngaa.

Mbá nájtsíin nuxna̱a̱ wéñuuʼ númaaʼ xúgííʼ dí niʼni congregación ga̱jma̱á nindxu̱ún, ma̱ngaa rí xú káʼnii nisngajma gajkhun dí nindúún kuñún. Yomara naʼthí: “Asndu má nákha niniʼniúunʼ a̱ngiu̱lú, nisngajma gajkhun dí nindúún kuyuxu”. Ga̱jma̱a̱ Marcelo naʼthí: “Guáʼdiinxu bi̱ nambáxuxu májánʼ gajmiúxu náa congregación ma̱ngaa kúwáanʼxu náa kúwíin a̱ngiu̱lú bi̱ nandún kuʼyamijná ga̱jma̱a̱ kúwá mbá kambáxun náa xúgííʼ numbaaʼ”. Yomara gajmíi̱n a̱ngui̱i̱n nandún ga̱jma̱a̱ xúgííʼ a̱jkiu̱ún mbuyáá índo̱ gáʼga̱nú mbiʼi dí ma̱ndoo mbuyáá xú káʼnii Ku̱ba̱ʼ gáʼnii mitsaanʼ (Sal. 37:10, 11; Is. 35:5).