BI̱ NINIRAʼMÁʼ Biblia, nguáná nijmún mbaʼa nuthu tikhuʼ mbá ajngáa. Náá numuu rá. Guʼyáá ajtsú rí nini xúʼko̱:

Nguáná nigumaraʼmáʼ. Mbaʼin israelitas na̱nguá kuaʼdáá mbá copia ndrígóo Xtángoo. Nagimbíi̱n mbá xúgíinʼ xa̱bu̱ mu mudxawíín rí nagixnuu, náa tebernáculo ga̱jma̱a̱ náa templo (Deut. 31:​10-12). Naʼni gakhi̱i̱ rí mugíʼ májánʼ edxu̱ún numuu rí naguájun mba̱yu̱u̱ʼ horas ga̱jma̱a̱ kúwá mbaʼin (Neh. 8:​2, 3, 7). Náa mbiʼi xóo rígi̱, rí mudxawíín mbaʼa nuthu ajngáa rí gíʼdoo numuu, xúʼko̱ tséʼniún gakhi̱i̱ dí marmáʼáan a̱jkiu̱ún ga̱jma̱a̱ rí mugíʼ muni̱. Ajngáa rí itháán natanga̱a̱ naʼthí mbaʼa nuthu nindxu̱u̱ xóo: Xtángoo ga̱jma̱a̱ kiʼtáñajunʼ, numuu rí gíʼdoo numuu ga̱jma̱a̱ mbaʼa rí e̱ʼkha̱ raʼthí ikhí (Lev. 18:​4-22; Deut. 5:1).

Xú káʼnii nigumaraʼmáʼ. Náa Biblia naʼni xó mbá 10% rí nindxu̱u̱ ajmúú, rígi̱ dí na̱ʼkha̱ náa libro ndrígóo Salmos, El Cantar de los Cantares ga̱jma̱a̱ Lamentaciones. Tikhuʼ ajmúú kagu̱ estribillo. Ajngáa rí na̱ʼkha̱ mbaʼa nuthu, rúʼko̱ nayambáá mu maʼthí má xúʼko̱ ga̱jma̱a̱ numuu edxu̱u̱ ga̱jma̱a̱ mu xúʼko̱ xáʼni gakhi̱i̱ magidaʼ edxa̱a̱ʼ. Mu ma̱ndoo mbuʼyáá, náa Salmo 115:​9-11 naʼthí: “Ikháán Israel, gakuma̱a̱ʼ xtayáá Jeobá. (Ikhaa mambáyáaʼ ga̱jma̱a̱ nindxu̱u̱ escudo ndrígáaʼ). Ikháán goʼwóo Aarón, gakuma̱a̱ʼ xtayáá Jeobá. (Ikhaa mambáyáaʼ ga̱jma̱a̱ nindxu̱u̱ escudo ndrígáaʼ). Ikháanʼ bi̱ namíñala kuya̱a̱ Jeobá, gakumala kuya̱a̱ Jeobá. (Ikhaa mambáyála ga̱jma̱a̱ nindxu̱u̱ escudo ndrígala).” Índo̱ mbáa naʼni ajmúú rígi̱, phú gajkhun dí nagidaʼ edxu̱u̱.

Náá numuu dí nigumaraʼmáʼ. Tikhuun natangiín nuthi mbaʼa nuthu, numuu rí gíʼdoo numuu ga̱jma̱a̱ nandún rí mbuyáá xa̱bu̱ rí gíʼdoo numuu. Mbá xkri̱da, nákha mbiʼi rí Jeobá niʼthúún israelitas rí xúphu̱ eʼdi, niʼni rí Moisés maʼthúún mbaʼa nuthu ga̱jma̱a̱ numuu xtángoo rígi̱. Dios nindoo rí xa̱bu̱ mikru̱ʼu̱u̱n májánʼ rí eʼdi nindxu̱u̱ vida ndrígu̱ún xúgíinʼ bi̱ nduya (Lev. 17:​11, 14). Mba̱yu̱u̱ʼ tsiguʼ nda̱wa̱á, índo̱ apóstoles ga̱jma̱a̱ bi̱ kuya̱ edxu̱u̱ náa Jerusalén nithi dí ragíʼma maguma á mu dí nandún muni̱ rí nanigu̱u̱ʼ Dios, nitangiín nithi dí ragíʼmaa mu̱ʼphu̱ eʼdi (Hech. 15:​20, 29).

Maski ajndu náa Biblia natanga̱a̱ naʼthí mbaʼa nuthu mbá ajngáa, mú raʼkháa rúʼko̱ eyoo gáʼthí dí Jeobá nandoo muʼthá kikháá, rí asndu maguʼwunlú gáʼni mbá ajngáa. Jesús niʼthí náa Mateo 6:7: “Índo̱ gáratajkáan, xárata kikháá ajngáa”. Ma̱ngaa niʼthí tikhuʼ dí ma̱ndoo muʼthá índo̱ nuʼtájkáan rí kajua̱a̱ ga̱jma̱a̱ rí nandoo maguma Dios (Mat. 6:​9-13). Maski ajndu índo̱ nuʼtákháñíí Jeobá, tséʼthá kikháá mbá ajngáa mbaʼa nuthu, mú ma̱ndoo muʼthán kikháá rí nandulú tséʼniuu má nguáthá nuthu (Mat. 7:​7-11).

¡Ra̱ʼkhá tháán májánʼ dí náa Biblia natanga̱a̱ naʼthí mbaʼa nuthu mbá ajngáa! Rígi̱ nindxu̱u̱ xóo naʼsngúlú Jeobá mu xúʼko̱ makuwáanʼ má májánʼ ikháanʼ (Is. 48:​17, 18).