Maski ajndu xúʼko̱ Jeobá nandoo dí ikháanʼlú muguáʼthi̱i̱n mbiʼi dí ikhaa nigíiʼ mu maʼni dí niʼthí. Náá numuu rí nandoo Jeobá rí muʼnilú rígi̱ rá. Ga̱jma̱a̱, ndiéjunʼ ma̱ndoo mambáyulú mu xándáti̱gu̱lú gagi índo̱ nuguáʼthi̱i̱n rá.

NÁÁ NUMUU RÍ NANDOO JEOBÁ RÍ MUGUÁʼTHI̱I̱N RÁ.

Guʼyáá dí eʼthí náa Biblia: “Jeobá naʼngo̱o̱ a̱jkiu̱u̱n nagi̱ʼthu̱u̱n mu mambáyala, ga̱jma̱a̱ matujxu̱u̱ mu magaʼwíínʼ a̱jkiu̱u̱n kaʼyala. Numuu rí Jeobá nindxu̱u̱ mbáa Dios bi̱ jmbii. Gagi kúwi̱i̱n xúgíin bi̱ nuguáʼthi̱i̱n ikhaa ga̱jma̱a̱ gagi” (Is. 30:18). Ajngáa rígi̱, Isaías niʼthúún judíos bi̱ tsénimbu̱u̱n (Is. 30:1). Mú, ma̱ngaa má nikúwi̱i̱n judíos bi̱ niguajún jmbu. Mbáa ajngáa rígi̱ nixnún tsiakii, mú asndu mangáanʼ naxnúlú tsiakii xúgi̱.

Náá numuu jngóo gíʼmaa muguáʼthi̱i̱n rá. Numuu rí Jeobá ma̱ngaa xtáa ragíʼthu̱u̱n. Ikhaa niraʼwíí má mbiʼi ga̱jma̱a̱ hora dí maʼnigámbáa numbaaʼ rígi̱, ga̱jma̱a̱ i̱ndó nagi̱ʼthu̱u̱n dí maʼga̱nú mbiʼi rúʼko̱ (Mat. 24:36). Índo̱ gáʼga̱nú mbiʼi rúʼko̱ makujmaa kaʼwu dí xúgíʼ dí niʼthí Gixa̱a̱ ga̱jma̱a̱ numuu Jeobá ma̱ngaa ga̱jma̱a̱ numulú ikháanʼ minduwaʼ nindxu̱u̱. Ikhú maxíyáa Gixa̱a̱ ga̱jma̱a̱ xa̱bi̱i̱. Mú Dios “magaʼwíínʼ a̱jkiu̱u̱n” kaʼñún xa̱bi̱i̱.

Mbáa índo̱ ikháanʼlú kúwáanʼ ruguáʼthi̱i̱n Jeobá xáʼni jngudi̱i̱ xkujndu ndrígulú. Mú ikhaa naʼthúlúʼ rí gajkhun ma̱ndoo makuwáanʼ gagi. Xó má niʼthí Isaías, ma̱ndoo makuwáanʼ gagi índo̱ nuguaʼthi̱i̱n dí nandulúʼ mambanúu (Is. 30:18). a Xú káʼnii rá. Guyáá a̱jkhu̱ enii rí ma̱ndoo muʼnilú.

XÚ KÁʼNI MA̱NDOO MAKUWÁAN GAGI ÍNDO̱ NUGUAʼTHI̱I̱N RÁ.

Guyáá rí májánʼ. Rey David ndiʼyoo mbaʼa dí ra̱májánʼ náa xúgíʼ mbiʼi dí nixtáa (Sal. 37:35). Maski ajndu xúʼko̱ ikhaa niʼnirámáʼ: “Wíí gátani̱ náa inuu Jeobá araʼthi̱i̱n ga̱jma̱a̱ gagi. Xákásnga̱ña̱a̱ʼ gáʼni xa̱bu̱ bi̱ nagájnuu májánʼ awan dí ra̱májánʼ dí naríyaʼ maʼni” (Sal. 37:7). Mínaaʼ David niʼnimbánuu consejo rígi̱. Xú káʼnii niʼnii rá. Ikhaa nindxaʼwámi̱na̱ʼ má xúʼko̱ rí Jeobá nikudaminaʼ mambáyúu. Ma̱ngaa nixnáa núma̱aʼ xúgíʼ dí niʼni Jeobá ga̱jma̱a̱ numuu (Sal. 40:5). Á mu mangáanʼ nundxaʼwamíjna̱ má xúʼko̱ numuu dí májánʼ  dí rígá, raʼkháa dí ra̱májánʼ, xáʼniulu mingíjyúuʼ muguáʼthi̱i̱n rí Jeobá maʼnimbánuu dí niʼthí maʼni.

Tséʼniuu ma náá, aratá dí májánʼ ga̱jma̱a̱ numuu Jeobá. Bi̱ niʼnirámáʼ Salmo 71, mbáa ninindxu̱u̱ David, niʼthúu̱n Jeobá: “Mú ikhúún, magúʼthu̱u̱n má xúʼko̱; mbayamajkuaaʼ itháan xóó” (Sal. 71:14). Ndiéjunʼ niʼni mu mbaʼyamajkuu rá. Naʼthúún eʼwíinʼ ga̱jma̱a̱ numuu Jeobá ga̱jma̱a̱ naʼniu ajmúú (Sal. 71:​16, 23). Mangáanʼ ma̱ndoo mbuʼyaridáá David ga̱jma̱a̱ mbuʼyamajkuíí Dios índo̱ nuʼtáraʼa, índo̱ nuʼthúún bi̱ numbájxulú gajmiúlú, bi̱ kúwíin náa guʼwúlú ga̱jma̱a̱ índo̱ nuʼni ajmúú dí naguwíi xuajñuu Dios. Ikha jngóo índo̱ ikháán gátani̱ ajmúú, atagíiʼ edxa̱a̱ʼ dí eʼthí ajmúú mu maxnáʼ tsiaki̱i̱. Xúgíʼ rígi̱ maʼni dí maraʼdáá gagi índo̱ naraʼthi̱i̱n rí Jeobá gáʼnimbánuu dí nikudaminaʼ maʼni.

Gambajxú gajmiúlú a̱ngiu̱lú mu muʼda̱a̱ tsiakii. Índo̱ David nigiʼdoo xkujndu, niʼthúu̱n Jeobá: “Náa inún bi̱ nuguajún jmbu náa ikháán, magúʼthu̱u̱n náa mbiʼyaaʼ” (Sal. 52:9). Xó má David ndiyáʼ mambajxúu gajmíi̱nʼ eʼwíinʼ xa̱bi̱i̱ Jeobá ga̱jma̱a̱ nixka̱ma̱a̱ tsiakii ikhí, mangáanʼ ma̱ndoo mambájxulú gajmíi̱n a̱ngiu̱lú náa reunión, náa nuʼtáraʼa o náa i̱ʼwáʼ náa mugimbumijná (Rom. 1:​11, 12).

Guʼyáá rí gajkhun mambanúu rí kuaʼti̱i̱n. Salmo 62:5 naʼthí: “Nagúʼthu̱u̱n Dios náa wíí, numuu dí náa Dios na̱ʼkha̱ dí nagúʼthu̱u̱n”. Gíʼdoo wéñuuʼ numuu dí mbuʼyáá dí gajkhun mambanúu dí kuáʼti̱i̱n, itháan ma á mu fin tse̱ʼkha̱ nacha̱ xó má eyulú ikháanʼ. Tséʼniuu nguáthá mbayuʼ guguaʼthi̱i̱n, gíʼmaa mbuʼyáá gajkhun dí Jeobá gáʼnimbánuu dí nikudaminaʼ maʼni. Ma̱ndoo mambáyulú á mu nuʼnigajmaa Ajngáa rawuunʼ Dios ga̱jma̱a̱ nuʼgíiʼ edxulú makru̱ʼu̱lú profecías, xú káʼni nimbánuu ga̱jma̱a̱ xú káʼni bi̱ niniraʼmáʼ ikha̱á ma xóo ethi, ma̱ngaa xúgíʼ dí eʼsngúlú numuu Jeobá (Sal. 1:​2, 3). Ma̱ngaa gíʼmaa muʼtájkháanʼ má xúʼko̱ Jeobá ga̱jma̱a̱ munda̱ʼa̱a̱ espíritu ndrígóo mu mambáyulú mambájxulú gajmíi̱n ikhaa, índo̱ ikháanʼ nuguáʼthi̱i̱n dí maʼnimbánuu dí nikudaminaʼ maxnúlú makuwáanʼ kámuu (Jud. 20, 21).

Xó má rey David, ma̱ndoo maʼni kañiiʼ a̱jkiu̱lú rí iduu Jeobá ndaʼñún bi̱ nuguáʼthi̱i̱n dí ikhaa maʼnimbánuu dí nikudaminaʼ maʼni ga̱jma̱a̱ dí ikhaa masngájmún ngajua rí tsétumuu (Sal. 33:​18, 22). Ikha jngóo, mu muguáʼthi̱i̱n ga̱jma̱a̱ gagi rí Jeobá nikudaminaʼ maʼni, gíʼmaa mbuʼyáá dí májánʼ, guʼthá numuu Jeobá, gambajxú gajmiúlú a̱ngiu̱lú ga̱jma̱a̱ guʼyáá rí gajkhun mambanúu rí kuaʼti̱i̱n.