1, 2. Ndiéjunʼ xkri̱da nambáyulú makru̱ʼu̱lú xú káʼnii ku̱mu̱u̱ Jeobá ga̱jma̱a̱ nduwaʼ rí nuthi ga̱jma̱a̱ numuu xá.

 ATATSAʼWÁMINAʼ rí mbáa bi̱ nandaaʼ xtayáá naʼthí mbá dí raʼkhí ga̱jma̱a̱ numaaʼ. Ikháán natayáá dí nindxu̱u̱ nduwaʼ, mú, tikhuun nunimbu̱ún ma̱ngaa nuthi má xúʼko̱, rúʼko̱ naʼni dí mudxawíín eʼwíinʼ. Xú káʼnii gákuma̱a̱ʼ rá. Phú gajkhun dí rígi̱ maʼni maxmiéjuaanʼ numuu rí natayáá dí xa̱bu̱ muthi dí raʼkhí ga̱jma̱a̱ numaaʼ. Lá ragájkhun ráʼ. (Prov. 22:1.)

² Xkri̱da rígi̱, ma̱ndoo mambáyulú mbuʼyáá xú káʼnii nikumu̱u̱ Jeobá índo̱ mbáa a̱ʼdióo niʼthí rí minduwaʼ ga̱jma̱a̱ numuu, ma̱ngaa niʼni gachúu mbiʼyuu. Eva niʼnimbo̱o̱ nduwaʼ rúʼko̱, rígi̱ niʼni dí timbíin xa̱bu̱ bi̱ nikúwá na̱nguá ninimbu̱ún kuyáá Jeobá. Ikha jngóo xúgiáanʼ nakiéʼkulu ga̱jma̱a̱ nakháñulú (Gén. 3:​1-6; Rom. 5:12). Nduwaʼ dí niʼthí Gixa̱a̱ náa ixi̱ ri̱ʼi̱ Edén niʼni rí maguaʼdáá xkujndu xa̱bu̱ náa xúgíʼ numbaaʼ, xóo rí nakháñún, guerra ga̱jma̱a̱ rí numíniiʼ. Phú gajkhun dí Jeobá nagawúunʼ ga̱jma̱a̱ numuu xúgíʼ nduwaʼ rúʼko̱ ga̱jma̱a̱ dí naʼni marigá. Mú Dios, tséʼni dí rúʼko̱ majmúuʼ, náa Biblia naʼthí rí nindxu̱u̱ mbáa “Dios gagi” (1 Tim. 1:11).

3. Ndiéjunʼ ñájunʼ kuaʼdáá rá.

³ Kuáʼdáá mbá ñajunʼ mitsaanʼ, ikhaa nindxu̱u̱ rí muʼni kaʼwii o mumbayíí mbiʼyuu Jeobá. Xú káʼnii gándoo guʼni rá. Rí muʼnimbulú xtángoo rígi̱: “Guni̱ mba̱a̱ mbiʼyuu Jeobá” (Sal. 113:1). Xú káʼnii guma rígi̱ rá. Rí muʼthálú rí májánʼ ga̱jma̱a̱ numuu, numuu rí kaʼwu mbiʼyuu. Lá na̱ʼkha̱ a̱jkia̱a̱nʼ ikháán  matani ráʼ. Guʼyáá mbá ajtsú numuu rí maxkajxáánʼ muʼni mba̱a̱ mbiʼyuu Dios ga̱jma̱a̱ xúgíʼ a̱jkiu̱lú.

GUʼNI RÍ MAʼDXUU A̱JKIU̱U̱N JEOBÁ

4. Náá numuu rí nadxuu Jeobá índo̱ nuʼni mba̱a̱ mbiʼyuu rá. Aratá mbá xkri̱da. (Atayáá ma̱ngaa xtiʼkhuu).

⁴ Jeobá nindxu̱u̱ Anu̱lú bi̱ xtáa mekhuíí ikhaa naniguuʼ rí muʼni mba̱a̱ mbiʼyuu (Sal. 119:108). Lá nandoo gáʼthúu̱n rúʼko̱ rí mbáa Dios bi̱ gíʼdoo xúgíʼ tsiakii ndayóoʼ rí mbáa xa̱bu̱ aʼkhá maʼni mba̱a̱ mbiʼyuu mu xúʼko̱ maxtáa májánʼ ga̱jma̱a̱ gagi ráʼ. Na̱nguá, mu ma̱ndoo makru̱ʼu̱lú májánʼ, gundxaʼwamíjna̱ rí mbáa dxáʼgú chíʼgíiʼ na̱ʼkha̱ kanuu náa anu̱u̱, ndayáraʼaa ga̱jma̱a̱ naʼthúu̱n: “¡Xóo mbiʼin wáa gákúwíin xóo ikháán xí papá!” Anu̱u̱ dxáʼgú nadxuu ga̱jma̱a̱ na̱jkha̱nú asndu náa a̱jkiu̱u̱n rí niʼthúu̱n. Náá numuu rá. Lá ga̱jma̱a̱ numuu rí ikhaa ndayóoʼ rí wáxióo maxnáa tsiakii rí maxtáa májánʼ xáʼ. Na̱nguá, ikhaa nindxu̱u̱ mbáa xa̱bu̱ nikhi̱i̱ nadxuu rí índo̱ wáxióo nandoo kaʼyoo ga̱jma̱a̱ naxnáa núma̱aʼ. Ma̱ngaa ndaʼyoo rí xóo nindxu̱u̱ xúgi̱, rúʼko̱ gaʼni rí maxtáa gagi índo̱ gikhi̱i̱. Xúʼko̱ má kayuuʼ, Jeobá nindxu̱u̱ mbáa xa̱bu̱ nikhi̱i̱ bi̱ ra̱ʼkhá tháán májánʼ a̱jkiu̱u̱n, nadxuu índo̱ nuʼni mba̱a̱ mbiʼyuu.

5. Ndiéjunʼ esngájma índo̱ nuʼni mba̱a̱ Jeobá rá.

⁵ Gixa̱a̱ niʼthí mbá minduwaaʼ rí naʼni marikulú. Ikhaa niʼthí: Nimbáa xa̱bu̱ xáwi̱ji̱ jmbu náa Dios ni má xaʼtambáyuuʼ mbiʼyuu índo̱ gáraʼnuu mbá tsáʼkhá. Numuu rí ikhaa naʼthí rí xúgíinʼ muniñaʼ Dios mu xúʼko̱ makuwá májánʼ (Job 1:​9-11; 2:4). Mu, Job bi̱ niwi̱ji̱ jmbu náa Dios nisngájma rí Gixa̱a̱ nindxu̱u̱ mbáa bi̱ naʼthí rí minduwaʼ. Ikháánʼlú rá. Índo̱ nuʼni mba̱a̱ Jeobá xúʼko̱ nusngajmá rí Gixa̱a̱ nindxu̱u̱ mbáa bi̱ naʼthí dí ragájkhun. Mambáa dí ikháanʼ kajkuáa ñawúunʼ rígi̱ ñajunʼ, rí muʼtámbáyíí mbiʼyuu Jeobá, ga̱jma̱a̱ rígi̱ muʼni rí maxtáa gagi á mu nuguajún jmbu náa ikhaa (Prov. 27:11).

6. Xú káʼnii gándoo gúʼyaridúún levitas ga̱jma̱a̱ rey David rá. (Nehemías 9:5.)

⁶ Bi̱ nandún kuyáá Dios nixkaxi̱i̱ a̱jkiu̱u̱n rí muni̱ mba̱a̱ mbiʼyuu ga̱jma̱a̱ xúgíʼ a̱jkiu̱ún. Rey David niʼnirámáʼ: “Atatsíñááʼ rí ikhúún ma̱ni̱ mba̱a̱ Jeobá, xúgíʼ a̱jkiu̱nʼ gaʼni mba̱a̱ mbiʼyuu” (Sal. 103:1). David ndiʼyoo májánʼ rí maʼni mba̱a̱ mbiʼyuu Jeobá nindxu̱u̱ ikháá má rí maʼni mba̱a̱ Jeobá. Rí muʼtá ga̱jma̱a̱ numuu mbiʼyuu, nuʼtá xóo mitsaanʼ cualidad ndrígóo ga̱jma̱a̱ rí mitsaanʼ rí niʼni. David nindoo rí mbiʼyuu Anu̱u̱ maʼni kaʼwu ga̱jma̱a̱ maʼni mba̱a̱. Niʼthí rí nindoo maʼni ga̱jma̱a̱ xúgíʼ a̱jkiu̱u̱n. Levitas mangiin nini xúʼko̱, nini̱  mba̱a̱ mbiʼyuu Jeobá, ga̱jma̱a̱ nithi rí asndu táʼkha̱ ajngáa xóo muthi mu muni̱ mba̱a̱ mbiʼyuu Jeobá rí kaʼwu (atraxnuu Nehemías 9:5). a ¡Ra̱ʼkhá tháán nixtáa gagi Jeobá índo̱ ndiʼyoo rí nini mba̱a̱ mbiʼyuu ga̱jma̱a̱ xúgíʼ a̱jkiu̱ún!

7. Xú káʼnii gándoo guʼni mba̱a̱ Jeobá náa nuʼtáraʼa ga̱jma̱a̱ náa ñajunʼ rí nuʼni mambáa mbiʼi rá.

⁷ Mangáanʼ ma̱ndoo muʼni mba̱a̱ Jeobá índo̱ nuʼthúún xa̱bu̱ ga̱jma̱a̱ mbiʼyuu, xó má májánʼ a̱jkiu̱u̱n. Rí phú nandulúʼ índo̱ nuʼthúún xa̱bu̱ rí magún kanuu náa ikhaa ga̱jma̱a̱ rí maguanúu maʼndún kuyáá xó má eyulú kuʼyáá ikháanʼ (Sant. 4:8). Nanigulúʼ musngajmúún xa̱bu̱ xóo mitsaanʼ cualidad ndrígóo rí naʼthí náa Biblia, xóo eyoo kaʼyulú, rí naniguuʼ marigá dí májánʼ, rí najmañuu ga̱jma̱a̱ rí gíʼdoo tsiakii. I̱mba̱ xóo ma̱ndoo muʼni mba̱a̱ Jeobá nindxu̱u̱ rí muʼni gagi a̱jkiu̱u̱n ga̱jma̱a̱ rí mbuʼyaridáá xó má eʼngo̱o̱ (Efes. 5:1). Índo̱ nuʼnilú, xa̱bu̱ nduyáá dí ikháanʼ nindxu̱lú mixtiʼkuáanʼ ki xóo iʼwíínʼ xa̱bu̱, mbáa rígi̱ maʼni murajximíjna̱ náá numuu (Mat. 5:​14-16). Mambá mbiʼi ma̱ndoo muʼthúnlu ikháanʼ náá numuu nuʼnilú xúʼko̱. Nda̱wa̱á, rígi̱ gaʼni rí xa̱bu̱ bi̱ gajkhun maʼndún majmañún muxuʼmamijná náa Dios. Índo̱ nuʼni mba̱a̱ Jeobá xígi̱ kaʼnii, nuʼni rí maxtáa gagi (1 Tim. 2:​3, 4).

NUʼNI RÍ MAʼDXUU JESÚS

8. Náa numuu rí Jesús nindxu̱u̱ mbá xkri̱da májánʼ bi̱ niʼni mba̱a̱ mbiʼyuu Jeobá rá.

⁸ Náa mbá xúgíʼ numbaaʼ nda̱wa̱a̱ imba̱a̱ bi̱ naniniiʼ itháán májánʼ Dios, mbáwíí A̱ʼdióo (Mat. 11:27). Jesús nandoo kaʼyoo májánʼ Anu̱u̱, ga̱jma̱a̱ niniñuʼ mbá májánʼ xkri̱da rí ma̱ndoo mbuʼyaridáá mu muʼni mba̱a̱ mbiʼyuu Jeobá (Juan 14:31). Índo̱ niʼtákáñuu Anu̱u̱ mbruʼun nákha xóo tsékháñuu niʼthí xígi̱ kaʼnii: “Ikhúúnʼ nixnu̱u̱n mbuyáá mbiʼyaaʼ” (Juan 17:26). Xú káʼnii niʼni xá.

9. Ndiéjunʼ xkri̱da nijmuu Jesús mu maʼthí xóo nindxu̱u̱ Jeobá rá.

⁹ Jesús raʼkháa índo̱ niʼthún xa̱bu̱ xú káʼnii mbiʼyuu Dios. Numuu rí judíos nduyáá má rígi̱. Ikhaa niʼthún “xú káʼnii nindxu̱u̱ Dios” (Juan 1:​17, 18). Mbá xkri̱da náa Escrituras Hebreas naʼthí rí Jeobá nagawíin a̱jkiu̱u̱n (Éx. 34:​5-7). Jesús niʼni rí mbaʼin xa̱bu̱ makru̱ʼu̱u̱n májánʼ rígi̱ índo̱ niʼthí xkri̱da ndrígóo ada̱ bi̱ nitanga̱a̱ a̱jkiu̱u̱n. Índo̱ nuraxnuu náa naʼthí rí anu̱u̱ niʼngo̱o̱ ndiʼyoo “na̱ʼkha̱ mitsínguánʼ” nigáyúu ni̱jkha̱ gátsijnuu ga̱jma̱a̱ ndiyaraʼa niʼni mba̱a̱ a̱jkiu̱u̱n kaʼyoo, nakujmaa kaʼwu xú káʼni nindxu̱u̱ Jeobá phú gajkhun rí nagawíin a̱jkiu̱u̱n (Luc. 15:​11-32). Jesús nimbáñun xa̱bu̱ mbuyáá xú káʼnii nindxu̱u̱ Jeobá.

10. a) Náá numuu nduʼyáá rí Jesús nijmuu mbiʼyuu Anu̱u̱, ga̱jma̱a̱ ndiéjunʼ nindoo rí mu̱ni̱ eʼwíinʼ xá. (Marcos 5:​19, atayáá ma̱ngaa xtiʼkhuu.) b) Ndiéjunʼ eyoo Jesús muʼni mangáanʼ rá.

¹⁰ Lá nindoo Jesús dí eʼwíinʼ ma̱ngaa majmúún nambiʼyuu Anu̱u̱ ráʼ. Xúʼko̱, numuu dí nákha ikhú nikúwíin bi̱ kuya̱ edxu̱u̱ náa i̱ʼwáʼ religión bi̱ nikumu̱ún rí mbiʼyuu Dios nindxu̱u̱ mitsúʼkháan ga̱jma̱a̱ ragíʼmaa majmuluʼ. Mú Jesús na̱nguá niniñuʼ dí ku̱ma̱ rúʼko̱, rí na̱nguá e̱ʼkha̱ raʼthí náa kiʼniraʼmáʼ maʼni rí xájmúún mbiʼyuu Anu̱u̱. Gundxaʼwámíjná índo̱ niʼni thanuu xa̱bu̱ bi̱ gíʼdiin giñánʼ xkawi̱i̱nʼ náa xuyuʼ náa mba̱a̱ʼ ndrígún gerasenos. Xa̱bu̱ ra̱ʼkhá tháán nimíñúún rí asndu ninda̱ʼa̱a̱ Jesús dí magajnáa ikhí (Mar.5:​16, 17). Mú, nákha Jesús xóo tsegájnaa, niʼthúu̱n xa̱bu̱ bi̱ niʼni thanuu rí maʼthúún eʼwíinʼ rí Jeobá niʼni  ga̱jma̱a̱ nindxu̱u̱, raʼkháa Jesús (atraxnuu Marcos 5:19). b Jesús bi̱ nindxu̱u̱ Rey ndrígúluʼ, ikhaa nandoo rí mangáanʼ muʼnilú xúʼko̱ rí muʼsngúún xa̱bu̱ bi̱ kúwá náa xúgíʼ tsu̱du̱u̱ numbaaʼ mbiʼyuu Jeobá (Mat. 24:14; 28:​19, 20). Índo̱ nuʼnilú xúʼkhíin, naʼni rí maxtáa gagi.

11. Ndiéjunʼ niʼthún xa̱bi̱i̱ Jesús rí muthi índo̱ gútakháñii Dios rá. Xó má eʼthí náa Ezequiel 36:​23, ndíjkha rí gíʼdoo numuu rá.

¹¹ Jesús ndiʼyoo májánʼ rí nandoo Jeobá, dí maguma kaʼwi̱i̱ mbiʼyuu xóo muʼtá, maguma kaʼwii xúgíʼ rí nduwaʼ rí niʼni gachúu mbiʼyuu. Ikha jngóo Jesús niʼsngúún xa̱bi̱i̱ rí mutajkáan. “Anu̱xu bi̱ xtaa mekhuíí, kaʼwu gáʼni mbiʼyaaʼ” (Mat. 6:9). Jesús ndiʼyoo rí ndaa imbo̱o̱ rí itháan gíʼdoo numuu ki xóo rígi̱ (atraxnuu Ezequiel 36:23). c Náa xúgíʼ rí nigumawíi ndawa̱a̱ i̱mba̱a̱ xóo Jesús mu maʼni kaʼwii mbiʼyuu Jeobá. Ndiéjuunʼ rí nini̱ tsu̱di̱i̱ xa̱bu̱ sia̱nʼ ndrígóo índo̱ nirtuwiin xá. Nithi rí niʼni gachúu mbiʼyuu Anu̱u̱. Ikhaa ndiʼyoo rí nda̱a̱ imbo̱o̱ aʼkhá rí itháán mbiʼ ki xó rígi̱. Nákha xóo tsirtuwiin ikhaa nixmiéjuunʼ má ga̱jma̱a̱ numuu rígi̱, numuu rí ndiʼyoo rí xúʼkhíin má gútháán dí nindxu̱u̱ aʼkhá rí niʼni. Mbáa ga̱jma̱a̱ numuu xúgíʼ rígi̱ niʼni rí ikhaa, ‹maʼgánú majmuu wéñuuʼ› (Luc. 22:​41-44).

12. Ndiéjunʼ niʼni Jesús mu maʼni kaʼwii mbiʼyuu Anu̱u̱ xó ma gíʼmaa rá.

¹² Jesús niʼngo̱o̱ a̱jkiu̱u̱n rí nini gínáa, nitha̱ wéñiiʼ, ga̱jma̱a̱ nini tsu̱di̱i̱ mu ma̱ndoo maʼni kaʼwii mbiʼyuu Anu̱u̱. Ndiʼyoo rí niʼnimbo̱o̱ kaʼyoo Anu̱u̱ ga̱jma̱a̱ ndaa nimbá rí ma̱ndoo maʼni mati̱yu̱u̱ʼ (Heb. 12:2). Jesús ndiʼyoo rí Gixa̱a̱ nindxu̱u̱ bi̱ xtáa raʼni gínáa (Luc. 22:​2-4; 23:​33, 34). Gixa̱a̱ nindoo rí Jesús maniñuuʼ rawi̱ji̱ jmbu náa Jeobá, mú na̱nguá niʼngo̱o̱; Jesús nisngájma kaʼwu, rí Gixa̱a̱ nindxu̱u̱ mbáa bi̱ minduwaaʼ ga̱jma̱a̱ Jeobá gíʼdiin xa̱bi̱i̱ bi̱ naguajún jmbu náa ikhaa, maski asndu nuraʼníí xkujndu mingíjyúuʼ.

13. Ndiéjunʼ gíʼmaa muʼni mu maʼdxuu a̱jkiu̱u̱n Rey ndrígiulúʼ rá.

¹³ Nandaaʼ rí Jesucristo bi̱ nindxu̱u̱ Rey ndrígia̱ʼ maxtáa gagi ráʼ. Atani̱ mba̱a̱ má  xúʼkhíin mbiʼyuu Jeobá ga̱jma̱a̱ atambáñúún iʼwíínʼ mu mbuyáá rí ikhaa nindxu̱u̱ mbáa Dios bi̱ gajkhun. Xúʼkhíin gatasngajmá rí natayaridáá Jesús (1 Ped. 2:21). Xó má ikhaa niʼni rí Jeobá maxtáa gagi ga̱jma̱a̱ nisngajmá rí Gixa̱a̱ nindxu̱u̱ sia̱nʼ ndrígióo bi̱ xkawiiʼ a̱jkiu̱u̱n ga̱jma̱a̱ minduwaaʼ.

GUMBAÑÚN XA̱BU̱ MAKÁWÍIN

14, 15. Ndiéjunʼ e̱jkha̱nú erígá índo̱ nuʼsngúún xa̱bu̱ rí gajkhun ga̱jma̱a̱ numuu Jeobá rá.

¹⁴ Náá numuu rí índo̱ nuʼni mba̱a̱ mbiʼyuu Jeobá numbañún xa̱bu̱ makáwíin rá. Numuu rí Gixa̱a̱ “nirugoo ku̱ma̱ ndrígún” bi̱ “tséni rí jmbu” (2 Cor. 4:4). Ikha jngóo, mbiʼin xa̱bu̱ nunimbún nduwaʼ ndrígóo Gixa̱a̱ nundxaʼwamíjná rí Dios ndawa̱a̱, ga̱jma̱a̱ xtáa mitsínguánʼ náa mámbáa rí ikháánʼlú, ma̱ngaa rí na̱nguá exmiéjunʼ kaʼyulú, nindxu̱u̱ mbáa Dios bi̱ ra̱májánʼ, ga̱jma̱a̱ naʼni ginii bi̱ ramíjíin asndu kámuu mbiʼi. Nduwaʼ rígi̱, i̱ndó nayambáá mu maʼni nduwiinʼ eʼwíinʼ xa̱bu̱ mu xágún kanuu náa Jeobá, ga̱jma̱a̱ rí maʼni gachúu mbiʼyuu ma̱ngaa rí nindxu̱u̱ mbáa bi̱ xkawiʼ a̱jkiu̱u̱n. Mú, índo̱ nuʼtáraʼa ga̱jma̱a̱ nuʼsngáa rí gajkhun ga̱jma̱a̱ numuu Ikhaa, nuʼni rí Gixa̱a̱ nindxu̱u̱ mbáa bi̱ naʼni nduwaʼ ga̱jma̱a̱ nuʼni mba̱a̱ mbiʼyuu Jeobá. Ndiéjunʼ e̱jkha̱nú erígá rá.

¹⁵ Kiʼsngáa ndrígóo Biblia rí nindxu̱u̱ gajkhun gíʼdoo wéñuuʼ tsiakii. Índo̱ nuʼsngúún xa̱bu̱ tsáá nindxu̱u̱ Jeobá ga̱jma̱a̱ xú káʼnii nindxu̱u̱, rígi̱ nañambáá wéñuuʼ. Mámbá índo̱ najmañún rí Gixa̱a̱ nindxu̱u̱ bi̱ nirugoo ku̱ma̱ ndrígún ga̱jma̱a̱ nduwaʼ ndrígóo, índo̱ ikhiin narmbáʼta̱a̱ idún ga̱jma̱a̱ nugíʼdi̱i̱ nduyáá Jeobá xóo mbáa Anu̱lú, xó má eʼyáá ikháánʼlú. Naguanún tsiánguá índo̱ nundxaʼwamíjna̱ ga̱jma̱a̱ numuu tsiakii ndrígóo (Is. 40:26). Náa xúgíʼ májánʼ rí naʼni, nambáñun mu xámíñún kuyáá (Deut. 32:4). Ra̱ʼkhá tháán nigúun muniʼnuuʼ xú káʼnii nindxu̱u̱ ku̱ma̱ ndrígóo (Is. 55:9; Rom. 11:33). Naʼni a̱jkiu̱ún índo̱ najmañún rí Dios nindxu̱u̱ ngajua (1 Juan 4:8). Índo̱ nagún kanuu náa Jeobá naguánu nduyáá rí ma̱ndoo makuwa kámuu mbiʼi ga̱jma̱a̱ maguanúu mani̱ndxu̱ún e̱ji̱i̱n. Lá ragájkhun rí gíʼdoo numuu rí mumbañún xa̱bu̱ mú magúun kanuu itháán mijngii náa Anu̱lú bi̱ xtáa mekhuíí ráʼ. Índo̱ nuʼni  xígi̱ káʼnii Jeobá ndaʼyulú xóo “bi̱ numbáyiixu” (1 Cor. 3:​5, 9).

16. Ndiéjunʼ e̱jkha̱nú erígá índo̱ najmañulú mbiʼyuu Dios rá. Aratá mbá xkri̱da.

¹⁶ Índo̱ nuʼtámíjná gajmiúlú mbáa xa̱bu̱ ga̱jma̱a̱ numuu Dios, mbáa ginii kayuuʼ nuʼsngáá rí mbiʼyuu Dios nindxu̱u̱ Jeobá. Á mu xa̱bu̱ májánʼ a̱jkiu̱u̱n, rígi̱ gaʼni dí mariʼkuminaʼ. Mbá xkri̱da, mbáa dxáʼgú bi̱ mbiʼyuu Alía d ikhaa ndi̱ja̱a̱ gajmíi̱n bi̱ kúwá náa goʼwóo náa mbá religión. Ikhaa na̱nguá xtáa tsímáá rí xóo nusngáá ni má tséku̱mu̱u̱ rí xtáa mijngii náa Dios. Mú, índo̱ niʼnigajmaa gajmíi̱n Testigos de Jeobá nixtiʼkhuu rí nijmañuu, asndu tsiánguá niguanúu índo̱ ndiʼyoo rí náa mbaʼa Biblia nixtiʼkhuu mbiʼyuu Dios ga̱jma̱a̱ xóo Señor. Índo̱ nijmañuu mbiʼyuu Dios, vida ndrígóo nixtiʼkhuu mbá kayuuʼ. Ikhú nigíʼdúu ndiʼyoo rí Dios nindxu̱u̱ xóo mbáa bi̱ nambájxu̱u̱ ga̱jma̱a̱, ikha jngóo niʼthí: “¡Bi̱ nambájxuʼ májánʼ gajmuʼ gíʼdoo mbiʼyuu!”. Ikha naʼthí: “Rí xúgi̱ xtáá tsímáá. Naku̱mu̱ʼ rí gúʼdoo numuʼ”. Steve nindxu̱u̱ mbáa bi̱ naʼdu̱u̱, ikhaa na̱ʼkha̱ náa mbá guʼwíin xa̱bu̱ bi̱ nindxu̱ún judío bi̱ nuñewamíjna̱ wéñuuʼ. Ndiʼyoo rí kúwá xa̱bu̱ bi̱ tsénimbáníí rí nusngáa. Ikha jngóo, niraʼwíí rí xáxtáa náa nimbáa religión. Mú, índo̱ mbáa bi̱ kaʼyoo nikháñuu, ikhaa niraʼwíí rí magiʼi índo̱ mbáa ndxájulú xtáa raʼsngáa ga̱jma̱a̱ numuu Biblia. Ikhaa naʼthí: “Nditháan na̱nguá eyoo xú káʼnii mbiʼyuu Dios”. Ga̱jma̱a̱ naʼthí xóó: “Mbá xúgíʼ mbiʼi rí xtáá ninindxu̱u̱ timbá aʼphu̱ rí ni̱jkhánú ndi̱yo̱o̱ rí Dios nindxu̱u̱ mbáa bi̱ gajkhun xtáa, ma̱ngaa ikhú ni̱jkhánú ndi̱yo̱o̱ rí nixkamaa mbáa bi̱ nambajxúʼ ga̱jmu̱ʼ”.

17. Náá numuu rí ikháán nandaaʼ matani mba̱a̱ má xúʼkhíin mbiʼyuu Jeobá rá. (Atayáá ma̱ngaa xtiʼkhuu.)

¹⁷ Índo̱ nuʼtáraʼa o nusngúún xa̱bu̱, lá nuʼthúún xú káʼnii mbiʼyuu Dios ga̱jma̱a̱ xú káʼnii nindxu̱u̱ xáʼ. Á mu nuʼni, kuwáanʼlu ru̱ʼni̱ mba̱a̱ mbiʼyuu. Ikha jngóo gumbáñún má xúʼkhíin xa̱bu̱ mu maguánú mbuyáá xú káʼnii nindxu̱u̱ Jeobá ga̱jma̱a̱ muʼni mba̱a̱ mbiʼyuu rí nindxu̱u̱ kaʼwu. Á mu nuʼni xúgíʼ rígi̱, muʼni káwíin xa̱bu̱, mbuʼyaridáá xkri̱doo Jesucristo bi̱ nindxu̱u̱ Rey ndrígulú, ga̱jma̱a̱ muʼni rí maʼdxuu a̱jkiu̱u̱n Jeobá xó má niʼthí bi̱ niʼniraʼmáʼ Salmo 145:2: Rí xúgiáanʼlú ma̱ndoo muʼthá: “Mani mba̱a̱ má xúʼko̱ mbiʼyaaʼ, asndu kámuu mbiʼi”.