Náa Biblia naʼthí dí Jeobá ma̱ndoo maʼtáriyaʼ dí marigá nda̱wa̱á (Is. 45:21). Gajkhun má tséʼthí xúgíʼ xú káʼnii naʼni, nguáná o nguátha nuthu naʼni. Numuu rí tséʼyáá xúgíʼ ga̱jma̱a̱ numuu rígi̱, ikha jngóo xándoo muʼthá mbájmbu xóo gáʼni. Mú rígá tikhuʼ rí nduʼyáá.

Jeobá naʼngo̱o̱ naʼni xúgíʼ, mú ikhaa naraʼwíi nguáná rí xáʼni. Ku̱ma̱ ndrígóo Jeobá tsétumuu, ikha jngóo ma̱ndoo maʼthí asndu ndiéjuunʼ má dí ikhaa nandoo (Rom. 11:33). Numuu rí ikhaa najmaa nañewu̱u̱n májánʼ dí naʼni, ma̱ngaa ma̱ndoo maraʼwíí rí tséʼyoo dí gárígá (atayáá ma̱ngaa Isaías 42:14).

Jeobá naʼni rí mambanúu dí nandoo. Xú káʼnii kajua̱a̱ ga̱jma̱a̱ rí naʼtáriyaʼ nda̱wa̱á rígi̱ xá. Náa Isaías 46:10 naʼthí: “Asndu nákha ginii, ikhúúnʼ natha dí marigá nda̱wa̱á ga̱jma̱a̱ asndu nákha tsiguʼ kidíiʼ, dí xóó tséjkha̱nú marigá. Ikhúúnʼ natha: ‹Rí niraʼwíí mani marigá má xúʼko̱, ga̱jma̱a̱ asndu biʼyáá má rí nandoʼ mani rí marigá›”.

Ikha jngóo mbá numuu nindxu̱u̱ dí Jeobá ma̱ndoo maʼtáriyaʼ dí marigá nda̱wa̱á, numuu rí ikhaa gíʼdoo tsiaki̱i̱ maʼni. Ikhaa tséyóo rí maʼga̱ gáʼyoo ginii, mu mbaʼyoo ndiéjuunʼ dí gárígá nda̱wa̱á, rí asndu xúgíʼ dí xóó tsérígá dí asndu xóo nirígá má gáʼni ga̱jma̱a̱ rí asndu xóo ndaʼyoo má wapháá xúgíʼ. Jeobá ma̱ndoo maraʼwíi ndiéjuunʼ dí marigá náa mbiʼi dí ikhaa naʼthí; ga̱jma̱a̱ índo̱ gáʼga̱nú mbiʼi rúʼko̱ ikhaa maʼni dí marigá (Éx. 9:​5, 6; Mat. 24:36; Hech. 17:31).

Ikha jngóo Jeobá najmuu ajngáa rígi̱, xóo “Dí xúgi̱ ma̱ni̱”, “ni̱ni̱” ga̱jma̱a̱ “nitha̱ má rí ma̱ni̱” mu maʼthí rí niʼni má tikhuʼ dí marigá nda̱wa̱á (2 Rey. 19:25; nota; Is. 46:11). Náa ajngáa hebreo, versículos rígi̱ nambríguii ga̱jma̱a̱ ajngáa “bi̱ naʼni daan” (Jer. 18:4). Xóo má mbáa xa̱bu̱ bi̱ naʼni daan, ma̱ndoo maʼga̱nú maʼni mbá rayaʼ, xúʼko̱ má Jeobá, ma̱ndoo maʼni mu xúʼko̱ mambanúu rí nandoo (Efes. 1:11).

Jeobá naniñuuʼ dí ma̱ndoo muraʼwíí dí mu̱ʼni̱. Ikhaa tséraʼwíí dí magíʼnuu mambáa xa̱bu̱ ga̱jma̱a̱ na̱nguá etsudíin xa̱bu̱ bi̱ nuni̱ rí májánʼ muni̱ mbá rí maʼga̱ kagui̱i̱n rí maʼni makhañún. Ikhaa naʼsngúlú ndiéjuunʼ kamba̱a̱ rí itháán májánʼ náa dí ma̱ndoo mu̱ʼgua̱ ga̱jma̱a̱ nda̱wa̱á naniñuuʼ dí mambáa maraʼwíí náa gáʼga̱.

Guʼyáá a̱jma̱ xkri̱da. Timbá, ga̱jma̱a̱ numún xa̱bu̱ bi̱ kúwá náa Nínive. Jeobá niʼthí rí xuajin rúʼko̱ maʼni gámbáa, numuu dí ra̱ʼkhá tháán ra̱májánʼ eni̱ xa̱bu̱. Mú ikhiin nitanga̱a̱ a̱jkiu̱ún, Ikha jngóo Dios “nitanga̱a̱ a̱jkiu̱u̱n dí niʼthí maʼni gajmíi̱n, ikha jngóo táʼni gámbíin” (Jon. 3:​1-10). Jeobá niriʼkhu̱u̱ dí niʼthí maʼni. Náá numuu rá. Numuu rí xa̱bu̱ bi̱ kúwá náa Nínive nidxawíín rí niʼthí Jeobá ga̱jma̱a̱ nitanga̱a̱ a̱jkiu̱ún.

Raga̱jma̱ xkri̱da, nindxu̱u̱ rí nijuiʼtáriyaʼ ga̱jma̱a̱ numuu Ciro, mbáa bi̱ maʼni káwíin judíos ma̱ngaa rí maʼtáñajunʼ rí maguma̱a̱ goʼwóo Jeobá (Is. 44:​26–45:4). Profecía rígi̱ nimbánuu ga̱jma̱a̱ numuu rey Ciro bi̱ xtáa náa Persia (Esd. 1:​1-4). Mú Ciro na̱nguá niʼni ñajuunʼ Dios bi̱ gajkhun. Ga̱jma̱a̱ nijmiuu Jeobá mu maʼnimbánuu rí nijuiʼtáriyaʼ, mú ma̱ngaa na̱nguá nitsudaa maʼni ñajuunʼ (Prov. 21:1).

Gajkhun má, rígá mbaʼa dí xóo ndayóoʼ mbuʼyáá. Bi̱ nindxu̱lú xa̱bu̱ tséʼngo̱o̱ gíkru̱ʼu̱lú kájxi̱ ga̱jma̱a̱ rí xóo nandxa̱ʼóo edxu̱u̱ ga̱jma̱a̱ xóo naʼni Jeobá, asndu má tsékru̱ʼu̱lú náá numuu dí naʼtáriyaʼ dí marigá nda̱wa̱á (Is. 55:​8, 9). Maski ajndu xúʼko̱, numuu rí nuniʼníilú Jeobá, rúʼko̱ naʼni mbuʼyáá dí ikhaa naʼni dí májánʼ, ga̱jma̱a̱ xúʼko̱ má dí naʼtáriyaʼ nda̱wa̱á ma̱ngaa.