1. Aratá mbá xkri̱da, náá numuu rí gíʼmaa muʼnimbulú ikha rí naxná Jeobá.

 ATATSAʼWÁMINAʼ rí nindáti̱ga̱a̱n náa mbá xaxi̱. Ikhí gamíi mupha̱a̱ʼ xujkhúʼ xkawi̱i̱nʼ, iná mbiiʼ ga̱jma̱a̱ xúgíinʼ enii exu̱nʼ. Ma̱ngaa asndu gamíi majngrádáan’ itsí ga̱jma̱a̱ maxpátriga̱a̱n. Phú gajkhun dí maraxna̱a̱ núma̱aʼ a mu nataxkamaa mbáa bi̱ maʼtháanʼ náa mi̱dxu̱ʼ ga̱jma̱a̱ rí xágíʼnaa’ nimbá dí raʼkhí. Xóo xaxi̱ rúʼko̱, xúʼko̱ kaʼnii nindxu̱u̱ numbaaʼ náa kuwáánʼ. Rígá mbaʼa dí gamíi maʼni gachúu xóo nambájxulú gajmiúlú Dios. Ikha jngóo ra̱ʼkhá tháán májánʼ rí xtáa Jeobá bi̱ naxná májánʼ ikhulú. Ikhaa nindxu̱u̱ bi̱ naxná ikhulú mu xágíʼnulú dí ra̱májánʼ asndu muʼgua̱nú náa numbaaʼ nuxi̱ʼ náa makuwáanʼ kámuu mbiʼi.

2. Xú káʼnii exnúlú ikha Jeobá rá.

² Xú káʼnii exná ikhulú Jeobá rá. Náa Ajngá rawuunʼ, ma̱ngaa najmiuu xa̱bu̱ bi̱ nuxná ikha náa xuajñuu. Mbá xkri̱da, ikhiin nindxu̱ún “ñumbáá jmbii bi̱ májánʼ endxa̱ʼwáminaʼ” bi̱ nuxnulúʼ ganitsu rí na̱ʼkha̱ náa Dios rí nambáyulú muraʼwíí májánʼ dí muʼni (Mat. 24:45). Raʼkháa i̱ndó xa̱bu̱ bugi̱ nindxu̱ún bi̱ najmiuu Jeobá mu maxnulú ikha. Najmiuu ndxájulú circuito, ancianos bi̱ kúwá náa congregación bi̱ nuxnulúʼ tsiaki̱i̱ ga̱jma̱a̱ consejo rí nambáyulú maʼngulú náa xkujndu. Nuxnáa núma̱aʼ wéñuuʼ Jeobá rí naxnúlú ikha náa iwáá mbiʼi gakhi̱i̱ dí kuwáánʼlú. Xúʼko̱ ma̱ndoo mambáxulú má xúʼko̱ gajmiúlú ga̱jma̱a̱ mu̱ʼgua̱ náa kamba̱a̱ rí na̱jkha̱ kaguáanʼ mu makuwáanʼ.

3. Ndiéjunʼ gúʼnigajma̱a̱ náa artículo rígi̱ rá.

³ Maski ajndu xúʼko̱, mbáa nguáná maʼniulú gakhi̱i̱ muʼnimbulú ikha ndrígóo Jeobá, itháán índo̱ mbáa xa̱bu̱ aʼkhá naʼthúlú.  Náá numuu rá. Mbáa rí gúthulú, raʼkháa rúʼko̱ nindxu̱u̱ dí nandulúʼ muʼdxawíín mbiʼi rúʼko̱. O mbáa mundxa̱ʼwa̱míjna̱ rí consejo dí muxnúlú na̱nguá eyambáá wéñuuʼ, ikha jngóo xándoo ma̱ʼkha̱ náa Jeobá. Ikhú ma̱ndoo makumulú xú káʼnii Jeobá xtáa raxná ikha náa xuajñuu ga̱jma̱a̱ rí itháán májánʼ dí ma̱ndoo muʼni nindxu̱u̱ dí muʼnimbulú. Mu ma̱ndoo muʼni rígi̱, náa artículo rígi̱ mbuʼyáá ajtsú enii rí ma̱ndoo mambáyulú: 1) Xú káʼnii Jeobá nixná ikha náa xuajñuu nákha wajyúuʼ, 2) xú káʼnii exná ikha rí mbiʼi xúgi̱ ga̱jma̱a̱ 3) xú káʼnii gáguma tsajkurámáanʼ rí muʼnimbulú ikha ndrígóo.

XÚ KÁʼNII NIXNÁ IKHA JEOBÁ NÁA XUAJIN ISRAEL

4, 5. Xú káʼnii nisngájma Jeobá rí najmiuu Moisés mu maxnún ikha israelitas rá. (Atayáá xtiʼkhuu rí na̱’kha̱ náa timbá ináa.)

⁴ Jeobá nigíiʼ Moisés mu maguwíin israelitas náa Egipto ga̱jma̱a̱ nisngájmúún kaʼwu dí najmiuu Moisés mu xúʼko̱ maxnún ikha. Mbá dí ikhaa ninindxu̱u̱ du̱u̱n rí naxná ikhúún rí mbiʼi ga̱jma̱a̱ mbá aguʼ rí mbruʼun (Éx. 13:21). Moisés ni̱jkha̱ xó má na̱jkha̱ du̱u̱n ga̱jma̱a̱ rígi̱ niʼni dí muguánu náa lamáa Maña̱ʼ. Ikhú ra̱ʼkhá tháán nimíñúún israelitas nikumu̱ún rí nándáa náa magún, numuu dí náa inún rígá lamáa ga̱jma̱a̱ náa kidxu̱únʼ soldados egipcios. Nithi dí raʼkhí niʼni Moisés rí ni̱jkha̱ kagui̱i̱n ikhí. Mú, raʼkháa xúʼko̱ kaʼnii nindxu̱u̱, Jeobá nindxu̱u̱ bi̱ niʼni rí Moisés maʼga̱ kagui̱i̱n ikhí (Éx. 14:2). Nda̱wa̱á niʼni káwíin ga̱jma̱a̱ mbá milagro (Éx. 14:​26-28).

⁵ Náa mbá 40 tsiguʼ, Moisés nijkha kidxuuʼ du̱u̱n rí Dios nitsiji náa ku̱ba̱ʼ mijxooʼ mu maxnún ikha xa̱bi̱i̱. a Nguáná Jeobá naʼni rí du̱u̱n rúʼko̱ mawi̱ji̱ náa guʼwá xtugoo Moisés, mu xúʼko̱ xúgíinʼ ma̱ndoo mbuyáá (Éx. 33:​7, 9, 10). Asndu náa du̱u̱n rúʼko̱ Jeobá naʼtámíjná ga̱jma̱a̱ Moisés, nda̱wa̱á ikhaa naʼthúún xa̱bu̱ xuajin rí niʼthúu̱n Jeobá (Sal. 99:7). Ikha jngóo israelitas ndiyáá kaʼwu xú káʼnii Jeobá najmiuu Moisés mu maxná ikhúún.

6. Xú káʼnii nini̱ israelitas ga̱jma̱a̱ ikha ndrígóo Jeobá rá. (Números 14:​2, 10, 11).

⁶ Phú migíná nindxu̱u̱ dí mbaʼin israelitas na̱nguá ninimbu̱ún dí Jeobá nindxu̱u̱ bi̱ niraʼwíi Moisés mu maxná ikhúún (atraxnuu Números 14:​2, 10, 11). Numuu rí mbaʼa nuthu túnimbu̱u̱n kuyáá Moisés, ikha jngóo Jeobá tániñúúnʼ rí mataʼáán náa Ku̱ba̱ʼ rí nijuiʼthá makánún (Núm. 14:30).

7. Tsíin ninindxu̱ún bi̱ ninimbu̱ún ikha ndrígóo Jeobá rá. (Números 14:24; Atayáá xtiʼkhuu ma̱ngaa.)

⁷ Nikuwa tikhuun israelitas bi̱ ninimbu̱u̱n ikha ndrígóo Jeobá. Mbá xkri̱da, Jeobá niʼthí: “Caleb [...] niʼnimbo̱o̱ ga̱jma̱a̱ xúgíʼ a̱jkiu̱u̱n” (atraxnuu Números 14:24). Dios nini tsajkurámaaʼ ga̱jma̱a̱ asndu niniñuuʼ maraʼwíi náa mínaaʼ xuajin dí rígá náa Canaán maxtáa (Jos. 14:​12-14). Ikhaa má xóo Caleb, bi̱ niguwáʼ rakúwá itháán nda̱wa̱á náa israelitas niniñami̱jna̱ rí Jeobá maxnún ikha. Ikha jngóo, xúgíʼ mbiʼi rí nixtáa Josué, ndiyamajkuíí wéñuuʼ xa̱biya̱ bi̱ Jeobá nigíiʼ mu mariʼkuriyaaʼ Moisés mu mayéʼga edxu̱u̱ náa xuajin rúʼko̱ (Jos. 4:14). Ikha jngóo Jeobá niʼni tsajkurámiinʼ ga̱jma̱a̱ niniñuuʼ makuwá náa Ku̱ba̱ʼ rí niʼthí maxnún (Jos. 21:​43, 44).

8. Xú káʼnii Jeobá nixnún ikha xa̱bu̱ xuajñuu mbiʼi dí nikúwa reyes rá. (Atayáá xtiʼkhuu ma̱ngaa.)

⁸ Tsiguʼ nda̱wa̱á Jeobá nigruigi̱i̱n jueces mú muxnún ikha xa̱bu̱ xuajñuu. Itháan nda̱wa̱á índo̱ nikúwá reyes, nigruigi̱i̱n profetas mu muni̱ ñajuunʼ. Reyes bi̱ niguájun jmbu náa Dios nidxawíín consejo rí nixna profetas bugi̱. Mbá xkri̱da, rey David nigruigú ga̱jma̱a̱ xúgíʼ a̱jkiu̱u̱n rí nixprigúu profeta  Natán (2 Sam. 12:​7, 13; 1 Crón. 17:​3, 4). Rey Jehosafat niʼnimbo̱o̱ rí niʼthúu̱n profeta Jahaziel ga̱jma̱a̱ niʼni rí israelitas bi̱ kúwá náa Judá muguaʼdáá fe náa profetas ndrígóo Dios (2 Crón. 20:​14, 15, 20). Ga̱jma̱a̱ náa mbiʼi mingíjyúuʼ, rey Ezequías nindo̱ʼo̱o̱ profeta Isaías rí mambáyúu (Is. 37:​1-6). Mámbá índo̱ reyes nunimbu̱ún ikha ndrígóo Jeobá ikhaa naʼni tsajkurámiinʼ ga̱jma̱a̱ nañewu̱u̱n xa̱bu̱ xuajin (2 Crón. 20:​29, 30; 32:22). Nikujmaa kaʼwu xú káʼnii Jeobá nijmiuu profetas ndrígóo mu maxnún ikha xuajñuu. Mú mbaʼin reyes ga̱jma̱a̱ israelitas nini̱ gáʼdu̱u̱n (Jer. 35:​12, 15).

JEOBÁ NIXNÚN IKHA TIMBÍIN CRISTIANOS

9. Xú káʼnii nixnún ikha Jeobá cristianos nákha siglo timbá rá. (Atayáá xtiʼkhuu ma̱ngaa.)

⁹ Nákha siglo timbá, Jeobá nigruiga̱ congregación náa nigimbíin bi̱ ninindxu̱ún timbíin cristianos. Xú káʼnii nixnún ikha nákha ikhú náa xuajñuu xá. Nigíiʼ Jesús mu mayéʼga edxuu náa congregación (Efes. 5:23). Mú, gajkhun má dí Jesús na̱nguá niʼtáminaʼ ga̱jma̱a̱ mámbáa cristiano mu maʼthúún ndiéjunʼ gúni, ikhaa nijmiu apóstoles ndrígióo ga̱jma̱a̱ bi̱ kuya̱ edxu̱u̱ náa Jerusalén mu muxna ikha (Hech. 15:​1, 2). Ma̱ngaa náa mámbá congregación nitri̱gi̱i̱n bi̱ muyégun edxu̱u̱ mu muxnún ikha a̱ngiu̱lú (1 Tes. 5:12; Tito 1:5).

10. a) Xú káʼnii nindrigú cristianos bi̱ nikúwá nakha siglo timbáa ikha rí nikhánún rá. (Hechos 15:​30, 31.) b) Náá numuu dí tikhuun na̱nguá nindriguíin bi̱ Jeobá nigruigi̱i̱n mu muxnún ikha ga̱jma̱a̱ numuu dí nijuiʼtáriyaʼ asndu nakha wajyúuʼ rá. (Atayáá ma̱ngaa kúgumaʼá “ Ndíjkha dí tikhuun tsíñún gúyáá dí nakujmaa kaʼwu rá.”)

¹⁰ Xú káʼnii nindrigú ikha rí nikhánún cristianos bi̱ nikúwá nákha siglo timbá rá. Mbaʼin rí ikhiin ninimbu̱ún ga̱jma̱a̱ xúgíʼ a̱jkiu̱ún asndu nikúwá gagi ga̱jma̱a̱ numuu tsiaki̱i̱ rí nikhánún (atraxnuu Hechos 15:​30, 31). Rí xúgi̱, xú káʼnii eʼni Jeobá mu maxnún ikha xuajñuu rá.

XÚ KÁʼNI EXNÚLÚ IKHA JEOBÁ RÍ MBIʼI XÚGI̱

11. Aratá mbá xkri̱da xú káʼnii Jeobá nisngájma dí naxnún ikha xa̱bi̱i̱ dí mbiʼi xúgi̱.

¹¹ Rí mbiʼi xúgi̱, Jeobá naxnún ikha xuajñuu náa ajngáa rawuunʼ ga̱jma̱a̱ najmiuu a̱ʼdióo mu mayéʼga edxu̱u̱ náa congregación. Xú káʼnii eʼyáá rí najmiuu má xúʼko̱ xa̱bi̱i̱ mu muxnúlú ikha xá. Mbá xkri̱da gundxaʼwamíjna̱ rí nirígá nákha siglo diecinueve. Charles Russell gajmii  bi̱ numbáyíí nikru̱ʼu̱u̱n rí tsiguʼ 1914 magiʼdoo wéñuuʼ numuu náa Xa̱bu̱ Ñajunʼ ndrígióo Dios (Dan. 4:​25, 26). Xú káʼnii niguánu nikru̱ʼu̱u̱n rúʼko̱ xá. Rí munigajma̱a̱ profecías rí na̱ʼkha̱ náa Biblia, ga̱jma̱a̱ Jeobá má nimbáñún. Dí nirígá náa numbaaʼ nákha 1914 nisngájma rí gajkhun dí Xa̱bu̱ Ñajunʼ ndrígióo Dios nigíʼdúu niʼtáñajunʼ. Nirígá Timbá Guerra dí nirígá náa xúgíʼ tsu̱du̱u̱ Numbaaʼ ga̱jma̱a̱ nirígá nandii, gaʼxma ga̱jma̱a̱ ewiʼ (Luc. 21:​10, 11). Nakujmaa kaʼwu rí Jeobá nijmiuu xa̱bekha buʼko̱ bi̱ májánʼ a̱jkiu̱ún mu mumbayíí xuajñuu.

12, 13. Ndiéjunʼ rí nigumaa índo̱ nirígá Raga̱jma̱ Guerra náa xúgíʼ Numbaaʼ mu maxkajxi̱i̱n xuajñuu Jeobá mu mutaraʼa itháan ajngáa rí májánʼ xá.

¹² Gundxaʼwamíjna̱ ga̱jma̱a̱ numuu rí nirígá náa Ragajma Guerra náa xúgíʼ tsu̱du̱u̱ Numbaaʼ. A̱ngiu̱lú bi̱ kúwá náa guʼwá dí phú na̱ʼkha̱ ikha ninigajmaa ga̱jma̱a̱ numuu dí na̱ʼkha̱ raʼthí náa libro ndrígóo Apocalipsis 17:8 ga̱jma̱a̱ niguánu nikru̱ʼu̱u̱n dí xáʼkha̱ Armagedón nda̱wa̱á dí gájngoo Ragajma Guerra rí nirígá náa xúgíʼ tsu̱du̱u̱ Numbaaʼ, numuu rí maguánúu xóó mbiʼi mu majuitárúʼun itháán xa̱bu̱. Ikha jngóo xuajñuu Jeobá niraʼwíi rí mambaʼtoo Colegio Superior Bíblico de la Watchtower de Galaad b mu maʼniratiin misioneros mu magún gutaraʼa ga̱jma̱a̱ musngáa náa xúgíʼ numbaaʼ. Asndu náa xtáa rarígá guerra nixuʼmiin a̱ngiu̱lú, nigún mixtiʼkhu xuajin. Ma̱ngaa ñumbáá jmbii niʼthí dí marigá Curso en el Ministerio Teocrático c mu mambáñún publicadores musngáa itháán májánʼ. Rígi̱ niʼniratiin xa̱bi̱i̱ Jeobá ga̱jma̱a̱ rí gáʼkha̱ nda̱wa̱á.

¹³ Nandoo nduʼyáá kaʼwu rí Jeobá nixnún ikha xuajñuu nákha mbiʼi mingíjyúuʼ rúʼko̱. Asndu nákha niguámbá Ragajma Guerra rí nirígá náa xúgíʼ tsu̱du̱u̱ Numbaaʼ, xa̱bi̱i̱ Jeobá nindoo nitaraʼa náa mixtiʼkhu enii xuajin. Rúʼko̱ niʼni rí mbaʼin xa̱bu̱ niguánu muniʼniiʼ Jeobá ma̱ngaa rí xúgi̱ nandoo najuiʼtáraʼa náa xúgíʼ numbaaʼ.

14. Náá numuu rí gíʼmaa munimbulú ikha rí na̱ʼkha̱ náa Jeobá ga̱jma̱a̱ náa a̱ngiu̱lú bi̱ kuya̱ edxu̱u̱ rá. (Apocalipsis 2:1; Atayáá xtiʼkhuu ma̱ngaa.)

¹⁴ Rí mbiʼi xúgi̱, bi̱ nindxu̱ún Cuerpo Gobernante, nduyááʼ ikha ndrígóo Cristo, ikhiin nuni̱ asndu xó má naʼngo̱o̱ mu ikha  rí nuxna mambaníi ga̱jma̱a̱ rí xóo nandoo Jeobá ma̱ngaa Jesús. Ga̱jma̱a̱ ikhiin nuxuʼma náa inún a̱ngiu̱lú bi̱ nindxu̱ún circuito ga̱jma̱a̱ ancianos, mu xúʼko̱ ikhiin muthún a̱ngiu̱lú bi̱ kúwá náa congregación. d A̱ngiu̱lú bi̱ kaxtaʼwíin ga̱jma̱a̱ eʼwíinʼ ancianos kúwá náa “ñawún mújúunʼ” Cristo (atraxnuu Apocalipsis 2:1). Numuu rí nindxu̱ún xa̱bu̱ aʼkhá, ikha jngóo nguáná má najngawi̱i̱n, xó má nigíʼnuu Moisés, Josué ga̱jma̱a̱ apóstoles (Núm. 20:12; Jos. 9:​14, 15; Rom. 3:23). Mú Jesús, naxnúu ikha ñumbáá jmbii bugi̱ ga̱jma̱a̱ a̱ngiu̱lú ancianos, ikhaa ‹maxtáa ga̱jma̱a̱ nindxu̱ún asndu índo̱ gártumuu mbiʼi› (Mat. 28:20). Ikha jngóo kuaʼdáá mbaʼa numuu rí muʼnimbulú kuʼñúún a̱ngiu̱lú bugi̱.

RÍ NAMBÁYULÚ DÍ MUʼNIMBULÚ IKHA NDRÍGÓO JEOBÁ

15, 16. Ndiéjunʼ eʼsngúlú xkridún bi̱ nuniñamíjná rí maxnún ikha Jeobá rá.

¹⁵ Rí munimbulú ma xúʼko̱ ikha ndrígóo Jeobá nambáyulú asndu mbiʼi xúgi̱. Mbá xkri̱da, Andy ga̱jma̱a̱ aʼgiuu Robyn, nigímíjna munimbu̱ún ikha dí xáguaʼdáá wéñuuʼ (atayáá náa ragajma nota ndrígóo Mateo 6:​22, náa Biblia de estudio). Rúʼko̱ niʼni rí ma̱ndoo muñambáá náa nagumaa guʼwá. Ndxájulú aguʼ naʼthí: “Nikúwáanʼxu náa mbá guʼwá chíʼgíiʼ, ga̱jma̱a̱ mbaʼa nuthu na̱nguá niguáʼdááxu̱ náa muni̱ májáánʼ dí muphúxu. Mú ndiyóoʼ dí magujua dí naguwíi ga̱jma̱a̱ foto ga̱jma̱a̱ i̱ʼwáʼ dí gúʼdoo, maski má nigáwíinʼ a̱jkiu̱nʼ, mú nindoʼ mani̱ndxu̱ʼ xóo Sara, agiuuʼ Abrahán, ga̱jma̱a̱ dí xáʼyóoʼ matangu̱ún mayejxi̱ kidííʼ” (Heb. 11:15). Lá nikúwíin gagi ga̱jma̱a̱ numuu dí niraʼwíi muni̱ xá. Ikhaa naʼthí xóó: “Nikúwánʼxu̱ gagi wéñuuʼ numuu rí ndiʼyáá dí nixnán Jeobá dí itháan gíʼdoo numuu. Mámbá índo̱ nunixu ñajuunʼ Jeobá nindxu̱u̱ xóo kuwáanʼ ru̱ya̱a̱ xú káʼnii ganindxu̱u̱ rí maraxtaa náa numbaaʼ nuxi̱ʼ”. Xú káʼnii nikumu̱u̱ Andy rá. Ikhaa naʼthí: “Nda̱a̱ nimbá rí naʼni maraxtaa itháan gagi ki xóo rí matani̱ kájxi̱i̱ ñajuunʼ Jeobá náa marataráʼa”.

¹⁶ Ndiéjunʼ embáyulú rí muʼnimbulú má xúʼko̱ ikha ndrígóo Jeobá rá. Guʼyáá ga̱jma̱a̱ numuu mbáa ndxájulú bi̱ mbiʼyuu Marcia. Índo̱ niguámbóo escuela, nigíminaʼ maʼnimbo̱o̱ʼ consejo rí manidxu̱u̱ precursora (Mat. 6:33; Rom. 12:11). Ikhaa naʼthí: “Náa mbó universidad nithu̱nʼ muxnuʼ beca rí mbajyúuʼ a̱jkhu̱ tsiguʼ. Mú ikhúún nindoʼ ma̱ni̱ ñajuunʼ Jeobá, ikha jngóo niʼgíminaʼ mato̱ʼo̱ʼ náa mbá escuela  mu ma̱ndoo majmañuʼ mbó ñajunʼ ga̱jma̱a̱ xúʼko̱ ma̱ndoo mani̱ndxu̱ʼ precursora. Nindxu̱u̱ mbó dí ra̱ʼkhá tháan májánʼ dí niraʼwíi ma̱ni̱. Rí xúgi̱ nindxu̱ʼ precursora regular, ga̱jma̱a̱ horario ndrígóʼ nambáyúʼ mu ma̱ndoo mayambáá náa Betel ma̱ngaa ma̱ni̱ i̱ʼwáʼ ñajunʼ”.

17. Xú káʼnii imbo̱o̱ nambáyulú rí muʼnimbánii ikha ndrígóo Jeobá rá.

¹⁷ Náa xuajñuu Jeobá naxnúlú ikha rí ma̱ndoo muñewu̱nlú ga̱jma̱a̱ i̱ʼwáʼ rí gamíi maʼga kaguáanʼ mu mu̱ʼni̱ dí ra̱májánʼ náa iduu Dios. Ikha jngóo, rí muʼni ñajuunʼ Jeobá nambáyulú, ga̱jma̱a̱ naʼni dí makuwaanʼ itháan májánʼ ma̱ngaa rí tséʼni rí mundxaʼwamíjná dí ra̱májánʼ (1 Tim. 6:​9, 10). Ga̱jma̱a̱ rígi̱ naʼni dí makuwaanʼ itháan xawii mu mu̱ʼni̱ ñajuunʼ Jeobá. Nda̱a̱ imbo̱ʼ rí maʼni makuwaanʼ itháan gagi ga̱jma̱a̱ dí makuwáanʼ itháan tsímáá (atraxnuu Isaías 48:​17, 18). e

18. Náá numuu rí nandaaʼ matatsimbaʼ má xúʼko̱ ikha ndrígóo Jeobá rá.

¹⁸ Jeobá najmiuu má xúʼko̱ xa̱bi̱i̱ mu maxnún ikha a̱ngiu̱lú bi̱ kúwá náa guʼwá nagimbáanʼ índo̱ garigá majphú mbá gaʼkhu ma̱ngaa índo̱ gáʼtañajunʼ Xa̱bu̱ Ñajunʼ ndrígóo Dios mbá míi tsiguʼ (Sal. 45:16). Lá muʼnimbulú má xúʼko̱ ikha ndrígóo maski ajndu tségumaa rí ikháanʼ nandulúʼ rá. A mu nuʼnimbulú xúgi̱, xáʼniulú miʼskoo muʼnimbulú nda̱wa̱á. Ikha jngóo guʼnimbulúʼ má xúʼko̱ ikha dí na̱ʼkha̱ náa Jeobá, ga̱jma̱a̱ rí nuxnulú a̱ngiu̱lú bi̱ Jeobá ma nigruigi̱i̱n mu muñewu̱nlú (Is. 32:​1, 2; Heb. 13:17). Kuaʼdáá numuu mu muʼnimbulú kuʼyáá Jeobá bi̱ naxnúlú ikha, rí nambáyulú má xúʼko̱ mu makuwáanʼ kámuu mbiʼi.