1. Xú káʼnii nindxu̱ún xa̱bi̱i̱ Jeobá bi̱ niguwáʼ rakúwá asndu nákha wajyúuʼ rá.

 LÁ NATAYÁÁ ikháán rí gíʼdoo numuu rí mambajxáaʼ ga̱jma̱a̱ Jeobá ráʼ. ¡Xúʼko̱! Raʼkháa i̱ndó ikháán. Asndu na̱jkha̱ wajyúuʼ nikumu̱ún xúʼkhíin (Sal. 104:​33, 34). Mbaʼin xa̱bu̱ nuni̱ tsiakimíjna̱ muniñaaʼ rí kúwíin runi̱ mu mu̱ni̱ ñajuunʼ Jeobá, xó má xkri̱da ndrígún nazareos bi̱ nikúwá náa Israel. Tsíín ninindxu̱ún ikhiin, ga̱jma̱a̱ ndiéjunʼ ejmañulúʼ ga̱jma̱a̱ numún xá.

2. a) Tsíín nindxu̱ún nazareos rá. (Números 6:​1, 2.) b) Ndiéjunʼ nixkajxi̱i̱n tikhuun israelitas mu mani̱ndxu̱ún nazareos rá.

² Ajngáa “nazareos” na̱ʼkha̱ náa hebreo rí nandoo gáʼthúu̱n “nini ñajuunʼ Jeobá xó má kaʼyoo”. Xó má israelitas bugi̱, nini̱ mbá tsiakii mu̱ni̱ ñajuunʼ Jeobá. Xó má naʼthí náa Xtángoo ndrígóo Moisés, niniñaaʼ rí xa̱biya̱ o a̱ʼgu̱ maxná ajngóo náa Jeobá rí maxtáa xóo nazareo a nguáthá mba̱yu̱u̱ʼ mbiʼi (atraxnuu Números 6:​1, 2). Índo̱ mbáa naxná ajngóo, ndayóoʼ rí maʼnimbo̱o̱ tikhuu xtángoo rí tikhuiin israelitas xáʼyóoʼ mu̱ni̱. Ndiéjunʼ exkajxi̱i̱ mbáa mu mani̱ndxu̱u̱ nazareo rá. Ga̱jma̱a̱ numuu dí ra̱ʼkhá tháán eyoo kaʼyoo Jeobá ma̱ngaa rí naxnáa núma̱aʼ numuu xúgíʼ rí naguma tsajkurámááʼ Jeobá (Deut. 6:5; 16:17).

3. Ndiéjunʼ mbríguáanʼlú gajmiúlú nazareos rá.

 ³ Índo̱ “xtángoo ndrígóo Cristo” niriʼkuriyaaʼ Xtángoo ndrígóo Moisés, ikhú xa̱bi̱i̱ Dios niniñaaʼ rí mani̱ndxu̱ún nazareos (Gál. 6:2; Rom. 10:4). Xó má nazareos, mangáanʼ nandulúʼ muʼni ñajuunʼ Jeobá ‹ga̱jma̱a̱ xúgíʼ a̱jkiu̱lú, ga̱jma̱a̱ xúgíʼ xóo nindxu̱lú ga̱jma̱a̱ xúgíʼ ku̱ma̱ ndrígulú› (Mar. 12:30). Xúgíʼ rígi̱, nuʼtháán Jeobá índo̱ nuxnájxi vida ndrígulú náa ikhaa. Mú ma̱ndoo muʼnimbáníí rí nixuʼdamíjna̱ muʼni, ndayóoʼ muʼni tsiakimijná muʼnimbáníí rí nandoo Jeobá. Mbuʼyáá xó enii bi̱ nazareos, xú káʼnii enimbáníí rí ajngún rí nixna ga̱jma̱a̱ xú káʼnii gambáyúlú xkridún mu muʼni mangáanʼ (Mat. 16:24). b

GÁKUWÁÁNʼLÚ XAWII MUNIʼÑÁAʼ TIKHUU

4. Xó ma eʼthí náa Números 6:​3, 4, ndiéjunʼ ndiyóoʼ muni̱ tsiakimijna bi̱ nazareos rá.

⁴ (Atraxnuu Números 6:​3, 4). Mbáa nazareo xándoo maga̱a̱n alcohol ni má muphu nimbá rí najma̱a̱ náa ixi̱ uva, xó má uva ga̱jma̱a̱ uva rí nijndoʼ. Mú iʼwíínʼ xa̱bu̱, xúgíʼ ganitsu rígi̱ ma̱ndoo mu̱phu̱ numuu rí na̱nguá má nindxu̱u̱ ra̱májánʼ, rí asndu náa Biblia naʼthí dí vino nindxu̱u̱ rí nimínáaʼ Dios ga̱jma̱a̱ “naʼni rí maʼdxuu a̱jkiu̱u̱n xa̱bu̱” (Sal. 104:​14, 15). Maski ajndu xúʼko̱, nazareos nunigaʼduunʼ ga̱jma̱a̱ xúgíʼ a̱jkiu̱ún rí xúphu̱ rígi̱. c

5. Ndiéjunʼ rí niraʼwíí maʼni Madián ma̱ngaa Marcela, ga̱jma̱a̱ náa numuu rá.

⁵ Xó má nazareos, mangáanʼ nuniʼñáánʼ ga̱jma̱a̱ xúgíʼ a̱jkiu̱lú tikhuu, mu xúʼkhíin ma̱ndoo muʼnilú itháán ñajuunʼ Jeobá. Guʼyáálú xkri̱doo Madián ga̱jma̱a̱ Marcela. d A̱ngiu̱lú bi̱ nidamijná bugi̱ kúwá náa Colombia, kúwá májánʼ. Madián nadaaʼ mba̱a̱ mbújkha̱a̱, kúwíin náa mbá guʼwá rí mitsaanʼ. Maski ajndu xúʼko̱, ikhiin nindúún mu̱ni̱ itháan ñajuunʼ Jeobá, mu ma̱ndoo muni̱ rígi̱, ndiyóo rí muniñaaʼ tikhu. Ikhiin nuthi: “Nánguá nitsixu itháan, ni̱jkuáxu gákuwáanʼ náa mbá guʼwá chíʼgíiʼ ga̱jma̱a̱ nigujua̱a̱ carriuxu”. Madián ga̱jma̱a̱ Marcela na̱nguá má nitsudiin mu mu̱ni̱ rígi̱, ikhiin nini, mu xúʼko̱ ma̱ndoo mutaraʼa itháán. Kúwá gagi ga̱jma̱a̱ tsímáá numuu rí niraʼwi̱i̱ rí mu̱ni̱ rígi̱.

6. Ndiéjunʼ rí nuniña̱a̱nʼ tikhuun cristianos rí mbiʼi xúgi̱ rá. (Atayáá ma̱ngaa xtiʼkhuu.)

 ⁶ Bi̱ nindxu̱lú cristianos nanigulúʼ rí muniʼñááʼ ruʼni tikhuu, mu xúʼko̱ ma̱ndoo maguaʼdáá itháán mbiʼi muʼni itháán ñajuunʼ Dios (1 Cor. 9:​3-6). Jeobá tséndu̱ʼu̱lú muʼni rígi̱, ga̱jma̱a̱ rí nuniʼñáanʼluʼ muʼni tikhuu na̱nguá má nindxu̱u̱ ra̱májánʼ. Mbá xkri̱da, tikhuun a̱ngiu̱lú nuni̱ gaʼduunʼ rí xáguaʼdáá mbá guʼwá májánʼ, mbá ñajunʼ o asndu rí xáguáʼdiin xujkhúʼ. Ga̱jma̱a̱ tikhuun a̱ngiu̱lú niraʼwi̱i̱ rí xúnigu̱nʼ o rí xáguáʼdiin e̱ji̱n nda̱wa̱á rí ninigúu̱nʼ o ninújunʼ má. Ga̱jma̱a̱ eʼwíinʼ nuraʼwi̱i̱ rí magún guñambáá náa ndayóoʼ itháán miʼtáraʼa, rígi̱ mbaʼyóoʼ makuwá mitsínguánʼ náa bi̱ kúwá náa guʼwún ga̱jma̱a̱ bi̱ nambájxu̱u̱n gajmiún. Mbaʼánʼ rí ikháanʼ nakuwáánʼlú xawii muʼni rígi̱, mu xúʼko̱ ma̱ndoo muʼnilú itháan ñajuunʼ Jeobá xó má eʼngo̱o̱. Ma̱ndoo mbuʼyáá gajkhun rí Jeobá nangajo̱o̱ xúgíʼ tsiakii rí nuʼni, tséʼniuu á mu mba̱a̱ o chíʼgíiʼ rí nuʼni ga̱jma̱a̱ numuu (Heb. 6:10).

NDAYÓOʼ RÍ XÁMIÑULÚʼ MU MANINDXU̱LÚ MIXTIʼKUÁANʼ

7. Ndiéjunʼ rí ma̱ndoo maʼniuu mingíjyúuʼ mbáa nazareo maʼni mbánúu ajngóo rá. (Números 6:5; atayáá ma̱ngaa xtiʼkhuu.)

⁷ (Atraxnuu Números 6:5). Xa̱bu̱ nazareos bi̱ nixnaxímíjná náa Jeobá, xándoo murujtu xtátsu̱u̱n edxu̱u̱. Xúʼkhíin nusngajma rí nduyamajkuíí xóo naʼtáñajunʼ Jeobá. Mbáa israelita bi̱ ninindxu̱u̱ nazareo mbayuuʼ mbiʼi naniñuuʼ mbaʼya xtátsiu̱u̱n rí asndu eʼwíinʼ mbuyáá. Á mu bi̱ kúwá mijngii numbáyíí, xáʼniún gakhi̱i̱ maʼnimbánuu rí nikudaminaʼ náa Dios. Mu ngíná wéñuuʼ ninindxu̱u̱, rí nirígá mbiʼi dí israelitas tséyamajkuíí ñajunʼ rí gíʼdoo mbáa nazareo. Mbá xkri̱da, nákha mbiʼi rí nixtáa profeta Amós, israelitas bi̱ nindxu̱ún apóstatas “nuxnún muwan vino” mu xúʼko̱ xúnimbaníí ajngún rí nixnaxímíjná náa Jeobá (Amós 2:12). Ikha jngóo, rí mani̱ndxu̱ún mixtiʼkuiin ikhiin ndayóoʼ rí xámíñún ga̱jma̱a̱ maguaʼdáá tsiakii.

8. Ndiéjunʼ rí ninigua̱a̱ʼ náa xkri̱doo Benjamin rá.

⁸ Jeobá mambáyulú mangáanʼ mu xámiñulúʼ rí manindxu̱lú mixtiʼkuáanʼ ki xóo iʼwíínʼ, maski ajndu kuaniáanʼ rí namíñulú. Guʼyáá rí nigíʼnuu Benjamin, mbáa Testigos bi̱ gíʼdoo 10 tsiguuʼ, bi̱ xtáa náa Noruega. Náa escuelóo niniriyaaʼ mbá ndxa̱a̱ náa nusngajmá rí numbayíí Ucrania ga̱jma̱a̱ numuu rí xtáa rarígá guerra. E̱ji̱n ndiyóoʼ rí muni̱ ajmúú ga̱jma̱a̱ mugíʼ xtíin, rí xóo color ndrígóo bandera dí rígá náa Ucrania. Benjamin mu xáʼga̱ ga̱jma̱a̱ xáʼni ajmúú, ndiyóoʼ rí mawiji̱ mitsínguánʼ. Mú, maestra ndiʼyoo ga̱jma̱a̱ niʼthúu̱n: “¡Ayi̱ ga̱jma̱á ni̱ndxu̱xu̱ʼ! ¡Nacha̱ kúwáanʼxu raguaʼtáán!”. Ikhaa támiñuu,  nijkha kanuu náa maestriuu ga̱jma̱a̱ niʼthúu̱n: “Ikhúún naguajún jmbu. Tséniriyaaʼ ndxa̱a̱ rí nuni̱ político ma̱ngaa. Mbaʼin Testigos de Jeobá kúwá náa guʼwá e̱jua̱nʼ ga̱jma̱a̱ numuu rí tségún guerra”. Ikhaa niʼdxaun rí nithi Benjamin ga̱jma̱a̱ niniñuuʼ má xúʼko̱. Mú, a̱ngui̱i̱n bi̱ naʼnigajmaa gajmíi̱n, nigíʼdi̱i̱ nirajxi̱i̱ náá numuu ikhaa tséʼni ajmúú, ma̱ngaa rí tséʼkha̱ náa ndxa̱a̱ rúʼko̱. Benjamin ra̱’khá tháán nimíñuu rí asndu nindoo gámbiyaaʼ, maski asndu xúʼko̱ ndiyáaʼ tsiakii ga̱jma̱a̱ niʼthún a̱ngui̱i̱n rí niʼthúu̱n maestriu̱u̱. Nda̱wa̱á niʼthúu̱n anu̱u̱ ga̱jma̱a̱ ru̱dúu̱, xú káʼnii Jeobá nimbáyúu mu maʼni gujkhuʼ fe ndrígóo.

9. Xú káʼnii guʼni rí maʼdxuʼ a̱jkiu̱u̱n Jeobá rá.

⁹ Índo̱ nuʼnimbulú kuʼyáá Jeobá xa̱bu̱ bi̱ nduyulú, nduyáá rí nindxu̱lú mixtiʼkuáanʼ. Mu mbuyulú rí nindxu̱lú Testigos de Jeobá náa nuñajunʼ o náa escuela, ndayóo’ rí xámiñulúʼ. Numuu rí xóo nuni̱ ga̱jma̱a̱ xóo nindxu̱ún xa̱bu̱, mambá mbiʼi mu̱ni̱ itháán dí ra̱májánʼ, ikha jngóo mambá mbiʼi maʼniulú gakhi̱i̱ muʼnimbánii ikha rí naʼthí náa Biblia ma̱ngaa rí muʼtáruʼun eʼwíinʼ xa̱bu̱ ajngóo Reino (2 Tim. 1:8; 3:13). Mu gíʼmaa marmáʼáan a̱jkiu̱lú rí muʼni rí maʼdxuu a̱jkiu̱u̱n Jeobá, a mu nindxu̱lú mixtiʼkuáanʼ ikháanʼ ki xóo xa̱bu̱ bi̱ na̱nguá eni̱ ñajuunʼ ikhaa (Prov. 27:11; Mal. 3:18).

GÚʼNILÚ GINII ÑAJUUNʼ JEOBÁ

10. Náá numuu rí naʼniún mingíjyúuʼ nazareos munimbu̱ún kiʼtáñajunʼ rí na̱ʼkha̱ náa Números 6:​6, 7 rá.

¹⁰ (Atraxnuu Números 6:​6, 7). Nazareos xándoo makuwá mijngii náa xa̱bu̱ bi̱ nikháñuu. Mbáa rígi̱ makujmaa rí na̱nguá má nindxu̱u̱ gakhi̱i̱, mu bi̱ nindxu̱ún nazareos nguáná naʼniún gakhi̱i̱ numuu rí índo̱ nakháñuu mbáa bi̱ kuyáá. Náa numuu rá. Numuu rí xóo naguʼwún nuni̱ xa̱bu̱ nakha ikhú, ndayóoʼ rí maxtáa mijngii mbáa náa bi̱ nikháñuu (Juan 19:​39, 40; Hech. 9:​36-40). Ikha jngóo nazareos nuniñanʼ runi̱ rí naguʼwún índo̱ nunimbáníí rí nuxuʼdamíjná. Numuu rí tsékúwiin náa nakháñun mbáa bi̱ kuyáá maski ajndu nindxu̱u̱ gakhi̱i̱, xúʼko̱ nusngajma rí guáʼdáá mbá fe gujkhuʼ. Mú, na̱nguá kúwá ndajkuíín ma̱ndoo mbuyáá kaʼwu rí Jeobá naxnún tsiakii rí ndañúun.

11. Ndiéjunʼ eyoo rí muraʼwíi muʼni índo̱ nuʼtámíjná gajmiúlú bi̱ kúwíin náa guʼwúlú rá. (Atayáá ma̱ngaa xtiʼkhuu.)

¹¹ Bi̱ nindxu̱lú cristianos rí nuxnáxímijna̱ náa Jeobá nduʼyáá rí gíʼdoo wéñuuʼ numuu. Rígi̱ nusngajmá índo̱ nuraʼwíí mbá rí muʼni ga̱jma̱a̱ xú káʼnii kúwáanʼ gajmiúlú bi̱ kúwíin  náa guʼwúlú. Numbáñún bi̱ kúwá náa guʼwúlú asndu xó má naʼngo̱o̱, mú tséʼni ginii rí nandún ikhiin ki xóo rí muʼni ñajuunʼ Jeobá (Mat. 10:​35-37; 1 Tim. 5:8). Mbáa nguáná maʼni miʼskhoo rí muʼni xóo nandún bi̱ kúwíin náa guʼwúlú índo̱ nandulúʼ muʼni ñajuunʼ Jeobá

12. Índo̱ Alexandru niraʼnuu xkujndu ga̱jma̱a̱ numuu a̱ʼgiu̱u̱, ndiéjunʼ rí niʼni ga̱jma̱a̱ rí táʼni xá.

¹² Guʼyáá xkri̱doo Alexandru ga̱jma̱a̱ a̱ʼgiu̱u̱ bi̱ mbiʼyuu, Dorina. Índo̱ naʼni má mbá tsiguʼ má kúwá runigajma̱a̱ Biblia. Dorina niraʼwíí rí maniñuuʼ raʼnigajma̱a̱, ma̱ngaa nindoo rí maniñuuʼ raʼnigajma̱a̱ Alexandru. Mú, ikhaa niʼthúu̱n ga̱jma̱a̱ májánʼ rí nandoo maʼniga̱jma̱a̱ má xúʼko̱. Nditháan tánigu̱u̱ʼ a̱ʼgiu̱u̱ ma̱ngaa nitsudaa rí maniñuʼ raʼnigajma̱a̱ Biblia. Alexandru niʼniuu gakhi̱i̱. Nguáná índo̱ Dorina natsíjmaa ga̱jma̱a̱ naʼniuu dí ra̱májánʼ, ikhú naku̱mu̱u̱ nánguá maʼngo̱o̱ itháán. Maski ajndu xúʼkhíin ikhaa nigíʼ niʼni ginii ñajuunʼ Jeobá ga̱jma̱a̱ nandoo kaʼyoo a̱ʼgiu̱u̱ ma̱ngaa ndaʼyamajkuu. Xkri̱doo, nixkajxi̱i̱ a̱ʼgiu̱u̱ mu matanga̱a̱ maʼniga̱jma̱a̱ Biblia mbu̱júu̱ ga̱jma̱a̱ magri̱gu rí gajkhun (atayáá video ndrígóo Alexandru ga̱jma̱a̱ Dorina Văcar: “Ngajua naʼngo̱o̱ a̱jkiu̱u̱n ga̱jma̱a̱ májánʼ a̱jkiu̱u̱n” náa níʼkhóo: “Rí gajkhun nariʼkhuu xóo kúwá xa̱bu̱” náa jw.org).

13. Xú káʼnii gándoo gusngajmá rí nandulúʼ kuʼyáá Jeobá ga̱jma̱a̱ bi̱ kúwíin náa guʼwúlú rá.

¹³ Jeobá niʼthí rí makuwíin mbáa guʼwíin xa̱bu̱, ga̱jma̱a̱ nandoo rí mbá guʼwíin makuwá tsímáá (Efes. 3:​14, 15). Á mu nandulúʼ makuwáánʼlú gagi, ndayóoʼ rí muʼni xó má eʼthí Jeobá ikhaa ndaʼyoo rí gíʼdoo wéñuuʼ numuu rí nuʼni tsiakimijna mu muʼni ñajuunʼ, ga̱jma̱a̱ rí muñewu̱u̱n bi̱ kúwíin náa guʼwúlú ma̱ngaa rí maʼndulú kuʼñúún ga̱jma̱a̱ rí mbuʼyamajkhúún (Rom. 12:10).

GUXNAMÍJNÁ TSIAKI̱I̱ MU MANINDXU̱LÚ XÓO NAZAREOS

14. Tsíín itháán gíʼmaa muxnún tsiakii rá.

¹⁴ Xúgiáanʼ bi̱ nandulúʼ muʼni ñajuunʼ Jeobá rí mbiʼi xúgi̱, ndayóo rí muniʼñááʼ tikhuʼ ga̱jma̱a̱ ngajua, mu nguáná naʼni gakhi̱i̱. Xú káʼnii gándoo guxnamíjná tsiakii mámbáa rí ikháánʼlú mu muʼni tsiakimijna muʼni ñajuunʼ Jeobá rá. Ga̱jma̱a̱ xóo nuʼthá (Job 16:5). Lá xtáa mbáa náa congregación ndrígáaʼ bi̱ tséyáʼ magiʼdoo wéñuuʼ mu maʼni itháán ñajuunʼ Jeobá ráʼ. Natatsiniiʼ mbáa dxámá o dxáʼgú náa escuela bi̱ tsémiñuu masngájma rí nindxu̱u̱ mixtiʼkuii náa a̱ngui̱i̱n, maski ajndu naʼniuu miʼskoo xáʼ. Lá narmáʼáan a̱jkia̱a̱nʼ eʼni mbáa ndxájulú o mbáa bi̱ naʼnigajma̱a̱ Biblia rí tsíñún gúyáá bi̱ kúwíin náa goʼwóo numuu  rí nawi̱ji̱ jmbu náa Jeobá xáʼ. Gajmulú májánʼ mbiʼi mu muxnún tsiakii a̱ngiu̱lú ga̱jma̱a̱ muʼthúún rí nandulúʼ kuʼñúún ga̱jma̱a̱ numuu tsiaki̱i̱ rí nuni̱ mu mu̱ni̱ ñajuunʼ Jeobá (Filem. 4, 5, 7).

15. Ndiéjunʼ enii tikhuun a̱ngiu̱lú mu mumbáñuun a̱ngiu̱lú bi̱ nuni̱ kájxi̱ ñajuunʼ Jeobá rá.

¹⁵ Mbáa nguáná ma̱ndoo mumbañún a̱ngiu̱lú bi̱ nuni̱ kájxi̱ ñajuunʼ Jeobá (Prov. 19:17; Heb. 13:16). Ikhaa rígi̱ rí niraʼwíí maʼni mbáa ndxájulú a̱ʼgú nikhi̱i̱ bi̱ xtáa Sri Lanka. Numuu rí nixnáá itháan mbújkha̱a̱ náa rí nuda xabuanii, niraʼwíí rí mámbáñún a̱jmi̱i̱n a̱ngiu̱lú wáʼxaʼ bi̱ naʼniún miʼskoo xóo makánún mbújkha̱a̱ bi̱ nindxu̱ún precursoras. Ikha jngóo, mámbá igu̱nʼ naríyaʼ chíʼgíiʼ mbújkha̱a̱ mú mámbáñún ga̱jma̱a̱ náa xóo muni̱ numáá teléfono. ¡Ra̱ʼkhá tháan májánʼ rí xóo niraʼwíí maʼni ndxájulú bugi̱!

16. Ndiéjunʼ eʼsngúlú xkri̱da ndrígún nazareos rá.

¹⁶ ¡Ra̱ʼkhá tháan mbaʼa rí nijmañulúʼ náa xkridún nazareos! Mú, ma̱ngaa nijmañulúʼ ga̱jma̱a̱ numuu Anu̱lú Jeobá, bi̱ xtáa mekhuíí. Ikhaa ndaʼyoo rí nuʼni ga̱jma̱a̱ xúgíʼ a̱jkiu̱lú rí naniguuʼ ga̱jma̱a̱ rí nuʼni tsiakimíjna̱ mu muʼnimbáníí ajngúlú rí nixnaximi̱jna̱ náa ikhaa. Ma̱ngaa naniñuuʼ rí ikháánʼlú musngajma rí nandulúʼ kuʼyáá wéñuuʼ (Prov. 23:​15, 16; Mar. 10:​28-30; 1 Juan 4:19). Xkri̱da ndrígu̱ún nazareos nasngájmulú rí Jeobá ndaʼyoo rí gíʼdoo wéñuuʼ numuu índo̱ nuʼni tsiakimijna muʼni ñajuunʼ. Ikha jngóo, guʼni má xúʼkhíin ñajuunʼ Jeobá ma̱ngaa guxnaximíjná ga̱jma̱a̱ xúgíʼ a̱jkiu̱lú muʼni ñajuunʼ ikhaa.