1. Nguáná gágun mekhuíí xúgíinʼ bi̱ kaxtaʼwíin rá.

 MBAYUUʼ tsiguʼ, bi̱ nindxu̱lú xa̱bi̱i̱ Jeobá nuraximíjnalú: “Nguáná gágúun mekhuíí bi̱ kaxtaʼwíin bi̱ xóo naguanún rá.” Mbáa nindxa̱ʼwa̱míjna̱ mbá miʼtsú rí tikhuun bi̱ nixtaʼwíin maguma káwíin náa Armagedón ga̱jma̱a̱ makuwíin ga̱jma̱á nindxu̱lú nguáthá mbiʼi náa Ku̱ba̱ʼ mitsaanʼ. Náa i̱yi̱i̱ʼ La Atalaya rí nigájnuu 15 ñajunʼ gu̱nʼ julio tsiguʼ 2013 nijmañulúʼ rí xúgíinʼ bi̱ kaxtaʼwíin bi̱ naguanún xóó náa tsu̱du̱u̱ Ku̱ba̱ʼ magúun mekhuíí nákha xóo tségi̱ʼdu̱u̱ Armagedón (Mat. 24:31).

2. Ndiéjuunʼ graxe̱ dí ma̱ndoo muʼni, ga̱jma̱a̱ ndiéjuunʼ gúʼyáá náa artículo rígi̱ rá.

² Mbáa mbaʼin murajximíjna̱: Ndiéjunʼ gúgíʼníín “eʼwíinʼ mugiu̱u̱” Cristo bi̱ kúwá runi̱ ñajuunʼ Jeobá náa tsu̱du̱u̱ Ku̱ba̱ʼ índo̱ gagíʼdu̱u̱ ga̱ʼkhu̱ rí majphú mba̱a̱ rá. (Juan 10:16; Mat. 24:21.) Mbáa makuwíin tikhuun a̱ngiu̱lú bi̱ maku̱mu̱ún rí nándáa rí muni̱ o rí kúwá ndajkuíín numuu rí bi̱ kaxtaʼwíin nánguá kúwi̱i̱n náa tsu̱du̱u̱ Ku̱ba̱ʼ. Guʼyáá a̱jma̱ enii, rí raʼthí náa Biblia rí ma̱ndoo maguánú mundxa̱ʼwa̱míjna̱ xúʼko̱. Ma̱ngaa mbuʼyáá dí rígá mbaʼa numuu dí ragíʼmaa maxmiéjunlú.

RÍ XÁRÍGÁ

3, 4. Ndiéjunʼ gándoo guraximíjna̱ tikhuiin, ga̱jma̱a̱ náa numuu rá.

³ Tikhuun nundxa̱ʼwa̱míjna̱ á mu rí eʼwíinʼ mugu̱ muniñaaʼ rí gajkhun índo̱ bi̱ Cuerpo Gobernante nánguá makuwá náa tsu̱du̱u̱ Ku̱ba̱ʼ mu muxnúún ikha. Náá numuu rá. Guʼyáá a̱jma̱  xkri̱da rí naʼthí náa Biblia rí niʼniún mundxa̱ʼwa̱míjna̱ xúʼko̱. Timbá, ga̱jma̱a̱ numuu ndxajkun Jehoiadá, mbáa májáanʼ xa̱bi̱i̱ Dios. Ikhaa ga̱jma̱a̱ a̱ʼgiu̱u̱ bi̱ mbiʼyuu Jehosabeat, niñewa̱a̱n mbáa ada̱ bi̱ mbiʼyuu Jehoás ga̱jma̱a̱ nimbayíí, mu xúʼko̱ mani̱ndxu̱u̱ mbáa májáanʼ rey. Nákha Jehoiadá xtaa ndaʼya, Jehoás nixtáa mijngii náa Jeobá. Mú índo̱ Jehoiadá nikháñuu, ikhú nigíʼdúu raʼni dí ra̱májánʼ. Niniñuuʼ rí príncipes bi̱ xkawiiʼ a̱jkiu̱ún muxnáá consejo ga̱jma̱a̱ niniñuuʼ raʼni ñajuunʼ Jeobá (2 Crón. 24:​2, 15-19).

⁴ Rí ma’ni ragajma, ninindxu̱u̱ xkridún a̱ngiu̱lú bi̱ nikúwíin rí maʼni ragajma siglo. Juan, ninindxu̱u̱ iwáá apóstol bi̱ nikháñuu, niniñuuʼ mbá májánʼ xkri̱da náa mbiʼin a̱ngiu̱lú cristianos. Nimbáñun rí maguajún jmbu náa Jeobá (3 Juan 4). Ikhaa má xóo eʼwíinʼ apóstoles ndrígióo Jesús bi̱ niguájun jmbu, Juan ma̱ngaa nimbáñun a̱ngiu̱lú bi̱ kúwá náa congregación mú xáguma nduwiinʼ ga̱jma̱a̱ kiʼsngáa rí minduwaʼ (1 Juan 2:18 atayáá ma̱ngaa nota rí na̱ʼkha̱ náa Biblia de estudio náa 2 Tes. 2:7). Nda̱wa̱á rí Juan nikháñuu kiʼsngáa rí nduwaʼ nito̱ʼo̱o̱ xóo mbá virus náa congregación ga̱jma̱a̱ nguáthá tsiguʼ nda̱wa̱á a̱ngiu̱lú niguma nduwiinʼ ga̱jma̱a̱ kiʼsngáa rúʼko̱.

5. Ndiéjunʼ rí xándoo muʼthá nacha̱ ga̱jma̱a̱ numuu a̱jma̱ xkri̱da rígi̱ rá.

⁵ Lá magíʼnún xúʼko̱ kayuuʼ eʼwíinʼ mugiu̱u̱ Cristo índo̱ bi̱ kaxtaʼwíin gágun mekhuíí ráʼ. Muni̱ xó má Jehoás ga̱jma̱a̱ muniñaaʼ Jeobá xáʼ. Lá muni̱ xó má nigíʼnun mbaʼin cristianos bi̱ nikuwa rí maʼni ragajma siglo ga̱jma̱a̱ rí munimbu̱ún náa kiʼsngáa rí nduwaʼ xáʼ. ¡Na̱nguá! Nduʼyáálú gajkhun maski ajndu nánguá makuwa bi̱ kaxtaʼwíin náa tsu̱du̱u̱ Ku̱ba̱ʼ, mú bi̱ eʼwíinʼ mugu̱ muni̱ má xúʼko̱ ñajuunʼ Jeobá ga̱jma̱a̱ mixtiewu̱u̱n. Xú káʼnii eʼyáá rá.

RÍ XÓO NDUʼYAMAJKUÍÍ DIOS XÁGUMA GACHÍÍ

6. Ndiéjunʼ rí ajtsú enii gúʼyáá xúgi̱ rá.

⁶ Xú káʼnii eʼyáá rí xóo nduʼyamajkuíí Dios xáguma gachíí maski ajndu makuwáanʼ náa mbiʼi mingíjyúuʼ rá. Numuu rí náa Biblia naʼthí rí mbiʼi rí kuwáanʼ xúgi̱ nindxu̱u̱ mixtiʼkhu ki xóo mbiʼi rí nikúwíin israelitas ga̱jma̱a̱ cristianos bi̱ nikúwíin rí maʼni ragajma siglo. Ikha jngóo guʼyáá kuduun mbá ajtsú rígi̱: 1) Mbiʼi rí nikúwíin israelitas, 2) nda̱wa̱á rí nikháñún apóstoles, 3) “mbiʼi rí Dios maʼni májáanʼ xúgíʼ”, xó muʼthá mbiʼi rí kuwáanʼ xúgi̱ (Hech. 3:21).

7. Náá numuu rí takhanájkun israelitas bi̱ niguájun jmbu índo̱ eʼwíinʼ israelitas ga̱jma̱a̱ reyes nini dí raʼkhí rá.

⁷ Mbiʼi rí nikúwíin israelitas. Nákha xóo tsékháñuu Moisés niʼthúún israelitas: “Nda̱yo̱o̱ májánʼ dí nda̱wa̱á dí gákháñúʼ, ikháanʼla mu̱ni̱la dí ra̱májánʼ ga̱jma̱a̱ magajnúriyala náa kamba̱a̱ dí nikuʼmáanʼ muʼguala” (Deut. 31:29). Ma̱ngaa niʼthúún rí maʼga kiʼdiin i̱mba̱ níʼkhá á mu tsénimbu̱ún (Deut. 28:​35, 36). Lá nimbánuu rí niʼthí Moisés rá. Xúʼko̱, mbayuuʼ tsiguʼ reyes niraʼwi̱i̱ rí xúnimbu̱ún kuyáá Jeobá ga̱jma̱a̱ xúʼko̱ má nini̱ xa̱bu̱ xuajin mangiin. Ikha jngóo Jeobá niʼni rí mumíniiʼ bi̱ tsénimbu̱ún ga̱jma̱a̱ na̱nguá niniñuuʼ rí makuwíin itháán reyes náa xuajin Israel (Ezeq. 21:​25-27). Índo̱ ndiyáá xúgíʼ rígi̱ israelitas bi̱ niguájun jmbu, nixnún tsiakii (Is. 55:​10, 11).

8. Ndíjkha dí ragíʼmaa maʼniulú tsiánguá xóo niguma nduwiinʼ cristianos nákha raga̱jma̱ siglo rá.

⁸ Nda̱wa̱á rí nikháñún apóstoles. Xáʼniulu tsiánguá rí mbiʼi xúgi̱ dí cristianos bi̱ nikuwa rí maʼni raga̱jma̱ siglo niguma nduwiinʼ. Náá numuu rá. Numuu rí Jesús má niʼthí dí marigá kiʼsngáa minduwaʼ (Mat. 7:​21-23; 13:​24-30, 36-43). Apóstol Pablo, Pedro ga̱jma̱a̱ Juan nákha siglo timbá, nithi rí kiʼsngáa  nduwaʼ rí niʼthí Jesús nigíʼdúu má (2 Tes. 2:​3, 7; 2 Ped. 2:1; 1 Juan 2:18). Mú nda̱wa̱á rí nikháñuu iwáá apóstol, cristianos bi̱ nusngáa rí nduwaʼ niguánú ninindxu̱ún Babilonia rí majphú mba̱a̱ xóo muʼthá, náa phú naʼtáñajunʼ religión rí minduwaʼ. Xúʼko̱ ni̱jkha̱nú nimbánuu rí nijuiʼtáriyaʼ.

9. Xú káʼnii mixtiʼkhu nindxu̱u̱ mbiʼi, ki xóo nákha nikúwá israelitas ga̱jma̱a̱ rí maʼni raga̱jma̱ siglo rá.

⁹ “Mbiʼi rí Dios maʼni májáanʼ xúgíʼ”. Mbiʼi xúgi̱ nindxu̱u̱ mixtiʼkhu ki xóo mbiʼi dí nikúwíin israelitas ga̱jma̱a̱ rí maʼni raga̱jma̱ siglo, índo̱ kisngáa rí nduwaʼ nito̱ʼo̱o̱ náa congregación. Rí xúgi̱ xú káʼnii mbiʼyuu rá. Nuxna mbiʼíílú “iwáá mbiʼi” rí mambáa dí rígá náa numbaaʼ xkawiiʼ rígi̱ (2 Tim. 3:1). Náa Biblia naʼthí rí ikhaa má mbiʼi rúʼko̱ nigíʼdúu imbo̱o̱ rí itháán mbajyúuʼ ga̱jma̱a̱ rí gíʼdoo numuu. Ikhaa nagumbiʼyuu “mbiʼi rí Dios maʼni májáanʼ xúgíʼ” (Hech. 3:21). Nigíʼdúu na̱jkha̱ tsiguʼ 1914 ga̱jma̱a̱ mambáa índo̱ xa̱bu̱ ni xáguaʼdáá aʼkhá ga̱jma̱a̱ Ku̱ba̱ʼ maʼga̱nú mani̱ndxu̱u̱ mbá Ku̱ba̱ʼ mitsaanʼ náa maʼtá ñajunʼ Xa̱bu̱ Ñajunʼ ndrígóo Dios. Ndiéjunʼ niʼni májáanʼ Jeobá nákha tsiguʼ 1914 rá. Jesús nigíʼdúu nitañajunʼ mekhuíí ikha jngóo Jeobá nigiʼdaa mbu̱júu̱ mbá xa̱bu̱ ñajunʼ, mbáa bi̱ na̱ʼkha̱ náa rey David. Mú raʼkháa i̱ndó rúʼko̱. Nguáthá mbayuuʼ nda̱wa̱á, xóo nduʼyamajkuíí Dios nigi̱ʼdu̱u̱ niguma májáanʼ (Is. 2:​2-4; Ezeq. 11:​17-20.) Dí xúgi̱, lá maguma gachíí mbu̱júu̱ rá.

10. a) Ndiéjunʼ niʼtáriyaʼ Biblia ga̱jma̱a̱ numuu xóo nduʼyamajkuíí Dios dí mbiʼi xúgi̱ rá. (Isaías 54:17.) b) Náá numuu rí naxnúlú tsiakii kiʼtáriyaʼ dí na̱ʼkha̱ náa Isaías rá.

¹⁰ (Atraxnuu Isaías 54:17). a Mbuʼyáálú rí naʼthí náa profecía: “Tséʼniuu má ndiéjunʼ nindxu̱u̱ rí gátujxu̱u̱ ga̱jma̱á numaʼ, xáʼga̱nú marigá”. Versículo rígi̱ nambánuu rí mbiʼi xúgi̱. Ma̱ngaa xtaa raguma mbánúu ajngáa rígi̱: “Xúgíinʼ e̱jña̱a̱ʼ maʼsngúún Jeobá ga̱jma̱a̱ e̱jña̱a̱ʼ makuwíin tsímáá wéñuuʼ. Mariejún gújkhúʼ ga̱jma̱a̱ rí jmbu. [...] Nimbá xáʼni mamiñáanʼ ni má xárígá nimbá dí maʼni maguáʼáán, numuu dí rígi̱ xákuʼmaminaʼ náa ikháán” (Is. 54:​13, 14). Ni má “dios bi̱ xtáa náa numbaaʼ rígi̱”, Satanás bi̱ gíʼdoo tsiakii maʼni rí muniʼñááʼ ruʼsngúún xa̱bu̱ ga̱jma̱a̱ Biblia (2 Cor. 4:4). Kiʼsngáa rí gajkhun niguma kríyaaʼ. ¡Nditháan xáguma gachíí mbu̱júu̱! Ga̱jma̱a̱ nimbá ajua̱nʼ rí nuni̱ xa̱bu̱ numbaaʼ xáʼngo̱o̱.

 RÍ MARIGÁ

11. Xú káʼnii eʼyáá rí xáguanún ndajkuíín bi̱ mbaʼin xa̱bu̱ índo̱ xúgíinʼ bi̱ kaxtaʼwíin gágúun mekhuíí rá.

¹¹ Ndiéjunʼ gárigá índo̱ bi̱ kaxtaʼwíin gágun mekhuíí rá. Gármáʼáanʼ a̱jkiu̱lú dí Jesús nindxu̱u̱ baxtúu ga̱jma̱a̱ ikhaa kayá edxu̱u̱ náa congregación. Ikhaa mínaaʼ niʼthí: “Numuu rí mbáwíí xa̱bu̱ Ede̱ xtáa, ikhaa nindxu̱u̱ Cristo” (Mat. 23:10). Rey bi̱ naʼtáñajunlú nditháan xániñulú, maxtáa má xúʼko̱ rañewu̱nlú. Maxnún ikha cristianos bi̱ makuwá náa tsu̱du̱u̱ Ku̱ba̱ʼ, ga̱jma̱a̱ ikhiin xámíñún. Tséʼyáá ndiéjunʼ gáʼni Cristo ga̱jma̱a̱ numuu xuajñuu Jeobá mbiʼi rúʼko̱. Mú rígá tikhu xkri̱da rí na̱ʼkha̱ náa Biblia rí ma̱ndoo mambáyulú mu xámiñulúʼ, guʼyáá.

12. a) Xú káʼnii niñewu̱u̱n Jeobá xuajñuu nda̱wa̱á rí nikháñuu Moisés rá. b) Xú káʼnii niʼni nda̱wa̱á rí Elías ni̱jkha̱ i̱mba̱ níʼkhá rá. (Atayáá xtiʼkhuu ma̱ngaa.)

¹² Moisés nikháñuu, índo̱ israelitas nitu̱ʼu̱u̱n náa Ku̱ba̱ʼ rí nijuiʼthá makánún. Ndiéjunʼ rí nigíʼnuu xuajñuu Dios rá. Ndawa̱a̱ bi̱ maxná ikhúún, lá niguanún ndajkuíín xáʼ. Na̱nguá, Jeobá nixtáa ga̱jma̱á nindxúu̱n índo̱ ikhiin naguájun jmbu. Mbá xkri̱da, nákha xóo tsékháñuu Moisés, Jeobá niʼthúu̱n rí Josué mani̱ndxu̱u̱ bi̱ mayéʼga edxu̱u̱, mbáa xa̱bu̱ bi̱ niʼsngóo Moisés mbayuuʼ tsiguʼ (Éx. 33: 11; Deut. 34:9). Ma̱ngaa nikúwíin mbaʼin xa̱bekha bi̱ nijmañún bi̱ niyégún edxu̱u̱ náa mbá mil, cien, cincuenta, ga̱jma̱a̱ asndu gu̱wa̱ʼ (Deut. 1:15). Xuajñuu Dios kaxtiewa̱a̱n májánʼ. Ma̱ngaa kuaʼdáá xkri̱da, ndrígóo Elías. Mbayuuʼ tsiguʼ ikhaa nimbáñun israelitas rí mbuyamajkuíí Jeobá. Mú ni̱jkha̱nú mbá mbiʼi rí Jeobá nikuʼmaa náa imbo̱o̱ xuajin xígií náa sur ndrígóo Judá (2 Rey. 2:1; 2 Crón. 21:12). Lá niguanún ndajkuíín xa̱bi̱i̱ Jeobá bi̱ mbá gu̱wa̱ʼ tribus ndrígóo Israel ráʼ. Na̱nguá, numuu rí Elías nixtáa raʼsngóo Eliseo mba̱yu̱u̱ʼ tsiguʼ. Ma̱ngaa nimbáñún “e̱jñu̱ún profetas”, bi̱ mangiin nijuiʼsngúún (2 Rey. 2:7). Xó má ndiʼyáá kúwíin má xúʼko̱ xa̱bu̱ jmbiin bi̱ nimbáñún xa̱bi̱i̱ Dios. Ikha jngóo Jeobá xtáa raʼnimbánuu má xúʼko̱ rí naʼthí ga̱jma̱a̱ nañewu̱u̱n xa̱bi̱i̱ bi̱ naguajún jmbu

13. Ndiéjunʼ eʼthúlú Hebreos 13:5b rá. (Atayáá xtiʼkhuu ma̱ngaa.)

¹³ Xúgi̱ rí ndiʼyáá xkridún xa̱bu̱ bi̱ naʼthí náa Biblia, ndiéjunʼ ku̱ma̱a̱ʼ dí marigá índo̱ xa̱bi̱i̱ Jeobá bi̱ gawanún náa tsu̱du̱u̱ Ku̱ba̱ʼ índo̱ xúgíinʼ bi̱ kaxtaʼwíin gágúun mekhuíí rá. Xáʼyóoʼ maxmiéjunlú ga̱jma̱a̱ numuu rígi̱: Náa Biblia naʼthí kaʼwu rí Jeobá nditháan xániñátígáanʼ (atraxnuu Hebreos 13:5b). Xó ma nigíʼnuu Moisés ga̱jma̱a̱ Elías, a̱ngiu̱lú bi̱ kaxtaʼwíin bi̱  nuxna ikha náa xuajñuu Jeobá rí mbiʼi xúgi̱, nduʼyáá rí gíʼdoo numuu muʼsngúún eʼwíinʼ. Mbayuʼ má tsiguʼ a̱ngiu̱lú Cuerpo Gobernante nuni̱ rathiin eʼwíinʼ mugu̱ mu xúʼkhíin ma̱ndoo muxna ikha. Mbá xkri̱da, rígá escuela náa ma̱ndoo musngúún bi̱ kuya̱ edxu̱u̱, superintendente ndrígóo circuito bi̱ kúwá ruñambáá xóo Comité ndrígóo Sucursal, superintendentes ndrígóo Betel ga̱jma̱a̱ i̱ʼwáʼ. Mangiin a̱ngiu̱lú Cuerpo Gobernante kúwá runiratiin a̱ngiu̱lú bi̱ nuñambáá náa Comité ndrígún. A̱ngiu̱lú bugi̱ kúwá runi̱ májánʼ ñajunʼ, kijmaratiin májánʼ, ga̱jma̱a̱ kúwá má xawii mu mumbáñuun mugiu̱u̱ Cristo.

14. Ndiéjunʼ rí gíʼdoo numuu rí nijkhua̱nú ndiʼyáá rá.

¹⁴ Xúgíʼ dí kuwáanʼ najmañulú náa artículo rígi̱ naʼsngúlú dí itháan gíʼdoo numuu: Índo̱ bi̱ kaxtaʼwíin gágúun mekhuíí, índo̱ gáwámbá rí majphú mba̱a̱ ga̱ʼkhu̱, xa̱bi̱i̱ Jeobá makuwá ruyamajkuíí má xúʼko̱ náa tsu̱du̱u̱ Ku̱ba̱ʼ. Numuu rí Jesucristo ni̱ndxu̱u̱ bi̱ kayá edxu̱u̱, xa̱bi̱i̱ Jeobá nditháan xákáwabiinʼ. Gajkhun má dí mbiʼi ríʼkhíin murugui̱i̱n mbá nguéjmi̱i̱n xa̱bu̱ xkawiinʼ bi̱ náa Biblia naxnáa mbiʼñún Gog ga̱jma̱a̱ Magog (Ezeq. 38:​18-20). Mbiʼi dí gúrugui̱i̱n xáʼni ma mbayuuʼ ga̱jma̱a̱ xájmiin. Xáʼngu̱u̱n gúni̱ rí testigos muniñaaʼ ruyamajkuíí Dios. Jeobá má gámbáñún, náa mbá visión, apóstol Juan ndiʼñún “mbaʼin xa̱bu̱” bi̱ nindxu̱ún eʼwíinʼ mugiu̱u̱ Cristo ma̱ngaa nijuiʼtháán dí “mbaʼin xa̱bu̱” bugi̱ nikáwíin náa “majphú mba̱a̱ ga̱ʼkhu̱”. Nakujmaa gajkhun rí maguma káwíin (Apoc. 7:​9, 14).

15, 16. Xó má eʼthí náa Apocalipsis 17:​14, ndiéjunʼ guni̱ bi̱ kaxtaʼwíin índo̱ gáʼkha̱ Armagedón, ga̱jma̱a̱ ndíjkha rí naxnúlú tsiakii rígi̱ rá.

¹⁵ Mbáa murajximíjna̱: Bi̱ kaxtaʼwíin rá. Ndiéjunʼ gúni índo̱ gágúun xúgíinʼ mekhuíí xá. Náa Biblia naʼthí kaʼwu rí político bi̱ kúwá náa numbaaʼ rígi̱, “muxmijná gajmiún A̱ʼdá múgú”. Mú, ikhiin xáʼngu̱u̱n numuu dí “A̱ʼdá múgú maʼngo̱o̱”. Ga̱jma̱a̱ tsíin gumbáyíí mu maʼngo̱o̱ xá. Náa versículo naʼthí: “Ikhiin ni̱ndxu̱ún bi̱ watsaʼwúún, bi̱ niwaxtaʼwíin ma̱ngaa bi̱ jmbiin”. Xóo muʼthá, ikhiin nindxu̱ún bi̱ kaxtaʼwíin bi̱ magabiín (atraxnuu Apocalipsis 17:14). Rígi̱ eyoo gáʼthúu̱n, xúgíinʼ bi̱ kaxtaʼwíin bi̱ makuwa  mekhuíí, ñajunʼ dí majuixnúún ginii nindxu̱u̱ dí muxmijná. ¡Ra̱ʼkhá tháan nagui̱i̱ nindxu̱u̱! Tikhuun bi̱ kaxtaʼwíin ninigu̱u̱nʼ muxmijná nákha xóo tsénindxu̱ún testigos. Asndu tikhuun ninindxu̱ún soldado. Índo̱ niguánu niniʼniiʼ Jeobá ga̱jma̱a̱ ninindxu̱ún cristianos, niniñanʼ kidíiʼ xúgíʼ dí xkawiʼ ga̱jma̱a̱ nijmañún mani̱ndxu̱ún míjíinʼ xa̱bu̱ (Gál. 5:22; 2 Tes. 3:16). Índo̱ gakuwá mekhuíí, mumbayíí Cristo gajmíi̱n ángeles ndrígóo mu muni̱ gámbíin xúgíinʼ bi̱ nini̱ dí raʼkhí ga̱jma̱a̱ bi̱ taʼndun gúyaa Dios.

¹⁶ Gundxaʼwamíjna̱ ga̱jma̱a̱ numuu rígi̱: Tikhuun bi̱ kaxtaʼwíin bi̱ kúwíin náa tsu̱du̱u̱ Ku̱ba̱ʼ guanii má ga̱jma̱a̱ nánguá guaʼdáá tsiakii. Mú índo̱ gakuwá mekhuíí, mani̱ndxu̱ún espíritu ga̱jma̱a̱ maguaʼdáá tsiakii, magún guxmijná gajmiún Rey bi̱ gíʼdoo tsiakii bi̱ nindxu̱u̱ Jesucristo. Nda̱wa̱á índo̱ gájngoo guerra ndrígóo Armagedón, mumbañún xa̱bu̱ mu nánguá maguaʼdáá aʼkhá. Ikhiin mumbañún itháán a̱ngiu̱ún índo̱ gakuwá mekhuíí, ki xóo nákha kúwá náa tsu̱du̱u̱ ku̱ba̱ʼ xóo xa̱bu̱ aʼkhá.

17. Xú káʼnii eʼyáá rí xúgíinʼ xa̱bi̱i̱ Dios maguma káwíin índo̱ gáʼkha̱ guerra ndrígóo Armagedón rá.

¹⁷ Lá nindxa̱a̱ʼ bi̱ iʼwíínʼ mugu̱ ráʼ. Á mu xúʼko̱, ndiéjunʼ gátani̱ índo̱ gáʼkha̱ guerra ndrígóo Armagedón rá. I̱ndó rígi̱: Rí gakuma̱a̱ʼ xtayáá Jeobá ga̱jma̱a̱ atanimbáníí ikha rí naxná. Mbá rí ikhaa nindxu̱u̱ dí na̱ʼkha̱ raʼthí náa Isaías 26:20: “Ata̱ʼa̱ʼ náa awúu̱n guʼwáaʼ, ga̱jma̱a̱ índo̱ nita̱ʼa̱ʼ má atrugua̱a̱ xkrugua. Atarkaʼuminaʼ mbá xngaa asndu índo̱ gánújngoo rí nakiʼnún”. Naʼni̱i̱ a̱jkiu̱lú índo̱ nduʼyáá rí xúgíinʼ xa̱bi̱i̱ Dios bi̱ kúwá mekhuíí ga̱jma̱a̱ bi̱ kúwá náa tsu̱du̱u̱ Ku̱ba̱ʼ, maguma káwíin mbiʼi rúʼko̱. Xó má niʼthí apóstol Pablo, “ni xa̱bu̱ ñajunʼ, ni má dí rígá xúgi̱, ni má dí marigá nda̱wa̱á ma̱ndoo matsíngúlú náa ngajua rí gíʼdáánʼ Dios” (Rom. 8:​38, 39). Nditháan xámbumaaʼ rí Jeobá nandoo kaʼyaaʼ ga̱jma̱a̱ nditháan xániʼñátíga̱a̱n.